Setembro

Tin’funika lini kundocita nyongo kuti tikhale wanthu wauzimu basi, koma tin’funikambo kupitiriza kukhala wanthu wauzimu. Tsono, tin’funika lini kukumbuka kuti pakuti ndife kale wanthu wauzimu mpsakufunika lini kukulisa uxamwali bwathu na Yahova. (1 Ako. 10:12) Tin’funika ‘kupitiriza kubziyeza’ kuti titsimikizire kuti tikupitiriza kukula mwauzimu. Mu tsamba lomwe mpostolo Paulo adanembera Akristau wa ku Kolose, iye adalatiza kuti iwo akhafunika kupitiriza kukhala wakukhwima mwauzimu. Napo kuti iwo akhali kale wakukhwima mwauzimu, Paulo adawauza kuti akhafunikira kukhala tceru kuti aleke kunamizidwa na nzeru za wanthu. (Akol. 2:6-10) Epafra, omwe bzikuwoneka kuti akhawadziwa bwino abale wa mu gwerelo, akhambapemba nthawe zentse kuti iwo apitirize kukhala “wakulimba mwauzimu.” (Akol. 4:12) Kodi nfundo njiponi pamwepa? Paulo pabodzi na Epafra adawona kuti iwo akhafunikira thandizo la Mulungu na kucita nyongo kuti apitirize kukula mwauzimu. Iwo akhafuna kuti Akristau wa ku Kolose apitirize kukhala wakukhwima mwauzimu napo acigumana na mabvuto. w24.04 6-7 ¶16-17

Tikapfunza kugopa Yahova, ifepano tin’dzamufuna kwene-kwene Yahovayo ndipo tin’dzatcenkha kucita cinthu comwe cingamusunamise. Bzimwebzi bzimbaticitisa kuti tifune kudziwa kusiyana komwe kulipo pakati pa cabwino na cakuipa na nkhani zacadidi na zakunama kuti tifunidwe na Yahova. (Mim. 2:3-6; Aheb. 5:14) Tikambagopa kwene-kwene wanthu, tingapambusidwe pa cadidi. Onani ciratizo ca atsogoleri 12 omwe adatumidwa na Yahova kuti akazonde Dziko Lakupiciridwa lomwe iye akhafuna kupasa Ajirayeri. Kwa azondi 10 wale, mantha yawo yakhali makulu kwene-kwene kuposa lufoyi lawo kwa Yahova. Iwo adauza abale wawo Ajirayeri kuti: “Tin’funika lini kuyenda kukamenyana na wanthu amwewale thangwe iwo mbamphanvu kwene-kwene kuposa ifepano.” (Num. 13:27-31) Mu kawonedwe ka wanthu, Akananiwo akhana mphanvu kwene-kwene. Bzimwebzi bzikhali bzacadidi. Tsono munthu omwe angadalewa kuti Ajirayeri angadakwanisa lini kukunda anyamadulanthaka wawo akhakumbukira lini Yahova. w24.07 9 ¶5-6

Kodi ifepano tingakhale na citsimikizo cakuti Yahova akatonga wanthu iye ambacita bzimwebzo mwakulungama? Inde! Abalahamu adabvesesa bwino kuti Yahova ni “muyeruzi wakulungama pa dziko lentse,” wanzeru na wantsisi. Iye adapfunzisa Mwana wace ndipo adamupasa udindo bwa kutonga wanthu wentse. (Juw. 5:22) Yahova na Jezu ambakwanisa kuwona bzomwe bziri mu mtima mwa munthu. (Mat. 9:4) Ndipopa, iwo nthawe zentse an’dzacita bzinthu “mwakulungama”! Tentsenefe mbatipitirizeni kukhulupira pa bzomwe Yahova ambacita. Ifepano timbadziwa kuti Yahova ndiye an’themera kuyeruza sikuti ifepano! (Zai. 55:8, 9) Na tenepo mbatipitirizeni kukhulupira momwe Mwana wace an’dzatongera wanthu kutsogoloku omwe ni Mambo omwe ambalatizambo makhalidwe yabwino ya Pai wace, yomwe ni cirungamo na ntsisi. — Zai. 11:3, 4. w24.05 7 ¶18-19

Tingapfunze kufunika kwa kukhala wanthu wacadidi tikakumbukira bzomwe bzidacitika pa ntsiku yakuyamba yomwe Jezu adagumana na Nataniyeri. Pomwe Filipi adamudziwikisa xamwali wace Nataniyeri kwa Jezu, Jezuyo akhamudziwa lini Nataniyeri. Koma iye adalewa kuti: “Onani Mjirayeri wacadidi, omwe mwa iye mulibe cinyengo.” (Juw. 1:47) Jezu adadabwa kwene-kwene na kusaya cinyengo kwa Nataniyeri. Nataniyeri akhali munthu wakuperewerambo ninga ifepano. Tsono iye akhali lini wacinyengo. Iye akhali wakukhulupirika mu bzinthu bzentse. Jezu adadabwa kwene-kwene na bzimwebzo ndipo adatenda Nataniyeri. Bzinthu bzizinji bzomwe bzimbafotokozedwa pa Salimo 15 bzimbalatiza momwe tin’funika kucitira bzinthu na wanthu winango. Salimo 15:3 ambalewa kuti mulendo mu tendi la Yahova ambalewa lini “gunkha na lirime lace, ambacitira lini bzinthu bzakuipa anzace, ndipo ambalewa lini kuipa xamwali wace.” Ifepano tikalewa kuipa munthu ayai kumunamizira, bzimwebzi bzingasunamise munthuyo. — Tiy. 1:26. w24.06 10 ¶7, 9; 11 ¶10

