Dezembro

Kodi Yahova ana mphanvu yakulamusa anyakufa? Inde anayo! Bibliya limbalewa kuti iye ni “Wamphanvu-zentse.” (Apok. 1:8) Iye ana mphanvu za kukunda anyamadulanthaka ali-wentse kuphatanidzambo infa. (1 Ako. 15:26) Cinthu cinango comwe cimbatitsimikizira kuti Mulungu an’kwanisa kulamusa wanthu omwe adafa n’cakuti iye ana nzeru zakusaya malire. Iye ambadziwa madzina ya nyenyezi zentse. (Zai. 40:26) Ndipo iye ambakumbukirambo wanthu wentse omwe adafa. (Djob. 14:13; Luk. 20:38) Iye ambakumbukira bzinthu bzomwe munthu ali-wentse adacita pomwe akhanati kufa. Ifepano tingakhulupire kuti Yahova an’dzacita bzomwe adalewa bzakuti an’dzalamusa wanthu omwe adafa thangwe timbadziwa kuti iye akufuna ndipo ana mphanvu yakucita bzimwebzi. Thangwe linango lomwe limbatitsimikizira kuti Yahova an’dzalamusa wanthu omwe adafa ndakuti: Iye adalamusa kale wanthu m’mbuyomu. M’mbuyomu iye adapasa mphanvu wanthu wakukhulupirika kuphatanidzambo Jezu kuti alamuse wanthu wakufa. w23.04 9-10 ¶7-9

Tikafotokozera anzathu bzomwe timbakhulupira mwakuderekha na mwakugwa mpfuwa iwo an’dzakhala wakukonzeka kutitetekera ndipo tin’dzapitiriza kuceza nawo. Tsono munthu omwe tikuceza nayeyo akakhala na cakulinga cakufuna kupopotezana nafe, ifepano tin’funika lini kupitiriza kuceza naye. (Mim. 26:4) Koma wanthu azinji ambakhala lini na cakulinga cimweci, ndipo iwo ambakhala wakukonzeka kutitetekera. Kulewa cadidi, ifepano tin’dzagumana phindu kwene-kwene tikacita nyongo ya kukhala wakuderekha. Pembani kwa Yahova kuti akupaseni mphanvu kuti mupitirize kukhala wakuderekha pomwe mukubvunzidwa mibvunzo ayai wanthu akukunyozani. Kumbukirani kuti mukakhala munthu wakuderekha mungacitise kuti kusiyana makumbukidwe kuleke kubweresa bvuto. Ndipo kuderekha kwanu na mitawiro yanu yakugwa mpfuwa bzin’dzacitisa kuti wanthu omwe akukutetekeraniwo acinje momwe iwo akhakuwonerani na momwe ambawonera cadidi ca m’Bibliya. “Nthawe zentse khalani wakukonzeka kuti mutawire munthu ali-wentse omwe an’kubvunzani” bza cikhulupiro canu, “ndipo citani bzimwebzo mwakubzicepesa na ulemu bukulu.” (1 Ped. 3:15) Ndipopa citani ciri-centse kuti mukhale wakuderekha! w23.09 19 ¶18-19

Mbatiwoneni njira zinai za momwe tingalatizire kupirira. Yakuyamba, munthu wakupirira ambacedwa kukalipa. Iye ambakhala wakugwa mpfuwa ndipo ambatcenkha kubwezera akanyosedwa. (Eki. 34:6) Yaciwiri, munthu wakupirira ambadikhirira mwakugwa mpfuwa. Cinthu comwe akhacidikhirira cikacedwa, iye ambacita ciri-centse kuti aleke kulalewa ayai kukalipa. (Mat. 18:26, 27) Yacitatu, munthu wakupirira ambacita lini bzinthu mwa mphumapuma. Munthu wakupirira akakhala akucita basa lakufunika, iye ambacita lini bzinthu mwa mphumapuma ayai kulicita mwakamfulumize kuti limale kamangu. Koma, iye ambapambula nthawe yakukwanira kuti akonzekere bzomwe an’funa kucita ndipo ambacita basalo mwakuderekha. Yacinai, munthu wakupirira ambacita nyongo yakulimbana na mabvuto mwakusaya kudandaula. Munthu wakupirira ambacita ciri-centse kuti apitirize kupirira napo kuti akugumana na mabvuto. (Akol. 1:11) Ninga Akristau, tin’funika kulatiza njira zinai za kupirirazi. w23.08 20-21 ¶3-6

Thangwe likulu lomwe lin’funika kuticitisa kuti tikhotcerere mtima wathu, ndakuti Yahova ambakwanisa kudziwa bzomwe bziri mu mtima mwa munthu. Bzimwebzi bzin’funa kulewa kuti Yahova ambakwanisa kuwona bzinthu bzomwe wanthu winango angakwanise lini kubziwona ndipo ambakwanisambo kudziwa bwino-bwino bzomwe tikukumbuka. Iye an’dzatifuna ifepano tikapitiriza kumbakumbukira bza malango yace yomwe yangadzatithandize kudzakhala na moyo wakusaya kumala. (Juw. 4:14) Bzimwebzi bzin’dzatithandiza kuti makhalidwe yakuipa ya wanthu wa m’dzikoli pabodzi na bzinthu bzakunama bzomwe Sathani ambalewa bzireke kutidzonga. (1 Juw. 5:18, 19) Uxamwali bwathu na Yahova bukakula, ifepano tin’dzamufuna kwene-kwene ndipo tin’dzamulemekeza. Tin’dzawenga cinthu ciri-centse comwe cingaticitise kucita pikado thangwe rakuti timbafuna kuti Baba wathu aleke kuipidwa nafe. Mpfumakazi inango ya ku Croácia yakucemeredwa Marta, yomwe idayezedwa kucita upombo, idalewa kuti: “Bzikhandinesa kukumbuka bwino-bwino kuti ndicose mu mtima mwangu cikhumbo cakufuna kucita cinthu cakuipa. Tsono kugopa Yahova kudandikhotcerera.” Kodi kugopa Mulunguko kudamuthandiza tani? Marta adalewa kuti iye adakumbukira kwene-kwene bza mabvuto yomwe yangadabwera, angadacita cinthu cakuipaco. Ifepano tingacitembo bzibodzi-bodzibzi. w23.06 20-21 ¶3-4

