Dezembro

Anyakupfunza wa Jezu adabvuma Fala la Mulungu ndipo akhacita nyongo kuti aphatise basa bzomwe akhapfunza pa moyo wawo. (Juw. 17:6) Napo bziri tenepo, iwo alibe kubvesesa thangwe ranyi Jezu adaphedwa ninga kapondo. Jezu adadziwa kuti anyakupfunza wacewo akhana cikhulupiro ndipo akhafuna Yahova, tsono iwo akhabvesesa lini Bzinembo. (Luk. 9:44, 45; Juw. 20:9) Tenepo, iye adawathandiza kubvesesa bzomwe akhawerenga m’Bzinembo. Mbatiwoneni momwe iye adacitira bzimwebzi pomwe adawonekera kwa anyakupfunza awiri omwe akhayenda ku Emausi. Jezu alibe kuuziratu amunawo kuti iye akhali yani. Thangwe ranyi? Pinango-pentse Jezu akhafuna kuti iwo alewe bzomwe akhakumbuka na bzomwe bzikhali m’mitima mwawo. Iwo adacita bzimwebzi. Iwo adalewa kuti akhadikhirira kuti Jezuyo angadapulumusa Ajirayeri ku utongi bwa Aroma. (Luk. 24:18-27) Jezu adaphatisa basa Bzinembo kuti awathandize kubvesesa bzomwe bzikhadacitikabzo. Usiku bwa ntsiku ibodzi-bodzi ire, iye adathandiza pomwe anyakupfunza winango kubvesesa nkhani ibodzi-bodziyi. — Luk. 24:33-48 w24.10 14 ¶9-10

Jezu adapfunza na Baba wace wakudzulu bzomwe akhafunika kucita na kulewa. Gulu la Yahova limbatewezera ciratizo ca Jezu mwa kuphatisa basa Fala la Mulungu kuti litithandize kudziwa cabwino na cakuipa na kutipasa malango yomwe yambatithandiza pa moyo wathu. (2 Tim. 3:16, 17) Nthawe zentse timbakumbusidwa kuti tin’funika kumbawerenga na kuphatisa basa Fala la Mulungu. Timbagumana phindu likulu kwene-kwene tikambapfunza Bibliya mwakuphatisa basa mabukhu yathu. Mwa ciratizo, tingambandendemezere bzomwe Bibliya limbalewa na malango yomwe timbatambira m’gulu lathu. Tikambakwanisa kuwona kuti malango yomwe gulu limbatipasa yambacokera m’Bibliya, bzimbaticitisa kuti tilikhulupire kwene-kwene gululo. (Aro. 12:2) Jezu adapalizira “mafala yabwino ya Umambo bwa Mulungu.” (Luk. 4:43, 44) Jezu adauzambo ateweri wace kuti ambapalizire bza Umambo bwa Mulungu. (Luk. 9:1, 2; 10:8, 9) Ntsiku zino, wentse omwe ali mu gulu la Yahova ambapalizira mafala yabwino bziribe basa komwe iwo ambakhala. w24.04 9 ¶5-7

Pitirizani kukhulupira malango ya gulu la Yahova. Mu nthawe ya Ajirayeri, Yahova adaphatisa basa Mozeji na Djoswa kuti apase malango Ajirayeri. (Djos. 1:17) Ajirayeri akhasimbidwa pomwe akhabvuma wanthu amwewa ningati aimikiri wa Yahova Mulungu. Pomwe padapita magole mazinji, gwere lacikristau lidakhazikisidwa ndipo apostolo 12 adapereka malango ku magwere. (Mab. 8:14, 15) Grupo limweri lidadzathumizirika pomwe akulu winango wa ku Jeruzalemu adayamba kucita mbali ya grupolo. Thangwe ra kuteweza malango ya amuna wakukhulupirikawa, “wanthu omwe akhakhulupira m’magweremo akhayenda acithumizirika ntsiku na ntsiku.” (Mab. 16:4, 5) Mu ntsiku zathu zino, ifepano tin’dzasimbidwambo tikambateweza malango ya gulu la Yahova. w24.07 10 ¶10

Yahova akhamufuna kwene-kwene Mambo Davide. Ndipo mpaka adafika pakulewa kuti iye akhali ‘munthu omwe akhakondwesa mtima wace.’ Koma Davide adacita pikado zikulu kwene-kwene. Iye adacita upombo ndipo adapha munthu. Mwakubverana na Lamulo la Mozeji, Davide akhafunika kuphedwa. (Lev. 20:10; Num. 35:31) Napo bziri tenepo, Yahova akhafuna kuthandiza Mambo Davide kuti akungule. Tenepo iye adatuma mprofeta wace Natani kuti ayende kukaceza na Mambo Davideyo, napo kuti iye akhanati kulatiza kuti akhafuna kukungula. Natani adaphatisa basa ciratizo kuti athandize Davide kubvesesa kuti akhadacita pikado ikulu kwene-kwene. Davide adabvesesa kuti akhadasunamisa Yahova ndipo adakungula. (2 Sam. 12:1-14) Davide adanemba salimo kuti alatize kuti akhadakungula na mtima wace wentse pa bzomwe akhadacita. (Sal. 51, kamsolo) Wanthu azinji omwe adacita pikado adatsangalazidwa pomwe adawerenga salimo limweri ndipo adakungula. Kodi imwepo mumbabva tani mukakumbukira bza lufoyi lomwe Yahova adalilatiza kwa Davide kuti amuthandize kukungula? w24.08 10 ¶9

