Julho

Bzakudabwisa bzomwe Jezu akhacita na momwe iye akhacitira bzinthu akhatewezera Baba wace. (Juw. 14:9) Kodi tingapfunze ciyani na bzakudabwisa bzomwe Jezu adacita? Jezu na Baba wace ambatifuna kwene-kwene. Pomwe Jezu akhali pa dziko la pantsi pano adalatiza kuti ambafuna wanthu mwa kuphatisa basa mphanvu zomwe anazo kuti awathandize. Pa nthawe inango, azimola awiri adamukumbira kuti awathandize. (Mat. 20:30-34) Jezu adawapoza thangwe rakuti “adawabvera ntsisi.” Fala la Cigerego lomwe lidasanduliziridwa kuti “adawabvera ntsisi” limbathandauza momwe munthu ambabvera mu mtima mwace. Ntsisi zimwezi ndizo zidacitisa kuti Jezu adyese wanthu omwe akhana njala na kupoza omwe akhana mapere. (Mat. 15:32; Mar. 1:41) Tingatsimikize kuti Yahova, Mulungu wa “ntsisi zikulu” na Mwana wace ambatifuna kwene-kwene ndipo ambawawidwa akatiwona tikubonera. (Luk. 1:78; 1 Ped. 5:7) Iwo akufunisisa kumalisa mabvuto yomwe wanthu akugumana nayo! w23.04 3 ¶4-5

Tingacite bzomwe tingakwanise kuti timbatcenkhe kuwerenga ayai kutetekera bzinthu bzakuphonyeka bza mu dziko la Sathaniri. Tingakhale na makumbukidwe yakucena tikambawerenga Bibliya na kumbalipfunza ntsiku zentse. Kugumanika pa mitsonkhano na kumbacita mbali mu utumiki kun’dzatithandizambo kuti tikhale na makumbukidwe yabwino. Yahova akutiuza kuti an’dzatilekerera lini kuti tiyezedwe mpaka kufika pa kutazira kupirira. (1 Ako. 10:12, 13) Tentsenefe tin’funika kumbapemba kwa Yahova kuti tipitirize kukhala wakukhulupirika pa nthawe zakunesa. Yahova ambafuna kuti ‘timbamukhuthulire bza mu mtima mwathu’ mwa kumbapemba kwa iye. (Sal. 62:8) Mbatumbizani Yahova ndipo mbamutendani pa bzentse bzomwe iye ambacita. Mbamukumbirani kuti akuthandizeni kukhala wakukhwimika mu upalizi. Ndipo mbamukumbiranimbo kuti akuthandizeni kupirira mabvuto na mayezo yomwe mungakhale mukugumana nayo. Lekani kulekerera kuti cinthu ciri-centse ayai munthu ali-wentse akutaziseni kumbapemba kwa Yahova ntsiku zentse. w23.05 7 ¶17-18

Thangwe ranyi ifepano timbayenda ku mitsonkhano ya gwere? Cakuyamba, timbatsonkhana kuti titumbize Yahova. (Sal. 26:12; 111:1) Timbatsonkhanambo pabodzi kuti timbalimbikisane pa nthawe zino zakunesa. (1 Ates. 5:11) Tikambaimisa boko ticipereka mtawiro, timbakhala tikucita bzimwebzi. Tsono pomwe tikufuna kupereka mtawiro, tingagumane na mphitca. Tingacite mantha kutawira ayai tingafune kutawira tsono tingalatidwe lini kawiri-kawiri. N’ciyani comwe cingatithandize kukunda bzimwebzi? Mpostolo Paulo adalewa kuti tin’funika ‘kumbalimbikisana.’ Tikazindikira kuti wanthu winango angalimbikisidwe na mitawiro yathu, bzin’dzaticitisa kuti timbapereke mitawiro. Napo kuti tingalatidwe lini kawiri-kawiri, tin’dzakomedwa kuwona winango akukhalambo na mwayi wakutawira. — 1 Ped. 3:8. w23.04 20 ¶1-3

Mambo adapereka lamulo lakuti Adjuda omwe akhali ku ukapolo ku Babiloniya kwa magole 70 abwerere ku mui kwawo ku Jirayeri. (Eza. 1:2-4) Ni Yahova omwe adacitisa kuti bzimwebzi bzikwanisike. Thangwe Ababiloniya akhatsudzula lini akapolo wawo. (Zai. 14:4, 17) Tsono mzinda wa Babiloniya udakundidwa, ndipo mambo omwe adayamba kutonga mu mzindamo adauza Adjuda kuti akhafunika kubwerera ku mui kwawo. Ndipopa, Mdjuda ali-wentse akhafunika kucita cakusankhula pa nkhani imweyi: kupitiriza kukhala ku Babiloniya ayai kubwerera ku Jirayeri. Bzikhali lini bzakupusa kucita cakusankhula pa nkhani imweyi. Ajirayeri azinji akhadakalamba ndipo angadakwanisa lini kucita ulendo bumwebule. Ndipo kwa Adjuda omwe adabadwira ku Babiloniya, akhawona ninga kuti kumweko ndiko ku mui kwawo. Kwa iwo dziko la Jirayeri likhali dziko la makolo yawo. Adjuda winango bzinthu bzikhawafambira bwino ku Babiloniya, ndipopa bzikhali bzakunesa kwa iwo kusiya moyo wabwino ule na malonda yawo aciyenda ku dziko lomwe akhalidziwa lini. w23.05 14 ¶1-2

