Mareferensiya ya Kabukhu ka Mitsonkhano ka Moyo Wathu na Utumiki
7-13 OUTUBRO
CUMA CA M’FALA LA MULUNGU | TIAGO 3-5
“Mbalatizani Nzeru Yakucokera kwa Mulungu”
(Tiyago 3:17) Koma nzeru yakucokera kudzulu cakutoma iyo njakucena, patsogolo pace nja mtendere, njakulekerera, njakukonzeka kubvera, njakudzala na nsisi na bzisapo bzabwino, njakusaya tsankhulo na yakusaya cinyengo.
Kufufudza Cuma Cauzimu
(Tiyago 4:5) Ayai imwepo mukukumbuka kuti palibe thangwe lomwe bzinembo bzimbalewera kuti: “Mzimu omwe udayamba kukhala mwa ife ukupitiriza na bzikhumbo bza nsanje?”
(Tiyago 4:11, 12) Lekani kumbalewana abale. Omwe ambalewa kuipa ayai kuyeruza m’bale wace ambakhala akulewa kuipa cakutonga ndipo ambakhala akuyeruza cakutonga. Tenepo, penu ukuyeruza cakutonga, ukucita lini bzomwe cakutonga cimbalewa, koma ukukhala nyakuyeruza. 12 Alipo m’bodzi yekha omwe ni nyakupereka lamulo na Muyeruzi, ule omwe ambakwanisa kupulumusa na kupfudza. Tsono iwepo, ndiwe mbani kuti umbayeruze mwanzako?
w97 15/11 matsa. 20-21 ndi. 8
Cikhulupiro Cimbaticitisa Kukhala Wakupirira na Kumbapemba
Ni pikado kumbalewa kuipa Mkristau mwanzathu. (Tiyago 4:11, 12) Tsono winango ambalewa kuipa Akristau anzawo, pinango thangwe ra khalidwe lawo ayai thangwe rakuti akufuna kubziwonesera mwa kumbanyoza winango. (Psalymo 50:20; Mimwani. 3:29) Fala la Cigirego lakuti ‘kulewa kuipa’ lingathandauzembo kunamizira, ayai kunamizira mwakunyanyira. Bzimwebzi bzinkuthandauza kuyeruza mwakuipa m’bale wathu. Kodi ni mwa njira iponi kucita bzimwebzi ni ‘kulewa kuipa na kuyeruza cakutonga ca Mulungu’? Anembi na Afarizeu mwa ‘kucenjera, akhambasiya kumbali mitemo ya Mulungu’ acimbayeruza mwakubverana na mwambo wawo. (Marko 7:1-13) Tenepo, Kodi ifepano tikambayeruza m’bale omwe alibe mathangwe, ‘tinkuyeruza lini Cakutonga ca Mulungu’ na kulatiza kuti ico n’cakusaya kulungama? Ndipo tikambacitira bzakuipa abale wathu, tinkukwanirisa lini lamulo la cakutonga.—Waroma 13:8-10
14-20 OUTUBRO
CUMA CA M’FALA LA MULUNGU | 1 PEDRU 1-2
“Khalani Wakucena”
(1 Pedru 1:14, 15) Ninga wana wakubvera lekani kutewezera bzikhumbo bzanu bzomwe mukhanabzo kale-kale pomwe mukhali wakusaya kudziwa. 15 Koma khalani wakucena m’makhalidwe yanu yense, ninga Nyakucena omwe adakucemerani,
Cakulombolera—‘Mphaso Yakulungamiratu’ Yakucokera kwa Baba
Kodi tingalatize tani kuti timbafuna dzina la Yahova? Mwa khalidwe lathu. Yahova ambafuna kuti timbakhale wakucena. (Werengani 1Pedru 1:15, 16) Bzimwebzi bzimbathandauza kuti tin’funika kunamata iye yekha ticimbamubvera na mtima wathu wense. Napo tigumane na mazunzo, tin’funika kucita ciri-cense comwe tingakwanise kuti tipitirize kukhala na moyo mwakubverana na bzomwe Yahova ambatipfunzisa. Tikakhala na moyo wakubverana na mitemo ya Yahova, timbalemekezesa dzina lace. (Mateu 5:14-16) Timbalatiza kuti malamulo ya Yahova njabwino na kuti Sathani ni nyakunama. Timbaphonya bzinthu bzinango thangwe ndife lini wakulungama. Koma tikaphonya, timbakungula ndipo timbacita ciri-cense kuti tileke kucita bzinthu bzomwe bzingapswipise dzina la Yahova.—Psalymo 79:9.
(1 Pedru 1:16) pakuti bzidanembedwa kuti: “Khalani wakucena, thangwe inepano ndine wakucena.”
