Agosto

Onani nfundo ziwiri zakufunika mu cinembo comwe ciri padzauluci: (1) Nyakulungama ambagumana na matsoka mazinji. (2) Yahova ambamupulumusa pa matsoka yentseneyo. Kodi Yahova ambatipulumusa tani? Njira ibodzi yomwe iye ambacitira bzimwebzi ni kutithandiza kudziwa momwe bzinthu bziriri m’dzikoli. Napo kuti Yahova adalewa kuti tin’dzakondwa tikamutumikira, iye alibe kulewa kuti tin’dzakhala na moyo wakusaya mabvuto. (Zai. 66:14) Iye ambatiuza kuti timbakhulupire bzinthu bzomwe bzin’dzacitika kutsogolo, pa nthawe yomwe tin’dzakhala na moyo wakusaya mabvuto. (2 Ako. 4:16-18) Pomwe nthaweyo ikanati kufika, iye ambatithandiza kuti tipitirize kumutumikira. (Mal. 3:22-24) Kodi tikupfunza ciyani na atumiki wa Yahova wakale-kale na wa ntsiku zino? Tingagumane na mabvuto yakusaya kudikhiririka. Tsono, tikathemba Yahova, iye an’dzapitiriza kutithandiza. — Sal. 55:22. w23.04 14-15 ¶3-4

Tingapfunze bzizinji na bzomwe Zuze na Mariya adacita pakubvera akulu-akulu wa boma napo kuti bzikhali bzakunesa kucita bzimwebzo. (Luk. 2:1-6) Pomwe Mariya akhana pathupi pa minyezi 9, boma lidawauza kuti acite cinthu cinango comwe cikhali cakunesa kwene-kwene. Seza Agusto, omwe akhali mtongi wa boma la Roma, adalewa kuti wanthu wentse akhafunika kukacita kanembera ku mzinda wawo omwe adabadwira. Zuze na Mariya adafunika kucita ulendo bwa makilometro 150 kuti akafike ku Betelehemu. Ulendobo mungadakhala bwakunesa kwene-kwene kwa Mariya. Iwo akhacita thupo na thanzi la Mariya na la mwana omwe akhali m’mimbayo. Kodi bzinthu bzingadakhala tani bzingadakhala kuti Mariya adaberekera mu njira? Iwo akhana thupo la momwe angadakhotcerera mwanayo thangwe rakuti iye akhali Mesiya, omwe Yahova adapicira kuti angadadzabwera. Kodi bzimwebzi bzidawacitisa kuti aleke kubvera bzomwe boma lidalewa? Napo kuti Zuze na Mariya akhanayo mathangwe yakucitira thupo, iwo adabvera lamulolo. Yahova adasimba kwene-kwene kubvera kwawo. Mariya adafika bwino ku Betelehemu, adabereka mwana wa thanzi, ndipo adathandizira kukwanirisa mapolofesiya! — Mik. 5:2. w23.10 8 ¶9; 9 ¶11-12

Kodi mungacite ciyani penu mumbabva mantha kutawira pa mitsonkhano? Pinango cinthu comwe mungacite ndico kumbakonzekera bwino. (Mim. 21:5) Imwepo mukabvesesa bwino nfundo zomwe mun’kapfunza, bzin’dzakupusirani kuti muimise boko kuti mutawire. Ndipo cinthu cinango, mbaperekani mitawiro yacigwatira. (Mim. 15:23; 17:27) Imwepo mun’dzacita lini mantha mukadziwa kuti mafala yomwe mun’funa kulewayo ni mang’ono-ng’ono. Mukapereka mtawiro wacigwatira mwa kufotokoza mafala yanu-yanu, imwepo mun’dzalatiza kuti mwakonzekera bwino ndipo mwaibvesesa bwino nkhaniyo. Penu imwepo mukuyezera kuphatisa basa nfundo zimwezi koma mukadapitiriza kucita mantha kutawira, dziwani kuti Yahova ambawona nyongo yanu kuti mutawire. (Luk. 21:1-4) Yahova angakukumbireni lini kuti mucite bzinthu bzomwe mungabzikwanise lini. (Afil. 4:5) Yezerani kuwona bzomwe mungakwanise kucita ndipo mbapembani kuti mukhale wakuderekha pomwe mukutawira. Kucita bzimwebzi kun’dzakuthandizani kuti mupereke mtawiro wacigwatira. w23.04 21 ¶6-8

Mpostolo Paulo adatiyezezera na acikunda omwe ambakhala tceru na wakukonzeka kuyenda ku nkhondo. Nthawe zentse, mcikunda ambafunika kukhala wakukonzeka kumenya nkhondo. Mpsibodzi-bodzimbo na ifepano. Pomwe ntsiku ya Yahova ikufendera, tin’funika kupitiriza kukhala wakukonzeka mwa kubvala pa nkhombe cakukhotcerera pa cifuwa ca cikhulupiro na lufoyi ndipo tibvalembo cidikhiro ninga kapaseti. Cakukhotcerera pa nkhombe cikhakhotcerera mtima wa mcikunda. Cikhulupiro na lufoyi bzimbakhotcerera mtima wathu wakuyezezera. Bzimwebzi bzin’dzatithandiza kuti tipitirize kutumikira Yahova na kutewera Jezu. Cikhulupiro cimbaticitisa kuti tikhulupire kuti Mulungu an’dzatisimba tikamutumikira na mtima wentse. (Aheb. 11:6) Bzimwebzi bzin’dzatithandiza kuti tipitirize kukhala wakukhulupirika kwa Mtsogoleri wathu, Jezu, napo kuti tingagumane na mabvuto. Tingalimbise cikhulupiro cathu kuti tikwanise kulimbana na mabvuto yomwe tikugumana nayo pa moyo wathu. Tingacite bzimwebzi mwa kumbawona bziratizo bza abale wathu omwe adapitiriza kukhala wakukhulupirika napo kuti akhazunzidwa na kugumana na mabvuto ya kusaya kobiri. Ndipo tingatcenkhembo kufuna kukhala na bzinthu bzizinji bza m’dzikoli mwakutewezera wale omwe adakhala na moyo wakusaya kufuna bzizinji kuti aikhe Umambo bwa Mulungu pa mbuto yakuyamba. w23.06 10 ¶8-9

