Kukulisa Luso Lathu mu Utumiki​—Latizani kuti Muna Thupo na Ali-wense Payekha

Thangwe Ranyi Mpsakufunika: Jezu adawona wanthu ninga munthu payekha, ndipo iye adalatiza thupo kuna ali-wense payekha mwa lufoyi. Mwa ciratizo, nthawe inango Jezu adabva nsisi na munthu omwe akhali nkhuthu, koma pomwe iye adamupoza, iye adacita bzimwebzo pambali, patali na pomwe pakhana thimu la wanthu. (Mar. 7:31-35) Iye adalatiza thupo kuna anyakupfunza wace mwa kuzindikira kutepa kwawo ndipo alibe kuwapanikiza mwa kuwauza bzinthu bzizinjisa. (Juwau 16:12) Napo ali kudzulu, Jezu ambalatiza thupo kuna munthu ali-wense. (2 Tim. 4:17) Ninga ateweri wa Kristu, ifepano timbafuna kumutewezera. (1 Pe. 2:21; 1 Juwau 3:16, 18) Kuthumizira bzimwebzi, tin’dzakhala waphindu mu utumiki bwathu tikalatiza kuti tinaye thupo mweneciro nyumba na kumbakumbukira mikhalidwe yace, bzomwe iye ambafuna, na thupo lomwe iye ambakhala nalo. Iye an’dzafunisisa kubva akazindira kuti tiri pamwepo si kuti tindomuuze mafalayo ayai kundomusiira mabukhu ne, koma kuti tinaye thupo munthuyo payekha.

Momwe Mungacitire:

• Konzekerani bwino. Derekhani, mwetukirani, ndipo muwoneni ninga xamwali wanu.

• Khalani wakuzindikira. Kodi munthuyo ankuwoneka ninga ana wana? kodi ambakomedwa na kudekesa pamuyi na maluwa ayai ambafuna bzirombo bzakukhala na wanthu? kodi ankuwoneka ninga ngwacipembedzo? Pinango imwepo mungafune kucinja kayambidwe ka upalizi bwanu kuti kayenderane na mikhalidwe yace.

• Mubvunzeni kuti alewe makumbukidwe yace, ndipo mutetekereni mwatceru mucileka kumugwatiza mwakusaya kufunikira. Pitirizani kumunyang’anisa mwakulatiza kuti munkumutetekera. Zindikirani bzomwe iye ankulewa ndipo mbamutendani mukakwanisa kucita tenepo kucokera pansi pa mtima. Tcenkhani kulewalewa bzizinji.

• Mbacinjani. Bzikafunika, cinjani kayambidwe ka upalizi bwanu kuti kayenderane na thupo la munthuyo. Kucita bzimwebzi kungakhale kwakupusa kuposa momwe munkukumbukira, pakuti tumatsamba twathu, mabroxura na marevista yambafotokoza bzinthu bzakusiyana-siyana. Mukaona kuti mwafika pa nthawe yakusaya kuthemera ninga pomwe iye ali wakutanganika, zindikirani bzimwebzo ndipo mupalizireni mwacigwatho.

Yezerani Kucita Bzimwebzi Mkati mwa Mwezi Wathunthu:

• Pa kunamata kwanu ninga banja, khalani na mbali za kuyezeza za kukhala mpalizi omwe an’funika kucinja kayambidwe ka upalizi bwace, kuti abveranise na bzomwe mweneciro muyi ankulewa, ndipo yezerani kucita bzimwebzi pomwe muli mu utumiki.

• Pa mtsonkhano wa kukonzekera mu utumiki, m’bale omwe ankucitisa mtsonkhanoyo angafotokoze ayai kulatiza njira za momwe angalatizire thupo kuna munthuyo.