Setembro

Caciwiri, Mulungu adapasa Jezu mphanvu kuti amalise mabvuto ya wanthu. Pomwe Jezu akhacita bzakudabwisa, iye adalatiza kuti an’kwanisa kumalisa mabvuto yomwe ifepano tingakwanise lini kuyamalisa tekha. Iye ana mphanvu zakumalisa mabvuto yentse yomwe wanthu ambagumana nayo, yomwe yadabwera thangwe ra pikado, ninga kuduwala na kufa. (Mat. 9:1-6; Aro. 5:12, 18, 19) Bzakudabwisa bzomwe iye adacita bzikulatiza kuti iye angapoze matenda “ya mtundu uli-wentse” na kumusa wanthu omwe adafa. (Mat. 4:23; Juw. 11:43, 44) Ndipo iye ana mphanvu yakuimisa conzi camphanvu na kucosa mizimu yakuipa. (Mar. 4:37-39; Luk. 8:2) Mpsabwino kudziwa kuti Yahova adapasa Mwana wace mphanvu zakucita bzentsenebzi! Ifepano tingakhulupire na mtima wathu wentse kuti bzinthu bzentse bzomwe Mulungu adalewa bzin’dzacitikadi mu Umambo bwace. Bzakudabwisa bzomwe Jezu adacita pantsi pano bzimbalatiza bzomwe an’dzacita akadzayamba kutonga dziko la pantsi. w23.04 3 ¶5-7

Penu muli mu gwere lomwe lina apalizi azinji, ndipo imwepo mumbawona ninga kuti mumbalatidwa lini kawiri-kawiri, bzimwebzi bzingakucitiseni kuti muleke kumbatawira. Tsono, lekani kuleka kumbapereka mitawiro. Imwepo mungambakonzekere mitawiro mizinji pa mtsonkhano uli-wentse. Penu imwepo mungalatidwe lini pa kuyamba kwa pfunzirolo, mungadzakhale na mwayi wa kutawira kuphampha kwa pfunzirolo. Pomwe mukukonzekera Pfunziro la Ntsanza ya Mulindiri, mbawonani momwe ndime iri-yentse ikubveranirana na msolo wa nkhaniyo. Mukacita tenepo, mungadzakhale na mwayi wakupereka mtawiro pa nthawe iri-yentse pomwe pfunzirolo liri mkati. Ndipo imwepo mungakonzekere kuti mudzapereke mtawiro pa ndime zomwe n’zakunesa kuzibvesesa. Thangwe ranyi? Thangwe pa ndime zimwezi mbanthu ang’ono-ng’ono omwe angaimise manja. Imwepo mukawona kuti mumbalatidwa lini basi, mungauze m’bale omwe ambatsogolera pfunzirolo ndime zomwe mukufuna kudzatawira pomwe mitsonkhanoyo ikanati kuyamba. w23.04 21-22 ¶9-10

Zuze adabvera malango ya Yahova, ndipo bzimwebzi bzidamucitisa kuti akhale mwamuna wabwino. Iye adatambira malango yakucokera kwa Mulungu yakulewa bza banja lace katatu-kentse. Akapasidwa malangoyo iye akhabvera napo kuti akhafunika kucinja bzinthu bzizinji. (Mat. 1:20; 2:13-15, 19-21) Mwa kubvera malango ya Mulungu, Zuze adakhotcerera Mariya, adamuthandiza ndipo adamupasa bzomwe akhafunikira. Bzomwe Zuze adacitabzi bzidacitisa kuti Mariya amufune kwene-kwene na kumulemekeza! Amuna, imwepo mungatewezere Zuze mwa kumbabvera malango ya m’Bibliya ya momwe mungasamalirire mabanja yanu. Imwepo mukabvera malango yamweya napo kuti yangakucitiseni kucinja bzinthu bzinango, mumbalatiza kuti mumbafuna akazanu ndipo mumbacitisa kuti banja lanu likhale lakulimba. Mpfumakazi inango ya ku Vanuatu, yomwe iri pa banja kwa magole 20, idati: “Mwamuna wangu akambateweza malango ya Yahova, nimbamulemekeza kwene-kwene. Nimbabzibva kukhala wakukhotcerereka. Ndipo akambacita cakusankhula, nimbacita lini thupo.” w23.05 21 ¶5

Adjuda omwe angadabwerera ku Jirayeri akhafunika kukhala “mtundu wakucena” kwa Mulungu wawo. (Deut. 7:6) Bzimwebzi bzin’funa lini kulewa kuti wentse akhacita kale bzinthu bzabwino ndipo angadafunika lini kucinja bzinthu bzinango kuti akondwese Yahova. Adjuda azinji omwe adabadwira ku Babiloniya akhana nzeru ninga za wanthu wa ku Babiloniyako ndipo akhatewezerambo makhalidwe yawo. Pomwe padapita magole 69, Mtongi wa m’Cigawo Nehemiya adadabwa kwene-kwene pomwe adadziwa kuti wana azinji ku Jirayeri akhalalewa lini cirewedwe ca Adjuda. (Deut. 6:6, 7; Neh. 13:23, 24) Pakuti Fala la Mulungu likhadanembedwa m’Cihebereu, kodi wanawo angadapfunza tani bza Yahova uko iwo akhadziwa lini cirewedwe cimweci? (Eza. 10:3, 44) Adjuda amwewa akhafunikira kucinja bzinthu pa moyo wawo, ndipo bzingadakhala bzakupusa kwa iwo kucita bzimwebzi angadakhala ali ku Jirayeri komwe kunamata kwa cadidi kukhadabwezeresedwa. — Neh. 8:8, 9. w23.05 15 ¶6-7