Imwepo mukakonzekera bwino upalizi, mun’dzacita lini mantha kuti mukapalizire. Jezu adakonzekeresa anyakupfunza wace pomwe akhanati kuwatumiza kuti akapalizire. (Luk. 10:1-11) Thangwe ra kuphatisa basa bzomwe Jezu adawauza, anyakupfunza wacewo adakhala wakukondwa thangwe ra bzomwe adakwanisa kucita. Kodi tingakonzekere tani kuti tikapalizire? Tin’funika kukumbukira bzomwe tingakalewelewe na mafala yathu-yathu na mu njira yomwe wanthu ambalewalewera. Kumbukirani momwe wanthu angakatawirire na bzomwe imwepo mungakafunikire kucita. Na tenepo, tikambaceza na wanthu tin’funika kumbawasekerera na kulewalewa nawo mwa uxamwali. w24.04 16 ¶6-7

Thangwe likulu lomwe limbaticitisa kuti tipalizire mafala yabwino ya Umambo ndakuti timbafuna Yahova Mulungu na dzina lace lakucena. Timbawona utumiki bwathu ninga njira yakutumbizira Mulungu wathu. Timbabveranambo na mafala yakuti: Ndimwe wakuthemera imwe Yahova Mulungu wathu, kupasidwa ulemerero, ulemu na mphanvu. Timbamupasa ulemu na ulemerero tikambauza wanthu kuti ndiye omwe ‘adalenga bzinthu bzentse’ nakuti tina moyo thangwe ndiye omwe adatipasa moyoyu. Timbamupasa mphanvu zathu Yahova tikambaphatisa basa nthawe yathu, mphanvu zathu na bzinthu bzomwe tinabzo kuti ticite ciri-centse comwe tingakwanise pa basa lakupalizira. (Mat. 6:33; Luk. 13:24; Akol. 3:23) Kulewa cadidi, timbafuna kuuza winango bza Yahova thangwe timbamufuna. Timbalimbikisidwa kuuza winango bza dzina lace na bzomwe dzina lacero limbathandauza. w24.05 17 ¶11

Yahova nthawe zentse ambabaira wale omwe mbakukhulupirika kwa iye. Iye ambatipasa mtendere na cikondweso ntsiku zino ndipo kutsogolo an’dzatipasa moyo wakusaya kumala. Ifepano timbathemba Yahova thangwe timbadziwa kuti iye anayo mphanvu yakucita bzimwebzi. Ndipopa timbapitiriza kucita nyongo pa kumunamata ninga momwe atumiki wace wa m’mbuyomu adacitira. Bzimwebzi ndibzo bzomwe Timotio adacita. (Aheb. 6:10-12) Iye akhakhulupira Mulungu wamoyo. (1 Tim. 4:10) Ndipopa, adacita nyongo yakuphata basa la Yahova na kuthandizambo abale. Kodi iye adacita tani bzimwebzi? Mpostolo Paulo adamupfunzisa kuti akhale mpfunzisi wabwino m’gwere na mu upalizi. Paulo adauzambo Timotio kuti akhale ciratizo cabwino kwa acikulire na maswaka. Iye adapasidwambo mautumiki manango yakunesa kuphatanidzambo kupereka malango yamphanvu koma yalufoyi kwa wale omwe akhafunikira. (1 Tim. 4:11-16; 2 Tim. 4:1-5) Timotio akhadziwa kuti Yahova akhawona basa lentse lomwe iye akhacita ndipo angadamubaira. — Aro. 2:6, 7. w24.06 22-23 ¶10-11

Kazinji-kazinji Yahova akhaphatisa basa aprofeta wace kuti acenjeze na kutsimula wanthu wace. Mwa ciratizo, Yahova adaphatisa basa Jeremiya kuti auze Ajirayeri kuti: “Bwerera kwa ine, iwe Jirayeri wakupanduka . . . Nin’dzakunyang’anisa lini na ukali, pakuti ndine wakukhulupirika . . . Nin’dzapitiriza lini kukhala na cakumtima mpaka kale-kale. Koma ndobvuma kuphonya kwako, pakuti wapandukira Yahova.” (Jer. 3:12, 13) Mwakuphatisa basa Joweli, Yahova adati: “Bwererani kwa ine na mtima wentse.” (Jow. 2:12, 13) Yahova adaphatisambo basa Zaiya kuti auze wanthu wace kuti: “Sambani ndipo bziceneseni, cosani bzinthu bzakuipa pa maso pangu, siyani kucita bzinthu bzakuipa.” (Zai. 1:16-19) Mwakuphatisa basa Ezekiyeli Yahova adabvunza kuti: “Kodi ine nimbakomedwa na infa ya munthu wakuipa? Ine nimbafuna kuti iye acinje makhalidwe yace kuti apitirize kukhala na moyo . . . Nimbakomedwa lini munthu akafa. Tenepo cinjani makhalidwe yanu kuti mukhale na moyo.” (Ezek. 18:23, 32) Yahova ambakomedwa kwene-kwene akawona kuti munthu wakungula, thangwe iye akufuna kuti wanthu wentse akhale na moyo wakusaya kumala! w24.08 9 ¶5-6

