‘Wakucenjera Ninga Nyoka koma Wakusaya Mulandu Ninga Nkhangaiwa’—Nkhaniyi yacokera mu Buku Lapachaka la Mboni za Yehova la 2015

República Dominicana

Matsamba 110 ndime 2-116 ndime 2

‘Jezu ni Msolo’

Donald Nowills, omwe adasankhulidwa kuti akhale nyakunyang’anira basa ku mthambi pambuyo pa amisiyonario kucoka, iye akhana magole 20 yakubadwa ndipo akhadakwanisa kale magole 4 yokha yakubatizidwa. Basa la ku mthambili lidakhala lipsa kuna iye napo iye akhadatumikira kale ninga nyakunyang’anira dera kwa minyezi ing’ono-ng’ono. M’bale Nowills akhana kaxikiritoriyo pa mui pace, komwe kakhadakonzedwa na matabwa na malata ndipo pansi pace pakhalibe simenti. Nyumbayi ikhali ku Gualey, mbuto yakugopswa kwene-kwene mu mzinda wa Ciudad Trujillo. Na thandizo la Felix Marte, iye akhacita kopiya ya marevista ya Nsanza ya Mulindiri acimbapereka kuna abale wense m’dziko lensenelo.

Mary Glass akhathandizambo m’bale Nowills ndipo pa nthaweyi mwamuna wace Enrique akhali m’kawoko. Iye adati: “Ine ndikhakotoka 17 hora ku basa kwangu ndipo ndikhapita na ku xikiritoriyo ya m’bale Nowills kuti ndikanembe Nsanza ya Mulindiri. Patsogolo pace m’bale Nowills akhacita fotokopiya na makina. Na tenepo, mpfumakazi yakucokera ku Santiago, yomwe tikhayicemera na dzina lakuti ‘anjo’ kuti wanthu aleke kudziwa dzina lace, ikhatenga marevistayo iciyaikha mu galoni la mafuta. Iye akhayafunikiza ndipo padzaulu pace akhaikha manjoka, mbatata na bzakudya bzinango. Patsogolo pace, iye akhaikha sakha padzulu pace. Akamala, akhapakira kandere-ndere aciyenda ku mpoto kwa dzikoli acikapereka revista ibodzi ku gwere iri-yense. Abale akhambakumbizana revistayo kuti akapfunzire ninga banja.”

Mary adalewa pomwe kuti: “Tikhafunika kukhala wakucenjera, thangwe wa mphanvu za umangi wakhali pense-pense mu mseu, wacimbafufuza komwe marevista ya Nsanza ya Mulindiri yakhadindidwa. Koma alibe kukwanisa. Yahova akhatikhotcerera nthawe zense.”

‘Wakucenjera ninga Nyoka koma Wakusaya Mulandu ninga Nkhangaiwa’

Bzikhali bzakufunika kwene-kwene kuti atumiki wakukhulupirika wa Yahova .apitirize kutambira cakudya cauzimu pa nthawe yomwe wakhaletsedwayi, koma kucita bzimwebzi kukhali ngozi ikulu kuna anyakunamata wacadidi wa m’dzikolo. Mkati mwa magole yamwe-yale, abale azinji akhamangidwa aciikhidwa m’kawoko kazinji-kense.

Juanita Borges adalewa kuti: “Pomwe ndidapfunza cadidi mu 1953, ndikhadziwa bwinoletu kuti, ninga m’bodzi wa Mboni za Yahova nditi ndidzamangidwe nsiku inango. Ndipo ndibzo bzomwe bzidadzacitikadi. Mu Novembro 1958, pomwe ndidayenda kazungira mpfumakazi Eneida Suarez, wa mphanvu za umangi adabwera pana ife acitinamizira kuti tikhacita mtsonkhano. Tidauzidwa kuti tingadakhala m’kawoko kwa minyezi mitatu, na kuti ali-wense akhafunika kulipira kobiri zakukwana 100 peso, zomwe pa nthaweyo zikhaimira madola 100 ya ku Estados Unidos.”

Boma lidacita ciri-cense kuti atazise Mboni kutsonkhana pabodzi, koma abale alibe kusiya. Na tenepo, mbonizo zikhafunika kukhala ‘zakucenjera ninga nyoka koma zakusaya mulandu ninga nkhangaiwa.’ (Mat. 10:16) Andrea Almanzar adalewa kuti: “Tikhafunika kufika kumitsonkhano pa nthawe zakusiyana-siyana. Tikamaliza, tikhacoka pang’ono-pang’ono kuti wanthu waleke kutipenukira, ndipo nthawe zinango tikhacoka usiku kwene-kwene.”

Jeremias Glass, omwe adabadwa pa nthawe yomwe baba wace wa Leon, akhali m’kawoko, adakhala mpalizi mu 1957 pomwe akhana magole 7 yakubadwa. Iye ambakumbukira mitsonkhano ya cinsinsi yomwe ikhacitika m’nyumba mwace na bzomwe akhacita kuti wanthu aleke kuwagumaniza. Jeremias adafotokoza kuti: “Ali-wense omwe akhagumanika pa mitsonkhanoyo akhapasidwa tsamba lomwe likhana mulewengo wakulatiza nthawe yomwe akhafunika kucoka pa mbutopo. Mtsonkhanoyo ukamala, baba wangu akhandiikha pa msuwo kuti ndimbawone mulewengo wa tsamba la munthu ali-wense ndicimbawauza kuti acoke awiri-awiri aciyenda na njira zakusiyana.”

Tikhacita mitsonkhano pa nthawe yomwe wanthu azinji angadadziwa lini. Mwa ciratizo, Mercedes Garcia adapfunza cadidi na tiu wace a Pablo Gonzalez. Pomwe Mercedes akhana magole 7 yokha yakubadwa mai wace adafa ndipo pa nthaweyi baba wace akhali m’kawoko, ndipo iye adasala na abale wace wakukwana 9. Mercedes adabatizidwa mu 1959 pomwe akhana magole 9 yakubadwa. Kuti wanthu aleke kudziwa, abale adacita nkhani ya batismo pa nthawe ya 3:30 madandakweca. Nkhaniyo idafotokozedwa ku mui kwa m’bale winango, ndipo ubatizobo budacitika mu mkulo wa Ozama, womwe umbagwata na mu mzinda wa dzikolo. Mercedes adati: “Pa nthawe ya 5:30 zakumacibese pomwe tikhabwerera m’miyi mwathu ndipo pomwe wanthu winango akhayamba kulamuka.”

[Tsamba limweri palibe 6]]