Phatisisani Bzomwe Bibliya Limbalewa pa Misinda ya Nkhawa—Mbali 4

Pakuwonekera pa Msinda wa Nkhawa Wakutsogoledwa na Omwe si Mboni

Kuwonekera pa msinda wa nkhawa wakutsogoledwa mwakubverana na bzikhulupiro bza bzipembedzo bzakunama, ni nkhani yakufunika kwene-kwene, napo msindayo ucitidwe m’gereja ayai m’mudzi. (Onani “Mafunso Ochokera Kwa Owerenga” mu Nsanja ya Olonda 15 Maio, 2002). Mpsabwino kukumbukira kuti msinda wakucitidwa m’gereja, ni msinda wa cipembedzo ndipo pinango ungadzaphatanidze mapfunziso ayai mafala yakuthandizira bzikhulupiro bzomwe si bza m’Bibliya, ninga cikhulupiro cakuti mzimu umbafa lini, na kuti wanthu wense wabwino wan’dzayenda kudzulu. Kugonera nkhawa, kuimba nyimbo za cipembedzo, kupemba kwa anyamuya, kupereka nsembe za nyama, kuthirira mizimu pabodzi na miyambo minango ya pezi, imbacitidwa kawiri-kawiri m’misinda ya nkhawa ya m’midzi.

² Nthawe zinango, pana mtemo wakuti wadzinza wapafupi wa m’banja wacite misinda yakupambulika ya nkhawa. Mwa ciratizo, mwana wacimuna wakuyamba kubadwa, ambadikhiridwa kuti acite miyambo ya nkhawa yakuphonyana na Bibliya, kucitira babace omwe akhali lini Mboni. Ayai Mkristau mansiwa angadikhiridwe kuti acite miyambo ya msinda wa nkhawa yomwe njacikunja. Pa bzinthu ninga bzimwebzi, bzimbafunika kusamala kwene-kwene kuti titcenkhe kucita cakuipa. Tin’funikira lini kudikhira kuti pawoneke infa kuti tilatize kaimidwe kathu pa nkhani zimwezi kwa abale wathu omwe si Mboni. Iwo wakadziwiratu na nthawe kuti kaimidwe kathu n’kaponi, bzingadzapuse kukhotcerera kaimidwe kathu pakulimbana na mabvuto yomwe yambawoneka pa nkhawa.

³ Apa tani penu munthu aniwona kuti kuwonekera pa msinda wa nkhawa kungamucitise kucita bzinthu bzomwe si bzacikristau, ayai kukhumudwisa anzace, ayai kunesana na womwe si Mboni? Kukumbukira kuti cibodzi pa bzinthu bzimwebzi cingacitike, kungakhale thangwe labwino kuti Mkristau asankhule penu aniyenda ayai ne ku msinda wa nkhawa. Penu thangwe ra cikumbu-mtima cace munthuyo an’sankhula kusaya kuyenda, palibe munthu wa m’gwere an’funikira kumutombodzera ayai kuipidwa naye. Winango wambasankhula kukazungira banja lakufedwalo pomwe msinda wa nkhawa ukanati kucitika ayai pambuyo pakuti wamala kale. Pa nthawe zimwezi, banja lakufedwalo limbakhala lakhazika mtima pansi na lakufunisisa kubva bzomwe Bibliya limbalewa. Kupereka thandizo la kobiri kwa banjalo pomwe palibe wanthu azinji, kungacitise kuti banjalo ligumanedi phindu na kobiriyo.

⁴ Lekani Kucepsa Ngozi: Wazinji wambawona misinda ya nkhawa ninga nyengo yomwe imbawapasa mpata wakutsonkhana na wanthu, wacidya na kumwa bzomwe wambapasidwa kawiri-kawiri pa nkhawapo. Kwa iwo, kuwona na kuwonedwa pa nkhawa, n’cinthu cakufunika kwene-kwene. Tenepo, kusaya kuwonekera pa msindayo kungacitise kuti banja lakufedwalo liyipidwe na munthuyo. Winango wambafika pakukumbuka kuti penu waniwonekera lini kawiri-kawiri pa misinda ya nkhawa za anzawo, ndiye kuti wazinji wan’dzabwerambo lini pa nkhawa yawo! Na mathangwe yamweya, bzimbacitika kawiri-kawiri kuti wanthu wambayenda ku nkhawa ziwiri, zitatu ayai zizinjiretu pa mdzinga m’bodzi wokha, napo penu wakhamudziwa lini nyamuyayo ayai banja lakufedwalo. Kodi kuwonekera pa nkhawa na makumbukidwe yamweya, kumbabverana na makumbukidwe ya Mulungu?

