Outubro

Akulu, anyakunyang’anira dera, mthambi na Bungwe Lakutonga nthawe zentse ambatipasa malango yomwe yambatithandiza kutumikira Yahova. Tsono nthawe zinango tingabvesese lini thangwe lomwe abalewo akutipasira malangoyo. Tingayambe kupenukira penu malangoyo njabwinodi kwa ifepano ayai ne ndipo tingayambembo kuwona kuperewera komwe abale omwe atipasa malangoyo anako. Bzimwebzi bzingaticitise kuleka kufamba mwa cikhulupiro. Tikafamba mwa cikhulupiro pomwe tatambira malango m’gulu la Yahova timbalatiza kuti timbathemba Yahova kuti ndiye omwe akutsogolera gulu lace ndipo ambadziwambo momwe bzinthu bziriri pa moyo wathu. Bzimwebzi bzimbacitisa kuti tibvere mwakamfulumize ticikhalambo na makumbukidwe yabwino. (Aheb. 13:17) Timbadziwa kuti tikateweza malango timbathandizira kuti gwere lipitirize kukhala lakubverana. (Aef. 4:2, 3) Ndipo timbakhulupirambo Yahova thangwe timbadziwa kuti napo kuti wanthu omwe ambatitsogolera mbakuperewera, tikabvera iye an’dzatisimba. (1 Sam. 15:22) Ndipo pa nthawe yakuthemera, iye an’dzakonza cinthu ciri-centse comwe cin’funika kukonzedwa. w25.03 23-24 ¶13-14

Tikukhala mu nthawe yakudekeza kwene-kwene! Ntsiku iri-yentse, tikuwona kukwanisika kwa profesiya ya m’Bibliya. Mwa ciratizo, tikuwona kuti “mambo wa ku norte” na “mambo wa ku suli” akunesana okha-okha thangwe rakuti wentse akufuna kutonga dziko la pantsi. (Dan. 11:40) Tikukwanisa kuwona kuti mafala yabwino yakupaliziridwa pa dziko lentse la pantsi, ndipo wanthu azinji akusankhula kutumikira Yahova. (Zai. 60:22; Mat. 24:14) Ndipo tikutambira cakudya cizinji cauzimu “pa nthawe yakuthemera.” (Mat. 24:45-47) Yahova akutithandiza kubvesesa bwino bzinthu bzakufunika bzomwe bzin’dzacitika kutsogolo kuno. (Mim. 4:18) Tingakhale na citsimikizo centse cakuti citsautso cikulu cikadzayamba, tin’dzadziwa bzomwe tin’funika kucita kuti tipitirize kukhala wakukhulupirika na kupitirizambo kukhala wakuphatana pa nthawe yakunesayi. Tsono, tin’funika kuzindikira kuti pana bzinthu bzinango bzomwe tin’dziwa lini pakulewa bzakutsogolo. w24.05 8 ¶1-2

Pa vesiri, Davide adafotokoza bza magunkha. Kodi magunkha n’ciyani? Magunkha ni kulewa bzinthu bzakunama pakulewa bza munthu na cakulinga cakuti tidzonge mbiri yace. Salimo 15:3 ambalewa kuti alendo wa mu tendi la Yahova ambadzonga lini mbiri ya axamwali wawo ayai kuwanyazisa. (Sal. 15:1) Tsono nthawe zinango mwakusaya kuzindikira tingayambe kudzonga mbiri ya munthu munango mwa kulewa nkhani zakuipa pakulewa bza munthuyo. Onani bzakucitika ibzi: (1) mpfumakazi yasiya kutumikira ninga mpainiya, (2) banja lasiya kutumikira pa Beteli ayai (3) m’bale wasiya kutumikira ninga mkulu ayai mtumiki wakuthandiza. Bzingakhale bzakuphonyeka kwene-kwene ifepano kulewa kuti pinango bzimwebzi bzawacitikira thangwe rakuti iwo acita cinthu cinango cakuphonyeka. Pana mathangwe mazinji yomwe yangacitise kuti iwo asiye utumiki bwawo ndipo ifepano tingayadziwe lini. Ndipopa mulendo wa mu tendi la Yahova “ambacitira lini bzinthu bzakuipa anzace, ndipo ambalewa lini kuipa axamwali wace.” w24.06 11 ¶11-13

Kuti tikwanise kumbagopa Yahova, nthawe zentse tin’funika kumbakumbukira bzomwe bzimbamukondwesa tikakhala tikucita cakusankhula. Tikakhala tikuwerenga nkhani za m’Bibliya, tin’funika kumbabzibvunza kuti: ‘Bzimwebzi bzingadakhala bzikucitikira inepano, kodi ningadacita cakusankhula ciponi?’ Mwa ciratizo, kumbukirani kuti imwepo mukubva mafala yakutepesa yomwe azondi 10 wale adalewa pambuyo pa kuzonda dziko lomwe Yahova akhadapicira Ajirayeri. Kodi mungadakhulupira bzomwe iwo akhalewabzo thangwe ra kugopa munthu ayai lufoyi lanu kwa Yahova lakufuna kumukondwesa lingadakucitisani kuti muleke kukhala na mantha? Ajirayeri azinji alibe kuwona kuti bzomwe Djoswa na Kalebe akhawauza bzikhali bzacadidi. Thangwe ra bzimwebzi, iwo adaluza mwayi wakupita mu Dziko Lakupiciridwa. — Num. 14:10, 22, 23. w24.07 10 ¶7

