Junho

Pana bzisimbo bzizinji bzomwe timbakhala nabzo ntsiku zino thangwe ra cakulombolera ca Jezu. Cisimbo cibodzi n’cakuti ntsembe ya cakulombolera ya Jezu imbacitisa kuti Yahova atilekerere pikado zathu. Iye ambacita lini kungingimizidwa kuti acite bzimwebzi. Iye ambafuna kutilekerera. (Sal. 103:3, 10-13) Wanthu winango angakumbuke kuti alibe kuthemera kulekereredwa na Yahova. Tsono cadidi n’cakuti tentsenefe tiribe kuthemera kulekereredwa. Mpostolo Paulo akhadziwa kuti iye “akhathemera lini kucemeredwa mpostolo.” Napo bziri tenepo, iye adalewa kuti: “Thangwe ra kudeka mtima kukulu kwa Mulungu, inepano ndine mpostolo.” (1 Ako. 15:9, 10) Tikakungula pikado zathu Yahova ambatilekerera. Thangwe ranyi? Sikuti thangwe ra kuthemera, koma thangwe rakuti Yahova ambatifuna kwene-kwene. Tenepo imwepo mukasunama thangwe ra kukumbukira kuti ndimwe lini wakuthemera kulekereredwa na Yahova, kumbukirani kuti iye alibe kupereka ntsembe ya Mwana wace thangwe ra wanthu wakulungama. Iye adaipereka thangwe ra wanthu wa pikado kuti akakungula awalekerere. — Luk. 5:32; 1 Tim. 1:15. w25.01 26-27 ¶3-4

Ifepano tingakwanise lini kucitisa wanthu kuti alewe ayai kuti aticitire bzinthu bzabwino. Tsono tingakwanise kubziphata kuti bzomwe aticitabzo bzireke kutiwawa kwene-kwene. Ndipo cinthu cabwino comwe ifepano tingacite ndico kuwalekerera. Thangwe ranyi? Thangwe ifepano timbafuna Yahova ndipo iye ambafuna kuti tilekerere anzathu. Ifepano tikapitiriza kukhala tidakalipa ticileka kulekerera wanthu omwe atiphonyera, bzimwebzi bzingaticitise kuti ticite bzinthu bzakuphonyeka ayai bzingadzonge thanzi lathu. (Mim. 14:17, 29, 30) Tikayebwa bzinthu bzakuipa bzomwe anzathu adaticita, timbasiya kukhala na ciya. Bzimwebzi bzimbaticitisambo kuti tileke kumbakumbukira bza nkhaniyo ndipo bzimbatithandiza kuti tikhale pomwe wakukondwa. Kodi ciyani comwe mungacite kuti muleke kupitiriza kukhala mudakalipa munthu akakuphonyerani? Cinthu cibodzi comwe mungacite ndico kubzipasa nthawe kuti mubve bwino. Munthu omwe akuduwala akapasidwa mankhwala na dotolo pambatenga nthawe kuti iye alimbe. Mwakundendemerana na bzimwebzi, tin’funika kubzipasa nthawe kuti tikwanise kulekerera munthu thangwe nthawe zinango tingakwanise lini kulekerera munthu omwe atiphonyera pa nthawe imweyoletu. (Mpal. 3:3; 1 Ped. 1:22) Pembani kwa Yahova ndipo mukumbireni kuti akuthandizeni kukhala wakulekerera. w25.02 16-17 ¶8-11

Bzipfunziso bzakuyambirira bzomwe Akristau wentse ambakhulupira bzimbaphatanidza kukungula, cikhulupiro, ubatizo na kulamusidwa kwa anyakufa. (Aheb. 6:1, 2) Bzimwebzi ni bzipfunziso bzakuyambirira bzomwe Akristau wentse ambakhulupira. Pomwe Pedru adapalizira wanthu pa Pentekoste, iye adawafotokozera bzinthu bzimwebzi. (Mab. 2:32-35, 38) Kuti tikhale ateweri wa Jezu tin’funika kubvuma bzipfunziso bzimwebzi. Paulo adaticenjeza kuti penu timbakhulupira lini bzakuti wanthu an’dzalamusidwa ndiye kuti tingakhale lini ateweri wa Jezu. (1 Ako. 15:12-14) Tsono tin’funika lini kumbakomedwa na bzinthu bzing’ono-ng’ono bzomwe timbadziwa. Mwakusiyana na cipfunziso cakuyambirira, cakudya cakulimba cimbandophatanidza lini malamulo ya Yahova yokha, koma cimbaphatanidzambo mitemo yace yomwe imbatithandiza kuti tibvesese momwe Yahova ambawonera bzinthu. Kuti tigumane phindu na cakudya cimweci, tin’funika kupfunza Fala la Mulungu, kukumbukira bzomwe tapfunzabzo na kubziphatisa basa. Tikacita bzimwebzi, tin’dzacita bzakusankhula bzomwe bzimbakondwesa Yahova. w24.04 5 ¶12-13