Mwakusaya kudikhiririka ifepano tingagumane na mphitca zomwe zingatitazise kukwanirisa cakulinga cathu napo kuti tina cikhumbo ndipo tikucita nyongo yakufuna kukwanirisa cakulingaco. Mwa ciratizo, “bzinthu bzakusaya kudikhiririka” bzingaticitise kuti tisaye kukhala na nthawe yakuti tikwanirise cakulinga cathu. (Mpal. 9:11) Tingagumane na mabvuto yomwe yangaticitise kukhala wakuwofoka na wakusaya mphanvu. (Mim. 24:10) Pakuti ndife wanthu wakuperewera, nthawe zinango tingacite bzinthu bzakuphonyeka ndipo bzinthubzo bzingatitazise kukwanirisa cakulinga cathu. (Aro. 7:23) Ayai nthawe zinango tingabve kuti tidaneta. (Mat. 26:43) Kodi n’ciyani comwe cingatithandize kuti tikunde mphitca zomwe tingagumane nazo? Pakacitika cinthu comwe cikukutazisani kukwanirisa cakulinga canu bzin’funa lini kulewa kuti mun’funika kuimira pamwepo. Bibliya limbalewa kuti tin’dzagumana na mabvuto mazinji. Tsono Bibliyalo limbalewambo kuti ifepano tingapitirize kucita bzomwe tikufuna napo kuti tikugumana na mabvuto. Imwepo mukapitiriza kucita nyongo yakukwanirisa cakulinga canu napo kuti mukugumana na mphitca, mumbalatiza Yahova kuti mukufuna kumukondwesa. Yahova ambakomedwa kwene-kwene akakuwonani kuti mukucita nyongo yakuti mukwanirise cakulinga canu! w23.05 30 ¶14-15

Kucita upainiya kungathandize mulumbwana kupfunza kuphata basa na wanthu wa m’bzikhalidwe bzakusiyana-siyana. Ndipo kumbathandizambo munthu kudziwa kuphatisa basa kobiri. (Afil. 4:11-13) Kuti munthu awone penu angakwanise kucita utumiki bwa nthawe zentse, comwe cingamuthandize ndico kuyamba kucita upainiya bwakuthandiza. Bzimwebzi bzimbawathandiza kuti adzakwanise kucita upainiya bwakukhazikika. Kucita upainiya kumbapereka mwayi kwa munthu kuti adzakwanise kucita utumiki bwa nthawe zentse ninga kuthandizira basa la kumanga-manga na kutumikira pa Beteli. Abale wakukhwima mwauzimu an’funika kukhala na cakulinga ca kutumikira abale na mpfumakazi zawo ninga akulu wa gwere. Bibliya limbalewa kuti amuna omwe akufuna udindo bumwebu “akufuna basa labwino.” (1 Tim. 3:1) M’bale akanati kukhala mkulu, cakuyamba iye ambafunika kukhala mtumiki wakuthandiza. Atumiki wakuthandiza ambathandiza akulu mu njira zizinji zakusiyana-siyana. Akulu pabodzi na atumiki wakuthandiza ambathandiza abale na mpfumakazi mwakubzicepesa ndipo ambathandizirambo basa la kupalizira mwanyongo. w23.12 28 ¶14-16

Mambo Josiya akhana magole 16 pomwe adayamba kucita nyongo yakuti akhale xamwali wa Yahova. Iye akhafunisisa kumudziwa Yahova na bzomwe iye ambafuna. Napo bziri tenepo, bzinthu bzikhali lini bzakupusa pa moyo wace. Pa nthawe imweyire, wanthu azinji akhanamata mirungu yakunama. Ndipopa Josiya akhafunika kukhala wakukhwimika kuti aletse wanthuwo kucita bzimwebzo, ndipo iye adakwanisadi kucita bzimwebzo. Josiya adayamba kucosa mirungu yakunama mu Jirayeri pomwe akhanati kukwanisa magole 20. (2 Nkha. 34:1, 2) Napo penu imwepo ndimwe tswaka, mungakwanise kutewezera Josiya mwa kupitiriza kupfunza bzizinji bza Yahova pabodzi na makhalidwe yace. Mukacita bzimwebzi, imwepo mun’dzabzipereka kwa Yahova. Kodi kubziperekako kun’dzakuthandizani tani pa moyo wanu? Luke, omwe adabatizidwa pomwe akhana magole 14, adati: “Kuyambira lero kuyenda kutsogolo, nin’dzaikha Yahova pa mbuto yakuyamba pa moyo wangu, ndipo nin’dzacita ciri-centse kuti ndimukondwese.” (Mar. 12:30) Penu imwepo mukufuna kucitambo bzimwebzi, dziwani kuti bzinthu bzin’dzakufambirani bwino kwene-kwene pa moyo wanu! w23.09 11 ¶12-13