Bibliya limbatilimbikisa kuti tipitirize kulatiza kupirira, ntsisi na lufoyi. Pa Luka 21:19 pambati: “Mukapirira mpaka kuphampha, mun’dzapulumusa moyo wanu.” Pa Akolose 3:12 pambati: “Latizani . . . ntsisi.” Ndipo pa 1 Atesalonika 4:9, 10 pambati: “Imwepo mudacita kupfunzisidwa na Mulungu kuti mumbafunane. . . . Ndipo tikukulimbikisani abale, kuti mupitirize kucita bzimwebzo mwakuthumizirika.” Mavesi yentseneya yadanembedwera anyakupfunza omwe akhalatiza kale kupirira, ntsisi na lufoyi. Tsono iwo akhafunika kupitiriza kukhala na makhalidwe yamweya. Ifepanombo tin’funika kupitiriza kucita bzibodzi-bodzibzi. Kuti mudziwe momwe mungacitire bzimwebzi, onani momwe Akristau wakuyambirira adalatizira makhalidwe yamweya. Ndipo onanimbo momwe imwepo mungawatewezerere kuti mukhale wakukonzeka pomwe citsautso cikulu cikufendera. Ndipo citsautso cikulu cikadzayamba, imwepo mun’dzakhala mwapfunza kupirira ndipo mun’dzafunisisa kupitiriza kupirirako. w23.07 3 ¶4, 8

Penu ndife anyakudzozedwa ayai wa “mabira manango,” tin’funika kupitiriza kufamba mu “Mseu Wakucena” omwe un’dzatithandiza kupitiriza kunamata Yahova ntsiku zino na kutsogolo pomwe Umambo bwa Mulungu bun’dzabweresa bzisimbo bzizinji pa dziko la pantsi. (Juw. 10:16) Kuyambira mu 1919 EC, amuna, akazi na wana azinji adacoka mu Babiloniya Mkulu aciyamba kufamba mu mseu wakuyezezerayu. Pomwe Adjuda adacoka ku Babiloniya Yahova adawacosera mabvuto yomwe iwo angadagumana nayo mu njira. (Zai. 57:14) Tsono tani bza “Mseu Wakucena” wa ntsiku zino? Pomwe gole la 1919 likhanati kufika, Yahova adaphatisa basa amuna omwe akhamugopa kuti akonze njira kuti wanthu acoke mu Babiloniya Mkulu. (Ndendemezerani na Zaiya 40:3.) Iwo adacita mabasa mazinji kuti athandize wanthu omwe akhana mitima yabwino kusiya kunamata kwakunama aciyamba kunamata kwacadidi. w23.05 15-16 ¶8-9

Yahova akufuna kuti timutumikire mwakukondwa na mwakubzipereka. (2 Ako. 9:7) Tsono, kodi tingapitirize kucita nyongo ya kukwanirisa cakulinga cathu ca uzimu penu ifepano ndife lini wakukondwa? Onani bzomwe mpostolo Paulo adalewa. Iye adati: “Nimbamenya thupi langu ndiciritsogolera ninga kapolo.” (1 Ako. 9:25-27) Paulo akhacita nyongo ya kucita bzinthu bzabwino napo kuti thupi lace likhafuna kuti iye acite bzinthu bzakuipa. Kodi Yahova akhakomedwa na basa lomwe mpostolo Paulo akhacita? Inde! Ndipo Yahova adamusimba thangwe ra nyongo yace. (2 Tim. 4:7, 8) Mwakundendemerana na bzimwebzi, Yahova ambakomedwa akatiwona kuti tikucita nyongo ya kukwanirisa cakulinga cathu napo kuti tiribe cikhumbo ca kukwanirisa cakulingaco. Iye ambakomedwa thangwe rakuti ambawona kuti ifepano tikucita nyongo ya kucita bzinthubzo sikuti thangwe rakuti tikubzifuna, koma tikubzicita thangwe ra kufuna iye. Ndipo ninga momwe Yahova adasimbira mpostolo Paulo, iye an’dzatisimbambo. (Sal. 126:5) Ndipo tikayamba kuwona kuti Yahova akutisimba tin’dzayamba kukhala na cikhumbo. w23.05 29 ¶9-10

Mpostolo Paulo adandendemezera wale omwe an’dzapulumuka lini pa ntsiku ya Yahova na wanthu omwe akugona. Iwo ambadziwa lini bzomwe bzimbakhala bzikucitika. Iwo ambakhala akudziwa lini kuti ni nthawe iponi yomwe bzinthu bzakufunika bzingacitike ndipo n’ciyani comwe iwo angacite. Wanthu azinji ntsiku zino akugona mwauzimu. (Aro. 11:8) Iwo ambakhulupira lini kuti tikukhala mu “ntsiku zakumalizira” ndipo citsautso cikulu cin’fika tsapanopapa. (2 Ped. 3:3, 4) Koma ifepano tin’funika kupitiriza kukhala tidapenya ntsiku zentse. (1 Ates. 5:6) Na tenepo, tin’funika kukhala wakuderekha na wakusaya kutekenyeka. Tin’funika kucita bzimwebzi kuti tileke kupitira nkhani za ndale na bzomwe bzikucitika mu dzikoli. Kuyezedwa kuti ticite mbali pa nkhani zimwezi kukuthimizirika kwene-kwene pomwe ntsiku ya Yahova ikufendera. Tsono tin’funika lini kucita thupo kuti tin’dzacita ciyani tikadzayezedwa. Mzimu wa Yahova un’dzatithandiza kuti tikhale wakuderekha na kucita bzakusankhula bzabwino. — Luk. 12:11, 12. w23.06 10 ¶6-7

