Outubro

Kodi nthawe zinango bzimbakunesani kubvera? Mambo Davide bzidamunesa kale. Ndipopa, iye adapemba kwa Mulungu kuti: “Ndipaseni mtima wakufuna kumbakubverani.” (Sal. 51:12) Davide akhafuna kwene-kwene Yahova. Napo bziri tenepo, iye nthawe zinango bzikhamunesa kubvera. Ndipo ifepano bzingatinesembo. Thangwe ranyi? Thangwe cakuyamba, ifepano tidabadwa na mtima wakusaya kufuna kubvera. Caciwiri, Sathani ambaticitisa kuti tileke kubvera Yahova ticipanduka, ninga momwe iye adacitira. (2 Ako. 11:3) Cacitatu, ifepano tidazunguliridwa na wanthu womwe ana mzimu wakusaya kubvera wa m’dzikoli, ndipo “makumbukidwe yamweya, tsapano yakuphata basa kwa wanthu wakusaya kubvera.” (Aef. 2:2) Tin’funika lini kucita nyongo yakundotcenkha kucita bzinthu bzakuipa basi, koma tin’funikambo kutcenkha mzimu omwe Sathani pabodzi na dzikoli anawo omwe ungaticitise kusaya kufuna kubvera. Tin’funika kucita nyongo kuti tibvere Yahova na wale omwe ana udindo. w23.10 6 ¶1

Kodi tingapfunze ciyani na cakudabwisa ca Jezu cakusandusa madzi kukhala vinyu yabwino? Tikupfunza kuti tin’funika kumbakhala wakubzicepesa. Jezu alibe kubziwonesera pomwe adacita cakudabwisa cire; ndipo alibe kubziwoneserambo pa bzinthu bzentse bzomwe iye akhacita. Koma nthawe zentse, iye akhambatumbiza Baba wace. (Juw. 5:19, 30; 8:28) Tikakhala wakubzicepesa ninga Jezu tin’dzabziwonesera lini pa bzomwe timbacita. Tin’funika lini kumbabzitumbiza, koma tin’funika kumbatumbiza Mulungu omwe timbamutumikira. (Jer. 9:23, 24) Ifepano tin’funika kucita bzimwebzi thangwe timbazindikira kuti bzakwanisika na thandizo la Yahova. (1 Ako. 1:26-31) Tikakhala wakubzicepesa, tin’dzabziwonesera lini tikacitira cinthu wanthu winango. Timbakhala wakukondwa pakudziwa kuti Yahova ambawona bzentse bzomwe timbacita. (Ndendemezerani na Mateu 6:2-4; Aheb. 13:16) Tikatewezera kubzicepesa kwa Jezu tin’dzakondwesa Yahova. — 1 Ped. 5:6. w23.04 4 ¶9; 5 ¶11-12

Mwakutsogoleredwa na mzimu wa Mulungu, mpostolo Paulo adauza Akristau kuti ambakumbukirembo anzawo. Kodi tingaphatise tani basa malango yamweya pa mitsonkhano? Tingacite bzimwebzi mwa kumbakumbukira kuti anzathu ambafunambo kutawira. Tiyezezere tenepa. Imwepo mukakhala mukuceza na axamwali wanu, kodi mumbandolalewa ndimwepo mwekha ndipo anzanuwo ambandokhala adanyamala? Bzikuwonekeratu kuti ne. Imwepo mumbafuna kuti iwo alalewembo. Mpsibodzi-bodzimbo na pa mitsonkhano. Timbafuna kuti wanthu azinji atawirembo. Njira ibodzi yakulimbikisira abale na mpfumakazi zathu ndiyo kuwapasa mpata kuti atawirembo. (1 Ako. 10:24) Ndipopa tin’funika kupereka mitawiro yathu mwacigwatira kuti tipase mpata anzathu kuti atawirembo. Imwepo mukapereka mtawiro wacigwatira, tcenkhani kumbalalewa bzinthu bzizinji. Imwepo mukalewa bzinthu bzizinji bzomwe bziri pa ndimepo, winango an’dzasaya bzakulewambo. w23.04 22-23 ¶11-13

Tin’funika kumbakumbukira kuti cinthu cakufunika ndico kupitiriza kuthandiza wanthu winango mwa kumbacita basa la kupalizira. Pomwe tikucita basa la kupalizira tin’funika kumbacinja bzinthu mwakamfulumize. Ifepano timbagumana na wanthu omwe ambakhulupira bzinthu bzakusiyana-siyana, wa makhalidwe yakusiyana-siyana na wakucokera ku mbuto zakusiyana-siyana. Mpostolo Paulo akhambacinja bzinthu mwakamfulumize ndipo ifepano tingamutewezerembo. Jezu adasankhula Paulo kuti akhale “mpostolo wa wanthu wa mitundu inango.” (Aro. 11:13) Utumiki bumwebu budacitisa Paulo kuti apalizire Adjuda, Agerego, wanthu wakudziwa bzinthu kwene-kwene, wanthu wakusauka, atongi na amambo. Kuti iye akwanise kuthandiza wanthu wentsenewa, Paulo adakhala “bzinthu bzentsenebzi kwa wanthu wa mitundu yentse.” (1 Ako. 9:19-22) Akafuna kuceza na wanthu, iye akhakumbukira kwene-kwene bza cikhalidwe cawo, bzomwe iwo ambakhulupira na komwe adacokera. Kuti bzinthu bzitifambire bwino pomwe tikupalizira, tin’funikambo kukhala wanthu wakucenjera ticimbacinja kapaliziridwe kathu mwakubverana na wanthu omwe tikuwapalizirawo. w23.07 23 ¶11-12

