Maio

Pomwe Yahova adatsudzula Ajirayeri ku ukapolo m’dziko la Edjipito, iye adaikha antsembe kuti ambatumikire pa tendi la mkonkhano. Alevi adasankhulidwa kuti ambacite mabasa manango pa tendi la mkonkhanolo. Kodi wale omwe akhatumikira pa tendi la mkonkhanolo na omwe akhakhala pafupi na tendi la mkonkhanolo akhasamaliridwa bwino kuposa anzawo? Ne! Wentse akhasamaliridwa mwakundendemerana thangwe Yahova alibe tsankhulo. Mjirayeri ali-wentse akhana mwayi wakukhala pa uxamwali bwakulimba na Yahova. Mwa ciratizo, Yahova adacitisa kuti Ajirayeri wentse akwanise kuwona bzinthu bzakudabwisa bzomwe bzikhali mtambo masikati na moto usiku bzomwe bzikhakhala padzulu pa tendi la mkonkhanolo. (Eki. 40:38) Mtambo ukayamba kufamba napo wale omwe akhakhala kutali na tendiro akhakwanisa kuuwona. Tenepo, mabanja yakhakwanisa kulongedza bzombo bzawo, kuzula matendi yawo acicoka pabodzi na anzawo. (Num. 9:15-23) Mwakundendemerana na bzimwebzi, ntsiku zino Yahova ambatifuna, ambatisamalira ndipo ambatikhotcerera bziribe basa komwe ifepano tingakhale. w24.06 4 ¶10-12

Davide akhali pa ngozi. Mwana wace Abisalomu akhafuna kumupha kuti iye akhale mambo. (2 Sam. 15:12, 13) Davide akhafunika kucoka ku Jeruzalemu mwakamfulumize! Pomwe atumiki wace akhacoka ku Jeruzalemu, Davide adauza Zadoki na antsembe winango kuti abwerere mu mzindamo kuti akhale ninga azondi kuti ambamuuze bzomwe Abisalomu akhafuna kucita. (2 Sam. 15:27-29) Iwo akhafunikira kucita bzinthu mwakucenjera. Davide adakumbira Zadoki na Husai, axamwali wace wakukhulupirikawa, kuti amuthandize pa bzomwe iye akhafuna kucita. (2 Sam. 15:32-37) Husai adanamizira kuti akhali ku mbali ya Abisalomu ndipo adapasa Abisalomuyo malango ya momwe angadaphatira Davide. Patsogolo pace, iye adauza Zadoki na Abiyatari bzomwe akhadauza Abisalomu. Bzimwebzi bzidapasa nthawe Davideyo kuti akwanise kuthawa. (2 Sam. 17:8-16) Ndipo bzidathandizambo kuti iye aleke kuphedwa. — 2 Sam. 17:21, 22. w24.07 4-5 ¶9-10

Atumiki winango wa Yahova ambacita thupo na pikado zomwe adacita m’mbuyo pomwe akhanati kubatizidwa ayai pomwe akhadabatizidwa kale. Tsono bzingakhale bwino kukumbukira kuti Yahova adapereka cakulombolera thangwe rakuti ambatifuna. Ndipo iye an’funa kuti tibvume mphaso imweyi. Yahova akutitsimikizira kuti ‘tikacezerana naye nkhani zathu,’ iye an’dzatilanga lini thangwe ra pikado zomwe tidacita m’mbuyo. Timbatenda kwene-kwene Pai wathu wa lufoyi, Yahova, thangwe rakuti ambakumbukira lini pomwe bza pikado zathu za m’mbuyo! Ndipo iye ambayebwa lini bzinthu bzabwino bzomwe timbacita. (Sal. 103:9, 12; Aheb. 6:10) Penu imwepo mudasunama thangwe ra bzomwe mudacita m’mbuyo, citani ciri-centse kuti mumbakumbukire bzomwe mukucita tsapano na bzomwe mun’dzakwanisa kucita kutsogolo. Imwepo mun’funika kukumbukira bzomwe mukucita tsapano na bzomwe mun’dzacita kutsogolo thangwe mungakwanise lini kucinja bzomwe mudacita m’mbuyo. Tsono imwepo mungatumbize Yahova na kumukondwesa tsapano, ndipo mungakumbukire tsogolo labwino lomwe iye adakupicirani. w24.10 8 ¶8-9

Pomwe mukuwerenga Bibliya, nthawe zinango imwepo mungasuname mukadziwa kuti pana bzinthu bzizinji bzomwe mun’funika kucinja. Mwa ciratizo, tindendemezere kuti: Lero pomwe mukhawerenga Bibliya mwagumana malango yomwe yakulatiza kuti Akristau an’funika lini kumbasankhulana. (Tiy. 2:1-8) Imwepo mwazindikira kuti mun’funika kucinja momwe mumbacitira bzinthu na wanthu winango ndipo mwasankhula kucita bzimwebzo. Mangwana yace imwepo mwawerenga malango yomwe yakulewa kuti mun’funika kucita mphole na bzomwe mumbalewa. (Tiy. 3:1-12) Imwepo mwazindikira kuti nthawe zinango mumbalewa lini mafala yabwino. Patsogolo pace, imwepo mwatsimikiza kuti mun’dzalewa mafala yabwino na yakulimbisa. Mkuxa wace pomwe mwawerenga Bibliya mwagumana malango yomwe yakulewa kuti mun’funika lini kukhala xamwali wa dziko. (Tiy. 4:4-12) Imwepo mwazindikira kuti mun’funika kucita mphole na bzomwe mumbawerenga, kuwona na kubva. Mtondo wace imwepo mungawone ninga kuti mpsakunesa kuphatisa basa malango yentseneya. Tsono Lekani kubwerera mbuyo. Kumbukirani kuti ‘kubvala unthu bupsa’ kumbacitika lini kabodzi na kabodzi. w24.09 5-6 ¶11-12