Atumiki wentse wa Mulungu ambatambira cakudya cauzimu, malango ndipo ambakhotcereredwa na iye. Cinthu comwe Yahova akucita kuti alatize kuti alibe tsankhulo n’cakuti iye akucitisa kuti Bibliya ligumanike m’bzirewedwe bzakusiyana-siyana kuzungulira pa dziko lentse la pantsi. Bibliya lidanembedwa mu bzirewedwe bzitatu: Cihebereu, Ciaramaiko na Cigerego. Kodi wale omwe ambawerenga Bibliya m’bzirewedwe bzimwebzi ndiwo omwe ali pa uxamwali bwakulimba na Yahova kuposa wale omwe ambalewa-lewa lini bzirewedwe bzimwebzi? Ne, ndibzo lini. (Mat. 11:25) Kuti tikhale atumiki wa Yahova tin’funika lini kupfunza kwene-kwene ayai kudziwa bzirewedwe bzomwe bzidaphatisidwa basa pakunemba Bibliya. Yahova ambacitisa kuti wanthu wentse kuzungulira pa dziko lentse la pantsi adziwe nzeru zace bziribe basa penu iwo adapfunza kwene-kwene ayai alibe kupfunza. Fala la Mulungu, Bibliya, lidasanduliziridwa m’bzirewedwe bzizinji ndipo bzimwebzi bzimbacitisa kuti wanthu wentse awone kuti mpsabwino kubvera bzomwe iye ambapfunzisa acikhala axamwali wace. — 2 Tim. 3:16, 17. w24.06 6-7 ¶13-15

Kupfudzidwa kwa mzinda wa Jeruzalemu komwe Jezu akhadalewa kukhadafendera. Akristau akhafunika kuphatisa basa nthawe yomwe ikhadasala kuti akulise makhalidwe yomwe ni cikhulupiro na kupirira. (Aheb. 10:25; 12:1, 2) Tsapanopali tin’gumana na mabvuto makulu kwene-kwene kuposa yomwe Akristau wacihebereu adagumana nayo. (Mat. 24:21; Apok. 16:14, 16) Onani malango yomwe Yahova adapasa Akristau amwewa yomwe yan’dzatithandizambo. Mpostolo Paulo adawalimbikisa kuti akhafunikira kupfunza mwakuzika Fala la Mulungu. (Aheb. 5:14–6:1) Mwakuphatisa basa Bzinembo Bzacihebereu, mpostolo Paulo adafotokozera Akristau wacidjuda kuti thangwe ranyi kanamatidwe kacikristau kakhali kapadzulu kuposa kacidjuda. Paulo akhadziwa kuti Akristauwo angadapfunza na kubvesesa bwino cadidi, iwo angadakwanisa kuzindikira bzipfunziso bzakunama acibzilamba. w24.09 8-9 ¶2-3; 10 ¶6

Anyakupfunza wa Jezu akhafunika kulimbikisidwa. Thangwe ranyi? Thangwe winango adasiya nyumba zawo, famidya zawo na malonda yawo kuti atewere Jezu aciphata naye basa nthawe zentse. (Mat. 19:27) Winango akhacitiridwa bzinthu bzakusaya cirungamo thangwe rakuti adasankhula kukhala anyakupfunza wa Jezu. (Juw. 9:22) Anyakupfunza wa Jezuwo adabvuma kucita bzentsenebzi thangwe rakuti akhakhulupira kuti iye ni Mesiya omwe adalewedwa kuti angadabwera pa dziko la pantsi pano. (Mat. 16:16) Tsono pomwe Jezu adaphedwa, iwo adakumbuka kuti bzomwe akhadikhirirabzo bzingadacitika lini. Jezu adawona kuti bzikhali bzakubveka kuti anyakupfunza wace akhale wakusunama thangwe ra kufa kwace, ndipo iye akhadziwa kuti kusunamako kukhathandauza lini kuti iwo akhalibe cikhulupiro. Ndipopa pomwe iye adalamusidwa adayambiratu kulimbikisa axamwali wace. Mwa ciratizo, iye adawonekera kwa Mariya Madalena pomwe iye akhalira pa nthutu ya Jezuyo. (Juw. 20:11, 16) Iye adawonekera kwa anyakupfunza awiri omwe akhayenda ku Emausi ndipo adawonekerambo kwa mpostolo Pedru. w24.10 13 ¶5-6

