Khalidwe Labwino Limbapereka Mpata wa Kubzala Njere za Cadidi—Nkhaniyi yacokera mu Buku Lapachaka la Mboni za Yehova la 2015
Europa
Adalatiza Ulemu
Tsamba 73
Pa 30 Março, 2014, Vasilii omwe ankutumikira pa Betel ya ku Rússia, akhapalizira pafupi na cipinda ca mthambi mwakuphatisa basa kangolo kakucita kupfuwa ndipo patsogolo pace kandere-ndere ya mphanvu za umangi idafendera pakhana iyepo. Wa mphanvu za umangi m’bodzi adabuluka acilewa mwaulemu kuna m’bale Vasilii kuti asiye basa lomwe akhacitalo, thangwe rakuti anansi wapafupipo wakhakomedwa lini na basa lakupaliziralo. Wa mphanvu za umangi winango akhagravari macezayo. Vasilii adawona kuti bzikhali bwino kubvera wa mphanvu za umangiwo acileka kunesana nawo. Wanthu womwe akhagwata pa mbutoyi akhaima kuti awone n’ciyani comwe cikhacitika. Vasilii adacoka pa mbutopo, koma zitapita nsiku ziwiri, iye adakumbira kuti akawonane na mkulu wa mphanvu za umangi. Mkumbiro wace udabvumidwa. Pomwe akhacezerana, Vasilii adatenda mkulu wa mphanvu za umangiyo bza basa lakufunika lomwe iwo ambalicita, ndipo adatendambo khalidwe labwino lomwe wa mphanvu za umangiyo adaliratiza pomwe adalewa-lewa naye nsiku ziwiri mbuyomu. Mkulu wa mphanvu za umangi adayang’anisa nyakutewera wace ndipo adalewa kuti, “Pa magole 32 yomwe ndinkuphata basa ninga mcikunda, ndikanati kubva munthu ali-wense ankutitenda pa basa lathuli!” Mkati mwa macezayo, mkulu wa mphanvu za umangi adathandizidwa kubvesesa kuti basa lathu la kupalizira mwapadeca ndakubvumizidwa mwalamulo. Mkulu wa mphanvu za umangiyo adabvunza Vasilii thangwe lomwe iye, alibe kunesana na wa mphanvu za umangi pomwe adaimisa basa lacero napo akhadziwa kuti akhana ufulu pa basa lacero. Vasilii adatawira kuti: “Ndimbalemekeza kwene-kwene wa mphanvu za umangi. Kungadakhala kusaya ulemu ndingadatsutsa wa mphanvu za umangiwo kuti an’dziwa lini malamulo pakati pa wanthu wense.” Mkulu wa mphanvu za umangiyo na nyakutewera wace adakomedwa kwene-kwene, ndipo adamutsimikizira Vasilii kuti pan’dzakhala lini pomwe na bvuto iye akadzapitiriza kupalizira mwakuphatisa basa kangolo kakucita kupfuwa.