Pomwe mpostolo Paulo adanemba tsamba limweri, gwere la ku Tesalonika likhanati kukwanisa gole libodzi. Abale omwe akhana udindo akhanati kudziwa bzinthu bzizinji ndipo akhaphonyesa bzinthu bzinango. Napo bziri tenepo, iwo akhafunika kulemekezedwa. Pomwe citsautso cikulu cikufendera, tin’funika kuthemba malango yomwe akulu wa gwere ambatipasa. Pinango bzingakhale bzakunesa kutambira malango kucokera ku likulu lathu ayai ku mthambi. Ndipopa tin’funika kuyambiratu tsapano kumbafuna na kulemekeza akulu wa m’gwere mwathu. Tipitirize kukhala tceru ticileka kumbandowona bzakuphonya bzawo ticizindikira kuti Yahova akuphatisa basa Mwana wace kuti atsogolere amuna wakukhulupirikawa. Ninga momwe kapaseti imbakhotcererera msolo wa mcikunda, cidikhiro cathu cimbakhotcerera nzeru zathu. Timbazindikira kuti bzomwe dzikoli limbapereka mpsakusaya phindu. (Afil. 3:8) Ndipo cidikhiroco cimbatithandizambo kuti tikhale wakuderekha na wakusaya kutekenyeka. w23.06 11-12 ¶11-12

Wale omwe akutetekera “mkazi wakusaya nzeru” an’funika kusankhula: Kodi iwo an’dzabvuma mcemo wa mkazi umweyu ayai an’dzaulamba? Pana mathangwe mazinji yomwe yan’funika kuticitisa kutcenkha kucita bzinthu bza upombo. “Mkazi wakusaya nzeru” ule, pakucita mcemo wace, iye ambalewa kuti: “Madzi yakucita kuba yambatapira.” (Mim. 9:17) Kodi “madzi yakucita kubayo” n’ciyani? Bibliya limbalewa kuti malume ya pa mphasa pakati pa wanthu awiri omwe adalowolana ni madzi yomwe yambadjedjeresa. (Mim. 5:15-18) Mwamuna na mkazi omwe adalowolana mwa lamulo ndiwo okha omwe ambabvumizidwa kucita malume ya pa mphasa. Bzimwebzi bzidasiyana na “madzi yakucita kuba.” Madzi yakucita kuba yamweya yambathandauza malume ya pa mphasa pakati pa wanthu awiri wakusaya kulowolana. Bzimwebzi bzimbacitika mwakabise-bise ninga momwe mbava imbabera pa mdima. Malume ya pa mphasa pakati pa wanthu awiri wakusaya kulowolana yangakhale ninga yakudekeza bzikakhala kuti iwo akuwona ninga kuti palibe munthu omwe adziwa bzomwe iwo acita. Bzimwebzi mpsakupasa ntsisi kwene-kwene! Thangwe Yahova ambawona bzentse. Kusiya kufunidwa na Yahova ni cinthu cakuwawa kwene-kwene, ndipo bzimwebzi ni cinthu lini “cakutapira” ayai cakudekeza. — 1 Ako. 6:9, 10. w23.06 22 ¶7-9

Kodi n’ciyani comwe mun’funika kucita penu mukuwona kuti mumbapemba lini na mtima wentse ayai mumbakomedwa lini na upalizi ninga momwe mukhacitira m’mbuyomu? Lekani kuwona ninga kuti Yahova akukupasani lini pomwe mzimu wace wakucena. Imwepo ndimwe wakuperewera, ndipo makumbukidwe yanu yangacinje nthawe zinango. Penu nyongo yanu ikucepekera, kumbukirani bza mpostolo Paulo. Napo kuti Paulo akhayezera kutewezera Jezu, iye akhadziwa kuti nthawe zinango angadakhala alibe mphanvu yakucita bzimwebzo. Paulo akhali wakutsimikiza kupitiriza kucita utumiki bwace napo pa nthawe yomwe akhabva kuti alibe mphanvu. Mwa njira ibodzi-bodziyi, lekani kulekerera kuti makumbukidwe yanu yakuperewera yakucitireni cakusankhula. Khalani wakutsimikiza kucita bzinthu bzabwino napo kuti mukufuna lini kucita bzimwebzo. Imwepo mukapitiriza kucita bzinthu bzabwino, na kupita kwa nthawe makumbukidwe yanu yangadzacinje. — 1 Ako. 9:16. w24.03 11-12 ¶12-13

Tingalatize kuti timbafuna abale na mpfumakazi zathu mwa kubvuma kuti iwo akhale axamwali wathu. (2 Ako. 6:11-13) Azinji wa ifepano tiri m’magwere yomwe yana abale wa bzikhalidwe bzakusiyana-siyana. Tingakulise lufoyi lathu kwa iwo mwa kumbawona bzinthu bzabwino bzomwe iwo ambacita. Tikambawona anzathu ninga momwe Yahova ambawawonera timbalatiza kuti timbawafuna kwene-kwene. Pa citsautso cikulu tin’dzafunikira kulatiza lufoyi kwa abale na mpfumakazi zathu. Kodi Yahova an’dzatikhotcerera tani citsautso cikulu cikadzayamba? Onani bzomwe Yahova adauza wanthu wace pomwe mzinda wa Babiloniya ukhafuna kupfudzidwa. Iye adati: “Imwe wanthu wangu, ndokoni mukapite m’bzipinda bzanu bza mkati mucikafunga misuwo. Mukabisale kwa kanthawe mpaka ukali butapita.” (Zai. 26:20) Pinango pa citsautso cikulu tin’dzafunikirambo kuteweza malango mabodzi-bodziya. w23.07 6-7 ¶14-16

