Novembro

Penu imwepo muna wana, mbathandizani wana wanuwo kukonzekera mitawiro yawo. Ndime zinango zingakhale zakunesa kuti wana wanu azibvesese, koma munganyang’ane ndime zakupusa kuti wana wanuwo atawirembo. Ndipo thandizanimbo wana wanuwo kubvesesa kuti ni nthawe lini zentse zomwe an’dzalatidwa akaimisa boko. Kubvesesa bzimwebzi kun’dzawathandiza kuti aleke kudzakalipa nyakucitisa akadzalata wanthu winango. (1 Tim. 6:18) Tentsenefe tingakonzekere mitawiro yomwe ingatumbizise Yahova na kulimbikisambo abale wathu wacikristau. (Mim. 25:11) Napo kuti nthawe zinango tingafotokoze bza moyo wathu pomwe tikutawira, tin’funika kutcenkha kulalewa bzinthu bzizinji. (Mim. 27:2; 2 Ako. 10:18) Koma mitawiro yathu in’funika kulatiza kuti tikutumbiza Yahova, tikulewa bzinthu bzomwe bziri m’Fala lace na kulewa bzinthu bzomwe bzingalimbikise atumiki wace wentse. — Apok. 4:11. w23.04 24-25 ¶17-18

Lufoyi ndakufunika kuti tipitirize kukhala tceru na wakupenya. (Mat. 22:37-39) Lufoyi lathu kwa Yahova limbatithandiza kuti tipitirize kucita basa la kupalizira napo kuti bzimwebzi bzingaticitise kuti tigumane na mabvuto. (2 Tim. 1:7, 8) Pakuti timbafuna wanthu, timbapitiriza kupalizira mwa nyongo, pa telefoni na mwakunemba makarta. Ifepano timbakhulupira kuti wanthu winango an’dzacinja aciyamba kucita bzinthu bzabwino. (Ezek. 18:27, 28) Cinthu cinango comwe tingacite kuti tilatize kuti tina lufoyi na anzathu ndico kufunambo abale wathu wacikristau. Ifepano timbalatiza kuti timbawafuna mwa kupitiriza “kumbalimbikisana na kumbapasana mphanvu.” (1 Ates. 5:11) Ninga acikunda omwe ambathandizana pa kumenya nkhondo, ifepano timbalimbikisana. Ifepano tingasunamise lini abale na mpfumakazi zathu utowa ayai kuwabwezera cakuipa na cakuipa. (1 Ates. 5:13, 15) Ndipo timbalatizambo kuti tina lufoyi tikambalemekeza abale omwe ambatsogolera mu gwere. — 1 Ates. 5:12. w23.06 10 ¶6; 11 ¶10-11

Njira ibodzi yakulimbisira cikhulupiro cathu ndiyo kumbakumbukira bza cakulombolera. Cakulombolera cimbatitsimikizira kuti Mulungu an’dzacita bzinthu bzentse bzomwe adalewa. Tikambakumbukira bwino-bwino thangwe lomwe lidacitisa Mulungu kuti apereke Mwana wace, timbalimbisa cikhulupiro cathu pa mapiciro ya Mulungu yakuti mu dziko lipsa lomwe likubweralo wanthu an’dzakhala na moyo wakusaya kumala. Thangwe ranyi tikulewa bzimwebzi? Kodi n’ciyani comwe Mulungu adacita kuti tikhale na cakulombolera? Yahova adatumiza Mwana wace wakuyamba omwe akhali xamwali wace wa pa mtima kuti abwere pa dziko la pantsi pano ninga munthu wakulungama. Pomwe Jezu akhali pa dziko la pantsi pano, iye adapirira mabvuto yakusiyana-siyana. Patsogolo pace, iye adafa infa yakuwawa kwene-kwene. Bzimwebzi bzikhali lini bzakupusa! Mulungu wathu walufoyi angadabvuma lini kuti Mwana wace abonere acifa kuti ifepano tikhale na moyo wa kanthawe kakucepa basi. (Juw. 3:16; 1 Ped. 1:18, 19) Bzomwe Yahova adacitabzi bzikulatiza kuti iye akufuna kuti wanthu adzakhale na moyo wakusaya kumala mu dziko lipsa. w23.04 27 ¶8-9

Kodi Yahova akufuna kulamusa anyakufa? Inde, iye akufuna. Iye adacitisa anembi wa Bibliya kuti anembe bzomwe akufuna kudzacita kutsogolo. (Zai. 26:19; Apok. 20:11-13) Yahova nthawe zentse ambacita bzomwe ambalewa. (Djos. 23:14) Yahova akufunisisa kudzalamusa anyakufa. Onani mafala yomwe Djobi adalewa. Iye akhakhulupira kuti akafa, Yahova angadadzamulamusa acikhala pomwe na moyo. (Djob. 14:14, 15) Yahova akufunisisa kudzalamusa atumiki wace wentse omwe adafa. Iye akufunisisa kuti iwo adzakhale na moyo wa thanzi na wacikondweso. Tsono tani bza wanthu azinji omwe adafa omwe alibe kupfunza bza Yahova? Mulungu wathu wa lufoyi akufuna kudzawalamusambo. (Mab. 24:15) Iye akufunisisa kuti iwo adzakhale axamwali wace na kupitiriza kukhala na moyo pa dziko la pantsi. — Juw. 3:16. w23.04 9 ¶5-6

