Pitirizani Kuyenda Patsogolo Ninga Mtumiki
1. Kodi mpsiponi bziratizo bza m’magole dzana yakutoma bzomwe bzimbalatiza kuti ifepano tin’funika kuyenda patsogolo ninga atumiki?
1 Wakristau wan’funika kuyenda patsogolo ninga atumiki. Ndipopa Jezu adapfunzisa anyakupfunza wace kukulisa luso lawo pa basa la kupalizira. (Lu. 9:1-5; 10:1-11) Ndipopambo Akila na Prisila wadatenga Apolo ‘wacikam’fotokozera njira ya Mulungu mwa kulondoza.’ (Mab. 18:24- 26) Pa thangwe libodzi-bodziri, Paulo adalimbisa mpalizi wakuzolowera Timotio kuti apitirize kubzipereka pa kupfunzisa, kuti kuyenda kwace patsogolo ‘kuwonekere kwa wense.’ (1 Tim. 4:13-15) Bziribe basa kuti ndife akapolo wa Mbuya kwa nthawe itali tani ninga mpalizi wa bzipsa bzabwino, tin’funika kupitiriza kukulisa luso lathu la kupalizira.
2. Kodi tingapfunze tani kwa winango?
2 Pfunzani kwa Winango: Njira ibodzi yomwe ingatithandize kukulisa luso lathu ni yakupfunza kwa winango. (Mim. 27:17) Tenepo, bveserani mwa tceru pomwe apalizi anzanu wankupalizira. Kumbirani nzeru kwa apalizi waluso, ndipo bveserani mwa tceru bzomwe iwo alewebzo. (Mim. 1:5) Kodi muna thupo na kucita ulendo bwakubwereza, kuyambisa pfunziro la Bibliya, ayai kucita mtundu winango wa upalizi? Yambani ndimwe; ndipo kumbirani thandizo kwa nyakunyang’anira wanu wa gulu ayai mpalizi winango waluso kuti akupfunziseni. Kumbukirani kuti mzimu wa Yahova ungatithandizembo kukulisa luso lathu, tenepo ukumbireni nthawe zense mu mpembo.—Luka 11:13.
3. Kodi bzin’funika timbacite tani tikatambira malango, napo penu tiribe kuyakumbira?
3 Mukatambira malango ya momwe mungakulisire luso lanu, lekani kukalipa penu mulibe kucita kukumbira malangoyo. (Mpal. 7:9) Ninga Apolo, tambirani malangoyo mwakubzicepswa mucitenda. Kucita bzimwebzi kumbalatiza nzeru.—Mim. 12:15.
4. Kodi Jezu adapereka thangwe likulu liponi kuti tiyende patsogolo ninga mpalizi?
4 Kuyenda Kwanu Patsogolo Kumbalemekeza Mulungu: Mwa kuphatisa basa there, Jezu adalimbisa anyakupfunza wace kuti wayende patsogolo ninga atumiki. Iye adabzindendemezera na muti wa mphesa ndipo anyakupfunza wace wakudzozedwa ninga mthambi. Iye adalewa kuti Babace ambatunthula mthambi iri-yense yakubala bzisapo ‘kuti ibale bzisapo bzizinji.’ (Ju. 15:2) Ninga momwe mweneciro munda wa mphesa ambafuna kuti mthambi za miti ya mphesa zace zibale kwene-kwene, Yahova ambafunambo kuti ifepano tipitirize kukulisa luso lathu la kupereka ‘bzisapo bza miromo yathu.’ (Waheb. 13:15) Kodi cimbacitika n’ciyani pomwe ifepano timbayenda patsogolo ninga mpalizi? Jezu ankutipasa mtawiro: ‘Babangu ambatumbizidwa mukambapitiriza kubala bzisapo bzizinji.’—Ju. 15:8.