Mulungu adakumbusa Djona kuti wanthu wa ku Ninive akhakwanisa lini “kusiyanisa cabwino na cakuipa.” (Djon. 1:1, 2; 3:10; 4:9-11) Pomwe padapita magole, Jezu adaphatisa basa ciratizo cimweci kuti apfunzise wanthu bza cirungamo na ntsisi za Yahova. Kodi mafala yakuti wanthu wa ku Ninive an’dzalamusidwa “pa ntsiku ya kutongedwa” yambathandauza ciyani? Jezu adapfunzisa bza wanthu omwe “an’dzamuka kuti atongedwe.” (Juw. 5:29) Pakulewa mafalaya, iye akhafuna kuthandauza pa nthawe yomwe an’dzatonga ninga Mambo kwa magole 1000, pomwe wanthu “wakulungama na wakusaya kulungama” an’dzalamusidwa. (Mab. 24:15) Kwa anyakusaya kulungama, “an’dzamuka kuti atongedwe.” Bzomwe bzikuthandauza kuti pambuyo pa kulamusidwa, Yahova na Jezu an’dzawona penu iwo akupitiriza kubvera na kuphatisa basa bzomwe akupfunza. Penu munthu m’bodzi wa ku Ninive akadzalamusidwa acilamba kunamata Yahova, Yahovayo an’dzabvuma lini kuti iye apitirize kukhala na moyo. (Zai. 65:20) Koma kwa wale omwe an’dzasankhula kunamata Yahova mwakukhulupirika, an’dzakhala na mwayi wakukhala na moyo mpaka kale-kale! — Dan. 12:2. w24.05 5 ¶13-14

Jezu adalatiza bwino kuti Yahova ni Mulungu wa ntsisi. (Juw. 14:9) Bzinthu bzomwe Jezu akhalewa na kucita bzikhalatiza kuti Baba wace wa ntsisi ambafuna wanthu ndipo akufuna kuthandiza m’bodzi na m’bodzi wa ifepano kukwanisa kulimbana na pikado. Kuthumizira bzimwebzi, Jezu adathandiza anyapikado kufuna kucinja bzinthu pa moyo wawo acikhala ateweri wace. (Luk. 5:27, 28) Jezu akhadziwa kuti angadapereka moyo wace ninga ntsembe. Kazinji-kentse, Jezu adauza ateweri wace kuti angadadzaphindukiridwa na kukhomereredwa pa muti. (Mat. 17:22; 20:18, 19) Iye akhadziwambo kuti ntsembe imweyi ingadacosa pikado za m’dziko. Jezu adalewambo kuti pambuyo pa kuphedwa, ‘angadadzabweresa kwa iye wanthu wa mitundu yakusiyana-siyana.’ (Juw. 12:32) Bzimwebzi bzikuthandauza kuti munthu omwe angadakhulupira Jezu na kukhala mteweri wace angadakondwesa Yahova. Wanthu omwe angadacita bzimwebzo “angadatsudzulidwa ku pikado.” (Aro. 6:14, 18, 22; Juw. 8:32) Ndipopa Jezu akhali wakukhwimika na wakukonzeka kufa infa yakuwawa kuti atipulumuse. — Juw. 10:17, 18. w24.08 5 ¶11-12

Kumbukirani momwe mudabvera pomwe mudayamba kupfunza mafala ya Mulungu. Imwepo mudapfunza kuti Pai wanu wa lufoyi ambakufunani, akufuna kuti mucite mbali ya banja lace, akufuna kudzamalisa kuwawa na kubonera ndipo akufuna kuti mudzawonane pomwe na adzinza wanu omwe adafa na bzinthu bzinango bzizinji. (Mar. 10:29, 30; Juw. 5:28, 29; Aro. 8:38, 39; Apok. 21:3, 4) Bzomwe imwepo mudapfunza bzidakucitisani kuti mukhale wakukondwa kwene-kwene. (Luk. 24:32) Imwepo mudakomedwa na bzomwe mukhapfunza ndipo mudafuna kuuzambo wanthu winango! (Ndendemezerani na Jeremiya 20:9.) Tikambafuna bzomwe timbapfunza m’Bibliya timbafunisisa kupalizirambo wanthu winango. (Luk. 6:45) Timbabzibva ninga anyakupfunza wa Jezu omwe adati: “Tingaleke lini kulewalewa bzinthu bzomwe tidawona na kubva.” (Mab. 4:20) Timbafuna cadidi ndipo timbafunambo kupalizira wanthu wakusiyana-siyana. w24.05 15 ¶5; 16 ¶7

Pakuti ndife atumiki wa Yahova, timbapalizira mafala yabwino kwa wanthu winango thangwe timbafuna Yahova ndipo tikufuna kuwathandiza kuti amudziwe. Tsono winango, bzimbawanesa kukhala wakukondwa pa basa lakupalizira. Thangwe ranyi? Winango ana manyazi ndipo ambawona kuti angakwanise lini kupfunzisa munthu. Winango ambawona kuti mpsabwino lini kuyenda ku mui kwa wenekaciro pomwe alibe kucemeredwa. Winango ambagopa kuti wanthu angawakalipire. Ndipo pinango winango angagope kukalipisa wanthu. Iwo ambaneseka kupalizira mafala yabwino kwa wanthu omwe ambawadziwa lini. Kodi nthawe zinango bzimbakunesanimbo kukhala wakukondwa mu upalizi? Penu ndibzo, lekani kuwofoka. Bzimwebzi bzikulatiza kuti ndimwe wakubzicepesa ndipo mumbafuna lini kubziwonesera. Palibe omwe ambafuna kukalipisa munthu munango, maka-maka akakhala akufuna kumucitira bzinthu bzabwino. Baba wanu wakudzulu akudziwa bza mabvuto yomwe mukugumana nayo ndipo akufuna kukuthandizani. — Zai. 41:13. w24.04 14 ¶1-2