Momwe Tingasankhulire Bzinthu Bzabwino Kuti Tisenzeke Nabzo
Paulo adauza Akristau wa ku Roma kuti aleke kumbapereka thupi lawo ku pikado. Ndipo adawauzambo kuti aphe bzicito bza thupi lawo. (Waroma 6:12-14; 8:13) Kumayambiriro kwa tsamba laceri, Paulo adapereka bziratizo bza ‘bzicito bza thupi.’ Pakulewa bza wanthu wa pikado, iye adati: ‘Pa miromo pawo pana ululu bwa nyoka.’ ‘Minyendo yawo imbathamangira kucosa mulopa anzawo.’ ‘M’maso mwawo mulibe mantha na Mulungu.’ (Waroma 3:13-18) Mkristau angabzipswipize mwakuphatisa basa ‘bziwalo’ bza thupi lace kuti acite pikado zimwezi. Mwa ciratizo, Mkristau akambawona bzinthu bza maika ayai mavidiyo ya ciwembo, iye ankucita pikado na maso yace, acipswipiza thupi lace lense. Nsembe iri-yense yomwe iye angapereke kwa Mulungu, imbabvumidwa lini na iye. (Bzakutonga 15:21; 1Pedru 1:14-16; 2Pedru 3:11) Bzimwebzi ndibzo bzomwe bzingacitikire munthu omwe ambasenzeka na bzinthu bzakuipa.
Kufufudza Cuma Cauzimu
(1 Pedru 1:10-12) Pakulewa bza cipulumusoci, apolofeta omwe adaleweratu bza kudeka mtima kukulu kwa Mulungu komwe kudalatizidwa kwa imwepo, adafufudza mwa nyongo na mwakusamala. 11 Iwo akhafufudza kuti adziwe nthawe caiyo na bzomwe mzimu ukhawalatiza pakulewa bza Kristu, kuti adziwe nthawe yomwe mzimu ukhaperekera umboni pakulewa bza mabvuto yomwe Kristu angadadzapirira na umbiri bomwe bungadadzabwera patsogolo pace. 12 Iwo adazimbuliridwa kuti akhabzitumikira lini iwo okha, koma akhatumikira imwepo, pakulewa bza bzinthu bzomwe tsapano bzafotokozedwa kwa imwepo mwa wale omwe adawauza bzipsa bzabwino na mzimu wakucena omwe udatumizidwa kucokera kudzulu. Ni bzinthu bzimwebzi bzomwe anjo an’funa kubzibvesesa.
(1 Pedru 2:25) Pakuti mukhali ninga mabira yakutayika, koma tsapano mwabwerera kwa m’busa omwe ambanyang’anira moyo wanu.
it-2 tsa. 565 ndi. 3
Nyakunyang’anira
Nyakunyang’anira Mkululetu. Bzinkuwoneka kuti cinembo ca 1Pedru 2:25 cimbalewa bza Zaiya 53:6 pakulewa bza omwe ‘akhambataika ninga mabira’, ndipo iye adalewa kuti: ‘koma tsapano mwabwerera kwa m’busa omwe ambanyang’anira moyo wanu.’ Bzinkuwoneka kuti pamwepa iye akhalewa bza Yahova Mulungu, pakuti wanthu omwe Pedru adanembera tsambali akhalibe kusiya Kristu Jezu, koma mwa iye iwo akhadafendererana pomwe na Yahova Mulungu, omwe ni M’busa Mkululetu wa mbumba yace. (Psal. 23:1; 80:1; Jer. 23:3; Zek. 34:12) Ndipombo Yahova ni nyakunyang’anira, ule omwe ambazondera. (Psal. 17:3) Fala lakuti kuzondera (Gr., e·pi·sko·peʹ) lingabveranembo na fala lakuti kuyeruza, ninga momwe bzidacitikira m’dzana lakutoma, pakulewa bza Jeruzalemu omwe alibe kukumbukira bza nthawe yomwe ‘angadadzazonderedwa [Gr., e·pi·sko·pesʹ].’ (Lu 19:44) Ayai bzingadakhala na bzakutewera bzabwino na bza phindu, ninga wale omwe ambatumbiza Mulungu pa nsiku ‘ya kuzondera kwace [Gr., e·pi·sko·pesʹ].’—1Pe 2:12.
21-27 OUTUBRO
CUMA CA M’FALA LA MULUNGU | 1 PEDRU 3-5
“Kumala kwa Bzinthu Bzense Kunkufendera”
(1 Pedru 4:7) Koma kumala kwa bzinthu bzense kunkufendera. Tenepo, khalani wakukumbuka bwino na wakupenya mwakumbacita mipembo.
