Janeiro

Mwamuna na mkazi ambakomedwa kwene-kwene akakhala na mwana. Tsono napo kuti iwo ambamufuna kwene-kwene mwanayo, ambafuna lini kuti iye apitirize kukhala mwana. Kulewa cadidi, iwo angacite thupo kwene-kwene mwanayo akasaya kukula. Mwa njira ibodzi-bodziyo, napo kuti Yahova ambakomedwa kwene-kwene tikayamba kupfunza bza iye, koma ambafuna lini kuti tindoimire pamwepo. (1 Ako. 3:1) M’mbuto mwace, iye ambafuna kuti ‘tikule’ mwauzimu. M’Bibliya, fala la Cigerego lomwe lidasanduliziridwa kuti “kukhala mkulu” lingathandauzembo “kukhwima,” “kulungama,” na “kusaya cirema.” (1 Ako. 2:6) Ninga mwana omwe ambapitiriza kukula acifika pa kukhala mkulu, ifepanombo tin’funika kupitiriza kukulisa uxamwali bwathu na Yahova. Tikacita bzimwebzi, timbakhala Akristau wakukhwima mwauzimu. Napo tikakula mwauzimu tin’funika lini kusiya kupitiriza kukula mwauzimuko. — 1 Tim. 4:15. w24.04 2 ¶1, 3

Munthu acikubvunzani kuti Yahova ni mbani kwa imwepo, kodi mungamutawire tani? Pinango mungamutawire kuti: ‘Iye ni Pai wangu, Mulungu wangu na Xamwali wangu.’ Yalipo pomwe madzina manango ya udindo yomwe mungacemere nayo Yahova. Tsono kodi mudakumbuka kalembo kuti ndimwe mulendo wace? Mambo Davide akhafotokoza bza uxamwali bomwe Yahova ambakhala nabo na atumiki wace wakukhulupirika, iye adandendemezera Yahovayo na mwenekaciro mui ndipo atumiki wace ninga alendo wace. Davide adabvunza kuti: “Imwe Yahova, kodi ni mbani omwe angakhale mulendo mu tendi mwanu? Mbani omwe angakhale m’phiri lanu lakucena?” (Sal. 15:1) Vesi limweri likutithandiza kubvesesa kuti ifepano tingakhale alendo mu tendi la Yahova ayai tingakhale axamwali wace. Pomwe Yahova akhanati kulenga cinthu ciri-centse, iye akhali yekha. Tsono iye adadzalenga Mwana wace wakuyamba. Bzidakhala ninga kuti Yahova, omwe ni mwenekaciro mui, wacemera mulendo wace wakuyamba kuti apite mu tendi lace. Yahova adakomedwa kwene-kwene na bzimwebzi. Bibliya limbalewa kuti iye ‘akhamufuna kwene-kwene’ Mwana wace. Ndipo Mwanayombo ‘akhakomedwa kukhala naye pabodzi nthawe zentse.’ — Mim. 8:30. w24.06 2 ¶1-3

Ndokumbukirani kuti mukuwona thimu la amuna wakupitirira 340 000 omwe akonkhana kuti aikhe Davide kuti akhale mambo. Iwo amala ntsiku zitatu ali m’phiri la minyala pafupi na ku Hebroni. Iwo akukomedwa na kuimba nyimbo zakutumbiza Yahova. (1 Nkha. 12:39) Pakati pa amuna amwewa pana tswaka lakucemeredwa Zadoki. Wanthu azinji akumuwona lini, tsono Yahova akumuwona ndipo akufuna kuti tidziwe kuti Zadoki akhalipombo pamwepo. (1 Nkha. 12:22, 26-28) Zadoki akhali wantsembe omwe akhaphata basa pabodzi na Mkulu wa Antsembe Abiyatari. Mulungu adam’pasa nzeru na luso lakubvesesa kufuna kwace. (2 Sam. 15:27) Iye akhali wakukhwimika. Mu ntsiku zakumalizira zino, Sathani akucita ciri-centse kuti adzonge cikhulupiro cathu kwa Yahova. (1 Ped. 5:8) Ndipopa tin’funika kukhala wakukhwimika kuti tikwanise kupirira mpaka pomwe Yahova adzapfudze Sathani pabodzi na dziko lakuipali. (Sal. 31:24) Tikacita bzimwebzi tin’dzalatiza kuti tikutewezera Zadoki. w24.07 2 ¶1-3

Pomwe Yahova adalenga mwamuna na mkazi wakutoma, iye akhafuna kuti iwo akhale wakukondwa. Yahova adawapasa mbuto yakudeka kuti akhale, banja labwino na basa labwino lomwe iwo angadacita. Iwo angadakhala na mwayi wa kudzaza dziko la pantsi na wana wawo, acisandusa dziko lentse la pantsi kukhala paraizo ninga momwe likhaliri zunde la Edeni. Yahova adandoletsa Adamu na Eva cinthu cibodzi basi. Cikhali cinthu cakupusa kwene-kwene kucicita, ndipo Yahova adawafotokozera bzomwe bzingadacitika iwo angadasankhula kusaya kumubvera acicita bzomwe iye akhadawaletsabzo. Ndipo bzimwebzi bzingadacitisa kuti iwo akhale na pikado patsogolo pace acifa. Ifepano timbadziwa bwino bzomwe bzidacitika. Anjo wakuipa omwe akhafuna lini Mulungu ne wanthu, adapumpsa Adamu na Eva kuti aleke kubvera Mulungu. Banja lakutoma lidabvera bzomwe anjo wakuipayo adawauza. M’mbuto mwa kuthemba Baba wawo wa lufoyi, iwo adacita pikado. Ndipo ifepano tikudziwa bwino bzakutewera bzomwe bzidabwera thangwe ra pikado yawoyo. Kucokera pa nthawe imweyire, Adamu na Eva adagumana na mabvuto mazinji kwene-kwene pa moyo wawo. Iwo adayamba kukalamba, adaduwala ndipo patsogolo pace adafa. — Gen. 1:28, 29; 2:8, 9, 16-18; 3:1-6, 17-19, 24. w24.08 3 ¶3