Jezu akhadziwa kuti Yahova akhawona kuti akucitiridwa bzinthu mwakusaya cirungamo. Iye akhakhulupira kuti Yahova angadadzamalisa bzinthu bzakusaya cirungamo pa nthawe yace. Tingatewezere Jezu mwa kucita mphole na bzomwe tingalewe tikacitiridwa bzinthu mwakusaya cirungamo. Bzinthu bzinango bzomwe tingacitiridwe bzingakhale bzing’ono, tenepo bzingakhale bwino kundobzisiya tenepo. Ayai tingasankhule kunyamala kuti bzinthu bzileke kulemweratu. (Mpal. 3:7; Tiy. 1:19, 20) Nthawe zinango tingafunike kulewalewa tikawona bzinthu bzakusaya cirungamo bzikucitika ayai kuti tikhotcerere cadidi. (Mab. 6:1, 2) Penu tikuwona kuti mpsabwino kulewalewa, tingacite bwino kulewalewa mwakuderekha na mwaulemu. Tingatewezerembo Jezu mwa kusiya bzentse m’manja mwa “Ule omwe ambatonga mwacirungamo.” — 1 Ped. 2:23. w24.11 5-6 ¶10-12

Munthu omwe wacita pikadoyo akakungula timbakomedwa kwene-kwene! (Luk. 15:7) Mbani omwe an’funika kutumbizidwa thangwe ra bzimwebzi? Napo kuti akulu ambacita nyongo yakuthandiza munthu kuti akungule, mbani omwe ambathandizadi munthuyo kuti afike pa kukungula? Onani bzomwe mpostolo Paulo adalewa pakulewa bza anyapikado. Iye adati: “Pinango Mulungu angawapase mtima wakukungula.” (2 Tim. 2:25) Yahova ndiye omwe ambathandiza munthu kucinja makumbukidwe yace na makhalidwe yace sikuti wanthu. Paulo adafotokoza bzinthu bzabwino bzomwe bzimbacitika pambuyo pa munthuyo kukungula. Munthuyo angakwanise kudziwa cadidi caico, “angakwanise kuzindikira, acipulumuka pa diwa la Dyabu.” (2 Tim. 2:26) Munthu akakungula, akulu ambapitiriza kuzungira munthuyo kuti amuthandize kupitiriza kukhala wakulimba m’cikhulupiro na kumuthandiza kupitirizambo kukunda misampha ya Sathani acicita bzomwe mpsabwino. — Aheb. 12:12, 13. w24.08 23 ¶14-15

Wanthu omwe adadyesedwa na Jezu wale akhandofuna bzinthu bzakuthupi bzokha. Thangwe ranyi tikulewa tenepo? Thangwe mangwana yace iwo adafika pa mbuto yomwe adadyesedwa na Jezu pale, tsono iwo alibe kugumana Jezu na anyakupfunza wace. Tenepo iwo adapakira mimwadiya yomwe ikhadafika kucokera ku Tiberiya aciyenda ku Kafarnau kuti akanyang’ane Jezu. (Juw. 6:22-24) Kodi iwo adacita bzimwebzi thangwe rakuti akhafuna kudziwa bzizinji pakulewa bza Umambo? Ne. Iwo akhandofuna kuti Jezu awapase pomwe pau. Kodi tikudziwa tani bzimwebzi? Onani bzomwe bzidacitika pomwe wanthuwo adagumana na Jezu pafupi na ku Kafarnau. Jezu adawauza kuti iwo akhamunyang’ana thangwe rakuti akhafuna cakudya. Iye adazindikira bzimwebzi ‘thangwe rakuti wanthuwo akhadadya pau acikhuta.’ Tsono cimweci cikhali “cakudya comwe cimbamala.” Ndipopa iye adawalimbikisa kuti aphatire “basa cakudya comwe cimbamala lini comwe cimbatsogolera ku moyo wakusaya kumala.” (Juw. 6:26, 27) Ndipo iye adawauzambo kuti Pai wace angadawapasa cakudya cimweci. w24.12 5 ¶8-9

Abale, Kuti mukhale mpfunzisi wabwino, mbaphatisani basa Bibliya nthawe zentse pomwe mukupfunzisa na pomwe mukupereka malango. Kuti mukwanise kucita bzimwebzi, imwepo mun’funika kumbapfunza Bibliya pabodzi na mabukhu yathu. (Mim. 15:28) Pomwe mukupfunza, khalani tceru kuti muwone penu mukuphatisa basa bwino nfundo zomwe mukupfunzazo. Pomwe mukupfunzisa citani nyongo yakuthandiza wanthu kufuna kwene-kwene Yahova na kuwalimbikisa kuti ambaphatise basa bzomwe akupfunzabzo. Imwepo mungakhalembo mpfunzisi wabwino mukambakumbira na kuphatisa basa bwino malango yomwe akulu wa nzeru angakupaseni. (1 Tim. 5:17) Akulu an’funika kulimbikisa abale na mpfumakazi zawo. Tsono nthawe zinango an’funikambo kuwapasa malango na kuwatsimula. Pomwe akucita bzimwebzi, akulu an’funika kukhala wakudeka mtima. Imwepo mukambalewalewa bwino na mwa lufoyi na kuphatisa basa bwino Fala la Mulungu pakupfunzisa, mun’dzakhala mpfunzisi wabwino thangwe mun’dzakhala mukutewezera Mpfunzisi Mkulu, Jezu Kristu. — Mat. 11:28-30; 2 Tim. 2:24. w24.11 24 ¶16

