Phatisani Basa Webisaite ya jw.org mu Utumiki Bwanu​—“Torne-se Amigo de Jeová”

Mbuto yakuti “Ensinos Bíblicos” yakugumanika pa Webisaite ya jw.org pana cigawo cakukonzedwera wana cakucemeredwa “Torne-se Amigo de Jeová” ndipo pacigawoci pambagumanika nyimbo, vidiyo na mabasa yakucita. Kodi mudaphatisa kale basa cigawoci mu utumiki bwanu? Penu munkupfunza Bibliya na m’bereki womwe ana wana wang’ono, musairanyi kumulatiza cigawoci? Bzimwebzi bzingamucitise kufuna kupita mbuto zinango za Webisaite yathu.

Pomwe pakhagawiridwa Bzipsa bza Umambo N.° 38, m’bale m’bodzi adagumana mkazi winango omwe atam’pasa katsamba adayamba kukawerenga nthawe imweyo. Mkaziyo akhana wana wazinji womwe wakhafunisisa kuwona katsambako. M’bale ule adafotokoza mwacigwatho nkhani ya katsambako ndipo adamulatiza endereso ya Webisaite yathu yomwe ikhali kumambuyo kwa katsambako. Kutomera pomwe mkazi ule adafunisisa kudziwa bzizinji, m’bale ule adalatiza iye pabodzi na wana wace vidiyo ibobzi ya Kalebe, aciphatisa basa mtedwe wace wa m’manja.

Mpfumakazi inango idalewalewa na mwanzace wakubasa omwe ana wana wang’ono bza Webisaite yathu na nkhani za m’banja zomwe zimbagumanika mwemo. Mkazi ule adawona Webisaiteyo pabodzi na wana wace. Pambuyo pace mkazi ule adauza mpfumakazi ire kuti mwana wace ambasenzeka pamui uku ankuimba “Pregue a Palavra” yomwe ni nyimbo ibodzi ya cigawo ca “Torne-se Amigo de Jeová”.

Zolowerani cigawo cimweci ca jw.org mucicosa vidiyo ibodzi, nyimbo ayai mbali ya mabasa ya bzakucita mucikoya mu mtedwe wanu wa m’manja. Tenepo mungakwanise kuphatisa basa cigawoci ca jw.org mu utumiki bwanu. Cigawoci n’cinthu cakufunika kwene-kwene pakutithandiza kukhala akapolo wa Mbuya.​—Mab. 20:19.