Jezu akhadziwa kuti cakulinga ca Yahova ni kucenesa dzina lace kwa wale omwe ambalipswipiza. Ndipopa, iye adapfunzisa ateweri wace kuti ambapembe kuti: “Baba wathu omwe muli kudzulu, dzina lanu licenesedwe.” (Mat. 6:9) Jezu adadziwa kuti imweyi ni nkhani ikulu kwene-kwene. Palibe cakulengedwa ciri-centse canzeru kudzulu ayai pano pa dziko la pantsi comwe cidacenesa dzina la Mulungu kuposa momwe Jezu adacitira. Tsono pomwe Jezu adamangidwa, kodi ni mulandu uponi omwe adanamiziridwa? Iye adanamiziridwa kuti watukwana Mulungu! Bzimwebzi bzidamuwawa kwene-kwene Jezu, thangwe iye akhadziwa kuti kupswipiza dzina la Pai wace ikhali pikado ikulu kwene-kwene. Ndipopa Jezu “adaneseka kwene-kwene mu mtima” pomwe akhadasala pang’ono kumangidwa. — Luk. 22:41-44. w24.02 11 ¶11

Pomwe tikuthamanga mu njira ya ku moyo, tin’funika kufuna Yahova na Jezu kuposa momwe timbafunira wanthu wa m’banja mwathu. (Mat. 10:37) Bzimwebzi bzin’funa lini kulewa kuti tin’funika lini kukwanirisa udindo bwathu m’banja ninga kuti udindobo bumbatitazisa kukondwesa Yahova na Jezu. M’mbuto mwace, kuti Mulungu pabodzi na Kristu atifune, tin’funika kukwanirisa udindo bwathu m’banja. (1 Tim. 5:4, 8) Tikakwanirisa udindo bwathu tin’dzakhala wakukondwa. Yahova adalenga mabanja kuti yambakhale yakukondwa mwamuna na mkazi akambalemekezana na kucitirana bzinthu mwalufoyi, abereki akambafuna na kupfunzisa wana wawo ndipo wana akambabvera abereki wawo. (Aef. 5:33; 6:1, 4) Penu ndimwe mwamuna, mkazi ayai mwana, mbakhulupirani malango ya m’Bibliya. Lekani kutewezera nzeru zanu ayai bzomwe bzimbacitika komwe mumbakhala ayai bzomwe adziwi ambalewa kuti mucite. Phatisani bwino basa mabukhu yathu yomwe yambafotokoza bza Bibliya. Mabukhu yamweya yambatithandiza momwe tingaphatisire basa malango ya m’Bibliya. w23.08 28 ¶6-7

Mpfumakazi yacikristau in’funika kupfunza mabasa yakusiyana-siyana. Mabasa yanango yomwe mtsikana angapfunze pomwe akali mwana yangadzamuthandize pa moyo wace wentse. Mwa ciratizo, mbapfunzani kuwerenga na kunemba bwino. M’bzikhalidwe bzinango, atsikana ambalimbikisidwa lini kuti apfunze kuwerenga na kunemba. Tsono bzimwebzi ni bzinthu bzakufunika kwa Akristau wentse. (1 Tim. 4:13) Ndipopa lekani kubvuma kuti cinthu ciri-centse cikutaziseni kupfunza kuwerenga na kunemba bwino. Kodi ni phindu liponi lomwe mun’dzakhala nalo? Bzimwebzi bzin’dzakuthandizani kuti mugumane basa mwakamfulumize. Ndipo bzin’dzakuthandizanimbo kupfunza Fala la Mulungu na kupfunzisambo wanthu winango. Ndipo kuposa bzentse, mukambawerenga Fala lace na kukumbukira bzomwe mwawerengabzo bzin’dzakuthandizani kuti mukhale pa uxamwali bwakulimba na Yahova. — 1 Tim. 4:15. w23.12 20 ¶10-11

Kumbirani Yahova kuti akuthandizeni kupirira mayezo. Pakuti ndife wakuperewera, nthawe zentse timbayezedwa kuti ticite cinthu cakuipa. Sathani ambacita ciri-centse kuti ifepano titazire kupirira. Njira ibodzi yomwe iye ambacitira bzimwebzi ndiyo kuticitisa kuti timbafune kusenzeka na bzinthu bzomwe bzingaticitise kucita bzinthu bzakuipa. Bzinthu bzimwebzi bzingaticitise kuti tikhale na nzeru zakuipa ndipo nzeru zakuipazo zingacitise munthu kucita pikado ikulu. (Mar. 7:21-23; Tiy. 1:14, 15) Tin’funikira thandizo la Yahova kuti tikwanise kupirira mayezo yomwe yangaticitise kufuna kucita cinthu cakuipa. Pomwe Jezu akhacita mpembo wakuyezezera adalatiza kufunika kwa kukumbira thandizo Yahova pomwe tikuyezedwa. Iye adati: “Lekani kulekerera kuti tiyezedwe, koma tipulumuseni kwa nyakuipayo.” (Mat. 6:13) Yahova an’funa kutithandiza kuti timbapirire mabvuto yathu, tsono tin’funika kumbamukumbira. Ndipo tin’funikambo kumbacita bzinthu mwakubverana na mipembo yathu. w23.05 6-7 ¶15-17