Azinji wa ifepano tingatawirize kuti kupfunzisa wana ni basa likulu kwene-kwene. Penu ndimwe m’bereki ndipo muna wana ang’ono, tikukutendani thangwe ra nyongo yomwe mumbacita yakupfunzisa wana wanu kuti akhale na cikhulupiro cakulimba na kukondwesa Yahova. (Deut. 6:6, 7) Pomwe wana wanuwo akukula, iwo angayambe kucita mibvunzo pa bzomwe timbakhulupira na thangwe lomwe limbaticitisa kuti tibvere mitemo ya m’Bibliya. Pinango imwepo mungakumbuke kuti mibvunzo yomwe wana wanu ambakucitani ikulatiza kuti cikhulupiro comwe iwo anaco kwa Mulungu na Bibliya cikucepekera. Tsono pomwe wana akukula, iwo ambafunika kucita mibvunzo kuti atsimikizire kuti bzomwe ambakhulupira mpsacadidi. (1 Ako. 13:11) Ndipopa lekani kucita thupo akakucitani mibvunzo. Iwo akacita mibvunzo, phatisani basa mpata umweyu kuti muwathandize kukhala wakukhwima mwauzimu. w24.12 14 ¶1-2

Akristau wacihebereu akhafunika kukhala na cikhulupiro cakulimba thangwe cingadadzawathandiza kupulumuka pa mabvuto yomwe angadadzagumana nayo ku Djudeya. (Aheb. 10:37, 38) Jezu akhadacenjeza kale ateweri wace kuti akadzawona mzinda wa Jeruzalemu wazunguliridwa na acikunda adzathawire ku mapiri. Akristau omwe akhakhala mu mzinda na wale omwe akhakhala kunja kwa mzinda akhafunika kubvera malango yamweya. (Luk. 21:20-24) Pa nthawe imweyire, wanthu omwe akhakhala kunja kwa mzinda akagopswedwa na acikunda, kawiri-kawiri iwo akhafunika kuthawira mu mzinda omwe ukhana litsito kuti akhotcerereke. Tsono kuthawira ku mapiri kungadawoneka ninga kwakusaya kuthandiza, ndipopa iwo akhafunika kukhala na cikhulupiro cakulimba. Akristau wacihebereu akhafunikambo kukhulupira wale omwe Jezu akhawaphatisa basa pa kutsogolera gwere. Pinango-pentse wale omwe akhatsogolera gwere adapereka malango yakubveka bwino yakulewa bza nthawe yomwe akhafunikira kucoka mu mzindamo na momwe angadacokera. — Aheb. 13:17. w24.09 10 ¶9-10

Pomwe Jezu akhali pa dziko la pantsi pano, iye adacita bwino-bwino basa lomwe Pai wace adamupasa. (Juw. 17:4) Tsono iye alibe kukhala na nzeru zakufuna kucita yekha mabasa yentse pinango thangwe ra kukumbuka kuti angadapasa winango basalo lingadafamba lini bwino. Iye adapfunzisa winango kuti acite basalo. Jezu adalatiza kuti akhakhulupira anyakupfunza wace mwa kuwapasa basa lakusamalira mabira na kutsogolera basa lakupalizira na kupfunzisa. Jezu adauza anyakupfunza wace bzinthu bzomwe akhafunika kucinja, koma adacita bzimwebzo mwakudeka mtima. Anyakupfunza wace winango akhakhulupira lini kuti iye akhadalamusidwa, ndipopa adawathandiza kubvesesa cadidi mwa kuwapasa malango. (Luk. 24:25-27; Juw. 20:27) Iye adawalimbikisambo kuti acite nyongo pa basa lakusamalira mabira ya Yahova sikuti kucita mabasa yawo ya ku thupi. (Juw. 21:15) Iye adawakumbusambo kuti akhafunika lini kucita thupo anzawo akatambira udindo bwakuthumizirika. (Juw. 21:20-22) Ndipo iye adawathandiza kucinja nzeru zakuipa zomwe iwo akhanazo pakulewa bza Umambo, ndipo adawalimbikisa kuti acite basa lakupalizira mafala yabwino ya Umambo. — Mab. 1:6-8. w24.10 15-16 ¶13-14

Kubvera kun’dzapulumusa moyo wathu. Ninga Ajirayeri omwe akhadasala pang’ono kupita mu Dziko Lakupiciridwa, ifepanombo tasala pang’ono kuti tipite mu dziko lipsa lomwe Yahova adatipicira ndipo iro lin’dzakhala paraizo. (Zai. 35:1; Luk. 23:43) Mu dzikolo mun’dzakhala mulibe Sathani na madimonyo yace. (Apok. 20:2, 3) Mu dzikolo mun’dzakhala mulibe magereja yomwe yambapfunzisa bzinthu bzakunama pakulewa bza Yahova. (Apok. 17:16) Ndipo mun’dzakhala mulibembo maboma yomwe yambaboneresa wanthu. (Apok. 19:19, 20) Yahova an’dzalekerera lini kuti m’Paraizo mukhale na apanduki. (Sal. 37:10, 11) Kuli-kwentse wanthu an’dzabvera malamulo yakulungama ya Yahova yomwe yambacitisa kuti wanthu akhale wakuphatana na wa mtendere. Ndipopa iwo an’dzafunana na kumbakhulupirana. (Zai. 11:9) Tikudikhirira bzinthu bzabwino kwene-kwene! Ndipo kuthumizira bzimwebzi, ifepano tikabvera Yahova tin’dzapitiriza kukhala mu paraizo pa dziko la pantsi pano sikuti kwa magole yakucepa koma mpaka kale-kale. — Juw. 3:16. w24.11 9 ¶7