Gomeri, omwe akhali mkazi wa Ozeya adasiya bayace Ozeya aciyamba kukhala na amuna winango. Kodi bzingadakwanisika lini kuti iye akukungule? Yahova omwe ambawona bzomwe bziri mu mtima mwa munthu adauza Ozeya kuti: “Yamba pomwe kufuna mkazi omwe akufunidwa na mwamuna munango, mkazi omwe akucita uputa. Umufune ninga momwe Yahova ambafunira Ajirayeri, napo kuti iwo ayamba kunamata mirungu inango.” (Oze. 3:1; Mim. 16:2) Onani kuti pa nthawe imweyi, mkazi wa Ozeyayo akhapitiriza kucita bzinthu bzakuipa ayai akhacita pikado. Napo bzikhali tenepo, Yahova adauza Ozeya kuti akhafunikira kumunyang’ana acimulekerera nakuti abwererane naye acikhala pomwe mkazace. Mwa njira ibodzi-bodziyi, Yahova akhalibe kusiya mtundu wa Ajirayeri napo kuti iwo akhamubvera lini ndipo akhazindikira lini kuphonya kwawo. Napo kuti iwo akhacita bzinthu bzakuipa kwene-kwene, Yahova akhapitiriza kuwafuna. Ndipo akhafuna kuwathandiza kuti akungule acicinja bzinthu pa moyo wawo. Ciratizo cimweci cikulatiza kuti Yahova ambakhala m’mambuyo mwa wanthu omwe akupitiriza kucita pikado kuti ayezere kuwathandiza kuti iwo akungule. w24.08 10 ¶7

Adjuda omwe adadzakhala Akristau akhafunika kucinja bzinthu pa moyo wawo ndipo kucita bzimwebzi kukhali lini kwakupusa. Kale-kale Adjuda akhali mtundu wakusankhulidwa na Yahova. Mzinda wa Jeruzalemu ukhali likulu lomwe likhaimira Umambo bwa Mulungu pa dziko lentse la pantsi ndipo templo ku Jeruzalemuko ikhali mbuto ya kunamatira Yahova. Adjuda wentse akhateweza Malamulo ya Mozeji na mitemo yomwe atsogoleri wa magereja akhadayakhazikisa. Pakhana malamulo yakulewa bza cakudya, mgwatidwe na momwe angadambacitira bzinthu na wanthu omwe akhali lini Adjuda. Tsono pomwe Jezu adafa, Yahova akhabvuma lini pomwe ntsembe zomwe zikhaperekedwa mu templo. Bzimwebzi bzidakhala bzakunesa kwene-kwene kwa Adjuda omwe adadzakhala Akristau, omwe akhadazolowera kuteweza Malamulo ya Mozeji. (Aheb. 10:1, 4, 10) Napo kwa Akristau wakukhwima mwauzimu, ninga mpostolo Pedru, bzidawanesambo kuteweza kucinjaku. (Mab. 10:9-14; Agal. 2:11-14) Akristau adayamba kuzunzidwa na atsogoleri wacidjuda thangwe ra bzomwe akhakhulupirabzo. w24.09 9 ¶4

Yahova akapasa basa atumiki wace, iye ambafuna kuti iwo alicite basalo. (1 Ako. 14:33) Mwa ciratizo, bzomwe Mulungu akufuna mpsakuti mafala yabwino ya Umambo yapaliziridwe pa dziko lentse la pantsi. (Mat. 24:14) Yahova adapasa udindo Jezu kuti atsogolere basa limweri. Ndipo Jezu adalewa kuti bzimwebzi bzikhafunika kucitika mu njira yakulinganizika. Pomwe magwere yadakhazikisidwa mu nthawe ya Akristau wakuyambirira, padasankhulidwa akulu kuti ambatsogolere na kupereka malango. (Mab. 14:23) Bungwe la akulu wa ku Jeruzalemu omwe akhali apostolo lidacita bzakusankhula bzomwe gwere lentse likhafunika kubziteweza. Pomwe magwere yadakhazikisidwa ku mbuto zakusiyana-siyana, akulu wa m’magwereyo akhadziwisa abale bza nkhaniyo. (Mab. 15:2; 16:4) Thangwe ra kubvera malango yomwe akhapasidwa, ‘magwereyo yakhayenda yacithumizirika ntsiku na ntsiku.’ — Mab. 16:5. w24.04 8 ¶1

Kumacibese-bese kwa ntsiku ya 16 Nisani, akazi winango wakukhulupirika adayenda komwe mtembo wa Jezu ukhadaikhidwa. (Luk. 24:1, 10) Bwerani tiwone bzomwe bzidacitikira mkazi m’bodzi wakucemeredwa Mariya Madalena. Pomwe Mariya adafika pa nthutupo adawona kuti pakhalibe cinthu. Iye adathamanga kuyenda kukauza Pedru na Juwau ndipo adawatewera pomwe iwo akhathamanga kuyenda komwe kukhana nthutuko. Pomwe amunawo adatsimikizira kuti nthutuyo ikhalibe cinthu, iwo adabwerera ku mui. Tsono Mariya adasala kumweko akulira. Iye akhadziwa lini kuti Jezu akhamuwona. Jezu adawona misozi ya mkazi wakukhulupirikayu ndipo adamubvera ntsisi. Iye adawonekera kwa Mariya ndipo adacita cinthu kuti amulimbikise. Iye adalewalewa naye ndipo adamupasa basa lakuti akauze abale wace kuti Jezu akhadalamusidwa. — Juw. 20:17, 18. w24.10 13 ¶7