Munthu wakuderekha ngwamphanvu sikuti wakusaya mphanvu. Thangwe ranyi tikulewa tenepo? Thangwe bzimbafunika kukhala na mphanvu kuti tikwanise kukhala wakuderekha tikanyosedwa. Kuderekha ni khalidwe libodzi lomwe “mzimu wakucena umbabala.” (Agal. 5:22, 23) Fala la Cigerego lomwe lidasanduliziridwa kuti “kuderekha” nthawe zinango likhaphatisidwa basa pa kufotokoza bza cirombo ca m’thengo comwe cazereweresedwa kuti cikhale na wanthu. Yezezerani kuti mukuwona cirombo cimweci pomwe cakhala cakuderekha. Napo kuti ico n’cakuderekha, koma n’camphanvu basi. Mwakundendemerana na cirombo cimweci, kodi wanthufe tingakulise tani khalidwe la kuderekha, koma nthawe ibodzi-bodziyo ticipitiriza kukhala wamphanvu? Tingakwanise lini kucita bzimwebzi na mphanvu zathu. Comwe cingatithandize ni mzimu wa Mulungu, ndipo tin’funika kukumbira Mulunguyo kuti atithandize kukulisa khalidwe limweri. Pana wanthu azinji omwe adapfunza kukhala wakuderekha. Mwa ciratizo, abale na mpfumakazi zathu zizinji adalatiza kuderekha pomwe wanthu akhawanyosa, ndipo bzimwebzi bzidathandiza wanthuwo kuti awone kuti Mboni za Yahova ni wanthu wabwino. — 2 Tim. 2:24, 25. w23.09 15 ¶3

M’masomphenya yakudabwisa, mpostolo Juwau adawona akulu 24 kudzulu akutumbiza Yahova. Iwo akhatumbiza Mulungu thangwe ra kuzindikira kuti iye ngwakuthemera kupasidwa “ulemerero, ulemu na mphanvu.” (Apok. 4:10, 11) Anjo wakukhulupirika ana mathangwe yakubveka yakulemekeza na kutumbiza Yahova. Iwo ali kudzulu pabodzi na Yahova ndipo ambamudziwa bwino. Iwo ambawona makhalidwe yace yomwe yambawonekera pa bzomwe iye ambacita. Pakuwona mabasa makulu yomwe Yahova ambacita, iwo ambapereka ulemu kwa iye. (Djob. 38:4-7) Mpsibodzi-bodzimbo na ifepano. Pomwe tikucita mipembo yathu kwa Yahova, tin’funika kumbalewa mafala yomwe yambalatiza kuti timbamufuna na kumutenda. Pomwe tikuwerenga na kupfunza Bibliya, tin’funika kumbawona makhalidwe ya Yahova yomwe yambaticitisa kuti timufune. (Djob. 37:23; Aro. 11:33) Ndipo mungamuuze Yahova bza makhalidwe yabwino yomwe mwawona. Tingatumbize Yahova thangwe rakuti ambatikhotcerera na kukhotcererambo abale wathu wacikristau. — 1 Sam. 2:1, 2. w23.05 3-4 ¶6-7

Kuyambira mu gole la 1919, Babiloniya Mkulu akukwanisa lini kutazisa wanthu wa Mulungu kutumikira Yahova. Mu gole limweri, Jezu adaikha “kapolo wakukhulupirika na wanzeru.” Ndipo kapoloyo adayamba kuphata basa kuti athandize wale omwe akhana mitima yabwino kufamba mu “Mseu Wakucena.” (Mat. 24:45-47; Zai. 35:8) Basa la “kukonza njira” lomwe wanthu winango adacita pomwe gole limweri likhanati kufika lidathandiza wanthu azinji kuti ayambe kufamba mu mseu umweyu aciyamba kudziwa bzinthu bzizinji pakulewa bza Yahova na cakulinga cace. (Mim. 4:18) Ndipo bzimwebzi bzidacitisa kuti wanthuwo acinje bzinthu pa moyo wawo aciyamba kucita bzomwe Yahova ambafuna. Yahova alibe kudikhirira kuti wanthu wacewo acinje kabodzi na kabodzi. Koma iye adawathandiza kucinja pang’ono na pang’ono. Tentsenefe timbakomedwa kwene-kwene tikambakondwesa Yahova pa ciri-centse comwe timbacita. Mseu uli-wentse kuti upitirize kukhala udapfumbira pambafunika kucitidwa basa. Kuyambira mu gole la 1919, basa lakukonza “Mseu Wakucena” likadapitiriza na cakulinga cakufuna kuthandiza wanthu azinji kucoka m’magereja yakunama. w23.05 17 ¶15; 19 ¶16

Bungwe Lakutonga limbapfunzisa abale omwe ambathandizira m’makomiti ya Bungwe Lakutonga. Athandizi amwewa akucita mabasa mazinji yakusiyana-siyana mwakukhulupirika. Iwo ali wakukonzeka kuti adzapitirize kuthandiza mabira ya Kristu. Akristau wakudzozedwa wakumalizira akadzatengedwa aciyenda kudzulu kuphampha kwa citsautso cikulu, kunamata kwakucena kun’dzapitiriza pa dziko la pantsi pano. Atumiki wa Yahova an’dzapitiriza kumunamata thangwe ra kutsogoleredwa na Jezu Kristu. Tikudziwa kuti pa nthawe imweyo mbverano wa mitundu wakucemeredwa Gogi wa ku Magogi an’dzafuna kupfudza wanthu wa Mulungu. (Ezek. 38:18-20) Tsono bzimwebzi bzin’dzacitisa lini kuti atumiki wa Yahova asiye kunamata Yahovayo. Iye an’dzawapulumusa! M’masomphenya yanango, mpostolo Juwau adawona “thimu likulu” la mabira yanango ya Kristu. Mpostolo Juwau adauzidwa kuti “thimu likulu” limweri likhacoka “ku citsautso cikulu.” (Apok. 7:9, 14) Bzimwebzi bzikulatiza kuti iwo an’dzakhotcereredwa! w24.02 5-6 ¶13-14