Kodi imwepo mungalimbise tani cidikhiro canu? Mwa ciratizo, penu cidikhiro canu n’cakudzakhala pa dziko la pantsi, werengani bzomwe Bibliya limbalewa pakulewa bza Paraizo mucimbabzikumbukira. (Zai. 25:8; 32:16-18) Kumbukirani momwe moyo un’dzakhalira mu dziko lipsa. Kumbukirani kuti muli m’mwemo. Tikambakhala na nthawe ya kukumbukira bza cidikhiro cathu, mabvuto yathu yan’dzakhala ‘yakanthawe na mang’ono.’ (2 Ako. 4:17) Cidikhiro comwe Yahova adakupasani cin’dzakuthandizani kupirira mabvuto yomwe mukugumana nayo. Iye adakupasani bzomwe mukufunikira kuti mutambire mphanvu yace. Tenepo, mukafuna thandizo kuti mukwanise kucita basa lomwe mwapasidwa, kuti mupirire mabvuto yomwe mukugumana nayo ayai kuti mukhale wakukondwa, mbapembani kwa Yahova ndipo mbacitani pfunziro lanu la pamwekha. Bvumani thandizo la abale na mpfumakazi zanu, mbakhalani na nthawe ya kumbakumbukira bza cidikhiro comwe munaco ca kutsogolo. Na tenepo, imwepo mun’dzalimbikisidwa “na mphanvu zikulu za Mulungu mwakubverana na ulemerero bwace bukulu, kuti mukwanise kulimbikira, kupirira na kukondwa.” — Akol. 1:11. w23.10 17 ¶19-20

Tina mathangwe mazinji yakutendera Yahova. Tingatende Yahova pa cinthu ciri-centse comwe tinaco thangwe mphaso iri-yentse yabwino na yakulungama imbacokera kwa iye. (Tiy. 1:17) Tingamutende thangwe ra bzinthu bzabwino bzomwe adakonza pa dzikoli. Tingamutendembo thangwe ra kutipasa moyo, thangwe ra kutipasa adzinza wathu, axamwali wathu na cidikhiro cathu. Ndipo tingamutendembo Yahova thangwe ra kutithandiza kuti tikhale naye pa uxamwali bwakulimba. Pinango tingafunikire nyongo kuti tikwanise kuwona bzinthu bzomwe bzingaticitise kumutenda Yahova. Tikukhala mu dziko lomwe wanthu ambatenda lini. Wanthu ambandokumbukira bzomwe iwo akufuna basi, ndipo ambatenda lini bzinthu bzomwe iwo anabzo. Tikatewezera makhalidwe yamweya tingambandocite mipembo ya kundombakumbira basi. Kuti bzimwebzi bzireke kucitika, tin’funika kupitiriza kutenda Yahova pa bzentse bzomwe iye ambaticitira. — Luk. 6:45. w23.05 4 ¶8-9

Pakuti Baba wathu Yahova ambatifuna, iye ambafuna lini kutiwona tikubonera. (Zai. 63:9) Tsono, iye angacitise lini kuti tileke kugumana na mabvuto yomwe yali ninga mikulo ayai moto. (Zai. 43:2) Tsono, iye akupicira kuti an’dzatithandiza “kulimbana” na mabvutoyo. Ndipo iye an’dzalekerera lini kuti mabvuto yomwe tikugumana nayo yatitazise kupitiriza kumutumikira. Yahova ambatipasambo mzimu wakucena kuti utithandize kupirira. (Luk. 11:13; Afil. 4:13) Ndipopa tingakhale na citsimikizo cakuti iye an’dzatipasa bzomwe tikufunikira kuti tipirire na kuti tipitirize kumutumikira mwakukhulupirika. Yahova ambafuna kuti ifepano timukhulupire. (Aheb. 11:6) Nthawe zinango bzingawoneke ninga kuti tingakwanise lini kupirira mabvuto yomwe tikugumana nayo. Ndipo tingayambe kupenukira penu Yahova an’dzatithandiza. Tsono Bibliya limbatitsimikizira kuti na mphanvu ya Yahova tingakwanise “kukwira mpanda.” (Sal. 18:29) Ndipopa m’mbuto mwa kumbapenukira, timbapembe kwa Yahova na cikhulupiro cakuti Yahova an’dzatawira mipembo yathu. — Tiy. 1:6, 7. w23.11 22 ¶8-9

Mafalaya yambafotokoza bwino-bwino bza lufoyi lacadidi! Mafala yamweya yambalimbikisa wale omwe adalowolana kuti: Imwepo mungakwanise kulatizana lufoyi lomwe lin’dzamala lini. Kuti wanthu wakulowolana akhale na lufoyi lakusaya kumala bzimbathemba awiriwo. Kuti moto upitirize kugaka timbafunika kupitiriza kuuyesera. Tikasaya kuuyesera, motoyo umbathima. Mpsibodzi-bodzimbo na lufoyi la mwamuna na mkazi. Kuti lipitirize kukhala la mphanvu, awiriwo an’funika kupitiriza kulilimbisa. Nthawe zinango, banja lingawone kuti lufoyi lawo likumala mphanvu, maka-maka akakhala akugumana na bvuto lakusaya kobiri, bvuto la thanzi ayai mabvuto manango yomwe yambacitikira wanthu. Kuti “moto wa Yah” upitirize kugaka, mwamuna na mkazi an’funika kupitiriza kulimbisa uxamwali bwawo na Yahova. w23.05 20-21 ¶1-3