Profesiya imweyi yomwe iri mu vesi la lero ikukwanisika mu ntsiku zathu zino kuposa kale-kale. Mafala yabwino ya Umambo yakupaliziridwa m’bzirewedwe bzakupitirira 1000. Thangwe ra kuphatisa basa webisaite yathu ya jw.org, wanthu azinji pa dziko lentse la pantsi ntsiku zino akupfunza mafala yabwino ya Umambo bwa Mulungu. Na tenepo, Jezu adauzambo ateweri wace kuti iwo an’dzamaliza lini“ kupalizira m’mizinda yentse pomwe iye akanati kubwera,” kudzatonga wanthu acisiyanisa wabwino na wakuipa. (Mat. 10:23; 25:31-33) Mafala yamweya njacadidimbo ntsiku zathu zino. Wanthu azinji ambakhala ku mbuto komwe timbabvumizidwa lini kupalizira padeca. Kuthumizira bzimwebzi, wanthu azinji ambabadwa ntsiku iri-yentse. Na tenepo, tin’dzakwanisa lini kupalizira wanthu wentse pa dziko lentse la pantsi pomwe cimaliziro cikanati kufika napo tingacite nyongo yakupalizira wanthu wa “mtundu uli-wentse, dzinza [na] cirewedwe.” — Apok. 14:6. w24.05 10 ¶6-7

Jezu akhambalewa mafala yabwino kuti atsangalaze na kulimbikisa wanthu. Iye akhalewalewa lini na anyakupfunza wace mwa ukali. (Luk. 8:47, 48) Bzimwebzi ndibzo bzomwe amuna wacikristau an’funika kucita! Jezu adalewa kuti amuna an’funika kupitiriza kukhala wakukhulupirika kwa akazawo. Iye adaphatisa basa mafala ya Pai wace kuti auze amuna kuti an’funika kukhala ‘wakuphatana na akazawo.’ (Mat. 19:4-6) Fala la Cigerego lomwe lidasanduliziridwa pa cinemboci kuti “kuphatana” limbathandauza “kumatirira.” Bzimwebzi bzin’funa kulewa kuti mwamuna na mkazi an’funika kufunana kwene-kwene kukhala ninga kuti adamatirirana. M’bodzi wa iwo akacita cinthu comwe cingasunamise mwanzace awiriwo anibva kuwawa. Mwamuna omwe ambafuna mkazace an’dzatcenkha kuwona mtundu uli-wentse wa pornografia. Mwakamfulumize iye an’dzacitisa kuti maso yace yaleke “kuwona bzinthu bzapezi-pezi.” (Sal. 119:37) Ninga Djobi, iye an’dzacita mpangano na maso yace ndipo an’dzanyang’anisisa lini mkazi omwe ngwace lini mu njira yakuphonyeka. — Djob. 31:1. w25.01 10 ¶12-13

Wanthu akalewa kuti ndakulekerera ambakhala akuthandauza bzinthu bzakusiyana-siyana. Kulekerera kwa Yahova n’kwakusiyana na kwa wanthufe. Palibe munthu angakwanise kulekerera ninga momwe Yahova ambacitira. Pakulewa bza Yahova, nyakunemba salimo adanemba kuti: “Imwepo mumbalekerera na mtima wentse, kuti wanthu akugopeni.” (Sal. 130:4) Inde, Yahova ‘ambalekerera na mtima wentse.’ Iye ndiye omwe ambalatiza thandauzo cairo la kulekerera. M’mavesi manango ya Bzinembo Bzacihebereu, anembi wa Bibliya adafotokoza momwe Yahova ambalekererera mwakuphatisa basa fala lomwe limbaphatisidwa lini basa pakulewa bza kulekerera kwa wanthu. Yahova akalekerera munthu, pikado ya munthuyo imbapfudzidwa. Munthuyo ambakhala pomwe pa uxamwali na Yahova. Timbatenda kwene-kwene Yahova thangwe ra kutilekerera na mtima wentse napo kuti timbaphonya kazinji-kentse. w25.02 8 ¶1-3

Napo kuti wanthu angatetekere lini pomwe tikuwapalizira, ifepano timbakwanirisa basi cakulinga cathu. Thangwe ranyi? Thangwe tacita bzomwe Yahova na Mwana wace Jezu ambafuna kuti ticite, bzomwe ni kupalizira. Napo kuti tingagumane lini wanthu kuti ticeze nawo ayai ticitsutsidwa, timbakhala wakukondwa thangwe timbadziwa kuti tikukondwesa Baba wathu wakudzulu. (Mim. 27:11) Timbakhala wakukondwa tikadziwa kuti mpalizi mwanzathu wagumana munthu omwe akufuna kudziwa bzizinji. Ntsanza ya Mulindiri inango idandendemezera basa lathu la kupalizira na kunyang’ana mwana omwe ataika. Mwanayo akagumanika, wentse ambakhala wakukondwa sikuti munthu omwe amugumanayo basi. Mwakundendemerana na bzimwebzi, basa la kupalizira limbaphatidwa na wanthu azinji. Wentse ambafunikira kuti apalizire gawo ndipo wentse ambakomedwa munthu m’bodzi akayamba kutsonkhana. w24.04 18 ¶13-14