Yahova na Mwana wace wapamtima, Jezu, akufuna kuti ifepano tikhale wakukondwa. Salimo 119:2 ambati: “Wakukondwa mbale omwe ambabvera malamulo yace, ndipo ambamulinga na mtima wentse.” Ndipo pakulewambo bza nkhani ibodzi-bodziyi, Jezu adati: “Wakusimbidwa ngule omwe ambabva mafala ya Mulungu aciyakoya!” (Luk. 11:28) Atumiki wa Yahovafe ndife wanthu wakukondwa, timbawerenga Fala la Mulungu nthawe zentse na kucita nyongo yakuphatisa basa bzomwe tawerengabzo. (Tiy. 1:22-25) Imweyi ni njira ibodzi yomwe imbacitisa kuti Yahova akomedwe nafe. (Mpal. 12:13) Tikambateweza bzomwe timbawerenga m’Fala la Mulungu, timbakhala na banja lakukondwa ndipo timbakhala pa uxamwali bwakulimba na abale na mpfumakazi zathu. Kuthumizira bzimwebzi, timbatcenkha kugumana na mabvuto yomwe wale omwe ambateweza lini malamulo ya Yahova ambagumana nayo. Ifepano timbabverana na mafala yomwe Mambo Davide adalewa. Pomwe akhaimba nyimbo yace pambuyo pa kulewa bza malamulo na katongedwe ka Yahova, iye adamaliza na kulewa kuti: “Munthu omwe ambabziteweza ambagumana mabaibai mazinji.” — Sal. 19:7-11. w24.09 2 ¶1-3

Yahova ambadziwa bzomwe atumiki wace ambagumana nabzo. Iye ambatiwona tikakhala tidakondwa na pomwe tidasunama. (Sal. 37:18) Iye ambakomedwa kwene-kwene akawona kuti tikucita nyongo yakuti timutumikire napo kuti tikugumana na mabvuto yakusiyana-siyana! Kuthumizira bzimwebzi, iye akufunisisa kutithandiza na kutitsangalaza. Salimo 147:3 ambafotokoza kuti Yahova “ambamanga bzironda” bza wale omwe ana mtima wakusweka. Cinemboci cikulatiza momwe Yahova ambathandizira wale omwe adasunama. Tsono n’ciyani comwe tingacite kuti tithandizidwe na Yahova? Mbatiwoneni ciratizo. Dotolo waluso angacite bzizinji kuti apoze munthu omwe akuduwala. Tsono kuti munthuyo alimbe, iye an’funika kuteweza bwino-bwino malango ya dotoloyo. Yahova mwakuphatisa basa Fala lace ambalewalewa na wale omwe adasunama ndipo ambawapasa malango yalufoyi. w24.10 6 ¶1-2

Kale-kale mabukhu yathu yakhafotokoza bzomwe bzimbacitikira wanthu omwe Yahova ambawawona kuti mbakusaya kulungama. Iyo yakhalewa kuti wanthu omwe adapfudzidwa na Yahova an’dzalamusidwa lini. Pana nkhani zizinji za m’Bibliya zomwe zimbalewa momwe Yahova adatongera wanthu wakusaya kulungama. Mwa ciratizo, Yahova adapfudza wanthu na Cigumula ca Madzi kupambula Nowa na banja lace. Kuthumizira bzimwebzi, iye adaphatisambo basa Ajirayeri kuti apfudze mitundu 7 ya wanthu yomwe ikhakhala mu Dziko Lakupiciridwa. Ndipo iye adaphatisambo basa anjo kuti aphe acikunda wa Asiriya wakukwana 185 000 usiku bubodzi bokha. (Deut. 7:1-3; Zai. 37:36, 37) Pa bzomwe bzidacitikabzi, kodi Bibliya limbaleweratu padeca kuti Yahova adatonga kuti wanthu omwe adafawa aleke kudzalamusidwa pomwe? Ne, Bibliya limbalewa lini. Ifepano timbadziwa lini momwe Yahova adatongera munthu ali-wentse payekha. Ndipo tikudziwambo lini penu wanthu omwe adaphedwawo adakhala na mwayi wakupfunza bza Yahova acikungula. w24.05 3 ¶5-7

Jezu adafotokoza ciratizo ca mkazi mamsiwa omwe adangingimiza nyakutonga mirandu kuti atonge nkhani yace mwacirungamo. Anyakupfunza wa Jezu adabvesesa ciratizoci thangwe mu nthawe imweyire wanthu wakusauka akhambacitiridwa bzinthu mwakusaya cirungamo. (Luk. 18:1-5) Ndipo ciratizo cimweci n’cakufunikambo kwa ifepano thangwe rakuti nthawe zinango timbacitiridwambo bzinthu bzakusaya cirungamo. Mu dzikoli wanthu azinji mbatsankhulo, alibe lufoyi ndipo mbaumbombo. Ndipopa bzimbatidabwisa lini tikacitiridwa bzinthu mwakusaya cirungamo na iwo. (Mpal. 5:8) Tsono ifepano tingadikhirire lini kucitiridwa bzinthu mwakusaya cirungamo na m’bale ayai mpfumakazi; koma napo bziri tenepo bzimwebzi bzingacitike. N’cadidi kuti abale na mpfumakazi zathu ambatsutsa lini cadidi. Koma iwo mbakuperewera. Ifepano tingapfunze na bzomwe Jezu adacita pomwe akhacitiridwa bzinthu mwakusaya cirungamo na wanthu wakuipa. Penu tingakwanise kukhala wakupirira pomwe tikucitiridwa bzinthu mwakusaya cirungamo na wanthu wakuipa, tin’funikambo kupirira tikacitiridwa bzinthu bzakusaya cirungamo na abale wathu wacikristau! w24.11 2 ¶1-2