Kubziphata ni mphanvu yomwe ifepano timbakhala nayo yakubzikhotca thupi lathu likafuna kucita cinthu comwe ifepano tikufuna lini. Khalidwe limweri ndakufunika thangwe limbatithandiza kuti tikwanirise cakulinga cathu maka-maka bzikakhala kuti cakulingaco n’cakunesa kucikwanirisa ayai tikakhala tiribe cikhumbo cakucita bzomwe tikufuna. Kumbukirani kuti kubziphata ni khalidwe libodzi lomwe limbacita mbali ya bzisapo bza mzimu. Ndipopa kumbirani Yahova kuti akupaseni mzimu wace wakucena kuti ukuthandizeni kukhala na khalidwe limweri. (Luk. 11:13; Agal. 5:22, 23) Lekani kumbadikhira nthawe yabwinoletu. Tikadikhirira kukhala na nthawe yabwinoletu kuti tikwanirise cakulinga cathu, ifepano tin’dzakwanisa lini kukwanirisa cakulingaco thangwe m’dzikoli mpsakunesa kukhala na nthawe. Ifepano tingatazire kukwanirisa cakulinga cathu cikakhala kuti cakulingaco n’cikulu kwene-kwene. Penu ndibzo bzomwe bzimbakucitikiranimbo, kodi mungakwanirise cakulingaco pang’ono-pang’ono? Penu mukufuna kukhala na khalidwe linango, thangwe ranyi mun’saya kucita bzimwebzo pang’ono-pang’ono? Penu cakulinga canu n’cakuti muwerenge Bibliya lentse, thangwe ranyi mun’saya kukhala na ndondomeko ya nthawe ing’ono ya kumbawerenga Bibliya? w23.05 29 ¶11-13

Mu ntsiku zakumalizira zino, Yahova akuphatisa basa gulu lace kuti atipase malango yakucokera m’Bibliya yomwe yambatithandiza kuti tipitirize kufamba mu “Mseu Wakucena.” (Zai. 35:8; 48:17; 60:17) Tingalewe kuti munthu akabvuma kupfunza Bibliya iye ambakhala ana mwayi wakufamba mu “Mseu Wakucena.” Wanthu winango ambandofamba pang’ono basi mu mseu umweyu akamala ambasiya. Koma winango akupitiriza kufamba mu mseu umweyu mpaka kukafika komwe akuyenda. Kodi iwo akuyenda kuponi? Kwa wale omwe ana cidikhiro ca kudzayenda kudzulu, “Mseu Wakucena” umbawatsogolera ku “[paraizo] wa Mulungu” kudzulu. (Apok. 2:7) Ndipo kwa wale omwe ana cidikhiro ca kudzakhala pa dziko la pantsi, mseu umweyu umbawatsogolera ku moyo wakulungama kuphampha kwa magole 1000 ya utongi bwa Jezu. Penu imwepo mukufamba mu mseu umweyu, lekani kubwerera m’mbuyo. Lekani kusiya kufamba mu mseu umweyu mpaka mukafike mu dziko lipsa! w23.05 17 ¶15; 19 ¶16-18

Imwepo mukakumbukira bzinthu bzentse bzabwino bzomwe Yahova adakucitirani mun’dzamutenda ndipo mun’dzafunisisa kubzipereka kwa iye. (Sal. 116:12-14) Bibliya limbalewa kuti Yahova ndiye omwe ambapereka “mphaso iri-yentse yabwino na yakulungama.” (Tiy. 1:17) Mphaso ikulu pa mphaso zentse zomwe adatipasa ni cakulombolera ca Mwana wace, Jezu. Cakulombolera cidacitisa kuti bzikhale bzakukwanisika kukhala pa uxamwali na Mulungu. Ndipo iye adakupasanimbo mwayi wakuti mudzakhale na moyo wakusaya kumala. (1 Juw. 4:9, 10) Kubzipereka kwa Yahova ni njira ibodzi ya momwe imwepo mungalatizire kuti mumbatenda lufoyi lomwe iye adakulatizani na bzisimbo bzentse bzomwe Yahova adakupasani. — Deut. 16:17; 2 Ako. 5:15. w24.03 5 ¶8

Tikambawona bzinthu bzakuipa bzomwe bzikucitika ntsiku zino, ifepano timbabva ninga momwe Loti adabvera. Iye “akhasunama thangwe ra makhalidwe yakupasa manyazi ya wanthu wakusaya kubvera malamulo,” thangwe akhadziwa kuti Baba wathu wakudzulu ambawenga makhalidwe yamweya. (2 Ped. 2:7, 8) Kugopa Mulungu na lufoyi lomwe iye akhanalo kuna Mulunguyo, bzidamucitisa kuti aleke kutewezera makhalidwe ya wanthu wa mu nthawe yace. Ifepanombo tikukhala pakati pa wanthu omwe ambalemekeza lini mitemo ya Yahova. Napo bziri tenepo, ifepano tingakhale wakucena pamaso pa Yahova tikakhala kuti timbamufuna Yahovayo na kumugopa. Kuti bzimwebzi bzikwanisike, Yahova adatipasa malango yomwe yangatilimbikise m’bukhu la Mimwani. Akristau wentse wacadidi, amuna, akazi na wana angagumane phindu akawerenga nfundo zomwe ziri m’bukhu limweri. Tikakhala kuti timbagopa Yahova, ifepano tin’dzacita mphole kuti tileke kucita uxamwali na wanthu omwe ana makhalidwe yakuipa. w23.06 20 ¶1-2; 21 ¶5