Tikudikhirira bzinthu bzakudekeza bzomwe bzin’citika kutsogoloku! Na thandizo la Yahova, tikudikhirira wanthu azinji kubvuma cadidi pomwe citsautso cikulu cikanati kuyamba. Kuthumizira bzimwebzi, ndife wakukondwa kwene-kwene kudziwa kuti napo pa citsautso cikulu, wanthu azinji an’dzasiya kucita mbali ya dziko la Sathaniri aciphatana nafe pa kutumbiza Yahova! Na tenepo, tina basa likulu kwene-kwene lomwe tin’funika kulicita ndipo tin’dzalicita lini pomwe. Tina mwayi wakupalizira mafala yabwino ya Umambo bwa Mulungu pa dziko lentse la pantsi. Pa nthawe ibodzi-bodziyo tin’funika kupitiriza kucenjeza wanthu bzomwe bzin’citika tsapanopali. Wanthu an’funika kudziwa kuti kumala kwa dzikoli kuli pafupi kwene-kwene. Thangwe rakuti timbafuna mafala yabwino, wanthu ndipo kuposa bzentse timbafuna Yahova Mulungu na dzina lace, tin’dzapitiriza kupalizira mwakukondwa, mwakamfulumize na mwa nyongo mpaka pomwe Yahova adzalewe kuti “bzakwana!” w24.05 19 ¶14-16

Usiku bomwe Jezu akhanati kuphedwa, iye adapfunzisa Pedru na apostolo winango kufunika kwa kukhala wakubzicepesa. Pinango apostolowo adadabwa kwene-kwene pomwe adawona Jezu akuphata basa lomwe likhacitidwa na anyabasa. Jezu adacosa cakubvala cace cakunja acimangirira tuwadya m’nciuno mwace, adaikha madzi m’basiya ndipo adayamba kutsuka minyendo yawo. (Juw. 13:4, 5) Pinango Jezu adatenga nthawe ikulu kuti atsuke minyendo ya apostolo 12 wale kuphatanidzambo Djuda omwe patsogolo pace angadadzamuphindukira. Napo bziri tenepo, mwakubzicepesa Jezu adatsuka minyendoyo. Patsogolo pace, Jezu adalewa kuti: “Kodi mukudziwa thangwe ranyi ndatsuka minyendo yanuyi? Imwepo mumbandicemera ‘Mpfunzisi’ na ‘Mbuya,’ ndipo mumbalewa cadidi, pakuti ndinedi. Tenepo, penu ine Mbuya na Mpfunzisi ndatsuka minyendo yanu, imwepo mun’funikambo kumbatsukana minyendo.” — Juw. 13:12-14. w25.03 10 ¶9-11

Mpsakupusa lini kukhala pa uxamwali bwakulimba na Yahova m’dziko lomwe tikukhalali. Wanthu azinji ambalewa kuti kulibe Mulungu. Ndipo bzimbawoneka ninga kuti wale omwe ambafuna lini Mulungu bzinthu bzimbawafambira bwino. Tikambawona bzimwebzi bzikucitika, cikhulupiro cathu cingayezedwe. N’cadidi kuti tingafike lini pakulamba kuti Yahova alipo, koma tingayambe kupenukira penu iye angatithandizedi. Munembi wa Salimo 73 adagumanambo na bvuto ninga limweri. Wanthu wa mu nthawe yace akhateweza lini malamulo ya Mulungu ndipo akhacita bzomwe iwo akhafuna. Thangwe ra bzimwebzi, iye adakumbuka kuti kutumikira Mulungu kukhalibe phindu. (Sal. 73:11-13) N’ciyani comwe cidamuthandiza kucinja makumbukidwe yace? Iye adakumbukira bzomwe bzingadacitikira wale omwe angadasiya kuthemba Mulungu. (Sal. 73:18, 19, 27) Iye adakumbukirambo bzisimbo bzomwe angakhale nabzo thangwe ra kutumikira Mulungu. Ifepanombo tingakumbukire bzisimbo bzomwe Yahova watipasa kale. w24.06 25 ¶16-17

Mu nthawe ya Ajirayeri, wanthu winango akhafiyalisi abale wawo wakusauka na juro izinji ndipo bzimwebzi bzikhacitisa kuti atazire kupagali. Ndipo atongi winango akhabvuma bobobo kuti atonge wanthu wakusaya kuphonya mwakusaya cirungamo. Yahova ambaipidwa kwene-kwene wanthu akambacita bzimwebzi. (Ezek. 22:12) Tentsenefe tin’funika kumbakumbukira momwe timbaiwonera kobiri. Bzibvunzeni kuti: ‘Kodi inepano nimbandokhalira kukumbukira kobiri na bzomwe ningadagula ningadakhala na kobiri zizinji? Ndikafiyali kobiri, kodi nimbacedwa kubwezera ndicikumbuka kuti munthuyo akuifuna lini kobiriyo? Kodi nimbabziwona kuti ndine wakufunika kwene-kwene thangwe rakuti ndina kobiri mwakuti nimbasamwira wanthu? Kodi nimbawona kuti m’bale ayai mpfumakazi ambafuna lini Yahova thangwe rakuti ana kobiri? Kodi ndina uxamwali na wanthu omwe mbakudala ndipo nimbaceza lini kwene-kwene na wanthu wakusauka?’ Tingakhotcerere uxamwali bwathu na Mulungu mwakutcenkha kumbafuna kwene-kwene kobiri. Tikambafuna kwene-kwene Yahova kuposa kobiri, iye cipo acidzatisiya! w24.06 12-13 ¶17-18