N’ciyani comwe tin’funika kucita kuti titambire mzimu wakucena? Kuti titambire mzimu wakucena, tin’funika kucita mpembo, kuwerenga Fala la Mulungu, Bibliya, na kupitiriza kukhala mu gulu lace lomwe limbatsogoleredwa na mzimu wakucena. Bzimwebzi bzin’dzatithandiza kulatiza makhalidwe yomwe “mzimu wakucena umbabala.” (Agal. 5:22, 23) Mulungu ambapereka mzimu wace wakucena kwa wale omwe ana makumbukidwe yakucena na makhalidwe yakucena. Tikakhala na nzeru zakuipa na kucita bzinthu mwakubverana na nzeru zakuipazo, Mulungu angatipase lini mzimu wace wakucena. (1 Ates. 4:7, 8) Kuti tipitirize kutambira mzimu wakucena, tin’funika lini “kunyozera mafala ya polofesiya.” (1 Ates. 5:20) Mapolofesiya yambalewa bza nkhani zakusiyana-siyana zakukonzedwa na mzimu wakucena, kuphatanidzambo bza ntsiku ya Yahova na bzinthu bzomwe bzikucitika mu ntsiku zathu zino. Ifepano tin’funika lini kukumbuka kuti ntsiku ya Yahova in’bwera lini nthawe yathu ino, ayai pomwe ifepano tikana moyo. Koma tin’funika kumbaikumbukira ntsikuyi ticipitiriza kukhala na makhalidwe yabwino ticimbacita bzinthu bzomwe bzin’latiza kuti ndife wanthu “wakubzipereka kwa Mulungu” ntsiku zentse. — 2 Ped. 3:11, 12. w23.06 12 ¶13-14

N’ciyani comwe Mkristau an’funika kucita cithunzi-thunzi ca pornografia cikabwera pa telefoni ayai pa komputadori yace? Mwakusaya kucedwa iye an’funikiratu kucosa cithunzi-thunzico. Comwe cingatithandize kuti tikwanise kucita bzimwebzi ndico kukumbukira kuti uxamwali bwathu na Yahova ndico cinthu cakufunika kwene-kwene. Napo bzithunzi-thunzi bzomwe bzimbalewedwa kuti ni pornografia lini bzingacitise kuti munthu akhale na cikhumbo cakufuna kucita upombo. Thangwe ranyi tin’funikambo lini kuwona bzithunzi-thunzi bzimwebzi? Thangwe tin’funa lini kuti cinthu ciri-centse citicitise kukhala na nzeru za upombo. (Mat. 5:28, 29) Mkulu munango wa gwere wa ku Tailândia, wakucemeredwa David, adalewa kuti: “Ndidabzibvunza kuti: ‘Napo kuti cithunzi-thunzici ni pornografia lini, tsono, kodi Yahova angakomedwe nande akandiwona kuti ndikucinyang’anisa?’ Kukumbukira bzimwebzi kumbandithandiza kuti ndicite bzinthu mwanzeru.” Kugopa kucita cinthu comwe cingacitise Yahova kusaya kukomedwa kungatithandize kuti ticite bzinthu mwanzeru. Bibliya limbalewa kuti kugopa Mulungu ndico “ciyambi ca nzeru.” w23.06 23 ¶12-13

“Bzipinda bza mkati” bzingathandauze magwere. Pa nthawe ya citsautso cikulu Yahova adalewa kuti an’dzatikhotcerera tikapitiriza kukhala wakubverana na abale na mpfumakazi zathu. Ndipopa tin’funika kucita nyongo kuti tilatize lufoyi kwa abale na mpfumakazi zathu ntsiku zino. Kuti tidzapulumuke tin’dzafunikira kucita bzimwebzi! “Ntsiku ikulu ya Yahova” in’dzakhala yakugopswa kwene-kwene kwa wanthu wentse wakukhala pa dziko la pantsi. (Zef. 1:14, 15) Napo atumiki wa Yahova an’dzagumanambo na mabvuto pa nthawe imweyi. Tsono tikakonzekereratu tsapano, tin’dzakhala tiribe thupo ndipo tin’dzakwanisa kuthandizambo anzathu. Tin’dzakwanisa kupirira mabvuto yali-yentse yomwe tin’dzagumana nayo. Abale na mpfumakazi zathu akadzakhala akugumana na mabvuto, tin’dzacita bzomwe tin’dzakwanisa kuti tidzawathandize mwa kuwalatiza ntsisi na kuwapasa bzomwe akufunikira pa moyo wawo. Ndipo tikakhala wakubverana na abale na mpfumakazi zathu ntsiku zino, bzin’dzaticitisa kuti tidzawalatize lufoyi kutsogolo. Yahova an’dzatisimba mwa kutipasa moyo wakusaya kumala mu dziko lomwe mabvuto yentse na malengwa ya pantsi kun’dzakhala kulibe. — Zai. 65:17. w23.07 7 ¶16-17