N’ciyani comwe tin’funika kucita kuti tikhale wakukhwimika? Abereki wathu angatithandize kuti tikhale wakukhwimika. Tsono iwo angaticitise lini kuti tikhale wakukhwimika napo kuti iwo mbakukhwimika. Kukhala wakukhwimika kuli ninga kupfunza basa lipsa. Njira ibodzi ya kupfunzira basa lipsa ndiyo kunyang’anisisa bzomwe mpfunzisi akucita patsogolo pace ticimutewezerambo. Mwakundendemerana na bzimwebzi, timbapfunza kukhala wakukhwimika tikambanyang’anisisa wanthu winango omwe analo khalidwe limweri ndipo patsogolo pace ticiwatewezerambo. Ninga Daniyeli, tin’funika kulidziwa bwino Fala la Mulungu. Tin’funika kukhala pa uxamwali bwakulimba na Yahova mwa kulalewa naye mwakutsudzuka nthawe zentse. Ndipo tin’funika kukhulupira Yahova ticikhala na citsimikizo cakuti iye ambatithandiza. Tikacita tenepoyo, napo cikhulupiro cathu ciyezedwe, tin’dzakhala wakukhwimika. Wanthu wakukhwimika kazinji-kazinji ambacitisa kuti anzawo awalemekeze. Ndipo iwo angathandizembo wanthu winango kuti amudziwe Yahova. Ndipopa, tina mathangwe mazinji yakukhalira wakukhwimika. w23.08 2 ¶2; 4 ¶8-9

Fala la Cigerego lomwe lidasanduliziridwa kuti “onesesani” lidaphatisidwa basa pa kufotokoza bzomwe wanthu ambacita kuti awone penu bzinthu bzinango bziri bwino, ninga oro ayai prata. Ndipopa tin’funika kumbacita mphole na bzomwe timbabva pabodzi na bzomwe timbawona. Bzimwebzi bzin’khala bzakufunikambo kwene-kwene kwa ifepano maka-maka pomwe citsautso cikulu cikufendera. Ifepano tin’dzafunika lini kukhulupira bzomwe wanthu ambalewa, koma tin’dzafunika kuphatisa basa luso lathu la kukumbuka kuti tidzasiyanise bzomwe timbawerenga na kubva na bzomwe Bibliya na gulu la Yahova limbalewa. Tikacita bzimwebzi, tin’dzanamizidwa lini na bzomwe madimonyo yan’dzalewa. (Mim. 14:15; 1 Tim. 4:1) Timbadziwa kuti atumiki wa Yahova an’dzapulumuka pa citsautso cikulu. Tsono palibe munthu omwe angadziwe bzomwe bzingamucitikire kutsogolo. (Tiy. 4:14) Ndipopa, penu tin’dzacita kupulumuka pa citsautso cikulu ayai tinifa pomwe citsautsoco cikanati kucitika, tikapitiriza kukhala wakukhulupirika, tin’dzasimbidwa na moyo wakusaya kumala. Ndipopa, tentsenefe tin’funika kupitiriza kumbakumbukira bza cidikhiro cathu ticipitiriza kukhala tidakonzekera kubwera kwa ntsiku ya Yahova! w23.06 13 ¶15-16

Ifepano timbadziwa lini momwe mapolofesiya manango ya m’Bibliya yan’dzakwanisikira. (Dan. 12:8, 9) Tsono thangwe rakuti timbabvesesa lini momwe polofesiya in’dzakwanisikira, bzin’funa lini kulewa kuti iyo in’dzakwanisika lini. Mwakusaya kupenukira, tingakhale na citsimikizo cakuti Yahova an’dzatithandiza kubvesesa pa nthawe yomwe tin’dzafunikira kudziwa bzimwebzo, ninga momwe adacitira kale m’mbuyomu. Mafala yakuti “mtendere na mkhomeko” yan’dzalewedwa. (1 Ates. 5:3) Tsapanopali maboma ya pa dziko lentse la pantsi yan’pfudza magereja yentse yakunama. (Apok. 17:16, 17) Patsogolo pace, iwo an’dzafuna kupha wanthu wa Mulungu. (Ezek. 38:18, 19) Bzimwebzi bzin’dzacitisa kuti iyambike nkhondo yakumalizira yomwe ni Armagedo. (Apok. 16:14, 16) Ifepano tikukhulupira kuti bzimwebzi bzin’citika tsapanopali. Pomwe bzimwebzi bzikanati kucitika, mbatipitirizeni kutenda Baba wathu wa lufoyi wa kudzulu thangwe ra kukhala tceru pa mapolofesiya na kuthandizambo anzathu kucita bzibodzi-bodzibzi. w23.08 13 ¶19-20