Kuti titcenkhe kuyezedwa, tin’funika kucita nyongo kuti timbakumbuke bzinthu bzabwino. Tikapfunza ‘kuwenga comwe n’cakuipa [na] kufuna comwe n’cabwino,’ tin’dzakhala wakutsimikiza kucita bzabwino. (Amo. 5:15) Tikakhala na makumbukidwe yabwino tin’dzakwanisa kulamba tikayezedwa. Tingakhale nayo makumbukidwe yabwinoyo tikambamala nthawe ikulu tikucita bzinthu bzauzimu. Tikakhala tiri pa mitsonkhano ayai tikupalizira timbalimbisa cikhumbo cathu cakufuna kukondwesa Yahova. (Mat. 28:19, 20; Aheb. 10:24, 25) Tikambawerenga Bibliya na kupfunza Fala la Mulungu ticimbakumbukira bzomwe tikuwerengabzo, timbalimbisa lufoyi lathu lakucita bzomwe mpsabwino ticimbawenga bzomwe mpsakuipa. (Djos. 1:8; Sal. 1:2, 3; 119:97) Kumbukirani kuti Jezu adauza ateweri wace kuti: “Mbapembani nthawe zentse kuti muleke kuyezedwa.” (Mat. 26:41) Tikambapemba kwa Yahova timbamupasa mwayi kuti atithandize, ndipo timbakhalambo wakutsimikiza kucita ciri-centse kuti timukondwese. — Tiy. 4:8. w24.07 17-18 ¶14-16

Wale omwe ambapfunzisa winango angacite bwino kutewezera momwe Yahova ambaperekera nzeru zace. Kumbukirani kuti Yahova ambabisa lini nzeru zace. Mwa njira ibodzi-bodziyi, timbapfunzisa winango bzomwe timbadziwa. Timbasiya lini kuwapfunzisa thangwe ra kugopa kuti iwo akadziwa angadzambacite ndiwo basa lomwe tikucitalo. Ndipo timbakhala lini na makumbukidwe yakuti: ‘Inepano ndidapfunza ndekha! Iyembo an’pfunza yekha.’ Mboni ya Yahova in’funika lini kukhala na makumbukidwe yamweya. M’mbuto mwace, timbakomedwa tikadziwa kuti tiribe kundowapfunzisa bzomwe timbadziwa, koma tacita bzentse bzomwe tingakwanise ‘na cakulinga cakuti tiwathandize.’ (1 Ates. 2:8) Tikawapfunzisa bwino, “iwo an’dzakhala wakuthemera kupfunzisambo wanthu winango.” (2 Tim. 2:1, 2) Tentsenefe tikakhala wakupasa mwa kumbapfunzisambo winango bzomwe timbadziwa, bzin’dzacitisa kuti ifepano pabodzi na omwe tikuwapfunzisawo tikhale wakukondwa. w24.09 29 ¶12-13

Penu imwepo mukukumbuka kuti mulibe luso lakupambulika lekani kubwerera m’mbuyo. Imwepo muna makhalidwe yomwe yangakucitiseni kuti mukhale wakufunika m’gwere. Kumbukirani bzomwe mpostolo Paulo adalewa pa 1 Akolinto 12:12-30 ndipo kumbirani Yahova kuti akuthandizeni kuwona momwe mungaphatisire basa nfundo zimwezi. Mafala ya Pauloya yakulatiza padeca kuti ninga mtumiki ali-wentse wa Yahova pana bzizinji bzomwe imwepo mungacite m’gwere. Citani nyongo kuti mutumikire Yahova na abale wanu. Khalani na citsimikizo centse cakuti akulu wa gwere an’dzakumbukira luso lomwe munalo akafuna kukupasani basa. (Aro. 12:4-8) Mkristau ali-wentse an’funika kukhala pa uxamwali bwakulimba na Yahova, an’funika kukhala wakupasa ndipo an’funikambo kukhala ciratizo cabwino kwa winango. w24.11 17 ¶12-13

Ana adagumana na mabvuto mazinji yomwe yadamucitisa kuti alire. Bvuto libodzi lomwe iye akhagumana nalo ndakuti akhali pa cipali ndipo akhawengedwa na mkhaziba wace Penina. Kuthumizira bzimwebzi, Ana akhalibe wana, tsono Penina akhana wana azinji. (1 Sam. 1:1, 2) Penina akhandokhalira kumuseka Ana nthawe zentse thangwe rakuti iye akhabereka lini. Ana adasunama kwene-kwene mwakuti “akhalira ndipo akhadya lini.” “Iye akhawawidwa mu mtima.” (1 Sam. 1:6, 7, 10) Kodi Ana adacita ciyani kuti abve bwino? Cinthu cakuyamba comwe iye adacita ndico kuyenda ku tendi la mkonkhano kuti akanamate Yahova. Pomwe akhali kumweko, iye adadandaulira Yahova kuti: “[Onani] kubonera kwa kapolo wanune mucindikumbukira.” (1 Sam. 1:11) Yahova adawona kubonera kwace, adabva kulira kwace ndipo adamusimba mwakucitisa kuti akhale na wana. — 1 Sam. 1:19, 20; 2:21. w24.12 21 ¶5-7

