Mareferentsiya ya Kabukhu ka Mitsonkhano ka Moyo Wathu na Utumiki
7-13 DEZEMBRO
CUMA CA M’FALA LA MULUNGU | MWAMBO 10-11
“Kufuna Kwene-kwene Yahova Kuposa Adzinza”
(Mwambo 10:1, 2) Patsogolo pace, Nadabe na Abihu wana wa Aroni, adatenga bzakufukizira, ali-wentse akhana cace, iwo adaikha moto m’mwemo na bzakununtcirisa. Ndipo adapereka kwa Yahova moto omwe ukhali lini wakubvumizika, bzomwe iye akhalibe kuwauza kuti acite. 2 Tenepo, udabwera moto kucokera kwa Yahova uciwatentha, ndipo iwo adafa patsogolo pa Yahovayo.
it-1 tsa. 1174
Cinthu Cakuletsedwa
Moto na Cakununcirisa Cakuletsedwa. Fala la Cihebereu lakugumanika pa cinembo ca Mwambo 10:1 lakuti zar (lomwe m’kalewedwe kanango ni, za·rahʹ; lomwe limbafuna kulewa cinthu cacirendo) limbaphatisidwa basa pakulewa bza ‘moto omwe ukhali lini wakubvumizika kwa [Mulungu]’ omwe Nadabe na Abihu wana wa Aroni adauphatiza pamaso pa Yahova, ndipopa Yahova adawapha na moto. (Mwam 10:2; Mirew 3:4; 26:61) Patsogolo pace, Yahova adauza Aroni kuti: ‘Lekani kumwa vinyo ayai cakumwa cinango cakuledzeresa, iwepo na wana wako, mukakhala mukubwera mu tendi la mkonkhano, kuti muleke kufa. Limweri ni lamulo lakusaya kumala kwa mibadwo yanu yentse kuti musiyanise cinthu comwe n‘cakupambulika na cakuipa, cinthu cakupswipa na cakucena, na kupfunzisa Ajirayeri mitemo yentse yomwe Yahova adawauza mwakuphatisa basa Mozeji.’ (Mwam 10:8-11) Bzimwebzi bzikulatiza kuti Nadabe na Abihu akhadaledzera; bzomwe bzidawacitisa kuti iwo apereke moto wakusaya kubvumizidwayu. Pinango-pentse motoyu ukhali wakuletsedwa thangwe ra nthawe yomwe adaupereka, mbuto yomwe adauperekera, kaperekedwe kace ayai cakununtcirisa comwe cidaperekedwa cikhali cakusiyana na comwe Yahova akhadawauza kuti ambacipereke, comwe cimbafotokozedwa pa cinembo ca Kufuluka 30:34, 35. Ndipo kuledzera kwawo kulibe kucitisa kuti pikado yawo ilekereredwe.
(Mwambo 10: 4, 5) Tenepo, Mozeji adacemera Misaeli na Elizafani, wana wa Uziyeri, tiu wa Aroni aciwauza kuti: “Bwerani kuno, cosani abale wanuwa pa mbuto yakucenayi, ndokoni nawoni kunja kwa mbuto yomwe imbakhalidwa.” 5 Na tenepo, iwo adafendera acitenga amunawo na bzakubvala bzawo bzitalibzo aciyenda nawo kunja kwa mbuto yomwe ikhakhalidwayo, ninga momwe Mozeji akhadawauzira.
(Mwambo 10:6, 7) Pomwe bzidamala bzimwebzi, Mozeji adauza Aroni na wana wace winango omwe ni Eleyazari na Itamari kuti: “Lekani kusiya tsisi lanu nyandu-nyandu ayai kung’amba bzakubvala bzanu kuti muleke kufa, nakuti Mulungu aleke kukalipa na mbumba yentseyi. Abale wanu wentse wa mui wa Jirayeri ndiwo omwe anilira wale omwe aphewa na Yahova mwakuphatisa basa moto. 7 Lekani kucoka pa msuwo wa tendi la mkonkhano thangwe mungafe, pakuti mafuta yakudzozera ya Yahova yali pa imwepo.” Tenepo iwo adacitadi mwakubverana na mafala ya Mozeji.
