Fevereiro

Abale omwe ana makhalidwe yabwino mbakufunika kwene-kwene m’gwere. Munthu omwe ngwakukonzeka kubvuma ambacita nyongo yakukhala pa mtendere na anzace. Penu imwepo mun’funa kudziwika ninga munthu omwe ngwakukonzeka kubvuma bzomwe winango ambalewa, mbabvumani bzomwe anzanu ambalewa na kubvumambo kuti bzomwe iwo ambalewa bziphatisidwembo basa. Pa mtsonkhano wa akulu, kodi imwepo mun’dzabvuma kuti nzeru ya winango iphatisidwe basa ikakhala kuti ikupitana lini na mitemo ya m’Bibliya? Lekani kumbangingimira kuti bzinthu bzicitike ninga momwe imwepo mun’funira. Mun’funika kulemekeza bzomwe anzanu anilewa. (Gen. 13:8, 9; Mim. 15:22) Bzimwebzi bzikuthandauza kuti imwepo mun’funika lini kukhala munthu wakusaya ulemu ayai kumbandokhalira kupopotezana na anzanu. M’mbuto mwace, imwepo mun’funika kumbaceza nawo mu njira yabwino. Mukakhala munthu wa mtendere mun’dzacita ciri-centse kuti mukhale pa mtendere na wanthu winango napo bzicikhala bzakunesa. (Tiy. 3:17, 18) Imwepo mukambalewalewa na wanthu wentse mu njira yabwino kuphatanidzambo na wale omwe ni Mboni lini, mun’dzawathandiza kuti akhale wa kugwa mpfuwa acimalisa ukali bwawo. — Ato. 8:1-3; Mim. 25:15; Mat. 5:23, 24. w24.11 23 ¶13

N’cadidi kuti Jezu adafa “kabodzi kokha mpaka kale-kale,” koma iye akupitiriza kuticitira bzinthu bzizinji kwene-kwene. (Aro. 6:10) N’ciyani comwe iye akucita? Iye akupitiriza kuphata basa kuti atipase bzinthu bzentse bzabwino bzomwe tsapano mpsakukwanisika thangwe ra cakulombolera. Iye akutumikira ninga Mambo, Mkulu wa Antsembe na msolo wa gwere. (1 Ako. 15:25; Aef. 5:23; Aheb. 2:17) Iye adapasidwa basa la kutsonkhanisa anyakudzozedwa na wa thimu likulu, ndipo basa limweri lin’dzamala pomwe citsautso cikulu cikanati kumala. (Mat. 25:32) Iye akuphatisambo basa kapolo wakukhulupirika na wanzeru kuti atipase cakudya cauzimu kuti tipitirize kutumikira Yahova mwakukhulupirika mu ntsiku zakumalizira zino. (Mat. 24:45) Ndipo m’magole 1000 yomwe iye an’dzakhala akutonga an’dzapitiriza kutithandiza. Pomwe Yahova adapereka Mwana wace alibe kumupereka kuti adzatifere basi, koma kuti adzaticitirembo bzinthu bzizinji kwene-kwene! w25.01 24 ¶12

Yahova akatilekerera ambapfudziratu pikado zathu mpaka kale-kale. Bzimwebzi bzimbaticitisa kuti tikhale pa uxamwali bwakulimba na Baba wathu wakudzulu. Tsono, ifepano timbadziwa kuti kulekerera kwa Yahova ni mphaso yomwe iye adatipasa thangwe ra lufoyi na kudeka mtima kwace sikuti thangwe rakuti tikhathemera. Timbatenda kwene-kwene Yahova thangwe rakuti ‘ambatilekerera na mtima wentse’! (Sal. 130:4; Aro. 4:8) Tsono, penu tikufuna kuti Yahova atilekerere tin’funika kucita cinthu cinango. Jezu adalewa kuti: “Mukasaya kulekerera bzakuphonya bza winango, Baba wanu wakudzulu an’dzalekererambo lini bzakuphonya bzanu.” (Mat. 6:14, 15) Tin’funika kutewezera Yahova ticimbalekerera anzathu. w25.02 13 ¶18-19

Kumbukirani bza wanthu omwe adapfudzidwa m’mizinda ya Sodoma na Gomora. Munthu wakulungama,wakucemeredwa Loti, akhakhala pakati pa wanthu amwewa ku Sodoma. Kodi ifepano timbadziwa kuti Loti adapalizira wanthu wentse? Ne. Iwo akhali wanthu wakuipa, tsono kodi iwo akhadziwa cabwino na cakuipa? Bzikuwoneka kuti ne. Kumbukirani kuti thimu la amuna lidayenda ku mui kwa Loti kuti akacite malume ya pa mphasa na amuna omwe akhadabwera ku mui kwace. Ndipo Bibliya limbalewa kuti pakati pa thimulo pakhana “maswaka na amuna wacikulire.” (Gen. 19:4; 2 Ped. 2:7) Kodi ifepano timbadziwa kuti Mulungu wantsisi, Yahova, adatonga kuti wanthu amwewa aleke kudzalamusidwa? Ne timbadziwa lini. Cadidi n’cakuti Yahova adauza Abalahamu kuti mu mzindamu mukhalibe wanthu wakulungama wakukwana 10. (Gen. 18:32) Yahova akhana mathangwe ya kuwapfudzira thangwe rakuti iwo akhana makhalidwe yakuipa. Tsono ifepano tingatsimikizire kuti wanthu amwewa angadzalamusidwe lini “akadzalamusidwa wanthu . . . wakusaya kulungama”? Ne, ifepano tingalewe lini mwakutsimikiza! w24.05 2 ¶3; 3 ¶8