⁵ Ifepano ninga Wakristau wacadidi, tin’funikira kukumbukira momwe kumbandowenekera pa nkhawa zizinji kungadzongere uzimu bwathu. Kodi bzingadakhala bwino kudzonga nthawe izinji tinkumbayenda ku nkhawa za wanthu pa nsiku zakumala kwa mdzinga, ticimbasaya nthawe yakuyenda mu utumiki bwa kumunda na kucita mabasa manango ya Mulungu? (Wayefezo 5:15, 16) Pakuti pa misinda ya nkhawa za kudziko pambacitidwa kawiri-kawiri bzinthu bzomwe si bzacikristau, ninga kumwa kwene-kwene na kugonana, kodi bzingadakhaladi bwino kuyenda tekha-tekha ku nkhawazo, ayai kutumiza mwanzathu wa m’banja yekha-yekha ku msinda wa nkhawa wakucitidwira ku mzinda wakutali? Tin’funikira kusamala kumbandokhala ticiwonekera pa misinda ya nkhawa yomwe yimbakondwesa lini Yahova, pakuti bzingadzonge kuyenda kwathu patsogolo mwa uzimu pabodzi na makhalidwe yathu Yacikristau.—Cibvumbulutso 18:4.

⁶ Nthawe zinango, Wakristau wakusaya kusamala wambacepsa ngozi, wacicita bzinthu bzakuphonyeka na kuluza maudindo yawo, ndipo winango wadafika pakucosedwa m’gwere Lacikristau. Bibliya limbacenjeza kuti: “Nyakucenjera ngule omwe akawona tsoka ambabisalika.” (Mimwani 22:3) Kubvesesa mtemoyu na kukumbukira ngozi yauzimu yomwe ingatiwonekere, kun’funika kucitisa kuti timbasamale pomwe tinkukumbukira kuyenda ayai ne ku nkhawa ya omwe si Mboni.

Makumbukidwe ya m’Bibliya Njacikati-kati na Yakubveka Bwino

⁷ Pa 1 Wakolinto 10:21, timbauzidwa kuti: “Mungadyere lini pa ‘citawo ca Yahova’ na pa citawo ca madimonyo.” Wanthu wa Mulungu wambalitenga mwa mphanvu cenjezoli. N’ciani cingadacitika penu m’bale thangwe ra kungingimiridwa na wanthu womwe si Mboni, iye an’cita mbali pa mwambo wacikunja wa nkhawa? Penu m’bale angadapemba cifanikiso ayai kusanganiza cikhulupiro na winango, bzimwebzi bzingadakhala kupanduka, ndipo bzingadafunikira kucita ciri-cense kuti gwere likhale lakucena.—Bzakutonga 18:9-13; Jeremiya 7:16-19.

⁸ Kuwona Infa Mu Njira Yakuthemera: N’ciani cin’dzatithandiza kukhala na makumbukidwe yacikati-kati pa nkhani ya infa na macitidwe ya misinda ya nkhawa ninga momwe talewera kalemu? Bzin’funika tin’fune Yahova kucokera pansi pa mtima, ticifika pa “kuwenga comwe n’cakuipa.” (Psalymo 97:10) Misinda ya nkhawa yakubverana na cikhulupiro cakuti anyakufa wangacite ciri-cense kwa wanthu wa moyo, tin’funikira kuitcenkha, bzinese bzitani. Nthawe ibodzi-bodziyo, lufoyi lathu likulu kwa winango, lin’funika kutilimbisa kukhala kutali na ciri-cense comwe cingakhumudwise Wakristau anzathu ayai kupweteka cikumbu-mtima cawo.—1 Wakolinto10:32, 33.

⁹ Kubvesesa bwino-bwino bza mkhalidwe wa anyakufa, kumbatithandiza kutcenkha makumbukidwe na bzicito bza wanthu womwe wali mu mdima wauzimu. Timbalambambo kupumpsidwa na wale womwe wambatsogolera misinda ya nkhawa yomwe imbatumbiza na kulemekeza anyakufa, ayai yomwe wambalatiza ugo na cuma comwe wanaco. Ifepano cipo ticibvuma kuti makonzedwe ya nkhawa yatitazise kucita mabasa yathu yauzimu yakufunika kwene-kwene. Ndipo tingadaipidwa lini penu munthu angadasankhula kusaya kuwonekera pa msinda wa nkhawa yathu ayai kusaya kutiphatanidza pa makonzedwe manango ya nkhawa. Wakristau wacadidi wambakumbuka na kucita bzinthu mwakusiyana thangwe iwo wambatsogoledwa na cadidi ca m’Bibliya. (Wayefezo 5:8) Ifepano timbalira na kupendesa nkhawa ya wakufunidwa wathu mu njira yakulemekezeka yomwe imbalatiza kubvesesa kwathu bzinthu bza uzimu na mu njira yomwe njakubzicepsa, yacikati-kati na yakubverana na cadidi ca m’Bibliya.—1 Watesalonika 4:13; 5:5, 8, 11.