Kufufudza Cuma Cauzimu:
(Mwambo 10:8-11) Patsogolo pace, Yahova adauza Aroni kuti: 9 “Lekani kumwa vinyo ayai cakumwa cinango cakuledzeresa, iwepo na wana wako, mukakhala mukubwera mu tendi la mkonkhano, kuti muleke kufa. Limweri ni lamulo lakusaya kumala kwa mibadwo yanu yentse 10 kuti musiyanise cinthu comwe n‘cakupambulika na cakuipa, cinthu cakupswipa na cakucena, 11 na kupfunzisa Ajirayeri mitemo yentse yomwe Yahova adawauza mwakuphatisa basa Mozeji.”
(Mwambo 11:8) Lekani kudya nyama ya bzifuwo bzimwebzi, ne kukhuya thupi labzene pomwe bzafa. Ibzo mpsakupwsipa kwa imwepo.
it-1 tsa. 111 ndi. 5
Bzirombo
Kuletsedwa kudya bzakudya bzinango, kukhandophata basa kwa wale omwe akhabvera Cakutonga ca Mozeji, ninga momwe bzimbafotokozedwera pa Mwambo 11:8 pomwe pana mafala yakuti: ‘Ibzo mpsakupswipa kwa imwepo,’ yomwe yakhandolewedwa kwa Ajirayeri. Na kumala kwa Cakutonga thangwe ra ntsembe ya infa ya Jezu Kristu, kuletsedwaku kudamala ndipo wanthu wentse angadayambambo kugumana phindu na mtemo omwe Nowa adapasidwa pambuyo pa Cigumula.—Wakol 2:13-17; Ciy 9:3, 4.
14-20 DEZEMBRO
CUMA CA M’FALA LA MULUNGU | MWAMBO 12–13
“Bzomwe Tingapfunze na Lamulo Lakulewa bza Mapere”
(Mwambo 13:4, 5) Tsono penu cironda ca pa thupi la munthuyo n’cicena ndipo ciribe kuzikiratu, ndipo maukuse yace yalibe kukhala macena, wantsembe amuikhe kwayekha kuti amale ntsiku 7. 5 Pa ntsiku yaci 7, wantsembe an’dzakamuwona pomwe. Bzikawoneka kuti cirondaco ciri ninga momwe cikhaliri, wantsembeyo an’dzaikha pomwe munthuyo kwa yekha kuti amale pomwe ntsiku 7.
(Mwambo 13:45, 46) Tenepo munthu omwe agumanike na mapereyo, bzakubvala bzace bzing’ambidwe, aleke kumbakonza-konza tsisi lace ndipo ambampsinkhe mulomo wace acimbakuwa kuti: ‘Wakupswipa, wakupswipa!’ 46 Iye an’dzakhala adapswipa nthawe yentse yomwe an’dzakhala akudwala matendaya. Pakuti ngwakupswipa an’funika kumbakhala kwayekha. An’dzakhala kunja kwa mbuto yomwe mumbakhala.
(Mwambo 13:52) Iye an’funika kutentha cakubvala cace penu n’ca ukuse, ca usalu ayai cakukonzedwa na khanda comwe catakanyidwa na matendaya.
(Mwambo 13:57) Tsono penu cirondaco cikuwonekera ku mbali inango, m’phepete mwa cakubvala cakukonzedwa na khanda, matendeyo yakumwazika, mun’funika kutentha pa moto ciri-centse comwe catakanyidwa na matendaya.