Pinango banja lanu limbakutsutsani ayai imwepo mudabvuma kuluza basa lomwe lingadakucitisani kuti mutambire kobiri zizinji kuti muikhe Umambo bwa Mulungu pa mbuto yakuyamba pa moyo wanu. (Mat. 6:33) Yahova ambadziwa bzinthu bzentse bzomwe imwepo mudamucitira. (Aheb. 6:10) Pinango imwepo mudakwanisa kuwona kukwanisika kwa mafala ya Jezu yakuti: “Palibe munthu omwe adasiya nyumba, abale, mpfumakazi, mai, pai, wana ayai minda thangwe ra inepano na thangwe ra mafala yabwino, omwe an’dzatambira lini mu nthawe ino kubwerezera maulendo 100, nyumba, abale, mpfumakazi, azimai, wana na minda pabodzi na mazunzo, ndipo mu nthawe ikubwerayo acidzatambirambo moyo wakusaya kumala.” (Mar. 10:29, 30) Bzisimbo bzomwe imwepo mudatambira mpsizinji kwene-kwene kuposa bzinthu bzomwe mudaluza. — Sal. 37:4. w24.03 9 ¶5

Pomwe Akristau wa ku Djudeya adagwedwa na bvuto la njala, abale wa gwere la ku Antiyokiya “adabverana kuti ali-wentse acose bzomwe angadakwanisa kuti atumize thandizolo kwa abale wa ku Djudeya.” (Mab. 11:27-30) Napo kuti abale omwe akhagumana na njalayo akhakhala kutali, Akristau wa ku Antiyokiya akhali wakukonzeka kuwathandiza. (1 Juw. 3:17, 18) Ifepano tingalatizembo ntsisi mwa kuthandiza abale wathu omwe agwedwa na malengwa ya pantsi. Timbacita bzimwebzi mwa kubvunza akulu penu tingayendembo kukathandizira, kucita bzakupereka ayai kupempherera abale omwe agwedwa na malengwayo. Abale na mpfumakazi zathu angafunikire thandizo kuti agumane bzakufunikira pa moyo wawo. Mambo wathu Jezu Kristu akadzabwera kudzatonga wanthu tikufuna kuti adzatigumane tikulatiza ntsisi ndipo acidzatiuza kuti: “Tambirani Umambo.” — Mat. 25:34-40. w23.07 4 ¶9-10; 6 ¶12

Jezu adatewezera Baba wace Yahova mwa kusaya kungingimira nzeru zace. Iye adabwera pa dziko la pantsi kuti adzapalizire mafala yabwino kwa “mabira yakutaika ya mtundu wa Jirayeri.” Iye alibe kungingimira nzeru zace pomwe akhacita utumiki bwace. Nthawe inango, mkazi munango omwe akhali lini m’Jirayeri adakumbira Jezu kuti amupozere mwana wace omwe ‘akhana ciwanda comwe cikhamuzunza kwene-kwene.’ Jezu adabva ntsisi ndipo adapoza mwana wa mkaziyo. (Mat. 15:21-28) Onani ciratizo cinango. Pomwe Jezu adayamba utumiki bwace, iye adalewa kuti: “Ule omwe an’dzandilamba . . . , inepanombo nin’dzamulamba.” (Mat. 10:33) Tsono kodi iye adalamba Pedru omwe adamulamba katatu? Ne, alibe. Jezu adawona kukungula kwa Pedru na cikhulupiro cace. Pomwe iye adalamusidwa, adawonekera kwa Pedru ndipo adamutsimikizira kuti akhadamulekerera na kumufuna. (Luk. 24:33, 34) Yahova pabodzi na Jezu ambangingimira lini nzeru zawo. Tsono tani ifepanombo? Yahova ambafuna kuti tileke kumbangingimira nzeru zathu. w23.07 21 ¶6-7

Kodi ni citsimikizo ciponi comwe tingafotokozere wale omwe ambapenukira kuti piciro la Paraizo lin’dzakwanisikadi kutsogoloku? Cakuyamba, Yahova caiyeyo ndiye omwe adapicira. Bukhu la Apokalipse limbalewa kuti: “Ule omwe akhadakhala pa mpando wa umambo, adati: ‘Ona! Ndikukonza papsa bzinthu bzentse.’” Iye ana nzeru na mphanvu ndipo akufunisisa kukwanirisa piciro lace. Caciwiri, piciro lomwe Yahova adalewa lin’dzakwanisikadi ndipopa iye adalewa ninga kuti bzakwanisika kale. Iye adati: “Mafala yamweya njakukhulupirika na yacadidi. . . . Bzakwanisika!” Cacitatu, Yahova akayamba kucita cinthu, iye ambadzacimaliza, ndipopa iye adalewa kuti: “Inepano ndine Alfa na Omega.” (Apok. 21:6) Yahova an’dzalatiza kuti Sathani ngwakunama ndipo angamutazise lini kukwanirisa cakulinga cace. Tenepo munthu akalewa kuti: “Bzimwebzi bzingacitike lini,” imwepo mungamuwerengere Apokalipse 21:5, 6. Mucimulatiza momwe Yahova adatsimikizira kuti bzimwebzi bzin’dzacitikadi mwakucita kuikha assinatura yace. — Zai. 65:16. w23.11 7 ¶18-19