Pomwe mukuwerenga Bibliya, m’mbuto mwa kuyezera kucita bzentse bzomwe mwawerenga kabodzi na kabodzi, yezerani kukhazikisa ndondomeko. Imwepo mungayezere kucita ibzi: Nembani lista ya bzinthu bzomwe mun’funika kucinja, ndipo m’mbuto mwa kufuna kucinja bzinthu bzentse kabodzi na kabodzi sankhulani cibodzi ayai bziwiri. Ndipo bzinangobzo mun’dzabziwona kutsogolo. Tsono kodi muniyamba kucinja bzinthu bziponi? Imwepo mungasankhule kuyamba kucita cinthu comwe mukuwona kuti n’cakupusa kwa imwepo. Ayai pinango imwepo mungasankhule kuyamba kucita nyongo yakuti mucinje mbali inango pa moyo wanu yomwe njakufunika kwene-kwene. Imwepo mukawona bzomwe mun’funika kuyamba kucinja fufudzani m’mabukhu yathu. Pemphererani bzomwe mwasankhulabzo mucikumbira Yahova kuti akupaseni “mphanvu na cikhumbo kuti mucite bzomwe iye akufuna.” (Afil. 2:13) Mukamala phatisani basa bzomwe mwapfunzabzo. Mukakwanisa kucinja cinthu cakuyamba comwe mukhadasankhulaco bzimwebzi bzin’dzakucitisani kuti mukwanisembo kucinja cinthu caciwiri comwe mwasankhula. Imwepo mukawona kuti mwakwanisa kucinja bzinthu bzinango pa moyo wanu ayai kukhala na makhalidwe yacikristau yomwe mukhalibe, mun’dzafunisisa kupitiriza kufuna kucinja ndipo bzin’dzakhala bzakupusa kucinja bzinthu bzinango bzomwe mun’funikira kucinja. w24.09 6 ¶13-14

Imwepo mungasuname thangwe ra bzinthu bzinango bzomwe mudacita m’mbuyo bzomwe bzidasunamisambo wanthu winango. N’ciyani comwe imwepo mungacite? Citani bzentse bzomwe mungakwanise kuti mukonze bzomwe mudaphonyabzo ndipo apepeseni. Pembani kwa Yahova kuti athandize wanthu omwe mudawasunamisawo. Iye angathandize imwepo pabodzi na wale omwe mudawasunamisa kupirira na kukhala pomwe na mtendere. Pfunzani na pikado zomwe mudacita m’mbuyo ndipo khalani wakukonzeka kubvuma kuti Yahova akuphatiseni basa mu njira yomwe iye akufuna. Onani ciratizo ca mpolofeta Djona. M’mbuto mwa kuyenda ku Ninive komwe Yahova akhadamutuma, iye adayenda ku mbuto inango. Yahova adalanga Djona, ndipo Djonayo adapfunza na kuphonya kwaceko. (Djon. 1:1-4, 15-17; 2:7-10) Yahova alibe kumusiya Djona. Mulungu adamupasa pomwe Djona mwayi wakuti ayende ku Ninive, ndipo Djonayo adabvuma. Napo kuti akhadasunama thangwe ra bzomwe akhadacita, Djona adacita bzomwe Yahova adamuuza. — Djon. 3:1-3. w24.10 8-9 ¶10-11

Yahova ambandolekerera lini mangawa yathu ayai pikado zathu; iye ambazipfudza. Tingayezezere bzimwebzi na munthu omwe akuikha X pa mangawa yomwe munayo kuti muleke kuyapagali. Napo bziri tenepo, X omwe aikhayo akukwanisa lini kubisa mangawayo ndipo wanthu akupitiriza kuyawona basi. Kucita bzimwebzi n’kwakusiyana na kupfudza. Kuti tibvesese ciratizo cimweci, tin’funika kukumbukira kuti mu nthawe za m’Bibliya, wanthu akhanemba mwakuphatisa basa tinta yomwe ikhali yakupusa kupfudzika na madzi. Bzikhali bzakupusa munthu kutenga thonje lakutota acipfudza bzomwe anemba. Tenepo, mangawa “yakapfudzidwa,” yakhawoneka lini pomwe. Wanthu akhakwanisa lini pomwe kuwona bzomwe bzikhadanembedwabzo. Bzikhali ninga kuti mangawayo kukhalibe. Timbatenda kwene-kwene Yahova thangwe ra kudziwa kuti iye akalekerera pikado bzimbakhala ninga kuti tiribe kuicita pikadoyo! — Sal. 51:9. w25.02 10 ¶11

Wanthu akatilewa kuipa ayai akaticitira bzinthu mwakusaya cirungamo, timbakhulupira kuti Yahova akudziwa cadidi ca nkhaniyo. Bzimwebzi bzimbatithandiza kupirira pomwe tikucitiridwa bzinthu mwakusaya cirungamo thangwe timbadziwa kuti Yahova an’dzakonza bzentse pa nthawe yace. Tikasiya bzentse m’manja mwa Yahova, bzimbatithandiza kuti tileke kukhala na ciya pabodzi na kukoya cakumtima. Thangwe bzimwebzi bzingaticitise kucita bzinthu bzakuipa, kuleka kukhala wakukondwa na kudzonga uxamwali wathu na Yahova. N’cadidi kuti tin’dzakwanisa lini kutewezera bwino-bwino ciratizo ca Jezu. Nthawe zinango tingacite ayai kulewa cinthu comwe patsogolo pace tingadzakhumbule naco. (Tiy. 3:2) Ndipo nthawe zinango bzinthu bzomwe wanthu angaticitire bzingatiwawe kwene-kwene ndipo bzingatibweresere mabvuto kwa moyo wathu wentse. Penu ndibzo bzomwe bzikukucitikirani, khalani na citsimikizo cakuti Yahova akudziwa bzimwebzi. Ndipo Jezu omwe adabonerambo thangwe ra bzinthu bzakusaya cirungamo akubvesesambo momwe mukubvera. (Aheb. 4:15, 16) Timbakhala wakukondwa kwene-kwene thangwe rakuti Yahova ambatipasambo malango yomwe yambatithandiza kupirira bzinthu bzakusaya cirungamo bzomwe tikucitiridwa. w24.11 6 ¶12-13