it-2 tsa. 238 ndi. 3
Mapere
M’bzakubvala na m’manyumba. Mapere yakhatakanyambo bzakubvala bza ukuse ayai bza usalu, ndipo yakhambatakanyambo bzinthu bzakukonzedwa na khanda. Matendaya yakhambamala na kufula ndipo pakhana makonzedwe yakuciikha pacokha cinthu comwe catakanyidwaco. Tsono matenda yomwe yakhambawoneka kukhala ya kore ya masamba ya ndimu na safalau, ayai ifuiraya yangadapitiriza, bzikhalatiza kuti yakhali mapere yakuipa, ndipo cinthuco cikhafunika kutenthedwa. (Mwam 13:47-59) Penu kore ya masamba ya ndimu na yasafalau ayai ifuirayi ingadawonekera m’maparede ya nyumba, wantsembe akhafunikira kutonga kuti nyumbayo ifungidwe kwa kanthawe. Ndipo bzikhali bzakufunika kucosa minyala yentse yomwe ikhadatakanyidwa na matendayo ndipo nyumbayo ikhafunika kupalidwa mkati mwace. Minyala na bzomwe bzikhadapalidwabzo bzikhafunika kuikhidwa pa mbuto yakupswipa kunja kwa mzinda. Tsono penu matendayo yangadabwerera, nyumbayo ikhayesedwa yakupswipa icigudjulidwa ndipo bzakukonzera bzacebzo bzikhambataidwa ku mbuto yakupswipa. Tsono nyumba yomwe ikhalewedwa kuti njakucena, pakhana makonzedwe yakuti icenesedwe. (Mwam 14:33-57) Bzimbalewedwa kuti mapere yomwe yakhatakanya bzakubvala ayai nyumba yakhali mtundu winango wa bonga ayai bzinthu bzakuwoneka ninga makhonga; koma bzimbadziwikiratu lini bwino-bwino.
Kufufudza Cuma Cauzimu:
(Mwambo 12:2) “Uza Ajirayeri kuti: ‘Mkazi angakhala na pathupi acibereka mwana wacimuna, ambakhale wakupswipa kwa ntsiku 7, ninga momwe ambakhalira angakhala ali kumwezi.
(Mwambo 12:5) “‘Ndipo akabereka mwana wacikazi, ambakhale wakupswipa kwa ntsiku 14, ninga momwe ambakhalira angakhala ali kumwezi. Iye an’dzapitiriza kubzicenesa kwa ntsiku zakukwana 66.
(Mwambo 12:3) Ndipo pa ntsiku yaci 8 mwanayo an’dzafunika kugwatidwa kakhanda ka kumaso.
21-27 DEZEMBRO
CUMA CA M’FALA LA MULUNGU | MWAMBO 14–15
“Kunamata kwa Cadidi Kumbafuna Kucena”
Mwambo 15:13-15) “‘Ndipo munthu akacira citenda, pambapite ntsiku 7 kuti akhale wakucena, ndipo ambafule bvakubvala bzace na kusamba madzi ya mu mkulo, akacita tenepo an’dzakhala wakucena. 14 Pa ntsiku yaci 8 ambatenge njiwa ziwiri ayai nkhangaiwa ziwiri acizibweresa kwa Yahova pa msuwo wa tendi la mkonkhano, ndipo ambazipereke kwa wantsembe. 15 Ndipo wantsembeyo an’dzapereka ibodzi kuti ikhale ntsembe ya pikado ndipo inangoyo kuti ikhale ntsembe yakutentha. Wantsembe an’dzamumpsinkhira pikado yace kwa Yahova, thangwe ra citenda caceco.
it-1 tsa. 263
Kusamba
Pakhana mathangwe mazinji yomwe Ajiraeri akhacitira mwambo wakusamba. Ali-wentse omwe mapere yace yangadamala, omwe angadakhuya bzinthu bzakuphatiwa na wale omwe akhana ‘citenda,’ mwamuna akacosa bwamuna bzace, mkazi akacoka kumwezi ayai kucoka mulopa, ayai munthu ali-wentse omwe angadacoka pa kucita malume ya pamphasa, akhali ‘wakupswipa’ ndipo akhafunika kusamba. (Mwam 14:8, 9; 15:4-27) Ule omwe angadakhala na mtembo ayai citanda m’nyumba mwace ayai kukhuya bzinthu bzimwebzi, akhakhala ‘wakupswipa’ ndipo akhafunika kucenesedwa na madzi. Penu munthu angadalamba kuteweza mitemo imweyi, iye ‘akhafunika kuphedwa acicosedwa pakati pa mbumba, thangwe rakuti akhadapswipiza mbuto yakucena ya Yahova.’ (Mirew 19:20) Bzimwebzi bzikhali bzakufunika thangwe rakuti kusamba kumbaphatisidwa basa mu njira yakuyezezera, kufuna kulatiza m’khalidwe wakucena pamaso pa Yahova. (Psal 26:6; 73:13; Zai 1:16; Zakiy 16:9) Kusamba na madzi ya cadidi ca fala la Yahova, comwe cimbayezezeredwa na madzi, kuna mphanvu yakucenesa.—Wayef 5:26.