Thangwe ra kucinja na kunesa kwa bzinthu, wanthu azinji adayezedwa kuti abvume basa lomwe lingadawacitisa kukhala kutali na banja lawo, tsono bzimwebzi bzidawonekeratu kuti bzikhali bzakusaya nzeru. Pomwe mukanati kubvuma basa, lekani kumbandokumbukira kobiri zomwe mun’dzatambira koma mbakumbukiranimbo penu bzimwebzi bzin’dzakuthandizani na kuthandizambo banja lanu kukhala pa uxamwali bwakulimba na Yahova. (Luk. 14:28) Bzibvunzeni kuti: ‘N’ciyani comwe cingacitike ndikakhala kutali na banja langu? Kodi nin’dzakwanisa kumbagumanika pa mitsonkhano yentse, kucoka mu upalizi na kumbamala nthawe ndiri pabodzi na abale na mpfumakazi?’ Penu muna wana, mun’funika kumbabzicita mbvunzo wakufunika wakuti: ‘Kodi wana wangu nin’dzakwanisa “kuwalanga na kuwapfunzisa mwakubverana na kufuna kwa Yahova”?’ (Aef. 6:4) Bvumani kutsogoleredwa na makumbukidwe ya Mulungu sikuti na makumbukidwe ya wanthu wa m’banja mwanu ayai axamwali wanu omwe ambalemekeza lini malamulo ya m’Bibliya. w25.03 29 ¶12

Munthu omwe ngwakukhwima lini mwauzimu anganamizidwe mwakusaya kunesa na omwe ambalewa “bzipfunziso bzakunama” na omwe ambamwaza nkhani zakunama pa interneti ayai na apanduki. Iye angayambe kuipidwa na wanthu winango, kunesana nawo na kufulumiza kukalipa. Ndipo kawiri-kawiri iye angacite bzinthu bzakuphonyeka akayezedwa. (1 Ako. 3:3) Bzinembo bzimbandendemezera kukula mwauzimu na momwe mwana ambakulira. (Aef. 4:15) Mwana alibe nzeru, ndipo ambafunikira kutsogoleredwa. Mai akafuna kuyambuka mseu ambaphata boko la mwana wace. Pomwe mwanayo akukula, maiyo ambadzamusiya kuti iye ayambuke yekha, tsono ambamukumbusa kuti iye an’funika kuyamba kunyang’anisa mbali zentse kuti awone penu kukubwera karo. Mwanayo akakula ambadziwa bzomwe angacite kuti atcenkhe ngozi. Mwakundendemerana na bzimwebzi, Akristau wakukhwima mwauzimu akafuna kucita bzakusankhula, iwo ambakumbukira bwino-bwino na kuwona bzomwe Bibliya limbalewa kuti adziwe momwe Yahova ambaiwonera nkhaniyo. Akamala iwo ambaphatisa basa bzomwe awerengabzo. w24.04 3 ¶5-6

Padapita magole mazinji kwene-kwene pomwe alendo wa Yahova akhakhala kudzulu basi. Tsono, Yahova adadzathumizira tendi lace kuti wanthu wa pa dziko la pantsi akhalembo alendo wace. Winango mwa alendo amwewa akhali Inoki, Nowa, Abalahamu na Djobi. Bibliya limbalewa kuti iwo akhali axamwali wa Mulungu thangwe rakuti adamubvera ndipo adafamba “na Mulungu wacadidi.” (Gen. 5:24; 6:9; Djob. 29:4; Zai. 41:8) Papita magole mazinji ndipo Yahova akupitiriza kucemera axamwali wace kuti akhale alendo wace. (Ezek. 37:26, 27) Mwa ciratizo, mu profesiya ya Ezekiyeli ifepano timbapfunza kuti Yahova an’funa kuti atumiki wace akhale pa uxamwali bwakulimba na iye. Iye akupicira kucita nawo “mpangano wa mtendere.” Profesiyayi imbalewa bza nthawe yomwe wale omwe ana cidikhiro ca kukakhala kudzulu pabodzi na wale omwe an’dzakhala pa dziko la pantsi an’dzakhala pabodzi mu tendi lace ninga “thimu libodzi” la mabira. (Juw. 10:16) Profesiya imweyi ikukwanisika ntsiku zino! w24.06 2 ¶2, 4; 3 ¶5