Banja likambawona kuti uxamwali bwawo na Yahova n’bwakufunika, limbacita nyongo yakuphatisira basa malango ya Yahova ndipo malangoyo yambawathandiza kupirira mabvuto yomwe yangacitise kuti lufoyi lawo limale mphanvu. Wanthu wakulimba mwauzimu ambacita nyongo ya kutewezera makhalidwe ya Yahova, ninga kudeka mtima, kupirira na kulekerera. (Aef. 4:32–5:1) Banja likambalatizana makhalidwe yamweya limbacitisa kuti lufoyi lawo lithimizirike. Mpfumakazi inango yakucemeredwa Lena, yomwe iri pa banja kwa magole 25, idati: “Mpsakupusa kufuna na kulemekeza munthu omwe ambafuna bzinthu bzauzimu.” Mbatiwoneni nkhani ibodzi ya m’Bibliya. Pa mbadwa zentse za Davide, Yahova adasankhula Zuze na Mariya kuti alere Mesiya. Thangwe ranyi? Thangwe ndakuti awiriwa akhali pa uxamwali bwakulimba na Yahova, ndipo Yahovayo akhadziwa kuti iwo angadadzacita bzinthu mwakubverana na lufoyi lomwe akhanalo kwa iye. w23.05 21 ¶3-4

Napo kuti Mtsogoleri wathu, Jezu Kristu, ngwakulungama, abale omwe iye adawaikha kuti ambatsogolere mu gulu la Yahova mbakuperewera. Ndipo bzingakhale bzakunesa kwa ifepano kuwabvera maka-maka iwo akatiuza kuti ticite cinthu comwe tikukomedwa lini naco. Mpostolo Pedru adapasidwa malango yomwe iye akhafuna lini kuyabvera. Pomwe anjo adamuuza kuti adye bzirombo bzakupswipa m’Lamulo la Mozeji, Pedru adalamba, sikuti kabodzi kokha, koma katatu! (Mab. 10:9-16) Thangwe ranyi? Thangwe bzimwebzi bzikhali bzakusiyana kwene-kwene na bzomwe akhacita pa moyo wace. Tsono mpostolo Paulo adabvera pomwe Akristau wacikulire wa ku Jeruzalemu adamuuza kuti atenge amuna anai aciyenda nawo ku templo kuti akabzicenese na cakulinga cakuti alatize kuti akhabvera Lamulo la Mozeji. Paulo akhadziwa kuti Akristau akhateweza lini pomwe Lamulolo. Ndipo iye akhalibe kucita cinthu ciri-centse cakuphonyeka. Napo bziri tenepo, Paulo adacita bzomwe iwo adamuuzabzo. Iye “adatenga amuna wale acibzicenesa pabodzi na iwo mwakuteweza mwambo.” (Mab. 21:23, 24, 26) Kubvera kwa Paulo kudacitisa kuti iwo akhale wakubverana. — Aro. 14:19, 21. w23.10 10 ¶15-16

Pinango imwepo mungawone lini kuti mantha njakufunika kuti mubverane na xamwali wanu. Tsono, wanthu omwe an’funa kukhala axamwali wapamtima wa Yahova an’funika “kumugopa.” Tentsenefe tin’funika kumbagopa Yahova, bziribe basa penu tayamba tsapanopa kutumikira Yahova ayai tidayamba kale-kale. Tsono, kodi kugopa Mulungu kumbathandauza ciyani? Munthu omwe ambagopa Mulungu, ambamufuna ndipo ambacita ciri-centse kuti aleke kucita cinthu comwe cingadzonge uxamwali bwace na iye. Jezu akhana mtundu umweyu wa ‘mantha.’ (Aheb. 5:7) Iye akhawona lini Yahova ninga munthu wakupasa mantha. (Zai. 11:2, 3) M’mbuto mwace, iye akhamufuna kwene-kwene Yahovayo ndipo akhafuna kumubvera. (Juw. 14:21, 31) Ninga Jezu, ifepanombo timbamugopa Yahova mwa kumulemekeza thangwe iye ambatifuna, ana nzeru, ana cirungamo ndipo ngwa mphanvu. Ndipo ifepano timbadziwambo kuti Yahova ambatifuna ndipo ambafunambo kuti ifepano ticite bzomwe iye ambatipfunzisa. Ifepano tingakondwese mtima wa Yahova ayai tingacitise kuti iye awawidwe. — Sal. 78:41; Mim. 27:11. w23.06 14 ¶1-2; 15 ¶5

Pomwe Mambo Uziya adawona kuti umambo bwace bukhadakhazikika, iye alibe kukumbukira bzinthu bzabwino bzomwe Yahova adamucitira. Kodi tikupfunza ciyani na bzimwebzi? Tin’funika kumbakumbukira kuti udindo bwentse na bzisimbo bzomwe tinabzo bzimbacokera kwa Yahova. M’mbuto mwa kubzitumbiza pa bzomwe takwanisa kucita, tin’funika kumbatenda Yahova pa bzimwebzo. (1 Ako. 4:7) Tin’funika kumbazindikira mwakubzicepesa kuti ndife wakuperewera ndipo tin’funika kumbauzidwa bzakucita. M’bale munango omwe ana magole 60 adalewa kuti: “Ndidazindikira kuti ndikhafunikira lini kukalipa ayai kuwofoka anzangu akazindikira bzakuphonya bzangu. Ndikatsimulidwa thangwe ra bzakucita bzangu bzakusaya kukumbuka bwino, nimbacita ciri-centse kuti ndileke kubwerera m’mbuyo, koma ndipitirize kutumikira Yahova.” Tikabvera Yahova na kupitiriza kukhala wakubzicepesa, timbakhala wakukondwa pa moyo wathu. — Mim. 22:4. w23.09 10 ¶10-11

