Pfunzisani Wana Wanu Kukhala Atumiki
1. Kodi Psalymo 148:12, 13 limbalimbisa wabereki Wacikristau kucita ciani?
1 Yahova ambauza wana ang’ono kuti wamutumbize. (Psalymo 148:12, 13) Tenepo, wabereki Wacikristau wambandopfunzisa lini wana wawo cadidi ca m’Bibliya na bzakutonga bza Mulungu. Iwo ambawapfunzisambo kukhala atumiki wa bzipsa bzabwino. Kodi bzingacitidwe tani bzimwebzi mwa pang’ono-pang’ono?
2. Kodi ciratizo cabwino ca wabereki cingatokonye tani wana wawo?
2 Ciratizo Cabwino: Muyeruzi Gideyoni adauza wanthu wace 300 kuti: ‘Mbandiwonesesani, mucipfunza na bzomwe ndinkucita.’ (Wayeruzi [Oweruza] 7:17) Mwacibadwa, wana wambawona na kutewezera wabereki wawo. Baba munango ambaphata basa usiku, tsono iye akabwerera kumui ku macibese kwa nsiku ya malinkhuma, m’mbuto mwakuyenda kagona, iye ambatenga wana wace aciyenda nawo mu utumiki napo penu adaneta kwene-kwene. Mwakusaya kulewa cinthu, iye ankupfunzisa wanawo kuti utumiki buli patsogolo pa moyo wace. (Mateu 6:33) Kodi wana wanu wambakuwonani muli wakukondwa kucita mabasa yauzimu yakusiyana-siyana ninga kupemba, kulewenga Bibliya, kutawira pa mitsonkhano na kupalizira? N’cadidi kuti mun’dzakhala lini ciratizo cakulungamiratu. Tsono wana wanu wan’dzatawira bwino nyongo yanu yakuwapfunzisa kunamata Yahova penu iwo waniwona imwepo munkumbacita nyongo yakumutumikira.—Bzakutonga [Deuteronomo] 6:6, 7; Waroma 2:21, 22.
3. Mpsiponi bzakulinga bzomwe wabereki wangathandize wana wawo kukhala nabzo na kubzitsungira?
3 Bzakulinga Bzakuyenda Nabzo Patsogolo: Wabereki mwakusaya kuneta wambapfunzisa wana wawo kufamba, kulewa-lewa, kubvala wokha na bzinango. Wanawo wakakwanisa kucita bzimwebzi pomwe wankukula, waberekiwo ambawaikhira bzakulinga bzinango. Penu waberekiwo ni Wakristau, iwo wambapfunzisambo wana wawo kukhala na bzakulinga bzauzimu na kubzitsungira mwakubverana na msinkhu pabodzi na luso lawo. (1 Wakolinto 9:26) Kodi munkupfunzisambo wana wanu kutawira pa mtsonkhano na mafala yawo-yawo, na kukonzekera nkhani za pa Xikola ya Utumiki bwa Mulungu? (Psalymo 35:18) Kodi munkuwapfunzisa kucita utumiki bwakusiyana-siyana? Munkumbawaikhira bzakulinga ninga batismo na utumiki bwa nthawe zense? Kodi munkuwathandiza kucita uxamwali na atumiki wakukomedwa womwe wan’dzawalimbisa?—Mimwani 13:20.
4. Kodi wana wambagumana phindu liponi thangwe ra kukhala na wabereki womwe ambawapfunzisa kukhala atumiki kutomera wakali an’gonoletu?
4 Munembi wa mapsalymo adati: “Imwe Mulungu mwandipfunzisa kutomera pa utswaka bwangu, ndipo mpaka pano ndikudziwisa bza mabasa yanu yakudabwisa.” (Psalymo 71:17) Yambani kupfunzisa wana wanu kukhala atumiki kutomera wali ang’onoletu. Kuwakonzekeresa mwa njira zimwezi, kun’dzawapasa phindu wakadzakula!—Mimwani 22:6.