Iwo akhafunika kukhulupira Jezu kuti “adzakhale na moyo wakusaya kumala.” (Juw. 3:16-18, 36; 17:3) Adjudawo akhakhulupira lini nfundo yakuti iwo akhafunika kukhulupira Jezu. Iwo adamukumbira kuti acite pomwe cakudabwisa cinango mwa kumuuza kuti: “Kodi ni bzizindikiro bziponi bzomwe mun’dzacita kuti ife tiwone ticikukhulupirani?” (Juw. 6:30) Iwo adalewa kuti mu nthawe ya Mozeji, makolo yawo yakhatambira mana mwakudabwisa, comwe cikhali cakudya cawo ca ntsiku na ntsiku. (Neh. 9:15; Sal. 78:24, 25) Bzikuwonekeratu kuti iwo akhandokumbukira bza cakudya cakuthupi cokha. Ndipopa pomwe Jezu adawauza bza “pau caiyo yakucokera kudzulu” yomwe ingadawapasa moyo wakusaya kumala, iwo alibe na kubvunzako kuti iye akhathandauza ciyani na mafala yamweya. (Juw. 6:32) Makumbukidwe yawo yakhali pa bzinthu bzakuthupi. Ndipopa iwo alibe kubvesesa pomwe Jezu akhayezera kuwapfunzisa momwe angagumanire moyo wakusaya kumala. w24.12 5-6 ¶10-11

Ku xikola, wana wanu an’dzapfunza bzinthu bzizinji bzakudabwisa bza m’cirengedwe. Kumbukirani momwe muti udalengedwera. Pomwe muti ukukula, umbakhala na tsinde. Tsindero limbakhala na mithambi, mithambiyo imbakhala na mithambi yacembo ming’ono-ming’ono. Ndipo mithambi ming’onoyo imbakhalambo na mithambimbo ming’ono-ming’ono kuposambo imweyo. Bzimwebzi bzimbacitika mpaka mutiyo kukhala ukulu. Miti mizinji imbacita bzimwebzi. Tsono mbani omwe adakonza mitiyo kuti imbacite bzimwebzi? Wana wanu akambabzicita mbvunzo ningati umweyu, iwo an’dzakhala na cikhulupiro cakulimba cakuti Yahova ndiye omwe adalenga bzinthu bzentse. Na kupita kwa nthawe, imwepo mun’dzafunika kuthandiza wana wanu kubvesesa kufunika kwa kubvera mitemo ya Mulungu. Imwepo mungacite bzimwebzi mwa kuwabvunza kuti: “Pakuti Mulungu ndiye omwe adatilenga, ukuwona kuti iye ngwakuthemera kutiuza bzomwe tin’funika kucita kuti tikhale wakukondwa?” Imwepo mungamulatize kuti bzomwe mukucezeranabzo bziri m’Bibliya. w24.12 16 ¶8

Mwakutsogoleredwa na Mulungu, mpostolo Paulo adanembera tsamba gwerero ndipo adaliuza kuti licose munthu wakusaya kukungulayo m’gwere. (1 Ako. 5:13) Kodi abale wa m’gwere akhafunika kucita naye tani bzinthu munthu umweyu? Paulo adawauza kuti ‘aleke kubverana’ na munthuyo. Kodi bzimwebzi bzikhathandauza ciyani? Paulo adalewa kuti lamulo limweri likhaphatanidza kuleka “kudya naye munthu umweyo.” (1 Ako. 5:11) Kudya pabodzi na munthu kungacitise kuti tiyambe kubverana na munthuyo. Patsogolo pace, Paulo adalewa mwakubveka bwino kuti gwere likhafunika lini kucita bzinthu na munthu umweyo. Bzimwebzi bzingadakhotcerera gwere kuti lileke kutewezerambo khalidwe lace lakuipalo. (1 Ako. 5:5-7) Kuthumizira bzimwebzi, kutcenkha kucita bzinthu na munthuyo kungadacitisa kuti iye azindikire kuti wataika pa njira ya Yahova ndipo angadacita manyazi acifuna kukungula. w24.08 15 ¶4-5

Ajirayeri akhakumbukira Ntsiku ya Kumpsinkha Pikado gole liri-lentse. Pa ntsikuyo, mkulu wa antsembe akhambapereka ntsembe za bzifuwo m’mbuto mwa wanthu wentse. N’cadidi kuti ntsembezo zikhamalisiratu lini pikado za wanthuwo thangwe bzifuwo mpsing’ono kwene-kwene tikabzindendemezera na wanthu. Tsono, Ajirayeriwo akakungula na kupereka ntsembe zomwe zikhafunikira, Yahova akhawalekerera. (Aheb. 10:1-4) Makonzedwe ya kumpsinkha pikado yakhakumbusa Ajirayeri kuti akhali wakuperewera. Kodi ni makonzedwe yaponi yakukhalisa yomwe Yahova adacita kuti tilekereredwe pikado zathu? Iye adacita makonzedwe yakuti Mwana wace wakufunidwa ‘apereke ntsembe kabodzi kokha mpaka kale-kale, kuti anyamule pikado za wanthu azinji.’ (Aheb. 9:28) Jezu adapereka “moyo wace kuti alombole wanthu azinji.” — Mat. 20:28. w25.02 4 ¶9-10

