Kodi Imwepo Mungabzale Tani Mbeu ya Cadidi ca m’Bibliya kwa Wacibale Wanu?​—Nkhaniyi yacosedwa mu Buku Lapachaka la Mboni za Yehova la 2015

República Dominicana

Basa Lakupalizira Lidayambika

Tsamba 87, ndime 1-2

Ikhali nsiku ya Mdzinga, pa 1 Abril, 1945, pomwe Lennart na Virginia Johnson omwe akhadamaliza mapfunziro ya Gileade adafika ku Ciudad Trujillo (tsapano kumbacemeredwa Santo Domingo), likulu la dziko la República Dominicana. Iwo wakhali Mboni zakuyambirira m’dzikolo lomwe likhadziwika na mbiri ya kunesana pabodzi na nkhondo. Mu Buku Lapachaka la 1946 mukhana mafala yakuti “Limweri ni gawodi lakucitira upainiya thangwe kukhalibe Mboni ne na ibodziyo.” Kumbukirani: Kumweko kukhalibe cipinda ca nthambi, kukhalibe Nyumba ya Umambo ndipo kukhalibe magwere. Amisiyonariowo wakhadziwa lini munthu ali-wense mu dzikolo, wakhabvesesa lini cirewedwe ca espanhol ndipo iwo wakhalibe ne nyumba ne bzombo bza m’nyumba. Kodi n’ciyani comwe iwo wangadacita?

Lennart adati: “Tikhayenda ku Hotel yakucemeredwa Victoria komwe tikhalipira madola maxanu pa nsiku kuti tikadye na kukagona. Nsiku ibodzi-bodziyo masikati tidayambisa pfunziro lathu la Bibliya lapamui. Bzimwebzi bzidacitika tenepa: Akazi awiri wa ku Dominicana omwe tikhadapfunza nawo Bibliya ku Brooklyn akhadatipasa madzina ya wacibale wawo na winango womwe akhadziwana nawo, ndipo m’bodzi akhali Dr. Green. Pomwe tidamuzungira, tidagumanambo na Moses Rollins omwe akhakhala pafupi na nyumba yawo. Pambuyo pa kudziwa momwe tidadziwira madzina yawo, na mbuto yomwe iwo wakhakhalayo, wadabvesesa bzipsa bza Umambo ndipo wadabvuma kupfunza Bibliya. Mwakusaya kucedwa Moses adakhala mpalizi wakuyamba wa Umambo kumweko.”