Mozeji adatumikira ninga mprofeta, mtongi, mtsogoleri na munembi. Iye adatsogolera mtundu wa Ajirayeri mwa kuwacosa mu Edjipito ndipo adawonambo bzakudabwisa bzizinji bza Yahova. Yahova adamuphatisambo basa kuti anembe mabukhu maxanu ya m’Bibliya, Salimo 90 ndipo pinango adanembambo Salimo 91. Bzikuwoneka kuti ndiye omwe adanembambo bukhu la Djobi. Pomwe Mozeji akhana magole 120 ndipo akhadasala pang’ono kufa, iye adatsonkhanisa Ajirayeri wentse kuti awakumbuse bzinthu bzomwe iwo akhadawona Yahova akuwacitira. Iwo adawona bzakudabwisa bzizinji bzomwe Yahova adacita na momwe adalangira Aedjipito. (Eki. 7:4) Iwo adafamba na pakati pa Nyanza Ifuira yomwe ikhadagawanika ndipo adawonambo kupfudzidwa kwa acikunda wa Farawo. (Eki. 14:29-31) Mu dambo, Yahova adawakhotcerera na kuwasamalira. (Deut. 8:3, 4) Pomwe akhadasala pang’ono kupita mu Dziko Lakupiciridwa Mozeji adawona kuti bzikhali bwino kuti aphatise basa mpata wakumalizira omwe akhanawo kuti alimbikise wanthuwo. w24.11 8-9 ¶3-4

Bzomwe Jezu adalewa pa Cilaliro ca Mbuya mpsakusiyana na bzomwe adauza thimu la wanthu ku Galileya. Mafala yomwe Jezu adayalewa pa Cilaliro ca Mbuya yakulewa bza wanthu ang’ono-ng’ono. Pomwe Jezu akhali ku Galileya mu gole la 32, wanthu azinji omwe akhalewalewa nawo wale akhandofuna cakudya. Tsono iye adawathandiza kubvesesa kuti pakhana cinthu cakufunika kwene-kwene kuposa cakudya, cinthu comwe cingadawapasa moyo wakusaya kumala. Ndipo Jezu adalewa kuti wale omwe akhadafa angadadzalamusidwa acidzakhala na moyo wakusaya kumala. Mwakusiyana na bzomwe adalewa pa Cilaliro ca Mbuya ku Galileya, Jezu akhalewa lini bza bzisimbo bzomwe wanthu ang’ono-ng’ono okha ndiwo omwe angadatambira. Iye akhalewa bza bzisimbo bzomwe wanthu wentse angadakwanisa kutambira. w24.12 11 ¶10-11

Yahova ambawenga munthu wa ndewo. (Sal. 11:5) Yahova ambakomedwa lini na mwamuna omwe ambamenya mkazace. (Malak. 2:16) Penu Mwamuna ambaboneresa mkazace uxamwali bwace na Yahova bungadzongeke. Ndipo bzimwebzi bzingacitise kuti Yahova aleke kubva mipembo yace. (1 Ped. 3:7) Amuna winango ambalewalewa na akazawo mwa ukali ndipo ambalewa mafala yomwe yambawasunamisa. Tsono Yahova ambawenga “ukali, ciya, kupopota [na] mafala yakupusa.” (Aef. 4:31, 32) Mwamuna omwe ambalewalewa na mkazace mwa ukali ambandodzonga lini banja lace, koma ambadzongambo uxamwali bwace na Yahova. (Tiy. 1:26) Ndipo bzimwebzi bzikuphatanidzambo mwamuna omwe ambawona pornografia. Iye ambadzonga uxamwali bwace na Yahova ndipo ambalatizambo kuti ambalemekeza lini mkazace. Yahova ambafuna kuti mwamuna akhale wakukhulupirika kwa mkazace. Mwamuna omwe ngwakukhulupirika angacite lini upombo na mkazi munango ne kukumbukira kucita bzimwebzi. Jezu adalewa kuti mwamuna omwe ambapitiriza kunyang’anisisa mkazi mpaka kumukhumba wacita naye kale upombo “mu mtima mwace.” — Mat. 5:28, 29. w25.01 9 ¶6-8

Kuwonedwa kukhala wakulungama kumbathandauza kuti Yahova ambatiuza lini kuti tipagali pikado zomwe tidacita. Napo kuti iye ambacita bzimwebzi, ambacinja lini malamulo yace yakulungama. Iye ambatiwona lini kuti ndife wakulungama thangwe ra kuti tikuthemera ayai kuti ambandosiya tenepo pikado zathu. Koma iye ngwakukonzeka kutilekerera pikado zathu thangwe timbalatiza kuti timbakhulupira bzomwe Yahova na Mwana wace, Jezu, adaticitira pakucita makonzedwe ya cakulombolera. (Aro. 3:24) Kodi ni phindu liponi lomwe timbakhala nalo Yahova akatiwona kukhala wakulungama? Winango ambagumana phindu thangwe adasankhulidwa kuti akatonge pabodzi na Jezu kudzulu na kukhala wana wa Mulungu. (Tito 3:7; 1 Juw. 3:1) Pikado zawo zalekereredwa. Bziri ninga kuti alibe kucita pikado iri-yentse ndipo mwa njira imweyi mbakuthemera kukatonga mu Umambo bwa Mulungu. (Aro. 8:1, 2, 30) Winango omwe adawonedwa kukhala wakulungama an’dzakhala na moyo mpaka kale-kale pano pa dziko la pantsi. Yahova adalekerera pikado zawo ndipo iwo ni axamwali wace. — Tiy. 2:21-23. w25.02 5 ¶17; 5 ¶18