(Mwambo 15:28-30) “‘Tsono citendaco cikamala, iye an’dzalewenga ntsiku 7, ndipo an’dzakhala wakucena. 29 Pa ntsiku yaci 8 iye an’funika kutenga nkhangaiwa ayai njiwa ziwiri acizibweresa kwa wantsembe pa msuwo wa tendi la mkonkhano. 30 Tenepo wantsembe an’dzapereka ibodzi kuti ikhale ntsembe ya pikado ndipo inangoyo kuti ikhale ntsembe ya kutentha. Wantsembe an’dzamumpsinkhira pikado yace kwa Yahova, thangwe ra citenda cace cakupswipizaco.
it-2 tsa. 372 ndi. 2
Kumwezi
Mkazi akhambayesedwambo wakupswipa nthangwe ra kucinja-cinja kwa ntsiku zakukhala kumwezi ayai thangwe ra kuwanda kwa ntsikuzo, ‘thangwe zikhambaposa ntsiku zace zakukhala kumwezi’ pakuti mu m’khalidwe umweyu iye akhambapswipiza bzinthu bzentse bzomwe akhambagonera ayai kukhalira, kuphatanidzambo wanthu wentse omwe akhambakhuya bzinthu bzakupswipabzi. Pambuyo pa mkaziyo kukhala kumwezi kwa ntsiku zizinjitsazi, pakhafunika kupita ntsiku zinomwe, kuti iye akhale wakucena. Pa ntsiku yacisere mkaziyo akhambayendesa njiwa ziwiri ayai nkhangaiwa ziwiri kuna wantsembe, omwe akhambampswinkha pikado yace; ndipo akhambazipereka kwa Yahova, ibodzi ninga ntsembe yapikado ndipo inangoyi akhambaipereka ninga ntsembe yakutentha.—Mwam 15:19-30; onani KUCENA, WAKUCENA.
(Mwambo 15:31) “‘Tenepo, mumbawonesese kuti Ajirayeri ambakhale kutali na bzakupwsipiza kuti aleke kufa, thangwe ra kupswipiza tendi langu la mkonkhano lomwe liri pakati pawo.
it-1 tsa. 1133
Mbuto Yakucena
2. Tendi la mkonkhano, ndipo patsogolo pace, templo. Mbuto zentse, kuphatanidzambo bwalo la tendi la mkonkhano na mabwalo ya templo, zikhali mbuto zakucena. (Kuf 38:24; 2Nkha 29:5; Mab 21:28) Bzinthu bzakufunika kwene-kwene bzomwe bzikhagumanika m’bwalo, bzikhali guwa la ntsembe, na basiya la mkuwa. Bzimwebzi bzikhali bzombo bzakucena. Pokha-pokha wanthu omwe akhadacenesedwa mwa mwambo ndiwo omwe angadapita m’bwalo la tendi la mkonkhano pa nthawe iri-yentse; kupambula amwewa, palibe ali-wentse wakupswipa omwe akhafunika kupita m’bwalomo. Mwaciratizo, mkazi omwe akhadapswipa, akhafunika lini kukhuya cinthu cakucena ayai kupita m’mbuto yakucena. (Mwam 12:2-4) Bzikuwoneka kuti Ajirayeri omwe akhali mu m’khalidwe wakupswipa akhawonedwa kuti akhapswipiza tendi la mkonkhano. (Mwam 15:31) Omwe akhambabweresa bzakupereka na cakulinga cakufuna kucenesedwa pa matenda yawo ya mapere, akhambandofika pa msuwo wa bwalo la tendi la mkonkhano. (Mwam 14:11) Palibe munthu wakupswipa omwe akhafunika kucita mbali pa kupereka ntsembe ya wentse mu tendi la mkonkhano ayai mu templo, thangwe angadafa.—Mwam 7:20, 21.
