Kodi Ndimwe Wakukonzeka ‘Kudzatambira Dziko la Pantsi’?

TENTSENEFE tikufunisisa kudzawona bzomwe Jezu adalewa bzikucitika. Iye adati: “An’kondwa mbale omwe mbakubzicepesa, thangwe an’dzatambira dziko la pantsi.” (Mateu 5:5) Anyakudzozedwa an’dzatambira dziko la pantsi thangwe iwo an’dzatonga pabodzi na Jezu kudzulu. (Apokalipse 5:10; 20:6) Tsono Akristau azinji wacadidi akudikhirira kudzakhala na moyo wakusaya kumala pa dziko la pantsi. Iwo an’dzakhala wakulungama, an’dzakhala mwa mtendere ndipo an’dzapfatsa na moyo wabwino. Tsono mu dziko lipsamo mun’dzakhala na basa lizinji kuti acite. Mbatiwoneni mabasa matatu yomwe iwo an’dzacita: iwo an’dzaphata basa lakukonza dzikoli kuti likhale paraizo, an’dzatambira wanthu omwe an’dzalamusidwa na kuwapfunzisa. Mbatiwoneni bzomwe imwepo mungacite ntsiku zino kuti mulatize kuti mukufunambo kudzaphata mabasa yamweya mu dziko lipsa.

KODI MUKUFUNA KUDZAKONZAMBO DZIKOLI KUTI LIKHALE PARAIZO?

Yahova adauza Adamu na Eva kuti ‘adzaze dziko la pantsiri na kulinyang’anira.’ Bzimwebzi bzikulatiza kuti dziko lentse la pantsi lingadakhala paraizo. (Ciyambo 1:28) Wanthu omwe an’dzakhala mu dziko lipsa an’dzafunika kubvera mtemo umweyu. Dzikoli lin’dzakhala lini paraizo kabodzi na kabodzi, thangwe zunde la Edeni kulibe. Ndipopa, Armagedo ikadzamala, wanthu an’dzakhala na basa lizinji lakucita. Iwo an’dzafunika kukonza dzikoli kuti likhale lakudeka thangwe rakuti wanthu alipswipiza.

Bzomwe bzin’dzacitika mu Paraizo bzikutikumbusa bzomwe bzidacitika pomwe Ajirayeri adabwerera kucoka ku Babiloniya. Iwo adamala magole 70 ku ukapolo. Ndipopa dziko lawo likhadakhaliratu matere caiyo. Tsono mpolofeta Zaiya akhadalewa kale kuti Yahova angadadzathandiza wanthuwo kukonza dziko lawo kuti likhale pomwe lakudeka. Zaiya adalewa kuti: “Iye an’dzacitisa kuti dambo likhale ninga zunde la Edeni ndipo an’dzacitisambo kuti dambolo likhale ninga munda wa Yahova.” (Zaiya 51:3) Yahova adathandiza Ajirayeri kukonza dziko lawo. Ndipo an’dzacitambo bzibodzi-bodzibzi mu dziko lipsa. Iye an’dzathandiza wanthu wace kukonza dzikoli kuti likhale paraizo. Ndipo ntsiku zino, imwepo mungalatize kuti mukufuna kudzaphatambo basa limweri la kukonza paraizo.

Cinthu cibodzi comwe mungacite ni kukhala na khonkho pa mui panu napo kuti avizinyu wanu ambacita lini bzimwebzi. Ndipo mungambathandizirembo kucenesa Nyumba ya Umambo ayai Nyumba ya Mitsonkhano Mikulu-mikulu. Ndipo penu mungakwanise, mungakumbire formulariyo kuti mupreencheri kuti mukathandize komwe kungacitike malengwa ya pantsi. Mukacita bzimwebzi, imwepo munilatiza kuti ndimwe wakukonzeka kukathandiza komwe kukufunikira thandizo. Bzibvunzeni kuti: ‘Kodi ningapfunze mabasa yomwe yangadzakhale yakufunika mu dziko lipsa?’

Abale na mpfumakazi akucita limpeza mu Nyumba ya Umambo na kukonza bzinthu bzomwe bzadzongeka.

KODI NDIMWE WAKUKONZEKA KUDZATHANDIZA WANTHU OMWE AN’DZALAMUSIDWA?

Pomwe Jezu adalamusa mwana wacikazi wa Jairo, iye adauza abereki wa mwanayo kuti amupase cakudya kuti mwanayo adye. (Marko 5:42, 43) Bziribe kuwanesa aberekiwo kupasa cakudya mwana wawo wacikazi omwe akhana magole 12. Tsono mukuwona kuti bzinthu bzin’dzakhala tani wanthu ‘wentse omwe ali m’thenje akadzabva fala la Jezu acidzabula’? (Juwau 5:28, 29) N’cadidi kuti Bibliya limbalewa lini bzinthu bzizinji bzomwe bzin’dzacitika, koma tikukwanisa kuwona kuti wanthu omwe an’dzalamusidwawo, an’dzafuna cakudya, bzakubvala na mbuto yakuti adzakhale. Pomwe nthaweyi ikanati kufika, ifepano tingalatize basi kuti tikufuna kudzathandiza basa limweri. Mbatiwoneni bzinthu bzinango bzomwe mungacite.