Dziwikani ninga munthu omwe ambangingimira lini nzeru zace. Mungabzibvunze kuti: ‘Kodi wanthu ambandiwona ninga munthu omwe ambangingimira lini nzeru zace, wakufewa na wakubva bzomwe wanthu winango ambalewa? Ayai ambandiwona ninga munthu wakuuma, wakunesa na wakusaya kubva? Kodi nimbabva bzomwe anzangu ambalewa na kucita bzomwe iwo ambafuna penu mpsakuphonyeka lini?’ Tikambacita nyongo yakusaya kungingimira nzeru zathu timbakhala tikutewezera Yahova na Jezu. Lekani kumbangingimira nzeru zanu bzinthu bzikacinja. Kucinja kumweku kungabwerese mabvuto yomwe ifepano tikhayadikhirira lini. Tingagumane na mabvuto ya thanzi. Kucinja kwa bzinthu ninga kusaya kobiri, kucinja kwa nyengo na ndale, kungacitise kuti bzinthu bzileke kufamba bwino pa moyo wathu. (Mpal. 9:11) Bzinthu bzinango bzingacinje pa kutumikira Yahova ndipo bzimwebzi bzingayeze cikhulupiro cathu. Tingacinje bzinthu bzicitifambira bwino tikateweza nfundo zinai izi: (1) kubvuma kuti bzinthu bzacinja, (2) kunyang’anisisa bza kutsogolo, (3) kunyang’anisisa bzinthu bzabwino na (4) kucitirambo bzinthu bzabwino wanthu winango. w23.07 21-22 ¶7-8

Mpolofeta Daniyeli akhali tswaka pomwe adatengedwa aciyendesedwa ku Babiloniya, komwe kukhali kutali na ku Jeruzalemu, kuti akakhale kapolo. Napo kuti iye akhali tswaka, akulu-akulu wa ku Babiloniyako adakomedwa naye. Iwo adakwanisa kuwona kuti Daniyeli “akhali munthu wa mawonekedwe yabwino” ndipo akhali wa m’dzinza lakulemekezeka. (1 Sam. 16:7) Thangwe ra bzimwebzi, Ababiloniya adamupfunzisa kuti ambatumikire pa nyumba ya mambo. (Dan. 1:3, 4, 6) Yahova akhamufuna Daniyeli thangwe ra mtundu wa munthu omwe iye adasankhula kukhala. Pinango Daniyeli akhali kuphampha kwa utswaka bwace, ayai akhana magole 20, pomwe Yahova adamuguma pabodzi na Nowa na Djobi, amuna omwe adakhala wakukhulupirika kwa iye magole mazinji. (Gen. 5:32; 6:9, 10; Djob. 42:16, 17; Ezek. 14:14) Ndipo Yahova adapitiriza kumufuna Daniyeli pa moyo wace wentse. — Dan. 10:11, 19. w23.08 2 ¶1-2

Imwepo mukafuna kugula nyumba, mungafune kuwona penu bzentse bziri bwino. Tingacitembo bzibodzi-bodzibzi pomwe tikuwerenga na kupfunza Bibliya. Imwepo mukambandowerenga mwakuthamanga mun’dzandobvesesa bzinthu bzakucepa, ayai “bzinthu bzakuyambirira bza m’mafala yakupambulika ya Mulungu.” (Aheb. 5:12) Tsono, kuti imwepo mulibvesese bwino Bibliya, mun’funika kumbalipfunza mwa kamderekho ninga momwe imwepo mumbafunikira kupita “mkati” mwa nyumba kuti muidziwe bwino nyumbayo. Njira ibodzi yakupfunzirira Bibliya ndiyo kumbawona momwe mbali zizinji za m’Bibliyamo zikubveranira. Mbayezerani kubvesesa bzomwe mumbakhulupira ndipo mbayezeranimbo kubvesesa mathangwe yomwe yambakucitisani kuti mukhulupire kuti mpsacadidi. Kuti tibvesese bwino-bwino Fala la Mulungu, tin’funika kubvesesa bzinthu bzakuzika bza m’Bibliya. Mpostolo Paulo adauza abale wace wacikristau kuti akhafunika kucita nyongo yakubvesesa Fala la Mulungu kuti akwanise “kudziwa kufupika, kutalimpha, kukula, [na] kuzika” kwa cadidi. Mwa kucita tenepoyo, iwo angadakhala “wakuzika na wakulimba” mu cikhulupiro. (Aef. 3:14-19) Bzimwebzi ndibzo bzomwe tin’funikambo kucita. w23.10 18 ¶1-3

M’Bibliya muna nkhani za wanthu omwe adalatiza kupirira. Tani mucikhala na makonzedwe yakupfunza nkhani zimwezo? Mwa ciratizo, napo kuti Davide adadzozedwa pomwe akhali mwana kuti akhale mambo wa Ajirayeri, iye adadikhirira magole mazinji kuti ayambe kutonga. Simiyoni na Ana adapitiriza kunamata Yahova mwakukhulupirika pomwe akhadikhirira kubwera kwa Mesiya. (Luk. 2:25, 36-38) Pomwe mukupfunza nkhani zimwezi, nyang’anani mitawiro ya mibvunzo iyi: Kodi n’ciyani comwe cidathandiza munthu umweyu kukhala wakupirira? Kodi ni phindu liponi lomwe adakhala nalo thangwe ra kupirira? Kodi ningamutewezerembo tani? Imwepo mungagumanembo phindu mukapfunza bza wanthu omwe alibe kulatiza kupirira. (1 Sam. 13:8-14) Imwepo mungabvunze kuti: ‘Kodi n’ciyani comwe cidacitisa kuti iwo aleke kulatiza kupirira? Kodi ni mabvuto yaponi yomwe iwo adagumana nayo?’ w23.08 25 ¶15