Ifepano timbathandizira Umambo bwa Yahova na mtima wentse, tsono kucita bzimwebzi kumbafunika kukhwimika. (Mat. 6:33) Mu dziko lakuipali timbafunika kukhala wakukhwimika kuti titeweze mitemo ya Yahova na kupalizira mafala yabwino ya Umambo. Pakuti dzikoli ndakugawanika thangwe ra nkhani za ndale, tin’funika kukhala wakukhwimika kuti tileke kupitira nkhani za ndalezo. (Juw. 18:36) Atumiki azinji wa Yahova ambaneseka kugumana kobiri, ambamenyedwa ayai kuikhidwa m’kawoko thangwe ra kusaya kupitira nkhani za ndale ayai kuyenda ku nkhondo. Ifepano timbakhalambo wakukhwimika tikambakumbukira kukhwimika komwe wanthu winango adalatiza kuti apitirize kukhala wakukhulupirika kwa Yahova na Umambo bwace. Pomwe Mambo wathu Jezu Kristu akhali pa dziko la pantsi pano, iye adalamba na mtima wentse kupitira nkhani za ndale za m’dziko la Sathaniri. (Mat. 4:8-11; Juw. 6:14, 15) Iye nthawe zentse adathemba Yahova kuti akhale wakukhwimika kuti acite bzinthu bzabwino. w24.07 3 ¶4; 4 ¶7

Yahova adacitisa kuti nkhani imweyi inembedwe m’Bibliya kuti ifepano tikwanise kubvesesa cinthu cakufunika kwene-kwene. Nkhani imweyi imbatithandiza kubvesesa kuti thangwe ranyi Yahova ambawenga kwene-kwene pikado. Pikado imbaticitisa kuti tikhale kutali na Baba wathu ndipo imbacitisa kuti tife. (Zai. 59:2) Ndipopa anjo wakuipa omwe adacitisa kuti Adamu na Eva acite pikado ule, omwe ni Sathani, ambafuna kwene-kwene pikado ndipo akupitiriza kuyeza wanthu ntsiku zino. Pomwe Adamu na Eva adacita pikado, Sathani adakumbuka kuti wakwanisa kutazisa Yahova kukwanirisa cakulinga cace kwa wanthu. Koma iye akhadziwa lini kukula kwa lufoyi la Yahova. Yahova angacinje lini cakulinga comwe anaco na wana wa Adamu na Eva. Yahova ambafuna kwene-kwene wanthu, ndipopa pomwe Adamu na Eva adacita pikado Yahova adapereka cidikhiro kwa wana wawo wentse. (Aro. 8:20, 21) Yahova akhadziwa kuti wana winango wa Adamu na Eva angadasankhula kumufuna na kumubvera. Ndipopa iye adacita ciri-centse kuti awapulumuse ku pikado na kuwapasa mwayi wakukhala pa uxamwali bwakulimba na iye. w24.08 3 ¶3-4

Atumiki azinji wa Yahova ambakhala na bzakucita bzizinji pa moyo wawo. Azinji wa ifepano timbaphata basa kuti tikwanise kubzisamalira na kusamalirambo mabanja yathu. (1 Tim. 5:8) Pana Akristau azinji omwe ambasamalira adzinza wawo omwe akuduwala ayai mbakukalamba. Ndipo tentsenefe timbafunikira nthawe kuti tisamalire thanzi lathu. Kuthumizira pa mabasa yamweya, pana mabasambo yanango yomwe timbacita m’gwere. Basa likulu kwene-kwene lomwe timbacita ndiro kupalizira mwa nyongo. Kuwerenga Bibliya ni cibodzi mwa “bzinthu bzomwe mpsakufunika kwene-kwene” kwa Akristau. Ndipopa tin’funika kuwonesesa kuti timbakhala na nthawe yakumbaliwerenga. Pakulewa bza munthu wakukondwa, Salimo wakuyamba ambalewa kuti: Iye “ambakondwa na malamulo ya Yahova, ndipo ambawerenga malamulo yace acimbayakumbukira masikati na usiku.” (Sal. 1:1, 2) Bzimwebzi bzikulatiza kuti tin’funika kumbapambula nthawe kuti timbawerenge Bibliya. Kodi nthawe yabwino kuti tiwerenge Bibliya njiponi? Munthu ali-wentse angakhale na mtawiro wace pa mbvunzo umweyu. Tsono imwepo mun’funika kusankhula nthawe yomwe mungambacite bzimwebzo mwakusaya kumoga-moga. w24.09 3 ¶5-6

Kodi Mkristau wakukhwima mwauzimu angafunikire thandizo la munthu munango? Inde. Nthawe zinango, wanthu omwe mbakukhwima an’funikirambo kumbakumbira thandizo.Tsono Munthu omwe ngwakukhwima lini mwauzimu angafunikire thandizo la wanthu winango kuti amuuze bzakucita ayai kuti acite cakusankhula comwe iye yekha akhafunikira kucita. Mwakusiyana na bzimwebzi, Mkristau omwe ngwakukhwima mwauzimu akakumbira thandizo, iye ambadziwa kuti pakumalizira pace iye an’funika kusankhula yekha bzakucita nakuti an’funika ‘kunyamula mtolo wace.’ Ninga momwe munthu ambakhalira wakusiyana mawonekedwe na mwanzace, Akristau wakukhwima mwauzimu ambakhala na makhalidwe yauzimu yakusiyana-siyana ninga nzeru, kukhwimika, kudeka mtima na ntsisi. Ndipo Akristau awiri wakukhwima mwauzimu akagumana na bvuto lakundendemerana angacite bzakusankhula bzakusiyana, koma bzentse bzicikhala bzikubverana na bzomwe Bibliya limbalewa. Bzimwebzi bzimbacitika maka-maka bzikakhala kuti Mkristau an’funika kucita bzakusankhula mwakubverana na bzomwe mtima wace ukumuuza. Thangwe ra bzimwebzo, iwo ambalewa lini kuipa anzawo thangwe rakuti acita bzakusankhula bzakusiyana na bzawo. M’mbuto mwace, ambapitiriza kukhala wakuphatana. — Aro. 14:10; 1 Ako. 1:10. w24.04 4 ¶7-8