Kazinji-kazinji Fala la Mulungu likambalewa bza amuna wakukhulupirika, limbalewa kuti iwo akhali wamphanvu. Tsono napo ule omwe akhabziwona kuti akhali wamphanvu kwene-kwene, nthawe zinango akhali lini wa mphanvu. Mwa ciratizo, nthawe zinango Mambo Davide akhabziwona kukhala wamphanvu “ninga mapiri,” tsono nthawe zinango, iye “akhabva mantha.” (Sal. 30:7) Napo kuti Samusoni akhabzibva kuti akhali wamphanvu thangwe ra kuthandizidwa na mzimu wa Mulungu, iye adazindikira kuti angadasaya kuthandizidwa na mphanvu ya Mulungu “angadakhala wakusaya mphanvu ninga amuna winango.” (Ato. 14:5, 6; 16:17) Yahova ndiye omwe adapasa mphanvu atumiki wace wakukhulupirikawa. Mpostolo Paulo adazindikira kuti akhafunika kuthandizidwa na mphanvu ya Yahova. (2 Ako. 12:9, 10) Iye akhana bvuto la thanzi. (Agal. 4:13, 14) Nthawe zinango, iye akhaneseka kucita bzinthu bzabwino. (Aro. 7:18, 19) Ndipo nthawe zinango, iye akhakhala na thupo pabodzi na mantha ya bzomwe bzingadamucitikira. (2 Ako. 1:8, 9) Napo bziri tenepo, pomwe Paulo akhali wakuwofoka iye adakhala wamphanvu. Mwa njira iponi? Yahova adapasa Paulo mphanvu yomwe iye akhafunikira kuti akwanise kukunda mabvuto yomwe akhagumana nayo. w23.10 12 ¶1-2

Penu nthawe zinango timbabziwona kuti ndife wakusaya kufunika, tin’funika kukumbukira kuti Yahova ambatifuna, ndipopa adatibweresa mu cadidi. (Juw. 6:44) Iye ambakwanisa kuwona bzinthu bzabwino mwa ifepano bzomwe timbakwanisa lini kubziwona tekha, ndipo iye ambadziwa mtima wathu. (2 Nkha. 6:30) Ndipopa tin’funika kukhulupira iye akatiuza kuti ambatifuna. (1 Juw. 3:19, 20) Pomwe azinji wa ifepano tikhanati kupfunza Bibliya tikhacita bzinthu bzizinji bzakuipa, ndipo tikakumbukira bzimwebzi ifepano timbabzipasa mulandu. (1 Ped. 4:3) Napombo Akristau wakukhulupirika ambakhalambo nazo nzeru zimwezi. Kodi imwepo mumbabvambo tenepo nthawe zinango? Penu ndibzo, dziwani kuti muli lini mwekha. Atumiki winango wakukhulupirika wa Yahova adabvambo bzibodzi-bodzibzo. Mwa ciratizo, mpostolo Paulo akhabziwona kuti ni munthu wakutsautsika thangwe ra pikado zomwe adacita pomwe akhanati kukhala Mkristau. (Aro. 7:24) Tsono, iye akhadakungula pikado zacezo ndipo adabatizidwa. Napo bzikhali tenepo, iye adabzilewa kuti akhali “mpostolo wakumalizira” ndipo akhali nyapikado “mkululetu.” — 1 Ako. 15:9; 1 Tim. 1:15. w24.03 27 ¶5-6

Cinthu cibodzi comwe tingapfunze na bzakusankhula bzakuipa bzomwe Mambo Jehowasi adacita n’cakuti tin’funika kumbasankhula axamwali omwe ambafuna Yahova na omwe ambafuna kumukondwesa. Axamwali amwewa an’dzatithandiza kuti timbacite bzinthu mwanzeru. Ifepano tingakhale pa uxamwali napo na wanthu omwe mbakulu na ifepano. Kumbukirani kuti Jehowasi akhali mng’ono kwene-kwene na Jehoyada. Pakulewa bza axamwali, mbabzibvunzani kuti: ‘Kodi axamwali wangu ambandithandiza kuti ndilimbise uxamwali bwangu na Yahova? Kodi iwo ambandilimbikisa kuti nimbabvere mitemo ya Yahova? Kodi iwo ambalewa bza Yahova na bzinthu bzomwe apfunza m’Bibliya? Kodi iwo ambandipasa malango bzikafunikira, ayai ambandondiuza bzinthu bzomwe bzimbandidekera basi?’ (Mim. 27:5, 6, 17) Kulewa cadidi, penu axamwali wanu ambafuna lini Yahova, imwepo mun’funika kumalisa uxamwalibo. Tsono penu axamwali wanuwo ambafuna Yahova, iwo an’dzakuthandizani nthawe zentse. — Mim. 13:20. w23.09 9-10 ¶6-7

Alfa ni letra yakuyamba ya alfabeto ya Cigerego ndipo Omega ni letra yakumalizira. Mwakuphatisa basa maletra yamweya ya “Alfa na Omega,” Yahova adalatiza kuti iye akayamba kucita cinthu, cinthuco ambadzacimaliza. Pomwe Yahova adamala kulenga Adamu na Eva, iye adawauza kuti: “Balanani, muwande, mudzaze dziko la pantsi, mucirinyang’anira.” (Gen. 1:28) Mafala yomwe Yahova adalewaya yakuthandauza kuti iye adalewa kuti “Alfa.” Iye adalewa cakulinga cace: Ingadadzafika nthawe yomwe mbadwa zakubvera na zakulungama za Adamu na Eva zingadadzaza dziko la pantsi zicilisandusa Paraizo. Bzimwebzi bzikadzakwanisika kutsogolo, Yahova an’dzalewa kuti “Omega.” Pomwe Yahova adamala kulenga “kudzulu, dziko la pantsi pabodzi na bzentse,” iye adapereka citsimikizo cakuti an’dzakwanirisa cakulinga cace kuna wanthu na dziko la pantsi. Ndipo bzimwebzi bzingadadzakwanirisidwa kuphampha kwa ntsiku yaci 7. — Gen. 2:1-3. w23.11 5 ¶13-14