Mbatiwoneni bzomwe mpostolo Pedru adacita nthawe inango bzomwe bzimbalatiza kuti akhakumbuka lini ninga momwe Yahova ambakumbukirira. Ni pomwe Jezu adauza apostolo wace kuti iye akhafunikira kuyenda ku Jeruzalemu komwe angadaboneresedwa na atsogoleri wa magereja na kuphedwa. (Mat. 16:21) Pedru akhadziwa kuti Jezu akhali Mesiya omwe angadadzapulumusa wanthu wa Mulungu. Ndipopa bzidakhala bzakunesa kwa iye kukhulupira kuti Yahova angadalekerera kuti Jezu aphedwe. (Mat. 16:16) Tenepo Pedru adatenga Jezu aciyenda naye pambali acimuuza kuti: “Lekani kulewa bzinthu bzimwebzi Mbuya; bzimwebzi bzin’kucitikirani lini ne na pang’onopo.” (Mat. 16:22) Pedru alibe kubverana na Jezu pa nkhaniyo thangwe Pedruyo akhakumbuka lini ninga momwe Yahova akhakumbukira. Pinango Pedru akhana cakulinga cakufuna kuthandiza Jezu, tsono Jezuyo adalamba malango yaceyo. Thangwe ranyi? Thangwe Jezu akhadziwa kuti akhafunika kubonera na kufa kuti acite bzomwe Yahova akhafuna. Tikupfunza nfundo yakufunika na nkhani imweyi. Yahova akhafuna lini kuti Jezu apereke moyo wace mwakusaya kubonerera. Na bzimwebzi, Pedru adapfunza kumbakumbuka ninga momwe Yahova ambakumbukira. w25.03 9 ¶5-6

Kodi imwepo mudasunama kwene-kwene thangwe rakuti mwacitiridwa bzinthu bzakusaya cirungamo ayai kunamizidwa na munthu omwe mumbamukhulupira? Pinango munthu angakucitireni bzinthu bzomwe bzingakuwaweni kwene-kwene, tsono dziwani kuti Pai wanu wa kudzulu Yahova ambakufunani kwene-kwene. Penu imwepo mudasiyidwa ayai kulambidwa na mwanzanu wa m’banja, mungatsangalazidwe na mafala yomwe Davide adayalewa mu vesi la lero. N’ciyani comwe Yahova ambacita kuti athandize wanthu omwe akukumbuka kuti bzinthu bzin’dzawafambira lini pomwe bwino kutsogolo? Ninga pai walufoyi omwe ambakumbatira mwana wace omwe akugumana na mabvuto kuti amutsangalaze, Yahova “ali pafupi” na ifepano. Iye nthawe zentse ambatibvera ntsisi ndipo ngwakukonzeka kutithandiza tikakhala tidasunama kwene-kwene thangwe rakuti munthu omwe timbamufuna kwene-kwene watisiya ayai watilamba. Yahova ambafuna kutitsangalaza na kuderekhesa mtima wathu tikakhala tikuwawidwa kwene-kwene. Iye ambatipasa bzinthu bzizinji bzomwe bzimbatithandiza kukumbukira momwe bzinthu bzin’dzakhalira kutsogolo. Bzinthu bzimwebzi bzimbatithandiza kupirira mabvuto yomwe tikugumana nayo. — Zai. 65:17. w24.12 23 ¶13-14

Ntsiku zino, akulu ana citsimikizo cakuti Yahova ambawona bzentse bzomwe iwo ambacita ndipo ambawatenda. Kupambula maulendo ya ubusa, kupfunzisa na kupalizira, iwo ambathandizirambo basa lakumanga-manga na kuthandizirambo pakagwa malengwa ya pantsi. Winango ambatumikira m’Mathimu Yakuzungira Atenda ayai Komiti Zakucezerana na Nyumba za Ulapi. Akulu omwe ambacita basa limweri ambadziwa kuti gwere nda Yahova. Iwo ambacita nyongo pa basa lawo ndipo ambakhala na citsimikizo cakuti Yahova an’dzawabaira. (Akol. 3:23, 24) Ni abale lini wentse omwe angatumikire ninga akulu. Tsono, tentsenefe tingam’pase cinthu Yahova. Mulungu ambakomedwa kwene-kwene ifepano tikacita ciri-centse kuti timutumikire. Iye ambawona bzakupereka bzomwe timbacita bza basa la pa dziko lentse napo bzikhale bzakucepa. Ndipo ambakomedwa akawona kuti tacita ciri-centse kuti tilekerere abale wathu. Napo kuti mungawone kuti mun’kwanisa lini kucita bzizinji pakutumikira Yahova, mungakhale na citsimikizo cakuti iye ambawona nyongo yomwe mumbacita. Thangwe ra bzimwebzi, iye ambakufunani kwene-kwene ndipo an’dzakubairani. — Luk. 21:1-4. w24.06 23 ¶12-13

Nkhani yomwe Salomau adalewayi ikulatiza bzomwe bzingacitikire mtumiki ali-wentse wa Yahova. Iye angacite pikado ikulu ndipo akamala aciwona ninga kuti bzentse bzacitika mwadzidzidzi ayai angalewe kuti “Ndikudziwa lini kuti bzacitika tani.” Tsono, iye akakumbukira bwino-bwino bzomwe bzacitikabzo an’dzakwanisa kuwona kuti pana bzinthu bzakusaya nzeru bzomwe bzamucitisa kufika pa kucita pikadoyo. Bzinthubzo bzingakhale axamwali wakuipa, masenzeka ayai bzakutsangalaza bzakuipa, mbuto zakuphonyeka zomwe ambayenda ayai mawebisaite yomwe iye ambafuna kupita. Pinango-pentse iye akhadasiyambo kupemba, kuwerenga Bibliya, kuyenda ku mitsonkhano na kuyenda mu upalizi. Ninga mulumbwana omwe ambafotokozedwa pa Mimwani ule, iye alibe kucita pikadoyo “mwadzidzidzi.” Kodi tikupfunza ciyani na nkhani imweyi? Tin’funika lini kundotcenkha kucita pikado, koma tin’funikambo kutcenkha bzinthu bzentse bzomwe bzingatifikise pa kucita pikado. Bzimwebzi ndibzo bzomwe Salomau adafotokoza. — Mat. 5:29, 30. w24.07 16 ¶10-11