Pau cikhali cakudya comwe cikhadyedwa na wanthu azinji mu nthawe za m’Bibliya. (Gen. 14:18; Luk. 4:4) Ndipopa nthawe zinango Bibliya limbaphatisa basa fala lakuti “pau” pakufuna kuthandauza cakudya ciri-centse. (Mat. 6:11; Mab. 20:7) Jezu adaphatisambo basa pau pa bzakudabwisa bziwiri bzomwe iye adacita. (Mat. 16:9, 10) Timbawerenga cibodzi mwa cakudabwisa cimweci pa Juwau kapitulo 6. Pomwe apostolo wa Jezu adamala nthawe izinji akupalizira, iwo pabodzi na Jezuyo adapakira mwadiya aciyenda ku ng’ambu inango ya Nyanza ya Galileya kuti akapume. (Mar. 6:7, 30-32; Luk. 9:10) Ndipo iwo adayenda ku mbuto ya okha-okha pafupi na mzinda wa Betsaida. Tsono wanthu adadziwa kuti Jezu akhali kumweko, ndipopa mwakusaya kucedwa thimu la wanthu lidafika kuti limuwone. Tsono Jezu alibe kundowasiya tenepoyo, koma iye adayamba kuwapfunzisa bza Umambo na kupozambo atenda. Pakuti kukhadoka, anyakupfunza wa Jezu akhakumbukira komwe angadagumana cakudya comwe cingadakwana wanthu wentse wale. Wanthu winango akhadanyamula cakudya pang’ono, tsono azinji akhalibe, ndipopa akhafunikira kuyenda kukagula cakudyaco. — Mat. 14:15. w24.12 2 ¶1-2

Abereki wathu, Adamu na Eva, akhali wakulungama ndipo akhakhala mu paraizo wakudeka. (Gen. 1:27; 2:7-9) Iwo angadakhala na moyo wakukondwa mpaka kale-kale. Tsono padacitika cinthu cakuipa kwene-kwene. Adamu na Eva adaphonya, ndipo thangwe ra bzimwebzo Yahova adawathotha mu zunde la Edeni. Iwo alibe pomwe kukhala na mwayi wakukhala na moyo mpaka kale-kale. Tsono n’ciyani comwe iwo adasiyira wana wawo? Bibliya limbalewa kuti: “Thangwe ra munthu m’bodzi [Adamu] pikado idapita m’dziko, ndipo pikadoyo idabweresa infa, tenepo infayo idafikira wanthu wentse thangwe wentse akhana pikado.” (Aro. 5:12) Adamu adatisiyira pikado yomwe imbaticitisa kuti tife. Pikado imweyi iri ninga mangawa makulu yomwe palibe ne m’bodzi wa ifepano omwe angakwanise kuyapagali. (Sal. 49:8) Jezu adandendemezera pikado na “mangawa.” (Luk. 11:4; Mat. 6:12) Tikaphonya timbakhala ninga kuti tina mangawa kwa Yahova ndipo Yahovayo angadatisunda kuti tipagali mangawayo. Mangawayo yangadasaya kuperekedwa, iyo yangadamala pokha-pokha tikafa. — Aro. 6:7. w25.02 2-3 ¶2-3

Ni mwayi ukulu kwene-kwene kwa ifepano kuuza winango bza Umambo bwa Mulungu! Ni wanthu lini wentse omwe ana mwayi umweyu. Mwa ciratizo, pomwe Jezu akhali pa dziko la pantsi, iye alibe kulekerera kuti madimonyo yalewe bza iye. (Luk. 4:41) Ntsiku zino, kuti munthu ayambe kupalizira, cakuyamba iye an’funika kucita bzinthu mwakubverana na momwe Yahova ambafunira. Timbalatiza kuti timbatenda mwayi umweyu tikambauza wanthu bza Umambo bwa Mulungu kuli-kwentse komwe timbawagumana. Tikufuna kukhala ninga Jezu, ndipopa timbacita bzomwe tingakwanise kuti tipalizire wanthu winango mwakuwapfunzisa cadidi. (Mat. 13:3, 23; 1 Ako. 3:6) Gulu la Mulungu limbatewezera ciratizo ca Jezu mwakucita ciri-centse comwe iwo angakwanise kuti athandize wanthu winango kulidziwa dzina la Mulungu. Ndipo njira ibodzi ya momwe iwo ambacitira bzimwebzi ndiyo kuphatisa basa Bibliya Lakusanduliziridwa la Dziko Lipsa. Bibliya limweri lidabwezeresa dzina la Mulungu m’mbuto zomwe dzinalo likhadacosedwa ndipo Bibliya lakusanduliziridwa limweri likugumanika m’bzirewedwe bzakupitirira 270. w24.04 9 ¶8-9