Kodi mumbakumbuka ciyani mukabva dzina lakuti Samusoni? Pinango imwepo mumbakumbukira bza munthu omwe akhali wamphanvu kwene-kwene. Bzimwebzi ni cadidi. Tsono Samusoni adacita bzakusankhula bzakuipa bzomwe bzidacitisa kuti agumane na mabvuto. Napo bziri tenepo, Yahova adakumbukira bzinthu bzizinji bzabwino bzomwe Samusoni adacita, ndipopa adacitisa kuti bzinthu bzabwinobzo bzinembedwe m’Bibliya. Yahova adaphatisa basa Samusoni kuti acite bzinthu bzakudabwisa pakuthandiza wanthu wace Ajirayeri. Pomwe padapita magole mazinji pambuyo pakuti Samusoni wafa, Yahova adacitisa kuti mpostolo Paulo aikhembo dzina la Samusoni pa lista ya wanthu wakukhulupirika. (Aheb. 11:32-34) Bzomwe Samusoni adacita bzingatilimbikise tentsenefe. Iye adathemba Yahova napo pa nthawe yomwe akhagumana na mabvuto. w23.09 2 ¶1-2

Tingakhale wakupirira tikambapemba kwa Yahova nthawe zentse ticimbamuuza bza mabvuto yathu. (1 Ates. 5:17) Pinango mukugumana lini na mabvuto makulu. Napo bziri tenepo, kodi imwepo mumbapemba kwa Yahova mukakhala mudakalipa, muna thupo ayai mukudziwa lini bzomwe mungacite? Penu imwepo mumbakumbira Yahova kuti akuthandizeni pa mabvuto yomwe mukugumana nayo ntsiku zino, bzin’dzakhala bzakupusa kucitambo bzibodzi-bodzibzo mukadzagumana na mabvuto makulu kutsogolo. Mukacita bzimwebzi, imwepo mungakhale na citsimikizo cakuti iye an’dzakuthandizani. (Sal. 27:1, 3) Tikakwanisa kupirira mabvuto yomwe tikugumana nayo ntsiku zino, tin’dzakwanisambo kupirira pa citsautso cikulu. (Aro. 5:3) Thangwe ranyi tikulewa tenepoyo? Abale azinji ambalewa kuti akapirira bvuto lomwe agumana nalo, bzimbawathandiza kuti akwanise kupirira bvuto linango likabwera. Akapirira mabvuto yomwe akugumana nayo na thandizo la Yahova, iwo ambakhala na citsimikizo cakuti Yahovayo ngwakukonzeka kuwathandiza. Ndipo pakuti iwo ana cikhulupiro kwa Yahova, ambakwanisa kupirira. — Tiy. 1:2-4. w23.07 3 ¶7-8

Kubzicepesa na ntsisi za Yahova bzimbamucitisa kuti aleke kungingimira nzeru zace. Mwa ciratizo, kubzicepesa kwa Yahova kudawonekera pomwe iye akhadasala pang’ono kupfudza mzinda wa Sodoma. Mwakuphatisa basa anjo wace, Yahova adacenjeza munthu wakulungama Loti kuti athawire ku mapiri. Loti akhana mantha kuti ayende kumweko. Iye pabodzi na banja lace adakumbira Yahova kuti athawire ku Zoari omwe ukhali mzinda omwe Yahova akhafuna pomwe kuupfudza. Yahova angadangingimira kuti Loti ateweze malango yomwe iye adalewa. Tsono Yahova adabvuma mkumbiro wa Loti ndipo alibe kudzapfudza mzindayo. (Gen. 19:18-22) Na kupita kwa magole, Yahova adalatiza ntsisi kwa wanthu wa ku Ninive. Iye adatumiza mpolofeta Djona kuti akadziwise bza kupfudzidwa kwa mzindayo pabodzi na wanthu wakuipa. Pomwe wanthu wa ku Ninivewo adalatiza kukungula, Yahova adawabvera ntsisi ndipo alibe kuwapfudza. — Djon. 3:1, 10; 4:10, 11. w23.07 21 ¶5

Kodi tikupfunza ciyani na bzomwe bzidacitikira Jehowasi? Iye akhali ninga muti omwe ukhalibe mizi, omwe ukhafunikira kudjimbikiridwa na muti unango. Pomwe munthu omwe akhamuthandiza, Jehoyada, adafa, Jehowasi adayamba kutetekera apanduki ndipo bzimwebzi bzidamucitisa kuti aleke kukhala wakukhulupirika kwa Yahova. Bzimwebzi bzikutipfunzisa nkhani yakufunika kwene-kwene. Bzikutipfunzisa kuti tin’funika lini kukhala wakukhulupirika kwa Yahova thangwe ra kuthandizidwa na wanthu winango kuphatanidzambo wanthu wa m’banja mwathu. Kuti tikhale wakulimba mwauzimu, tin’funika nthawe zentse kumbagopa Mulungu, mwa kumbawerenga Fala lace, Bibliya, kukumbukira bzomwe tawerengabzo na kupemba. (Jer. 17:7, 8; Akol. 2:6, 7) Yahova ambatikumbira lini kuti timucitire bzinthu bzomwe tingabzikwanise lini. Bzomwe iye ambatikumbira kuti ticite ndibzo bzomwe bzidanembedwa pa Mpalizi 12:13, pomwe pambati: “Gopa Mulungu wacadidi ucibvera Malamulo yace, pakuti ibzi ndibzo bzomwe munthu ali-wentse an’funika kucita.” Tikagopa Mulungu, ifepano tin’dzakwanisa kukhala wakukhwimika pa mabvuto yomwe tin’dzagumana nayo kutsogolo. Palibe cinthu comwe cingadzakwanise kudzonga uxamwali bwathu na Yahova. w23.06 19 ¶17-19