Mu nthawe ya mpostolo Paulo, Akristau akhafunika kupirira. Iwo akhagumana na mabvuto yakundendemerana na yomwe wanthu akhagumana nayo pa nthawe imweyo. Ndipo iwo akhagumanambo na mabvuto thangwe ra kukhala Akristau. Azinji wa iwo akhazunzidwa na atsogoleri wa magereja yacidjuda, boma la Roma na adzinza wawo caiwo. (Mat. 10:21) Ndipo iwo akhafunika kutcenkha kuti bzipfunziso bzakunama bza apanduki bzireke kudzonga mbverano wawo m’gwere. (Mab. 20:29, 30) Koma iwo adalatiza kupirira. (Apok. 2:3) Kodi iwo adacita tani bzimwebzi? Iwo adakumbukira nkhani za m’Bibliya za wanthu omwe adapirira, ninga nkhani ya Djobi. (Tiy. 5:10, 11) Iwo adapemba kwa Yahova kuti awapase mphanvu. (Mab. 4:29-31) Ndipo iwo akhadziwa kuti angadapirira Yahova angadadzawasimba. (Mab. 5:41) Ifepano tingalatizembo kupirira tikambapfunza nkhani za m’Bibliya na za m’mabukhu yathu za wanthu omwe adapirira. w23.07 3 ¶5-6

Yahova na Jezu ambatisiya lini tekha. Pambuyo pa mpostolo Pedru kulamba Jezu, iye akhafunikira kucita cakusankhula cakufunika. Kodi iye angadasiya ayai angadapitiriza kukhala mteweri wa Jezu? Jezu akhadadandaulira Yahova kuti cikhulupiro ca Pedru cireke kuwofoka. Jezu adamuuza Pedru bza mpembo umweyo ndipo adamutsimikizira kuti iye angadakwanisa kulimbikisa abale wace. (Luk. 22:31, 32) Pomwe Pedru adakumbukira mafala ya Jezuya, iye adakhala na mphanvu! Tikafuna kucita cakusankhula, Yahova angaphatise basa akulu walufoyi kuti atipase mphanvu kuti tipitirize kukhala wakukhulupirika kwa iye. (Aef. 4:8, 11) Ninga momwe Yahova adapasira Pedru na apostolo winango bzinthu bzomwe akhafunikira pa moyo wawo, iye an’dzatipasambo bzomwe timbafunikira tikaikha basa lakupalizira pa mbuto yakuyamba pa moyo wathu. w23.09 24-25 ¶14-15

Yahova ambawona bzinthu bzabwino bzomwe timbacitira anzathu napo bzicikhala bzakucepa. Iye ambawona bzimwebzi ninga ntsembe zakufunika ndipo an’dzatibwezera pa bzabwino bzomwe timbacitabzo. Penu kale-kale imwepo mudatumikira ninga mtumiki wakuthandiza ayai mkulu wa gwere, Yahova ambakumbukira basa lomwe mudacita m’mbuyo na lufoyi lomwe likhakucitisani kucita bzimwebzo. (1 Ako. 15:58) Ndipo iye ambawonambo lufoyi lomwe mukupitiriza kulilatiza. Yahova akufuna kuti tentsenefe tikulise lufoyi lathu kwa iye na kwa anzathu. Tingakulise lufoyi lathu kwa Yahova mwa kumbawerenga Bibliya, kukumbukira bzomwe tikuwerengabzo na kumbalalewa naye mu mpembo. Ndipo tingakulise lufoyi kwa abale na mpfumakazi zathu mwa kumbawathandiza pa ciri-centse comwe angafunikire. Lufoyi lathu likakula, ifepano tin’dzakhala pa uxamwali bwakulimba na Yahova ndipo tin’dzakhalambo pa uxamwali bwakulimba na abale na mpfumakazi zathu. Ndipo uxamwali bumwebo mun’dzamala lini! w23.07 10 ¶11; 11 ¶13; 13 ¶18

Mkristau ali-wentse an’funika kubzisankhulira yekha bzomwe an’funika kucita kuti akhale na thanzi la bwino. M’Bibliya muna malamulo yakucepa yomwe yambalewa bzomwe Akristau angacite pa nkhani ya thanzi ninga kuleka kudya mulopa na kuleka kucita bzinthu bza mizimu. (Mab. 15:20; Agal. 5:19, 20) Wanthu winango angafune kuphatisa basa mankhwala yacizungu akakhala akuduwala ndipo winango angafune kuphatisa basa mankhwala yacisenzi. Pinango ifepano tingawone kuti pana mankhwala yomwe yangathandizedi pa matenda yomwe m’bale ayai mpfumakazi akugumana nayo, tsono ifepano tin’funika kulemekeza cakusankhula ca abale na mpfumakazi zathu pa nkhani ya thandizo la ulapi lomwe akufuna kutambira. Pa nkhani imweyi tin’funika kumbakumbukira nfundo izi: (1) Ni Umambo bwa Mulungu bokha bomwe bun’dzakwanisa kupoza matenda yentse yomwe wanthu akugumana nayo. (Zai. 33:24) (2) Mkristau ali-wentse an’funika “kutsimikizira” yekha bzomwe bzingamuthandize. (Aro. 14:5) (3) Tin’funika lini kumbawona kuipa anzathu ayai kuyezera kutsogolera moyo wawo. (Aro. 14:13) (4) Akristau ambalatiza lufoyi ndipo ambabvesesa kuti ciphatano m’gwere ni cinthu cakufunika kwene-kwene kuposa makumbukidwe yawo. — Aro. 14:15, 19, 20. w23.07 24 ¶15