Yahova adalewa piciro limweri kwa Abalahamu pomwe Abalahamuyo akhana magole 75. Kodi Abalahamu adawona kukwanisika kwa piciro limweri? Iye alibe kuwona bzentse bzikukwanisika. Pomwe adayambuka Mkulo wa Eufrate acidikhirira magole 25, Abalahamu adawona kubadwa kwakudabwisa kwa mwana wace Izaki, ndipo pomwe padapita magole 60, azukulu wace Esau na Djakobo adabadwa. (Aheb. 6:15) Tsono Abalahamu alibe kuwona mbadwa zace zikuwanda zicikhala mu Dziko Lakupiciridwa. Tsono mwamuna wakukhulupirikayu akhali pa uxamwali bwakulimba na Yahova. (Tiy. 2:23) Abalahamu akadzalamusidwa, iye an’dzakomedwa kwene-kwene kudziwa kuti cikhulupiro na kupirira kwace bzidacitisa kuti mitundu yentse ya wanthu isimbidwe! (Gen. 22:18) Kodi tikupfunza ciyani? Pinango ifepano tingawone lini mapiciro yentse ya Yahova yakukwanisika tsapanopali. Tsono, tikakhala wakupirira ninga Abalahamu, tin’dzakhala na citsimikizo cakuti Yahova an’dzatibaira tsapano napombo mu dziko lipsa. — Mar. 10:29, 30. w23.08 24 ¶14

Pomwe Mambo Uziya akhali mwana, iye akhali wakubzicepesa. Iye adapfunza “kugopa Mulungu wacadidi.” Iye adakhala na moyo magole 68, ndipo Yahova adamusimba pa bzentse bzomwe akhacita. (2 Nkha. 26:1-4) Uziya adakunda mitundu mizinji ya anyamadulanthaka wace, ndipo adacita ciri-centse kuti mzinda wa Jeruzalemu ukhale wakukhotcerereka. (2 Nkha. 26:6-15) Uziya adakomedwa kwene-kwene na bzomwe Yahova adamuthandiza kucita. (Mpal. 3:12, 13) Mambo Uziya akhadazolowera kuuza wanthu malango ya Yahova. Pinango bzimwebzi ndibzo bzomwe bzidamucitisa kuti iye awone kuti angadacita ciri-centse comwe akhafuna. Ntsiku inango, Uziya adapita mu templo ya Yahova ndipo adayezera kutentha bzakununtcirisa pa guwa la ntsembe. Amambo akhabvumizidwa lini kucita bzimwebzi. (2 Nkha. 26:16-18) Mkulu wa Antsembe Azariya adayezera kumuletsa kucita bzimwebzo, tsono Uziya adakalipa kwene-kwene. Bzakupasa ntsisi mpsakuti Uziya alibe kupitiriza kukhala wakukhulupirika, ndipo Yahova adamulanga mwa kumucitisa kuti akhale na mapere. (2 Nkha. 26:19-21) Iye angadapitiriza kukhala wakubzicepesa, bzinthu bzingadamufambira bwino kwene-kwene pa moyo wace! w23.09 10 ¶9-10

Napo pambuyo pa mpostolo Pedru kudzozedwa na mzimu, iye adapitiriza kulimbana na kuperewera kwace. Mu 36 EC, Mulungu adatuma Pedru kuti ayende ku mui kwa Korneliyo omwe akhali lini Mdjuda, kumweko Mulungu adadzoza Korneliyoyo na mzimu wakucena. Bzimwebzi bzidalatiziratu padeca kuti “Mulungu alibe tsankhulo” ndipo wanthu omwe akhali lini Adjuda angadakhalambo m’gwere lacikristau. (Mab. 10:34, 44, 45) Pedru adayamba kudya na wanthu omwe akhali lini Adjuda. Kukhali kuyamba kucita bzimwebzi. Napo bziri tenepo, Adjuda winango akhawona kuti Akristau omwe ni Adjuda akhafunikira lini kudya pabodzi na omwe akhali lini Adjuda. Pomwe wanthu winango omwe akhana nzeru zimwezi adafika ku Antiyokiya, Pedru adasiya kudya na Akristau omwe akhali lini Adjuda thangwe rakuti akhafuna lini kusunamisa Akristau omwe akhali Adjuda. Mpostolo Paulo adawona bzomwe Pedru adacitabzi ndipo adamutsimula pakati pa wanthu. (Agal. 2:13, 14) Napo kuti Pedru adacita bzimwebzi, iye adapitiriza kutumikira Yahova. w23.09 22 ¶8

Mukakhala na nthawe yakubziwona mun’dzakwanisa kuzindikira mbali zinango zomwe mun’funika kucita nyongo kuti muzikwanirise. Koma lekani kuwofoka. “Mbuya ngwakudeka mtima,” iye an’dzakuthandizani kuti mukwanirise bzomwe mukanati kukwanirisa. (1 Ped. 2:3) Mpostolo Pedru akutitsimikizira kuti: “Mulungu . . . an’dzamalizisa kukupfunzisani. Iye an’dzakulimbikisani.” Pedru adabziwona kuti akhali lini wakuthemera kukhala pafupi na Mwana wa Mulungu. (Luk. 5:8) Tsono mwakuthandizidwa na Yahova pabodzi na Jezu, iye adapitiriza kukhala mteweri wa Kristu. Ndipopa Pedru adawonedwa kuti akhali wakuthemera ‘kupita mu Umambo bwakusaya kumala bwa Mbuya na Mpulumusi wathu Jezu Kristu.’ (2 Ped. 1:11) Iye adapasidwa mabaibai yabwino kwene-kwene! Mukapirirambo ninga momwe Pedru adapiririra na kubvuma kupfunzisidwa na Yahova, imwepo mun’dzatambirambo mabaibai ya moyo wakusaya kumala. Bzimwebzi bzin’dzakucitisani kuti “mudzapulumuke thangwe ra cikhulupiro canu.” — 1 Ped. 1:9. w23.09 31 ¶16-17