N’ciyani comwe mungacite penu mukupitiriza kubziwona kuti ndimwe lini wakufunika? Werengani mavesi ya m’Bibliya yomwe yangakutsimikizireni kuti Yahova ambakuwonani kuti ndimwe wakufunika ndipo mbayakumbukirani. Penu imwepo mwatazira kucita bzomwe mukhafuna ayai mwasunama thangwe rakuti mukukwanisa lini kucita bzomwe anzanu ambacita, lekani kubzipasa mulandu. Yahova ambadikhirira lini kuti mucite bzinthu bzomwe mungabzikwanise lini. (Sal. 103:13, 14) Penu imwepo mudacitiridwa bzinthu bzakuipa kale-kale ninga kutukwanidwa, kumenyedwa ayai kupswithidwa, lekani kubzipasa mulandu na bzimwebzi! Kumbukirani kuti Yahova an’dzatonga munthu omwe adakucitirani bzinthu bzakuipayo sikuti imwepo. (1 Ped. 3:12) Lekani kupenukira kuti Yahova angakuphatiseni basa kuti muthandize winango. Iye adakupasani mwayi wakuphata naye basa pabodzi mu utumiki. (1 Ako. 3:9) Bzomwe bzidakucitikirani pa moyo wanu bzingakucitiseni kuti mumbabvere ntsisi anzanu na kubvesesa momwe iwo akubvera. Ndipo imwepo mungacite bzizinji kuti muwathandize. w24.10 7-8 ¶6-7

Yahova ambacita thupo tikacitiridwa bzinthu mwakusaya cirungamo. Timbadziwa bzimwebzi thangwe “Yahova ambafuna cirungamo.” (Sal. 37:28) Jezu adatitsimikizira kuti Yahova “an’dzawonesesa . . . kuti . . . [tacitiridwa] cirungamo mwakamfulumize” pa nthawe yakuthemera. Ndipo tsapanopali iye an’malisa mabvuto yentse yomwe tikugumana nayo ndipo an’pfudza kusaya cirungamo kwentse. (Sal. 72:1, 2) Pomwe tikudikhirira dziko la cirungamo, Yahova ambatithandiza kuti tikwanise kupirira bzinthu bzakusaya cirungamo bzomwe bzimbaticitikira. (2 Ped. 3:13) Iye ambatipfunzisa kuti ticite bzinthu mwa nzeru tikacitiridwa bzinthu mwakusaya cirungamo. Yahova ambaphatisa basa ciratizo ca Mwana wace kuti atithandize kudziwa bzomwe tingacite tikacitiridwa bzinthu bzakusaya cirungamo. Ndipo iye ambatipasambo malango yomwe tingaphatise basa tikacitiridwa bzinthu mwakusaya cirungamo. w24.11 2-3 ¶3-4

Jezu adauza apostolo wace kuti apase cakudya thimu la wanthu tsono bzimwebzi bzikhawoneka ninga kuti mpsakukwanisika lini thangwe pakhana amuna wakukwana 5000. Ndipo tikafuna kuphatanidza akazi na wana omwe akhalipo pamwepo, pinango wanthu wentse akhakwana 15 000. (Mat. 14:21) Andereya adalewa kuti: “Pano, pana mulumbwana omwe ana pau zixanu zakukonzedwa na mpunga na tuntsomba tuwiri. Tsono kodi bzimwebzi bzingakwane thimu lentse la wanthuli?” (Juw. 6:9) Pau zakukonzedwa na mpunga cikhali cakudya comwe cikhadyedwa na wanthu azinji. Tuntsomba tung’ono-tung’onoto tukhali twakuuma ndipo tukhana munyu. Tsono pau na ntsomba zomwe mulumbwana ule akhanazo zingadakwana lini kudyesa thimu lentse lire! Pakufuna kulatiza khalidwe la kutambira bwino alendo, Jezu adauza wanthuwo kuti akhale pantsi tumathimu pa mauswa yakupswipirira. (Mar. 6:39, 40; Juw. 6:11-13) Ifepano timbawerenga kuti Jezu adatenda Pai wace thangwe ra pau na ntsomba zire. Bzikhali bzakufunika kutenda Mulungu thangwe rakuti iye ndiye omwe ambapereka cakudya. Ifepano tingatewezere Jezu mwa kumbapemba pomwe tikanati kudya. Jezu adauza anyakupfunza wace kuti agawanise cakudyaco wanthuwo ndipo iwo adadya acikhuta. w24.12 2-3 ¶3-4

