Novembro

Akulu ambacita nyongo kuti atewezere ntsisi za Yahova pomwe akucita bzinthu na munthu omwe wacosedwa m’gwere. Yahova alibe kudikhirira kuti Ajirayeri wakupanduka ayambe kulatiza kuti akufuna kucinja kuti awathandize. M’mbuto mwace, iye ndiye omwe adayamba kuwanyang’ana napo kuti iwo akhanati kulatiza kuti akufuna kukungula. Yahova adapereka ciratizo kuti alatize ntsisi zace mwa kuuza mprofeta Ozeya kuti abwererane na mkazace napo kuti mkaziyo akhapitiriza kucita bzinthu bzakuipa. (Oze. 3:1; Malak. 3:7) Mwakutewezera Yahova, akulu wa gwere ambafunisisa kuti munthu omwe wacita pikado abwerere m’gwere ndipo ambayezera lini kuphingiza kuti bzimwebzi bzitazike kucitika. Mu ciratizo ca mwana wakutaika pomwe pai adawona mwana wace akubwerera ku mui, iye “adamuthamangira, acikamukumbatira na kumumpsompsona mwa lufoyi.” (Luk. 15:20) Onani kuti paiyo alibe kudikhirira kuti mwana waceyo amukumbire kuti amulekerere. Iye ndiye omwe adayamba kumufenderera mwanayo ninga momwe pai ali-wentse wa lufoyi angadacitira. w24.08 28 ¶7-8

Ninga momwe yalatizira mafala ya mu vesi la lero, Yahova ambafuna lini kuti nzeru zindokhale na iye basi. Mwakudeka mtima, iye ambapasambo wanthu winango. Tiyago adalewambo kuti Yahova akapereka nzeru, iye ambapereka mwakusaya “kutombodzera,” ayai mwakusaya “kung’ung’udzika.” Iye ambafuna lini kuti tibzibve kuipa tikamukumbira malango. M’mbuto mwace, iye an’funa kuti timbamukumbire nzeruzo. (Mim. 2:1-6) Tsono tanimbo ifepano? Kodi tingatewezere tani Yahova pa nkhani ya kumbapasa winango nzeru zomwe tinazo? (Sal. 32:8) Wanthu wa Yahova ana mipata mizinji yakuti ambauze winango bzomwe adapfunza. Mwa ciratizo, kazinji-kazinji timbapfunzisa apalizi apsa mu upalizi. Mwakupirira akulu ambathandiza atumiki wakuthandiza na abale wakubatizidwa momwe angambacitire bwino mbali zawo m’gwere. Abale na mpfumakazi omwe ambadziwa bwino basa lakumanga-manga na lakukonza-konza ambathandiza kupfunzisa winango kuti ambaphate bwino basa lakumanga nyumba zomwe zimbaphatisidwa basa na gulu la Yahova. w24.09 28-29 ¶11-12

Abale, kuti mukhale mkulu imwepo mun’funika kukhala “wakusaya mulandu,” bzimwebzi bzikuthandauza kuti imwepo mun’funika kukhala na mbiri yabwino m’gwere ndipo palibe omwe angalewe kuti mumbacita bzinthu bzakuipa. (1 Tim. 3:2) Kuthumizira bzimwebzi, imwepo mun’funikambo kukhala na mbiri yabwino napo kunja kwa gwere. Wanthu winango pinango angakuleweni kuipa thangwe ra kukhala Mkristau, tsono palibe munthu omwe an’funika kupenukira kuti imwepo ndimwe wakukhulupirika nakuti ndimwe munthu wabwino. (Dan. 6:4, 5) Bzibvunzeni kuti: ‘Kodi inepano ndina mbiri yabwino mkati na kunja kwa gwere?’ Imwepo mun’funikirambo “[kufuna] bzabwino,” ayai imwepo mun’funikira kuwona bzinthu bzabwino bzomwe winango ambacita na makhalidwe yabwino yomwe iwo anayo. (Tito 1:8) Ndipo imwepo mun’funikirambo kukhala wakukondwa na kumbacitira bzinthu bzabwino wanthu winango napo bzire bzomwe akhadikhirira lini kuti mungadawacitira. Thangwe ranyi khalidwe limweri ndakufunika kuti akulu akhale nalo? Thangwe iwo ambamala nthawe ikulu akusamalira gwere na kucita mbali zawo pa mitsonkhano. (1 Ped. 5:1-3) Napo bziri tenepo, iwo ambakomedwa kwene-kwene kutumikira winango kuposa basa lomwe ambacita. — Mab. 20:35. w24.11 20-21 ¶3-5

Atumiki wakuthandiza ambacita mabasa yakufunika m’gwere. Mpostolo Paulo akhatenda kwene-kwene amuna wakukhulupirikawa. Mwa ciratizo, mu tsamba lomwe adanembera Akristau wa ku Filipi pomwe akhalewa bza akulu adagumambo atumiki wakuthandiza. (Afil. 1:1) Abale wakubatizidwa omwe ni maswaka ayai acikulire ambakomedwa kwene-kwene kutumikira ninga atumiki wakuthandiza. Mwa ciratizo, Devan adaikhidwa kukhala mtumiki wakuthandiza pomwe akhana magole 18. Tsono m’bale wakucemeredwa Luis adakhala mtumiki wakuthandiza pomwe akhana magole yakupitirira 50. Kodi iye adabva tani thangwe ra kukhala na mwayi umweyu? Iye adati: “Nimbawona kuti ni mwayi ukulu kwene-kwene kwa inepano kutumikira ninga mtumiki wakuthandiza, maka-maka ndikakumbukira lufoyi lentse lomwe gwere landilatiza!” Penu imwepo ndimwe m’bale wakubatizidwa ndipo mukanati kukhala mtumiki wakuthandiza, tani mucikhalambo na cakulinga cimweci? w24.11 14 ¶1-3