Kodi imwepo mumbawona kuti uxamwali bwanu na Yahova ni cinthu cakufunika? Tikudziwa kuti mtawiro wanu ngwakuti, inde! Kuyambira kale-kale, atumiki azinji wa Yahova adabzibvambo tenepoyo. Iwo adawona uxamwali bwawo na Yahova kuti cikhali cinthu cakufunika kwene-kwene kwa iwo. (Sal. 104:33, 34) Azinji adabvuma kuluza bzinthu bzinango kuti acite bzizinji pa kutumikira Yahova. Bzimwebzi ndibzo bzomwe wale omwe akhatumikira ninga Anazireu mu nthawe ya Ajirayeri adacita. Fala limweri limbalewa bza Ajirayeri wa nyongo omwe akhabvuma kuluza bzinthu bzinango kuti atumikire Yahova mu njira yakupambulika. Malamulo ya Mozeji yakhabvumiza kuti mwamuna ayai mkazi asankhule nthawe yomwe akufuna kumala akutumikira ninga M’nazireu. (Num. 6:1, 2) Munthu akasankhula kukhala M’nazireu, pakhana malamulo yomwe iye akhafunika kuyateweza. Thangwe ranyi munthu akhasankhula kukhala M’nazireu? Bzomwe bzikhamucitisa ni lufoyi lomwe iye akhanalo kuna Yahova na kutenda bzinthu bzabwino bzomwe Yahovayo akhamucitira. — Deut. 6:5; 16:17. w24.02 14 ¶1-2

Mu Bibliya, fala la Cihebereu lakuti “kukhulupirika” ayai “lufoyi lacadidi” limbathandauza lufoyi lomwe Mulungu ambalilatiza kwa axamwali wace. Fala libodzi-bodziri limbaphatisidwambo basa kuti lilatize lufoyi lomwe atumiki wace ambalatizana. (2 Sam. 9:6, 7) Kukhulupirika kwathu kungakhale kwakulimba na kupita kwa nthawe. Mbatiwoneni momwe kukhulupirika kwa Daniyeli kudakhalira kwakulimba. Daniyeli adafuna kulatiza kuti akhali wakukhulupirika kwa Yahova kazinji-kentse pa moyo wace. Tsono pomwe iye akhana magole yakupitirira 90, pa moyo wace padacitika cinthu cakunesa kwene-kwene. Nduna zomwe zikhatumikira mu nyumba ya mambo, zikhamuwenga Daniyeli ndipo zikhalemekeza lini Mulungu wace. Iwo adanyang’ana mathangwe kuti Daniyeli aphedwe. Iwo adacitisa kuti mambo akhazikise lamulo lomwe lingadayeza Daniyeli penu angadakhala wakukhulupirika kwa Mulungu wace. Lamulolo likhalewa kuti wanthu wentse akhafunika lini kupemba kwa mirungu yawo mkati mwa ntsiku 30, koma iwo akhafunika kupemba kwa mamboyo basi. Daniyeli adalamba kubvera lamulolo. — Dan. 6:12-15, 20-22. w23.08 5 ¶10-12

Yahova akufuna kuti tipitirize kulatiza lufoyi kwa abale na mpfumakazi zathu. Abale na mpfumakazi zathu akatiphonyera, tin’funika lini kukumbuka kuti iwo atiphonyera utowa. Koma tin’funika kutsimikizira kuti iwo akuyezera kucita bzabwino pa maso pa Yahova. (Mim. 12:18) Yahova ambalatiza lufoyi kwa atumiki wace wakukhulupirika napo kuti ambamuphonyera. Napo tikaphonyesa bzinthu bzinango, iye ambapitiriza kukhala xamwali wathu ndipo ambafulumiza lini kukalipa. (Sal. 103:9) Mpsakufunika kwene-kwene kutewezera Baba wathu wakudzulu omwe ambalekerera na mtima wentse! (Aef. 4:32–5:1) Kumbukirani kuti, pomwe cimaliziro cikufendera, tin’funika kukhala wakubverana na abale na mpfumakazi zathu. Tingadikhirire kudzagumana na mabvuto kutsogoloku. Tingaikhidwe m’kawoko thangwe ra cikhulupiro cathu. Bzimwebzi bzikadzacitika, tin’dzafunikira thandizo la abale na mpfumakazi zathu. — Mim. 17:17. w24.03 15-16 ¶6-7