Abereki, thandizani wana wanu kuti ambafotokozere anzawo thangwe lomwe limbawacitisa kukhulupira kuti bzinthu bzidacita kulengedwa. Mungaceze na mwana wanu nkhani zakusiyana-siyana za msolo wakuti “Zimene Achinyamata Amadzifusa — Kodi Zinthu Zinachita Kulengedwa?” mu jw.org. Patsogolo pace, mwana wanuyo angasankhule nfundo zomwe akuwona kuti zingathandize wanthu winango kukhulupira kuti kuna Mulengi. Thandizani mwana wanuyo kufotokoza mu njira yakusaya kunesa na yakubveseseka mwanzace wa ku xikola akafuna kuceza naye bza nkhaniyo. Mwanzaceyo pinango angalewe kuti: “Ine nimbakhulupira bzomwe nimbawona. Ndikanati kumuwona Mulungu, ndipopa ningakhulupire lini kuti iye alipo.” Mwana wanuyo angatawire kuti: “Tiyezezere kuti iwepo ukufamba m’thengo ndipo ukuwona nyumba. Kodi ungakumbuke kuti nyumbayo idabzimanga yokha? Bzikuwonekeratu kuti iwepo ungatawirize kuti nyumbayo idacita kumangidwa na munthu. Penu nyumba idacita kumangidwa na munthu, tsono tanimbo dzikoli? Bzikuwonekeratu kuti iro lidacita kulengedwa!” w24.12 18 ¶16

Tentsenefe timbafunikira malango kuti ticite bzakusankhula bzabwino pa moyo wathu. Ifepano tingatambire malango yamweya kwa akulu wa gwere na Akristau wakukhwima mwauzimu. Munthu omwe akutipasa malangoyo akakhala wacikulire, tin’funika lini kukumbuka kuti malango yaceyo njakale-kale ndipo yangatithandize lini. Yahova akufuna kuti tipfunze na acikulire. Iwo ana magole mazinji kuposa ifepano, ambadziwa na kubvesesa bzinthu bzizinji ndipo ana nzeru kuposa ifepano. Mu nthawe za m’Bibliya, Yahova adaphatisa basa acikulire wakukhulupirika kuti alimbikise na kutsogolera wanthu wace. Iye adaphatisa basa acikulire ninga Mozeji, Davide na mpostolo Juwau. Iwo adakhala mu nthawe zakusiyana ndipo bzakucitika pa moyo wawo bzikhali bzakusiyanambo. Tsono pomwe iwo akhadasala pang’ono kufa, adapereka malango ya nzeru kwa maswaka. Amuna wakukhulupirikawa adalatiza kuti kubvera Mulungu ni cinthu cakufunika kwene-kwene. Tentsenefe tingagumane phindu mwakucezerana mafala yawoyo bziribe basa penu ndife maswaka. — Aro. 15:4; 2 Tim. 3:16. w24.11 8 ¶1-2

Mu nthawe ya Nowa, Yahova adaletsa wanthu kudya mulopa. (Gen. 9:3, 4) Pomwe padapita nthawe, iye adaletsambo Ajirayeri kudya mulopa. Munthu ali-wentse omwe angadadya mulopa ‘angadaphedwa.’ (Lev. 7:27) Jezu akhateweza lamulo limweri. (Mat. 5:17-19) Tenepo, iye angadakumbira lini Adjudawo kuti adye thupi lace cairo ayai kuti amwe mulopa wace caiwo. Jezu akhalewa mwakuyezezera ninga momwe adauzira mkazi Msamariya kuti: “Madzi yomwe inepano nin’dzamupasa, . . . yan’dzamupasa moyo wakusaya kumala.” (Juw. 4:7, 14) Jezu akhalewa lini kuti mkazi Msamariyayo akhandofunika kumwa madzi caiyo yomwe angadapasidwa na iye yacimucitisa kukhala na moyo wakusaya kumala. Mwakundendemerana na bzimwebzi, Jezu akhafuna lini kulewa kuti wanthu wa ku Kafarnau angadakhala na moyo wakusaya kumala angadandodya thupi cairo la Jezu na kumwa mulopa wace caiwo. w24.12 9 ¶4-6

Amuna wacikristau an’funika kucita mphole kuti aleke kutewezera makumbukidwe yakuphonyeka ya momwe dzikoli limbawonera akazi. Thangwe ranyi? Thangwe libodzi ndakuti bzomwe munthu ambakumbuka ndibzo bzomwe ambadzacita. Mpostolo Paulo adacenjeza Akristau wa ku Roma kuti: “Lekani kutewezera makumbukidwe ya m’dzikoli.” (Aro. 12:1, 2) Pomwe Paulo adawanembera mafala yamweya, iwo akhali kale Akristau kwa magole mazinji. Napo bzikhali tenepo, mafala ya Pauloya yakulatiza kuti Akristau winango mu gwere limwelire akhatewezera makhalidwe na kakumbukidwe ka ku dziko. Ndipopa Paulo adawauza kuti akhafunika kucinja makumbukidwe na makhalidwe yawo. Malango yamweya yakuyendambo kwa amuna wacikristau ntsiku zino. Bzakupasa ntsisi mpsakuti winango wa iwo ambatewezera makumbukidwe ya m’dzikoli ndipo bzimwebzi bzimbawacitisa kuti ambabonerese azikazawo. w25.01 9 ¶4