Kodi n’ciyani comwe mungacite ntsiku zino kuti mulatize kuti ndimwe wakukonzeka kudzatambira dziko la pantsi?

Abale na mpfumakazi ali pa thambwe la ndeke ndipo akutambira abale omwe ayenda ku mtsonkhano wa madziko ku Paris.

Nyakunyang’anira dera akakhala akuzungira gwere lanu, imwepo munganembese dzina lanu kuti adzadye ku mui kwanu. Ndipo penu m’bale omwe akhatumikira pa Beteli ayamba kutumikira m’gwere mwanu, ayai nyakunyang’anira dera asiya basa lace, imwepo mungabzipereke mwakuwathandiza kugumana mbuto yakukhala. Penu kwanuko kun’citika mtsonkhano wa cigawo ayai wakupambulika, mungabzipereke kuti muthandizire mabasa ya kukonzekera mtsonkhanoyo ayai kutambira abale omwe an’cokera ku madziko manango.

KODI MWAKONZEKA KUDZAPFUNZISA WANTHU OMWE AN’DZALAMUSIDWA?

Pa Mabasa 24:15 pambalewa kuti wanthu omwe an’dzalamusidwa an’dzakhala azinji kwene-kwene. Pa wanthu omwe an’dzalamusidwawo, azinji alibe kukhala na mwayi wa kudziwa Yahova. Koma akadzalamusidwa, iwo an’dzakhala na mwayi wa kupfunza kuti adzamudziwe bwino Yahova.a Atumiki wa Mulungu wakukhulupirika ndiwo an’dzaphata basa lakupfunzisali. (Zaiya 11:9) Charlotte, omwe adapalizira kale ku Europa, América do Sul na ku África, akufunisisa kudzacita basa limweri. Iye adalewa kuti: “Ndikufuna kwene-kwene kudzapfunzisa wanthu omwe an’dzalamusidwa. Ndikambawerenga bza wanthu omwe adakhala na moyo kale-kale, nimbawona kuti iwo adacita bzinthu bzakuipa thangwe akhadziwa lini Yahova. Bzingadakhala kuti akhamudziwa, angadacita lini tenepoyo. Ndipopa ndikufunisisa kudzawapfunzisa, thangwe ndikudziwa kuti moyo wawo un’dzakhala wabwino akadzayamba kumutumikira.”

Napo atumiki wa Yahova wakukhulupirika omwe adakhala na moyo pomwe Jezu akhanati kubwera pantsi pano an’dzakhalambo na bzinthu bzizinji kuti apfunze. Kumbukirani ibzi: Mpolofeta Daniyeli adanemba mapolofesiya yomwe akhayadziwa lini thandauzo lace. Ndipopa akadzalamusidwa, ifepano tin’dzakomedwa kwene-kwene kumufotokozera kuti mapolofesiya yomwe adanemba yale yadacitika tani. (Daniyeli 12:8) Ndipo bzin’dzakhalambo bzakudekeza kufotokozera Rute na Naomi kuti iwo adakhala na mwayi ukulu kwene-kwene wakucita mbali ya dzinza lomwe Mesiya adadzabadwira. Ndipopa tingalewe kuti basa la kupfunzisa wanthu pa dziko lentse la pantsi lin’dzakhala lakudekeza kwene-kwene, thangwe tin’dzakhala mu dziko lomwe lin’dzakhala liribe mabvuto ayai cinthu comwe cingatiphingize.

Mpfumakazi ikupereka katsamba kwa mkazi omwe akufula.

Kodi n’ciyani comwe mungacite kuti mulatize kuti mukufuna kudzapfunzisambo wanthu omwe an’dzalamusidwa? Cinthu cibodzi comwe mungacite ni kucita nyongo kuti mukhale mpfunzisi wabwino na kuphata basa mwa mphanvu pa kupalizira. (Mateu 24:14) Nthawe zinango tingatazire kucita bzizinji thangwe rakuti takalamba, ayai tina mphitca zinango. Napo bziri tenepo, nyongo yathu ingalatize kuti tikufuna kudzapfunzisa wanthu omwe an’dzalamusidwa.

Mpsabwino kwene-kwene kumbabzicita mibvunzo iyi: ‘Kodi ndikufunisisadi kudzakhala mu dziko lipsa? Kodi ndikufunisisa kudzathandizira basa la kukonza dzikoli kuti likhale paraizo, kudzatambira wanthu omwe an’dzalamusidwa na kuwapfunzisa?’ Kuti mulatize kuti mukufunisisadi, bzingakhale bwino kubakacitiratu mabasa yomwe yakundendemerana na yomwe mun’dzacita mukadzatambira dziko lipsa!

a Onani nkhani yakuti ‘Kuthandiza Wanthu Azinji Kucita Cirungamo’ yomwe iri mu Ntsanza ya Mulindiri ya Setembro, 2022.