M’Bibliya muna nkhani zizinji za maswaka yomwe yadakhala pa uxamwali bwakulimba na Yahova, yadabvumidwa na iye ndipo yadakhala na moyo wabwino. Davide akhali m’bodzi wa maswaka yamweya. Pomwe akhali tswaka, iye adasankhula kutumikira Yahova, ndipo patsogolo pace adadzakhala mambo wakukhulupirika. Tsono nthawe inango, Davide adacita bzinthu bzakuphonyeka. (1 Ama. 3:6; 9:4, 5; 14:8) Imwepo mukapfunza bza Davide, ciratizo cace cin’dzakuthandizani kuti mutumikire Yahova mwakukhulupirika. Ayai imwepo mungapfunze bza Marko ayai Timotio. Iwo adayamba kutumikira Yahova pomwe akhali wana, ndipo adapitiriza kumutumikira mwakukhulupirika. Iwo adasankhula kutumikira Yahova ndipo bzimwebzi bzidamukondwesa kwene-kwene Yahovayo. Bzomwe imwepo mumbacita pa moyo wanu tsapano ndibzo bzin’dzacitisa kuti bzinthu bzidzakufambireni bwino mukadzakula. Imwepo mukathemba Yahova sikuti kubzithemba mwekha, iye an’dzakuthandizani kuti mucite bzakusankhula bza nzeru. Imwepo mungakhale na moyo wakukondwa na bzisimbo bzizinji. Kumbukirani kuti Yahova ambatenda bzomwe imwepo mumbamucitira. Ndipo palibe cinthu cabwino kwene-kwene kuposa kuphatisa basa moyo wanu kuti mutumikire Baba wanu walufoyi, Yahova. w23.09 13 ¶18-19

Mpostolo Paulo akhadziwa kuti abale na mpfumakazi zace zacikristau akhali wanthu wakuperewera. Mwa ciratizo, abale winango wa ku Jeruzalemu akhakhulupira lini kuti iye akhadacinja. (Mab. 9:26) Wanthu winango akhalewa bzinthu bzakuipa pakulewa bza iye kuti aipise mbiri yace. (2 Ako. 10:10) Paulo adawona mkulu wa gwere akucita cakusankhula cakuphonyeka comwe cingadakalipisa winango. (Agal. 2:11, 12) Ndipo Marko, mwanzace wa pa mtima wa Paulo, adamukalipisa kwene-kwene. (Mab. 15:37, 38) Bzimwebzi bzingadacitisa Paulo kusiya kukhala pa uxamwali na wanthu amwewa. Tsono, iye alibe kucita bzimwebzo. Koma adapitiriza kuwafuna abalewo ndipo adapitirizambo kutumikira Yahova mwakukhulupirika. Kodi n’ciyani comwe cidathandiza Paulo kupirira? Paulo akhafuna abale na mpfumakazi zace. Lufoyi lomwe Paulo akhanalo lidamuthandiza kuwona bzabwino bzomwe abale na mpfumakazi akhacita sikuti bzakuphonya bzawo. Lufoyi lidathandizambo mpostolo Paulo kucita bzomwe bzidanembedwa pa cinembo comwe cikutsogolera vesi la lero. w24.03 15 ¶4-5

M’Bibliya muna nkhani zizinji zomwe zimbalatiza phindu lakukhala wakuderekha. Kumbukirani ciratizo ca Izaki. Pomwe iye akhakhala mu dziko la Afilisteu ku cigawo ca Gerari, wanthu wanjiru wa m’dzikolo adafucira micera ya madzi yomwe atumiki wa pai wace adacera. Izaki alibe kunesana nawo, koma iye adafuluka aciyenda kukakhala kunango ndipo adacera micera inango kumweko. (Gen. 26:12-18) Tsono Afilisteu adalewa pomwe kuti madzi ya micera yomwe Izaki akhadacerayo yakhali yawo basi. Napo kuti Izaki adagumana na mabvuto yentseneya, iye adapitiriza kucita bzinthu mwa mtendere. (Gen. 26:19-25) Kodi n’ciyani comwe cidamuthandiza kuti apitirize kukhala wakuderekha napo kuti wanthu akhamunyosa? Bzikuwoneka kuti iye adatewezera abereki wace. Iye adapfunza momwe Abalahamu akhacitira bzinthu mwa mtendere na momwe Sara adalatizira “mzimu wakuderekha na wakugwa mpfuwa.” — 1 Ped. 3:4-6; Gen. 21:22-34. w23.09 15 ¶4

Yahova adatumiza Mwana wace pa dziko la pantsi kuti adzapfunzise wanthu bza Umambo bwa Mulungu na kupereka moyo wace kuti alombole wanthu ku pikado na infa. Patsogolo pace, Jezu adalamusidwa aciyenda kudzulu kuti akatonge ninga Mambo wa Umambo bwa Mulungu. Nkhani yakufunika kwene-kwene ya m’Bibliya njakuti dzina la Yahova lin’dzacenesedwa pomwe cakulinga cace cin’dzakwanisika pa dziko la pantsi mwakuphatisa basa Umambo bwace bomwe bun’dzatongedwa na Jezu Kristu. Cakulinga ca Mulungu cingatazike lini. Iye adapicira kuti bzentse bzin’dzacitika ninga momwe adalewera. (Zai. 46:10; Aheb. 6:17, 18) Na kupita kwa nthawe, dziko lin’dzasanduka paraizo, ndipo wana wa Adamu na Eva “an’dzakhala na moyo [m’mwemo] mpaka kale-kale.” (Sal. 22:26) Tsono mpsimwebzi lini bzokha bzomwe Yahova akufuna. Cakulinga cakumalizira ca Yahova n’cakuti bzakulengedwa bzace bza kudzulu na bza pa dziko la pantsi bzikhale bzakuphatana. Na tenepo, wentse an’dzabvera Yahova mwakukhulupirika ninga Mtongi wawo. (Aef. 1:8-11) Kodi imwepo mumbadabwa lini mukambawona momwe Yahova akukwanirisira cakulinga cace? w23.10 20 ¶7-8