Ntsiku zino, akulu ambakhala wakutanganika kwene-kwene. Iwo ni apalizi. (2 Tim. 4:5) Iwo ambapereka ciratizo cabwino mwa kupalizira na nyongo, kukonzekeresa basa lakupalizira na kutipfunzisa momwe tingapalizirire bwino. Ndipo iwo ambalatizambo ntsisi mwa kutonga mwakusaya tsankhulo. Munthu akacita pikado ikulu m’gwere, akulu ambamuthandiza kuti akhale pomwe pa uxamwali bwakulimba na Yahova. Pa nthawe ibodzi-bodziyo, iwo ambacita ciri-centse kuti gwere lipitirize kukhala lidacena. (1 Ako. 5:12, 13; Agal. 6:1) Tsono akulu ambadziwika kwene-kwene ninga amakabusa. (1 Ped. 5:1-3) Iwo ambafotokoza bwino nkhani mwakuphatisa basa Bibliya, ambacita nyongo yakudziwa m’bale ali-wentse m’gwere na kucita ulendo bwa ubusa. Akulu winango ambathandizira basa lakumanga Nyumba za Umambo, kukonza-konza Nyumba za Umambo zomwe zadzongeka, kukonzekera mitsonkhano ya cigawo, kuphata basa m’Makomiti Yakucezerana na Nyumba za Ulapi na Mathimu Yakuzungira Atenda. Iwo ambacita bzentsenebzi napo kuti ana kale mabasa manango yakucita. Akulu ambaphata basa na nyongo kwene-kwene! w24.10 20 ¶9

M’Bibliya, fala lakuti “kulombola” limbathandauza kutsudzula munthu pambuyo pa kumupagaliri cakulombolera. Mpostolo Pedru adalewa kuti: “Imwepo mukudziwa kuti mulibe kupulumusidwa ku mkhalidwe wanu wakusaya basa omwe mudatambira kwa makolo yanu yakale na bzinthu bzakudzongeka ninga prata na oro, koma mudapulumusidwa na mulopa wakufunika kwene-kwene wa Kristu omwe uli ninga mulopa wa bira wakusaya cirema ne nthontsa.” (1 Ped. 1:18, 19) Thangwe ra ntsembe ya cakulombolera tingatsudzulidwe ku pikado na infa bzomwe bzimbatiboneresa. (Aro. 5:21) Timbatenda kwene-kwene Yahova na Jezu thangwe ra kutilombola na mulopa wa Jezu. w25.02 5 ¶15-16

Kodi tingakhale tani wakupenya ticitcenkha pikado? Onani bzomwe tingapfunze na mulumbwana omwe ambafotokozedwa pa Mimwani kapitulo 7. Iye adacita pikado na mkazi omwe ni puta. Vesi 22 limbalewa kuti mulumbwanayo adamutewera mkaziyo “mwadzidzidzi.” Tsono mavesi ya m’mbuyo yambalewa bzomwe bzidamufikisa pakucita pikado. N’ciyani comwe iye adacita? Cakuyamba, iye ‘adapita na mseu omwe [ukhali] pafupi na mphambano ya kuyenda ku mui kwa mkazi’ putayo usiku. Patsogolo pace, iye adapita na njira yakuyenda ku mui kwa mkaziyo. (Mim. 7:8, 9) Ndipo pomwe adawona mkaziyo, iye alibe kuthawa. Koma adabvuma kumpsompsonedwa naye na kutetekera pomwe iye akhalewa bza ntsembe yaciphatano yomwe akhadapereka. Pinango mkaziyu adalewa bzimwebzi kuti mulumbwanayo awone ninga kuti iye ni munthu wabwino. (Mim. 7:13, 14, 21) Bzingadakhala kuti iye alibe kucita bzinthu bzakusaya nzerubzi angadatcenkha kucita pikado. w24.07 16 ¶8-9; 19 ¶19

Yahova ambalekerera lini kuti pakati pa wanthu wace pacitike pikado zikulu-zikulu. Iye ambawona kuti anyapikado omwe alibe kukungula an’funika lini kucitiridwa “ntsisi” acipitiriza kucita bzinthu na atumiki wace wakukhulupirika. Napo kuti Yahova ngwa ntsisi, iye ambalekerera lini makhalidwe yakuipa. Mitemo yace pa nkhani ya cabwino na cakuipa imbacinja lini. (Djuda 4) Thangwe kucita bzimwebzi kungadacitisa kuti wanthu wentse wa m’gwere akhale pa ngozi. (Mim. 13:20; 1 Ako. 15:33) Napo bziri tenepo, tikupfunza kuti Yahova akufuna lini kuti munthu ali-wentse adzapfudzidwe. Nthawe zentse cakulinga cace n’cakufuna kupulumusa wanthu. Iye ambalatiza ntsisi kwa wanthu omwe acinja nzeru zawo ndipo akufuna kubwezeresa pomwe uxamwali bwawo na iye. (Ezek. 33:11; 2 Ped. 3:9) Ndipopa pomwe munthu wa ku Kolinto ule adakungula acisiya makhalidwe yace yakuipa, Yahova adaphatisa basa mpostolo Paulo kuti athandize gwere la ku Kolinto kubvesesa kuti munthuyo akhafunika kulekereredwa acitambiridwa na manja mawiri. w24.08 17 ¶7; 18-19 ¶14-15