Kodi cuma cimweci n’ciponi? Ni basa la kupalizira mafala yabwino ya Umambo. (2 Ako. 4:1) Kodi bzombo bza dongo bzimbaimira yani? Bzimbaimira atumiki wa Mulungu omwe ambapalizira mafala yabwino kwa wanthu. Mu nthawe ya Paulo, anyakugulisa malonda akhaphatisa basa bzombo bza dongo kuti anyamulire bzinthu bzakufunika ninga cakudya, vinyu na kobiri. Mwakundendemerana na bzimwebzi, Yahova ambatiphatisa basa kuti tipalizire mafala yabwino. Na thandizo la Yahova, tin’dzagumana mphanvu kuti tipalizire. Nthawe zinango, tingagope kutsutsidwa. Kodi tingacite tani kuti tikunde mayezo yamweya? N’ciyani comwe apostolo adacita pomwe adauzidwa kuti aleke kupalizira? M’mbuto mwakugopa, iwo adakumbira Yahova kuti awathandize kupitiriza kulewalewa mwakukhwimika. Ndipo Yahova adatawira mpembo wawoyo pa nthawe imweyoletu. (Mab. 4:18, 29, 31) Imwepombo mukacita mantha, mun’funika kukumbira Yahova kuti akuthandizeni kukunda mantha na kukulisambo lufoyi lanu kuna wanthu. w24.04 16 ¶8-9

Lufoyi lathu kwa Yahova limbaticitisa kuti ticenese dzina lace. Bzimwebzi bzimbathandauza kuti tin’funika kuuza wanthu winango kuti bzomwe Sathani adalewa pakulewa bza Yahova mpsakunama. (Gen. 3:1-5; Djob. 2:4; Juw. 8:44) Pomwe tikucita basa lakupalizira, timbakhala wakukonzeka kukhotcerera Mulungu na kulewa cadidi pakulewa bza iye kuna wentse omwe akufuna kubvesera. Tikufuna kuti wanthu wentse adziwe kuti khalidwe lace likulu kwene-kwene ni lufoyi nakuti katongedwe kace n’kakulungama ndipo tsapanopa Umambo bwace bunimalisa mabvuto yentse pa dziko la pantsi bucibweresa mtendere na cikondweso kuna wanthu. (Sal. 37:10, 11, 29; 1 Juw. 4:8) Tikambakhotcerera dzina la Yahova pomwe tikupalizira timbakhala tikucenesa dzina lacero. Timbakomedwa kudziwa kuti tikucita bzinthu mwakubverana na dzina lathu. w24.05 18 ¶12

Abale, Imwepo mumbalatiza kuti “[mumbatambira] bwino alendo” mukambacitira bzinthu bzabwino wanthu winango kuphatanidzambo wale omwe ni axamwali lini wanu. (1 Ped. 4:9) Pakulewa bza munthu omwe ambatambira bwino alendo, bukhu linango lidalewa kuti: “Munthu omwe ambatambira bwino alendo ngwakudeka mtima napo kwa wanthu omwe ambawadziwa lini, ndipo ambakondwa kuwacemera kuti abwere ku mui kwace.” Bzibvunzeni kuti: ‘Kodi inepano nimbadziwika ninga munthu omwe ambatambira bwino alendo omwe ambabwera kudzazungira gwere langu?’ (Aheb. 13:2, 16) Munthu omwe ambatambira bwino alendo, ambalatiza kudeka mtima na kupereka bzomwe angakwanise kwa wanthu wentse omwe ambabwera kudzazungira gwere. Bzimwebzi bzikuphatanidza wale omwe mbakusauka omwe angakwanise lini kubwezera cinthu ciri-centse, kwa abale wa m’magwere manango omwe ambabwera kudzafotokoza nkhani na winango omwe ambaphata basa na nyongo kuti alimbikise abale ninga anyakunyang’anira dera. — Gen. 18:2-8; Mim. 3:27; Mab. 16:15; Aro. 12:13. w24.11 21 ¶6

Mu ciratizo ca madende, Jezu adalewa bza madende 10 yomwe yadayenda kukacingulira namwali wacimuna. (Mat. 25:1-4) Wentsenewa akhafuna kugumana na namwaliyo kuti ayende naye pabodzi ku phwando la malowozi. Jezu adalewa kuti axanu akhali “wakucenjera” ndipo axanu akhali “wakupusa.” Madende maxanu yakucenjera yakhali yakukonzeka kudikirira namwaliyo bziribe basa penu angadacedwa ayai angadafulumiza. Iwo adabweresa kandiyero zomwe zikhana mafuta kuti zikhale zidagaka usikubo. Ndipo iwo adabweresambo mafuta yapambali pa kukumbukira kuti namwaliyo pinango angadacedwa. Tenepo, iwo akhali wakukonzeka kuti kandiyero zawo zileke kuthima. (Mat. 25:6-10) Pomwe namwaliyo adafika, madende yakucenjerayo yadapita naye mu nyumba ya phwando la malowozi. Mwa njira ibodzi-bodziyi, Akristau wakudzozedwa omwe alatiza kuti mbakukonzeka mwakukhala tceru na kukhala wakukhulupirika mpaka kubwera kwa Jezu, an’dzawonedwa kuti mbakuthemera kukatonga pabodzi na Namwali, omwe ni Jezu Kristu, mu Umambo bwace bwa kudzulu. — Apok. 7:1-3. w24.09 21 ¶6