Pomwe Adjuda omwe adacoka ku Babiloniya adafika ku Jeruzalemu, adagumana na mabvuto ya momwe angadagumanira bzinthu kuti asamalire mabanja yawo ndipo kukhacitikambo phiringu la boma la Perisiya na kutsutsidwa na mitundu inango. Winango adawona kuti bzikhali bzakunesa kumanga pomwe templo ya Yahova. Ndipopa, Yahova adatuma apolofeta awiri, Agai na Zakariya, kuti akathandize wanthuwo kucita pomwe nyongo pa kunamata Yahova. Bzimwebzi bzidabweresa bzisimbo bzizinji. (Ag. 1:1; Zak. 1:1) Pomwe padapita magole pafupi-fupi 50, Adjuda omwe akhadabwerera ku Jeruzalemu wale akhafunika kulimbikisidwa pomwe. Ezara, omwe akhakopiyari Lamulo, adacoka ku Babiloniya aciyenda ku Jeruzalemu kuti akalimbikise wanthu wa Mulungu kuti ambaikhe kunamata Yahova pa mbuto yakuyamba. (Eza. 7:1, 6) Ninga momwe mapolofesiya ya Agai na Zakariya yadalimbikisira wanthu wa Mulungu kuti apitirize kuthemba Yahova pa nthawe yakunesa, iyo yangatithandizembo ntsiku zino kuti tipitirize kuthemba Yahova napo kuti tikugumana na mabvuto. — Mim. 22:19. w23.11 14-15 ¶2-3

Kodi timbalatiza tani lufoyi kuna abale wathu wacikristau? Njira ibodzi ya momwe tingacitire bzimwebzi ndiyo kuwatsangalaza. Ntsisi zomwe tinazo na iwo ndizo zin’dzaticitisa kuti “tipitirize kutsangalaza” abale wathu wacikristau. (1 Ates. 4:18) Kodi tingacite ciyani kuti lufoyi lomwe tinalo na abale wathu lileke kumala? Tingacite bzimwebzi mwa kucita nyongo kuti tiwalekerere bzakuphonya bzawo. Thangwe ranyi mpsakufunika kwene-kwene kulatiza lufoyi kuna abale na mpfumakazi zathu ntsiku zino? Onani bzomwe mpostolo Pedru adalewa. Iye adati: “Kumala kwa bzinthu bzentse kwafendera, tenepo, . . . mbafunanani na mtima wentse.” (1 Ped. 4:7, 8) Pomwe dzikoli liri kuphampha kwa ntsiku zakumalizira, n’ciyani comwe tingadikhirire? Pomwe Jezu akhalalewa na anyakupfunza wace, iye adawauza kuti: “Mun’dzawengedwa na mitundu yentse ya wanthu thangwe ra dzina langu.” (Mat. 24:9) Kuti tipirire mabvuto yamweya, tin’funika kukhala wakuphatana. Tikambafuna abale na mpfumakazi zathu, Sathani an’dzakwanisa lini kutigawa thangwe ra lufoyi. — Afil. 2:1, 2. w23.11 13 ¶18-19

Cadidi ca m’Fala la Mulungu n’camphanvu kwene-kwene. Tikambapfunzisa wanthu cadidi ca Yahova cakulewa bza momwe iye aliri timbakhala wakukondwa. Wanthu ambacitisidwa lini khungu na magunkha ya Sathani ndipo iwo ambayamba kuwona makhalidwe yabwino ya Pai wathu wakudzulu. Iwo ambadabwa na mphanvu zace zakusaya malire. (Zai. 40:26) Iwo ambamuthemba thangwe ra cirungamo cace. (Deut. 32:4) Iwo ambapfunza bzizinji na nzeru zace zakusaya malire. (Zai. 55:9; Aro. 11:33) Iwo ambatsangalazidwa akadziwa kuti iye ni lufoyi. (1 Juw. 4:8) Iwo akakhala pa uxamwali na Yahova, ambadikhirira kudzakhala na moyo wakusaya kumala ninga wana wace. Ni mwayi ukulu kwene-kwene kwa ifepano kuthandiza wanthu kuti akhale axamwali wa Yahova! Tikacita bzimwebzi, Yahova ambatiwona kuti ndife “anyabasa anzace.” — 1 Ako. 3:5. w24.02 12 ¶15

Penu imwepo ndimwe nyakupfunza wa Bibliya ayai penu abereki wanu ni Mboni za Yahova, kodi mukukumbuka bza kubatizidwa? Penu ndibzo, imwepo mwakumbuka bwino kwene-kwene. Tsono pomwe mukanati kubatizidwa, imwepo mun’funika kubzipereka kwa Yahova. Kodi imwepo mungabzipereke tani kwa Yahova? Imwepo mungacite bzimwebzi mwa kucita mpembo kwa iye mucimupicira kuti mun’dzatumikira iye yekha basi ndipo mun’dzaikha kufuna kwace pa mbuto yakuyamba pa moyo wanu. Ndipo mumbapicira kwa Yahova kuti mun’dzapitiriza kumufuna “na mtima wanu wentse, moyo wanu wentse, nzeru zanu zentse na mphanvu zanu zentse.” (Mar. 12:30) Mpembo wakubziperekayo imwepo mumbaucita pa mwekha, imwepo na Yahova. Mwakusiyana na bzimwebzi, imwepo mukabatizidwa mumbalatiza kwa wanthu winango kuti mwabzipereka kwa Yahova. Kubzipereka kwanu ni cinthu cakufunika kwene-kwene. Imwepo mun’dzafunika kucita ciri-centse kuti mukwanirise lumbiro lanu la kubzipereka thangwe ni cinthu cakufunika kwene-kwene kwa Yahova ndipo iye ambadikhira kuti mucite bzimwebzo. — Mpal. 5:4. w24.03 2 ¶2; 3 ¶5

