Kukulisa Luso Lathu Mu Utumiki—Kuthandiza Omwe Tinkuphata Naye Basa
Thangwe race Mpsakufunika: Jezu adazindikira kufunika kwa kupalizira pabodzi na mwanzathu. Pomwe iye adatumiza wanyakupfunza wace 70 kuti wayende patsogolo wacikapalizira, iye adawatumiza awiri-awiri. (Lu. 10:1) Mperekezi angakhale mthandizi wakufunikira penu mpalizi mwazaceyo ankugumana na mabvuto ayai alibe citsimikizo ca momwe angamutawirire mweneciro nyumba. (Mpal. 4:9, 10) Iye angambagawane luso lace mwa kumbathandizambo kabodzi-kabodzi ule womwe ankuphata naye basa acikhala mpalizi wakupita patsogolo. (Mim. 27:17) Iye angakhalembo wakuthandiza pa bzomwe mungaceze mukacoka nyumba imweyo kuyenda inango.—Wafil. 4:8.
Tingacite Tani Bzimwebzi:
• Mbatetekerani pomwe mwanzanuyo ankupalizira. (Tiy. 1:19) Pomwe vesi linkuwerengedwa, mbateweranimbo m’Bibliya lanu. Bzin’dzakucitisani kukwanisa kuthandiza mwanzanuyo bzikafunika.
• Khalani wakukumbuka bwino penu mun’funa kutawirambo pomwe mwanzanu ankulewa-lewa. (Mim. 25:11) Pomwe munkuperekeza mpalizi mwanzanu ku mapfunziro ya Bibliya, mwakusaya kupenukira, kutawira kwanu kuti muthandize pa nkhaniyo kun’dzakhala kwakutendedwa. Tsono, mukakhala munkupalizira nyumba na nyumba, mwanzanu womwe munaye pinango angafune kuti mumuleke alewe-lewembo ikafika nthawe yace. N’cadidi, penu iye ni mpalizi watsapano ayai ankupenukira momwe angatawirire, iye an’dzakomedwa na thandizo lanu. Tsono mukaperekeza mpalizi mwanzanu ku nyumba na nyumba, ulendo bwakubwereza, ayai ku mapfunziro ya Bibliya, lekani kumugwatiza, kutenga nkhaniyo ninga yanu, ayai kuyambisa inango.
• Gawanani naye luso lanu. Penu pa mpata uli-wense, mungakwanise kupereka nzeru yomwe ingathandize mpalizi munkuphata naye basayo kukuza luso lace mu utumiki, lekani kuzeza kucita bzimwebzo. (Mim. 3:27) Pa nthawe yakuthemera, mungayambe mwa kulewa kuti: “Kodi munkukumbuka tani pa?” ayai “Ndingalewembo bzomwe ndinkukumbuka?” ayai “Ine ndimbayezera kucita tenepa”. Dziwani kuti pomwe winango wangakomedwe na nzeru yomwe mungapereke mwa kabodzi-kabodzi, iwo wangakhumudwe penu nthawe zense mundokhalira kuwapasa malango pa bzomwe waphonyebzo.
Yezerani Bzimwebzi Mkati mwa Mwezi:
• Pambuyo pa basa la mu utumiki bwakumunda na mwanzanu, muuzeni bzomwe iye walewa ayai kucita bzomwe bzacitisa iye kukhala mthandizi wabwino.