Citsimikizo ca Yahova cimbayambira pa mbali yakuyambirira ya vesi 5 pomwe pambati: “Ule omwe akhadakhala pa mpando wa umambo, adati.” (Apok. 21:5a) Mafala yamweya njakupambulika thangwe ni pa mbali imweyi basi m’bukhu la Apokalipse pomwe pambalatiza Yahova caiyeyo ali kulalewa. Citsimikizo cimweci cikulewedwa lini na anjo wamphanvu ayai na Jezu omwe adalamusidwa, koma cikulewedwa na Yahova caiyeyo! Bzimwebzi bzikulatiza kuti ifepano tingakhulupire mafala yomwe yakulewedwa patsogolo pace. Thangwe ranyi? Thangwe Yahova “anganame lini.” (Tito 1:2) Penu Mulungu anganame lini, ndiye kuti mafala ya pa Apokalipse 21:5, 6 njacadidi. Bwerani ticezerane bza fala lakuti “Ona!” Fala la Cigerego lomwe lidasanduliziridwa kuti “ona!” lidabwerezeredwa kazinji m’bukhu la Apokalipse. Kodi n’ciyani comwe ciri kutsogolo kwa fala lakuti “ona!”? Ni mafala ya Mulungu yomwe yakulewa kuti: “Ndikukonza papsa bzinthu bzentse.” N’cadidi kuti Yahova pamwepa akulewa bza bzinthu bzomwe an’dzacita kutsogolo, koma iye akubzilewa ninga kuti akubzicita pa nthawe imweyino thangwe rakuti akudziwa kuti an’dzabzicitadi. — Zai. 46:10. w23.11 3-4 ¶7-8

Mpostolo Pedru adapitiriza kukumbukira bzakuphonya bzace. Mbaticezeraneni bziratizo bzinango. Pomwe Jezu adalewa kuti iye angadabonera na kuphedwa ninga momwe Bzinembo bzikhadalewera kale, Pedru adamutsimula Jezuyo. (Mar. 8:31-33) Pedru na apostolo anzace adapopotezana mwakubwereza-bwereza pa nkhani yakuti mbani akhali mkulu pakati pawo. (Mar. 9:33, 34) Usiku bwakumalizira pomwe Jezu akhanati kuphedwa, Pedru adagwata khutu la munthu. (Juw. 18:10) Ndipo usiku bubodzi-bodzibo, Pedru adakhala na mantha kwene-kwene pomwe wanthu adalewa kuti iye akhafamba pabodzi na Jezu. Ndipo iye adalamba Jezu katatu kuti akhamudziwa lini. (Mar. 14:66-72) Bzimwebzi bzidacitisa kuti Pedru alire kwene-kwene. Jezu alibe kumusiya mteweri wace omwe akhadasunamayu. Pomwe Jezu adalamusidwa, adamutsimikizira Pedru kuti akhamufuna. Ndipo Jezuyo adapasa basa Pedru lakukhala makabusa wa mabira yace. (Juw. 21:15-17) Pedru akhali wakukonzeka kucita bzomwe Jezu adamuuza. Iye akhalipombo pa ntsiku ya Pentekosite mu mzinda wa Jeruzalemu ndipo adakhala m’bodzi wa wanthu wakuyamba kudzozedwa na mzimu wakucena. w23.09 22 ¶6-7

Mpostolo Pedru adauza akulu anzace kuti: “Usani mabira ya Mulungu.” (1 Ped. 5:1-4) Penu imwepo ndimwe mkulu wa gwere, ifepano tikudziwa kuti mumbafuna abale na mpfumakazi zanu ndipo mumbafuna kuwathandiza mwauzimu. Tsono, nthawe zinango imwepo mungabzibve kuti muna bzizinji bzakucita ayai mwaneta mwakuti mungakwanise lini kucita bzinthu bzinango. N’ciyani comwe mungacite? Uzani Yahova bza thupo lomwe munalo. Pedru adanemba kuti: “Penu munthu akutumikira, atumikire mwakuphatisa basa mphanvu ya Mulungu.” (1 Ped. 4:11) Abale na mpfumakazi zanu angakhale akugumana na mabvuto yomwe yangamale lini mu dziko la Sathani lino. Tsono kumbukirani kuti “m’busa mkulu,” omwe ni Jezu Kristu, angawathandize kulimbana na mabvuto yawoyo kuposa momwe imwepo mungawathandizire. Iye angacite bzimwebzo ntsiku zino na mu dziko lipsa. Comwe Mulungu akufuna n’cakuti akulu ambalatize kuti ambafuna abale wawo, ambawathandize na kukhala “ciratizo kwa iwo.” w23.09 29-30 ¶13-14

Ifepano tin’funika kutcenkha kumbathemba nzeru za wanthu. Tikayamba kukumbuka ninga momwe wanthu ambacitira ku dzikoli tingasiye kubvera malamulo ya Yahova. (1 Ako. 3:19) “Nzeru za m’dzikoli” kazinji-kazinji zimbalimbikisa wanthu kuti aleke kubvera Mulungu. Akristau winango wa ku Pergamo na ku Tiyatira akhatewezera wanthu omwe akhanamata bzifanikiso na kucita bzinthu bza upombo omwe akhakhala kumweko. Jezu adapereka malango yamphanvu kuna magwere mawiriya thangwe ra kucita bzinthu bza upombo. (Apok. 2:14, 20) Ntsiku zino, wanthu ambayezera kutipumpsa kuti tikhale na nzeru zakuipa. Wanthu wa m’banja mwathu na wanthu omwe timbadziwana nawo ambayezera kutipumpsa kuti tileke kubvera malamulo ya Yahova. Iwo angalewe kuti malamulo ya m’Bibliya njakale-kale ndipo ifepano tingacite bzomwe tingafune. Nthawe zinango tingawone ninga kuti malango yomwe Yahova ambatipasa njakukwanira lini. Ndipo tingafune “[kucita] bzinthu bzomwe bziribe kunembedwa.” — 1 Ako. 4:6. w23.07 16 ¶10-11