Mabanja mazinji ntsiku zino yakugumana na mabvuto. Bibliya limbalewa mwakutsimikiza kuti wanthu wakulowolana “an’dzagumana na mabvuto mazinji pamoyo wawo.” (1 Ako. 7:28) Thangwe ranyi? Thangwe wanthu awiri omwe ambalowolanawo mbakuperewera, ana makhalidwe yakusiyana ndipo ambafuna bzinthu bzakusiyana. Iwo angasiyane bzikhalidwe na komwe adakulira. Na kupita kwa nthawe, iwo angalatize makhalidwe yomwe akhayalatiza lini pomwe akhanati kulowolana. Bzentsenebzi bzingayambise mabvuto m’banja. M’mbuto mwakuzindikira bzakuphonya bzanu na kubzikonzesa mungayambe kupasa mulandu mkazi wanu ayai mwamuna wanu. Ndipo mungawone kupumirana ayai kulambana ninga njira yakumalisira mabvuto. Tsono kodi kulambana kungamalisedi mabvuto? Ne. Yahova ambafuna kuti wanthu wakulowolana alemekeze malowozi yawo napo kuti mkazi ayai mwamuna angakhale wakunesa. w24.03 16 ¶8; 17 ¶11

Pambuyo pa imwepo kubzipereka mucibatizidwa, cidikhiro canu ca kudzakhala na moyo m’paraizo pa dziko lino la pantsi cidapitiriza kuthumizirika pomwe mukhapfunza bzizinji bza Yahova na kukhala wakukhwima mwauzimu. (Aheb. 5:13–6:1) Pinango bzomwe bzimbafotokozedwa pa Aroma 5:2-4 bzidakucitikiranimbo. Imwepo mudagumana na mabvuto mazinji. Tsono mudayapirira ndipo bzimwebzi bzidacitisa kuti mufunidwe na Mulungu. Thangwe ra kudziwa kuti iye ambakufunani ndipo ambakomedwa namwe, tsapano imwepo muna mathangwe mazinji yakukucitisani kudikhirira bzire bzomwe iye adapicira. Cidikhiro canu calimba kwene-kwene kuposa pakuyamba. Imwepo mukukwanisa kuwona kuti cidikhiroco n’cacadidi kwa imwepo, ndipo bzimwebzi bzikukudekerani kwene-kwene. Mwakusaya kupenukira, bzimbakucitisani kuti mucinje momwe mumbacitira bzinthu na wanthu wa m’banja mwanu, momwe mumbacitira bzakusankhula bzanu na momwe mumbaphatisira basa nthawe yanu. Mpostolo Paulo adafotokoza cinthu cakufunika kwene-kwene cakulewa bza cidikhiro comwe imwepo mumbakhala naco pambuyo pa kufunidwa na Mulungu. Iye adatsimikizira kuti cidikhiro canu cin’dzakwanisikadi. — Aro. 15:13. w23.12 12-13 ¶16-19

Tikakhala tikugumana na bvuto lakunesa bzingakhale bzakunesa kubva, kukumbuka ayai kucita bzinthu bwino-bwino. Ninga momwe naviyo imbagwinyidwira na mphepo icimbayenda uku na uku, ifepanombo bzingatinese kukumbuka bwino-bwino tikakhala tikugumana na mabvuto. Kodi Yahova ambatithandiza tani tikambabzibva mwa njira imweyi? Iye ambatitsimikizira kuti an’dzatithandiza. Naviyo ikakhala ikugwinyidwa na mphepo iyo ingayambe kupendeka-pendeka. Kuti naviyoyo ileke kucita bzimwebzi, pana tubzinthu tomwe tumbafuthuka pantsi pa naviyoyo kuti iyo ileke kupendeka-pendekako. Tubzinthu tumwetu tumbacitisa kuti naviyoyo ileke kupendeka-pendekako ndipo tumbacitisambo kuti wanthu omwe ali mu naviyoyo akhale wakukhotcerereka. Tsono tubzinthu tumwetu tumbaphata bwino basa bzikakhala kuti naviyoyo ikufamba. Mu njira ibodzi-bodziyo, Yahova an’dzapitiriza kutithandiza pokha-pokha tikapitiriza kumutumikira mwakukhulupirika napo pa nthawe zakunesa. w24.01 22 ¶7-8

Mukakhala muna mantha, bzibvunzeni kuti: ‘Kodi n’ciyani comwe Yahova adandicitira kale?’ Kumbukirani bzomwe iye adalenga. Mwa ciratizo, “nyang’anisisani” momwe Yahova ambasamalirira mbalame na maluwa, napo kuti alibe kubzipasa makhalidwe yace ndipo bzimbamunamata lini. Tsono tani ifepano? Bzikuwonekeratu kuti iye an’dzatisamalira. Kukumbukira bzimwebzi kun’dzatithandiza kuti timukhulupire kwene-kwene Yahova. (Mat. 6:25-32) Onanimbo bzomwe Yahova adacitira kale atumiki wace. Imwepo mungapfunze ciratizo ca m’Bibliya ca munthu omwe adalatiza cikhulupiro ayai mungawerenge nkhani ya mtumiki wa Yahova wa ntsiku zino. Kuthumizira bzimwebzi, kumbukirani bzomwe Yahova adakucitirani kale m’mbuyomu. Kodi iye adakuthandizani tani kuti mumudziwe? (Juw. 6:44) Kodi iye adatawira tani mipembo yanu? (1 Juw. 5:14) Kodi ni phindu liponi lomwe imwepo munalo thangwe ra ntsembe ya Mwana wace wapamtima? — Aef. 1:7; Aheb. 4:14-16. w24.01 4 ¶6; 7 ¶17