Wanthu wa Yahova akuuzidwa kuti “aimbire Yahova,” “atumbize dzina lace,” “adziwise wanthu mafala yabwino yacipulumuso” na “kudziwisa bza ulemerero pakati pa mitundu ya wanthu.”(Sal. 96:1-3) Zimwezi ni njira zakusiyana-siyana za momwe tingaperekere ulemerero kwa Baba wathu wa kudzulu. (Mab. 4:29) Ifepano tingaperekembo ulemerero kwa Yahova na bzinthu bzathu. Kuyambira kale-kale, atumiki wacadidi wa Yahova ambapereka ulemerero kwa iye mwa njira imweyi. (Mim. 3:9) Ajirayeri adacita bzakupereka kuti templo imangidwe ndipo adacitambo bzakupereka kuti akonzembo bzinthu bzomwe bzikhadadzongeka mu templomo. (2 Ama. 12:4, 5; 1 Nkha. 29:3-9) Anyakupfunza winango wa Jezu adacita bzakupereka kuti Jezuyo na apostolo wace ‘agumane bzinthu bzomwe akhafunikira.’ (Luk. 8:1-3) Akristau wakuyambirira adacitambo bzakupereka kuti athandize abale na mpfumakazi zawo omwe akhadagwedwa na njala. (Mab. 11:27-29) Ntsiku zino, ifepano tingambaperekembo ulemerero kwa Yahova tikambacita bzakupereka. w25.01 4 ¶8; 5 ¶11

Kodi n’ciyani cidathandiza Korneliyo kuti abatizidwe? Bibliya limbalewa kuti iye “[akhagopa] Mulungu pabodzi na wanthu wentse wa m’banja mwace.” Ndipo iye akhambacita mipembo yakudandaulira Mulungu. (Mab. 10:2) Pomwe Pedru adapalizira mafala yabwino Korneliyo, Korneliyoyo pabodzi na banja lace adakhulupira Kristu ndipo alibe kucedwa kubatizidwa. (Mab. 10:47, 48) Kulewa cadidi, Korneliyo akhali wakukonzeka kucinja bzinthu pa moyo wace kuti anamate Yahova pabodzi na banja lace. (Djos. 24:15; Mab. 10:24, 33) Korneliyo angadafuna angadalekerera kuti udindo bomwe akhanabo bumutazise kukhala Mkristau. Tsono iye alibe kulekerera kuti bzimwebzi bzicitike. Kodi pana bzinthu bzinango bzomwe imwepo mun’funikira kucinja pa moyo wanu kuti mubatizidwe? Penu ndibzo, dziwani kuti Yahova an’dzakhala Mthandizi wanu. Iye an’dzakusimbani mukatsimikiza kuphatisa basa mitemo ya m’Bibliya pa moyo wanu na kumutumikira. w25.03 5 ¶12-13

Imwepo mukabva bzinthu bzakuipa pakulewa bza gulu lathu ayai abale omwe akutsogolera, kumbukirani momwe anyamadulanthaka wathu adaboneresera Jezu pabodzi na Akristau wakuyambirira. Jezu adalewa kuti wanthu angadadzatsutsa wale omwe ambatumikira Yahova ndipo angadalewa bzinthu bzakunama pakulewa bza iwo ndipo bzimwebzi ndibzo bzomwe bzikucitika ntsiku zino. (Mat. 5:11, 12) Tin’dzakhulupira lini nkhani zakunama tikakumbukira mbani omwe akubzicitisa ndipo tin’dzacita ciri-centse kuti tibzikhotcerere. Kodi tingabzikhotcerere tani? Lekani kubvuma kunamizidwa na nkhani zakunama. Mpostolo Paulo adalewa bzomwe tin’funika kucita tikabva nkhani zakunama. Iye adauza Timotio kuti ‘apereke malango yamphanvu kwa wanthu winango kuti aleke . . . kubvesera nkhani zakunama’ nakuti ‘alambe nkhani zakunama.’ (1 Tim. 1:3, 4) Timbalamba nkhani zakunama thangwe timbakhala tikudziwa komwe nkhanizo zikucokera. M’mbuto mwace, timbabva “mafala yabwino” yacadidi. — 2 Tim. 1:13. w24.04 13 ¶16; 13 ¶17

