Asia na Oriente Médio​—Nkhaniyi yacokera mu Bukhu Lapachaka la Mboni za Yehova la 2014

Kuthandiza Mwamuna Omwe ni Zimola, Nkhuthu na Bewewe

Tsamba 59, ndime 1, mpaka tsamba 62, ndime 1

Mu 1999, gwere la cirewedwe ca manja ku kobe, Japão, lidadziwa bza mwamuna nkhuthu omwe ambacemeredwa Hirofumi. Pomwe m’bale m’bodzi adayezera kucemera Hirofumi, mai wace alibe kumubvumiza m’baleyo. M’baleyo atayenda mwakubwereza-bwereza, pakumalizira pace mai wacewo adamucosa Hirofumi pa msuwo kuti awonane na m’baleyo. Iye akhana ndebvu zitali-zitali na tsisi lakunyanduka. Iye akhawoneka ninga munthu omwe ambakhala kuthengo kwa yekha-yekha kwa magole mazinji. Nkhope yace ikhawoneka lini bwino. Napo akhali nkhuthu Hirofumi akhalimbo Zimola. M’baleyo adadzidzimuka kwene-kwene pomwe adamuwona, ndipo adayamba kumuphata manja yace aciyamba kulewa-lewa naye cirewedwe ca wanthu omwe ambalewa-lewa lini ne kubva. Tsono iye alibe na kubvako. Hirofumi akhakhala komwe kulibe wanthu ndipo palibe omwe akhalewa-lewa naye kwa magole khumi, kuyambira pomwe adakhala zimola pomwe akhana magole 31.

M’baleyo adabwerera patapita nsiku ziwiri. Mai wace wa Hirofumi adadabwa kwene-kwene, thangwe akhakumbuka kuti m’bale ule angadabwerera lini pomwe na momwe adawonera mwana wawoyo. Pomwe adabwerera kaciwiri, m’baleyo adadandaulira mai wace wa Hirofumi kuti amuone pomwe, tsono iwo adamubweresa mpaka pa msuwo. Patapita mwezi akumuzungira, Hirofumi alibe kulatiza cizindikiro ciri-cense, tsono mai wace adauza m’baleyo kuti aleke kubwerera pomwe. Napo bzikhali tenepo m’baleyo alibe kuleka. Iye akhatenga mabolo ndipo akhacita ciri-cense kuti iye alatize kufunisisa. Patapita pomwe minyezi miwiri ne na phindulo, m’baleyo adayamba kukumbuka kuti palibe comwe akucita.

M’baleyo adatsimikiza kucita ulendo bwakumaliza. Akanati kuyenda iye adacita mpembo kwa Yahova kuti amuthandize kudziwa penu bzikhafunika kupitiriza kumuzungira Hirofumi. Pomwe adafika pa muipo adaphata manja ya Hirofumi acicita cizindikiro cakumuuza kuti alipo Mulungu omwe ambacemeredwa Yahova, Mulunguyo akumuwona na kudzulu ndipo ambabvesesa mabvuto yomwe an’kugumana nayo kuposa munthu ali-wense. Yahova akumukumbukira ndipo an’kufunisisa kumucosera bvuto lacero. Ni thangwe race iye watumiza m’bodzi wa mboni zace kudzakuzungira. Pakuyambirira Hirofumi alibe kulatiza cizindikiro ciri-cense, koma patsogolo pace adaphata boko la m’baleyo mwa mphanvu, ndipo tsozi lidacoka maso mwace. M’baleyo adatokonyedwa ndipo adayambambo kulira. Pfunziro la Bibliya lidayamba.

Atapfunza kwa magole 11, Hirofumi adayamba kumbatsonkhana na gwere lakumweko mbuto mwa kumbayenda mtantho utali ku gwere la ciweredwe ca manja ninga momwe akhacitira pakuyamba. Mu gwerelo palibe akhadziwa cirewedwe ca manja, tsono pakupita minyezi 18, abale na mpfumakazi wakukwana 22 wa gwereli adayamba kupfunza cirewedweci kuti athandize Hirofumi. Mu Janeiro 2012, Hirofumi adafotokoza nkhani yace yakuyamba ya mu Xikola ya Utumiki bwa Mulungu, na kuthandizidwa na munthu omwe akhambasandulizira cirewedwe cace ca manja. Mu Outubro m’gole limweri, iye adakhala mpalizi wakusaya kubatizidwa.