Kukulisa Luso Lathu mu Utumiki​—Kunemba Wanthu Wakufuna Kudziwa Bzizinji

‘Mbasamala nthawe zense na bzomwe umbacita pabodzi na bzomwe umbapfunzisa.’ (1 Timotio 4:16) Malango yakufulizidwaya, yakucokera kwa mpostolo Paulo kuna Timotio, yambalatiza kuti tin’funikira kucita nyongo yakukhala apalizi wakuyenda patsogolo, bziribe basa penu ndife watsapanopa ayai wakale-kale. Kuti tithandizike pa nkhaniyi, mu Utumiki Bwathu bwa Umambo, muti mumbabwere nkhani zakuti, “Kukulisa Luso Lathu mu Utumiki.” Nkhani iri-yense in’dzafokotoza nfundo ibodzi yakufunika, icitipasambo luso na nzeru za momwe tingayendere patsogolo. Mkati mwa mwezi, apalizi wan’dzalimbisidwa kuti waiphatise basa nfundoyo. Ku phampha kwa mwezi, nkhani ibodzi ya mu Mtsonkhano wa Basa, in’dzatipasa mpata kuti tilewe momwe tagumanira phindu pakuiphatisa basa nfundoyo. Mwezi uno tinkulimbisidwa kuti tiwanembe wanthu womwe walatize kufuna kudziwa bzizinji.

Thangwe Ranyi Mpsakufunika: Kuti tikwanirise basa lathu, tin’funika lini kumbandopalizira kokha, koma tin’funikambo kumbawazungira wanthu womwe walatize kufuna kudziwa bzizinji, ticiwapfunzisa. Tenepo tin’dzakhala tinkuthirizira mbeu za cadidi zomwe tabzalazo. (Mateu 28:19, 20; 1 Wakolinto 3:6-9) Bzimbafunika kuwonana pomwe naye munthuyo, kuceza naye bzinthu bzomwe bzimbamunesa, ticimangiridza pa bzomwe tidacezerana naye pa ulendo bwakuyamba. Tenepo, tikagumana munthu wakufuna kudziwa bzizinji, bzin’funika kumunemba.

Bzomwe Munganembe:

• Tsimikizirani kuti mu pasta yanu ya utumiki bwa kumunda muna tsamba na cakunembera kuti mukanembe wanthu womwe walatize kufuna kudziwa bzizinji. Bzomwe munembebzo bzikhale bzakuwoneka na bzakulinganizika. Mumbanemberetu pomwe mwandocoka pa nyumba ya munthuyo.

• Nembani bzinthu ninga: Dzina la mweneciro nyumbayo, komwe iye ambakhala pabodzi na mulewengo wa mtedwe wace. Nembanimbo bzomwe mwawona pa mweneciro nyumbayo ayai banja lace, bzomwe bzingakhale bzakuthandiza.

• Nembani bzomwe mwacezeranabzo. Ngaponi mavesi yomwe mwamulewengera? Mpsiponi bzibvero bzace? Ndiponi bukhu lomwe mwamusiyira? Nembani nthawe na nsiku yomwe mudamuzungirayo.

• Nembani bzomwe mun’funa kudzacita pa ulendo bunangobo. Mpsiponi mwapangana kudzacezerana? Mudapicira kubwerera lini?

• Mbanembani nfundo zimwezi pa ulendo buli-bwense pomwe munimuzungirapo. Palibe cakuphonyeka kuthumizira nfundo zinango zakufunika.

Yezerani Kucita Bzimwebzi Mkati mwa Mwezi Wathunthu:

• Pakunembapo, muuzeni mwanzanu munkuphata naye basayo bza nfundo zomwe munkunembazo.