Pitirizani kukhala wakuphatana na wale omwe mbakukhulupirika kwa Yahova. Yahova akufuna kuti tikhale wakuphatana pomwe tikumunamata. Tikaphatisisa cadidi tin’dzakhala wakuphatana. Munthu omwe wapambuka pa cadidi ambacitisa kuti mu gwere mukhale na “magawano.” Ndipopa Yahova akuticenjeza kuti “mbawatcenkhani.” Tikasaya kucita bzimwebzi, ifepano tingapambuke pa cadidi. (Aro. 16:17) Tikazindikira cadidi ticiciphatisisa timbapitiriza kukhala wakulimba mwauzimu. (Aef. 4:15, 16) Tin’dzanamizidwa lini na bzipfunziso bzakunama pabodzi na nkhani zakunama za Sathani ndipo tin’dzapitiriza kukhala wakukhotcerereka m’manja mwa Yahova pa nthawe ya citsautso cikulu. Pitirizani kuphatisisa cadidi ndipo “Mulungu wa mtendere an’dzakhala namwe.” — Afil. 4:8, 9. w24.07 13 ¶16-17

Jezu akhathandiza wale omwe akhabonera thangwe ra pikado ndipo akhawacemera kuti akhale ateweri wace. Jezu akhadziwa kuti thangwe likulu lomwe likhacitisa kuti wanthu abonere ni pikado. Ndipopa iye akhacita bzomwe angakwanise kuti athandize amuna na akazi omwe akhabonera thangwe ra pikado yomwe iwo akhadacita. Pa nthawe inango, iye adafotokoza bzimwebzo mwakuphatisa basa ciratizo. Iye adalewa kuti: “Wanthu wathanzi labwino ambafunikira lini dotolo, koma wale omwe akuduwala ndiwo ambafunikira.” Ndipo adalewa pomwe kuti: “Ine ndiribe kubwerera anyakulungama, koma anyakucita pikado.” (Mat. 9:12, 13) Bzimwebzi ndibzo bzomwe Jezu adacita. Iye adalatiza kudeka mtima ndipo adalekerera pikado za mkazi omwe adatsuka minyendo yace na misozi. (Luk. 7:37-50) Iye adapfunzisa cadidi ca m’Bibliya cakufunika kwene-kwene kwa mkazi wa ku Samariya napo kuti akhadziwa kuti iye akhakhala na mwamuna omwe akhali lini bayace. (Juw. 4:7, 17-19, 25, 26) Ndipo Mulungu adapasa Jezu mphanvu yakumalisa infa yomwe imbabwera thangwe ra pikado. Mwa njira iponi? Jezu adacita bzimwebzo mwa kulamusa amuna, akazi na wana. — Mat. 11:5. w24.08 4 ¶9-10

Kodi Yahova an’dzacita ciyani kutsogoloku kuti dzina lace lipasidwe ulemerero? Iye an’dzatonga mwacirungamo. Tsapanopali iye an’pfudza magereja yentse yakunama thangwe rakuti yambapswipiza dzina lace. (Apok. 17:5, 16; 19:1, 2) Wanthu winango omwe an’dzawona kupfudzidwa kwa magereja yakunama angadzafune kuphatana nafe pa kunamata kwacadidi. Ndipo pa Armagedo, Yahova an’dzapfudza wanthu wentse wakuipa omwe ambapswipiza dzina lace acipulumusa wanthu omwe ambamufuna, ambamubvera na kupereka ulemerero pa dzina lace. (Mar. 8:38; 2 Ates. 1:6-10) Pambuyo pa mayezo yakumalizira kuphampha kwa Magole 1000 ya Utongi bwa Kristu, Yahova an’dzakhala wacenesa dzina lace. (Apok. 20:7-10) Pa nthawe imweyo, “dziko la pantsi lin’dzadzala na cidziwiso ca ulemerero bwa Yahova, ninga momwe madzi yambadzazira nyanza.” (Hab. 2:14) Bzin’dzakhala bzakudekeza kwene-kwene wanthu wentse akadzapereka ulemerero bwa kuthemera kwa Yahova thangwe dzina lace! w25.01 7 ¶15-16

N’ciyani comwe cingadathandiza Akristau wacihebereu kupitiriza kupirira napo kuti akhazunzidwa? Mpostolo Paulo akhafunisisa kuwathandiza kubvesesa phindu lomwe angadakhala nalo thangwe ra kupirira mabvuto. Ndipopa, iye adawafotokozera kuti Mulungu angalekerere kuti Mkristau agumane na mabvuto kuti amukonzekerese. Mabvutoyo yangamuthandize kukulisa makhalidwe yomwe Yahova ambakomedwa nayo. Akristau wacihebereuwo angadakumbukira phindu lomwe angadakhala nalo thangwe ra kupirira mabvuto, bzingadakhala bzakupusa kwa iwo kupirira mabvutoyo. (Aheb. 12:11) Mpostolo Paulo adalimbikisa Akristau wacihebereu kuti akhafunika kukhala wakukhwimika acileka kubwerera m’mbuyo pomwe akugumana na mabvuto. Pauloyo akhali wakuthemera kuwapasa malango yamweya. Iye akhadazunzambo kale Akristau, ndipopa akhadziwa bwino bzomwe iwo akhagumana nabzo. Ndipo pomwe iye adakhala Mkristau, adagumanambo na mazunzo yakusiyana-siyana. — 2 Ako. 11:23-25. w24.09 12-13 ¶16-17