Cakulombolera cimbatipfunzisa kuti Jezu ambacita thupo kwene-kwene na wanthu, koma maka-maka na anyakupfunza wace. (Juw. 13:1) Pomwe Jezu akhacita utumiki bwace, iye akhadziwa kuti angadagumana na mabvuto yakunesa kwene-kwene kuphatanidzambo infa yakuwawa. Tsono iye adakwanirisa utumiki bwace napo kuti bzikhali bzakunesa thangwe rakuti akhafuna kwene-kwene wanthu, sikuti thangwe rakuti adacita kuuzidwa na Pai wace. Iye adalatiza kuti akhafuna kwene-kwene wanthu mwa kuwapalizira, kuwapfunzisa na kuwathandiza pa bzomwe iwo akhafunikira. Napo pa ntsiku yomwe angadaphedwa, Jezu adapambula nthawe kuti atsuke minyendo ya apostolo wace, kuwapasa malango na kuwalimbikisa. (Juw. 13:12-15) Ndipo pomwe akhadakhomereredwa pa muti, Jezu adapasa cidikhiro kapondo omwe akhali pambali pace mwa kumuuza kuti angadadzakhala m’Paraizo, ndipo adalatizambo kuti akhacita thupo kwene-kwene na mai wace mwakukumbira Juwau kuti awasamalire. (Luk. 23:42, 43; Juw. 19:26, 27) Bzimwebzi bzikulatiziratu kuti Jezu akhafuna kwene-kwene wanthu sikuti mwakundopereka moyo wace okha, koma na bzentse bzomwe iye adacita pomwe akhali pa dziko la pantsi pano. w25.01 23 ¶11

Yahova akatilekerera timbabzibva bwino. Bibliya limbaphatisa basa ciratizo kuti litithandize kubvesesa bwino nkhani imweyi. Thangwe ra kuperewera, timbandendemezeredwa na “akapolo wa pikado.” Tsono thangwe ra kulekerera kwa Yahova, takhala ninga akapolo omwe ‘atsudzulidwa ku pikado.’ (Aro. 6:17, 18; Apok. 1:5) Tikadziwa kuti Yahova watilekerera pikado zathu, timbakhala wakukondwa ninga momwe ambakhalira kapolo omwe atsudzulidwa. Thangwe ra ntsembe ya cakulombolera yomwe Yahova adaipereka mwakuphatisa basa Mwana wace, ifepano tidapozedwa. (1 Ped. 2:24) Tikacita pikado, timbadzonga uxamwali bwathu na Yahova. Koma cakulombolera cimbatipoza thangwe cimbacitisa kuti tikaphonya Yahova ambatilekerere ticipitiriza kukhala pa uxamwali na iye. Ninga momwe munthu ambakhalira wakukondwa akapozedwa matenda makulu, ifepanombo timbakomedwa kwene-kwene uxamwali bwathu na Yahova bukabwezeresedwa ticiyamba pomwe kufunidwa na iye. w25.02 11 ¶16; 13 ¶17

Mu ciratizo ca matalento, Jezu adalewa bza akapolo awiri omwe adakhala wakukhulupirika kwa mbuya wawo na m’bodzi omwe alibe kukhala wakukhulupirika. (Mat. 25:14-30) Akapolo awiri wakukhulupirikawa ambaimira Akristau wakudzozedwa wakukhulupirika. Mbuya wawo omwe ni Jezu akuwacemera kuti iwo ‘akondwe pabodzi na iye.’ Iwo ambatambira mabaibai yawo kudzulu yomwe ni kulamusidwa kwakuyamba. (Mat. 25:21, 23; Apok. 20:5b) Tsono ciratizo cakuipa ca kapolo wautofu ni mcenjezo kwa Akristau wakudzozedwa. Mwa njira iponi? Iwo akhafunika kulatiza kuti ambaphata basa na nyongo. Mu ciratizo ca matalento na ciratizo ca madende, Jezu akhalewa lini kuti anyakudzozedwa winango angadadzakhala atofu, koma iye akhafotokoza bzomwe bzingawacitikire akasiya kukhala wanyongo. Iwo angaluze mwayi wa ‘kucemeredwa na kusankhulidwa na Mulungu.’ Ndipo iwo angabvumizidwe lini kupita mu Umambo bwa Mulungu. w24.09 22 ¶10; 23 ¶12-13

Tentsenefe timbafuna kugumana bzinthu bzakufunikira pa moyo wathu na pa banja lathu. (Mpal. 7:12; 1 Tim. 5:8) Tikambasankhula mtundu wa basa lomwe tingadzaphate timbakumbukirambo kuti ni kobiri zingasi zomwe tingadzatambire. Tsono penu timbandokumbukira bzimwebzi basi ifepano tikufamba lini mwa cikhulupiro. Penu tikufamba mwa cikhulupiro tin’dzakwanisa kuwona kuti basa lomwe tasankhulalo lin’dzadzonga uxamwali bwathu na Yahova ayai ne. Tin’funika kubzibvunza kuti: ‘Kodi basa lomwe ndasankhulali lin’dzacitisa kuti ndicite bzinthu bzomwe Yahova ambakomedwa lini nabzo?’ (Mim. 6:16-19) ‘Kodi lin’dzandicitisa kuti ndiluze mitsonkhano, kuleka kukhala na nthawe yakupalizira, kupfunza Bibliya ayai kukhala kutali na banja langu?’ Penu pa mibvunzo yentseneyi mtawiro wanu ngwakuti inde, cinthu ca nzeru ni kulamba basalo napo kuti bzikukunesani kugumana basa linango. Tikafamba mwa cikhulupiro tin’dzasankhula bzinthu bzomwe bzin’dzalatiza kuti tina citsimikizo cakuti Yahova an’dzatisamalira na kutipasa bzomwe tikufunikira. — Mat. 6:33; Aheb. 13:5. w25.03 21 ¶5-6