Ulendo bwakunesa bomwe Adjuda angadacita bwakucokera ku Babiloniya kuyenda ku Jirayeri bungadamala minyezi minai, tsono Yahova adapicira kuti mabvuto yali-yentse yomwe yangadafuna kutazisa ulendobo yangadacosedwa. Adjuda wakukhulupirika akhadziwa kuti angadatambira bzisimbo bzizinji angadabwerera ku Jirayeri. Ndipo cisimbo cikulu comwe angadatambira cikhali kunamata Yahova. Ku Babiloniya kukhalibe ne templo ibodzi ya Yahova. Ndipo kukhalibembo ne guwa la ntsembe kuti Ajirayeri ambaperekere ntsembe, ninga momwe Malamulo ya Mozeji yakhalewera. Ndipo pakhalibe makonzedwe yakuti antsembe ambacite basa limweri. Ku Babiloniya kukhana wanthu azinji omwe akhanamata mirungu yakunama kuposa wanthu womwe akhateweza mitemo ya Yahova. Ndipopa Adjuda azinji omwe akhafuna Yahova akhafunisisa kubwerera ku dziko lawo kuti akayambe pomwe kunamata Yahova. w23.05 14-15 ¶3-4

Cinthu cinango comwe cingatithandize kufamba ninga “wana wa ceza” ni mzimu wakucena wa Mulungu. Thangwe ranyi? Thangwe rakuti mpsakunesa kwene-kwene kupitiriza kukhala wakucena mu dziko lakuipali. (1 Ates. 4:3-5, 7, 8) Mzimu wakucena ungatithandize kucinja makumbukidwe yathu ticileka kumbakumbuka ninga wanthu wa m’dzikoli. Ndipo mzimu wakucenayo ungatithandizembo kulatiza “ubwino bwentse na cirungamo.” (Aef. 5:9) Cinthu cibodzi comwe tingacite kuti titambire mzimu wakucena ndico kuukumbira kwa Yahova. Jezu adalewa kuti Yahova an’dzapereka mzimu wakucena “kwa wale omwe ambamukumbira.” (Luk. 11:13) Ndipo tikambatumbiza Yahova pabodzi na Akristau anzathu pa mitsonkhano timbatambirambo mzimu wakucena. (Aef. 5:19, 20) Tikakhala na mzimu wakucena, ifepano tin’dzakwanisa kukhala na moyo omwe umbakondwesa Mulungu. w24.03 23-24 ¶13-15

Kodi bzimbakunesani kupirira? Penu ndibzo, pembani kwa Yahova kuti akuthandizeni kukhala wakupirira. Kupirira ni khalidwe libodzi lomwe mzimu wakucena umbabala. (Agal. 5:22, 23) Ndipopa, tingapembe kwa Yahova kuti atipase mzimu wakucena kuti utithandize kukhala wakupirira. Tikagumana na bvuto lomwe likuyeza kupirira kwathu, ifepano ‘tin’dzapitiriza kukumbira’ mzimu wakucena kuti utithandize kukhala wakupirira. (Luk. 11:13) Ndipo tingakumbirembo Yahova kuti atithandize kuwona bzinthu ninga momwe iye ambabziwonera. Pambuyo pakupemba tingafunike kucita nyongo ntsiku iri-yentse kuti tikhale wakupirira. Tikambapemba kwa Yahova nthawe zentse kuti atithandize kukhala wakupirira na kucita nyongo yakukhala wakupirira, khalidwe limweri lin’dzakula kwene-kwene mu mtima mwathu ndipo tin’dzakwanisa kulilatiza. Cinthu cinango comwe cingakuthandizeni ndico kumbakumbukira nkhani za m’Bibliya. M’Bibliya muna nkhani zizinji za wanthu omwe adakhala wakupirira. Tikambakumbukira nkhani zimwezi timbapfunza njira zakusiyana-siyana za momwe tingalatizire kupirira. w23.08 22 ¶10-11

Jezu adatsimikizira mpostolo Pedru kuti Yahova angadamuthandiza. Pomwe Jezu adalamusidwa adacitisa kuti Pedru na apostolo anzace aphate pomwe ntsomba mwakudabwisa. (Juw. 21:4-6) Cakudabwisaci cidamutsimikizira Pedru kuti Yahova angadamuthandiza mwa kumupasa bzomwe angadafunikira pa moyo wace. Pinango Pedruyo adakumbukira mafala ya Jezu yakuti Yahova angadasamalira wale omwe angadaikha “Umambo bwa Mulungu . . . pa mbuto yakuyamba.” (Mat. 6:33) Bzimwebzi bzidathandiza Pedru kuti aikhe basa lakupalizira pa mbuto yakuyamba pa moyo wace, sikuti basa la kupha ntsomba. Iye adapalizira mwakukhwimika pa ntsiku ya Pentekosite ya mu 33 EC, acithandiza wanthu azinji kubvuma mafala yabwino ya Umambo. (Mab. 2:14, 37-41) Patsogolo pace, iye adathandiza wanthu wa ku Samariya pabodzi na wanthu omwe akhali lini Adjuda kubvuma Kristu. (Mab. 8:14-17; 10:44-48) Yahova adaphatisa basa Pedru kuti abwerese wanthu wakusiyana-siyana mu gwere lacikristau. w23.09 20 ¶1; 23 ¶11

