NKHANI YA PA TSAMBA LAKUYAMBA | THANGWE RANYI BIBLIYA NDAKUFUNIKA KULIBVESESA?
Thangwe Ranyi Bibliya Ndakufunika Kulibvesesa?
“Bibliya ni bukhu la cipembedzo lomwe ndakudziwika kwene-kwene. Tsono kwa Maxineji, iro ni bukhu lacirendo ndipo ndakusaya kufunika.”—LIN, CHINA.
“Ndimbabvesesa lini mabukhu yakupambulika ya cipembedzo cangu ca Cibuda. Tenepo ndingabvesese tani Bibliya lakupambulika?”—AMIT, INDIA.
“Ndimbalemekeza Bibliya ninga bukhu lakale ndipo ndimbabva kuti limbagulisidwa kwene-kwene pa dziko lense. Koma ine ndikanati kuliwona.”—YUMIKO, JAPÃO.
Wanthu azinji pa dziko lense lapansi wambawona kuti Bibliya ndakufunika. Napo bziri tenepo iwo wambadziwa bzinthu bzing’ono-ng’ono ayai ambadziwa lini na cibodzico bza nfundo za m’Bibliya. Bzimwebzi bzimbacitikira wanthu azinji womwe ambakhala ku Àsia, ndipo bzimbacitikambo ku madziko mazinji komwe Bibliya limbagumanika.
Tenepo, pinango mungabzibvunze kuti: ‘Kodi thangwe ranyi ndin’kufunika kubvesesa Bibliya?’ Kubvesesa bzomwe bukhu lakupambulikali limbalewa kungakuthandizeni kucita ibzi:
• Kugumana mtsangalazo na cikondweso
• Kulimbana na mabvuto ya m’banja
• Kulimbana na thupo
• Kukulisa khalidwe labwino na winango
• Kuphatisira basa kobiri mwanzeru
Onani ciratizo ca Yoshiko, wa ku Japão. Iye akhabzibvunza bza Bibliya lense ndipo adawona kuti kuli bwino kuyamba kuliwerenga. Kodi bzakutewera bzace bzidakhala bziponi? “Bibliya lidandithandiza kugumana cakulinga ca moyo ndipo ndidakhala na cidikhiro ca kutsogolo,” ndipo iye adapitiriza kuti: “Tsapano ndimbabzibva lini pomwe wakusaya cakulinga.” Amit, omwe wafotokozedwa pakuyamba ule, adayamba kupfunza Bibliya. Iye adati: “Ndidakhala wakudabwisidwa kwene-kwene. M’Bibliya muna nfundo zakufunikira kwa munthu ali-wense.”
Bibliya limbatokonya kwene-kwene moyo wa bzulu na bzulu bza wanthu. Thangwe ranyi mun’saya kubzipenda mwekha kuti muwone momwe Bibliyalo lingakuthandizireni pa moyo wanu?
[Kwadru pa tsamba 3]
Kuti mudziwe bzizinji bza momwe mungagumanire phindu m’Bibliya, onani broxura lakuti: Banja Lanu Lingakhale Lakukondwa, lakukonzedwa na Mboni za Yahova.