Phatisani Basa Kabukhu Kakuti ‘Kodi Tingapfunze Ciyani m’Fala la Mulungu?’ kuti Tiyambise Maceza
1. Kodi tidatambira cinthu ciponi cipsa comwe cin’dzatithandiza mu utumiki?
1 Mu kabukhu kakuti “Kodi Tingapfunze Ciyani mʼFala la Mulungu” muna nfundo zinango zakuthumizira zomwe zatengedwa mu mbali yakuyambirira mu Baibulo la Dziko Latsopano la cingerezi lomwe lidasanduliziridwa papsa. Kodi tingaphatisire tani basa nfundo zatsapanozi pomwe tinkukonzekera momwe tingakapalizirire mu utumiki? Pakuti inkufotokoza bza misolo mizinji ya nfundo za m’Bibliya, mwakundendemerana na bzomwe bziri mu bukhu la Kukambitsirana, limweri lingakhale lakuthandiza kwene-kwene pa kuyambisa maceza.
2. Kodi tingaphatise tani basa mu utumiki kabukhu kakuti ‘Kodi Tingapfunze Ciyani m’Fala la Mulungu?’
2 Mungaphatise basa mbvunzo wa 8 mucilewa kuti: “Tinkuzungira mwacigwatho wanthu wa m’dera lino thangwe wanthu azinji ambadabwisika mwakubzibvunza kuti ‘Kodi Mulungu ndiye omwe ambacitisa kubonera?’ [Mu madera manango, mpsakuthandiza kulatiza mweneciro nyumba mbvunzoyu.] Kodi imwepombo munkukumbuka tani pa nkhani imweyi? [Dikhirani atawire.] Bibliya limbapereka mtawiro wabwino pa mbvunzo umweyu.” Werengani mu Bibliya mucicezerana vesi libodzi ayai mazinji yakunembedwa pamwepo. Penu mweneciro mui ankuwoneka kuti ankufuna kudziwa bzizinji, mungamulatize iye mibvunzo 20 yomwe iri m‘kabukhuka ndipo mukumbireni kuti asankhule mbvunzo m’bodzi kuti mudzacezerane ulendo bwakutewera. Ayai mungamugawire libodzi mwa mabukhu yathu yakupfunzisira yomwe yana nfundo zakuthumizirika pa nkhani yomwe munkucezeranayo.
3. Kodi tingaphatise tani basa kabukhu kakuti ‘Kodi Tingapfunze Ciyani m’Fala la Mulungu’ kuti tiyambise maceza mu madera yomwe wanthu ali m’bzipembedzo bzomwe N’bzacikristau lini?
3 Mibvunzo 4 na 13 mpaka 17 ingakhale yakuthandiza pomwe tinkupalizira mu madera yomwe yana bzipembedzo bzizinji bzomwe N’bzacikristau lini. Mwaciratizo, mungaphatise basa nfundo za mbvunzo wa 17 muciti: “Tinkuzungira wanthu mwacigwatho ninga basa lapadeca kuna mabanja. Mungabvume kuti mabanja yankugumana na mabvuto mazinji nsiku zino? [Dikhirani atawire.] Mabanja mazinji yankugumana mafala ya nzeru yakuthandiza yakuti: ‘Mkazi an’funika kupereka ulemu bukulu kuna mwamuna wace.’ [Mun’funika lini kucita kulewa kuti mafalaya yankucokera pa Wayefezo 5:33. Penu munkulewalewa na munthu wacikazi, mungalewe mwakundobwerezera mafala ya pa Wayefezo 5:28.] Kodi munkukumbuka kuti kuphatisa basa malango yamweya kungakhale kwakupasa phindu pa malowozi?”
4. Kodi mun’funika kucita ciyani kwakumalizira kwa maceza yanu na munthu womwe ngwacipembedzo comwe n’cacikristau lini?
4 Pakumalizira pa maceza yanuyo, citani makonzedwe yakuti mudzacezerane pa nthawe inango. Pinango mungacite makonzedwe yakulewalewa bza libodzi mwa mavesi manango pa mbvunzo omwe mwaphatisa basayo. Pa nthawe yakuthemera, uzani mweneciro nyumba kuti bzomwe munkulewalewa nayebzo ni nzeru yakucokera mu Bibliya. Mwakubverana na maceza yomwe mukhadacita na momwe iye ambawonera Bibliya mupaseni bukhu, broxura ayai katsamba, bzomwe bzingamulimbise.—Onani phathika ya mu Utumiki Bwathu bwa Umambo ya Dezembro 2013.