Bziratizo bza Upalizi

Kampanya Yakugawira Mcemo wa Cikumbuso

“Tinkugawira mcemo wa msinda wakufunika kwene-kwene. Pa 14 Abril, wanthu wazinji pa dziko lense la pansi wan’dzatsonkhana kuti wakumbukire infa ya Jezu Kristu na kubva nkhani ya fovolo ya m’Bibliya yakulewa momwe infa ya Jezu ingatipasire phindu. Mcemoyu unkulatiza mbuto na nthawe yomwe mtsonkhanoyu un’dzacitikira m’mudzi mwathu muno.”

Nsanja ya Olonda Abril 1

“Tinkuzungira wanthu mu nthawe yakucepa kuti ticeze nawo bza cinthu cinango comwe cimbacitikira wanthu wazinji. Munthu ali-wense ambapemba, bziribe basa kuti ali m’cipembedzo ciponi. Mun’kumbuka kuti mipemboyo imbatawiridwa na Mulungu ayai imbandocitisa kuti tibve bwino pa mabvuto yathu? [Dikirani atawire.] Bvani momwe Bibliya limbalewa bza mipembo. [Lewengani 1 Juwau 5:14.] Revistayi inkufokotoza momwe mpembo ungatithandizire.”

Galamukani! Abril

“Tiri pano kuti tithandizane pa bvuto lomwe linkugwera wanthu wense. Wanthu winango wakawona kuti mabvuto yawawandira pa moyo wawo, wambakumbukira kubzipha. Kodi munthu akakhala ankutsautsika na mabvuto, mun’kumbuka kuti iye ambafunadi kufa, ayai ambandofuna kutsangalazidwa pa mabvuto yaceyo? [Dikirani atawire.] Bvani piciro la m’Bibliya lomwe limbathandiza wanthu wazinji kukhala na makumbukidwe yabwino. [Lewengani Cibvumbulutso 21:3, 4.] Revistayi inkufokotoza mathangwe matatu yabwino kuti munthu apitirize kukhala na moyo napo ankugumana na mabvuto.”