Pomwe Mambo Ezekiya akhana magole 39, iye adadziwa kuti akhaduwala matenda yomwe yakhalibe mankhwala. Yahova adauza mprofeta Zaiya kuti akauze Ezekiya kuti angadafa na matendayo. (2 Ama. 20:1) Pomwe Ezekiya adabva bzimwebzi adalira kwene-kwene. Patsogolo pace, iye adapemba kwa Yahova. Pomwe Yahova adawona Ezekiya akulira acimudandaulira kuti apitirize kukhala na moyo, iye adamubvera ntsisi. Yahova adati: “Ndabva mpembo wako, ndipo ndawona misozi yako. Nin’kupoza.” Yahova adabvera ntsisi Ezekiya ndipo mwakuphatisa basa Zaiya, iye adalewa kuti an’dzamuthumizira ntsiku zace zakukhala na moyo nakuti angadapulumusa Jeruzalemu m’manja mwa Asiriya. (2 Ama. 20:4-6) Kodi imwepo mukuduwala ndipo bzikuwoneka kuti matenda yanuyo yalibe mankhwala? Pembani kwa Yahova ndipo muuzeni momwe mukubvera. Iye an’dzakutetekerani napo penu municita mpembo wanuyo uko mukulira. Bibliya limbatitsimikizira kuti: “Baba wa ntsisi kwene-kwene na Mulungu omwe ambatsangalaza wanthu” an’dzatitsangalaza pa mabvuto yathu yentse. — 2 Ako. 1:3, 4. w24.12 24 ¶15-17

Ndokumbukirani momwe tin’dzakhalira wakukondwa tikadzatambira wale omwe adafa! Ndokumbukiranimbo momwe bzin’dzakhalira bzabwino kupfunza bzinthu bzizinji pakulewa bza bzinthu bzomwe Yahova adalenga na kupfunzambo bzizinji bza Yahovayo. (Sal. 104:24; Zai. 11:9) Kuthumizira bzimwebzi, imwepo mun’dzaphonya lini pomwe, mun’dzatumikira Yahova ndipo mun’dzafunikira lini pomwe kukumbira kuti mulekereredwe! Kodi mukuwona kuti bzina phindu kuluza bzinthu bzentsenebzi thangwe ra “bzinthu bza pikado bzakusaya kukhalisa”? (Aheb. 11:25) Tin’dziwa kuti imwepo mukufuna lini bzimwebzi! Moyo wakusaya kumala omwe tin’dzakhala nawo un’dzakhala wabwino kwene-kwene kuposa cinthu ciri-centse comwe tingakhale naco m’dzikoli. Kumbukirani kuti Paraizo ni cinthu lini comwe tin’dzandokhala tikucidikhirira basi, koma in’dzafika nthawe yomwe tin’dzakhaladi m’Paraizomo. Bzimwebzi bzin’dzakwanisika thangwe Yahova adatifuna kwene-kwene mwakuti adapereka Mwana wace! w25.01 29 ¶12

Bukhu la Ahebereu limbafotokoza bza wanthu azinji omwe akhakhulupira Yahova, m’bodzi mwa iwo akhali Mozeji. Iye akhana cikhulupiro cakulimba kwene-kwene. (Aheb. 3:2-5; 11:23-25) Pakuti Mozeji adathemba Yahova, Yahovayo adapasa Ajirayeri cakudya na madzi kuti apitirize kukhala na moyo. (Eki. 15:22-25; Sal. 78:23-25) Napo kuti Mozeji akhana cikhulupiro cakulimba, pomwe padapita gole libodzi pambuyo pa Yahova kutsudzula Ajirayeri ku Edjipito, iye adayamba kupenukira penu Yahova angadakwanisa kuwapasa nyama ninga momwe akhadalewera. Ajirayeri akhalipo azinji kwene-kwene mu dambomo mwakuti kupambula akazi na wana, amuna akhalipo 600 000 ndipo mu dambomo mukhalibe cakudya. Tsono Yahova adabvunza Mozeji kuti: “Kodi boko langu ine Yahova ndifupi?” (Num. 11:21-23) Kulewa kwinango, Yahova akhabvunza Mozeji kuti: ‘Kodi iwepo ukukumbuka kuti inepano ningacite lini bzomwe ndalewa?’ w25.03 26 ¶1-2

