Lekani Kukhala Mperekezi Wakundonyamala
1. Kodi tingatewezere tani mpostolo Paulo pomwe tinkuphata basa na anango mu utumiki?
1 Mpostolo Paulo akhawona nthawe yomwe akhakhala na watawiri wanzace ninga nthawe ‘yakulimbisana unango na mwanzace.’ (Waroma 1:12) Pakuphata basa na mpalizi mwanzanu mu utumiki, kodi mumbayilokotera nthaweyo kuti mumulimbise na kumuthandiza? M’mbuto mwa kukhala mperekezi wakundonyamala, kodi mun’sayiranyi kumufokotozera bzomwe bzimbakuthandizani kukhala mpalizi wakuphata mtima?
2. Tingacite ciani kuti tilimbise mwanzathu womwe tinkuyenda naye mu utumiki, ndipo thangwe ranyi bzimwebzi mpsakufunika?
2 Limbisani Anzanu: Apalizi winango wambakhala na mantha, ndipo bzimwebzi bzimbawonekera pa nkhope yawo, na kalewe-lewedwe kawo. Tingawalimbise mwa kuwatenda kucokera pansi pa mtima. Nziponi njira zinango zakulimbisa anzathu? Nyakunyang’anira dera winango ambafokotoza padeca bzomwe bzimbam’citisa mantha na momwe ambacitira mpembo kawiri-kawiri kuti akunde manthayo. M’bale winango adalewa bzomwe bzimbamuthandiza kulewa-lewa na cikhulupiro. Iye adati: “Bzimbayamba na kumwetulira. Nthawe zinango ndimbafunikira kupemba kukumbira thandizo kuti ndicite bzimwebzi.” Ciripo cinthu comwe cidakuthandizani kulewa-lewa na cikhulupiro mu utumiki? Mufokotozereni mwanzanu womwe munkuyenda naye mu utumikiyo.
3. Tingamufokotozere bzinthu bziponi mwanzathu bzomwe bzingamuthandize kucita bwino mu utumiki bwace?
3 Muuzeni Momwe Mumbacitira: Kodi mwagumana kale mafala ayai mbvunzo wakusaya kunesa, pinango wakulewa bza cakucitika ca m’gawolo, womwe umbayambisa bwino maceza? Kodi mwakhala na phindu labwino thangwe ra kucinja pang’ono mafala ya bziratizo bza upalizi? Mufokotozereni mwanzanuyo. (Mimwani [Miyambo] 27:17) Pomwe munkuyenda kacita ulendo bwakubwereza, mungamufokotozere cakulinga ca ulendobo na momwe mukacitire. Pambuyo pa pfunziro la Bibliya, mungamufokotozere thangwe lomwe mwasankhulira nfundo inango, vesi, ayai njira yomwe mwacitirayo kuti muthandize nyakupfunza pa cakusaya caceco.
4. Thangwe ranyi tin’funikira kumbathandiza apalizi wanzathu?
4 Apalizi wa magole dzana yakutoma, wakhandofuna lini kuthandiza wanthu wakunja wokha. Iwo akhawona kufunika kwa kumbalimbisanambo wokha-wokha. (Mabasa 11:23; 15:32) Mpostolo Paulo adapfunzisa mulumbwana Timotio, ndipo patsogolo pace adamulimbisa kuti ambafokotozerembo winango bzomwe adapfunzabzo. (2 Timotio 2:2) Tikaleka kuyebwa kucitira ubwino Wakristau wanzathu pomwe tiri mu utumiki, tin’dzandothimizira lini mpfatso wawo na kuwathandiza kukhala apalizi wabwino, koma tin’dzakondwesambo Baba wathu wa kudzulu.—Wahebereu 13:15, 16.