Ntsiku iri-yentse basa lathu lakupalizira likukhala lakufunika kwene-kwene. Thangwe ranyi? Thangwe rakuti cimaliziro casala pang’ono kufika. Onani bzomwe Jezu adalewa bza basa lakupalizira mu ntsiku zakumalizira zino ninga momwe Marko 13:10 ambalewera. Mwakubverana na bukhu la Mateu, Jezu adalewa kuti mafala yabwino yangadadzapaliziridwa pa dziko lentse la pantsi pomwe “cimaliziro” cikanati kufika. (Mat. 24:14) Fala limweri lakuti cimaliziro limbathandauza kupfudzidwa kwa dziko la Sathaniri. Yahova adaikha “ntsiku na nthawe” yomwe bzimwebzi bzin’dzacitika. (Mat. 24:36; Mab. 1:7) Ntsiku iri-yentse ikapita ntsiku imweyi imbakhala ikufendera. (Aro. 13:11) Pomwe ntsikuyo ikanati kufika tin’funika kucita nyongo yakupalizira mpaka kuphampha. Tikambakumbukira bza basa lathu lakupalizira, tingambabzibvunze kuti: Thangwe ranyi timbapalizira mafala yabwino ya Umambo? Mwacigwatho, lufoyi ndiro lomwe limbaticitisa kuti tipalizire. Tikambapalizira timbalatiza kuti timbafuna mafala yabwino, timbafuna wanthu ndipo kuthumizira bzentse timbafuna Yahova pabodzi na dzina lace. w24.05 14-15 ¶2-3

Abereki, limbikisani wana wanu kuti ambakumbukire bzinthu bzakudabwisa bza m’cirengedwe. Mukakhala mukufamba na wana wanu ku mbuto inango yakudeka, athandizeni kuwona bzomwe angapfunze na bzinthu bza m’cirengedwe. Thangwe ranyi? Thangwe bzinthu bzimwebzi bzimbalatiza kuti pana munthu omwe adabzilenga. Imwepo mukawona jirasoli, cibade ca nkhono, masamba ya miti minango pabodzi na mawonekedwe ya migwala ya nzou, mun’dzawona kuti bzimwebzi bzina mawonekedwe yakudabwisa kwene-kwene. Masiyentista yakupfunza bzimwebzi kuyambira kale-kale. w24.12 16 ¶7

Mozeji, Davide na Juwau adakhala mu nthawe yakusiyana na yathu ndipo moyo wawo udakhalambo wakusiyana na wathu. Tsono tidandendemerana nawo pa bzinthu bzizinji. Iwo adatumikira Mulungu wacadidi ndipo ifepano timbatumikirambo Mulungu wacadidi. Ninga iwo, ifepano timbapemba kwa Yahova ndipo timbathemba iye kuti atipase malango. Ndipo ninga amuna wacikulirewa ifepanombo timbakhulupira kuti iye ambasimba wale omwe ambamubvera. Tenepo bwerani titeweze malango yomwe amuna wacikulirewa adayalewa mwakubvera malamulo ya Yahova. Tikacita bzimwebzi, bzinthu bzin’dzatifambira bwino pa cinthu ciri-centse comwe tin’dzacita. Tin’dzakhala na moyo “utali,” inde, mpaka kale-kale! Ndipo tin’dzakhala wakukondwa thangwe ra kudziwa kuti tikukondwesa Baba wathu wakudzulu Yahova omwe an’dzatisimba mu njira yomwe tingaidikhirire lini. — Aef. 3:20. w24.11 13 ¶20-21

Mu nthawe ya Akristau wakuyambirira, abale winango adasankhulidwa kuti akhale atumiki wakuthandiza. (1 Tim. 3:8) Bzikuwoneka kuti ndiwo omwe akhacita “mabasa yakuthandiza” ninga momwe Paulo adalewera. Bzikuwoneka kuti atumiki wakuthandiza akhambacita mabasa mazinji yakufunika. Bzimwebzi bzikhathandiza akulu kuti akwanise kucita mabasa yawo yomwe njakupfunzisa na kusamalira mabira ya Mulungu. Mwa ciratizo, atumiki wakuthandiza akhakopiyari Bzinembo na kugula bzinthu bzomwe bzikhafunikira kuti basa la kukopiyarilo licitidwe. Onani mabasa manango yomwe atumiki wakuthandiza ambacita m’gwere mwanu. (1 Ped. 4:10) Iwo ambacita basa lakusamalira kobiri za gwere ayai magawo, kukumbira na kupereka mabukhu kwa abale, basa la kuikha maaudiyo na mavidiyo pa mitsonkhano ya gwere, kukhala alatizi ayai kukonza bzinthu bzomwe bzadzongeka mu Nyumba ya Umambo. Mabasa yentseneya njakufunika kuti bzinthu bzifambe bwino m’gwere. — 1 Ako. 14:40. w24.10 19 ¶4-5

Ifepano tingakunde mabvuto mang’ono ayai makulu tikambakumbukira kuti Yahova ni Mulungu wamoyo ndipo nthawe zentse ngwakukonzeka kutithandiza. Cadidi n’cakuti iye ni Mulungu Wamphanvu-zentse ndipo angatipase mphanvu zomwe kuti tikunde mabvuto yali-yentse yomwe tingagumane nayo. Tikambawona Yahova akutithandiza pa bzinthu bzing’ono timbakhala na citsimikizo cakuti iye an’dzatithandizambo pa bzinthu bzakunesa. Onani bzakucitika bziwiri bzomwe bzidathandiza Mambo Davide kupitiriza kuthemba Yahova. Pomwe Davide akhali tswaka ndipo akhausa mabira ya pai wace, cimbalangondo na mphondolo bzidaphata mwana wa bira. Pa bzakucitika bziwiribzi, Davide adapulumusa mwana wa birayo. Tsono, Davide alibe kukumbuka kuti adakwanisa kucita bzimwebzire thangwe ra mphanvu zace. Iye adadziwa kuti Yahova ndiye omwe adamupasa mphanvu na kukhwimika kuti akwanise kucita bzimwebzire. (1 Sam. 17:34-37) Kukumbukira bzimwebzi kudacitisa kuti Davide athembe Yahova na kudziwa kuti iye an’dzapitiriza kumuthandiza kutsogolo. w24.06 21 ¶5-6