Tendi la mkonkhano likhana bwalo lomwe ikhali mbuto yomwe antsembe akhambaphatira mabasa yawo. Guwa la ntsembe likulu la mkuwa lakuperekera ntsembe likhakhala pa bwalolo pabodzi na basiya la mkuwa la madzi lomwe antsembe akhaliphatisa basa kuti abzicenese pomwe akanati kucita basa lawo lakupambulika. (Eki. 30:17-20; 40:6-8) Ntsiku zino, Akristau wakudzozedwa omwe akali pa dziko la pantsi pano ambatumikira mwakukhulupirika mu bwalo la mkati la pa dziko la pantsi la templo yauzimu. Basiya likulu la madzi ni cizindikiro kwa iwo na kwa Akristau wentse cakuti an’funika kupitiriza kukhala adacena pa mbali zentse za moyo wawo. Tsono n’kuponi komwe “thimu likulu” limbanamatira Mulungu? Mpostolo Juwau adawawona iwo “akhadaima pamaso pa mpando wa umambo,” bzomwe bzikuthandauza kuti ali pa dziko la pantsi pano pa bwalo la kunja, ndipo “acimbaphata mabasa yakupambulika mu templo mwace usiku na masikati.” (Apok. 7:9, 13-15) Ifepano timbatenda kwene-kwene mwayi omwe tinawo wakukhala na mbuto pa makonzedwe ya Yahova yakuti timunamate mwakucena! w23.10 28 ¶15-16

Njira ibodzi ya momwe Yahova ambatipasira mphanvu ni kuphatisa basa akulu wa gwere. (Zai. 32:1, 2) Ndipopa, imwepo mukakhala na thupo, fotokozerani akulu bza mabvuto yomwe mukugumana nayo. Lekani kuzeza kubvuma thandizo lomwe iwo angakupaseni. Mwakuphatisa basa iwo, Yahova angakulimbiseni. Mapiciro ya m’Bibliya ya kukakhala na moyo wakusaya kumala kudzulu ayai m’Paraizo wakudeka pa dziko la pantsi pano yangatipase mphanvu. (Aro. 4:3, 18, 19) Thangwe ra cidikhiro cimweci, timbakwanisa kupirira mabvuto yakusiyana-siyana, kupalizira mafala yabwino ya Umambo na kuthandiza abale na mpfumakazi zathu. (1 Ates. 1:3) Cidikhiro cibodzi-bodzici cidalimbisambo mpostolo Paulo. Iye adabziyezezera na combo ca dongo. Iye ‘akhadapanikizidwa,’ ‘nzeru zikhadamumalira,’ ‘akhazunzidwa,’ na ‘kugwesedwa pantsi.’ Moyo wace ukhalidi pa ngozi. (2 Ako. 4:8-10) Paulo adakhala na mphanvu ya kupirira thangwe rakuti akhakumbukira bza cidikhiro comwe iye akhanaco. (2 Ako. 4:16-18) Paulo akhakumbukira kwene-kwene bza cidikhiro cace cakutsogolo cakudzakhala na moyo kudzulu. Bzimwebzi bzidacitisa kuti unthu bwace bwa mkati “bukhalisidwe bupsa nsiku na ntsiku.” w23.10 15-16 ¶14-17

Pomwe mukupemba, mbawonani penu ni nthawe yakuti Yahova atawire mkumbiro wangu. Ifepano tingawone ninga kuti tikufunikira mtawiro wa mipembo yathu mwakamfulumize. Tsono Yahova ndiye ambadziwa nthawe yakuthemera kuti atawire mkumbiro wathu. (Aheb. 4:16) Ifepano tikasaya kutawiridwa mkumbiro wathu pa nthawe yomwe tikhadikhirira, tingakumbuke kuti mtawiro wa Yahova ngwakuti ‘Ne.’ Tsono pinango pentse mtawiro wace ungakhale wakuti ‘Tsapanopali ne.’ Mwa ciratizo, m’bale wacitswaka adapemba kwa Yahova kuti amupoze matenda yace. Tsono iye alibe kulimba. Yahova angadamulimbisa mwakudabwisa matenda yace yale, Sathani angadalewa kuti m’baleyo apitiriza kutumikira Yahova thangwe rakuti Yahovayo adamupoza. (Djob. 1:9-11; 2:4) Ndipo kuthumizira bzimwebzi, ifepano tikudziwa kuti Yahova adaikha kale nthawe yomwe an’dzapoza matenda yentse. (Zai. 33:24; Apok. 21:3, 4) Pomwe nthawe imweyo ikanati kufika, Yahova angatipoze lini mwakudabwisa. Ndipopa, bzomwe m’baleyo angadakumbira mpsakuti Yahova amupase mphanvu na mtendere wa mu mtima kuti apirire matenda yaceyo acipitiriza kutumikira Yahova mwakukhulupirika. w23.11 24 ¶13