Kufufudza Cuma Cauzimu
(Mwambo 14:14) “Patsogolo pace, wantsembe an’dzatenga pan’gono mulopa wa ntsembe ya mulandu, aciupalangira kumphepete kwa khutu la munthu omwe akubzicenesayo, ndipo an’dzaupalangirambo pa cala cikulu ca boko la madidi na pa cala cikulu ca mwendo wa madidi.
(Mwambo 14:17) Tsono mafuta yomwe yasala m’cithatha ca boko la wantsembeyo, an’dzayatenga pang’ono aciyapalangira kumphepete kwa khutu la madidi la munthu omwe akubzicenesayo, ndipo an’dzayapalangirambo pa cala cikulu ca boko la madidi na pa cala cikulu ca mwendo wa madidi, pomwe adamupalangira mulopa wa ntsembe ya mulandu.
(Mwambo 14:25) Ndipo iye an’dzapha kabira kamuna komwe ni ntsembe ya mulandu, ndipo wantsembe an’dzatenga pan’gono mulopa wa ntsembe ya mulandu, aciupalangira kumphepete kwa khutu la munthu omwe akubzicenesayo, ndipo an’dzaupalangirambo pa cala cikulu ca boko la madidi na pa cala cikulu ca mwendo wa madidi.
(Mwambo 14:28) Ndipo mafuta yomwe yasala m’cithatha ca boko la wantsembeyo an’dzayatenga pang’ono aciyapalangira kumphepete kwa khutu la madidi la munthu omwe akubzicenesayo, ndipo an’dzayapalangirambo pa cala cikulu ca boko la madidi na pa cala cikulu ca mwendo wa madidi. Apalangire m’mbuto zibodzi-bodzi na zomwe apalangira mulopa wa ntsembe ya mulandu.
it-1 tsa. 665 ndi. 5
Khutu
Pa kukhazikisidwa kwa untsembe mu Jirayeri, Mozeji adauzidwa kuti atenge mbali ya mulopa wa bira wa kukhazikisidwako na kuuikha ku khutu la mbali yamadidi na ku khutu la wana wace, kuphatanidzambo ku boko ladidi na ku mwendo wamadidi; kulatiza kuti bzomwe iwo angadabva, bzomwe angadacita na momwe iwo angadacitira, bzikhafunika kutsogoleredwa mwakubverana na momwe bzinthu bzikhaliri pa mbutopo. (Mwam 8:22-24) Mpsibodzi-bodzimbo na munthu omwe akhambacenesedwa mapere, Cakutonga cikhambalewa kuti wantsembe akhambafunika kutenga mbali inango ya mulopa wa bira wa ntsembe ya mulandu, mbali ya mafuta yakuperekedwa, bziciikhidwa ku khutu la madidi la nyamapereyo. (Mwam 14:14, 17, 25, 28) Makonzedwe mabodzi-bodziya yakhacitikambo kuna munthu omwe akhafuna kupitiriza kukhala kapolo kwa omwe akhaphatira basa mpaka kale-kale. Pamwepa kapoloyo akhafunika kutengedwa aciyendesedwa pa mphepete pa msuwo ndipo mbuya waceyo akhambamubowola khutu na ntsingano. Cizindikiro comwe cikhambaikhidwa pa khutuci cikhambalatiza kufuna kwa kapoloyo kupitiriza kubvera mbuya waceyo.—Kuf 21:5, 6.