Abale winango omwe ali pa banja, ambawonesesa kuti ntsiku iri-yentse ambacita cinthu comwe cimbalatiza kuti ambafuna mkazawo. (1 Juw. 3:18) Mwamuna angalatize kuti ambafuna mkazace mwakumbacita tubzinthu tung’ono-tung’ono, ninga kumuphata boko pomwe akufamba mu njira ayai kumukumbatira. Pomwe iye ali kutali na mkazaceyo angambamutumizire mensaje yakulewa kuti: “Ndakusuwa” ayai kumubvunza kuti: “Kodi ntsiku yako ikukufambira tani?” Nthawe zinango angambamunembere mafala yabwino patsamba yakulatiza kuti iye ambamufuna. Mwamuna akambacita bzinthu bzimwebzi ambalatiza kuti ambalemekeza mkazace ndipo ambacitisa kuti banja lace likhale lakulimba. Mwamuna omwe ambalemekeza mkazace ambamuuza mafala yomwe yambacitisa kuti mkaziyo abzibve bwino. Njira ibodzi yomwe mwamuna angacitire bzimwebzi ndiyo kumbatenda mkaziyo pa bzentse bzomwe ambacita kuti amuthandize. (Akol. 3:15) Mwamuna akambatenda mkazace na kumbamuuza thangwe lomwe ambamufunira, mkaziyo ambabzibva kuti ngwakukhotcerereka ndipo ambawona kuti ambafunidwa na kulemekezedwa. w25.01 11 ¶15; 13 ¶16

Salimo 15 ambamaliza na mafala yakuti: “Omwe ambacita bzimwebzi an’dzatekenyeka lini.” Pamwepa Davide adafotokoza thangwe lomwe limbacitisa Yahova kutiuza bzinthu bzimwebzi. Yahova akufuna kuti tikhale wakukondwa. Ndipopa tikacita bzomwe Mulungu ambatikumbira timbakhala na moyo wabwino ndipo iye ambatikhotcerera. Alendo wa Yahova akudikhirira tsogolo labwino kwene-kwene. Anyakudzozedwa wakukhulupirika an’dzayenda kukakhala kudzulu ku “mbuto zizinji” zomwe Jezu adawakonzera. (Juw. 14:2) Wale omwe ana cidikhiro cakukhala pa dziko la pantsi akudikhirira kukwanisika kwa piciro la pa Apokalipse 21:3. Kulewa cadidi, timbawona kuti ni mwayi ukulu kwene-kwene kucemeredwa na Yahova kuti tikhale axamwali wace na kukhalambo alendo mu tendi mwace mpaka kale-kale! — Sal. 15:1-5. w24.06 13 ¶19-20

Kodi ulemerero n’ciyani? M’Bibliya fala lakuti “ulemerero” lingathandauze cinthu ciri-centse comwe cingacitise munthu kudabwa. Pomwe padapita ntsiku zing’ono-ng’ono kucokera pomwe Yahova adatsudzula Ajirayeri ku ukapolo, iye adalatiza ulemerero bwace. Kumbukirani bzomwe bzidacitika pa ntsikuyo: Ajirayeri azinji akhadaima m’nyantsi mwa Phiri la Sinai kuti abve bzomwe Mulungu wawo akhafuna kuwauza. Phiriro lidampsinkhika na mtambo upswipa. Mwakusaya kudikhiririka, iwo adayamba kubva pantsi pakutekenyeka. Padayamba kucitika citeketeke ca mphanvu, kudabveka kugunda na bziphaliwali ndipo padabvekambo kulira kwa mphanvu kwa nyanga. (Eki. 19:16-18; 24:17; Sal. 68:8) Pomwe Yahova adalatiza ulemerero bwace mwa kucita bzimwebzi, Ajirayeriwo adadabwa kwene-kwene. Ntsiku zino timbapasa ulemerero Yahova tikambauza winango bza mphanvu zace zakudabwisa, makhalidwe yace yabwino na kumutenda pa bzinthu bzomwe timbakwanisa kucita thangwe ra mphanvu yace. — Zai. 26:12. w25.01 2 ¶2-3

Pa nthawe inango pomwe Ajirayeri akhayenda mu Dziko Lakupiciridwa, amuna winango omwe akhana maudindo adayamba kunesana na Mozeji bza udindo bomwe iye adapasidwa na Yahova. Iwo adalewa kuti: “Wanthu wentse mbakucena sikuti Mozeji yekha, ndipo Yahova ali pakati pawo.” (Num. 16:1-3) Napo kuti bzikhalidi bzacadidi bzakuti “wanthu wentse” akhali wakucena, Yahova akhadasankhula Mozeji kuti atsogolere wanthuwo. Napo kuti anyakupandukawo akhawona ninga kuti akutsutsana na Mozeji, iwo akhatsutsana na Yahova. Iwo alibe kukumbukira bzomwe Yahova akhafuna, koma akhandokumbukira bzomwe iwo akhafuna bzomwe ni kudziwika na kubvekera. Yahova adapha amuna wakupandukawo pabodzi na wentse omwe akhali ku mbali yawo. (Num. 16:30-35, 41, 49) Tin’funika kukumbukira kuti ntsiku zinombo Yahova ambakomedwa lini na wanthu omwe ambalemekeza lini makonzedwe ya gulu lace. w24.07 11 ¶11