Tiyezezere kuti mwacemeredwa ku festa. Kodi imwepo mungayende ku festako? Penu mumbamudziwa lini bwino-bwino munthu omwe wakucemerani ku festayo ayai mukudziwa lini bwino-bwino bzomwe bzin’kacitika kumweko, mungabvunze munthu omwe wakucemeraniyo mibvunzo ninga iyi: “Kodi festayo in’dzacitikira kuponi ndipo in’dzacitika lini? Kodi ni wanthu angasi omwe an’dzakhala alipo pa festapo? Mbani omwe an’dzanyang’anira festayo? Mbani omwe an’dzakhala alipo pa festapo? N’ciyani comwe cin’dzacitika pa festapo? Kodi pa festapo pan’dzamwedwa?” Mitawiro ya mibvunzo imweyi in’dzakuthandizani kuti mucite bzakusankhula bzanzeru. Mukakhala na mitawiro ya mibvunzo yentseneyi mun’dzakwanisa kubvesesa momwe bzinthu bzingadzakhalire pa festayo. Tsono tani penu mwadziwa kuti pa festapo pan’dzabwera wanthu omwe ambabvera lini mitemo ya m’Bibliya ayai kuti pan’dzakhala palibe munthu wakunyang’anira wanthu kuti aleke kumwa kwene-kwene? Kodi mukukwanisa kuwona ngozi yomwe ingakhale iripo pamwepa? (1 Ped. 4:3) Mukakwanisa kubvesesa nkhani yentse bzin’dzakhala bzakupusa kuti mucite cakusankhula ca nzeru. w25.01 15 ¶4-5

Mwakuphatisa basa ntsembe ya cakulombolera, Yahova ambapfudza pikado za wale omwe ambalatiza kukungula. Mpsakunesa kwene-kwene kucosa mulopa pa cakubvala. Na ciratizoci, Yahova akutitsimikizira kuti pikado zathu zingatsukidwe zicicena mwakuti zingawoneke lini pomwe. Pikado imbandendemezeredwa na “mangawa.” (Luk. 11:4; Mat. 6:12) Tenepo, mangawa yathu yambathimizirika tikapitiriza kucita pikado. Tina mangawa mazinji kwene-kwene na iye! Tsono Yahova akatilekerera pikado zathu bzimbakhala ninga kuti wamalisa mangawa yomwe tikhanayo yomwe tikhafunikira kupagali. Iye ambakumbusa lini pomwe pikado yomwe adailekerera kale. Ninga momwe munthu ambakhalira wakukondwa akalekereredwa mangawa yace, ifepanombo timbakhala wakukondwa Yahova akatilekerera pikado zathu! w25.02 9-10 ¶9-10

Abereki akakalamba iwo angafune kuti wana wawo awathandize mwa kuwapasa kobiri ayai bzinthu bzinango, ndipo wana azinji ambakomedwa kucitira bzimwebzi abereki wawo. (1 Tim. 5:4) Tsono abereki omwe ambathemba Yahova ambazindikira kuti an’dzakhala wakukondwa kwene-kwene akathandiza wana wawo kutumikira Yahova m’mbuto mwa kuwapfunzisa na cakulinga cakuti kutsogolo adzagumane kobiri kuti adzawasamalire. (3 Juw. 4) Pomwe mukuthandiza wana wanu momwe angadzabzisamalirire kutsogolo, alatizeni kuti imwepo mumbathemba Yahova. Pomwe iwo akali ang’ono apfunziseni kufunika kwa kumbaphata basa na nyongo. (Mim. 29:21; Aef. 4:28) Pomwe akukula athandizeni kuti ambacite bwino bzinthu ku xikola. Abereki angafufudze nfundo za m’Bibliya zomwe zingathandize wana wawo kusankhula bwino mapfunziro yomwe angadzacite. Cakulinga ca abereki n’cakuthandiza wana wawo kuti adzakwanise kubzisamalira acikhalambo na nthawe yakupalizira ayai kukhala apainiya. w25.03 30-31 ¶15-16

Mu kapitulo 65 ya Zaiya Yahova adalewa momwe wanthu omwe angadabvuma kupitiriza kukhala m’paraizo wauzimu angadadzakhalira. Profesiya imweyi idakwanisika kakuyamba mu gole la 537 AEC. Pa nthawe imweyi, Adjuda omwe akhadakungula adatsudzulidwa ku ukapolo ku Babiloniya ndipo adabwerera ku mui kwawo. Yahova adasimba na kuthandiza wanthu wace kumanga pomwe mzinda wakudeka wa Jeruzalemu pabodzi na templo yomwe ikhali likulu lakunamata kwacadidi ku Jirayeri. (Zai. 51:11; Zak. 8:3) Kukwanisika kwa ciwiri kwa profesiya ya Zaiyayi kudayamba mu gole la 1919 EC, pomwe anamati wapsa wa Yahova adatsudzulidwa ku ukapolo bwa Babiloniya mkulu. Patsogolo pace, paraizo wauzimu adayamba kukula. Apalizi Wanyongo wa Umambo adakhazikisa magwere mazinji ndipo adalatiza makhalidwe yabwino yauzimu. Amuna na akazi omwe pakuyamba akhacita bzinthu bzakuipa ‘adabvala unthu bupsa bomwe budalengedwa mwakubverana na kufuna kwa Mulungu.’ w24.04 20-21 ¶3-4