Kodi tin’funika kumbaiwona nkhani ya Cigumula ca Madzi ninga profesiya? Mtawiro ngwakuti ne. Thangwe ranyi? Thangwe rakuti Bibliya limbalewa lini bzimwebzo. N’cadidi kuti Jezu adandendemezera “ntsiku za Nowa” na kuwonekera kwace, tsono iye alibe kulewa kuti bzinthu bzentse bzomwe bzidacitika mu nthawe za Nowa bzingadadzacitikambo kutsogolo ninga pa nthawe yomwe Yahova adafunga msuwo wa cingalawa. (Mat. 24:37-39) N’ciyani comwe Nowa adacita pomwe adabva mafala ya Yahova ya mcenjezo? Iye adalatiza kuti akhana cikhulupiro mwa kumanga cingalawa. (Aheb. 11:7; 1 Ped. 3:20) Mwa njira ibodzi-bodziyi, wanthu omwe ambabva mafala yabwino ya Umambo an’funika kulatiza cikhulupiro mwa kuphatisa basa bzomwe akupfunzabzo. (Mab. 3:17-20) Pedru adalewa kuti Nowa akhali “mpalizi wacirungamo.” Ntsiku zino timbacitambo bzibodzi-bodzibzi mwa kucita nyongo yakucita basa lakupalizira. Koma napo ticicita nyongo yakupalizira, tin’kwanisa lini kupalizira mafala yabwino wanthu pa dziko lentse la pantsi pomwe cimaliziro cikanati kufika. w24.05 9-10 ¶3-5

Tin’funika kunyang’ana njira kuti tilatize kudeka mtima na ntsisi kwa axamwali wa Yahova. (Aro. 12:10) Kodi tingacite tani bzimwebzi? Pa Salimo 15:4 pambafotokoza njira ibodzi ya momwe tingacitire bzimwebzi. Mulendo wa mu tendi la Yahova “ambakwanirisa bzomwe wapicira, napo kuti bzomwe wapicirabzo bzingamubweresere mabvuto.” Tikaleka kukwanirisa bzomwe tapicira tingasunamise wanthu winango. (Mat. 5:37) Yahova ambafuna kuti amuna na akazi akwanirise lumbiro lomwe adacita pomwe adalowolana. Iye ambakomedwambo kwene-kwene akawona kuti abereki akukwanirisa bzomwe adapicira wana wawo. Thangwe ra kufuna Yahova na kufuna wanthu tin’dzacita nyongo kuti tikwanirise bzentse bzomwe tidalumbira. Njira inango yomwe tingalemekezere axamwali wa Mulungu ndiyo kukhala wakutambira bwino alendo na wakudeka mtima. (Aro. 12:13) Kumbaceza na abale wathu pa nthawembo zinango kumbatithandiza kuti tilimbise uxamwali bomwe tinabo na iwo pabodzi na Yahova. Kuthumizira bzimwebzi, tikambatambira bwino alendo timbatewezera Yahova. w24.06 12 ¶15-16

Yahova ambazimbula cadidi cace kwa wanthu wakubzicepesa. (Mat. 11:25) Thangwe ra kubzicepesa, ifepano tidabvuma kupfunza cadidi. (Mab. 8:30, 31) Napo bziri tenepo, tin’funika kucita mphole kuti tileke kukhala wakubzikuza. Thangwe bzimwebzi bzingaticitise kuyamba kuwona kuti bzomwe tikukumbuka mpsabwino kuposa nfundo za m’Bibliya na malango ya gulu la Yahova. Kuti tikhale wakubzicepesa, tin’funika kukumbukira kuti ndife wana kwene-kwene tikabzindendemezera na Yahova. (Sal. 8:3, 4) Cinango comwe cingatithandize ndico kupemba kwa Yahova. Yahova an’dzatithandiza kuti tiphatise basa nzeru zakucokera m’Bibliya na za m’gulu lace m’mbuto mwakuphatisa basa nzeru zathu. Pomwe mukuwerenga Bibliya, nyang’anani nfundo zomwe zimbalatiza kuti Yahova ambafuna wanthu wakubzicepesa koma ambaipidwa na wanthu wakubzikuza. Ndipo mukapasidwa udindo citani ciri-centse kuti mukhale wakubzicepesa. w24.07 10 ¶8-9

Kuyambira mu gole la 1919, Jezu mwakutsogoleredwa na Yahova akuphatisa basa kagrupo ka amuna wakudzozedwa kuti kalinganize basa lakupalizira na kupereka malango yakucokera m’Fala la Mulungu kwa ateweri wace pa nthawe yakuthemera. (Luk. 12:42) Bzikuwonekeratu padeca kuti Yahova akusimba basa lomwe kagrupo kamweka kakucita. (Zai. 65:13, 14) Bzingadakhala kuti ndife lini wakulinganizika tingadakwanisa lini kucita basa lomwe Jezu adatipasa. (Mat. 28:19, 20) Mwa ciratizo, bzingadakhala kuti abale ambalinganiza lini mbuto yakupalizira; munthu ali-wentse angadandombapalizira mbuto yomwe an’funayo. Tingadandombapalizira mbuto ibodzi na ibodzi mwakubwereza-bwereza ndipo tingadambapalizirambo lini ku mbuto zinango. Kodi imwepo mukukwanisa kuwona phindu linango lomwe timbakhala nalo thangwe ra kukhala wakulinganizika? Ninga momwe Jezu adalinganizira ateweri wace pomwe akhali pa dziko la pantsi pano, iye akupitiriza kulinganiza wanthu wa Mulungu ntsiku zino. w24.04 8-9 ¶2-4

