Kodi Fala la Mulungu Lina Mphanvu pa Moyo Wanu wa Nsiku na Nsiku?

Kuwerenga Bibliya nsiku na nsiku kungatithandize kukhala ‘wakuzikika’ na ‘wakukhazikika m’cikhulupiro.’ (Wakol. 2:6, 7) Tsono, kuti Fala la Yahova likhale na mphanvu pa moyo wathu, tin’funika kukumbukira bwino na kuphatisa basa mitemo yace. (Waheb. 4:12; Tiy. 1:22-25) Pa Djosuwe 1:8 pambalatiza bzinthu bzitatu bzomwe tingacite pa kuwerenga: (1) Kuwerenga Fala la Mulungu ‘masikati na usiku.’ (2) Kumbaliwerenga na ‘mafala ya pansi-pansi.’ Bzimwebzi bzinkulatiza kuti tin’funika kuwerenga mwakusaya kuthamanga kuti bzitithandize kukumbukira na kuwona m’makumbukidwe mwathu nkhani, nthawe na mbuto yomwe bzinthubzo bzidacitika na wanthu womwe ankulewedwa mu nkhaniyo. (3) Kucita ‘bzense bzomwe bzidanembedwa’ mwakucokera pansi pa mtima. Kuphatisa basa nfundo zimwezi kun’dzatithandiza kukhala na ‘moyo wabwino’ ndipo ‘tin’dzacita bzinthu mwanzeru’ pa moyo wathu wa nsiku na nsiku.