Mariya, mai wa Jezu, akhafunikira mphanvu. Iye akhanati kulowodwa, koma iye angadadzakhala na pathupi. Iye akhanati kukhala kale na wana, tsono akhafunikira kusamalira mwana omwe angadadzakhala Mesiya. Iye akhanati kucita kale malume ya pa mphasa, koma akhafunika kumuuza Zuze kuti akhana pathupi. Bzimwebzi bzikhali bzakunesa kwene-kwene. (Luk. 1:26-33) Kodi Mariya adapasidwa tani mphanvu? Iye adathemba thandizo la wanthu winango. Mwa ciratizo, iye adakumbira anjo Gabriyeli kuti amuuze bzakuthumizirika pakulewa bza basa lomwe akhadapasidwalo. (Luk. 1:34) Pomwe padapita ntsiku zing’ono-ng’ono, Mariya adacita ulendo aciyenda “ku mphimpha za ku mapiri mu mzinda wa Djuda” kuti akawone wacibale wace Elizabeti. Elizabeti adatenda Mariya ndipo adadzazidwa na mzimu wakucena wa Yahova kuti afotokoze polofesiya yomwe ikhalewa bza mwana omwe Mariya angadadzabereka. (Luk. 1:39-45) Mariya adalewa kuti Yahova “wacita bzinthu bza mphanvu na boko lace.” (Luk. 1:46-51) Yahova adapasa mphanvu Mariya mwakuphatisa basa anjo Gabriyeli na Elizabeti. w23.10 14-15 ¶10-12

Anyakupfunza wakucepa wa Jezu adadzozedwa na mzimu wakucena ndipo ali pa uxamwali bwakupambulika na Yahova. Wanthu wakukwana 144 000 amwewa an’katumikira ninga antsembe kudzulu pabodzi na Jezu. (Apok. 14:1) Mbuto Yakucena ya tendi la mkonkhano imbaimira mkhalidwe wawo wauzimu ninga wana wa Mulungu pomwe akali pa dziko la pantsi pano. (Aro. 8:15-17) Cipinda Cakucenesesa ca tendi la mkonkhano cimbaimira kudzulu komwe Yahova ambakhala. “Cinguwo” comwe cikhagawa Mbuto Yakucena na Cipinda Cakucenesesa cimbaimira thupi la umunthu la Jezu lomwe lingadamutazisa kuti ayende kudzulu kuti akakhale Mkulu wa Antsembe mu templo yauzimu ya Yahova. Pomwe Jezu adapereka thupi lace la umunthu ninga ntsembe kuti apulumuse wanthu, iye adafungula njira kuti Akristau wakudzozedwa akakhale na moyo kudzulu. Akristau amwewa an’funika kusiya mathupi yawo ya umunthu kuti akatambire mabaibai yawo kudzulu. — Aheb. 10:19, 20; 1 Ako. 15:50. w23.10 28 ¶13

Gidiyoni adapitiriza kukhala wakugwa mpfuwa pomwe amuna wa dzinza la Efraimu adamuuza kuti pana bzinthu bzinango bzomwe aphonyesa. (Ato. 8:1-3) Iye alibe kuwatawira mwakukalipa. Iye adalatiza kuti akhali wakubzicepesa mwa kuwatetekera mwatceru pomwe akhalalewa na kuwatawirambo mwakugwa mpfuwa. Bzimwebzi bzidacitisa kuti iwombo agwe mpfuwa. Akulu wa nzeru angatewezerembo Gidiyoni mwa kutetekera mwatceru na kutawirambo mwa kugwa mpfuwa akauzidwa kuti pana bzinthu bzomwe akucita lini bwino. (Tiy. 3:13) Bzimwebzi bzimbacitisa kuti m’gwere mukhale na mtendere. Pomwe wanthu adamutenda Gidiyoni thangwe ra kukunda Amidiyani, iye adauza wanthuwo kuti Yahova ndiye adacitisa. (Ato. 8:22, 23) Kodi akulu angatewezere tani Gidiyoni? Iwo angacite bzimwebzi mwa kupasa ulemerero Yahova pa bzomwe ambacita. (1 Ako. 4:6, 7) Mkulu wa gwere akatendedwa thangwe ra luso lakupfunzisa lomwe analo, iye angalewe kuti bzimwebzi bzimbakwanisika thangwe rakuti ambaphatisa basa malango ya m’Fala la Mulungu, Bibliya, ayai mabukhu yomwe gulu la Yahova limbakonza. Akulu an’funika kukumbukira kuti akupfunzisa mu njira yomwe imbalemekezesa Yahova sikuti kundofuna kubziwonesera kwa wanthu. w23.06 4 ¶7-8

Tikakhala tiribe kutambira bzinthu bzomwe takumbira, bzingakhale bwino kubzibvunza kuti: ‘Kodi bzomwe ndikupemphererabzo bzikubverana na kufuna kwa Mulungu?’ Nthawe zinango timbakumbuka kuti tikudziwa bzinthu bzomwe mpsabwino kwa ifepano. Tsono pinango bzinthu bzomwe ifepano takumbira bzingatithandize lini mpaka kale-kale. Penu tikupemba kwa Yahova thangwe ra bvuto linango lomwe tikugumana nalo, pinango Yahova angawone kuti pana njira yabwino yakutithandizira kuposa momwe ifepano tikukumbukira. Ndipo bzinthu bzinango bzomwe ifepano tikukumbira bzingakhale bzikubverana lini na cakulinga ca Yahova. (1 Juw. 5:14) Mwa ciratizo, kumbukirani bza abereki omwe adakumbira Yahova kuti athandize mwana wawo kuti apitirize kumutumikira. Umweyu ukuwoneka ninga mkumbiro wabwino. Tsono Yahova an’dzangingimiza lini ali-wentse wa ifepano kuti amutumikire. Iye akufuna kuti tentsenefe kuphatanidzambo wana wathu tisankhule tekha kumutumikira. (Deut. 10:12, 13; 30:19, 20) Ndipopa bzingadakhala bwino aberekiwo angadakumbira Yahova kuti awathandize kuti iwo akwanise kuthandiza mwana wawoyo kucita bzinthu bzomwe bzingamuthandize kuti afune Yahova na kukhalambo xamwali wace. — Mim. 22:6; Aef. 6:4. w23.11 21 ¶5; 23 ¶12

