República Dominicana

“Nsiku Inango Tin’dzagumana Nawo”

Tsamba 90, ndime 1-3

M’magole ya 1935, Pablo Gonzalez wa gawo linango la dziko lakucemeredwa Cibao Valley, adayamba kupfunza Bibliya. Pakuyamba iye akhanamata cipembedzo cinango, iye adasiya cipembedzoco pomwe adawona kuti makhalidwe yawo yakhabverana lini na bzomwe iye akhadawerenga mu Bibliya. Na tenepo, iye adapitiriza kupfunza yekha Fala la Mulungu acimbauza winango bzomwe akhapfunzabzo ndipo wakuyamba akhali wanthu wa pamui pace na omwe akhakhala pafupi na nyumba yace na winango wa mu dera lace. Iye adagulisa munda na bzifuwo bzace kuti agumane kobiri zakuphatisa basa kuti ambafambire pakucita utumiki bwace.

Mu 1942, Pablo akhazungira mabanja pafupifupi 200 ya m’madera ya pafupi naye acimbacita mitsonkhano nthawe zense napo iye akhanati kugumana na ali-wense wa Mboni za Yahova. Iye adalimbisa wanthu kupfunza Bibliya na kukhala mwakubverana na bzomwe akhapfunzabzo. Azinji wadaikha mumtima bzomwe iye akhalewa ndipo wadasiya kufumali na cipali.

M’bodzi pa wanthu omwe adabva mafala ya m’Bibliya ya Pablo akhali Celeste Rosario. Iye adati: “Pomwe ine ndikhana magole 17 mwana wa m’bale wa mai wangu dzina lace Negro Jimenez, akhali mu thimu libodzi mwa mathimu yomwe yakhatsogoleredwa na Pablo Gonzalez. Iye adazungira banja lathu ndipo adatiwerengera mavesi manango ya m’Bibliya, ndipo bzimwebzo bzikhali bzakukwanira kuti ndisiye Gereja ya Katolika. Bzomwe akhatiwerengera mu gerejamo bzikhali m’cirewedwe ca Cilatino ndipo tikhabzibvesesa lini. Mwakusaya kucedwa, Pablo Gonzalez adatizungira acitirimbisa. Iye adati: ‘Tiri lini m’cipembedzo ciri-cense, koma tina abale padziko lense lapansi. Timbadziwa lini komwe iwo wambakhala ne madzina yawo, koma nsiku inango tin’dzagumana nawo’. ”

[Tsamba limweri palibe 5, 6]]