Comwe cimbaticitisa kupitiriza kupalizira mwa nyongo ndico kukumbukira momwe basa lakupalizira likuthandizira wanthu azinji pa dziko lentse la pantsi. Gole liri-lentse wanthu azinji omwe ambafuna kudziwa bzizinji ambagumanika pa msinda wakukumbukira infa ya Jezu ndipo ambabvuma kupfunza nafe Bibliya. Ndipo azinji wa iwo ambabatizidwa aciyambambo kupalizira nafe pabodzi. Tikudziwa lini kuti ni wanthu angasi omwe an’dzabvuma mafala yathu, bzomwe tikudziwa mpsakuti Yahova akutsonkhanisa thimu likulu la wanthu lomwe lin’dzapulumuka pa citsautso cikulu. (Apok. 7:9, 14) Yahova omwe ni mwenekaciro wa kubvuna akudziwa kuti akalipo wanthu azinji omwe angabvume mafala yabwino. Ndipopa, tina mathangwe yabwino yomwe yambaticitisa kupitiriza kupalizira. (Luk. 10:2) Cinthu cibodzi comwe nthawe zentse cikhadziwikisa anyakupfunza wa Jezu ni nyongo yomwe iwo akhanayo pa basa lakupalizira. Apostolo adapalizira mwakukhwimika na mwakukondwa mwakuti wanthu, “adazindikira kuti iwo akhafamba pabodzi na Jezu.” (Mab. 4:13) Ntsiku zino, wanthu akatiwona tikupalizira tikufuna kuti iwo atsimikizirembo kuti tikutewezera nyongo yomwe Jezu akhanayo pa basa lakupalizira mafala yabwino. w25.03 18 ¶15; 19 ¶17-18

Bibliya limbalatiza kuti wale omwe ambawoneka ninga kuti mbakusaya kufunika kwa wanthu winango Yahova ambawawona kuti mbakufunika. Mwa ciratizo, Yahova adatuma mprofeta Samuyeli kuti ayende ku mui kwa Jese kuti akadzoze mwana wace m’bodzi kuti adzakhale mambo wa Jirayeri. Jese akhana wana 8 wacimuna, tsono iye adacemera wana wace 7 kuti akagumane na Samuyeli, koma alibe kucemera Davide thangwe rakuti akhali mwana. Tsono Yahova akhadasankhula Davideyo. (1 Sam. 16:6, 7, 10-12) Yahova adawona mu mtima mwa Davide ndipo adawona kuti Davideyo akhafuna kwene-kwene Yahovayo. Kumbukirani momwe Yahova walatizira kale kuti ambakuwonani kuti ndimwe wakufunika. Iye ambakupasani malango mwakubverana na bzomwe mukufunikira. (Sal. 32:8) Kodi iye angadacita tani bzimwebzi bzingadakhala kuti ambakudziwani lini bwino? (Sal. 139:1) Mukambaphatisa basa malango ya Yahova na kuwona momwe yakukuthandizirani, imwepo mun’dzakhala na citsimikizo cakuti iye ambakuwonani kuti ndimwe wakufunika. (1 Nkha. 28:9; Mab. 17:26, 27) Yahova ambawona nyongo yanu. Iye ambawonambo makhalidwe yabwino yomwe munayo ndipo ambafuna kukhala Xamwali wanu. — Jer. 17:10. w24.10 25-26 ¶7-9

Tikudziwa kuti imwepo mumbafuna Yahova ndipo mumbafunambo kutumikira anzanu. N’ciyani comwe mungacite kuti mukhale na cikhumbo cakufuna kutumikira winango? Ni kukumbukira cikondweso comwe mungadzakhale naco mukambatumikira abale na mpfumakazi zanu. Jezu adati: “Kupasa kumbabweresa cikondweso cikulu kuposa kutambira.” (Mab. 20:35) Ndipo Jezu adacita bzomwe adalewabzi. Iye akhakondwa kwene-kwene thangwe ra kuthandiza wanthu winango. Onani ciratizo cibodzi comwe ciri pa Marko 6:31-34. Pa nthawe inango, Jezu na apostolo wace akhadaneta. Iwo adayenda ku mbuto inango komwe kukhalibe wanthu kuti akapume. Tsono thimu la wanthu ndiro lomwe lidayamba kufika komwe akhayendako, licidikhirira kuti Jezu adzalipfunzise. Jezuyo angadafuna angadawabweza wanthuwo, thangwe iye na apostolo wacewo “akhalibe nthawe yakupuma ne kudya.” Ayai angadandowapfunzisa bzinthu bzing’ono-ng’ono aciwauza kuti ayende. Tsono thangwe ra lufoyi lomwe iye akhanalo kuna wanthuwo, “adayamba kuwapfunzisa” mpaka ‘kudoka.’ — Mar. 6:35. w24.11 16 ¶9-10