Tin’funika kumbawona abale na mpfumakazi zathu ninga momwe Yahova ambawawonera. Tingacite bzimwebzi mwakumbawona makhalidwe yawo yabwino sikuti bzakuphonya bzawo. Tingamalise kusaya kubvesesana kuli-kwentse pakati pathu mwa lufoyi. Tikacita bzimwebzi, wanthu omwe akufuna kucitiridwambo bzinthu mu njira imweyi an’dzafunambo kucita mbali ya paraizo wauzimu. Tenepo mbatitendeni Yahova thangwe ra kutikonzera paraizo wauzimu umweyu. Munthu ali-wentse omwe akufuna kulimbikisidwa, kukhala wakukondwa, wakugwa mpfuwa na wakukhotcerereka, an’funika kupita mu paraizo wauzimu umweyu acileka kucoka. Tsono khalani tceru thangwe Sathani akucita ciri-centse comwe angakwanise kuti aticose mu paraizo wauzimuyu. (1 Ped. 5:8; Apok. 12:9) Ndipo tin’funika lini kulekerera kuti iye atikunde. Mbaticiteni nyongo kuti tikhotcerere kudeka, kucena na mtendere wa mu paraizo wauzimu. w24.04 24-25 ¶18-19

Abereki, imwepo mungapfunzise wana wanu kufuna kutumikira Yahova. Apfunziseni wana wanu kuwona kuti bzinthu ninga kuwerenga Bibliya, kuyenda ku mitsonkhano na kupalizira bzimbakuthandizani kwene-kwene kukhala pa uxamwali bwakulimba na Yahova ndipo mpsakufunika kwene-kwene pa moyo. Mukasaya kucita tenepo, wana wanu an’dzatumikira Yahova thangwe ra kuti imwepo ndimwe “Mboni.” Ndipo bzimwebzi bzin’dzawacitisa kuyamba kuwona kuti kutumikira Yahova n’kwakufunika lini ayai an’dzasiya kumutumikirako.Munthu akasiya kutumikira Yahova, kodi bzimwebzi bzin’funa kulewa kuti munthuyo angadzakhale lini pomwe xamwali wa Yahova? Ne, thangwe iye angakungule aciyamba pomwe kutumikira Yahova. Kuti bzimwebzi bzikwanisike, iye an’funika kubzicepesa acibvuma thandizo lomwe angapasidwe na akulu wa gwere. (Tiy. 5:14) Kuti akhale pomwe pa uxamwali na Yahova, iye an’funika kucita nyongo! w24.07 24-25 ¶18-19

Kodi imwepo mungacitise tani kuti umakhadzi bwanu bukhale bwakulemekezeka? Pomwe lufoyi lanu likukula awirimwe mun’dzayamba kufunana kwene-kwene. N’ciyani cingakuthandizeni kuti muleke kucita cinthu comwe cingakondwese lini Yahova? Tcenkhani kumbaceza nkhani za upombo, kumbakhala pa mwekha na kumwa kwene-kwene. (Aef. 5:3) Thangwe kucita bzinthu bzimwebzi kungathumizire cikhumbo cakufuna kucita malume ya pamphasa ndipo bzingakutaziseni kucita bzinthu bzomwe mpsabwino. Cingakhale cinthu ca nzeru imwepo nthawe zentse kumbacezerana momwe mungambalemekezerane winango na mwanzace na kumbalemekezambo malamulo ya Yahova. (Mim. 22:3) Pomwe lufoyi lanu likukula imwepo mungambacitirane bzinthu bzinango bzakulatiza kuti mumbafunana mu njira yakuthemera. Tsono bzikhumbo bzanu bzakucita malume ya pamphasa bzikakula, bzingakhale bzakunesa kwene-kwene kucita cakusankhula ca nzeru na mwanzanu. (Nyi. 1:2; 2:6) Kuthumizira bzimwebzi, pomwe mumbakhala mukucitirana bzinthu bzakulatiza kuti mumbafunana bzingakhale bzakunesa kwene-kwene kubziphata ndipo bzingacitise kuti mucite bzinthu bzomwe bzimbakondwesa lini Yahova. (Mim. 6:27) Pomwe mukuyamba umakhadzi bwanu cezeranani malamulo ya Yahova kuti muwone penu mungadzacitirane bzinthu bzinango bzakulatiza kuti mumbafunana ayai ne. — 1 Ates. 4:3-7. w24.05 29 ¶10-11