“N’cadidi kuti mtima ukufuna tsono thupi ndakutepa.” (Mat. 26:41b) Na mafala yamweya, Jezu adalatiza kuti ambabvesesa kuti ifepano ndife wakuperewera. Tsono, mafala yamweya yakuticenjezambo kuti tin’funika lini kumbabzithemba kwene-kwene. Pomwe Jezu akhanati kulewa mafalaya, anyakupfunza wace akhadalewa mwakutsimikiza kuti angadamusiya lini. (Mat. 26:35) Bzomwe iwo akhafuna kucitabzo bzikhali bzabwino. Tsono, iwo alibe kuzindikira kuti mayezo yaciwabwerera, mphanvu zawo zakucitira bzinthu bzabwino zingacepe acimalizira kucita bzinthu bzakuphonyeka. Ndipopa, Jezu adawacenjeza mwakuphatisa basa mafala yomwe yali mu vesi la lero. Bzakupasa ntsisi mpsakuti anyakupfunzawo adatazira kupitiriza kukhala adapenya. Pomwe Jezu adamangidwa, kodi iwo adakhala naye ayai adacita mantha acithawa? Pakuti iwo alibe kukhala tceru, adacita bzinthu bzomwe iwo akhadalewa kuti angadacita lini, bzomwe ni kuthawa Jezu. — Mat. 26:56. w24.07 14 ¶1-2

Adamu na Eva adaluza uxamwali bomwe akhanabo na Baba wawo Yahova. Ndipo pomwe iwo akhanati kuphonya, akhacita mbali ya banja la Yahova. (Luk. 3:38) Tsono pomwe iwo adaphonyera Yahova, iye adawacosa m’banja mwace. Bzimwebzi bzidacitika pomwe iwo akhanati kukhala na wana. (Gen. 3:23, 24; 4:1) Na tenepo, pakuti ifepano ndife mbadwa zawo tin’funika kukhala pa mbverano na Yahova. (Aro. 5:10, 11) Kulewa kunango, tin’funika kukhala pa uxamwali na iye. Ninga momwe bukhu linango limbalewera, “kubwezeresa mbverano” kumbathandauza “kukhala pomwe pa uxamwali na munthu omwe akhali nyamadulanthaka wathu.” Bzakudabwisa mpsakuti ni Yahova omwe adayamba kucita bzimwebzi. Mwa njira iponi? Mwakuphatisa basa makonzedwe ya kumpsinkha pikado yomwe yadacitisa kuti Yahova abwezerese uxamwali pakati pa iye na wanthu. Bzimwebzi bzimbaphatanidza kucinjanisa cinthu na cinango comwe cina pereso yakundendemerana na cinthuco. Mwa njira imweyi, cinthu comwe cikhadataika ayai comwe cikhadapfudzika cingabwezeresedwe pomwe. w25.02 3-4 ¶7-8

Mpostolo Paulo adawona kuti ‘kutsimulidwa komwe adacitidwa na wanthu azinji, kukhali kwakukwanira kwa munthu umweyu.’ (2 Ako. 2:5-8) Bzimwebzi bzikuthandauza kuti pomwe munthu omwe adacita upombo na mkazi wa pai waceyo adacosedwa m’gwere, iye adazindikira kuti akhafunikira kukungula. (1 Ako. 5:1) Ndipo pakuti iye akhadakungula akhafunika lini pomwe kupitiriza kutsimulidwa. (Aheb. 12:11) Patsogolo pace, Paulo adauza gwerero kuti: “Mun’funika kumulekerera tsapano na mtima wentse na kumutsangalaza” ndipo “mulatize lufoyi lanu kwa iye.” Onani kuti Paulo akhafuna kuti gwere licite bzizinji sikuti kundobvuma kuti munthuyo ayambe pomwe kukhala pakati pa wanthu wa Yahova. Paulo akhafuna kuti abalewo alatize kwa munthu omwe wakungulayo na mafala pabodzi na bzicito bzawo kuti amulekerera nakuti ambamufuna. Bzimwebzi bzingadalatiza kuti iwo akumutambiradi m’baleyo mu gwere. w24.08 15 ¶4; 16-17 ¶6-8

Mpostolo Paulo akhadziwa bwino bzomwe iwo akhafunikira kuti akwanise kupirira. Iye adakumbusa Akristauwo kuti akagumana na mabvuto akhafunika lini kubzithemba okha, koma akhafunikira kuthemba Yahova. Bzimwebzi ndibzo bzomwe bzidacitisa Paulo kukhala wakukhwimika acilewa kuti: “Yahova ni mthandizi wangu, nin’dzagopa lini cinthu.” (Aheb. 13:6) Ntsiku zino, abale wathu winango akuzunzidwambo. Ifepano tingawathandize mwa kuwapempherera ndipo nthawe zinango mwa kumbawapasa bzomwe akufunikira. Tsono Bibliya limbafotokozeratu padeca kuti “wentse omwe an’funa kukhala na moyo wakubzipereka kwa Mulungu mwakubverana na Kristu Jezu, an’dzagumanambo na mabvuto.” (2 Tim. 3:12) Ndipopa tentsenefe tikadziwa kuti tin’dzagumana na mabvuto kutsogolo bzimwebzi bzin’dzatithandiza kukhala tidakonzeka kudzapirira pa nthawe yomwe tin’dzagumana na mabvutoyo. Na tenepo, tin’funika kupitiriza kukhulupira Yahova na kukhala na citsimikizo cakuti iye an’dzatithandiza kupirira mabvuto yali-yentse. Pa nthawe yakuthemera, iye an’dzamalisa mabvuto kuna wanthu wentse omwe ambamunamata mwakukhulupirika. — 2 Ates. 1:7, 8. w24.09 13 ¶17-18