Kaini akhali mwana wakuyamba wa Adamu na Eva. Ninga wana wentse wa Adamu na Eva, Kaini adatengerambo pikado ya abereki wace ndipopa akhacita bzinthu bzakuipa. Bibliya limbalewa kuti: “Mabasa yace yakhali yakuipa.” (1 Juw. 3:12) Pinango bzimwebzi ndibzo bzomwe bzidacitisa kuti Yahova aleke “kukomedwa na Kaini pabodzi na ntsembe yace” pomwe iye adaipereka kwa Yahovayo. M’mbuto mwa kucinja, “Kaini adakalipa kwene-kwene ndipo adapsoma.” Kodi n’ciyani comwe Yahova adacita kuti amuthandize? Yahova adaceza na Kaini. (Gen. 4:3-7) Onani kuti Yahova adaceza naye bwino Kaini ndipo adamuuza kuti angadamusimba angadacita bzinthu bzabwino. Ndipo Yahova adamucenjezambo Kainiyo kuti kukhala adakalipa kungadamucitisa kuti acite cinthu cakuipa. Bzakupasa ntsisi mpsakuti Kaini alibe kubva malango yomwe adapasidwa na Yahova. Iye alibe kufuna kuthandizidwa na Mulungu ndipo alibe kufuna kukungula. Kodi kusaya kubvera kwa Kaini, kudacitisa Yahova kusaya kufuna kuthandiza wanthu winango kuti akungule? Ne! w24.08 10 ¶8

Mozeji adakumbusa Ajirayeri kuti angadakakhala na moyo wabwino mu Dziko Lakupiciridwa. Thangwe ra kusimbidwa na Yahova, Ajirayeri angadakakhala na moyo utali mu dzikolo. Ndipo dzikolo likhali lakudeka na la ndovolo! Mozeji adawafotokozera momwe dzikolo likhaliri, mwa kulewa kuti: “Dziko lomwe lina mizinda mikulu-mikulu yabwino yomwe imwepo mulibe kuimanga, mizinda yomwe ina nyumba zakudzala na bzinthu bzabwino bzakusiyana-siyana bzomwe imwepo mulibe kubziphatira basa, micera yomwe mulibe kuicera ndimwepo, minda ya uva na miti ya maolivera yomwe imwepo mulibe kuibzala.” (Deut. 6:10, 11) Mozeji adapasambo Ajirayeri mcenjezo. Kuti iwo apitirize kukhala mu dziko lakudekalo, akhafunika kupitiriza kubvera malamulo ya Yahova. Mozeji adawakumbusa kuti iwo akhafunika “kusankhula moyo” mwa kubvera Yahova na “kumuphatisisa.” (Deut. 30:20) Tsono Ajirayeri alibe kubvera Yahova. Thangwe ra bzimwebzi, Mulungu adalekerera kuti Asiriya ndipo patsogolo pace Ababiloniya akunde Ajirayeri aciwayendesa ku ukapolo. — 2 Ama. 17:6-8, 13, 14; 2 Nkha. 36:15-17, 20. w24.11 9 ¶5-6

Wanthu azinji omwe ambabziti ni Akristau ambakumbuka kuti an’dzapulumuka ‘akandokhulupira Jezu’ na kubvuma kuti iye ni mpulumusi wawo. (Juw. 6:29) Tsono bzimwebzi mpsakukwanira lini. Pakhana wanthu winango omwe pakuyamba akhamukhulupira Jezu, tsono mu nthawe yakucepa iwo adasiya kumukhulupirako. N’thangwe ranyi? Wanthu azinji akhatewera Jezu thangwe rakuti iye akhawapasa bzomwe iwo akhafuna. Wanthuwo akhandofuna kuti Jezu awapoze, awapase cakudya na kuwauza bzinthu bzomwe bzikhawadekera. Tsono Jezu adawalatiza kuti akhafunika kucita bzinthu bzinango kuti akhaledi anyakupfunza wace. Iye adalatiza kuti alibe kundobwera pa dziko la pantsi kuti adzandopase wanthu bzinthu bza ku thupi. Wanthuwo akhafunika kubvuma ‘mcemo’ wace mwa kuteweza bzentse bzomwe iye akhapfunzisa. — Juw. 5:40. w24.12 12 ¶12-13

N’ciyani comwe cingathandize mwamuna kuti aleke kumbaboneresa mkazace na kumbamungingimiza kuti acite bzinthu bzakupasa manyazi? Njira ibodzi yomwe iye angacitire bzimwebzo ndiyo kucita nyongo yakutewezera Jezu Kristu. Amuna angamutewezere mwa kumbawona momwe iye akhambacitira bzinthu na anyakupfunza wace. Mbatiwoneni bzomwe mwamuna angapfunze na momwe Jezu akhambacitira bzinthu na apostolo wace na momwe iye akhambalewalewera nawo. Nthawe zentse, Jezu akhambacita bzinthu mwakudeka mtima na mwa ulemu na apostolo wace. Iye akhambacita lini nawo bzinthu mu njira yakuipa ndipo akhambawaponderera lini. Jezu akhaphatisa lini basa mphanvu yace kuti apostolowo abzibve kuti akhalibe na basalo ayai kuti apostolowo amugope. M’mbuto mwace akhambacitira apostolowo mabasa yakunyozeka. (Juw. 13:12-17) Pa nthawe inango, iye adauza anyakupfunza wacewo kuti: “Pfunzani kwa ine, pakuti ndine wakuderekha na wa mtima wakubzicepesa, ndipo mun’dzagumana mtsangalazo pa moyo wanu.” (Mat. 11:28-30) Mafalaya yakulatiza kuti Jezu akhali wakuderekha. Munthu wakuderekha ngwakusaya lini mphanvu. Iye ngwamphanvu koma ambakwanisa kubziphata. Napo akakhala kuti wanyosedwa, ambakwanisa kukhala wakugwa mpfuwa ndipo ambabziphata. w25.01 10 ¶10-11