Ifepano tikufuna kuti winango akhale na citsimikizo cakuti tin’dzawathandiza iwo akadzagumana na mabvuto. (Mim. 17:17) Tsono n’ciyani comwe tingacite kuti abale ambatiwone kuti ndife wakuthembeka? Ifepano tingacite bzomwe tingakwanise kuti titewezere Yahova ntsiku na ntsiku. Mwa ciratizo, timbacita bzimwebzi mwa kumbateweza bzomwe tapicira na kumbakoya nthawe. Akulu omwe mbakuthembeka ni mphaso m’gwere. Mwa njira iponi? Abale ambabzibva bwino akadziwa kuti pa nthawe iri-yentse angakumbire thandizo kwa akulu. Abale ambabzibva kuti mbakufunidwa akadziwa kuti akulu mbakukonzeka kuwathandiza. Abale an’dzathemba kwene-kwene akulu akawona kuti iwo ambaphatisa basa Bibliya na mabukhu yathu sikuti nzeru zawo pomwe akupereka malango. Kuthumizira bzimwebzi, abale ambathemba akulu omwe ambauza lini wanthu winango nkhani za cintsintsi ndipo ambapitiriza kuteweza bzomwe adapicira. w24.06 30 ¶14-15

Yahova angamalise lini mabvuto yathu yentse pomwe tikali mu dziko lakuipa lino, tsono tin’funika kuthemba iye kuti atitsangalaze na kutithandiza. (Sal. 41:3) Yahova ambaphatisa basa mzimu wace wakucena kuti atipase mphanvu, nzeru na mtendere wa mu mtima kuti tikwanise kukhala wakulimba pomwe tikugumana na mabvuto. (Mim. 18:14; Afil. 4:13) Njira inango yomwe Yahova ambaphatisa basa kuti atitsangalaze ndiyo Bibliya. Tikawerenga Bibliya timbabva kuti iye an’dzamalisa matenda kutsogoloku. (Zai. 33:24) Yahova adacitisa kuti anembi wa Bibliya anembe mafala yomwe yambaderekhesa mtima wathu na yomwe yambatitsangalaza tikakhala tikugumana na mabvuto. (Aro. 15:4) Onani bzomwe mpfumakazi inango ya ku Madokero kwa África yomwe idagumanidwa na matenda ya kankro idalewa. Pomwe mpfumakaziyi idadziwa kuti ikhana matenda ya kankro ikhandokhalira kulira. Iyo idati: “Vesi la m’Bibliya lomwe limbanditsangalaza kwene-kwene ni Zaiya 26:3. . . . Vesiri likulatiza kuti Yahova an’dzaderekhesa mtima wathu ndipo an’dzatithandiza kupirira bvutolo.” Tsono tanimbo imwepo? Kodi pana vesi la m’Bibliya lomwe limbaderekhesa mtima wanu mukakhala mukugumana na mabvuto yomwe mungakwanise lini kuyamalisa? w24.12 24 ¶17-18

Akulu wa gwere ambacita nyongo kuti alatize khalidwe limweri kwa wanthu wakucosedwa. Iwo akufuna kuti wanthu omwe adacosedwa ‘abwerere’ kwa Yahova. (Luk. 15:22-24, 32) Pambakhala na cikondweso cikulu kudzulu na pantsi pano munthu omwe wacita pikado akabwerera! (Luk. 15:7) Bzikuwonekeratu padeca kuti Yahova ambalekerera lini wanthu omwe alibe kukungula kuti apitirize kukhala m’gwere. Napo bziri tenepo, iye ambayezera kuwathandiza. Iye akufuna kuti iwo abwerere kwa iye. Onani momwe Yahova ambabvera wanthu omwe acita pikado akakungula pa Ozeya 14:4. Vesiri limbati: “Nin’dzamalisa kusaya kukhulupirika kwawo. Nin’dzawalatiza lufoyi mwakufuna kwangu, thangwe ukali bwangu bwawacokera.” Thangwe ra kudziwa momwe Yahova ambabvera, akulu ambacita ciri-centse kuti awone penu munthu omwe wacita pikado ikulu akulatiza kuti wakungula. Ndipo mafala yamweya yambatsimikizirambo wentse omwe adasiya Yahova kuti iye akufuna kuti iwo abwerere mwakamfulumize. w24.08 28 ¶8-9

Nthawe zinango wanthu winango angatende lini bzomwe timbawacitira. Tingacitire munthu cinthu, tsono patsogolo pace tingawone kuti iye alibe kutenda bzomwe tamucitirabzo. Bzimwebzi bzikacitika, n’ciyani comwe tingacite kuti tileke kuluza cikondweso ayai kuti tileke kusunama? Kumbukirani kuti cikondweso cathu cimbathemba lini penu winango angatitende pa bzomwe timbawacitira ayai ne. (Mab. 20:35) Tingapitirize kuthandiza winango napo kuti iwo angatitende lini bzomwe tingawacitire. Tingacite tani? Kumbukirani kuti mukakhala wakupasa mumbakhala mukutewezera Yahova. Yahova ambapasa bzinthu bzabwino wanthu napo kuti nthawe zinango iwo ambamutenda lini. (Mat. 5:43-48) Yahova akupicira kuti tikambacitira bzinthu bzabwino wanthu winango “mwakusaya kudikhira kubwezeredwa cinthu, . . . mabaibai [yathu] yan’dzakhala makulu.” (Luk. 6:35) “Cinthu” comwe cikulewedwa kuti tingacidikhirireco cingakhale kutendedwa na iwo. Kumbukirani kuti Yahova an’dzakusimbani thangwe ra bzabwino bzomwe mumbacita kuti muthandize winango thangwe iye ambafuna “wanthu omwe ambapereka mwakukondwa.” — Mim. 19:17; 2 Ako. 9:7. w24.09 29 ¶14-16