Iwo Wakhali Tceru kuti Ayambise Pfunziro la Bibliya​—Nkhaniyi yacokera mu Bukhu Lapachaka la Mboni za Yehova la 2015

Ku América

Gabriel Adathandiza Yavu Wace Wacimuna

Tsamba 55, ndime 1, mpaka tsamba 56

Ali mu njira pomwe akhayenda kumui, pakucokera ku mtsonkhano wacigawo ku Paraguai, Gabriel wa magole matanthatu adawona kufunika kwa kupalizira bzipsa bza Umambo. Tsono iye adakumbukira kuti pakhana munthu winango omwe ngwakufunika kwene-kwene kudzakhala naye m’paraizo, womwe ni yavu wace wacimuna. Koma yavu wace wacimunayo akhafuna lini kupfunza cadidi ndipo akhatsutsa mkazi wace na wana wace, womwe akhali Mboni za Yahova.

Nsiku imweyo, Gabriel adakumbira abereki wace kuti alewelewe pa skype na yavu wace wacimuna womwe ambakhala ku Argentina. Gabriel adafotokoza kuna yavu wacewo thangwe race mpsakufunika kupfunza Bibliya ndipo iye adawabvunza kuti, “Yavu, mukufuna kupfunza Bibliya pabodzi na ine?” Yavu wace wacimunayo adabvuma. Gabriel adawona kuti bzikhali bwino kuti iwo apfunze broxura lakuti Tetekerani Mulungu ndipo Khalani na Moyo Wakusaya Kumala. Itapita minyezi ming’ono-ng’ono, iwo adapfunza pabodzi broxuralo. Pakuti wense awiri akhakwanisa lini kuwerenga bwino-bwino, iwo akhakonzekereratu akanati kupfunza pabodzi. Pa pfunziro liri-lense, Gabriel akhambakonzekera ndipo akhabvala kamiza na galavata pakucita pfunzirolo.

Patsogolo pace yavuwo adacita ulendo bwa kuyenda kukazungira banja la Gabriel kwa midzinga ming’ono-ng’ono. Pomwe akhali kom’kule, yavu wace adayenda ku mitsonkhano ya gwere pabodzi na banjalo. Pomwe yavu wa Gabriel adabwerera ku Argentina, iwo adakapitiriza pfunziro lawo la Bibliya na m’bale wa kumweko ndipo adayenda patsogolo mpaka adakhala mpalizi wakusaya kubatizidwa. Tsapano yavu wa Gabriel ambapemba pabodzi na mkazi wace nsiku zense. Mwakusaya kucedwa Gabriel, adayendambo patsogolo. Iye tsapano ni mpalizi wakusaya kubatizidwa. Yavuwo ankufunisisa kubzipereka kwa Yahova mwa kubatizidwa m’madzi.

[Tsamba limweri palibe 7]