(1 Pedru 4:8) Kuposa bzense, funanani kwene-kwene, pakuti lufoyi limbampsinkha pikado zizinji.
w99 15/4 tsa. 22 ndi. 3
Momwe Tingazindikirire Kutepa mwa Uzimu na Kukukunda
Pakumalizira pace, pitirizani kumbakumbukira cenjezo la mpostolo Pedru lakuti: ‘Koma kumala kwa bzinthu bzense kunkufendera. Tenepo, khalani wakukumbuka bwino na wakupenya mwakumbacita mipembo. Kuposa bzense, funanani kwene-kwene, pakuti lufoyi limbampsinkha pikado zizinji.’ (1 Pedru 4:7, 8) Mpsakupusa kulekerera kuti kuperewera kwathu—ayai kwa winango kutokonye makumbukidwe na mitima yathu bzicikhala bzinthu bzakukhukhumudwisa. Ndipo Sathani ambakudziwa bwino kutepa kwathu kumweku. Njira ibodzi yomwe Sathani ambaiphatisa basa kuti akunde ni kubweresa m’gawano. Tenepo, tin’funika kumbacita bzinthu mwakamkulumize kuti timpsinkhe pikado zathu mwa kumbalatizana lufoyi likulu kuti timbaleke ‘kum’pasa mpata Dyabu.’—Wayef. 4:25-27.
(1 Pedru 4:9) Mbatambiranani mwakusaya kudandaula.
w18.03 matsa. 14-15 ndi. 2-3
Mbatambirani Alendo na Mtima Wense!
Pedru adauza Akristauwa kuti ‘ambatambirane.’ (1Pedru 4:9) M’cigirego fala lakuti ‘kutambira’ limbathandauza “kufuna ayai kudekera mtima munthu wacirendo.” Tsono mpostolo Pedru adauza abalewa kuti ‘ambatambirane’ napo kuti iwo akhadziwana kale ndipo akhacitira bzinthu pabodzi. Kodi kucita bzimwebzi kudawathandiza tani?
Bzimwebzi bzidawathandiza kukhala wakuphatana. Apa tani imwepombo? Kodi mudabva tani pomwe munthu munango adakucemerani kuti muyende kumui kwace? Dziwani kuti mukacemera munthu kuti abwere kumui kwanu, bzin’dzacitisa kuti mukhale wakuphatana. Ndipo njira ibodzi yakudziwana na abale wathu ndiyo kuwacemera kuti abwere kumui kwathu. Akristau wa mu nthawe ya mpostolo Pedru adafunika kukhala wakuphatana pomwe mabvuto yakhathumizirika, ndipo ifepano tin’funikambo kucita bzibodzi-bodzibzi ‘m’nsiku zakumalizira’ zino.—2 Timotio 3:1
Kufufudza Cuma Cauzimu
(1 Pedru 3:19, 20) yomwe iribe kubvera, pomwe Mulungu akhadikhira mwakupirira mu nsiku za Nowe, pa nthawe yomwe cingalawa cikhamangidwa, momwe wanthu wakucepa wakukwana asere, adapulumukira pa madzi.
(1 Pedru 4:6) Tenepo, ni thangwe race bzipsa bzabwino bzidapaliziridwambo kwa omwe adafa, kuti napo ayeruzidwe mwa kuthupi m’mawonedwe ya wanthu, koma iwo apitirize kukhala mwa kubverana na mzimu m’mawonedwe ya Mulungu.
28 OUTUBRO–3 NOVEMBRO
CUMA CA M’FALA LA MULUNGU | 2 PEDRU 1-3
“Pitirizani Kumbakumbukira bza Kukhala kwa Nsiku ya Yahova”
(2 Pedru 3:9, 10) Yahova ngwacinono lini pa piciro lace ninga momwe wanthu winango ambawonera, koma iye ambapirira namwe thangwe an’funa lini kuti munthu ali-wense adzapfudzidwe, koma an’funa kuti wense akungule. 10 Tsono nsiku ya Yahova in’dzafika ninga mbava, mwakuti pa nsikuyo, kudzulu kun’dzacoka na muwira wakugopswa; ndipo bzinthu bzakukonza kudzulu na dziko la pansi, bzitatenthesa, bzin’dzasungunuka; ndipo dziko la pansi na mabasa yace, bzin’dzawonekera padeca.
(2 Pedru 3:11, 12) Tenepo, pakuti bzinthu bzensebzi bzin’dzasungunuka, kumbukirani kuti mun’funika kukhala wanthu wa mtundu wanyi. Mun’funika kukhala wanthu wa makhalidwe yakucena, na kumbacita mabasa yakulatiza kuti ndimwe wakubzipereka kwa Mulungu. 12 Mumbacite bzimwebzi pomwe munkudikhirira na kukumbukira nthawe zense kukhala kwa nsiku ya Yahova, pomwe kudzulu kun’dzapsa na moto, ndipo bzin’dzasungunuka bzinthu bzense bzakukonza kudzulu na pansi pano.
Kufufudza Cuma Cauzimu
(2 Pedru 1:19) Tenepo, mafala ya polofesiyaya njakutsimikizika tsapano, ndipo munkucita bwino kumbayabvera. Mafalayo yali ninga mbvuniko mu mdima (mpaka nsiku itacena, iciwonekera nthanda), m’mitima mwanu.
(2 Pedru 2:4) Tsono, Mulungu alibe kusiya kulanga wanjo omwe adacita pikado, koma iye adawathusa ku Tartaro, aciwamanga na maunyolo mu mdima ukulu kwene-kwene aciwakoya kuti adzayeruzidwe.