Pomwe Jezu akhacita bzakudabwisa, iye nthawe zentse akhapereka ulemerero kwa Pai wace mwa kuuza wanthu kuti akhacita bzakudabwisabzo na mphanvu ya Yahova. (Mar. 5:18-20) Jezu adaperekambo ulemerero kwa Yahova mwa mafala yomwe iye akhalewa pakulewa bza Yahovayo na momwe akhacitira bzinthu na wanthu winango. Ntsiku inango, Jezu akhapfunzisa mu nyumba yakunamatira. Pakati pa wanthu omwe akhamutetekera pakhana mkazi m’bodzi omwe akhadamala magole 18 akuboneresedwa na mzimu wakuipa. Mzimu wakuipayo ukhacitisa kuti msana wace ukhale wakugonyoka ndipo iye akhakwanisa lini kuuthamula. Mkaziyo akhabonera kwene-kwene! Jezu adamubvera ntsisi mkaziyo, adamufenderera ndipo adamuuza kuti: “Mkaziwe, wapozedwa matenda yako.” Jezuyo adaikha manja yace pa mkaziyo ndipo pa nthawe imweyoletu msana wace udathamuka. Pomwe iye adawona kuti alimba matenda yaceyo “[adayamba] kutumbiza Mulungu”! (Luk. 13:10-13) Mkazi ule akhana mathangwe yomwe yadamucitisa kuti apereke ulemerero kwa Yahova ndipo ifepanombo tinayo mathangwe yakuperekera ulemerero kwa Yahova. w25.01 2-3 ¶3-4

Kodi tingakwanise kukhala pomwe na bzinthu bzentse bzomwe Adamu na Eva adaluza? Tekha tingakwanise lini. (Sal. 49:7-9) Tingadasaya kuthandizidwa, tingadakhala lini na cidikhiro cakudzakhala na moyo wakusaya kumala kutsogoloku ayai cakudzalamusidwa. Tikafa tingadadzakhala lini pomwe na moyo ninga momwe bzimbacitikira na bzirombo. (Mpal. 3:19; 2 Ped. 2:12) Baba wathu wa lufoyi, Yahova, adatipasa mphaso yomwe idapagali pikado yomwe tidaitenga kwa Adamu. Jezu adabvekesa bzimwebzi pomwe adalewa kuti: “Mulungu adafuna kwene-kwene dziko la pantsi, mwakuti adapereka Mwana wace m’bodzi yekha, kuti ali-wentse omwe an’khulupira mwanayo, aleke kudzaphedwa, koma adzakhale na moyo wakusaya kumala.” (Juw. 3:16) Kuthumizira bzimwebzi, mphaso imweyi imbatipasa mwayi wakukhala pa uxamwali bwakulimba na Yahova. Tingagumane phindu na mphaso imweyi ticilekereredwa pikado ayai “magawa” yathu. w25.02 3 ¶3-6

Kodi n’ciyani cidathandiza Saulo kuti abatizidwe? Pomwe Jezu adalewalewa na Saulo kucokera kudzulu, ceza cidatoya Sauloyo acikhala zimola. (Mab. 9:3-9) Iye adamala ntsiku zitatu akubzimana kudya ndipo pinango-pentse akhambakumbukira bzomwe bzikhadamucitikirabzo. Kulewa cadidi, bzimwebzi bzidatsimikizira Saulo kuti Jezu akhalidi Mesiya nakuti ateweri wace akhali anamati wacadidi. Pana bzinthu bzizinji bzomwe tingapfunze na Saulo. Iye angadafuna angadalekerera kuti kubzikuza ayai kugopa wanthu kumutazise kubatizidwa. Tsono iye alibe kulekerera kuti bzimwebzi bzicitike. Saulo akhali wakukonzeka kukhala Mkristau napo acidziwa kuti angadadzazunzidwa. (Mab. 9:15, 16; 20:22, 23) Pomwe adabatizidwa, iye adapitiriza kuthemba Yahova kuti angadadzamuthandiza pa mazunzo yomwe iye angadadzagumana nayo. (2 Ako. 4:7-10) Kubvuma kwanu kubatizidwa mucikhala Mboni ya Yahova, kun’dzakucitisani kuti mugumane na mazunzo yomwe yangadzayeze cikhulupiro canu. Tsono, imwepo mungakhale na citsimikizo cakuti Mulungu na Kristu an’dzakupasani thandizo lomwe mukufunikira kuti mupitirize kupirira na kukhalambo wakukhulupirika. — Afil. 4:13. w25.03 4 ¶8-9