Pomwe padapita magole mawiri pambuyo pa Ababiloniya kupfudza mzinda wa Jeruzalemu, Mambo Nabukadinazori wa ku Babiloniya adalota maloto yakupasa mantha kwene-kwene ya cifanikiso cikulu. Iye adauza adziwi wentse kuphatanidzambo Daniyeli kuti awauze bzomwe iye akhadalota na thandauzo lace. Iwo angadatazira kucita bzimwebzo wentse angadaphedwa. (Dan. 2:3-5) Daniyeli akhafunika kucita bzinthu mwakamfulumize, thangwe angadasaya kucita tenepo wanthu azinji angadaphedwa. Iye “adayenda kwa mambo, acikamukumbira kuti amupase nthawe yakuti amuthumbudzulire maloto yaceyo.” (Dan. 2:16) Bzimwebzi bzidalatiza kuti Daniyeli akhali wakukhwimika ndipo akhana cikhulupiro. Thangwe ranyi tikulewa tenepoyo? Thangwe Bibliya limbalewa lini kuti Daniyeli akhadathumbudzula kale maloto. Iye adakumbira anzace “kuti iwo apembe kuna Mulungu kuti awacitire ntsisi na kuwazimbulira cintsintsico.” (Dan. 2:18) Yahova adatawira mipembo yawo. Na thandizo la Yahova, Daniyeli adathumbudzula maloto ya Nabukadinazori. Ndipo iye na anzacewo alibe kuphedwa. w23.08 3 ¶4

Onani phindu lomwe limbabwera thangwe ra kukhala wakupirira. Tikakhala wakupirira, timbakhala wakukondwa na wakugwa mpfuwa. Ndipopa kupirira kumbacitisa kuti tikhale na thanzi labwino. Tikalatiza kupirira na anzathu, timbakhala wakubverana nawo. M’gwere mwathu timbakhala wakuphatana. Munthu akatinyosa, kuleka kukalipa mwakamfulumize kungacitise kuti bzinthu bzireke kuipiratu. (Sal. 37:8; Mim. 14:29) Kuposa bzentse, timbatewezera Pai wathu wakudzulu ndipo timbakhala pa uxamwali bwakulimba na iye. Kulewa cadidi, kupirira ni khalidwe labwino kwene-kwene lomwe lingatithandize tentsenefe! Napo kuti bzingakhale lini bzakupusa kulatiza khalidwe limweri nthawe zentse, tsono na thandizo la Yahova, ifepano tingapitirize kulikulisa. Ndipo pomwe tikudikhirira dziko lipsa, ifepano tingakhale na citsimikizo cakuti “maso ya Yahova yambawona wale omwe ambamugopa, wale omwe ambadikhirira lufoyi lace lacadidi.” (Sal. 33:18) Bwerani tentse tipitirize kukhala wakupirira. w23.08 22 ¶7; 25 ¶16-17

Tiyago adalewa kuti mwamuna angalewe kuti ana cikhulupiro koma bzicito bzace bzikulatiza kuti alibe cikhulupiro. (Tiy. 2:1-5, 9) Tiyago adafotokozambo bza mwamuna omwe adawona ‘m’bale wace ayai mpfumakazi yace yomwe ina usiwa ndipo akhalibe cakudya’ tsono iye alibe kumuthandiza. Napo kuti mwamuna umweyu angalewe kuti ana cikhulupiro, bzakucita bzace bzikulatiza kuti alibe cikhulupiro. (Tiy. 2:14-17) Tiyago adafotokoza bza Rahabi omwe adalatiza na bzicito bzace kuti akhana cikhulupiro. (Tiy. 2:25, 26) Rahabiyo adabva bzizinji pakulewa bza Yahova ndipo akhadziwa kuti Yahovayo akhathandiza Ajirayeri. (Djos. 2:9-11) Bzicito bzace bzidalatiza kuti iye akhana cikhulupiro. Thangwe ra cikhulupiro caceco, iye adakhotcerera azondi awiri pomwe moyo wawo ukhali pa ngozi. Rahabi adawonedwa kuti akhali wakulungama napo kuti akhali lini Mjirayeri, ninga momwe bzidakhalira kwa Abalahamu. Bzomwe iye adacitabzi bzikutipfunzisa kuti tin’funika kulatiza kuti tina cikhulupiro na bzicito bzathu. w23.12 5-6 ¶12-13

Ninga Akristau, tin’funika lini kundobvesesa cipfunziso cakuyambirira ca m’Bibliya. Na thandizo la mzimu wakucena wa Mulungu, tikufunisisa kubvesesa “napo cintsintsi cakubisika ca Mulungu.” (1 Ako. 2:9, 10) Imwepo mungacite pfunziro lakuzika kuti mukhale pa uxamwali bwakulimba na Yahova. Mwa ciratizo, imwepo mungafufudze momwe iye adalatizira lufoyi atumiki wace wakale-kale na momwe bzimwebzi bzimbalatizira kuti ambakufunani. Imwepo mungapfunze momwe Yahova akhafunira kuti Ajirayeri amunamate mucindendemezera na momwe iye ambafunira kuti timunamate ntsiku zino. Ayai imwepo mungapfunze mwatceru mapolofesiya yomwe Jezu adakwanirisa pomwe akhali pano pa dziko la pantsi na utumiki bomwe iye adacita. Imwepo mungawone bzinthu bzinango bzomwe iwo adatawira pa kwadru yakuti “Nfundo Zomwe Mungazipfunze pa Pfunziro Lanu la Pamwekha.” Imwepo mungakhale wakukondwa mukambapfunza nkhani zimwezi mwakuthandizidwa na Índice das Publicações da Torre de Vigia na Bukhu la Kufufudzira Nkhani la Mboni za Yahova. Kucita pfunziro la Bibliya lakuzika kun’dzalimbisa cikhulupiro canu ndipo kun’dzakuthandizani “kumudziwadi Mulungu.” — Mim. 2:4, 5. w23.10 18-19 ¶3-5