Kodi n’ciyani cidathandiza wanthu wa ku Kolinto kuti abatizidwe? (2 Ako. 10:4, 5) Fala la Mulungu, Bibliya, na mzimu wakucena bzidawathandiza kuti acinje bzinthu pa moyo wawo. (Aheb. 4:12) Wanthu wa ku Kolinto omwe adabvuma mafala yabwino yakulewa bza Kristu, adakwanisa kusiya bzinthu bzakuipa bzomwe akhacita ninga kuledzera, kuba na kucita malume ya pa mphasa amuna okha-okha ayai akazi okha-okha. (1 Ako. 6:9-11) Napo kuti wanthu wa ku Kolinto akhafunika kucinja bzinthu bzizinji pa moyo wawo, iwo alibe kuwona bzinthu bzimwebzo kukhala bzinthu bzomwe bzingadawatazisa kukhala Akristau. Iwo adacita nyongo kwene-kwene kuti ayambe kufamba mu msewu wakupapatiza na mseu wakupsindiza omwe umbayendesa ku moyo wakusaya kumala. (Mat. 7:13, 14) Kodi imwepo mukucita nyongo kuti mucinje bzinthu bzinango pa moyo wanu kuti mubatizidwe? Penu ndibzo, pitirizani kucita nyongo kuti mucinje! Kumbirani Yahova kuti akupaseni mzimu wace wakucena kuti akuthandizeni kutcenkha bzikhumbo bzakucita bzinthu bzakuipa. w25.03 6 ¶15-17

Yahova adalewa kuti an’dzatipasa nzeru kuti tikwanise kubvesesa penu bzakusankhula bzomwe tikucita bzikumukondwesa ayai ne. Iye ambapereka nzeruzo “na manja mawiri kwa wentse ndipo ambaperekambo mwakusaya kutombodzera.” Mukamala kupemba kwa Yahova kuti akutsogolereni, khalani tceru kuti muwone momwe akukutawirirani. Tiyezezere kuti imwepo mwataika pomwe mukucita ulendo. Imwepo mungabvunze munthu omwe ali komwe muliko kuti akupanganizeni njira. Kodi imwepo mungayambe kuyenda uko munthuyo akanati kukuuzani ciri-centse? Mungacite lini bzimwebzo. Imwepo mungamutetekere bwino-bwino pomwe iye akukupanganizani. Mwakundendemerana na bzimwebzi, mukakumbira Yahova kuti akuthandizeni, yezerani kugumana mtawiro wa mpembo wanu mwa kunyang’ana malamulo na nfundo za m’Bibliya zomwe zikubverana na cakusankhula comwe mukufuna kucitaco. Pomwe mukusankhula kufuna kuyenda ku festa ayai ne, imwepo mungawone bzomwe Bibliya limbalewa pa nkhani ya mafesta ya baludya, kubverana na wanthu wakuipa na kuikha Umambo bwa Mulungu pa mbuto yakuyamba m’mbuto mwa bzakufuna bzanu. — Mat. 6:33; Aro. 13:13; 1 Ako. 15:33. w25.01 16 ¶6-7

Profesiya ya Zaiya imbalatiza kusiyana komwe kulipo pakati pa wale omwe ali mu paraizo wauzimu na wale omwe ali kunja kwa paraizoyu. Yahova ambapasa atumiki wace bzentse bzomwe ambafunikira kuti apitirize kukhala pa uxamwali na iye. Tina mzimu wakucena, Fala lace na cakudya cizinji cauzimu kuti ‘tidye . . . timwe . . . na kukhala wakukondwa.’ (Ndendemezerani na Apokalipse 22:17.) Tsono mwakusiyana na atumiki wa Yahova, wale omwe ali lini m’paraizo wauzimu ‘ambakhala na njala . . . , ambakhala na nyota . . . , ndipo ambanyala.’ Iwo alibe cakudya cauzimu. (Amo. 8:11) Yahova ambatipasa bzomwe tikufunikira mwakuthupi na mwauzimu. (Jow. 2:21-24) Iye ambacita bzimwebzi mwakuphatisa basa Bibliya, mabukhu yathu, webisaite yathu, mitsonkhano ya gwere, mitsonkhano ya dera na ya cigawo. Ifepano timbadya cakudya cauzimu ntsiku zentse, ndipopa tina thanzi labwino lauzimu. w24.04 21 ¶5-6