Pomwe kuphampha kwa dziko lakuipali kukufendera tingadikhirirembo kuthumizirika kwa mabvuto yomwe yambacitisidwa na boma, nkhondo, malengwa ya pantsi ayai matenda. Tingaluze basa, bzinthu bzomwe tinabzo ayai tingafunikire kucoka ku mbuto komwe timbakhala ndipo bzimwebzi bzingacitise kuti bzikhale bzakunesa kugumana bzinthu bzomwe tikufunikira. N’ciyani comwe cingatithandize kuti tisankhule bzinthu bzomwe bzinilatiza kuti timbathemba thandizo la Yahova? Cinthu cakuyamba comwe mungacite ndico kuuza Yahova bza thupo lanu. Mukumbireni nzeru zomwe mukufunikira kuti musankhule bwino bzakucita mucimukumbirambo kuti akuthandizeni kukhala wakuderekha kuti mutcenkhe kucita “thupo lakunyanyira” pa mabvuto yomwe mukugumana nayo. (Luk. 12:29-31) Mukumbireni kuti akuthandizeni kumbakomedwa na bzinthu bzomwe munabzo pa moyo wanu. (1 Tim. 6:7, 8) Fufudzani m’mabukhu yathu nkhani zomwe zingakuthandizeni kudziwa bzomwe mungacite mukakhala mukugumana na bvuto lakusaya kobiri. Wanthu azinji adagumana phindu likulu kwene-kwene pomwe adawerenga mu jw.org nkhani zomwe zimbafotokoza bzinthu bzomwe tingacite tikakhala tikugumana na bvuto lakusaya kobiri. w25.03 28-29 ¶10-11

Ikhadafika nthawe yakuti wanthu wa mitundu inango acitembo mbali ya wanthu wa Yahova. Mulungu adatsogolera mpostolo Pedru kuti akapalizire Korneliyo omwe adakhala munthu wakuyamba wa mtundu munango kukhala Mkristau. Adjuda akhalibe basa na wanthu wa mitundu inango, ndipopa Pedru akhafunikira thandizo kuti akwanise kupalizira wanthu wa mitundu inangoyo. Pomwe Pedru adazindikira bza kufuna kwa Mulungu pa nkhaniyi, iye adacinja makumbukidwe yace. Pomwe Korneliyo adauza Pedru kuti akamuzungire, Pedruyo “mwakusaya kupenukira” adayenda kamuzungira. (Mab. 10:28, 29) Iye adapalizira Korneliyo ndipo Korneliyoyo pabodzi na adzinza wace adabatizidwa. (Mab. 10:21-23, 34, 35, 44-48) Pomwe padapita magole, Pedru adadzalimbikisa Akristau winango kuti akhale na “makumbukidwe yakuphatana.” (1 Ped. 3:8, mafala ya m’nyantsi.) Ifepano tingambakumbuke ninga momwe abale na mpfumakazi zathu ambakumbukirira tikambatewezera makumbukidwe ya Yahova yomwe yambafotokozedwa m’Bibliya. w25.03 9-10 ¶7-8

Kakumbukidwe ka wanthu kakuyenda kacisiyaniratu na kakumbukidwe ka Yahova. (Mim. 17:15) Ndipopa mpsakufunika kwene-kwene kumbazindikira makumbukidwe yakuphonyekaya ticiyalamba. Tin’funika lini kulekerera munthu ali-wentse kuticitisa kubwerera m’mbuyo ticisiya kutumikira Yahova. Mpostolo Paulo adalimbikisa Akristau wacihebereu kuti iwo akhafunika kukhala wakukhwima mwauzimu. Ifepanombo tin’funika kuphatisa basa malango yamweya. Bzimwebzi bzimbaphatanidza kupfunza Bibliya mwakuzika kuti timudziwe bwino Yahova na momwe iye ambakumbukirira. Tin’funika kucita bzimwebzi napo kuti tidabzipereka kale kwa Yahova na kubatizidwa. Bziribe basa magole yomwe tiri m’cadidi, tentsenefe tin’funika kumbawerenga na kupfunza Fala la Mulungu ntsiku zentse. (Sal. 1:2) Kupfunza Bibliya nthawe zentse kun’dzatithandiza kukulisa cikhulupiro cathu comwe ni khalidwe lomwe mpostolo Paulo adalilewa mu tsamba lomwe adanembera Akristau wacihebereu. — Aheb. 11:1, 6. w24.09 10 ¶7-8

Bzingakhale bzakupusa kupitiriza kukhala wakukhulupirika kwa Yahova tikambamuwona ninga Munthu caiye. Bzimwebzi ndibzo bzomwe bzidacitikira Zuze. Iye adalamba kucita upombo. Mulungu akhali Munthu caiye kwa iye ndipo akhafuna lini kumusunamisa. (Gen. 39:9) Tikafuna kumbawona Yahova ninga Munthu caiye, ifepano tin’funika kumbapambula nthawe yakumbaceza naye mu mpembo na kumbapfunza Fala lace, Bibliya. Mwa njira imweyi, uxamwali bwathu na iye bun’dzapitiriza kukula. Ninga Zuze, tikapitiriza kukhala pa uxamwali bwakulimba na Yahova tin’dzatcenkha kucita cinthu ciri-centse comwe cingamukalipise. Wale omwe ambayebwa kuti Yahova ni Mulungu wamoyo ambakhala pa ngozi yakusiya kumutumikira. Onani bzomwe bzidacitikira Ajirayeri pomwe iwo akhali m’dambo. Iwo akhadziwa kuti Yahova alipo, tsono adayamba kupenukira penu Yahovayo angadawasamalira. (Eki. 17:2, 7) Bzimwebzi bzidacitisa kuti iwo apandukire Mulungu. Ifepano tin’funika lini kukhala ninga iwo mwa kupandukira Yahova. — Aheb. 3:12. w24.06 24 ¶14-15