Pa ciratizo ca mabira na mbuzi, Jezu adalewa bza kutongedwa kwa wanthu omwe ana mwayi wa kuthandizira abale wace wakudzozedwa. (Mat. 25:31-46) Jezu an’dzatonga mabira na mbuzi pa “citsautso cikulu,” pomwe Armagedo ikanati kuyamba. (Mat. 24:21) Ninga momwe makabusa ambasiyanisira mabira na mbuzi, Jezu an’dzasiyanisa wanthu omwe ambathandizira abale wace wakudzozedwa na wanthu omwe ambawathandizira lini. Yahova adaikha Jezu kuti akhale Mtongi, ndipo profesiya ya m’Bibliya imbalatiza kuti Jezu an’dzatonga mwacirungamo. (Zai. 11:3, 4) Jezu an’dzanyang’anisisa bzomwe munthu ali-wentse ambacita, kulewa, kukumbuka na momwe ambacitira bzinthu na Akristau wakudzozedwa. (Mat. 12:36, 37) Tenepo, Jezu an’dzadziwa wanthu omwe akhathandiza abale wace wakudzozedwa na basa lomwe iwo akhacita. Njira yakufunika kwene-kwene yomwe wanthu omwe ambandendemezeredwa na mabira ambathandizira nayo abale wace wa Kristu ndiyo kucita basa lakupalizira. w24.09 20-21 ¶3-4

Tingatsimikizire kuti bzomwe timbakhulupira mpsacadidi tikambabzindendemezera na bzomwe Bibliya limbalewa. Mwa ciratizo, mbatiwoneni bza tswaka lomwe likukumbuka kuti Mulungu ambaliwona lini kuti ndakufunika. Kodi iro lin’funika kukumbuka kuti Yahova ambaliwona lini kuti ndakufunika thangwe ra kuti likupenukira? Ne, tswakali lin’funika “[kuwonesesa] bzinthu bzentse” mwa kupfunza Bibliya kuti lidziwe momwe Yahova ambaliwonera. Pomwe tikuwerenga Fala la Mulungu “timbabva” Yahova akulewalewa nafe. Tsono kuti tibvesese momwe iye ambaiwonera nkhani yomwe ifepano tikuibvesesa lini bwino pambafunika nyongo. Tin’funika kupfunza nkhani ya m’Bibliya yomwe ikubverana na nkhani yomwe tikuibvesesa liniyo. Tingacite bzimwebzi mwakufufudza m’mabukhu yakusiyana-siyana yomwe gulu la Yahova limbatipasa. (Mim. 2:3-6) Tingapembe kwa Yahova kuti atitsogolere pomwe tikufufudza nakuti atithandize kubvesesa makumbukidwe yace pakulewa bza nkhaniyo. Tikamala tinganyang’ane nfundo za m’Bibliya zomwe zikubverana na nkhaniyo na kuwona momwe tingaziphatisire basa. w24.10 25 ¶4-5

Yahova an’dzasimba lini munthu ali-wentse omwe akucita nyongo kuti akhale mtumiki wakuthandiza penu akucita bzimwebzo thangwe ra mtima wakubzikuza. (1 Ako. 10:24, 33; 13:4) Pa nthawe inango, napo apostolo wa Jezu akhafuna kukhala na udindo koma na cakulinga cakuipa. Kumbukirani bzomwe mpostolo Tiyago na Juwau adacita. Iwo adakumbira Jezu kuti awapase mbuto yakulemekezeka mu Umambo bwace. Jezu alibe kukomedwa na bzomwe iwo adacitabzi. Ndipopa, iye adauza apostolo wentse 12 kuti: “Ali-wentse omwe an’funa kukhala mkulu pakati panu, akhale mtumiki wanu, ndipo ali-wentse omwe an’funa kukhala wakuyamba pakati panu, akhale kapolo wa wentse.” (Mar. 10:35-37, 43, 44) Abale omwe ambafuna kukhala mtumiki wakuthandiza na cakulinga cakufuna kutumikira winango ambathandiza gwere mu njira zizinji. — 1 Ates. 2:8. w24.11 15-16 ¶7-8

Lufoyi lin’dzaticitisa kuti timbacite bzinthu “bzakudekerambo winango” na kukhala wakubzicepesa pomwe tikucita bzakusankhula. (1 Ako. 10:23, 24, 32; 1 Tim. 2:9, 10) Tikacita bzimwebzi, tin’dzacita cakusankhula comwe cin’dzalatiza kuti timbafuna anzathu ndipo timbawalemekeza. Imwepo mukafuna kucita cakusankhula cikulu, mbakumbukirani bzomwe mun’dzafunika kucita kuti mucite bzinthu mwakubverana na bzomwe mwasankhulabzo. Jezu adatilimbikisa kuti tinati kucita cakusankhula, tin’funika ‘kuyamba kukhala pantsi’ kuti tiwone penu tin’kwanisa kucita cinthuco. (Luk. 14:28) Ndipopa pomwe mukanati kucita cakusankhula, cakuyamba mun’funika kukumbukira nthawe, bzinthu bzomwe mun’dzadzonga na nyongo yomwe mun’dzafunika kucita kuti cakusankhulaco cifambe bwino. Nthawe zinango bzingakhale bwino kuuzambo wanthu wa m’banja mwanu bza cakusankhulaco kuti ali-wentse awone bzomwe angacite kuti akuthandizeni. Thangwe ranyi bzimwebzi mpsakufunika? Thangwe bzin’dzakuthandizani kuzindikira bzinthu bzinango bzomwe mungafunike kucinja ayai bzingakupaseni mwayi wakuti muphatise basa nzeru yomwe mungapasidwe. Ndipo imwepo mukauza adzinza wanu bzinthu bzomwe mun’funa kucita na kutetekera malango yomwe iwo angakupaseni, iwo an’dzakhala wakukonzeka kukuthandizani pa cakusankhula canuco. w25.01 18-19 ¶14-15