Penu imwepo mukufuna kukhala pa umakhadzi na munthu munango mungapangane na munthuyo kuti muceze naye pa mbuto yomwe imbagumanika wanthu azinji ayai pa telefoni. Muuzeni munthuyo mwakubveka bwino kuti mumbamufuna nakuti mukufuna kumudziwa bwino. (1 Ako. 14:9) Bzikafunikira, mupaseni nthawe kuti akumbuke momwe angatawirire. (Mim. 15:28) Tsono penu iye akufuna lini kukhala pa umakhadzipo, bvumani ndipo lemekezani cakusankhula caceco. Tsono tani penu munthuyo alatiza kuti ambakufunani? Kulewa cadidi munthuyo adafunikira kukhala wakukhwimika kuti akuuzeni momwe iye akubvera. Na tenepo, khalani wakudeka mtima na waulemu. Penu imwepo mungafunikire nthawe kuti mukumbuke penu mungayambedi kukhala pa umakhadzi na munthuyo, muuzeni. Tsono, lekani kucedwa kumupasa mtawiroyo. (Mim. 13:12) Penu imwepo mun’funa lini kukhala naye pa umakhadzi, muuzeni bzimwebzi mwakudeka mtima na mwakubveka bwino. Tsono, penu imwepo mukufunambo kukhala pa umakhadzi na munthuyo, muuzeni bzimwebzo ndipo cezeranani bzomwe imwepo mukufuna kuti bzidzacitike pa umakhadzi bwanu. Bzomwe imwepo mungadikhirire bzingakhale bzakusiyana na bzomwe mwanzanuyo angadikhirirembo. w24.05 23-24 ¶12-13

Pomwe Davide akhanati kupfitsa magole 20 yakubadwa, iye adayenda ku tsasa la acikunda wa Ajirayeri. Iye adadziwa kuti acikunda wale akhabva mantha thangwe ra Mfilisteu munango wakucemeredwa Goliyati omwe akhacita “mapici na acikunda wa Jirayeri.” (1 Sam. 17:10, 11) Acikundawo akhabva mantha thangwe rakuti iye akhali cinzonzomtali ndipo akhambawagopswa. (1 Sam. 17:24, 25) Tsono Davide adawona bzomwe bzikhacitikabzo mu njira yakusiyana. Iye akhadziwa kuti Goliyati akhanyoza lini kokha acikunda wa Ajirayeri, koma akhanyoza “acikunda wa Mulungu wamoyo.” (1 Sam. 17:26) Davide akhathemba Yahova. Iye akhadziwa kuti Mulungu omwe adamuthandiza pa nthawe yomwe akhali makabusa angadacitambo bzibodzi-bodzibzo pa cakucitika cimweci. Davide akhapenukira lini kuti Yahova angadamuthandiza, ndipopa iye adakwanisa kumenyana na Goliyati ndipo adamukunda! — 1 Sam. 17:45-51. w24.06 21 ¶7

Yezerani kukumbukira momwe moyo wanu ungadakhalira mungadakhala mukutumikira lini Mulungu. Tikambakumbukira bzinthu bzimwebzi tin’dzapitiriza kukhala wakukhulupirika kwa iye, ndipo ninga munembi wa Salimoyu, tingalewe kuti: “Tsono kwa ine kufenderera Mulungu ni cinthu cabwino kwene-kwene.” (Sal. 73:28) Ifepano tingalimbane na mabvuto yali-yentse yomwe tingagumane nayo mu ntsiku zakumalizira zino thangwe ndife “akapolo wa Mulungu wamoyo na wacadidi.” (1 Ates. 1:9) Yahova ni Munthu caiye ndipo iye ngwakukonzeka kutithandiza. Iye nthawe zentse adakhala ku mbali ya atumiki wace wakale-kale ndipo an’citambo bzibodzi-bodzibzi na ifepano ntsiku zino. Tsapanopapa ifepano tin’gumana na citsautso cikulu, tsono tin’dzakhala lini tekha. Yahova ali ku mbali yathu. Tentsenefe “tikhale wakukhwimika kwene-kwene ticilewa kuti: ‘Yahova ni mthandizi wangu, nin’dzagopa lini cinthu.’” — Aheb. 13:5, 6. w24.06 25 ¶17-18

Bibliya limbalewa bza amuna wakupitirira 40 omwe adakhala amambo wa Ajirayeri. Ndipo limbalewambo bzinthu bzakuipa bzomwe amambo wabwino adacita. Pakulewa bza Mambo Davide, Yahova adati: “Mtumiki wangu Davide . . . adateweza malango yangu na mtima wentse na kucita bzomwe mpsabwino bzokha-bzokha pamaso pangu.” (1 Ama. 14:8) Tsono Davideyo adacita upombo na mkazi wa mwenekaciro ndipo adapheseratu mwamunayo ku nkhondo. (2 Sam. 11:4, 14, 15) Bibliya limbalewambo bza amambo omwe adacita bzinthu bzabwino pakuyamba tsono adadzacita bzinthu bzakuipa. M’bodzi wa iwo ni Robuwamu. Iye “adacita bzinthu bzakuipa kwene-kwene” pamaso pa Yahova. (2 Nkha. 12:14) Tsono iye adacitambo bzinthu bzinango bzabwino. Iye adabvera Yahova pomwe adamuuza kuti aleke kukamenyana na madzinza 10 ya Ajirayeri. Ndipo adakonza mizinda mizinji kuti akhotcerere wanthu wa Mulungu. (1 Ama. 12:21-24; 2 Nkha. 11:5-12) N’ciyani cikhacitisa Yahova kuwona kuti mambo akhali wakukhulupirika ayai ne? Comwe cikhamucitisa cikhali kuwona penu mamboyo akhamufuna na mtima wentse, penu akhadakungula na mtima wentse akhala kuti waphonya ayai penu akhathandizira kunamata kwacadidi. w24.07 20 ¶1-3

