Asia na Oriente Médio

“Ndakhala Ndiri Kulinyang’ana kwa Magole 30”

Tsamba 67, ndime 2

Agnes omwe ni misiyonariya ku Indonesia, iye akhambapalizira mkazi wapathupi omwe akhana magole yakubadwa yakupitirira 40. Mkaziyo akhagulisa muliwo ku msika wa kwawo. Iye akhafuna kwene-kwene kuwerenga marevista yathu na kuceza nkhani za m’Bibliya akakhala na mpata. Nsiku inango Agnes adayenda pomwe ku msika kukazungira mkaziyo, tsono alibe kumugumana. Mwamuna wace adamuuza kuti iye wabereka tsapanopapa. Agnes adatsimikiza kudzamuzungira pomwe. Iye adatenga Bukhu Langu la Nkhani za m’Bibliya acirifunyizira pa tsamba lakuperekera mphaso. Mkaziyo adadabwa pakuwona kuti Agnes adabwera kudzamuwona ndipo adadabwiratu kwene-kwene pomwe Agnes adapereka mphaso yomwe akhadamukonzera. Iye adafungula ndipo alibe kukhulupira pa bzomwe iye akhawona ndipo adati: “Kodi mwaligumana kuponi bukhu limweri? Ndakhala ndiri kulinyang’ana kwa magole 30! Ndidalinyang’ana mu mbuto zakugulisira mabukhu ndicibvunza munthu ali-wense. Palibe akhanalo ndipo palibe akhalidziwa, palibe bukhu lakundendemerana nalo.” Pomwe mkaziyo akhali mwana, iye akhafuna kwene-kwene kuwerenga Bukhu limweri la Nkhani za m’Bibliya lomwe likhari la tiyu wace. Tsapano iye akuwerenga pomwe bukhu lire, ndipo mwana wace m’bodzi wacikazi ambafunambo kuliwerenga. Mkaziyo na mwana waceyo adayamba kupfunza Bibliya.

[Tsamba limweri palibe 5,  6]