Abereki, thandizani wana wanu kuti ambagumane mipata kuti auze anzawo bza m’Bibliya. (Aro. 10:10) Mungandendemezere nyongo yomwe iwo ambacita kuti auze anzawo bzomwe ambakhulupira na bzomwe munthu omwe akupfunza kuimba viyola ambacita. Pakuyamba munthuyo ambayamba kupfunza kuimba nyimbo zakusaya kunesa. Ndipo na kupita kwa nthawe iye ambadzazerewera kuimbako ndipo ambadzayamba kuimba bwino-bwino. Mwakundendemerana na bzimwebzi, tswaka lacikristau lingayambe kuphatisa basa nkhani zakusaya kunesa kuti lifotokozere anzace bzomwe limbakhulupira. Iye angabvunze mwanzace wa ku xikola kuti: “Kodi iwepo ukudziwa kuti bzinthu bzizinji bzomwe masiyentista yambakonza yambatewezera bza m’cilengedwe? Dikhira ndikulatize vidiyo.” Pambuyo pa kumulatiza vidiyo ya mu nkhani zakusiyana-siyana za msolo wakuti Kodi Zinangochitika Zokha?, iye angabvunze kuti: “Penu masiyentista yambalemekezedwa thangwe ra kukonza bzinthu mwakutewezera bzinthu bza m’cilengedwe, tsono mbani omwe an’funika kulemekezedwa kwene-kwene thangwe ra bzinthu bza m’cirengedwebzi?” Kucita mibvunzo ningati imweyi kungacitise kuti mwanzace wa ku xikolayo afune kudziwa bzizinji. w24.12 19 ¶17-18

Kuti atitsudzule ku pikado na infa, Yahova adatuma Jezu kuti abwere kudzatifera. Tsono bzingadakwanisika tani kuti cakulombolera ca munthu m’bodzi wakulungama cilombole wanthu azinji? Mpostolo Paulo adalewa kuti: “Pakuti kuphonya kwa munthu m’bodzi [Adamu] kudacitisa kuti wanthu azinji akhale na pikado, tenepo kubverambo kwa munthu m’bodzi [Jezu] kun’dzacitisa kuti wanthu azinji adzakhale wakulungama.” (Aro. 5:19; 1 Tim. 2:6) Kulewa kunango, Paulo akhalewa kuti wanthu wentse ana pikado ndipo ambafa thangwe ra kusaya kubvera kwa munthu m’bodzi wakulungama. Ndipopa kuti titsudzulidwe ku pikado na infa pakhafunikambo munthu m’bodzi wakulungama kuti abvere Mulungu. Thangwe ranyi Yahova alibe kundobvuma kuti wana wakubvera wa Adamu akhale na moyo wakusaya kumala? Kwa wanthu wakuperewerafe tingawone ninga kuti imweyi ikhali njira yabwino yakumalisira mabvuto. Tsono kwa Yahova, kucita bzimwebzi kungadalatiza lini kuti iye ambacita bzinthu mwacirungamo. Kucita bzimwebzi kungadakhala ninga kuti pikado ya Adamu ikhali lini ikulu ndipo wana wace angadakhala ninga kuti alibe pikado. w25.01 21 ¶3-4

Pa nthawe inango mpostolo Paulo akhadziwa kuti angadadzafa, tsono napo bzikhali tenepo, iye akhana mathangwe yomwe yakhamucitisa kukhala wakukondwa thangwe ra bzomwe akhadacita pa moyo wace. Ndipopa, iye adalewa kuti: “Ndathamanga pa mapici mpaka kuphampha, ndipo ndakhala na moyo wakubverana na cikhulupiro.” (2 Tim. 4:6-8) Pa utumiki bwace, Paulo akhadasankhula bzinthu mwa nzeru. Ndipo akhana citsimikizo cakuti Yahova akhakomedwa naye. Ifepano tikufunambo kusankhula bwino bzinthu bzomwe bzingacitise kuti Mulungu akomedwe nafe. Kodi tingacite tani bzimwebzi? Pakufuna kulewa bza iye na bza Akristau anzace, Paulo adati: “Tikufamba mwa cikhulupiro, sikuti mwa bzinthu bzakuwoneka na maso.” M’Bibliya, fala lakuti “kufamba” kazinji-kazinji limbafuna kulewa bzinthu bzomwe munthu ambafuna kucita pa moyo wace. Munthu omwe ana cikhulupiro kwa Yahova ambayamba kukumbukira bzomwe Yahovayo akufuna kuti iye acite. Ndipo bzomwe iye ambacita bzimbalatiza kuti ana citsimikizo cakuti Yahova an’dzamusimba nakuti an’dzagumana phindu akateweza malango ya Yahova yomwe yambagumanika m’Bibliya. — Sal. 119:66; Aheb. 11:6. w25.03 20 ¶1-2

Na thandizo la mzimu wakucena wa Mulungu, wanthu azinji omwe akhana makhalidwe yakuipa adacinja. (Zai. 65:25) Iwo adacita nyongo yakucinja makhalidwe yawo yakuipa. (Aef. 4:22-24) Tsono pakuti wanthu wa Mulungu akali wakuperewera, iwo an’dzapitiriza kuphonya. Tsono, Yahova akutsonkhanisa “wanthu wa mitundu yentse” ndipo akucitisa kuti iwo afunane na kubverana. (Tito 2:11) Bzimwebzi mpsakudabwisa thangwe ni Mulungu yekha Wamphanvu-zentse omwe angakwanise kucita bzinthu bzimwebzi. Mafala yace nthawe zentse yambakwanisika. (Zai. 55:10, 11) Paraizo wauzimu alipo kale ntsiku zino. Yahova adakhazikisa banja la pa dziko lentse. Thangwe ra kucita mbali ya banja limweri, tina mtendere ntsiku zino ndipo timbabzibva kuti ndife wakukhotcerereka mu dziko lakuipali. (Sal. 72:7) Ndipopa tikufuna kuthandiza wanthu azinji kuti akhalembo m’banja lathu lauzimu la pa dziko lentse. Tingacite bzimwebzi mwa kupfunzisa wanthu Bibliya. — Mat. 28:19, 20. w24.04 23 ¶13, 15