Samusoni adacita bzinthu bzakuphonyeka kwene-kwene, tsono iye alibe kubwerera m’mbuyo. Iye adanyang’ana mpata kuti akwanirise basa lomwe Mulungu adamupasa kwa Afilisteu. (Ato. 16:28-30) Samusoni adadandaulira Yahova kuti: “Lekani ndiwabwezere Afilisteuwa.” Mulungu wacadidi adatawira mkumbiro wa Samusoni ndipo adacitisa kuti iye akhale pomwe na mphanvu. Ndipo Samusoni adakwanisa kupha Afilisteu azinji kwene-kwene ntsiku imweyire kuposa omwe akhadapha kale m’mbuyo mwace. Napo kuti Samusoni akhagumana na mabvuto thangwe ra bzakusankhula bzace bzakuipa, iye alibe kusiya kucita bzomwe Yahova ambafuna. Ifepano tikacita bzinthu bzakuipa ticiluza mwayi omwe tikhanawo, tin’funika lini kubwerera m’mbuyo. Kumbukirani kuti Yahova ngwakukonzeka kutilekerera. (Sal. 103:8, 10) Napo kuti tidacita bzinthu bzakuphonyeka, Yahova angapitirize kutiphatisa basa ninga momwe adacitira na Samusoni. w23.09 6 ¶15-16

Kupirira kwanu kumbacitisa kuti mufunidwe na Mulungu. Bzimwebzi bzin’funa lini kulewa kuti Yahova ambakomedwa thangwe rakuti imwepo mukugumana na mabvuto. Bzomwe Mulungu ambakomedwa nabzo ndimwepo. Kupirira kwanu kumbacitisa kuti mufunidwe. Cimweci ni cisimbo cabwino kwene-kwene! (Sal. 5:12) Kumbukirani kuti Abalahamu adagumana na mabvuto mazinji. Ndipo pomwe iye adapirira mwakukhulupirika, Yahova adakomedwa naye. Yahova akhamuwona ninga xamwali wace ndipo akhamuwona kuti ngwakulungama. (Gen. 15:6; Aro. 4:13, 22) Bzimwebzi bzingaticitikirembo. Yahova ambakomedwa nafe sikuti thangwe ra basa lomwe timbacita ayai komwe timbatumikira. Iye ambatifuna thangwe ra kupirira kwathu mwakukhulupirika. Ndipo bziribe basa magole yathu, bzomwe bzikuticitikira ayai luso lomwe tinalo, tentsenefe tingakwanise kupirira. Kodi pana bvuto linango lomwe likukucitisani kupirira mwakukhulupirika tsapano? Penu ndibzo, khalani wakukondwa thangwe ra kudziwa kuti Yahova akukomedwa namwe. Kudziwa kuti tikukondwesa Mulungu, kungaticitise kuti tikhale wakukondwa ndipo kungalimbise cidikhiro cathu. w23.12 11 ¶13-14

Mkristau wakukhwima mwauzimu an’funika kucita nyongo kuti ambalewelewe bwino na anzace. Munthu omwe ambalewalewa bwino na anzace ambatetekera pomwe anzace akulewalewa na kuphatisambo basa nfundo zawo. (Mim. 20:5) Iye angakwanise kudziwa bzomwe mwanzace akukumbuka mwa kubva fala, kuwona momwe nkhope yace iriri na kalalewedwe kace. Imwepo mungakwanise lini kucita bzimwebzi penu mumbakwanisa lini kumala nthawe na anzanu. Penu imwepo mumbandophatisa basa mitcini ya nzeru kuti mulalewe nawo, imwepo mungakwanise lini kuzolowera kumbalewalewa bwino na anzanu. Ndipopa mbacitani nyongo yakuti mumbakhale na nthawe ya kumbalewalewa na anzanu maso na maso. (2 Juw. 12) Mkristau wakukhwima mwauzimu an’funika kukhala ule omwe ambabzisamalira yekha na kusamalirambo banja lace. (1 Tim. 5:8) Tin’funika kupfunza basa lomwe lingadzatithandize kutsogolo. (Mab. 18:2, 3; 20:34; Aef. 4:28) Citani nyongo kuti mudziwike kuti mumbaphata basa mwakubzipereka. Mukacita bzimwebzi, imwepo mun’dzakwanisa kugumana basa ndipo mun’dzakhala pa basapo nthawe ikulu. w23.12 27 ¶12-13

Bibliya likambalewa bza “ntsiku ya Yahova,” limbakhala likufotokoza bza nthawe yomwe Yahova an’dzapfudza wanthu omwe ambacita bzinthu bzakuipa acipulumusa wanthu wace. Mu nthawe za m’Bibliya, Yahova adalanga mitundu mizinji ya wanthu. (Zai. 13:1, 6; Ezek. 13:5; Zef. 1:8) Mu nthawe yathu ino, “ntsiku ya Yahova” in’dzayamba na kupfudzidwa kwa Babiloniya Mkulu, yomwe ni magereja yakunama ndipo pakumalizira pace pan’dzacitika nkhondo ya Armagedo. Kuti tidzapulumuke pa “ntsiku” imweyi, tin’funika kukonzekereratu tsapano. Jezu adalewa kuti tin’funika lini kundokonzekera kubwera kwa “citsautso cikulu,” koma tin’funikambo ‘kukhala tidakonzekera’ kubwera kwa ntsikuyo. (Mat. 24:21; Luk. 12:40) Mu tsamba lakuyamba lomwe mpostolo Paulo adanembera Akristau wa ku Tesalonika, iye adalewa bzinthu bzakusiyana-siyana bzomwe bzimbatithandiza kukonzekera kubwera kwa ntsiku ya Yahova. Paulo akhadziwa kuti ntsiku ya Yahova ingadabwera lini pa nthawe imweyire. (2 Ates. 2:1-3) Napo bziri tenepo, iye adalimbikisa abale wacewo kukhala wakukonzeka aciwona ninga kuti ntsikuyo ingadafika pa nthawe imweyire. Ifepano tin’funikambo kuphatisa basa malango ya Pauloya. w23.06 8 ¶1-2