Pomwe mpostolo Paulo akhalewa bza cikhulupiro, cidikhiro na lufoyi, iye adamaliza na kulewa kuti “cakufunika kwene-kwene pa bzitatubzi ni lufoyi.” (1 Ako. 13:13) Thangwe ranyi Paulo adalewa bzimwebzi? Thangwe kutsogoloku tin’dzafunika lini pomwe kukhulupira mapiciro ya Mulungu yakulewa bza dziko lipsa thangwe mapiciroyo yan’dzakhala yakwanisika kale. Tsono tin’dzafunikira kupitiriza kulatiza lufoyi kwa Yahova na kwa anzathu. Pomwe ntsiku zikupita, lufoyi lathulo kuna iwo lin’dzapitiriza kukula. Cinango n’cakuti lufoyi ndiro limbadziwikisa Akristau wacadidi. Jezu adauza anyakupfunza wace kuti: “Na bzimwebzi, wentse an’dzadziwa kuti ndimwe anyakupfunza wangu mukambafunana.” (Juw. 13:35) Kuthimizira bzimwebzi, kulatizana lufoyi kun’dzaticitisa kuti tikhale wakuphatana. Paulo adalewa kuti lufoyi “limbaphatanidzisa wanthu mwamphanvu kwene-kwene kuposa cinthu ciri-centse.” (Akol. 3:14) Mpostolo Juwau adanembera Akristau anzace kuti: “Ule omwe ambafuna Mulungu, an’funikambo kumbafuna m’bale wace.” (1 Juw. 4:21) Tenepo, tikambalatizana lufoyi, timbalatiza kuti timbafuna Mulungu. w23.11 8 ¶1, 3

Bibliya limbandendemezera moyo wa Akristaufe na kuthamanga. Anyakuthamanga omwe ambafika kuphampha an’dzasimbidwa na moyo wakusaya kumala. (2 Tim. 4:7, 8) Tin’funika kucita nyongo ya kupitiriza kuthamanga thangwe tasala pang’ono kufika. Mpostolo Paulo adafotokoza bzinthu bzomwe bzingatithandize. Iye adatiuza kuti: “Mbaticoseni cinthu ciri-centse cakulemera . . . , ndipo bwerani tithamange mwakupirira pa kuthamanga komwe kwaikhidwaku.” Kodi Paulo akhafuna kulewa kuti Mkristau an’funika lini kunyamula mtolo uli-wentse? Ne, ndibzo lini bzomwe iye akhafuna kulewa. M’mbuto mwace, iye akhafuna kulewa kuti tin’funika lini kunyamula mitolo yakusaya kufunika. Mitolo imweyi ingatisokoneze na kutinetesa. Kuti tileke kuneta, tin’funika kudziwa bzinthu bzakusaya kufunika bzomwe bzingatinetese na kubzitaya mwakamfulumize ndipo pa nthawe ibodzi-bodziyo, tin’funika lini kusiya mitolo yomwe tin’funika kuinyamula. Tikasaya kucita tenepoyo bzingakhale bzakunesa kuti tithamange. — 2 Tim. 2:5. w23.08 26 ¶1-2

Kuleka kungingimira nzeru zathu kumbatithandiza kuti timbalemekeze kawonedwe ka bzinthu ka anzathu. Mpfumakazi zinango zimbafuna kuikha makiyaje uko zinango zimbaikha lini. Akristau winango ambafuna kumwa pang’ono uko anango ambafuna lini na kulawidzako. Akristau wentse ambafuna kukhala na thanzi labwino, koma iwo angacite bzakusankhula bzakusiyana pa nkhani ya mankhwala yomwe angabvume kutambira. Tikambayezera kucitisa abale kuti asankhule bzinthu ninga bzathu, tingakhumudwise anzathu ndipo tingacitise kuti m’gwere mukhale na mgawano. (1 Ako. 8:9; 10:23, 24) Mwa ciratizo, Yahova alibe kutipasa malamulo ya momwe tingabvalire, koma iye adatipasa nfundo zomwe timbafunika kuziteweza. Ifepano tin’funika kubvala mwakuthemera ninga atumiki wa Mulungu ticimbalatiza kuti timbacita bzinthu mwacikati-kati, ndife wakubzicepesa ndipo ‘timbakumbuka bwino.’ (1 Tim. 2:9, 10) Ndipopa timbabvala lini mu njira yakuti ticitise kuti wanthu atinyang’anise kwene-kwene. Nfundo za m’Bibliya zimbathandizambo akulu kuti atcenkhe kumbapereka malamulo pa nkhani ya kabvalidwe na kagwatidwe ka tsisi. w23.07 23-24 ¶13-14

Yahova adaphatisa basa bzinthu bziwiri kuti atithandize kuwona phindu lomwe tin’dzakhala nalo tikasankhula bzinthu mwanzeru. Wale omwe ambabvuma mcemo wa “mkazi wakusaya nzeru” ambandokumbukira bza kukwanirisa bzikhumbo bzawo bzakuipa mwakabise-bise. Kumalizira kwace “ni infa.” (Mim. 9:13, 17, 18) Tsono bzimbakhala bzakusiyana na wale omwe ambabvuma mcemo wa “nzeru yacadidi”! (Mim. 9:1) Ifepano tikupfunza kufuna bzomwe Yahova ambafuna na kuwenga bzomwe Yahova ambawenga. (Sal. 97:10) Ndipo timbakomedwambo kucemera anango kuti adzagumanembo phindu na “nzeru yacadidi.” Bzimwebzi bzimbakhala ninga kuti tiri pakati pa sidade ndipo tiri kucemera kuti: ‘Ule omwe alibe nzeru, mbapite muno.’ Ifepano na wale omwe ambabvuma mcemo umweyu timbagumana phindu tsapano ndipo tin’dzagumanambo phindu kutsogolo, thangwe tin’dzakhala na moyo wakusaya kumala. Koma kuti bzimwebzi bzikwanisike, tin’funika kupitiriza “kufamba mu njira yacadidi.” — Mim. 9:3, 4, 6. w23.06 24 ¶17-18

