Iwo Wakhali Tceru kuti Ayambise Pfunziro la Bibliya—Europa
Pfunziro la Bibliya ‘Mthengo’
Tsamba 69, ndime 2-5
Macibese yali-yense Margret ambayenda kukazunga na mbwaya yace m’thengo ku Alemanha. Iye adati: “Ndimbayezera kulewalewa na wanthu omwe ndimbagumana nawo. Penu iwo mbakutsudzuka, ndimbayambiratu kuceza nawo nkhani za m’Bibliya.”
Nsiku inango iye adagumana na mkazi munango omwe ana magole ya mkati mwa 70 omwe akhafambambo na mbwaya yace. Margret adayamba kuceza na mkaziyo. Mkaziyo adakomedwa na macezayo ndipo adauza Margret kuti iye akhapemba kuna Mulungu ndipo akhambawerenga Bibliya nsiku iri-yense. Kuyambira pamwepo, iwo nsiku iri-yense wakhagumana wacimbaceza nkhani za m’Bibliya. Nsiku inango mkaziyo adabvunza Margret kuti: “Kodi mudakwanisa tani kudziwa bzinthu bzizinji bza m’Bibliya?” Margret adamuuza kuti iye ni m’bodzi wa Mboni za Yahova.
Nthawe zense Margret akhayezera kumukumbira kuti acite naye pfunziro la Bibliya la pamui, koma iye akhalamba. Koma macezayo yadapitiriza. Patapita minyezi minango kutsogolo, Margret adamukumbira pomwe pfunziro la Bibliya la pamuyi. Mkaziyo adaulula kuti akhana mantha na kupfunza thangwe ra mwamuna omwe akhakhala naye akhawenga Mboni za Yahova.
Patsogolo pace Margret adayenda mthengo mule na Bibliya lace na bukhu la Baibulo Limaphunzitsa Chiyani. Pomwe iye adawona mkaziyo, Margret mwakukhwimika adalewa kuti: “Ulendo buno ndinkukumbirani lini pfunziro la Bibliya la pamui, koma pfunziro la Bibliya la mthengo.” Na misozi m’maso mwace mkaziyo adabvuma nthawe ibodzi-bodziyo. Iye akhacitisa pfunziro la Bibliya la ‘mthengo’ na mkaziyo nsiku zitanthatu pa mdzinga. Nthawe zinango mwakubverana na momwe nyengo ikhaliri, Margreti akhanyamula sumbulero na lanterna.