Kuwerenga Bibliya ni cinthu cakufunika kwene-kwene. Tsono penu tikufuna kugumana phindu na bzomwe timbawerenga m’Bibliya, tin’funika kucita bzizinji sikuti kumbandowerenga Bibliyalo basi. Kumbukirani bza ciratizoci: Nvula njakufunika kwene-kwene kwa wanthufe. Tsono nvulayo ikabvumba kwene-kwene koma mu kanthawe kakucepa mnyontho umbapita lini pantsi. Nvulayo ikabvumba mwa njira imweyi, mbeu zimbakula lini bwino. Nvula in’funika kumbabvumba pang’ono-pang’ono kuti mnyontho upite pantsi. Mwakundendemerana na bzimwebzi, tin’funika lini kumbawerenga Bibliya mwakuthamanga-thamanga, thangwe tikacita bzimwebzi tin’dzakwanisa lini kubva, kukumbukira na kuphatisa basa bzomwe tawerengabzo. (Tiy. 1:24) Kodi imwepo mumbawerenga Bibliya mwakuthamanga-thamanga? Penu ndibzo, n’ciyani comwe mun’funika kucita? Mun’funika kuwerenga mwakusaya kuthamanga. Citani nyongo kuti mumbabvesese bzomwe mukuwerenga ayai kukumbukira bzomwe mwamala kuwerenga. Imwepo mungasankhule kuthumizira nthawe yomwe mumbapfunza na cakulinga cakuti mumbakhalembo na nthawe yakukumbukira bzomwe mukuwerengabzo. w24.09 4 ¶7-9

Gulu la Yahova likapereka malango kwa akulu, iwo an’funika kuyawerenga na kuyaphatisa basa. Iwo ambatambira malango ya momwe angambacitire mbali zawo pa mitsonkhano na momwe angambacitire mpembo m’gwere. Tsono ambatambirambo malango ya momwe angasamalirire mabira ya Jezu. Akulu akambaphatisa basa malango yentse yomwe ambatambira, abale ambawona kuti Yahova ambawafuna ndipo ambawasamalira. Ndipopa ifepano tikambatambira malango na akulu tin’funika kumbayateweza. Tikacita tenepo, bzin’dzakhala bzakupusa kwa iwo kuti acite basa lawo. Bibliya limbatiuza kuti timbabvere wale omwe ambatsogolera pakati pathu. (Aheb. 13:7, 17) Tsono amuna amwewa mbakuperewera. Ndipopa tikambandokhalira kumbawona kuphonya kwawo, tin’dzakhala tikuthandizira anyamadulanthaka wathu. Thangwe ranyi? Thangwe anyamadulanthaka wathu akufuna kuti tireke kukhulupira kuti Yahova akuphatisa basa gulu lace kuti atitsogolere. Ndipopa tikambakumbukira kuipa akulu bzin’dzaticitisa kuti tiyambe kusaya kukhulupira gulu la Yahova. w24.04 10 ¶11-12

Kodi wentse omwe an’dzafa pa citsautso cikulu alibe cidikhiro cakudzalamusidwa pomwe? Bzinembo bzimbabvekesa bwino kuti wale omwe ambatsutsa Yahova na omwe an’dzapfudzidwa na Yahovayo pabodzi na anyankhondo wace pa Armagedo, an’dzalamusidwa lini pomwe. (2 Ates. 1:6-10) Tsono tani pakulewa bza wanthu winango omwe an’dzafa pa citsautso cikulu thangwe ra matenda, kukalamba, asidente na kuphedwa na munthu munango? (Mpal. 9:11; Zak. 14:13) Kodi wanthu amwewa ali mu gulu la wanthu “wakusaya kulungama” omwe an’dzalamusidwa mu dziko lipsa? (Mab. 24:15) Kulewa cadidi ifepano tin’dziwa lini. Timbadziwa bzinthu bzakusiyana-siyana bzomwe bzin’dzacitika kutsogolo. Mwa ciratizo, timbadziwa kuti pa Armagedo wanthu an’dzacitiridwa bzinthu mwakubverana na momwe iwo akhacitirambo bzinthu abale wa Kristu. (Mat. 25:40) Ndipo wanthu omwe an’dzatongedwa ninga mabira an’dzakhala alatiza kuti ambathandizira anyakudzozedwa pabodzi na Kristu. — Apok. 12:17. w24.05 10-11 ¶9-11

Bibliya limbalewa kuti ntsiku zomwe tikukhala zino ni “zakunesa na zakugopswa.” (2 Tim. 3:1) Kupambula pa mabvuto yomwe tentse tikugumana nayo thangwe rakuti tikukhala mu ntsiku zakunesa, atumiki wa Yahova ambazunzidwa. N’ciyani comwe cimbatithandiza kupitiriza kunamata Yahova napo kuti tikugumana na mabvuto? Cinthu cibodzi comwe cimbatithandiza ndico kudziwa kuti “Yahova ni Mulungu wamoyo.” (Jer. 10:10; 2 Tim. 1:12) Yahova ni Munthu caiye. Iye ambatithandiza tikakhala tikugumana na mabvuto ndipo ambanyang’ana njira zakutithandizira. (2 Nkha. 16:9; Sal. 23:4) Tikambakumbukira kuti Mulungu ngwakukonzeka kutithandiza timbakhala na mphanvu yakulimbana na mabvuto yomwe tingagumane nayo. w24.06 20 ¶1-2