Kodi mumbabva tani mwanzanu wa ku basa ayai wa ku xikola akakubvunzani bzomwe mumbakhulupira? Kodi imwepo mumbabva mantha? Azinji wa ifepano timbabva tenepoyo. Tsono, mbvunzo umweyo ungakucitiseni kudziwa bzomwe munthuyo akukumbuka ayai bzomwe ambakhulupira ndipo bzimwebzi bzingakupaseni mpata kuti mukwanise kupalizira. Tsono nthawe zinango, munthuyo angacite mibvunzo inango mu njira yomwe ingatikalipise. Bzimwebzi bzikacitika ifepano tin’funika lini kudabwa. Thangwe ranyi? Thangwe wanthu azinji ambanamizidwa pa nkhani ya bzomwe Mboni za Yahova zimbakhulupira. (Mab. 28:22) Ndipo cinango n’cakuti tikukhala mu “ntsiku zakumalizira,” mu nthawe yomwe wanthu azinji ni “wakusaya kufuna kubverana na anzawo” na “waukali.” (2 Tim. 3:1, 3) Imwepo mungabzibvunze kuti: ‘Kodi ningacite ciyani munthu akalatiza kuti akundikalipira thangwe ra bzomwe nimbakhulupira?’ Kodi n’ciyani comwe cingakuthandizeni? Kuderekha ndiko kungakuthandizeni. Munthu wakuderekha ambakalipa lini mwakamfulumize, koma iye ambakwanisa kubziphata munthu akamulewa bzinthu bzakuipa ayai penu iye akudziwa lini bzomwe angatawire. w23.09 14 ¶1-2

Nthawe zinango, timbatambira malango ya gulu la Yahova, yomwe yambatikhotcerera. Timbacenjezedwa kuti timbaleke kufuna kwene-kwene kobiri na kucita bzinthu bzomwe bzingaticitise kuleka kubvera malamulo ya Yahova. Tikateweza malango yamweya timbagumana phindu. (Zai. 48:17, 18; 1 Tim. 6:9, 10) Yahova an’dzapitiriza kuphatisa basa amuna omwe iye ambawasankhula kuti atipase malango pa citsautso cikulu na mu Utongi bwa Magole 1000 bwa Kristu. Kodi tin’dzapitiriza kubvera malangoyo napo kuti yakubverana lini na bzomwe ifepano tikufuna? Bzin’dzakhala bzakupusa kwene-kwene kucita bzimwebzi penu timbabvuma kutsogoleredwa na Yahova ntsiku zino. Tenepo, mbatipitirizeni nthawe zentse kuteweza malango ya Yahova, kuphatanidza yale yomwe iye ambayapereka mwakuphatisa basa amuna omwe adawasankhula kuti atinyang’anire. (Zai. 32:1, 2; Aheb. 13:17) Tikacita bzimwebzi, timbalatiza kuti timbathemba Mtsogoleri wathu, Yahova, omwe akutitsogolera kuti tileke kugumana na mabvuto nakuti tidzatambire moyo wakusaya kumala m’dziko lipsa. w24.02 25 ¶17-18

Mpostolo Paulo akhakomedwa kwene-kwene pomwe akhatumikira Yahova, tsono iye akhagumanambo na mabvuto. Paulo akhambacita ulendo pafupi-pafupi ndipo ulendobo nthawe zinango bukhakhala bwakunesa. Pa maulendo yamweya nthawe zinango Paulo akhakhala pa “ngozi za m’mikulo” na “ngozi za akambowa.” Ndipo nthawe zinango iye akhamenyedwa. (2 Ako. 11:23-27) Ndipombo nthawe zinango abale wace wacikristau akhatenda lini nyongo yomwe iye akhacita. (2 Ako. 10:10; Afil. 4:15) N’ciyani comwe cidathandiza Paulo kupitiriza kutumikira Yahova? Paulo adadziwa bwino bza makhalidwe ya Yahova mwa kuwerenga Fala lace na kuwonambo bzomwe bzikhamucitikira pa moyo wace. Bzimwebzi bzidamutsimikizira kuti Yahova Mulungu akhamufuna kwene-kwene. (Aro. 8:38, 39; Aef. 2:4, 5) Ndipo iye adayambambo kumbamufuna kwene-kwene Yahova. Paulo adalatiza lufoyi lace kwa Yahova ‘mwakutumikira anyakukhulupira anzace’. — Aheb. 6:10. w23.07 9 ¶5-6

Wanthu azinji ambazindikira kuti timbafunikira “atsogoleri wa boma” nakuti tin’funika kumbabvera malamulo yomwe iwo ambaikha. Tsono wanthu winango ambabvera lini malamulo yomwe iwo ambayafuna lini ayai yale yomwe iwo ambayawona kuti njakusaya cirungamo. Bibliya limbalewa kuti maboma yambaboneresa wanthu, yambatongedwa na Sathani ndipo yan’dzapfudzidwa. (Sal. 110:5, 6; Mpal. 8:9; Luk. 4:5, 6) Ndipo limbalewambo kuti “munthu ali-wentse omwe an’bvera lini utongibo, akupitana na makonzedwe ya Mulungu.” Pakali pano, Yahova akulekerera kuti maboma yatonge kuti bzinthu bzifambe bwino. Ndipo iye ambafuna kuti ifepano tiyabvere. Ndipopa tin’funika ‘kupereka kwa wentse bzomwe iwo ambafuna,’ kuphatanidzambo mtsonkho, ulemu na kubvera. (Aro. 13:1-7) Nthawe zinango tingambawone lamulo kuti ndakusaya kuthemera, ndakusaya cirungamo na lakunesa kulibvera. Tsono timbabvera maboma thangwe rakuti Yahova ambatiuza kuti ticite bzimwebzo, bzikakhala kuti bzomwe iwo akutiuzabzo bzikupitana lini na malamulo ya Mulungu. — Mab. 5:29. w23.10 8 ¶9-10