Tikukhala mu nthawe yomwe wanthu azinji ambakhulupira lini kuti dzikoli lasala pang’ono kumala. Ndipo iwo ambatiseka thangwe rakuti ifepano timbakhulupira bzimwebzo. (2 Ped. 3:3, 4) Napo kuti pana bzinthu bzizinji bzomwe ifepano tin’bzidziwa lini, tin’funika kukhala na citsimikizo cakuti dzikoli lin’mala pa nthawe yomwe Yahova adaikhazikisa nakuti bzimwebzi bzikadzacitika Yahova an’dzatisamalira. Ifepanombo ntsiku zino tin’funika kulimbisa cikhulupiro cathu kuna “kapolo wakukhulupirika na wanzeru” omwe Yahova akumuphatisa basa kuti atitsogolere. (Mat. 24:45) Citsautso cikulu cikadzayamba tingadzatambire malango yomwe yangadzapulumuse moyo wathu. Ndipopa ino ni nthawe yakuti timbakhulupire wale omwe Yahova adawaikha kuti ambatitsogolere m’gulu lace. Tikasaya kukhulupira na kubvera malango yomwe iwo ambatipasa tsapano bzin’dzakhalambo bzakunesa kubvera malango yomwe tin’dzapasidwa pa citsautso cikulu. w24.09 11 ¶11-12

Abereki, wana wanu an’dzakhala lini na cikhulupiro thangwe rakuti imwepo munaco. Tenepo na kupita kwa nthawe, pinango iwo angayambe kubzibvunza kuti: ‘Kodi ningatsimikizire tani kuti Mulungu alipodi? Kodi nin’funikadi kukhulupira bzomwe Bibliya limbalewa?’ Kucita mibvunzo imweyi n’kwakuphonyeka lini. Thangwe Bibliya limbatiuza kuti tin’funika kuphatisa basa ‘luso lathu lakukumbuka’ na ‘kuwonesesa bzinthu bzentse.’ (Aro. 12:1; 1 Ates. 5:21) Tsono kodi imwepo mungathandize tani wana wanu kuti alimbise cikhulupiro cawo? Thandizani wana wanu kuti ambafufudze kuti atsimikizire kuti bzomwe Bibliya limbapfunzisa mpsacadidi. Wana wanu akacita mibvunzo, phatisani basa mpata umweyu kuti muwapfunzise momwe angagumanire mitawiro mwakuphatisa basa Índice das Publicações da Torre de Vigia na Bukhu Lakufufudzira Nkhani la Mboni za Yahova. Mu bukhu lakufufudzira, pa nkhani yakuti “Bibliya,” pa kamsolo kakuti “Lakucokera kwa Mulungu,” iwo agumane nfundo zomwe zikulatiza kuti Bibliya ni bukhu lini labwino lomwe lidandonembedwa na wanthu, koma ni “mafala ya Mulungu.” — 1 Ates. 2:13. w24.12 14-15 ¶4-5

Kodi akulu angatewezere tani Jezu? Iwo angacite bzimwebzi mwa kupfunzisa abale kuphatanidzambo maswaka kuti athemere kukhala na maudindo mu gulu la Yahova. Akuluwo ambadikhirira lini kuti wanthu omwe akuwapfunzisawo atewezeretu bwino-bwino bzomwe akuwapfunzisabzo. Iwo an’funika kuwapasa malango mwa lufoyi kuti maswakayo yadziwe bzizinji na kuwonambo kufunika kwa kukhala wakubzicepesa, wakukhulupirika na wakukonzeka kutumikira winango. (1 Tim. 3:1; 1 Ped. 5:5) Jezu adapasa anyakupfunza wace basa lakuti apalizire na kupfunzisa wanthu. Pinango anyakupfunzawo akhawona kuti akhathemera lini kucita basalo. Tsono Jezu akhadziwa kuti iwo angadakwanisa kucita basalo, ndipo iye adawauza bzimwebzi. Pakufuna kulatiza kuti akhawakhulupira, Jezu adawauza kuti: “Ninga momwe Baba adanditumira, inembo ndikukutumani.” — Juw. 20:21. w24.10 16 ¶15; 17 ¶17

Davide akhali mambo wabwino. Iye akhali muimbi, akhanemba nyimbo, akhali mcikunda ndipo akhali mprofeta. Iye adagumana na mabvuto mazinji pa moyo wace. Adamala magole mazinji akukhala mwakuthawa-thawa thangwe akhafuna kuphedwa na Mambo Sauli omwe akhamucitira njiru. Pomwe Davide adakhala mambo adafunikambo kuthawa pomwe mwana wace Abisalomu akhafuna kumupha kuti amutengere umambobo. Napo kuti Davide adagumana na mabvuto mazinji ndipo adaphonyambo bzinthu bzinango, iye adalatiza kuti akhali wakukhulupirika kwa Mulungu mpaka kuphampha kwa moyo wace. Yahova adalewa kuti Davideyo ‘akhali munthu omwe akhakondwesa mtima wace.’ Ndipopa tin’funika kutetekera malango yanzeru yomwe iye adalewa! (1 Ama. 15:5) Onani malango yomwe Davide adapasa mwana wace Salomau omwe adadzakhala mambo m’mbuto mwace. Davide adapasa malango Salomauyo thangwe rakuti akhadasankhulidwa na Yahova kuti amange templo yomwe wanthu angadaiphatisa basa pa kunamata Yahova. (1 Nkha. 22:5) Pakhana basa lizinji kuti licitidwe ndipopa iye akhafunika kuthandizidwa na Yahova kuti akwanise kutsogolera wanthuwo. Kodi n’ciyani comwe Davide angadalewa kwa iye? Davide adauza mwana wace kuti penu angadabvera Yahova, bzinthu bzingadamufambira bwino pa moyo wace. — 1 Ama. 2:2, 3. w24.11 10 ¶9-11