Thangwe ranyi kutsangalazana n’kwakufunika kwene-kwene pa kulatizana lufoyi? Mwakubverana na bukhu linango lomwe limbafotokoza nkhani za m’Bibliya, fala lomwe Paulo adaliphatisa basa pakulewa bza “kutsangalazana” limbathandauza “kukhala ku mbali kwa munthu kuti timulimbikise pomwe akugumana na mabvuto.” Ndipopa, tikambatsangalaza abale na mpfumakazi zathu pomwe akugumana na mabvuto, timbawathandiza kuti apitirize kufamba mu njira yakuyendesa ku moyo. Nthawe zentse tikambatsangalaza m’bale ayai mpfumakazi yomwe ikugumana na mabvuto, timbakhala tikulatiza lufoyi kwa abale wathu wacikristau. (2 Ako. 7:6, 7, 13) Kubva ntsisi na kutsangalaza mpsinthu bziwiri bzomwe bzimbafambira pabodzi. Thangwe ranyi tikulewa tenepoyo? Ntsisi ndizo zimbacitisa munthu kuti afune kutsangalaza omwe akugumana na mabvuto. Ndipopa, pomwe tikanati kuthandiza munthu, cakuyamba timbabva ntsisi; ndipo patsogolo pace timbatsangalaza munthuyo. Onani kuti Paulo adalewa kuti ntsisi zomwe Yahova anazo kwa wanthu ndizo zimbamucitisa kuti awatsangalaze. Paulo adalewa kuti Yahova ni “Baba wa ntsisi kwene-kwene na Mulungu omwe ambatsangalaza wanthu mu njira iri-yentse.” — 2 Ako. 1:3. w23.11 9-10 ¶8-10

Ateweri wentse wa Jezu angagumane na mabvuto. Mbatiwoneni ciratizo ca Paulo. Iye adauza Akristau wa ku Tesalonika kuti: “Ifepano tikhali pabodzi na imwepo, tidakuuzaniletu kuti tin’dzagumana na matsautso, ndipo bzacitika ninga momwe mukudziwira.” (1 Ates. 3:4) Ndipo kwa abale wa ku Kolinto, iye adanemba kuti: “Tikufuna lini kuti muleke kudziwa bza mazunzo yomwe tidagumana nayo . . . ndipo ne tikhakumbukira lini kuti tingadapulumuka.” (2 Ako. 1:8; 11:23-27) Akristau ntsiku zino angagumanembo na mabvuto yakusiyana-siyana. (2 Tim. 3:12) Pinango-pentse axamwali wanu na adzinza wanu akhambakucitirani bzinthu bzakuipa thangwe ra kutewera Jezu. Ayai pinango patrau wanu ayai anzanu wa ku basa ambakuzunzani thangwe rakuti mumbacita bzinthu mwakukhulupirika. (Aheb. 13:18) Kodi imwepo mudazunzidwa kale na boma thangwe ra kupalizira wanthu winango bza cidikhiro canu? Bziribe basa mabvuto yomwe tingagumane nayo, koma Paulo adalewa kuti tin’funika kukhala wakukondwa. w23.12 10-11 ¶9-10

Djakobo adagumana na mabvuto mazinji. Wana awiri wa Djakobo, Simiyoni na Levi, adanyozesa banja lawo pabodzi na Yahova. Rakeli omwe akhali mkazi wa Djakobo adafa pomwe akhabereka mwana wace waciwiri. Ndipo thangwe ra njala, Djakobo adacoka komwe akhakhala aciyenda ku Edjipito pomwe iye akhadakalamba. (Gen. 35:16-19; 37:28; 45:9-11, 28) Napo kuti Djakobo adagumana na mabvuto yentseneya, iye adapitiriza kukhulupira kuti Yahova angadadzacita bzomwe adalewa. Yahova adalatiza Djakobo kuti akhakomedwa naye. Yahova adamupasa bzinthu bzizinji. Ndokumbukirani momwe Djakobo adakomedwera pomwe adagumana pomwe na mwana wace Zuze omwe akhakumbuka kuti adafa. Uxamwali bomwe Djakobo akhanabo na Yahova budamuthandiza kuti akunde mabvuto yomwe akhagumana nayo. (Gen. 30:43; 32:9, 10; 46:28-30) Tikakhalambo pa uxamwali bwakulimba na Yahova, iye an’dzatithandiza kukunda mabvuto yomwe tikhayadikhirira lini. w23.04 15 ¶6-7