Pomwe Samusoni adabadwa, Ajirayeri akhatongedwa na Afilisteu ndipo akhaboneresedwa kwene-kwene. (Ato. 13:1) Katongedwe kawo kakuipa kadacitisa kuti Ajirayeri agumane na mabvuto mazinji. Yahova adasankhula Samusoni kuti ‘atsogolere pa kupulumusa Ajirayeri m’manja mwa Afilisteu.’ (Ato. 13:5) Kuti Samusoni akwanise kucita basa limweri, iye akhafunika kuthemba Yahova. Pa nthawe inango, acikunda wa Afilisteu adayenda kukaphata Samusoni ku Lehi, omwe ukhali mudzi wa ku Djuda. Wanthu wa ku Djudako adacita mantha, ndipopa iwo adawona kuti bzikhali bwino kumupereka Samusoniyo kwa anyamadulanthaka wace. Wanthuwo adamumanga Samusoni na bzingwe bziwiri bzinovu ndipo adamupereka kwa Afilisteu. (Ato. 15:9-13) Tsono, “mzimu wa Yahova udamupasa mphanvu” Samusoni ndipo iye adabwedza bzingwebzo. Iye “adawona pfupa la ntsagwada za bulu,” adalilokota ndipo adaliphatisa basa kuti aphe acikunda wakukwana 1000 wa Afilisteu! — Ato. 15:14-16. w23.09 2 ¶3-4

Yahova pang’ono na pang’ono adazimbula “cakulinga [cace] cakusaya kumala” m’Bibliya. Napo kuti cakulinga ca Yahova ciribe kukwanisika, iye angaphatise basa njira zakusiyana-siyana kuti akwanirise cakulinga caceco. Ndipo bzentse bzimbamufambira bwino thangwe “adakonza cinthu ciri-centse na cakulinga cace.” (Mim. 16:4) Bzinthu bzentse bzomwe Yahova ambacita bzimbakhala mpaka kale-kale. Kodi cakulinga ca Yahova n’ciponi, ndipo ni bzinthu bziponi bzomwe iye adacinja kuti acikwanirise? Mulungu adauza banja lakuyamba bza cakulinga cace kuna iwo. Iye adawauza kuti: “Balanani, muwande, mudzaze dziko la pantsi, mucirinyang’anira. Munyang’anire . . . bzamoyo bzentse bzomwe bzimbafamba-famba” pa dziko la pantsi. (Gen. 1:28) Pomwe Adamu na Eva adapanduka acicitisa kuti pikado ipite m’dziko, bzimwebzi bziribe kutazisa kuti cakulinga ca Mulungu cikwanisike. Iye adacinja momwe cakulingaco cingadakwanisikira. Pa nthawe ibodzi-bodziyo, iye adacita makonzedwe ya kuti adzakhazikise Umambo kudzulu bomwe bungadadzakwanirisa cakulinga cace kwa wanthu pa dziko la pantsi. — Mat. 25:34. w23.10 20 ¶6-7

Yahova angatithandize kupitiriza kumutumikira. Bzingakhale bzakunesa kucita bzimwebzi maka-maka tikakhala kuti tikulimbana na bvuto linango kwa nthawe itali. Nthawe zinango, mabvuto yomwe tingakhale tikugumana nayo thangwe ra kuperewera kwathu yangakhale makulu kuposa yomwe mpostolo Pedru adagumana nayo. Tsono Yahova angatipase mphanvu kuti tileke kubwerera m’mbuyo. (Sal. 94:18-19) Mwa ciratizo, m’bale munango akhali pa umakhadzi na mwamuna mwanzace kwa magole mazinji pomwe akhanati kupfunza cadidi. Iye adasiya bzimwebzo ndipo adacinja makhalidwe yace acikhala na moyo mwakubverana na nfundo za m’Bibliya. Koma napo bziri tenepo, nthawe zinango bzikhumbo bzakuipa bzimbamubwerera mu mtima mwace. N’ciyani cimbamuthandiza kuti apitirize kutumikira Yahova? Iye adati: “Yahova ambatipasa mphanvu.” Iye adalewa pomwe kuti: “Na mzimu wa Yahova . . . , ndidapfunza kuti mpsakukwanisika [kupitiriza] kucita bzomwe Yahova ambafuna . . . Yahova ambandiphatisa basa na kundipasa mphanvu napo kuti kuperewera kumbandicitisa kuti ndiphonye bzinthu bzinango.” w23.09 23 ¶12