Mpostolo Pedru akhali wakukhulupirika, ndipopa iye alibe kulekerera kuti cinthu ciri-centse cimutazise kutewera Jezu. Ndipo iye adalatiza kuti akhali wakukhulupirika pa nthawe inango pomwe Jezu adalewa cinthu comwe ateweri wacewo alibe kucibvesesa. (Juw. 6:68) M’mbuto mwakudikhirira kuti Jezu awauze thandauzo la bzomwe akhadalewabzo, azinji adasiya kumutewera. Tsono Pedru alibe kusiya. Iye adazindikira kuti ni Jezu yekha omwe akhana “mafala ya moyo wakusaya kumala.” Jezu akhadziwa kuti Pedru na apostolo winango wale angadamuthawa. Napo bziri tenepo, Jezu akhakhulupira kuti Pedru angadabwerera ndipo angadapitiriza kukhala wakukhulupirika. (Luk. 22:31, 32) Jezu adabvesesa kuti “mtima . . . ukufuna, tsono thupi ndakutepa.” (Mar. 14:38) Ndipopa, napo kuti Pedru adamulamba Jezu kuti akhamudziwa lini, Jezu alibe kumusiya mpostolo waceyu. Pomwe Jezu adalamusidwa, iye adawonekera kwa Pedru pomwe Pedruyo akhali yekha. (Mar. 16:7; Luk. 24:34; 1 Ako. 15:5) Ndokumbukirani momwe bzimwebzi bzidamulimbikisira Pedruyo omwe akhadasunama kwene-kwene thangwe ra bzomwe akhadacita! w23.09 22 ¶9-10

Mulungu ambalekerera ayai ambapfudza pikado za wale omwe ambamukhulupira. Iye ambalekerera na mtima wentse ndipo pikado zawo ambazikumbukira lini pomwe. (Sal. 32:1, 2) Iye ambawawona ninga wanthu wakusaya pikado na wakulungama thangwe ra cikhulupiro cawo. Napo kuti Abalahamu, Davide na atumiki winango wakukhulupirika wa Mulungu adawonedwa ninga wakulungama, iwo akhali wanthu wakuperewera. Tsono thangwe ra cikhulupiro cawo, Mulungu akhawawona ninga wakusaya pikado kusiyana na wale omwe akhamukhulupira lini. (Aef. 2:12) Mu tsamba lomwe mpostolo Paulo adanembera Akristau wa ku Roma, iye adalewa kuti tin’funika kukhala na cikhulupiro kuti tikhale axamwali wa Mulungu. Abalahamu na Davide akhali axamwali wa Mulungu thangwe akhamukhulupira. Ifepanombo tingakhale axamwali wa Mulungu tikambamukhulupira. w23.12 3 ¶6-7

Ntsiku zino, Akristau tentse tina mwayi wakupereka ntsembe kwa Yahova mwakuphatisa basa nthawe yathu, mphanvu zathu na bzinthu bzathu kuti tiyendese patsogolo bzakufuna bza Umambo bwa Mulungu. Tingalatize kuti timbatenda mwayi omwe tinawo wa kunamata Yahova mwa kumupasa ntsembe zathu zabwino. Mpostolo Paulo adalewa bzinthu bzakusiyana-siyana bzomwe tin’funika kucita pomwe tikunamata Yahova. (Aheb. 10:22-25) Bzinthu bzimwebzi bzimbaphatanidza kupemba kwa Yahova, kupalizira wanthu winango bza cidikhiro cathu, kutsonkhana pabodzi na kulimbikisa anzathu, ndipo ‘tithumizire kucita bzimwebzi pomwe tikuwona kuti ntsiku ya Yahova ikufendera.’ Kuphampha kwa bukhu la Apokalipse, anjo wa Yahova akutsindika kawiri kentse kuti: “Namata Mulungu!” (Apok. 19:10; 22:9) Tenepo, mbatilekeni kuyebwa cinthu cakufunika kwene-kwene cakulewa bza templo yauzimu ikulu ya Yahova na mwayi omwe tinawo wa kunamata Mulungu wathu! w23.10 29 ¶17-18