Jezu akhafuna Yahova na nzeru zace zentse. Iye akhadziwa bzomwe Mulungu akhafuna kuti iye acite. Ndipo akhadatsimikiza kucita bzimwebzo napo akhadziwa kuti angadabonera. Pakuti Jezu akhadatsimikiza kukondwesa Pai wace, iye alibe kulekerera kuti cinthu ciri-centse cikhale cakufunika kwene-kwene pa moyo wace. Pedru na apostolo winango adakhala na mwayi wa kukhala na Jezu kwa nthawe itali ndipo adapfunzambo momwe iye ambakumbukirira. Pomwe Pedru adafuliziridwa kuti anembe tsamba lace lakuyamba, iye adalimbikisa Akristau kubzikonzekeresa kuti ambakumbuke ninga Kristu. (1 Ped. 4:1) Pomwe Pedru adanemba kuti “bzikonzekereseni,” iye adaphatisa basa fala limweri pakufuna kulewa bza bzifuzo bzomwe acikunda ambanyamula pakufuna kuyenda ku nkhondo. Na tenepo, Akristau akapfunza na momwe Jezu akhakumbukirira iwo an’dzakwanisa kulimbana na bzikhumbo bzomwe bzingawacitise kuti acite bzinthu bzakuipa. — 2 Ako. 10:3-5; Aef. 6:12. w25.03 8-9 ¶1-3

Kodi ni bzinthu bziponi bzomwe mun’funika kudziwa kwa mwanzanuyo pa nthawe ya umakhadzi? Pomwe mukanati kuyamba kumufunisisiratu munthuyo, imwepo mun’funika kuceza naye nkhani zakufunika ninga bzakulinga bza munthuyo. Kodi tingakwanise tani kudziwa unthu bwa mkati bwa munthu? Imwepo mungakwanise kubudziwa mwa kumbamucita mibvunzo na kumbatetekerana mwatceru. Imwepo awirimwe mungambacezerane momwe mukubvera mucimbaleka kubisa cinthu ciri-centse pomwe mukutawira. (Tiy. 1:19) Imwepo mungambacite bzinthu pabodzi ninga kudya pabodzi, kuzunga ku mbuto komwe kumbagumanika wanthu wazinji na kumbapalizira pabodzi kuti mumbakwanise kumbaceza. Imwepombo mungambapfunze bzinthu bzizinji bza winango na mwanzace pomwe muli pabodzi na axamwali wanu na wanthu wa m’banja mwanu. Kuthumizira bzimwebzi, citani bzinthu bzomwe bzin’kuthandizani kuwona momwe mwanzanuyo ambacitira bzinthu bzakusiyana-siyana na momwe ambacitira na wanthu winango. w24.05 27-28 ¶6-7

Tsapanopali tin’gumana na mayezo yakunesa kwene-kwene ndipo tin’dzafunikira kuthemba Yahova kuposa kale-kale. Nkhani za m’Bibliya za atumiki wa Yahova na nkhani za abale wathu ntsiku zino zin’dzatithandiza kukumbukira momwe Yahova adathandizira atumiki wace. Mbakumbukirani kwene-kwene nkhani zimwezi. Mukacita bzimwebzi, mun’dzakwanisa kuwona kuti Yahova ni Tsendwa lanu. Kuthimizira bzimwebzi, mun’dzakwanisa kulimbisa abale wanu. Jezu adapasa Simau dzina lakuti Khefa (lomwe kulisandulizira ni “Pedru”) ndipo limbathandauza “Kambali ka Tsendwa.” (Juw. 1:42) Mwa njira imweyi, Jezu adabvekesa kuti Pedru angadatsangalaza na kulimbisa cikhulupiro ca abale na mpfumakazi zace. Akulu wa gwere ambalewedwa kuti ali ninga “mthunzi wa tsendwa likulu.” Bzimwebzi bzikuthandauza kuti akulu ambakhotcerera abale wa m’gwere. (Zai. 32:2) Tsono tentsenefe, sikuti akulu okha, tikambatewezera makhalidwe ya Yahova, tin’dzalimbisa winango m’gwere. w24.06 28 ¶10-11

Amambo wa Jirayeri omwe Yahova adawawona kuti akhali wakukhulupirika adathandizira kunamata kwacadidi. Tsono amambo azinji omwe Yahova adawawona kuti akhali wakusaya kukhulupirika adasiya kubvera Lamulo lace ndipo adayamba kunamata mirungu yakunama. (1 Ama. 21:25, 26; 2 Nkha. 12:1) Thangwe ranyi nkhani yakunamata ikhali yakufunika kwa Yahova? Cakuyamba, amambowo ndiwo akhana udindo bwakuthandiza wanthu wa Mulungu kuti amunamate. Cinango n’cakuti, wanthu akanamata mirungu yakunama bzikhacitisa kuti iwo acite pikado na kucitira anzawo bzinthu bzakuipa. (Oze. 4:1, 2) Kuthumizira bzimwebzi, amambo pabodzi na Ajirayeri akhadabzipereka kwa Yahova. Tenepo, iwo akasiya kukhala wakukhulupirika kwa Yahova acinamata mirungu yakunama bzikhali ninga kucita upombo. (Jer. 3:8, 9) Munthu akacita upombo ambaphonyera mwanzace wa m’banja. Bzimwebzi bzimbacitisa kuti mwanzaceyo asuname kwene-kwene. Mwakundendemerana na bzimwebzi, atumiki wakubzipereka kwa Yahova akanamata mirungu yakunama ambasunamisa kwene-kwene Yahovayo. — Deut. 4:23. w24.07 22-23 ¶12-15