Alumbwana, imwepo mun’funika kucita nyongo kuti mukhale Akristau wakukhwima mwauzimu. Imwepo mun’funika kusankhula wanthu wabwino kuti mutewezere, mucite nyongo kuti mumbakumbuke bwino, kukhala wakuthembeka, kupfunza mabasa yakusiyana-siyana na kukonzekera maudindo yomwe mun’dzakhala nayo kutsogolo. Nthawe zinango imwepo mukakumbukira mabasa yomwe mun’dzakhala nayo kutsogolo mungacite thupo kwene-kwene. Tsono kumbukirani kuti Yahova ali wakukonzeka kukuthandizani. (Zai. 41:10, 13) Ndipo abale na mpfumakazi zanu za m’gwere an’dzakuthandizanimbo. Imwepo mukakwanisa kukhala Mkristau wakukhwima mwauzimu, dziwani kuti moyo wanu un’dzakhala wa phindu na wakudekeza. Ifepano timbakufunani kwene-kwene alumbwanamwe! Ndipo tikufuna kuti Yahova akusimbeni pomwe mukucita nyongo yakukhala Akristau wakukhwima mwauzimu. w23.12 29 ¶19-20

Tiyezezere kuti imwepo muli pa mtsonkhano pabodzi na abale na mpfumakazi. Imwepo mukukomedwa, ndipo mukucoka foto na abalewo. Imwepo mungafunikire pomwe kucosa foto ziwiri kuti mudzakwanise kusankhula yabwino. Tsapano pa foto zitatu zomwe mwacoka, imwepo mukuwona kuti pana foto ibodzi yomwe m’bale m’bodzi akumwetulira lini. Imwepo mumbaipfudza thangwe muna kale foto ziwiri zomwe m’bale umweyo akumwetulira. Timbakumbukira bzinthu bzabwino bza m’mbuyo bzomwe abale wathu adacita. Tindendemezere kuti pa nthawe inango m’bale ayai mpfumakazi adalewa ayai kucita cinthu comwe cidakuipirani. N’ciyani comwe mungacite m’makumbukidwe mwanu? Yezerani kupfudza makumbukidwe yamweyo ninga momwe mudapfudzira foto zire. (Aef. 4:32) Tin’funika kupfudza pikado yomwe m’bale wathu wacikristau adaticitira thangwe tikukumbukira bzinthu bzabwino bzomwe iye adaticitira. Yamweya ndiyo makumbukidwe yomwe tin’funika kupitiriza kukhala nayo. w23.11 12-13 ¶16-17

Mafala ya Cigerego yomwe yadasanduliziridwa pamwepa yakuthandauza kuti mkazi wacikristau an’funika kubvala cakubvala comwe cinilatiza ulemu na kulatizambo kuti ambakumbukira wanthu winango. Ifepano timbatenda kwene-kwene mpfumakazi zathu zacikristau zomwe zimbabvala mwakuthemera! Kuzindikira ni khalidwe linango lomwe mpfumakazi zakukhwima mwauzimu zimbalatiza. Kodi kuzindikira n’ciyani? Kuzindikira ni luso lomwe tinalo lakudziwa cabwino na cakuipa ticisankhula kucita bzinthu bzabwino. Onani bzomwe Abigayeli adacita. Bayace adacita bzinthu bzakuipa bzomwe bzingadabweresa mabvuto makulu m’banja mwace. Abigayeli adacita bzinthu mwakamfulumize. Luso lace la kuzindikira lidathandiza kuti apulumuse moyo. (1 Sam. 25:14-23, 32-35) Kuzindikira kumbatithandizambo kudziwa nthawe yomwe tingalewelewe na nthawe yomwe tingakhale tidanyamala. Ndipo kumbatithandizambo kucita bzinthu mwacikati-kati pa nkhani yakulatiza lufoyi wanthu winango. — 1 Ates. 4:11. w23.12 20 ¶8-9

Mpostolo Paulo adanembera Akristau wa ku Roma mafalaya. Abale wa ku Roma adapfunza bza Yahova na Jezu, adakhala na cikhulupiro ndipo adakhala Akristau. Ndipopa Mulungu “adawawona kukhala wakulungama thangwe ra cikhulupiro cawo.” Ndipo adawadzoza na mzimu wakucena. (Aro. 5:1) Iwo angadadikhirira bzisimbo bzabwino ndipo angadakhala na citsimikizo centse cakuti angadabzitambira. Patsogolo pace, Paulo adanembera Akristau wakudzozedwa wa ku Efezo bza cidikhiro comwe Mulungu adawapasa. Iwo angadatambirambo “cuma ca ulemerero comwe [adakoyera] anyakucena ninga utaka.” (Aef. 1:18) Ndipo Paulo adalatizambo Akristau wa ku Kolose komwe iwo angadatambirira utaka bwawo. Iye adati: “Cidikhiro comwe adakukoyerani kudzulu.” (Akol. 1:4, 5) Cidikhiro ca Akristau wakudzozedwa n’cakuti akafa alamusidwe aciyenda kukakhala na moyo kudzulu, komwe an’katonga pabodzi na Jezu. — 1 Ates. 4:13-17; Apok. 20:6. w23.12 9 ¶4-5