Tentsenefe tin’funika ‘kupitiriza kumbafunana.’ Tsono, mpsakufunika kwene-kwene kukumbukira mafala yomwe Jezu adalewa, yakuti “lufoyi la wanthu azinji lin’dzacepekera.” (Mat. 24:12) Jezu akhafuna lini kulewa kuti anyakupfunza wace angadasiya kulatizana lufoyi. Koma tin’funika kukhala tceru kuti tireke kutengera makhalidwe ya wanthu omwe alibe lufoyi wa m’dzikoli. Pomwe tikukumbukira bzimwebzi, mbaticezeraneni mbvunzo wakufunikayu, wakuti: N’ciyani cin’dzatithandiza kudziwa penu lufoyi lomwe tinalo kwa abale wathu ndamphanvu? Njira ibodzi yomwe ingatithandize kuwona penu lufoyi lomwe tinalo kwa abale wathu ndamphanvu ndiyo kuwona momwe timbacitira bzinthu pa moyo wathu. (2 Ako. 8:8) Cibodzi mwa bzinthu bzimwebzi ni comwe mpostolo Pedru adalewa. Iye adati: “Kuposa bzentse, mbafunanani na mtima wentse, thangwe lufoyi limbampsinkha pikado zizinji.” (1 Ped. 4:8) Ndipopa bzomwe tingacite abale wathu akatiphonyera ayai bzinthu bzomwe iwo acita bzomwe bzatisunamisa bzin’dzatithandiza kudziwa penu lufoyi lathu kwa iwo ndamphanvu. w23.11 10-11 ¶12-13

Ifepano tingakwanise lini kubvera lamulo la Jezuli penu lufoyi lathu timbalilatiza lini kuna abale wentse m’gwere. N’cadidi kuti ifepano tingakhale axamwali wa abale winango m’gwere ticileka kukhala axamwali wa winango ninga momwe Jezu adacitira. (Juw. 13:23; 20:2) Tsono mpostolo Pedru akutikumbusa kuti tin’funika kucita nyongo ya kufuna ‘abale wanthu wentse’ na kulatiza lufoyi kuna iwo pakukhala abale na mpfumakazi zathu. (1 Ped. 2:17) Pedru adatiuza kuti: “Mbafunanani na mtima wentse.” (1 Ped. 1:22) Mafala yakuti “mbafunanani na mtima wentse” yakulatiza kuti tin’funika kumbacita nyongo yakulatiza lufoyi kuna abale na mpfumakazi zathu napo kuti nthawe zinango bzingakhale bzakunesa kwa ifepano thangwe ra makhalidwe yathu. Mwa ciratizo, tani penu m’bale akucitirani cinthu comwe mulibe kukomedwa naco? Thangwe ra kuperewera, pinango ifepano tingakumbuke bzakufuna kumubwezera sikuti kumulatiza lufoyi. Tsono Pedru adapfunza na Jezu kuti Mulungu ambafuna lini kuti atumiki wace ambabwezere cakuipa na cakuipa. (Juw. 18:10, 11) Pedru adanemba kuti: “Lekani kubwezera cakuipa na cakuipa ayai kutukwana na kutukwana, m’mbuto mwace mbalewani mafala yabwino.” (1 Ped. 3:9) Bvumani kuti lufoyi likucitiseni kuti mulatize kudeka mtima kuna abale wanu. w23.09 28-29 ¶9-11

Ifepano timbadabwa kwene-kwene na momwe mwana ambakulira mwakamfulumize. Bzimbakhala ninga kuti kukulako kumbandocitika kokha. Tsono kukula mwauzimu kumbandocitika lini kokha. (1 Ako. 13:11; Aheb. 6:1) Kuti tikwanise kukula mwauzimu, ifepano tin’funika kukhala pa uxamwali bwakulimba na Yahova. Ndipo timbafunikirambo mzimu wace wakucena kuti utithandize kukhala na makhalidwe yabwino na kuti utithandizembo kukhala na makhalidwe yomwe yangadzatithandize kutsogolo. (Mim. 1:5) Yahova adakonza wanthu kuti akhale amuna ayai akazi. (Gen. 1:27) Timbakwanisa kuwona kuti mwamuna na mkazi adasiyana kaimidwe kawo, tsono adasiyanambo mu njira inango. Mwa ciratizo, Yahova adakonza amuna na akazi kuti acite mabasa yakusiyana-siyana ndipo iwo an’funika kukhala na makhalidwe na luso lomwe lingawathandize kucita mabasayo. — Gen. 2:18. w23.12 18 ¶1-2

Kodi Jezu akhafuna kuti wanthu winango aphatisembo basa dzina la Pai wace? Inde akhafuna. Atsogoleri wa magereja wa mu nthawe ya Jezu akhalewa kuti dzina la Mulungu limbafunika lini kugumidwa-gumidwa thangwe ndakucena. Malamulo yamweya yakhali lini yakucokera m’Bzinembo, koma yakhali ya wanthu. Tenepo, nzeru zimwezi ziribe kucitisa Jezu kuleka kulemekeza dzina la Pai wace. Kumbukirani bza nthawe inango yomwe Jezu adapoza mwamuna munango omwe akhana madimonyo ku Jerazeno. Wanthu adabva mantha kwene-kwene ndipo adakumbira Jezu kuti acoke ku mbuto imweyire. (Mar. 5:16, 17) Napo bzikhali tenepo, Jezu akhafuna kuti dzina la Pai wace lidziwike ku mphimpha imweyo. Ndipopa, iye adauza mwamuna omwe adamupoza ule kuti adziwise wanthu bzomwe Yahova wamucitira, sikuti bzomwe Jezuyo wamucitira. (Mar. 5:19) Ninga momwe bzidacitikira mu nthawe imweyire, Jezu akufunambo kuti tidziwise dzina la Pai wace pa dziko lentse la pantsi! (Mat. 24:14; 28:20) Tikacita bzimwebzi, timbakondwesa Mambo wathu, Jezu Kristu. w24.02 10 ¶10