Mwamuna omwe ambamenya mkazace ayai kumutukwana an’funika kucita bzinthu bzinango kuti akhale pomwe pa uxamwali na Yahova na kukhalambo pa uxamwali na mkazace. Cakuyamba, iye an’funika kubvesesa kuti ana bvuto likulu kwene-kwene. Yahova ambakwanisa kuwona bzomwe iye ambalewa na kucita. (Sal. 44:21; Mpal. 12:14; Aheb. 4:13) Caciwiri, iye an’funika kucinja khalidwe lace na kuleka kuboneresa mkazace. (Mim. 28:13) Cacitatu, iye an’funika kucita ciri-centse kuti alekereredwe na Yahova na kulekereredwambo na mkazace. (Mab. 3:19) Iye an’funikambo kudandaulira Yahova kuti amuthandize kufuna kucinja na kukwanisambo kukumbuka, kulewalewa na kucita bzinthu bzomwe Yahova ambakomedwa nabzo. (Sal. 51:10-12; 2 Ako. 10:5; Afil. 2:13) Cacinai, iye an’funika kucita bzinthu mwakubverana na mipembo yace ndipo an’funikambo kuwenga ndewo pabodzi na mafala yakuipa. (Sal. 97:10) Cacixanu, iye an’funika kukumbira thandizo kwa akulu wa gwere mwakamfulumize. (Tiy. 5:14-16) Cacitanthatu, iye an’funika kukumbukiriratu bzomwe ati adzacite kutsogolo kuti aleke kudzaboneresa pomwe mkazace. w25.01 11 ¶14

Kodi imwepo mumbafuna Yahova omwe adakupasani bzinthu bzabwino kuphatanidzambo moyo? Kodi imwepo mukufuna kulatiza lufoyi lanu kwa iye? Cinthu cabwino comwe imwepo mungacite ndico kubzipereka kwa iye mucibatizidwa. Bzimwebzi bzin’dzakucitisani kuti mucite mbali ya banja la Yahova. Mukacita bzimwebzi, Baba wanu Yahova omwembo ni Xamwali wanu, an’dzakusamalirani. (Sal. 73:24; Zai. 43:1, 2) Kuthumizira bzimwebzi, imwepo mukabzipereka mucibatizidwa mun’dzakhala na cidikhiro cakudzakhala na moyo wakusaya kumala. (1 Ped. 3:21) Kodi pana cinthu cinango comwe cikukutazisani kubatizidwa? Penu mun’ti inde, dziwani kuti imwepo muli lini mwekha. Wanthu azinji pomwe akhanati kubatizidwa, adafunikambo kucinja makhalidwe yawo na makumbukidwe yawo kuti athemere kubatizidwa. Ndipo tsapano akutumikira Yahova mwakukondwa na nyongo. w25.03 2 ¶1-2

Kazinji-kazinji m’Bibliya, pikado zathu zimbandendemezeredwa na mtolo wakulemera. Pakulewa bza pikado zace, Mambo Davide adati: “Bzakuphonya bzangu bzakwira mpaka kupitirira msolo wangu. Bzandilemera kwene-kwene ninga mitolo yakulemera.” (Sal. 38:4) Tikakungula, Yahova ambatilekerera pikado zathu. (Sal. 25:18; 32:5) Fala la Cihebereu lomwe lidasanduliziridwa kuti “kulekerera” limbathandauza “kudzusa” ayai “kunyamula.” Na tenepo, Yahova akalekerera pikado zathu, iye ambaticosera pikadozo. Bzimbakhala ninga kuti tanyamula mtolo pa phewa pathu ndipo iye ambaticosera mtoloyo. Pana ciratizo cinango comwe cimbalatiza momwe Yahova ambafundusira pikado zathu kutali na ifepano. Salimo 103:12 ambatiuza kuti: “Ninga ku mabvadzuwa kuli kutali na ku madokero, tenepombo iye ambafundusa bzakuphonya bzathu kutali na ife.” Kumabvadzuwa n’kutali kwene-kwene na kumadokero. Mbali ziwirizi zimbagumana lini. Kulewa kunango, Yahova ambatenga pikado zathu acizifundusira kutali na ifepano. Bzimwebzi bzimbatitsimikizira kuti Yahova ambatilekerera na mtima wentse! w25.02 9 ¶5-6

Pambuyo pa Jezu kubwerera kudzulu, mpostolo Pedru adacita cakudabwisa mwa kupoza mwamuna munango omwe akhadabadwa wakupunduka. (Mab. 1:8, 9; 3:2, 6-8) Pomwe wanthu azinji adawona bzimwebzi adadabwa kwene-kwene. (Mab. 3:11) Tsono Pedru alibe kufuna kuti wanthuwo amutumbize napo kuti iye adakulira m’cikhalidwe comwe wanthu azinji akhafuna kwene-kwene kubvekera. M’mbuto mwace, mwakubzicepesa Pedru alibe kufuna kutumbizidwa. Iye adauza wanthuwo kuti atumbize Yahova pabodzi na Jezu mwakuwauza kuti: “Munthu omwe mukumuwonayu imwepo mumbamudziwa, iye wapozedwa mu dzina la Jezu na thangwe ra kukhulupira kwathu pa dzina la Jezuyo.” (Mab. 3:12-16) Tingatewezere Pedru mwakupitiriza kupfunza kukhala wakubzicepesa. Ifepano timbacitira bzinthu bzabwino wanthu winango thangwe rakuti timbafuna Yahova nakuti timbafunambo wanthu sikuti thangwe ra kufuna kutumbizidwa. Na tenepo, tingalatize kuti ndife wakubzicepesa tikambatumikira Yahova mwakukondwa na kumbacitira bzinthu bzabwino abale wathu napo kuti wanthu winango angawone lini bzimwebzi. — Mat. 6:1-4. w25.03 10-11 ¶11-12