Ifepano tin’funika kukhulupira gulu la Yahova. Abale omwe ambatsogolera mu gulu la Yahova akawona kuti tin’funika kucinja kabvesesedwe kanango ka cadidi ca m’Bibliya ayai ka momwe basa la Umambo likufambira, iwo ambazeza lini kucita bzimwebzo. Iwo ambacita bzimwebzi thangwe cinthu cakufunika kwene-kwene kwa iwo ndico kukondwesa Yahova. Ndipo iwo ambacitambo ciri-centse kuti bzakusankhula bzomwe iwo ambacita bzicokere m’Fala la Mulungu comwe ni ciratizo comwe atumiki wentse wa Yahova ambaciphatisa basa. Mpostolo Paulo adacenjeza kuti: “Pitiriza kuphatisisa ciratizo ca mafala yabwino.” (2 Tim. 1:13) “Ciratizo ca mafala yabwino” ni mapfunziso yacikristau yomwe yambagumanika m’Bibliya. (Juw. 17:17) Bzentse bzomwe timbakhulupira bzimbacokera pa mapfunziso yamweya. Gulu la Yahova limbatipfunzisa kuti timbakhulupire mapfunziso yamweya. Tikacita bzimwebzi, tin’dzasimbidwa. w24.07 11-12 ¶12-13

Mpostolo Pedru akhali wakukonzeka kupfunzisambo wanthu winango bza kukungula na kulekerera thangwe rakuti iye adawona kulekerera kwa Yahova na Jezu. Pomwe phwando la Pentekoste lidamala kucitika, Pedru adafotokozera nkhani thimu la Adjuda lomwe likhakhulupira lini Jezu. Iye adalewa kuti ndiwo omwe adacitisa kuti Mesiya aphedwe. Napo bziri tenepo, Pedru adalatiza lufoyi wanthuwo ndipo adawadandaulira mwakuwauza kuti: “Kungulani ndipo zungunukani kuti pikado zanu zipfudzidwe ndipo nthawe za mtsangalazo zibwere kucokera kwa Yahova.” (Mab. 3:14, 15, 17, 19) Pedru adalatiza kuti kukungula ndiko kumbacitisa kuti munthu omwe wacita pikado azungunuke ayai kuti acinje nzeru zace na bzicito bzace. Tenepo munthuyo ambayamba moyo upsa omwe umbakondwesa Yahova. Pedru adalatizambo kuti Yahova angadadzapfudza pikado za wanthuwo, ayai kuti angadacitisa kuti pikadozo zinyembereke. Mafala yamweya njakulimbikisa kwene-kwene thangwe yakulatiza kuti napo wanthu omwe acita pikado zikulu-zikulu angalekereredwe na Yahova! w24.08 12 ¶14

Tikakhulupira kuti Mulungu an’pfudza dzikoli tsapanopali, tin’dzawona lini kuti kukhala na kobiri ayai kukhala na bzinthu bzakuthupi n’kwakufunika kwene-kwene. Pa citsautso cikulu kobiri in’dzakhala iribe basa. Bibliya limbalewa kuti wanthu “an’dzathusa prata yawo mu mseu” thangwe an’dzazindikira kuti “ne prata yawo ne oro yawo bzin’dzawapulumusa lini pa ntsiku ya ukali bwa Yahova.” (Ezek. 7:19) M’mbuto mwa kufuna kukhala na kobiri zizinji, tin’funika kucita bzakusankhula bzomwe bzin’tithandiza kubzisamalira na kusamalirambo mabanja yathu ticipitiriza kutumikira Yahova. Bzingakhale lini bza nzeru kukhala na mangawa mazinji ayai kutanganidwa kwene-kwene na bzinthu bzakuthupi. Tin’funikambo kumbatcenkha kufuna kwene-kwene bzinthu bzomwe tinabzo. (Mat. 6:19, 24) Pomwe kuphampha kwa dzikoli kukufendera, ifepano tin’dzafunikira kusankhula kuthemba Yahova ayai kuthemba bzinthu bzomwe tinabzo. w24.09 11 ¶13-14

Ifepano tingakwanise kutcenkha bzinthu bzinango bzomwe bzingatifikise pa kucita pikado. Tsono napo bziri tenepo pana bzinthu bzinango bzomwe pangamale nthawe ikulu kwene-kwene kuti tibzikunde. Kumbukirani ciratizo ca mpostolo Pedru. Thangwe ra kugopa wanthu, iye adalamba Jezu katatu-kentse. (Mat. 26:69-75) Pedru akhawona ninga kuti akunda bvuto limwelire thangwe mwakukhwimika iye adapalizira bza Jezuyo mu Sinedriyo. (Mab. 5:27-29) Tsono pomwe padapita magole, iye adasiya kudya na wanthu omwe akhali lini Adjuda “thangwe akhagopa wanthu omwe akhadacita mgwatidwe.” (Agal. 2:11, 12) Bvuto la Pedru likhadabwerera pomwe. Pinango-pentse bvuto lacero likhalibe kumaliratu. Ifepano tingagumanembo na bvuto libodzi-bodziri. Tsono tingakwanise kulimbana na bvuto lomwe tinalo mwakutewezera malango ya Jezu yakuti: “Pitirizani kukhala mudapenya.” (Mat. 26:41) Napo kuti mukuwona ninga kuti mudalikunda kale bvutolo, pitirizani kutcenkha bzinthu bzomwe bzingakucitiseni kufika pa kulibwerezera pomwe. Pitirizani kucita bzinthu bzomwe bzidakuthandizani kuti mulikunde. — 2 Ped. 3:14. w24.07 18-19 ¶17-19