Zaiya adafotokoza kuti n’thangwe ranyi “tin’funika kukondwa na kukomedwa” m’paraizo wauzimu. Paraizo wakuyezezerayu adakonzedwa na Yahova. (Zai. 65:18, 19) Tenepo, Yahova ambatiphatisa basa kuti tithandize wanthu kuti asiye mabungwe ya wanthu wa m’dzikoli kuti acite mbali ya paraizo wakudekayu. Timbakomedwa kwene-kwene na bzisimbo bzomwe timbakhala nabzo thangwe ra kukhala n’cadidi, ndipo bzimwebzi bzimbaticitisa kuti tiuzembo wanthu winango. (Jer. 31:12) Ndife wakukondwa ndipo timbatenda Yahova thangwe ra kukhala mu paraizo wauzimuyu. Bibliya limbapicira kuti ‘tin’dzamanga nyumba, ticikhala m’mwemo; tin’dzalima minda ya mipesa, ticidzadya bzisapo bzace;’ ndipo ‘tin’dzaphatira lini basa papezi’ thangwe tentse ‘tin’dzasimbidwa na Yahova.’ Yahova akutipicira moyo wakukhotcerereka, wabwino na wacadidi. Iye an’dzadziwiratu bzomwe munthu ali-wentse akufunikira ndipo ‘an’dzacita bzomwe camoyo centse cimbakhumba.’ — Zai. 65:20-24; Sal. 145:16. w24.04 22-23 ¶11-12

Ifepano timbacitisa kuti Yahova akhale Tsendwa lathu tikambamukhulupira na mtima wentse. Tina citsimikizo cakuti tikambamubvera napo pa nthawe za mabvuto, bzinthu bzin’dzatifambira bwino. (Zai. 48:17, 18) Tikambawona momwe Yahova akutithandizira tin’dzamukhulupira kwene-kwene ndipo tin’dzakhala na citsimikizo centse cakuti ndiye yekha omwe angatithandize kupirira mabvuto yentse napo yacikhala yakunesa. Ninga tsendwa likulu, makhalidwe na cakulinga ca Yahova bzimbacinja lini. (Malak. 3:6) Pomwe Adamu na Eva adamupandukira, iye alibe kucinja cakulinga cace. Mpostolo Paulo adalewa kuti Mulungu “angabzilambe lini yekha.” (2 Tim. 2:13) Bzimwebzi bzikuthandauza kuti bziribe basa bzomwe bzicitike ayai bzomwe wanthu angacite, Yahova ambacinja lini momwe ambacitira bzinthu, ambacinja lini bzakulinga bzace ayai mitemo yace. Ifepano tingakhulupire Mulungu omwe ambacinja lini ticikhala na citsimikizo cakuti iye an’dzatithandiza pa nthawe zakunesa nakuti iye an’dzakwanirisa mapiciro yace yentse yakutsogolo. — Sal. 62:6, 7. w24.06 27-28 ¶7-8

Penu imwepo muli pa umakhadzi, n’ciyani cingakuthandizeni kudziwa penu mun’lowolanadi ayai ne? Dziwanani bwino. Pinango pentse imwepo mwadziwa bzinthu bzinango kwa munthu omwe munaye pa umakhadziyo pomwe mukhanati kuyamba umakhadzibo. Koma tsapano imwepo muna mwayi wakudziwa “unthu bwakubisika bwa mu mtima.” Pomwe imwepo muli pa umakhadzi mun’dzadziwa uxamwali bomwe mwanzanuyo anabo na Yahova, makhalidwe yace na momwe iye ambakumbukira. Na kupita kwa nthawe, imwepo mungadzatawire mibvunzo ninga iyi: ‘Kodi munthu umweyu angakhale mwanzangu wabwino wa m’banja?’ (Mim. 31:26, 27, 30; Aef. 5:33; 1 Tim. 5:8) ‘Kodi ningakwanise kumulatiza lufoyi lomwe iye akufunikira na kumubvesesa ndipo iye acicitambo bzibodzi-bodzibzo kuna inepano? Kodi mpsakupusa kwa inepano kumulekerera bzakuphonya bzace?’ (Aro. 3:23) Pomwe mukudziwana, lekani kumbandokumbukira kundendemerana komwe munako, koma mbawonani penu mun’dzakwanisa kuzolowerana bzakucita. w24.05 27 ¶5