Tingathumizire lufoyi lathu kwa Yahova tikambafuna Yahovayo na wanthu. (Mat. 22:37-39) Ndokumbukirani momwe Yahova ambakhalira wakukondwa akatiwona tikucita basali na momwe wanthu ambakhalira wakukondwa akayamba kupfunza Bibliya! Ndipo kumbukiranimbo momwe wale omwe ambatetekera mafala yabwino angadzakhalire na moyo mpaka kale-kale akasankhula kutumikira Yahova. (Juw. 6:40) Kodi imwepo mukucoka lini pa mui thangwe ra bvuto linango? Penu mun’ti inde, onani bzomwe mungacite kuti mukulise lufoyi lanu kwa Yahova na kwa wanthu winango. Pa nthawe ya matenda ya COVID-19, Samuel na Dania akhacoka lini pa mui. Pa nthawe yakunesayi, iwo akhapalizira mwanyongo mwakuphatisa basa telefoni, kunemba matsamba na kucitisa mapfunziro ya Bibliya pa Zoom. Napo kuti Samuel na Dania akhacita lini bzinthu ninga momwe akhacitira kale-kale, iwo adacita bzomwe angakwanise ndipo adakhala wakukondwa thangwe ra kucita bzimwebzi. w24.04 18 ¶15-16

Napo kuti malowozi ndiyo lini yomwe yambacitisa munthu kukondwa, Akristau azinji omwe akanati kulowola ayai kulowodwa, maswaka na nkhalamba ambafuna kugumana munthu kuti alowolane naye. Kulewa cadidi, pomwe mukanati kuyamba umakhadzi na munthu, mun’funika kukhala pa uxamwali bwakulimba na Yahova, kubzidziwa bwino na kukhala wakukonzeka kudzasamalira banja lanu. (1 Ako. 7:36) Bzingakhalembo bwino kudziwiratu makhalidwe yomwe munthu omwe mukufuna kulowolana nayeyo an’funika kukhala nayo pomwe mukanati kuyamba umakhadzi. Thangwe mukasaya kucita bzimwebzi, imwepo mungalambe munthu omwe ngwakuthemera kulowolana naye ayai mungakhale pa umakhadzi na munthu omwe ngwakusaya kuthemera. Ndipo munthu omwe tin’funika kumanga naye banja an’funika kukhala Mkristau wakubatizidwa. (1 Ako. 7:39) Tsono bzimwebzi bzin’funa lini kulewa kuti munthu ali-wentse omwe ngwakubatizidwa angakhale wakuthemera kuti tilowolane naye. Ndipopa bzibvunzeni kuti: ‘Kodi bzakulinga bzangu mpsiponi? Kodi ni makhalidwe yaponi yakufunika yomwe ndikufuna kuti munthu omwe ndidzalowolane naye adzakhale nayo? Kodi bzomwe ndikufunabzo mpsakubveka?’ w24.05 20 ¶1; 21 ¶3

Pomwe muli pa umakhadzi, Kodi mungacite tani mukakhala mukugumana na mabvuto ayai mukubvesesana lini? Penu mumbanesana nthawe zinango, kodi bzimwebzi bzin’funa kulewa kuti ndimwe lini wakuthemerana? Ne, thangwe mabanja yentse nthawe zinango yambanesana. Banja lakulimba nda wanthu awiri omwe ambalemekezana, na omwe mbakukonzeka kucinja bzomwe iwo ambafuna kuti bzibverane na bzomwe mwanzawo wa m’banja ambafuna. Momwe imwepo mumbacitira mukakhala mukugumana na mabvuto ntsiku zino bzimbalatiza momwe imwepo mun’dzakhalira m’banja mwanu. Imwepo na mwanzanuyo mungabzibvunze kuti: ‘Kodi timbacezerana nkhaniyo mwakugwa mpfuwa na mwa ulemu? Kodi timbabvuma bzomwe taphonya ndipo timbayezera kukonza bzomwe taphonyabzo? Kodi timbakulumiza kupepesana na kulekererana tikaphonyerana?’ (Aef. 4:31) Na tenepo, penu imwepo mumbakhalira kupopotezana ayai kunesana kawiri-kawiri pomwe muli pa umakhadzi, bzimwebzi bzin’dzacinja lini mukadzalowolana. Penu imwepo mukuwona kuti mwanzanuyo ni munthu lini omwe mungathemere kulowolana naye, cingakhale cakusankhula ca nzeru kumalisa umakhadzibo. w24.05 29 ¶12

Tikambabvera Yahova pa bzinthu bzentse na kumbacita bzakusankhula mwa kuphatisa basa nfundo za m’Bibliya, winango an’dzatitewezerambo. Tikambapfunza Bibliya na kulimbisa cikhulupiro cathu kwa Yahova tin’dzakhala wakukhulupirika kwa iye ndipo tin’dzateweza mitemo yace. Tin’dzanamizidwa lini na nkhani zakunama ayai kukumbuka bzinthu bzomwe mpsakusiyana na bzomwe Yahova ambatipfunzisa. (Aef. 4:14; Tiy. 1:6-8) Ndipo tin’dzathandizambo wale omwe akugumana na mabvuto. (1 Ates. 3:2, 3) Akulu an’funika kumbacita bzinthu mwacikati-kati, kukumbuka bwino, kucita bzinthu mwakulinganizika na kuleka kumbangingimira nzeru zawo. Akulu ambathandiza winango kukhala wakugwa mpfuwa ndipo ambalimbisambo gwere “akateweza bwino-bwino mafala yakukhulupirika.” (Tito 1:9; 1 Tim. 3:1-3) Akulu akambacita bzimwebzi na kucitambo maulendo ya ubusa an’dzathandiza apalizi m’gwere kuti ambatsonkhane mwakukhazikika, kupalizira na kucita pfunziro lawo la pawokha. Abale akagumana na mabvuto yomwe yakuwapasa thupo, akulu angawathandize kuti apitirize kukumbukira mapiciro ya Yahova. w24.06 31 ¶16-18