Mafala yomwe Pedru adayaphatisa basa yakuti “na mtima wentse” yambathandauza “cinthu citali.” Mbali yaciwiri ya mu vesiri imbalewa bzomwe tin’dzacita tikakhala na lufoyi kuna abale na mpfumakazi zathu. Lufoyi limbampsinkha pikado zawo. Tingayezezere bzimwebzi na meza yomwe idakweceka-kweceka. Tikampsinkha mezayo na nguwo, nguwoyo imbandompsinkha lini mbali yakucepa yomwe idakweceka. Koma imbampsinkha mbali zentse zomwe zidakwecekazo. Mwa njira ibodzi-bodziyi, tikalatiza lufoyi lakucokera mu mtima kwa abale na mpfumakazi zathu, tingampsinkhe ayai kulekerera, sikuti pikado ibodzi ayai ziwiri, koma “pikado zizinji.” Tin’funika kulatiza lufoyi lamphanvu kuti tikwanise kulekerera bzakuphonya bza abale wathu wacikristau, napo kuti kucita bzimwebzi kungakhale kwakunesa kwene-kwene. (Akol. 3:13) Tikakwanisa kulekerera anzathu, timbalatiza kuti tina lufoyi lamphanvu ndipo tikufuna kukondwesa Yahova. w23.11 11-12 ¶13-15

Pomwe Mambo Josiya adayamba kukonza-konza templo, iye akhana magole 26. Pa nthawe yomwe basali likhacitidwa, “bukhu la Malamulo lomwe lidanembedwa na Mozeji” lidagumanidwa. Pomwe mambo adabva bzomwe bukhulo likhalewa, iye mwakamfulumize adacinja bzinthu, ndipo adabvera bzomwe bukhulo likhalewa. (2 Nkha. 34:14, 19-21) Kodi imwepo mukufuna kumbawerenga Bibliya ntsiku zentse? Penu imwepo mumbayezera kucita bzimwebzi, kodi mukukomedwa na kuwerengako? Kodi imwepo mumbakoya mavesi yomwe mun’funa kumbayaphatisa basa pa moyo wanu? Pomwe Josiya akhana magole 39, iye adacita bzinthu bzakuphonyeka bzomwe bzidacitisa kuti afe. Iye adabzithemba yekha, m’mbuto mwakuthemba kutsogoleredwa na Yahova. (2 Nkha. 35:20-25) Kodi n’ciyani comwe tikupfunza na nkhani imweyi? Tikupfunza kuti bziribe basa kuti tina magole mangasi ayai tina nthawe itali tani tikupfunza Bibliya, tin’funika kupitiriza kucita nyongo kuti tidziwe bzomwe Yahova ambafuna kuti ticite. Kuti tikwanise kucita bzimwebzi, tin’funika kumbapemba kawiri-kawiri kuti Yahova atitsogolere, kupfunza Fala lace na kumbabvera malango yomwe timbapasidwa na Akristau wakukhwima mwauzimu. Bzimwebzi bzin’dzatithandiza kuti tileke kucita bzakusankhula bzakuipa ndipo tin’dzakhala wakukondwa. — Tiy. 1:25. w23.09 12 ¶15-16

Bibliya limbalewa bza akazi azinji omwe akhafuna Yahova na kumutumikira. Iwo ‘akhacita lini bzinthu mwakupitirira malire’ ndipo akhali “wakukhulupirika pa bzinthu bzentse.” (1 Tim. 3:11) Kuthumizira pa bziratizo bza akazi wa m’Bibliya amwewa, atsikana angawonembo bziratizo bza mpfumakazi zacikulire zomwe n’zakukhwima mwauzimu m’magwere yawo. Atsikana, kodi pana mpfumakazi zacikulire zomwe mukuzidziwa zomwe mukufuna kuzitewezera? Penu ziripo, onani makhalidwe yawo yabwino, ndipo onani momwe mungatewezererembo makhalidwe yawoyo. Khalidwe libodzi lakufunika kwene-kwene lomwe Akristau an’funika kulilatiza ni kubzicepesa. Mtsikana akakhala wakubzicepesa, iye an’dzakhala pa uxamwali bwakulimba na Yahova ndipo an’dzabveranambo na wanthu winango. Mwa ciratizo, kubzicepesa kun’dzacitisa mkazi omwe ambafuna Yahova kubvera makonzedwe ya utsogoleri yomwe Baba wace wakudzulu adayakhazikisa. (1 Ako. 11:3) Makonzedwe yamweya njakufunika kwene-kwene m’gwere na m’banja. w23.12 18-19 ¶3-5

Yahova ambafuna kuti mwamuna ambafune mkazace na kumusamalira mwakuthupi na mwauzimu. Kumbakumbuka bwino, kulemekeza akazi na kukhala wakuthembeka kun’dzakuthandizani m’banja. Mukalowola imwepo mungadzakhale pai. Kodi n’ciyani comwe mungapfunze na Yahova kuti mukhale pai wabwino? (Aef. 6:4) Yahova adauza Mwana wace Jezu Kristu kuti ambamufuna kwene-kwene. (Mat. 3:17) Imwepo mukakhala pai, nthawe zentse mbatsimikizirani wana wanu kuti mumbawafuna. Mbawatendani thangwe ra bzinthu bzabwino bzomwe iwo ambacita. Abereki omwe ambatewezera Yahova ambakwanisa kuthandiza wana wawo kuti akakula adzakhalembo amuna na akazi wakukhwima mwauzimu. Imwepo mungabakakonzekereretu bzimwebzi mwa kumbasamalira bwino maudindo yanu na kumbalatiza lufoyi wanthu wa m’banja mwanu na wa m’gwere. — Juw. 15:9. w23.12 28-29 ¶17-18