Mambo Davide adacita pikado ikulu kwene-kwene. Tsono pomwe mprofeta Natani adamuuza momwe Yahova adabvera na pikadoyo, Davide adabzicepesa ndipo adakungula. (Sal. 51:3, 4, 17, onani mafala yomwe yali padzaulu pa kapituloyi.) Mambo Ezekiya adaphonyerambo Yahova. (2 Nkha. 32:25) Ndipo ninga Davide, iye adabzicepesa ndipo adakungula. (2 Nkha. 32:26) Thangwe ra bzimwebzi, Yahova adamuwona ninga mambo wakukhulupirika omwe “adapitiriza kucita bzomwe mpsabwino.” (2 Ama. 18:3) Kodi tikupfunza ciyani? Tikacita pikado, tin’funika kukungula ticileka kuzibwerezera pomwe. Tsono tani tikatambira malango kwa akulu pa cinthu comwe cikuwoneka kuti n’cing’ono? Tin’funika lini kukumbuka kuti Yahova akutifuna lini ayai kuti akuluwo akutiwenga. Napo amambo wa Ajirayeri akhafunikirambo kupasidwa malango. (Aheb. 12:6) Tikapasidwa malango, tin’funika (1) kubvuma malangoyo mwakubzicepesa, (2) kucinja na (3) kupitiriza kutumikira Yahova na mtima wentse. Tikakungula pikado zathu Yahova an’dzatilekerera. — 2 Ako. 7:9, 11. w24.07 21 ¶8; 22 ¶9, 11

Munthu omwe wacita pikado ambacosedwa m’gwere akasaya kubvuma thandizo lomwe akulu akuyezera kumupasa kuti akungule. (2 Ama. 17:12-15) Bzicito bzace bzikulatiza kuti iye akufuna lini kuteweza mitemo ya Yahova. (Deut. 30:19, 20) Cidziwiso cimbaperekedwa ku gwere cakulewa kuti iye ni Mboni lini pomwe ya Yahova. Cidziwisoci cimbaperekedwa sikuti na cakulinga cakufuna kupasisa manyazi munthuyo. Ico cimbaperekedwa ku gwere kuti abale ateweze malango ya m’Bibliya yakuti ‘aleke kubverana’ na munthuyo, “ne kudya naye” munthu umweyo. (1 Ako. 5:9-11) Thangwe ranyi Yahova adapereka malango yamweya? Mpostolo Paulo adanemba kuti: “Cakufufumisa cing’ono-ng’ono cimbafufumisa ufa bwentse bwakumunyidwa.” (1 Ako. 5:6) Munthu wakusaya kukungula akasaya kucosedwa m’gwere, wanthu winango angakumbuke kuti mpsakufunika lini kuti iwo abvere malamulo ya Yahova. — Mim. 13:20; 1 Ako. 15:33. w24.08 27 ¶3-4

Napo ndife wanthu wakuperewera, ifepano tingatewezerembo Yahova pa nkhani ya kupasa mphanvu wanthu winango. Tsono ifepano tingakwanise lini kupasa munthu mphanvu zathu caizo. Koma tingaphatise basa mphanvu zathu kuti tithandize winango. Mwa ciratizo, tingathandize abale na mpfumakazi wacikulire ayai wale omwe akuduwala mwa kuwasamalirira nyumba yawo ayai kuyenda kukawagulira bzinthu. Ayai tingabzipereke kuti tikathandize kucenesa na kukonza-konza bzinthu pa Nyumba ya Umambo. Lekani kuyebwa bza mphanvu yomwe mafala yanayo. Kodi mukukumbukira munthu munango omwe angalimbikisidwe mukamuuza kuti mumbatenda bzomwe iye ambacita? Kodi m’gwere mwanu muna munthu omwe mukuwona kuti akufuna kutsangalazidwa? Penu munti inde, thangwe ranyi mun’saya kucita ciri-centse kuti mumufenderere kuti iye adziwe kuti mumbacita naye thupo? Mungamuzungire, kumuligaliri, kumutumizira karta ayai kumunembera mensaje. Lekani kucita thupo kwene-kwene na bzomwe mungamuuze. Mafala yakucepa yakufotokozedwa mwalufoyi ni yomwe m’bale ayai mpfumakazi yanuyo ikufunikira kuti ipitirize kukhala yakukhulupirika na kubzibva bwino pa bvuto lomwe akugumana nalo. — Mim. 12:25; Aef. 4:29. w24.09 28 ¶8-10

Penu imwepo mukutumikira kale ninga mtumiki wakuthandiza, bzikuwonekeratu kuti mwakulisa kale makhalidwe yomwe yambafunikira kuti munthu akhale mkulu. Kodi imwepo mukufuna kucita “basa labwino” lomwe akulu ambacita? Kodi ni basa liponi lomwe akulu ambacita? Iwo ambatsogolera basa lakupalizira, ambacita ulendo bwa ubusa, kupfunzisa mwa kufotokoza nkhani pa mitsonkhano ya gwere na kulimbikisa gwere na bzomwe ambalewa na kucita. Ndipopa Bibliya limbacemera akulu kuti “amuna ninga mphaso.” (Aef. 4:8) N’ciyani comwe imwepo mun’funika kucita kuti mukhale mkulu? Makhalidwe yomwe munthu ambafunikira kuti akhale mkulu njakusiyana na makhalidwe yomwe munthu ambafunikira kuti agumane basa. Penu mwayenda kukanyang’ana basa ndipo muna makhalidwe yomwe patrau omwe mun’funa kuphatira basayo an’funa, imwepo mumbapita basalo. Tsono kuti imwepo mukhale mkulu wa gwere, mun’funikira kukhala na makhalidwe manango sikuti kundokhala na luso lakupfunzisa na kupalizira basi. Imwepo mun’funika kukulisa makhalidwe yomwe akulu an’funika kukhala nayo yomwe yali pa 1 Timotio 3:1-7 na Tito 1:5-9. w24.11 20 ¶1-3