Ifepano tikukhala kuphampha kwa ntsiku zakumalizira, ndipopa tingadikhirire kugumana na mabvuto mazinji yomwe yangaticitise kulira. Yahova ambawona kulira kwathu ndipo ambatibvera ntsisi. Iye ambatifuna kwene-kwene akatiwona tikupitiriza kukhala wakukhulupirika kwa iye napo kuti tikubva kuwawa ndipo ambayebwa lini misozi yathu. Ndipopa mukakhala mukugumana na mabvuto makulu, muuzeni Yahova mu mpembo. Mbakhalani na nthawe ya kuceza na abale na mpfumakazi zanu mukakhala muli pa mitsonkhano ndipo mbawerengani Bibliya kuti mutsangalazidwe na Yahova. Mukapitiriza kupirira, mungakhale na citsimikizo cakuti Yahova an’dzakubairani. Mabaibai yamweya yambaphatanidza piciro lakuti tin’dzalira lini pomwe thangwe ra kufedwa wadzinza wathu, kusiidwa ayai kulambidwa na mwanzathu wa m’banja ndipo tin’dzalira lini pomwe thangwe ra matenda. (Apok. 21:4) Nthawe imweyo ikadzafika, ifepano tin’dzapitiriza kucosa misozi, tsono misozi yomwe tin’dzacosayo in’dzakhala yakukomedwa. w24.12 20 ¶3; 25 ¶19

Yahova adatisankhula kuti tikhale Mboni zace ndipo adapicira kuti an’dzatithandiza kuti tikhale wakukhwimika. (Zai. 43:10, 11) Onani njira zinai za momwe iye adacitira bzimwebzi. Yakuyamba, Jezu ambakhala nafe tikakhala tikupalizira mafala yabwino. (Mat. 28:18-20) Yaciwiri, Yahova ambaphatisa basa anjo kuti atithandize. (Apok. 14:6) Yacitatu, Yahova adatipasa mzimu wace wakucena kuti utithandize kukumbukira bzinthu bzomwe timbapfunza. (Juw. 14:25, 26) Yacinai, Yahova adatipasa abale na mpfumakazi kuti timbayende nawo kukapalizira. Na thandizo la Yahova pabodzi na la abale wathu pa dziko lentse la pantsi, tin’dzakhala wakukhwimika ticipitiriza kupalizira. Tsono tani penu mumbasunama mukasaya kugumana wanthu m’nyumba zizinji? Bzibvunzeni kuti: ‘Kodi wanthu wa mu gawo langu nthawe ino angakhale ali kuponi?’ (Mab. 16:13) ‘Kodi ali ku basa ayai ayenda kukagula bzinthu?’ Penu bziri tenepo, kodi mungakapalizire mu njira kuti mugumane wanthu azinji? w24.04 17 ¶10-11

Penu imwepo ndimwe msolo wa banja ndipo mukufuna kukhala mkulu, banja lanu lin’funika kukhala na mbiri yabwino. Ndipopa imwepo mun’funika kumbatsogolera bwino banja lanu. Bzimwebzi bzikuthandauza kuti imwepo mun’funika kusamalira banja lanu mwa lufoyi na kucita bzakusankhula bzabwino m’banjamo. Bzimwebzi bzikuphatanidza “kutsogolera” pa bzinthu bzentse bzauzimu. Pai an’funika kukhala na “wana wakumubvera na mtima wentse.” (1 Tim. 3:4) Penu imwepo ndimwe pai, mun’funika kupfunzisa wana wanu mu njira ya lufoyi. N’cadidi kuti imwepo mukufuna kuti wana wanu akhale wakukondwa na kuti ambasenzeke ninga momwe wana wentse ambacitira. Tsono imwepo mukawapfunzisa bwino, bzin’dzawathandiza kuti akhale wakubvera, wa ulemu na wa makhalidwe yabwino. Kuthimizira bzimwebzi, imwepo mun’funika kucita bzomwe mungakwanise kuti muthandize wana wanu kuti akhale pa uxamwali bwakulimba na Yahova, kubvera mitemo ya m’Bibliya na kukula mwauzimu acifika pa kubatizidwa. w24.11 22 ¶10-11

Tikambacita bzizinji mu utumiki tin’dzakwanisa kuwona kuti Yahova akutithandiza ndipo bzimwebzi bzin’dzaticitisa kuti timuthembe kwene-kwene. (1 Ako. 3:9) Tsono kumbukirani kuti Yahova ambandendemezera lini bzomwe imwepo mumbacita na bzomwe wanthu winango ambacita. M’mbuto mwace, iye ambawona bzomwe bziri mu mtima mwanu ndipo ambakomedwa kwene-kwene akawona kuti mukulatiza kutenda mphaso ya cakulombolera yomwe iye adapereka. (1 Sam. 16:7; Mar. 12:41-44) Cakulombolera ndico comwe cimbacitisa kuti bzikhale bzakukwanisika kuti tilekereredwe pikado zathu, tikhale pa uxamwali na Yahova na kudzakhala na moyo wakusaya kumala kutsogolo. Ndipopa tin’funika kulatiza kuti timbatenda lufoyi la Yahova lomwe lidamucitisa kuti atipase bzisimbo bzimwebzi. (1 Juw. 4:19) Tin’funikambo kulatiza kuti timbatenda Jezu omwe adatifuna kwene-kwene mwakuti adapereka moyo wace thangwe ra ifepano! w25.01 31 ¶16-18