Napo kuti ndife atumiki wa Yahova, ifepano timbagumanambo na mabvuto yakusiyana-siyana kuphatanidzambo kuduwala ninga momwe bzimbacitikira kwa wanthu wentse. Ndipo tingagumanembo na bvuto ninga kutsutsidwa ayai kuteweredwa m’mbuyo na wale omwe ambawenga wanthu wa Mulungu. Napo kuti Yahova angatikhotcerere lini pa mabvuto yamweya, iye akupicira kuti an’dzatithandiza. (Zai. 41:10) Na thandizo lace, tingapitirize kukhala wakukondwa, kucita bzakusankhula bzabwino na kupitiriza kukhala wakukhulupirika kwa iye napo ticigumana na mabvuto. Yahova akupicira kutipasa bzomwe Bibliya limbacemera kuti ‘mtendere wa Mulungu.’ (Afil. 4:6, 7) Mtendere umweyu ni kugwa mpfuwa na kubva bwino komwe timbakhala nako m’makumbukidwe mwathu na mu mtima thangwe ra uxamwali bwabwino bomwe tinabo na iye. Mtendere umweyu “wanthu angaubvesese lini,” ndipo ngwabwino kwene-kwene. Mwa ciratizo, kodi imwepo mudapemba kale kwa Yahova na mtima wentse ndipo patsogolo pace mudadabwa thangwe rakuti mudakhala wakugwa mpfuwa? Penu ndibzo, dziwani kuti umweyo ni “mtendere wa Mulungu.” w24.01 20 ¶2; 21 ¶4

Kufuna Mulungu kumbacitisa kuti wanthu wakukhulupirika atumbize dzina lace na mtima wawo wentse. Mambo Davide akhadziwa kuti tikatumbiza dzina la Yahova timbakhala tikutumbiza Yahova caiyeyo. Dzina la Yahova limbalewambo bza mbiri yace. Ndipopa tikabva bza dzina lace timbakumbukira bza makhalidwe yace yabwino na bzakucita bzace bzabwino. Davide adawona kuti dzina la Yahova ndakucena ndipo adafuna kulitumbiza. Iye akhafuna kucita bzimwebzo na “cinthu ciri-centse” comwe cikhali mwa iye, bzomwe bzikufuna kulewa kuti, akhafuna kutumbiza dzina la Yahova na mtima wace wentse. Alevimbo adakhala patsogolo pa kutumbiza Yahova. Iwo adazindikira kuti mafala yomwe iwo angadalewa yangadakwanisa lini kutumbiza bwino-bwino dzina la Yahova. (Neh. 9:5) Kutumbiza dzina la Yahova mu njira ya kubzicepesa kumbacitisa kuti Yahova akomedwe kwene-kwene. w24.02 9 ¶6

Yahova an’dzakuwonani lini kuti ndimwe wakuwofoka thangwe rakuti mwatazira kukwanirisa cakulinga comwe mungacikwanise lini. (2 Ako. 8:12) Onani bzomwe mungapfunze na bzomwe bzidakucitikirani m’mbuyo. Mbakumbukirani bzinthu bzomwe mwakwanisa kale kucita. Bibliya limbati: “Mulungu ngwakulungama, iye an’dzayebwa lini basa lanu.” (Aheb. 6:10) Ndipopa mun’funika lini kuyebwa bzomwe mukukwanisa kale kucita. Kumbukirani bzomwe imwepo mwakwanisa kale kucita. Imwepo mwakwanisa kukhala xamwali wa Yahova, mumbauza anzanu bza iye ndipo mudabatizidwa. Penu imwepo mudacita nyongo mpaka kukwanisa kucita bzinthu bzimwebzi, ndiye kuti bzinthu bzinango bzomwe imwepo mun’funambo kubzicita kutsogoloku mun’dzakwanisambo kubzicita. Na thandizo la Yahova, imwepo mungakwanirise cakulinga canu. Pomwe mukucita nyongo kuti mukwanirise cakulinga canu, lekani kumbayebwa kuwona bzinthu bzomwe Yahova akukucitirani pomwe akukuthandizani kuti mukwanirise cakulinga canuco. (2 Ako. 4:7) Mukasaya kubwerera m’mbuyo, imwepo mun’dzatambira bzisimbo bzizinji. — Agal. 6:9. w23.05 31 ¶16-18

Yahova ambafuna kulatiza wale omwe akukomedwa nawo kuti ambawafuna. Bibliya limbafotokoza bza nthawe ziwiri zomwe Yahova adalewa kuti ambafuna Mwana wace, Jezu. (Mat. 3:17; 17:5) Kodi imwepo mukufuna kubva Yahova akukuuzani kuti ambakufunani? Imwepo mungakwanise lini kubva fala la Mulungu likukuuzani kuti ambakufunani. Tsono imwepo mungabve falalo mukakhala mukuwerenga Bibliya. Ifepano tingabve fala la Mulungu likutiuza kuti ambatifuna tikambawerenga mafala ya Jezu m’mabukhu manai yomwe yambafotokoza bza moyo wace. Jezu ambatewezera mwakulungamiratu makhalidwe ya Pai wace, Yahova. Tenepo, tikambabva mafala ya Jezu yomwe iye adauza ateweri wace wakukhulupirika kuti ambawafuna, tidziwembo kuti mafala yokha-yokhayo ndiyo yomwe Yahova akufotokozambo kwa ifepano. (Juw. 15:9, 15) Tikagumana na mabvuto bzin’funa lini kulewa kuti Mulungu akukomedwa lini nafe, mabvutoyo yambatipasa mwayi wakuti tilatize kukula kwa lufoyi lomwe tinalo kwa Mulungu nakuti ifepano timbamuthemba. — Tiy. 1:12. w24.03 28 ¶10-11