M’madziko manango abereki ayai akulu-akulu ndiwo omwe ambasankhulira famidya yawo munthu omwe angalowolane naye. Ndipo m’madziko manango abereki ayai azixamwali ndiwo omwe ambanyang’anira mwanzawoyo munthu omwe angalowolane naye ndipo patsogolo pace awiriwo ambapangana kuti agumane mbuto inango kuti awone penu mpsakuthemera kuyamba umakhadzi ayai ne. Penu imwepo mungakumbiridwe kuti muthandizire malowozi ayai umakhadzi, cakuyamba mbazindikirani bzomwe awiriwo akufuna na bzomwe akufunikira. Ndipo mukawona kuti munthu munango angathemere kulowolana na xamwali wanu ayai famidya yanu, cakuyamba mudziweni bwino munthuyo, makhalidwe yace na uxamwali bomwe iye anabo na Yahova. Kukhala pa uxamwali bwakulimba na Yahova ni cinthu cakufunika kwene-kwene kuposa kobiri, mapfunziro ayai udindo bomwe tingakhale nabo. Kumbukirani kuti wanthu awiri omwe akanati kulowolanawo ndiwo omwe an’funika kucita cakusankhula cakuti angalowolane ayai ne. w24.05 23 ¶11

Tingathandizire wanthu omwe ali pa umakhadzi na bzomwe ifepano timbalewa. Nthawe zinango timbafunikira kubziphata ticileka kulewa cinthu. (Mim. 12:18) Mwa ciratizo, pinango tingafune kuuza wanthu winango kuti wanthu awiri ali pa umakhadzi pomwe wanthuwo akufuna lini kulewako. Tin’funika lini kulewa kuipa wanthu omwe ali pa umakhadzi ayai kupitira nkhani zawo. (Mim. 20:19; Aro. 14:10; 1 Ates. 4:11) Kuthumizira bzimwebzi, tin’funika lini kulewa bzinthu ayai kucita mibvunzo yomwe ingacitise kuti wanthu omwe ali pa umakhadziwo alowolane mwakamfulumize. Tsono tani penu wanthu awiri omwe ali pa umakhadzi awona kuti bziri bwino kumalisa umakhadzibo? Tin’funika kutcenkha kuwacita mibvunzo ayai kuwapasa mulandu. (1 Ped. 4:15) Penu wanthu awiri asankhula kumalisa umakhadzi tin’funika lini kulewa kuti iwo aphonya kucita bzimwebzo. Tingalewe kuti umakhadzibo bwakwanirisa cakulinga cace comwe n’kuthandiza wanthu awiriwo kuti acite cakusankhula. Dziwani kuti cakusankhula cimweci pinango cidawacitisa kuti akhale wakusunama. Ndipopa tin’funika kunyang’ana njira za momwe tingawathandizire. w24.05 31 ¶15-16

Bvuto libodzi lomwe lingakhale lakunesa kulipirira ni pomwe munthu wa m’banja mwathu ayai xamwali wathu wasiya kutumikira Yahova. (Sal. 78:40) Imwepo mukakhala mumbamufuna kwene-kwene munthuyo, bzimbawawa ndipo bzimbakhala bzakunesa kupirira. Penu bzimwebzi bzidakucitikiranimbo kale, bzomwe Davide na Zadoki adacita bzingakulimbiseni. Zadoki adapitiriza kukhala wakukhulupirika kwa Yahova pomwe xamwali wace Abiyatari adasiya kukhala wakukhulupirika. Bzimwebzi bzidacitika pomwe Davide akhadakalamba. Pa nthawe imweyi, mwana wace Adoniya adayezera kubzikhalisa mambo napo kuti Yahova akhadasankhula kale Salomau. (1 Nkha. 22:9, 10) Abiyatari adakhala ku mbali ya Adoniya. (1 Ama. 1:5-8) Mwakucita bzimwebzi, Abiyatari adasiya kukhala wakukhulupirika kwa Davide, Zadoki na kwa Yahova! Zadoki na Abiyatariyo akhadamala magole yakupitirira 40 akuphata basa pabodzi ninga antsembe. — 2 Sam. 8:17; 15:29; 19:11-14. w24.07 6 ¶14-15