Onani momwe nyakunemba Salimo 73 adabvera. Iye adawona wanthu omwe akhatumikira lini Yahova akupfatsa na moyo, ana cuma ndipo akhawoneka ninga kuti akhagumana lini na mabvuto. (Sal. 73:3-5, 12) Pomwe iye akhakumbukira bzimwebzo, adayamba kuwona ninga kuti kutumikira Yahova kukhalibe phindu. Iye ‘akhabonera ntsiku yentse’ na makumbukidwe yakuphonyekaya. (Sal. 73:13, 14) Kodi n’ciyani comwe iye adacita kuti amalise makumbukidwe yamweya? Nyakunemba salimoyu adapita mu nyumba ya Yahova yomwe ikhali mbuto yakuderekha kuti akakwanise kukumbukira bwino-bwino bza nkhani imweyi. (Sal. 73:16-18) Iye adakwanisa kuwona kuti napo kuti wanthu amwewa akhawoneka ninga kuti akhana moyo wabwino, iwo akhalibe tsogolo labwino. Makumbukidwe yamweya yadamucitisa kubzibva bwino ndipo adawona kuti adasankhula bwino kwene-kwene kutumikira Yahova. Bzimwebzi bzidamucitisa kuti akhale wakutsimikiza kufuna kupitiriza kutumikira Yahova. — Sal. 73:23-28. w24.10 27 ¶11-12

Yahova adatisankhula kuti tikhale “mboni zace.” (Zai. 43:10-12) Tsamba lakucokera ku Bungwe Lakutonga la gole linango m’mbuyomu lidalewa kuti: “Mwayi ukulu kwene-kwene omwe tentsenefe tingakhale nawo ni kudziwika kuti ndife Mboni za Yahova.” Thangwe ranyi tikulewa tenepo? Ndokumbukirani kuti mwanamiziridwa kuti mwacita cinthu cakuphonyeka, imwepo mungafunikire mboni kuti ikutawirireni bzomwe akukunamiziranibzo icilewambo kuti imwepo ndimwe munthu wabwino ndipo mungacite lini bzimwebzo. Bzimwebzi bzikacitika, kodi imwepo mungasankhule yani? Imwepo mungasankhule munthu omwe mumbamudziwa, omwe mumbamukhulupira na omwe ana makhalidwe yabwino yomwe yangacitise wanthu kukhulupira bzomwe ambalewa. Pomwe Yahova adatisankhula kuti tikhale Mboni zace, iye adalatiza kuti ambatidziwa bwino nakuti ambatithemba kuti timbapalizire kuti iye ni Mulungu wacadidi. Tenepo, timbacita bzomwe dzina lathu limbatiuza kuti ticite bzomwe ni kukhala Mboni za Yahova! — Aro. 10:13-15. w24.05 18 ¶13

Kutumikira wanthu winango kudacitisa kuti Jezu akhale wakukondwa. Pa nthawe inango, Jezu adacita bzizinji sikuti kundopfunzisa thimu la wanthu. Iye adawapasambo bzomwe akhafunikira pa moyo wawo wa ku thupi. Mwakudabwisa, iye adacitisa kuti pagumanike cakudya cakukwana wanthu wentsenewo ndipo adauza anyakupfunza wace kuti agawanise wanthuwo cakudyaco. (Mar. 6:41) Mwakucita bzimwebzi, iye adapfunzisa anyakupfunza wace kufunika kwa kutumikira wanthu winango. Iye adalatizambo kuti kucita mabasa yakusiyana-siyana n’kwakufunika kwene-kwene. Ndokumbukirani momwe apostolowo adakhalira wakukondwa pomwe adathandizira cakudabwisa ca Jezu mwa kugawanisa wanthuwo cakudya mpaka wentsewo “[kudya] acikhuta”! (Mar. 6:42) Ni pa nthawe imweyi lini yokha yomwe Jezu adaikha bzakufuna bza wanthu winango patsogolo pa bzakufuna bzace. Iye adaphatisa basa moyo wace wentse pa dziko la pantsi pano kuti athandize wanthu. (Mat. 4:23) Jezu akhakomedwa kwene-kwene kupfunzisa wanthu na kuwapasa bzomwe akhafunikira pa moyo wawo. w24.11 16 ¶10-11

Pomwe bzinthu bzikuyenda bziciipiratu mu “ntsiku zakumalizira” zino, ifepano tin’dzafunika kuthandiza abale na mpfumakazi zathu. Ifepano tingawatsangalazembo na kuwalatiza lufoyi lomwe iwo akufunikira mwakuthupi na mwauzimu. Njira ibodzi ya momwe tingacitire bzimwebzi ndiyo kumbaceza nawo ku Nyumba ya Umambo. Ndipopa abale na mpfumakazi zathu akabwera pa mitsonkhano, tin’funika kumbawalimbikisa na kuwalatiza lufoyi. Akulu angakhale mbuto yakuthawira ya abale omwe ambagumana na mabvuto yakusiyana-siyana. Pakacitika malengwa ya pantsi ayai pakafunikira thandizo la ulapi mwakamfulumize, akulu ambacita ciri-centse kuti athandize abale. Iwo ambaphatisambo basa Bibliya kuti apereke malango na cilimbikiso. Abale an’dzakhala wakutsudzuka kukumbira thandizo kwa mkulu omwe ambadziwika kuti ambacita nyongo yakubvesesa momwe iwo akubvera. Bzimwebzi bzimbacitisa kuti abale abzibve kuti mbakufunidwa ndipo bzin’dzakhala bzakupusa kwa iwo kuteweza malango ya m’Bibliya yomwe mkuluyo angapereke. — 1 Ates. 2:7, 8, 11. w24.06 29 ¶12-13