Pomwe Jezu akhali pa dziko la pantsi pano, iye adapfunzisa anyakupfunza wace kuti Yahova ambafunisisa kulekerera wanthu omwe acita pikado. Kumbukirani bza ciratizo ca pai na mwana wakutaika. Mu ciratizoci, mulumbwana adacoka pa mui ndipo adayamba kucita bzinthu bzizinji bzakuipa. Patsogolo pace, “nzeru zidamubwerera” ndipo adabwerera ku mui. Kodi pai wacewo adamutambira tani? Jezu adalewa kuti: “Pomwe pai wacewo adamuwona na patali, . . . , adamuthamangira, acikamukumbatira na kumumpsompsona mwa lufoyi.” Mwanayo akhafuna kukakumbira pai wacewo kuti andokhale ninga nyabasa. Tsono pai wacewo adati: “Mwananguyu . . . akhadataika ndipo tsapano wagumanika.” (Luk. 15:11-32) Pomwe Jezu akhanati kubwera pa dziko la pantsi pano adawona kazinji-kentse Yahova akulatiza ntsisi na kulekerera mwakamfulumize wanthu omwe akhalatiza kuti akungula. Ciratizo comwe Jezu adalewaci cimbatitsangalaza kwene-kwene ndipo cimbalatiza kuti Baba wathu Yahova ngwantsisi kwene-kwene! w24.08 11 ¶11-12

Pomwe Mkristau akanati kusankhula kucita cinthu, iye ambayamba wakumbukira momwe Yahova ambaciwonera cinthuco. Mkristauyo ambadziwa kuti palibe cinthu cakufunika kwene-kwene kuposa uxamwali bwace na Yahova. Iye ambabziwona mwakuthemera ndipo ambatcenkha kukumbuka kuti iye ambadziwa bzentse. Ndipo iye ambalatiza kuti ambathemba Yahova mwa kumbapemba kwa Yahovayo kuti amuthandize. Ifepano tin’funika kupitiriza kumbapemba nthawe zentse kwa Yahova, bziribe basa luso lomwe tingakhale nalo. Ndipo pomwe tikufuna kusankhula cinthu tin’funika kumbapemba kwa Yahova kuti atithandize, thangwe ndiye yekha omwe ambadziwa bzomwe mpsabwino kwa ifepano. Timbatenda kwene-kwene Yahova thangwe adatilenga mu njira yomwe timbakwanisa kutewezera makhalidwe yace. (Gen. 1:26) N’cadidi kuti tingakwanise lini kumutewezereratu bwino-bwino Yahova. — Zai. 55:9. w25.03 11 ¶13; 13 ¶17-18

Lekani kumbakumbukira kuipa wanthu winango. Munthu akasaya kukutendani pa bzomwe mwamucitira, bzibvunzeni kuti: ‘Kodi munthu umweyu ambatenda lini ayai wandoyebwa kunditendako?’ Pinango pangakhale na thangwe lomwe lamucitisa kuti iye aleke kutitenda. Wanthu winango ambatenda bzomwe timbawacitira tsono ambakwanisa lini kulewa. Pinango iwo angacite manyazi kutambira thandizolo, maka-maka penu kale-kale iwo akhathandizambo wanthu winango. Bziribe basa thangwe lomwe lingacitise munthu kuleka kutenda, kufuna abale wathu kun’dzaticitisa kuti tileke kumbawakumbukira kuipa ndipo tin’dzapitiriza kumbathandiza winango mwakukondwa. (Aef. 4:2) Khalani wakupirira. Pakulewa bza kupasa, Mambo Salomau adanemba kuti: “Thusa pau yako m’madzi pakuti pakapita ntsiku zizinji un’dzaigumana pomwe.” (Mpal. 11:1) Mafalaya yakutipfunzisa kuti wanthu winango angalatize kutenda bzomwe tidawacitira “pakapita ntsiku zizinji.” w24.09 30 ¶18-19

Nthawe zinango tingabve cidziwiso m’gwere cakuti munthu watsimulidwa. Bzimwebzi bzikacitika, ifepano tingapitirize kucita naye bzinthu munthuyo, thangwe rakuti iye wakungula ndipo wasiya makhalidwe yace yakuipa. Iye akadacita mbali ya gwere ndipo an’funika kulimbikisidwa na abale na mpfumakazi kuti acite bzinthu bzabwino. (Aheb. 10:24, 25) Tsono mpsakusiyana na munthu omwe wacosedwa m’gwere. Ifepano timbasiya “kubverana” na munthuyo ndipo timbasiyambo “kudya naye.” (1 Ako. 5:11) Kodi bzimwebzi bzikuthandauza kuti ifepano tingacemere lini munthu wakucosedwa kuti abwere ku mitsonkhano ayai kumumusa pomwe abwera ku mitsonkhano? Ne ndibzo lini. Bzomwe bzikuletsedwa ni kucita bzinthu na munthuyo. Koma Mkristau ali-wentse angaphatise basa cikumbu-mtima cace cakupfunzisidwa na Bibliya kuti awone penu angacemere munthu omwe wacosedwa m’gwere omwe ni famidya yace ayai munthu omwe akhali xamwali wace pomwe akhanati kucosedwa kuti agumanike pa mitsonkhano. w24.08 30 ¶13-14