(Mwambo 14:43-45) “Tsono penu nyumbayo yatakanyidwa pomwe na matendayo, pambuyo pakucosa minyala ire, kupala na kudjeda pomwe nyumbayo, 44 wantsembe an’dzapita m’nyumbamo aciiwona. Penu matendayo yakupitiriza kumwazika m’nyumbamo, muna mapere yakugopswa. Nyumbayo njakupswipa. 45 Iye an’dzalewa kuti nyumbayo igumulidwe pabodzi na minyala, matabwa na dongo lace lentse, ndipo an’dzacosa bzentsebzi aciyenda nabzo kunja kwa mzinda komwe ni ku mbuto yakupswipa.
28 DEZEMBRO–3 JANEIRO
CUMA CA M’FALA LA MULUNGU | MWAMBO 16–17
“Momwe Ntsiku Yakumpsinkha Pikado Imbakutokonyerani”
(Mwambo 16:12) “Tenepo, iye an’dzatenga cakufukizira cakudzala na masimbe ya moto yakucosedwa pa guwa la ntsembe, lomwe liri pa maso pa Yahova. Ndipo adzatapembo manja mawiri ya bzakufukiza bzakununcirisa bza ufa-ufa, aciyenda nabzo kuseri kwa nguwo yakumpsinkhira.
Bzomwe Tingapfunze na Bukhu la Mwambo
Werengani Mwambo 16:12, 13. Yezezerani kuti mukuwona bzomwe bzikhacitika pa Ntsiku ya Kumpsinkha Pikado: Mkulu wa ansembe akupita mu tendi la mkonkhano, ndipo ku boko lace linango wanyamula combo comwe cina bzakununcirisa. Ku boko linango wanyamula combo ca oro comwe cina masimbe ya moto. Ndipo waima patsogolo pa cinguwo comwe cikumpsinkha njira yakupitira m’Cipinda Cakucenesesa. Bumwebu ni ulendo bwakuyamba pa maulendo matatu yomwe iye an’pita m’Cipindaco pa Ntsiku ya Kumpsinkha Pikado. Iye akupita m’Cipindamo mwa ulemu, ndipo waima patsogolo pa Thungwa la Mpangano. Bziri ningati, iye waima patsogolo pa Yahova caiyeyo! Ndipo tsapano, mkulu wa ansembeyo akukhuthula pa masimbe ya moto bzakununcirisa bzire mwakusamala kwene-kwene, ndipo m’Cipindamo mukununcira bwino ndipo mukudekeza. Patsogolo pace, iye akupita pomwe m’Cipindamo na mulopa kuti apereke nsembe ya pikado. Onani kuti mkulu wa ansembeyo akhapereka nsembe ya pikado pambuyo pa kutentha bzakununcirisa.
(Mwambo 16:13) Iye an’dzaikha bzakununcirisa pa masimbe ya moto, pamaso pa Yahova, ndipo mtambo wa utsi wa bzakununcirisabzo un’dzampsikha cakugwanankhirira Thungwa la Umboni, kuti iye aleke kufa.
Bzomwe Tingapfunze na Bukhu la Mwambo
Kodi tikupfunza ciyani na bzakununcirisa bzomwe bzikhaphatisidwa basa pa Ntsiku ya Kumpsinkha Pikado? Bibliya limbalewa kuti mipembo yomwe Yahova ambabvuma ya atumiki wace wakukhulupirika iri ninga bzakununcirisa. (Psalymo 141:2; Cibvumbulutso 5:8) Kumbukirani kuti mkulu wa ansembe akhapita na ulemu pomwe akhayenda kukaikha bzakununcirisa pamaso pa Yahova. Mpsibodzi-bodzimbo na ifepano, tikapemba kwa Yahova tin’funika kumbalatiza ulemu. Tenepo, timbatenda kwene-kwene kuti Mulengi wa cirengedwe cense ambafuna kuti timufenderere na kukhala naye pafupi ninga momwe mwana ambacitira na babace. (Tiyago 4:8) Iye ambabvuma kuti tikhale axamwali wace! (Psalymo 25:14) Umweyu ni mwayi ukulu kwene-kwene, tenepo tin’funika kutcenkha kucita cinthu ciri-cense comwe cingamusunamise.