Tin’funika lini kumbakumbuka kuti pakuti Mulungu ni Mkululetu bzimbamuwawa lini akawona bzinthu bzakuipa bzikucitika! Mulungu adatilenga kuti timbawawidwe mu mtima tikambawona cinthu cakuipa cikucitika. Pakuti tidalengedwa m’cifanikiso cace, tingalewe kuti Yahova ambawawidwambo mu mtima akawona cinthu cakuipa cikucitika. Bibliya limbalewa kuti Mulungu nthawe zinango ‘ambakalipambo’ ndipo ‘ambasunama.’ (Sal. 78:40, 41) Iye adawawidwa kwene-kwene pomwe adawona Mwana wace akuboneresedwa na wanthu wakuipa acifika pa kuphedwa! Cakulombolera cimbalatiza kuti Yahova ambatifuna kwene-kwene kuposa momwe munthu wa m’banja mwathu ayai xamwali wathu wa ponda ndipondembo ambatifunira. (Aro. 8:32, 38, 39) Tingakhale na citsimikizo cakuti Yahova ambatifuna kwene-kwene kuposa momwe timbabzifunira tekha. Kodi imwepo mukufuna kukhala na moyo wakusaya kumala? Yahova akufunisisa kwene-kwene kuti imwepo mukhale na moyo wakusaya kumala kuposa momwe imwepo mukufunira. Kodi imwepo mukufuna kulekereredwa pikado zanu? Yahova akufunisisa kulekerera pikado zanu kuposa momwe imwepo mukufunira. Bzomwe iye akufuna mpsakuti tibvume cakulombolera mwakulatiza cikhulupiro na kukhala wakubvera. Cakulombolera ni mphaso yabwino kwene-kwene yomwe imbalatiza kuti Yahova ambatifuna. — Mpal. 3:11. w25.01 22-23 ¶8-9

Tentsenefe nthawe zinango timbafunika kukhulupira bzomwe timbawona, kubva ayai momwe timbabvera pomwe tikufuna kusankhula kucita cinthu. Tsono ni nthawe lini zentse pomwe bzinthu bzomwe timbawona na kubva bzimbakhala bzakuthembeka. Tikambacita bzakusankhula mwakubverana na bzomwe tikuwona ayai momwe tikubvera tin’dzacita bzinthu bzomwe Yahova akufuna lini kuti ticite. (Mpal. 11:9; Mat. 24:37-39) Tsono tikasankhula bzinthu mwakubverana na cikhulupiro cathu tin’dzasankhula bzomwe ‘mpsakubvumizika kwa Mbuya.’ Tikateweza malango ya Mulungu bzin’dzatithandiza kuti tikhale na mtendere wa mu mtima ndipo bzin’dzatithandizambo kuti tikhale wakukondwa. (Sal. 16:8, 9; Zai. 48:17, 18) Ndipo tikapitiriza kufamba mwa cikhulupiro tin’dzakhala na moyo mpaka kale-kale. (2 Ako. 4:18) Kodi tingadziwe tani penu tikufambadi mu cikhulupiro ayai mu bzinthu bzakuwoneka na maso? Kuti tidziwe tentsenefe tin’funika kubzibvunza kuti: Kodi nimbathemba ciyani ndikafuna kusankhula cinthu? Kodi nimbathemba bzinthu bzomwe ndikuwona ayai nimbabvuma kutsogoleredwa na malango ya Yahova? w25.03 20-21 ¶3-4

Munthu ali-wentse an’funika kucita mbali yace kuti acitise wanthu winango kufuna kupitambo m’paraizo wauzimu. Kuti bzimwebzi bzikwanisike, tin’funika kutewezera Yahova. Iye ambangingimiza lini wanthu kuti acite mbali ya gulu lace. M’mbuto mwace, iye ‘ambabweresa’ wanthuwo m’gulu lace mwakudeka mtima. (Juw. 6:44; Jer. 31:3) Yahova ambabweresa m’gulu lace wanthu omwe ana mitima yabwino omwe ambapfunza bza lufoyi lace na makhalidwe yace yabwino. Kodi tingathandize tani wanthu kuti abwere mu paraizo wauzimu na makhalidwe yathu na bzicito bzathu? Njira ibodzi ndiyo kumbacitira bzinthu abale na mpfumakazi zathu mwa lufoyi na mwakudeka mtima. Wanthu akabwera kudzatsonkhana nafe, tikufuna kuti awonembo bzinthu mu njira ibodzi-bodzi ninga momwe adawonera wanthu omwe adatsonkhana ku Kolinto. Iwo adalewa kuti: “Kulewa cadidi, Mulungu ali pakati panu.” (1 Ako. 14:24, 25; Zak. 8:23) Ndipopa tin’funika kupitiriza kuphatisa basa malango yomwe yafotokozedwa mu vesi la lero. w24.04 23-24 ¶16-17