Mu gole la 1978, prediyo itali kwene-kwene idamangidwa mu mzinda wa Tokyo ku Japão. Pakuti kumweko kumbacitika kwene-kwene bziteke-teke bza pantsi, wanthu azinji akhabzibvunza penu prediyoyo ingadagwa lini. N’ciyani comwe wanthu omwe adaikonzawo adacita kuti prediyoyo idzaleke kugwa na bziteke-tekebzo? Iwo adaikonza kuti ikhale yakulimba kwene-kwene. Mkristau ali ninga prediyo imweyi. Thangwe ranyi? Thangwe iye an’funika kukhala wakulimba, wakusaya kutekenyeka na wacikati-kati pa nkhani ya kubvera malamulo ya Yahova. Iye an’funika kukhala wakukonzeka kubvera na kutcenkha kucita bzinthu bzomwe bzimbabverana lini na bzomwe Bibliya limbalewa. Ndipo iye an’funikambo kukhala ‘wakukonzeka kubvuma’ bzikakhala kuti mpsakufunika kucita bzimwebzo. (Tiy. 3:17) Mkristau omwe adapfunza kumbawona makhalidwe mawiriya mu njira yakuthemera, iye ambakhala lini wakuuma ayai kulekerera bzinthu bzakuipa. w23.07 14 ¶1-2

Pomwe Jezu adakula adafunikira kupirira mayezo ya Sathani, pomwe Sathaniyo akhafuna kuti iye aleke kubvera ndipo adacita kumuuziratu kuti aleke kukhala wakukhulupirika kwa Mulungu. (Mat. 4:1-11) Sathani akhafunisisa kucitisa Jezu kuti aleke kukhala wakubvera kuti atazire kupereka cakulombolera kuti apulumuse wanthu. Pomwe Jezu akhacita utumiki bwace pa dziko la pantsi, iye adagumana pomwe na mabvuto manango. Anyamadulanthaka wace akhamutewera m’mbuyo ndipo akhafuna kumupha. (Luk. 4:28, 29; 13:31) Iye adapirira bzakuphonya bza ateweri wace. (Mar. 9:33, 34) Pomwe iye akhatongedwa mulandu napo kuti alibe kuphonya cinthu, adazunzidwa na kunyozedwa. Iye adabva kuwawa kwene-kwene pomwe adaphedwa ninga mbava. (Aheb. 12:1-3) Iye akhafunikira kupirira mbali yakumalizira ya kuyezedwa kwace mwakusaya kuthandizidwa na Yahova. (Mat. 27:46) Bzikuwonekeratu padeca kuti Jezu adabonera kwene-kwene kuti akwanise kupereka cakulombolera. Tikambakumbukira mabvuto yakusiyana-siyana yomwe Jezu adabvuma kugumana nayo kuti atilombole timbamufuna kwene-kwene. w24.01 10-11 ¶7-9

Kupirira kumbatithandiza kukhala wakubverana na anzathu ndipo kumbatithandiza kutetekera mwatceru pomwe anzathu akulalewa. (Tiy. 1:19) Kupirira kumbacitisa kuti wanthu akhale pa mtendere. Bzimwebzi bzimbatithandiza kuti tileke kulalewa bzinthu mwakusaya kukumbuka bwino tikakhala tanyosedwa. Tikakhala wakupirira tin’dzacedwa kukalipa mwanzathu akatilewa mafala yakuipa. M’mbuto mwa kubwezera, ‘tin’dzapitiriza kupirirana na kulekererana na mtima wentse.’ (Akol. 3:12, 13) Kupirira kumbatithandizambo kuti tisankhule bzinthu mwanzeru. M’mbuto mwakucita bzinthu mwa mphumapuma, tin’dzapambula nthawe kuti tifufudze pomwe tikanati kucita bzakusankhula. Mwa ciratizo, tikakhala tikunyang’ana basa, penu ndife lini wakupirira, tingabvume basa liri-lentse lomwe lingawonekero. Tsono tikakhala wakupirira, tin’dzakhala na nthawe yakufufudza kuti tikwanise kudziwa penu basalo lingadzatipase mpata wakucita bzinthu na banja lathu na kucitambo bzinthu bzauzimu. Kukhala wakupirira kun’dzatithandiza kuti tileke kusankhula bzinthu mwakuphonyeka. w23.08 22 ¶8-9

Imwepo mukasunama thangwe rakuti nthawe zinango mumbakhala na bzikhumbo bzakuipa, kukumbukira bza piciro lomwe imwepo mudacita lakubzipereka kwa Yahova kun’dzakuthandizani kuti muleke kubwerera m’mbuyo, koma mun’dzapitiriza kulimbana na mayezo yomwe mukugumana nayo. Mwa njira iponi? Imwepo mukabzipereka kwa Yahova, mumbakhala mwabzilamba mwekha. Bzimwebzi bzin’funa kulewa kuti mumbalamba bzikhumbo bzanu na bzakulinga bzinango bzomwe Yahova angakomedwe lini nabzo. (Mat. 16:24) Imwepo mukadzayezedwa ayai mukadzakhala mukugumana na bvuto linango lakunesa mun’dzafunika lini kukhala na thupo pa bzomwe mukufunikira kucita. Imwepo mun’dzakhala mukudziwa kale bzomwe mukufunikira kucita bzomwe ni kupitiriza kukhala wakukhulupirika kwa Yahova, ndipo mun’dzakhala wakutsimikiza kukondwesa Yahovayo. Imwepo mun’dzakhala ninga Djobi. Napo kuti akhagumana na mabvuto yakunesa kwene-kwene, iye adalewa mwakutsimikiza kuti: “Nin’dzasiya lini kukhala na mtima wakusaya kugawanika!” — Djob. 27:5. w24.03 9 ¶6-7