Palibe munthu omwe adacita kale bzizinji kuti athandize wanthu ninga momwe Jezu adacitira. Pomwe akhali pa dziko la pantsi pano, iye adaphatisa basa mphanvu yomwe akhanayo yakucita bzakudabwisa kuti athandize wanthu. (Luk. 9:12-17) Iye adapereka mphaso ikulu kwene-kwene mwa kupereka moyo wace thangwe ra ifepano. (Juw. 15:13) Pomwe Jezu adalamusidwa adapitiriza kutithandiza. Ninga momwe adapicirira, iye adakumbira Yahova kuti atipase mzimu wace wakucena kuti utipfunzise na kutitsangalaza. (Juw. 14:16, 17, mafala ya nyantsi; 16:13) Ndipo mwakuphatisa basa mitsonkhano ya gwere, Jezu akupitiriza kutipasa bzomwe tikufunikira kuti tikwanise kupfunzisa wanthu Bibliya pa dziko lentse la pantsi kuti akhalembo anyakupfunza wace. (Mat. 28:18-20) Mpostolo Paulo adanemba kuti pomwe Jezu adayenda kudzulu, iye “adapereka amuna ninga mphaso.” (Aef. 4:7, 8) Paulo adafotokoza kuti Jezu adapereka mphaso zimwezi na cakulinga cakuti zithandize gwere mu njira zakusiyana-siyana. (Aef. 1:22, 23; 4:11-13) Tsono amuna amwewa mbakuperewera ndipo nthawe zinango angaphonyembo. (Tiy. 3:2) Napo bziri tenepo, Mbuya wathu Jezu Kristu ambawaphatisa basa kuti atithandize. Iwo ni mphaso kwa ifepano. w24.10 18 ¶1-2

Davide adauza mwana wace Salomau kuti bzinthu bzimufambire bwino, iye akhafunika kupitiriza kubvera Yahova Mulungu. Bzakupasa ntsisi mpsakuti na kupita kwa nthawe Salomau adayamba kunamata mirungu inango. Yahova alibe kukomedwa na bzimwebzi ndipo iye adasiya kumupasa nzeru kuti atonge wanthu wa Mulungu mu njira yabwino na yacirungamo. (1 Ama. 11:9, 10; 12:4) Kodi tikupfunza ciyani? Kubvera kun’dzacitisa kuti bzinthu bzitifambire bwino. (Sal. 1:1-3) N’cadidi kuti Yahova angatipase lini cuma ayai ulemerero ninga momwe adacitira na Salomau. Tsono tikabvera Mulungu wathu, iye an’dzatipasa nzeru zomwe zin’dzatithandiza kucita bzakusankhula bzabwino. (Mim. 2:6, 7; Tiy. 1:5) Nfundo za m’Bibliya zomwe iye adatipasa zingatithandize pa nkhani yakusankhula basa, mapfunziro, masenzeka na momwe tingambaphatisire basa kobiri. Tikaphatisa basa nzeru za Mulungu pa moyo wathu ifepano timbakhotcerera uxamwali bwathu na iye ndipo tin’dzatambira moyo wakusaya kumala. (Mim. 2:10, 11) Timbakhala na axamwali wabwino ndipo banja lathu limbakhala lakukondwa. w24.11 10-11 ¶11-12

Abereki ana mipata yakusiyana-siyana kuti athandize wana wawo kubvesesa kuti n’thangwe ranyi an’funika kukhulupira Bibliya na Mulungu. Iwo angagumane mpata umweyu akambakazunga nawo ku mbuto yakukoyera bzinthu bzakusiyana-siyana yakucemeredwa muzeu. Imwepo mungalatize wana wanu bzinthu bzakale-kale ayai umboni bomwe mungagumane kumweko kuti muwathandize kutsimikizira kuti Bibliya ndacadidi. Kodi wana wanu ambadziwa kuti dzina la Mulungu limbagumanika pa mwala wakale-kale kwene-kwene omwe una magole 3000 wakucemeredwa Pedra Moabita (Mwala wa ku Moabe)? Mungawonembo cithunzi-thunzi ca mwalayu ku mbuto yakuwonesera bzinthu ku Likulu la pa Dziko Lentse la Mboni za Yahova ku Warwick, Nova Iorque. Mwala umweyu umbafotokozambo kuti Mambo Mesa wa ku Moabe adapandukira Ajirayeri. Bzimwebzi ndibzo bzomwe Bibliya limbalewa. (2 Ama. 3:4, 5) Mwana wanu akawona na maso yace kuti bzentse bzomwe Bibliya limbalewa mpsacadidi na bzakuthembeka, iye an’dzakhala na cikhulupiro cakulimba. w24.12 14 ¶4; 15 ¶6