Tsono tani penu mwana wa magole yakusaya kukwana 18 omwe ngwakubatizidwa wacita pikado ikulu? Bungwe la akulu lin’dzacita makonzedwe kuti akulu awiri awonane na mwanayo pabodzi na abereki wace omwe ni Akristau. Akuluwo an’funika kubvunza aberekiwo bzomwe acita kale na cakulinga cakuti athandize mwana wawoyo kuti akungule. Mwanayo akakhala ana makumbukidwe yabwino na makhalidwe yabwino ndipo aberekiwo amuthandiza kale, pinango akuluwo angawone kuti mpsakufunikira lini kuti mwanayo pabodzi na abereki wace omwe ni Akristau awonane na komiti. Akulu ambadziwa kuti Yahova adapasa udindo abereki kuti ambatsimule na kupasa malango wana wawo mu njira ya lufoyi. (Deut. 6:6, 7; Mim. 6:20; 22:6; Aef. 6:2-4) Akuluwo nthawe na nthawe an’funika kumbaceza na abereki wa mwanayo kuti atsimikize kuti iye akutambira thandizo lauzimu. Tsono, n’ciyani comwe akulu an’dzacita penu mwanayo akulamba kucinja? Komiti in’funika kugumana na mwanayo pabodzi na abereki wace omwe ni Akristau. w24.08 24 ¶18

Tentsenefe timbakomedwa tikapasidwa cinthu. Napo bziri tenepo, ifepano timbakhala wakukondwa kwene-kwene tikapasa munthu cinthu. Tikambanyang’ana njira zakusiyana-siyana kuti tikhale wakupasa timbathumizira cikondweso cathu ndipo timbalatiza kuti Yahova adatilenga mwa njira imweyi. Kodi mpsabwino lini kudziwa kuti tidalengedwa tenepayu? (Sal. 139:14) Bzinembo bzimbatitsimikizira kuti kupasa kumbabweresa cikondweso, ndipopa mpsakudabwisa lini Bibliya likalewa kuti Yahova ni “Mulungu wakukondwa.” (1 Tim. 1:11) Iye ndiye omwe adayamba kupasa ndipo ni Mpasi mkulu. Ninga momwe adalewera mpostolo Paulo, thangwe ra Mulunguyo, “ifepano tina moyo, timbafamba ndipo tiripo.” (Mab. 17:28) Kulewa cadidi, “mphaso iri-yentse yabwino na yakulungama” imbacokera kwa Yahova. (Tiy. 1:17) Tentsenefe timbafuna kukhala wakukondwa thangwe ra kupasa. Tingacite bzimwebzo mwa kutewezera kupasa kwa Yahova. — Aef. 5:1. w24.09 26 ¶1-4

Pambuyo pakuwona makhalidwe yomwe munthu an’funika kukhala nayo kuti akhale mkulu, atumiki winango wakuthandiza angayambe kuwona ninga kuti angakwanise lini kukhala na makhalidwe yamweya. Tsono kumbukirani kuti Yahova na gulu lace ambadikhirira lini kuti abale akhale wakulungamiratu pakulatiza makhalidwe yamweya. (1 Ped. 2:21) Ndipo ni mzimu wakucena wa Mulungu omwe un’dzakuthandizani kuti mukulise makhalidwe yamweya. (Afil. 2:13) Kodi pana khalidwe linango lomwe mukuwona kuti mun’funika kukhala nalo? Muuzeni Yahova mu mpembo. Fufudzani nkhani yomwe ikulewa bza khalidwero ndipo kumbirani malango kwa mkulu munango kuti akuthandizeni kuwona bzomwe mun’funika kucita kuti mukwanise kukhala na khalidwero. Khalani na cakulinga cakufuna kupitiriza kuthandiza abale. Pembani kwa Yahova kuti akuthandizeni na kukupfunzisani kuti mumbaphatisidwe basa m’gwere. (Zai. 64:8) Yahova an’dzakusimbani mukacita nyongo yakufuna kutumikira ninga mkulu. w24.11 25 ¶17-18

Palibe munthu omwe an’funika kukumbuka kuti ngwakuthemera kubveredwa ntsisi na Yahova thangwe rakuti watumikira Yahovayo magole mazinji. N’cadidi kuti Yahova ambatenda ndipo ambakumbukira bzinthu bzomwe ifepano tamucitira. Tsono iye adapereka Mwana wace kwa ifepano ninga mphaso sikuti ninga pagamento ya basa lomwe ifepano tamucitira. Tenepo bzingakhale bzakuphonyeka kukumbuka kuti ndife wakuthemera kulekereredwa na Yahova thangwe rakuti tamucitira bzinthu bzizinji. Tikakumbuka tenepoyo bzingathandauze ninga kuti Jezu akhafunikira lini kutifera. (Ndendemezerani na Agalatiya 2:21.) Mpostolo Paulo akhadziwa kuti Mulungu akhali lini wakungingimizidwa kuti amulekerere pikado zace. Tsono thangwe ranyi iye adacita bzizinji pakutumikira Yahova? Iye adacita bzimwebzi sikuti thangwe rakuti akhathemera kulekereredwa koma kuti alatize kuti akhatenda kudeka mtima komwe Yahova adamulatiza. (Aef. 3:7) Ninga Paulo, ifepano timbacita bzizinji pakutumikira Yahova kuti tilatize kutenda kwathu lufoyi lomwe iye adatilatiza sikuti thangwe ra kufuna kulekereredwa pikado zathu. w25.01 27 ¶5-6