Salimo 23 ni nyimbo yomwe imbalatiza kuti tin’funika kukhulupira lufoyi la Yahova na momwe iye ambatisamalirira. Davide, omwe adanemba salimo limweri, adafotokoza bza lufoyi lomwe likhalipo pakati pa M’busa wace Yahova na iye. Davide akhabzibva kuti akhali wakukhotcerereka pomwe akhasiya kuti Yahova atsogolere moyo wace. Davide akhadziwa kuti Yahova angadapitiriza kumufuna. Thangwe ranyi iye akhakhulupira bzimwebzi? Davide akhabzibva kuti akhali wakukhotcerereka thangwe rakuti nthawe zentse Yahova akhamupasa bzomwe iye akhafunikira pa moyo wace. Davide akhalimbo pa uxamwali bwakulimba na Yahova. Ndipopa iye akhakhulupira kuti, bziribe basa bzomwe bzingadabwera pa moyo wace, Yahova angadapitiriza kumusamalira na kumupasa bzomwe iye akhafunikira. Cikhulupiro comwe Davide akhanaco pa lufoyi la Yahova cikhali camphanvu kwene-kwene kuposa bzinthu bzomwe iye akhakumbukira pa moyo wace. Bzimwebzi bzidamucitisa kuti akhale wakukondwa na kuti aleke kukhala na thupo. — Sal. 16:11. w24.01 29 ¶12-13

Kuyambira pa nthawe ya Nkhondo Yaciwiri ya pa Dziko Lentse, wanthu wa Yahova m’madziko mazinji ambapalizira mwakutsudzuka. Bzimwebzi bzacitisa kuti wanthu azinji afike pa kudziwa cadidi, ndipo iwo akupitiriza kupalizira wanthu pa dziko lentse la pantsi. Ntsiku zino, abale wa m’Bungwe Lakutonga ambathemba kutsogoleredwa na Jezu. Iwo ambafuna kuti malango yomwe ambapasa abale yawoneke kuti yambacokera kudzulu. Tsono iwo ambaphatisa basa anyakunyang’anira dera na akulu kuti apereke malango m’magwere. Akulu wakudzozedwa pabodzi na akulu wentse m’magwere ali ku “boko . . . lamadidi” la Jezu. (Apok. 2:1) Wanthu amwewa mbakuperewera ndipo ambaphonyambo. Mozeji, Djoswa na apostolo akhaphonyambo nthawe zinango. (Num. 20:12; Djos. 9:14, 15; Aro. 3:23) Napo bziri tenepo, Kristu akupitiriza kutsogolera kapolo wakukhulupirika na wanzeru pabodzi na akulu wa gwere, ndipo iye an’pitiriza kucita bzimwebzi. Ifepano tina mathangwe mazinji yomwe yambaticitisa kukhulupira malango yomwe iye ambatipasa mwakuphatisa basa amuna wakusankhulidwa omwe ambatitsogolera. w24.02 23-24 ¶13-14

Ntsiku zino, timbakondwesa mtima wa Yahova tikambalewa bza iye na mafala yakulatiza kutenda na ya lufoyi. Tikambapalizira, cakulinga cathu cikulu n’cakuti tithandize wanthu kuti akhale pa uxamwali na Yahova acibvambo ninga momwe ifepano timbabvera pakulewa bza iye. (Tiy. 4:8) Timbathandiza wanthu kuti adziwe bzomwe Bibliya limbalewa pakulewa bza Yahova na makhalidwe yace ninga lufoyi, cirungamo, nzeru, mphanvu na makhalidwe manango yakufunika kwene-kwene. Ndipo timbatumbizambo Yahova na kucita bzinthu bzomwe bzimbamudekera tikacita nyongo yakumutewezera. Tikacita bzimwebzi timbabzisiyanisa na dziko lakuipali. Wanthu angakwanise kuwona kuti ndife wakusiyana ndipo angabzibvunze kuti thangwe ranyi. (Mat. 5:14-16) Tikambaceza nawo ntsiku na ntsiku, iwo an’dzakwanisa kudziwa kuti thangwe ranyi ndife wakusiyana. Bzimwebzi bzimbacitisa kuti wale omwe ana mtima wabwino ayambe kutumikira Yahova. Tikambatumbiza Yahova mu njira zimwezi, iye ambakomedwa. — 1 Tim. 2:3, 4. w24.02 10 ¶7

Kuti imwepo mukhale Mkristau wakukhwima mwauzimu, mun’funika kupfunza mabasa. Bzimwebzi bzin’dzakuthandizani kuti mucite mabasa yakusiyana-siyana m’gwere, kuti mugumane basa lomwe lingadzakuthandizeni pa moyo wanu, kuthandiza banja lanu na kukhala wakubverana na anzanu. Mwa ciratizo, pfunzani kuwerenga na kunemba bwino. Bibliya limbalewa kuti munthu wakukondwa na omwe bzinthu bzimbamufambira bwino ngule omwe ntsiku zentse ambawerenga Fala la Mulungu na kukumbukira bzomwe awerengabzo. (Sal. 1:1-3) Kuwerenga Bibliya ntsiku zentse kun’dzakuthandizani kuti mudziwe momwe Yahova ambakumbukira ndipo bzimwebzi bzin’dzakuthandizani kuti mumbakumbuke bwino. (Mim. 1:3, 4) Abale na mpfumakazi zathu ambafuna amuna wanzeru kuti awapfunzise na kuwapasa malango ya m’Bibliya. Imwepo mukadziwa kuwerenga na kunemba bwino bzin’dzakuthandizani kuti mumbakonzekere bwino nkhani na mitawiro yomwe in’dzalimbisa cikhulupiro ca Abale wanu wacikristau. Ndipo bzimwebzi bzin’dzakuthandizani kuti mumbanembe nfundo zakuthandiza zomwe zin’dzakuthandizani kulimbisa cikhulupiro canu na kulimbisambo cikhulupiro ca anzanu. w23.12 26-27 ¶9-11