Ni mwayi ukulu kwene-kwene kwa ifepano kukhala m’gulu la Yahova mu ntsiku zino zakumalizira zomwe n’zakunesa kwene-kwene. Pomwe bzinthu m’dzikoli bzikupitiriza kuipa, Yahova watipasa banja lauzimu lakuphatana la abale na mpfumakazi. (Sal. 133:1) Iye ambatithandiza kuti tikhale na banja lakukondwa. (Aef. 5:33–6:1) Ndipo iye ambatipasa nzeru yakutithandiza kuti tikhale na mtendere wa mu mtima. Tsono, tin’funika kucita ciri-centse kuti tipitirize kutumikira Yahova mwakukhulupirika. Thangwe ranyi? Thangwe nthawe zinango tingakalipe thangwe ra bzakuphonya bza anzathu. Ndipo bzingakhale bzakunesa kupirira bzakuphonya bzathu, maka-maka tikakhala tikubzicita mwakubwereza-bwereza. Tin’funika kupitiriza kupirira pomwe tikutumikira Yahova (1) pomwe mwanzathu omwe timbanamata naye pabodzi watikalipisa, (2) pomwe mkazi wathu ayai mwamuna wathu watikalipisa na (3) tikakalipa thangwe ra bzakuphonya bzathu. w24.03 14 ¶1-2

Nthawe zinango, imwepo mun’dzabva nkhani za abale na mpfumakazi omwe adasankhula kucita bzizinji pakutumikira Yahova. Winango wa iwo adasankhula kupita Xikola ya Apalizi wa Umambo ayai adayenda kukatumikira komwe kukhafunika apalizi azinji. Penu imwepo munacombo cakulinga cimweci bzimwebzo mpsabwino kwene-kwene. Atumiki wa Yahova ambafunisisa kucita bzomwe angakwanise kuti acite bzizinji pakumutumikira. (Mab. 16:9) Tsono tani penu imwepo mukukwanisa lini kucita bzimwebzo? Lekani kukumbuka kuti imwepo ndimwe lini cinthu mukabzindendemezera na wale omwe ambakwanisa kucita bzimwebzi. Cakufunika kwene-kwene n’cakuti imwepo mupitirize kupirira. (Mat. 10:22) Lekani kuyebwa kuti imwepo mumbakondwesa Yahova mukambacita bzomwe mungakwanise mwakubverana na momwe bzinthu bziriri pa moyo wanu. Imweyi ni njira yabwino kwene-kwene ya momwe mungapitirizire kutewera Jezu pambuyo pakubatizidwa. — Sal. 26:1. w24.03 10 ¶11

Yahova adatipicira kuti an’dzatilekerera pikado zathu tikakungula. (Sal. 86:5) Tenepo, ifepano tikakungula na mtima wathu wentse pikado zomwe tidacita tin’funika kukhulupira kuti Yahova watilekerera. Kumbukirani kuti Yahova alibe kukhala ninga wanthufe. Iye ambakwanisa kucinja bzinthu mwakamfulumize. Yahova alibe kunesa ayai ambaumirira lini pa bzinthu bzomwe iye akufuna. Iye ambatenda ciri-centse comwe tingamucitire tikakhala tikucicita na mtima wathu wentse. Ndipo kumbukiranimbo bziratizo bza m’Bibliya bza wanthu omwe adatumikira Yahova na mtima wawo wentse. Kumbukirani bza mpostolo Paulo. Iye adaphata basa na nyongo kwa magole mazinji acicita maulendo matali-matali na kukhazikisa magwere. Tsono pomwe bzinthu bzidacinja pa moyo wace acitazira kucita bzizinji pa basa lakupalizira, kodi Mulungu adasiya kumufuna? Ne. Iye adapitiriza kucita bzomwe angadakwanisa ndipo Yahova adamusimba. (Mab. 28:30, 31) Mwakundendemerana na bzimwebzi, bzomwe tingacitire Yahova bzingacinje na kupita kwa nthawe. Tsono cakufunika kwene-kwene kwa iye ni thangwe lomwe tikucitira bzinthubzo. w24.03 27 ¶7, 9

Mipembo yomwe Jezu akhacita kwa Yahova ni ciratizo kwa anyakupfunza wace. Mkati mwa utumiki bwace, Jezu akhapemba nthawe zentse. Iye akhafunika kumbapambula nthawe yakuti acite mpembo thangwe akhakhala wakutanganidwa na kupfunzisa wanthu. (Mar. 6:31, 45, 46) Iye akhabesera kuti apembe. Nthawe inango, iye adapemba usiku bwentse pa cakucitika cakufunika kwene-kwene. (Luk. 6:12, 13) Usiku bwakumalizira bwa moyo wace, Jezu adapemba kazinji-kentse thangwe akhafuna kucita cinthu cakufunika kwene-kwene na cakunesa. (Mat. 26:39, 42, 44) Bzomwe Jezu adacita bzikutipfunzisa kuti napo tikhale wakutanganidwa tin’funika kupambula nthawe ya kupemba. Pinango tingambamuke macibese-bese kuti tipembe ayai tingambapembe usiku pomwe tikanati kugona. Tikacita bzimwebzi, timbalatiza kuti timbatenda Yahova thangwe ra kutipasa mphaso imweyi yakufunika kwene-kwene. w23.05 3 ¶4-5.