Yahova ni “Mulungu wa lufoyi” ndipo iye an’dzatisiya lini! (2 Ako. 13:11) Iye ambafuna mtumiki wace ali-wentse payekha-payekha. Ndipo ifepano tina citsimikizo centse cakuti ‘tidazunguliridwa na kudeka mtima kwace komwe kumbamala lini.’ (Sal. 32:10) Tikambakumbukira kwene-kwene momwe iye ambatilatizira lufoyi lace, iye ambakhala munthu caiye kwa ifepano ndipo timbakhala pa uxamwali na iye. Tingapembe kwa iye mwakutsudzuka ticimuuza kuti tikufuna kuti iye atilatize lufoyi lace. Tingamuuze cinthu ciri-centse comwe cikuticitisa thupo na cikhulupiro centse cakuti iye an’dzatibva ndipo an’dzatithandiza. (Sal. 145:19) Ninga momwe ifepano timbafunira kukhala pa moto pa nthawe yakudjedjera, timbafunambo kuti Yahova atilatize lufoyi. Lufoyi la Yahova ndamphanvu kwene-kwene ndipo iye ngwantsisi. Tenepo khalani wakukondwa thangwe rakuti Yahova ambakufunani. Ndipo tentse tibvume lufoyi la Yahova mwakulewa kuti: “Inepano nimbamufuna Yahova”! — Sal. 116:1. w24.01 31 ¶19-20

Jezu adacita bzizinji kuposa kondodziwisa wanthu bza dzina la Yahova. Adjuda wentse akhadziwa kale dzina la Mulungu. Tsono Jezu adacita nyongo ‘yakufotokozera wanthu . . . bza Mulunguyo.’ (Juw. 1:17, 18) Mwa ciratizo, bzinembo bza Cihebereu bzimbalewa kuti Yahova ngwa lufoyi likulu na wantsisi. (Eki. 34:5-7) Jezu adabvekesa bwino nfundo imweyi mwa kufotokoza ciratizo ca mwana wakutaika, omwe adadzakungula, na pai wace. Timbawerenga kuti “pomwe pai wacewo adamuwona na patali,” adamuthamangira, acimukumbatira, acimulekerera na mtima wentse. Bzimwebzi bzikutithandiza kuwona kuti Yahova ana lufoyi likulu na ntsisi. (Luk. 15:11-32) Jezu adalewa mwakubveka bwino momwe Pai wace aliri. w24.02 10 ¶8-9

Yahova ambatsangalaza wale omwe ambagumana na mabvuto. Kodi tingatewezere tani Yahova mwa kukhala wa ntsisi na kutsangalaza anzathu? Njira ibodzi ya momwe tingacitire bzimwebzi ni kukulisa makhalidwe yabwino mu mtima mwathu yomwe yangatithandize kuti timbakhale na ntsisi. Kodi makhalidwe yamweyo njaponi? N’ciyani cin’dzatithandiza kuti tipitirize kumbafunana kuti “tikwanise kumbatsangalazana” ntsiku na ntsiku? (1 Ates. 4:18) Tin’funika kukulisa makhalidwe ninga ntsisi, lufoyi la pa ubale na kudeka mtima. (Akol. 3:12; 1 Ped. 3:8) Kodi makhalidwe yamweya yangatithandize tani? Tikambabvera ntsisi abale wathu na kufuna kuwathandiza, tin’dzafunisisa kuwatsangalaza pomwe akugumana na mabvuto. Jezu adalewa kuti: “Pamulomo pambalewa bzinthu bzomwe bzadzala mu mtima. Munthu wabwino, ambalewa bzinthu bzabwino thangwe mu mtima mwace mudadzala bzinthu bzabwino.” (Mat. 12:34, 35) Kutsangalaza abale na mpfumakazi zathu ni njira yakufunika kwene-kwene yakulatizira lufoyi. w23.11 10 ¶10-11

Penu tikufuna kubvesesa polofesiya ya m’Bibliya, tin’funika kukumbira thandizo. Kuti tibvesese, tingayezezere tenepa. Kumbukirani kuti imwepo mukucita ulendo ndipo mukuyenda ku mbuto komwe mun’kudziwa lini, tsono muli pabodzi na xamwali wanu omwe an’kudziwa komwe mukuyendako. Iye akudziwa komwe muli ndipo akudziwambo kuti mseu uli-wentse ukuyenda kuponi. Kulewa cadidi, imwepo mungakomedwe kwene-kwene na xamwali wanuyo thangwe ra iye kubvuma kucita namwe ulendobo. Yahova ali ninga xamwali umweyu. Iye ambalidziwa bwino-bwino tsogolo lathu, ndipopa kuti tibvesese mapolofesiya ya m’Bibliya, tin’funika mwakubzicepesa kukumbira thandizo kwa Yahova. (Dan. 2:28; 2 Ped. 1:19, 20) Ninga m’bereki wabwino, Yahova an’funa kuti wana wace akhale na tsogolo labwino. (Jer. 29:11) Tsono mwakusiyana na abereki, Yahova angakwanise kutiuza bwino-bwino bzomwe bzin’dzacitika kutsogolo, ndipo bzentse bzomwe iye ambalewa bzimbacitikadi. Yahova adaphatisa basa amuna wanzeru kuti anembe m’Fala lace mapolofesiya kuti tikwanise kudziwa bzomwe bzin’citika kutsogoloku. — Zai. 46:10. w23.08 8 ¶3-4