Mukakhala muna mantha, mbakumbukirani bzomwe Yahova an’dzacita kutsogolo Sathani akadzacosedwa. Mtsonkhano wa cigawo wa 2014 udalatiza pai munango akucezerana na banja lace momwe cinembo ca 2 Timotio 3:1-5 tingadaciwonera bzingadakhala kuti mavesi yamweya yambafotokoza momwe bzinthu bzin’dzakhalira m’Paraizo. Bzingadakhala tenepa: “Mu dziko lipsa ntsiku zentse zin’dzakhala zakudekeza. Pakuti wanthu an’dzakhala wakufuna anzawo, wakufuna bzinthu bzauzimu, wakuzindikira malire, wakubzicepesa, anamati wa Mulungu, wakubvera abereki, wakutenda, wakukhulupirika, wakufuna kwene-kwene wanthu wa m’banja mwawo, wakubverana na anzawo, wakusaya kulewa kuipa wanthu winango, wakubziphata, wakugwa mpfuwa, wakudeka mtima, wakubvera, wa mzimu wakubzicepesa, wakufuna Mulungu m’mbuto mwakubzikondwesa okha na wakubzipereka kwa Mulungu. Wanthu amwewa bverana nawo.” Kodi imwepo mumbaceza na wanthu wa m’banja mwanu ayai na wanthu winango bza momwe moyo un’dzakhalira mu dziko lipsa? w24.01 6 ¶13-14

Mpsabwino kwene-kwene kudziwa kuti Yahova ambafuna wanthu wace ninga thimu! Bibliya limbati: “Yahova ambakomedwa na wanthu wace.” (Sal. 149:4) Tsono nthawe zinango, ifepano tingawone ninga kuti Yahova ambakomedwa lini nafe, ndipopa tingabzibvunze kuti: ‘Kodi Yahova ambakomedwa nandembo inepano?’ M’mbuyomu, atumiki winango wakukhulupirika wa Yahova adakhalambo na nzeru ninga zimwezi. (1 Sam. 1:6-10; Djob. 29:2, 4; Sal. 51:11) Bibliya limbafotokoza mwakubveka bwino kuti wanthu wakuperewera angafunidwe na Yahova. Kodi bzimwebzi bzingacitike tani? Ifepano tin’funika kukhulupira ntsembe ya cakulombolera ya Jezu Kristu na kubatizidwa. (Juw. 3:16) Tikacita bzimwebzi timbalatiza padeca kuti takungula pikado zathu ndipo tapicira kwa Mulungu kuti tin’dzacita kufuna kwace. (Mab. 2:38; 3:19) Yahova ambakomedwa kwene-kwene akatiwona tikucita bzimwebzi kuti tikhale pa uxamwali bwakulimba na iye. Tikapitiriza kucita nyongo yakukhala na moyo mwakubverana na bzomwe tidamupicira Yahovayo, iye ambakomedwa nafe ndipo timbakhala xamwali wace. — Sal. 25:14. w24.03 26 ¶1-2

Tingatewezere anyakupfunza wa Jezu mwa kupitiriza kupalizira napo tikauzidwa na wamphanvu za umangi kuti tisiye kupalizirako. Tingakhale na citsimikizo centse cakuti Yahova an’dzatithandiza kukwanirisa utumiki bwathu. Ndipopa, pembani kuti mukhale wakulimba mtima na wanzeru ndipo kumbirani Yahova kuti akuthandizeni kupirira mabvuto yomwe mukugumana nayo. Tentsenefe timbabonera thangwe ra matenda na mabvuto manango ninga kufedwa wanthu omwe timbawafuna, mabvuto ya m’banja na kuzunzidwa. Ndipo bzinthu ninga malengwa ya pantsi na nkhondo bzimbacitisa kuti nthawe zinango bzikhale bzakunesa kupirira. Muuzeni Yahova momwe mukubvera. Muuzenimbo bza mabvuto yanu ninga momwe mumbafotokozera xamwali wanu wapamtima. Ndipo khalani na citsimikizo centse cakuti Yahova “an’dzakuthandizani.” (Sal. 37:3, 5) Kupitiriza kucita mipembo kun’dzatithandiza ‘kupirira pomwe tikugumana na mabvuto.’ (Aro. 12:12) Yahova akudziwa kuti atumiki wace akugumana na mabvuto yakusiyana-siyana. Ndipopa, “iye an’dzabva kukuwa kwawo kwakukumbira thandizo.” — Sal. 145:18, 19. w23.05 5-6 ¶12-15

Tikakhala na cakusankhula cikulu kuti ticite, ifepano tin’funika nthawe zentse ‘kumbazindikira kufuna kwa Yahova’ ndipo tikamala ticite bzinthu mwakubverana na kufuna kwaceko. (Aef. 5:17) Tikambaphatisa basa nfundo za m’Bibliya pa moyo wathu timbalatiza kuti tikufuna kucita bzinthu mwakubverana na nzeru za Yahova. Ndipo kucita bzimwebzi kun’dzatithandiza kuti ticite bzakusankhula bzanzeru. “Nyakuipayo,” omwe ni Sathani, ambafuna kuti ifepano tikhale wakutanganidwa na bzinthu bza m’dzikoli ticisaya nthawe yakucita bzinthu bza Yahova. (1 Juw. 5:19) Mpsakupusa kwa Mkristau kuikha bzinthu bzakuthupi ayai kufuna kupfunza kwene-kwene pa mbuto yakuyamba ndipo aciikha kunamata Yahova pa mbuto yaciwiri. Bzimwebzi bzikacitika, tidziweretu kuti ifepano tikutengeka na nzeru za dziko. Tikudziwa kuti bzinthu bzimwebzi bziribe kuipa, tsono ibzo bzin’funika lini kukhala pa mbuto yakuyamba pa moyo wathu. w24.03 24 ¶16-17