¹⁰ Lekani Kugopa Wanthu wa Moyo: Ifepano cipo ticifuna kukhumudwisa munthu ali-wense. Tsono, ninga momwe mabasa yabwino ya Jezu yadakalipisa wale womwe wakhabvesesa lini cadidi, tenepombo kukhotcerera kwathu kunamata kwacadidi kungacitisembo bzibodzi-bodzibzo. (Juwau 6:60, 66) Kulamba kwathu kuteweza miyambo ya msinda wa nkhawa wacikunja, kungacitise kuti titombodzeredwe, titukwanidwe, kuboneresedwa ayai kuwengedwa na womwe si Mboni. (1 Pedru 4:4) Mboni za Yahova zinango zidafika pa kutengeredwa utaka, kumanidwa thandizo na kumbathawidwa na wanthu thangwe ra kuima ku mbali kwa comwe n’cabwino. (Juwau 15:19) Winango wadayamba kumbapenukiridwa na kumbalewedwa kukhala wanthu wa kubzisankhula na wakusaya kulemekeza anyakufa. Napo bzimbadeka lini kucitidwa tenepoyo, ifepano timbadikhira kale bzimwebzo pakudziwa kuti ndife wanthu wakusiyana na dziko. (2 Timotio 3:12) Tenepo, m’mbuto mwakubvuma kupumpsidwa thangwe ra kugopa wanthu, ife timbabvuma kutsogoledwa na mantha yabwino yomwe yambakondwesa Yahova Mulungu.—Mimwani 29:25; Mabasa 5:29.

¹¹ Asiyeni Awone Kusiyana Kwace: Winango wadatiuza kuti: “Imwepo Mboni za Yahovamwe mumbadziwa lini kupendesa anyakufa wanu.” Kodi tin’funika kuneseka na mafalaya? Kodi nthawe zinango timbafuna kuyeza kuwataliza wanthuwo kuti ifepano timbadziwadi kupendesa anyakufa wanthu wakufunidwa? Tikumbukire kuti pomwe Sathani adapumpsa Jezu kuti awonese penu iye akhalidi Mwana wa Mulungu mwakubzithusa kucokera padzulu pa tempwlo mpaka pansi, Jezu alibe kubvuma. Iye alibe kupumpsika kucita cinthu kuti adabwise wanthu winango. (Mateu 4:5-7) Ticitembo bzibodzi-bodzi pakulamba mapumpso yakufuna kuwonesa kuti timbadziwa kupendesa anyakufa, mwakutewezera misinda ya nkhawa yakutsogoledwa na womwe si Mboni. Kodi tingakwanise tani kucita bzimwebzi? Tewezerani ciratizo ca Jezu.

¹² Wanthu wa Mulungu wambasiya lini miyambo inango yacikunja ya kunamata kwakunama acimbacita miyambo inango yomwe ingalatize ninga kuti Mboni za Yahova zakhazikisa miyambo yawo-yawo yakutengedwa kucikunja. (Wagalatiya 6:12; Bzakutonga 12:30) Koma mwakusiyana na bzimwebzi, timbadziwa kuti miyamboyi imbalemekeza lini Mulungu, njacikunja ndipo imbabverana lini na kunamata kwacadidi. (1 Wakolinto 10:20) Tikambalatiza kawonedwe kamweka, timbapereka mpata kuna wanthu kuti ‘awone kusiyana pakati pa nyakulungama na nyakuipa, na pakati pa omwe ambatumikira Mulungu na omwe alibe kumutumikira.’—Malakiya 3:18.

¹³ Pakusaya kucedwapa infa in’dzakhala kulibe. Misozi yathu, kusunama kwathu na kuwawidwa kwathu mu mtima, pakumalizira pace bzin’dzamala pomwe Yahova an’dzalamusa anyakufa. (Cibvumbulutso 21:4) Cidikhiro ciri-cense cakudzawonana pomwe na anyakufa wakufunidwa wale, bzina ifepano kukhulupirika kwathu nthawe ino. Pomwe tinkudikhira kukwanisika kwa mapiciro makuluya, tikhale wakutsimikiza mu mtima kugumanidwa na Yahova tiri wakulungama, wakusaya nthonsa, na wakusiyana na dziko lakuipali pabodzi na bzakucita bzace bzakusaya kulemekeza Yahova!—2 Pedru 3:14.