Fala lomwe lidasanduliziridwa kuti “kukhotcerera” ni fala lomwe likhaphatisidwa basa pa kulewa bza acikunda omwe akhakhotcerera mzinda kuti uleke kupitidwa na anyamadulanthaka. Wanthu wa mu mzindamo akhabzibva kukhala wakukhotcerereka thangwe iwo akhadziwa kuti acikundawo akhakhotcerera mzindayo. Mwa njira ibodzi-bodziyi, mtendere wa Mulungu ukakhotcerera mtima wathu na makumbukidwe yathu timbakhala wakugwa mpfuwa. (Sal. 4:8) Ninga Ana, napo kuti bvuto lomwe tikugumana nalo lingamale lini kabodzi na kabodzi, tingapitirize kukhala na mtendere wa mu mtima. (1 Sam. 1:16-18) Ndipo tikakhala wakugwa mpfuwa timbakumbuka bwino ndipo timbacita bzakusankhula bza nzeru. N’ciyani comwe tin’funika kucita? Tikakhala tikugumana na mabvuto tin’funika kukumbira Yahova kuti atithandize. Kodi tingacite tani bzimwebzi? Pembani mpaka mubve mtendere wa Mulungu. (Luk. 11:9; 1 Ates. 5:17) Imwepo mukakhala mukugumana na mabvuto, pitirizani kumbapemba kwa Yahova ndipo mun’dzabva mtendere wace omwe un’dzakhotcerera mtima wanu na makumbukidwe yanu. — Aro. 12:12. w24.01 21 ¶5-6

Kuti Jezu acenese dzina la Pai wace, iye adagumana na mabvuto mazinji ninga kutukwanidwa na kunamiziridwa magunkha. Iye akhadziwa kuti wabvera Pai wace pa bzinthu bzentse; ndipopa iye akhalibe nabzo basa kuti angadacitisidwa manyazi. (Aheb. 12:2) Iye akhadziwa kuti Sathani ndiye omwe akhacitisa bzimwebzi. (Luk. 22:2-4; 23:33, 34) Sathani akhakumbuka kuti angadakwanisa kucitisa Jezu kuleka kukhala wakukhulupirika kwa Yahova. Tsono Sathani adatazira kukwanirisa cakulinga cace! Jezu adalatiza kuti Sathani ngwakunama na wakuipa ndipo Yahova ana atumiki wace omwe napo akagumana na mabvuto ambapitiriza kukhala wakukhulupirika! Kodi imwepo mukufuna kukondwesa Mambo wanu, Jezu? Pitirizani kutumbiza dzina la Yahova na kuthandizambo wanthu winango kuti amudziwe bwino Yahovayo. Mukacita bzimwebzi, imwepo mumbakhala mukutewera nzayo za Jezu. (1 Ped. 2:21) Ninga Jezu, imwepo mumbakondwesa mtima wa Yahova ndipo mumbalatiza kuti Sathani ni nyamagunkha wakusaya manyazi! w24.02 11-12 ¶11-13

Magole 5 m’mbuyomu, wanthu azinji adabatizidwa acikhala Mboni za Yahova. Imwepo mukabzipereka kwa Yahova mumbasankhula kukhala mteweri wa Jezu ndipo mumbawona kuti kucita kufuna kwa Mulungu n’cinthu cakufunika kwene-kwene pa moyo wanu. Kodi kubziperekako kumbaphatanidza ciyani? Jezu adalewa kuti: “Munthu ali-wentse omwe an’funa kunditewera, abzilambe yekha.” (Mat. 16:24) Fala la Cigerego lomwe lidasanduliziridwa kuti “abzilambe yekha” lingathandauze “kuleka kubzifuna yekha.” Imwepo mukabzipereka kwa Yahova, mun’dzafunikira kulamba cinthu ciri-centse comwe cimbabverana lini na kufuna kwace. (2 Ako. 5:14, 15) Bzimwebzi bzimbaphatanidzambo “mabasa ya thupi,” ninga upombo. (Agal. 5:19-21; 1 Ako. 6:18) Kodi kubvera malango yamweya kungacitise kuti moyo wanu ukhale wakunesa? Penu imwepo mumbafuna Yahova, mun’dzakwanisa kuzindikira kuti malango yamweya njabwino kwa imwepo ndipo yan’dzakucitisani kuti mukhale na moyo wabwino. — Sal. 119:97; Zai. 48:17, 18. w24.03 2 ¶1; 3 ¶4

Yahova ambapereka mzimu wace wakucena kwa wale omwe iye akukomedwa nawo. (Mat. 12:18) Bzibvunzeni kuti: ‘Kodi pana makhalidwe yanango yacikristau yomwe inepano nimbakwanisa kuyalatiza pa moyo wangu?’ Pinango tsapano imwepo mumbakwanisa kupirira na anzanu kuposa pomwe mukhanati kupfunza Bibliya. Mukambacita nyongo yakulatiza makhalidwe yomwe mzimu wakucena umbabala, imwepo mun’dzakhala na citsimikizo cakuti Yahova akukomedwa namwe. Yahova ambaphatisa basa mphanvu ya cakulombolera kuti abvume wanthu omwe iye ambakomedwa nawo. (1 Tim. 2:5, 6) Tsono tani penu ifepano tina makumbukidwe yakuti Yahova ambakomedwa lini nafe napo kuti timbakhulupira cakulombolera ndipo tidabatizidwa? Cinthu comwe tingacite ndico kutcenkha kukhulupira nzeru zathu koma tin’funika kukhulupira Yahova. Iye ambawona wentse omwe ambakhulupira cakulombolera kuti mbakulungama m’maso mwace ndipo ambapicira kuti an’dzawasimba. — Sal. 5:12; Aro. 3:26. w24.03 30 ¶15; 31 ¶17