Onani fala lomwe liri pa vesi lathuli lakuti “lidathululidwa” Bukhu linango lidalewa kuti fala limweri lingathandauze “kukhala ninga kuti lufoyiro lidacita kuthululidwa licibwera ningati madzi ya mu mkulo.” Fala limweri likulatiza padeca kuti Yahova ambalatiza lufoyi likulu kwene-kwene kuna Akristau wakudzozedwa! Ndipo anyakudzozedwawo ambadziwa kuti “ambafunidwa na Mulungu.” (Djuda 1) Mpostolo Juwau adalatiza momwe akhabvera pomwe adanemba kuti: “Onani lufoyi likulu lomwe Baba adalilatiza kwa ifepano, mwa kutipasa mwayi wakucemeredwa wana wa Mulungu!” (1 Juw. 3:1) Kodi lufoyi la Yahova limbaimira pa anyakudzozedwawo basi? Ne, Yahova adalatiza lufoyi lace kwa ifepano tentse. Kodi n’ciyani comwe cimbalatiza kuti Yahova ambatifunadi? Ni cakulombolera. Mwakutipasa cakulombolera, Yahova adalatiza kuti ambatifuna kwene-kwene kuposa momwe munthu ali-wentse angatifunire! — Juw. 3:16; Aro. 5:8. w24.01 28 ¶9-10

Vesi lomwe liri padzaululi limbafotokoza cinthu comwe cidathandiza Davide pomwe iye akhana mantha. Napo kuti moyo wace ukhali pa ngozi, Davide adakumbukira bzomwe Yahova an’dzamucitira kutsogolo. Davide akhakhulupira kuti Yahova angadamupulumusa pa nthawe yace. Yahova akhadalewa kale kuti Davide angadakhala mambo wa Ajirayeri. (1 Sam. 16:1, 13) Kwa Davide, bzentse bzomwe Yahova adalewa bzikhakhala ninga bzakwanisika kale. Kodi n’ciyani comwe Yahova adapicira kuti an’dzakucitirani? Ifepano timbadikhirira lini kuti iye an’tikhotcerera ku mabvuto yentse. Tsono kumbukirani kuti bziribe basa bvuto lomwe tigumane nalo m’dziko lino, Yahova an’dzalicosa mu dziko lipsa lomwe likubwera. (Zai. 25:7-9) Mulengi wathu ana mphanvu ya kulamusa anyakufa, kupoza anyakuduwala na kucosa wanthu wentse omwe ambatiboneresa. — 1 Juw. 4:4. w24.01 6 ¶12-13

Mbakumbukirani bzomwe bzidakucitisani kubzipereka kwa Yahova mucibatizidwa. Imwepo mudacita bzimwebzi thangwe rakuti mukhafuna kupitiriza kukhala ku mbali ya Yahova. Kumbukirani bzomwe bzidakucitisani kutsimikizira kuti mwagumana cadidi. Imwepo mudamudziwa bwino Yahova, ndipo mudayamba kumufuna na kumulemekeza ninga Pai wanu wa kudzulu. Imwepo mudayamba kumukhulupira, ndipo bzimwebzi bzidakucitisani kuti musiye bzinthu bzakuipa bzomwe mukhacita. Imwepo mudayamba kucita bzinthu bzomwe iye ambakomedwa nabzo. Pomwe mudazindikira kuti Mulungu wakulekererani, mudabzibva bwino kwene-kwene. (Sal. 32:2) Imwepo mudayamba kutsonkhana na kuuzambo anzanu bzomwe mukhapfunzabzo. Ninga Mkristau wakubzipereka na wakubatizidwa, imwepo muli wakutsimikiza kucita bzentse bzomwe mungakwanise kuti mupitirize kufamba mu njira ya ku moyo. (Mat. 7:13, 14) Tenepo, pitirizani kukhala wakulimba na wakusaya kutekenyeka pa kutumikira Yahova ndipo pitirizani kubvera malamulo yace. w23.07 17 ¶14; 19 ¶19

Mukakumbukira bza mpembo wanu wakubzipereka kwa Yahova, imwepo mun’dzagumana mphanvu kuti mukwanise kulimbana na mayezo. Mwa ciratizo, kodi imwepo mungayambe kumbalatiza kuti mumbafuna mwamuna ayai mkazi wa munthu munango? Bzikuwonekeratu kuti mungacite lini bzimwebzo. Imwepo mudapicira kale kwa Yahova kuti mun’dzacita lini bzimwebzo. Mukasaya kulekerera kuti makumbukidwe yakuipa yakule mun’dzafunika lini kulimbana nayo. Imwepo mun’dzakhala kutali na “njira ya wanthu wakuipa.” (Mim. 4:14, 15) Kukumbukira ciratizo ca Jezu kungatithandize kwene-kwene. Iye akhali wakutsimikiza kukondwesa Pai wace. Imwepombo khalani wakutsimikiza kulamba cinthu ciri-centse comwe mukudziwa kuti cingakondwese lini Yahova Mulungu, omwe imwepo mudabzipereka kwa iye. (Mat. 4:10; Juw. 8:29) Cadidi n’cakuti mabvuto yambakupasani mwayi wakulatiza kuti muli wakutsimikiza kupitiriza kutewera Jezu. Imwepo mungakhale na citsimikizo centse cakuti Yahova an’dzakuthandizani kupitiriza kutewera Jezu. w24.03 9-10 ¶8-10