Tikapitiriza kukhala tidapenya kuti titcenkhe kucita pikado, bzinthu bzin’dzatifambira bwino. Napo kuti kucita pikado kungaticitise kukhala wakukondwa mu “nthawe yakucepa,” koma kubvera malamulo ya Yahova kun’dzaticitisa kukhala wakukondwa mpaka kale-kale. (Aheb. 11:25; Sal. 19:8) Tikulewa tenepo thangwe tidalengedwa kuti timbateweze malamulo yace. (Gen. 1:27) Tikakhala na moyo omwe umbakondwesa Yahova timbakhala na cikumbu-mtima cakucena ndipo kutsogolo tin’dzakhala na moyo wakusaya kumala. (1 Tim. 6:12; 2 Tim. 1:3; Djuda 20, 21) N’cadidi kuti “thupi ndakutepa.” (Mat. 26:41) Tsono bzimwebzi bzikuthandauza lini kuti palibe bzomwe tingacite kuti tikunde bvuto lomwe tinalo. Yahova ngwakukonzeka kutipasa mphanvu. (2 Ako. 4:7) Kumbukirani kuti ni mphanvu yakuposa yacibadwa yomwe Mulungu ambatipasa. Ifepanombo tin’funika kucita bzentse bzomwe tingakwanise kuti tikwanise kukunda bvuto lomwe tinalo. Yahova an’dzatawira mipembo yathu ndipo an’dzatipasa mphanvu. (1 Ako. 10:13) Na thandizo la Yahova tingapitirize kukhala tidapenya ticitcenkha kucita pikado. w24.07 19 ¶19-21

Mpostolo Paulo adanembera Timotio omwe akhali mkulu mwanzace mafala ya mu vesi la lero kuti atsimule “wanthu omwe [akhacita] pikado” pa maso pa wentse. Kodi iye akhafuna kulewanyi? Iye akhafuna lini kulewa kuti gwere likhafunika kudziwa nkhaniyo. M’mbuto mwace, iye akhalewa bza wanthu omwe “akhadziwa” bza pikadoyo. Angakhale wale omwe adacita kuwona ayai angakhale wale omwe adacita kuuzidwa na munthu omwe adacita pikadoyo. Akulu angandouze wanthu amwewa basi kuti munthu omwe wacita pikadoyo wathandizidwa. Nthawe zinango, abale ambakhala akudziwa kuti munthu wacita pikado ikulu ayai iwo angadzadziwe na kupita kwa nthawe. Bzikakhala bziri tenepo, gwere lentse lin’funika ‘kudziwisidwa.’ Mkulu angapereke cidziwiso ca cigwatho cakulewa bza kutsimulidwa kwa munthuyo mu gwere. Thangwe ranyi? Paulo akutawira kuti: “Kuti likhale cenjezo kwa winango” kuti aleke kucita pikado. w24.08 23-24 ¶16-17

Ifepano tin’funika kukhala wakutanganidwa na basa la Yahova mpaka kuphampha. Akristau wakudzozedwa an’funika kupitiriza kukhala wakupenya mwauzimu kuti ‘adzatengedwe’ na Jezu kuti akatambire mabaibai yawo kudzulu. (Mat. 24:40) Anyakudzozedwa akudikhirira na mtima wentse nthawe yomwe ‘an’dzatsonkhanisidwa’ pabodzi na Jezu kudzulu. Ndipo nkhondo ya Armagedo ikadzamala, iwo an’dzakhala anamwali wa Jezu pa phwando la malowozi ya Mwana wa Bira. (2 Ates. 2:1) Nthawe yakuti Jezu atonge wanthu iri pafupi kwene-kwene, tsono ifepano tin’funika lini kucita mantha. Tikapitiriza kukhala wakukhulupirika, Baba wathu wakudzulu Yahova an’dzatipasa “mphanvu yakuposa yacibadwa” kuti “[tidzakwanise] kuima pamaso pa Mwana wa munthu.” (2 Ako. 4:7; Luk. 21:36) Bziribe basa penu cidikhiro cathu n’cakudzakhala kudzulu ayai pa dziko la pantsi pano, ifepano tin’dzakondwesa Baba wathu Yahova tikatetekera mcenjezo omwe umbagumanika m’bziratizo bza Jezu. Thangwe ra kudeka mtima kukulu kwa Yahova, madzina yathu ‘yan’dzakhala yadanembedwa m’bukhu la moyo.’ — Dan. 12:1; Apok. 3:5. w24.09 24-25 ¶19-20

Imwepo mungabve bwino mu mtima mwanu mukathandizidwa na Fala la Mulungu, Bibliya. Mwa njira iponi? Mbakumbukirani bzisimbo bzomwe Yahova ambakupasani bzomwe bzimbaphatanidza kufunidwa na iye ndipo mbakumbukiranimbo kuti wanthu omwe ambamutumikira lini alibe bzisimbo bzimwebzi. Iwo ambandothemba bzinthu bzomwe anabzo ndipo alibe cidikhiro ca kutsogolo. Tsono kuthumizira pa bzinthu bzabwino bzomwe Yahova ambakupasani tsapano, imwepo mukudikhirirambo kudzatambira bzinthu bzinango bzabwino kwene-kwene kutsogoloku bzomwe pinango ne mukanati na kubzikumbukirako. (Sal. 145:16) Ndipo kumbukiranimbo ibzi: Mukudziwa lini momwe moyo wanu ungadakhalira tsapano bzingadakhala kuti mwacita cakusankhula cakusiyana na comwe mudacitaco. Tsono comwe mungatsimikizire n’cakuti: Mukacita cakusankhula thangwe rakuti mumbafuna Mulungu na wanthu, nthawe zentse mun’dzakhala na bzinthu bzomwe bzin’dzakucitisani kuti mukhale wakukondwa pa moyo wanu. w24.10 27 ¶12-13