(Mwambo 16:14, 15) “Ndipo an’dzatenga pang’ono mulopa wa mkono wa ng’ombe acithothezera patsogolo pa cakugwanankhirira, ku mbali ya kumabvadzuwa. An’dzathothezera mulopayo kanomwe-kentse patsogolo pa cakugwanankhiriraco. 15 “Ndipo iye an’dzapha tonde wa ntsembe ya pikado ya mbumba, ndipo an’dzatenga mulopa aciyenda nawo kuseri kwa cinguwo, acikacita nawo bzibodzi-bodzi na bzomwe adacita na mulopa wa mkono wa ng’ombe ire. Iye an’funika kuuthothezera patsogolo pa cakugwanankhirira.
Bzomwe Tingapfunze na Bukhu la Mwambo
Kumbukirani kuti mkulu wa ansembe akhatentha bzakununcirisa akanati kupereka nsembe. Kucita bzimwebzi, kukhamutsimikizirisa kuti Mulungu akhakomedwa naye. Kodi tikupfunza ciyani na bzimwebzi? Kumbukirani bzomwe Jezu adacita. Timbadziwa kuti iye adabwera pa dziko la pansi kuti adzapereke moyo wace ninga nsembe. Koma akanati kucita bzimwebzi, cakuyamba iye akhafunika kucita cinthu cinango cakufunika kwene-kwene kuposa kupulumusa wanthu. Kodi cinthuco n’ciponi? Iye akhafunika kulatiza kukhulupirika na kubvera Yahova kwa moyo wace wense pomwe akhali pano pa dziko la pansi, kuti Yahovayo abvume nsembe yaceyo. Na bzimwebzi, Jezu adalatiza kuti kucita bzinthu mwakubverana na kufuna kwa Yahova, n’cinthu cakufunika kwene-kwene comwe tingacite kuti tikhale na moyo. Bzomwe Jezu adacitabzi, bzidalatiza kuti katongedwe ka Yahova nkhabwino ndipo nkhakulungama.
Kufufudza Cuma Cauzimu
(Mwambo 16:10) Tsono tonde omwe adasankhulidwa mwakucita kuvima kuti akhale wa Azazeli an’funika kubweresedwa kwa Yahova pomwe akana moyo kuti aphatisidwe basa pa kumpsinkha pikado. Angamala amutumize ku dambo ninga wa Azazeli.
it-1 tsa. 226 ndi. 3
Azazeli
Ninga momwe mpostolo Paulo adafotokozera, pomwe Jezu adapereka thupi lace lakulungamiratu ninga ntsembe kuti alombole wanthu ku pikado zawo, iye adakwanisa kucita cinthu cikulu kwene-kwene kuposa bzomwe bzikhakwanisika na ‘mulopa wa ng’ombe na wa mbuzi.’ (Waheb 10:4, 11, 12) Tenepo iye adakhala ninga tonde ‘wakumpsinkhira pikado’, omwe adatenga ‘matenda yathu’ ndipo iye ‘Akhapswanyidwa thangwe ra pikado zathu.’ (Zai 53:4, 5; Mat 8:17; 1Pe 2:24) Iye ‘adanyamula’ pikado za wale omwe ambalatiza kukhulupirika pa ntsembe yace. Iye adalatiza bzomwe Mulungu akhadacita kuti amalise pikado zentse. Mwa njira imweyi ‘mbuzi ya Azazeli’ imbathandauza ntsembe ya Jezu Kristu.
(Mwambo 17:10, 11) “‘Penu munthu ali-wentse wa m’nyumba ya Jirayeri ayai mulendo wakukhala pakati panu anidya mulopa uli-wentse, ndin’dzaikha nkhope yangu pa iye, ndipo ndin’dzapfudza munthu umweyo pakati pa wanthu wa mtundu wace. 11 Thangwe moyo wa cirombo uli m’mulopa, ndipo ine ndakuikhirani mulopa pa guwa la ntsembe kuti ukumpsinkhireni pikado, pakuti mulopa ndiwo umbampsinkha pikado, thangwe moyo uli m’mulopa.