Kodi Yahova Ambatawira Tani Mipembo Yathu?

1-2. N’ciyani comwe tingabzibvunze pa nkhani ya mipembo yathu?

KODI imwepo mudabzibvunza kale penu Yahova ambatawira mipembo yanu? Penu munti inde, muli lini mwekha. Abale na mpfumakazi azinji ambakhalambo na thupo limweri maka-maka akakhala akugumana na mabvuto. Tikakhala tikugumana na mabvuto bzingatinese kukhulupira kuti Yahova akutawira mipembo yathu.

² Mbatiwoneni kuti n’thangwe ranyi tingakhale na citsimikizo cakuti Yahova ambatawira mipembo ya atumiki wace. (1 Juwau 5:15) Kuti ticite bzimwebzi tin’cezerana mibvunzo iyi: Thangwe ranyi nthawe zinango tingawone ninga kuti Yahova akutawira lini mipembo yathu? Kodi Yahova ambatawira tani mipembo yathu ntsiku zino?

YAHOVA ANGATAWIRE LINI MIPEMBO YATHU NINGA MOMWE IFEPANO TIKHAFUNIRA

3. Thangwe ranyi Yahova ambafuna kuti timbapembe kwa iye?

³ Bibliya limbatitsimikizira kuti Yahova ambatifuna kwene-kwene ndipo ambatiwona kuti ndife wakufunika. (Agai 2:7; 1 Juwau 4:10) Ndipo iye ambatiuza kuti tipembe kwa iye kuti timukumbire thandizo. (1 Pedru 5:6, 7) Iye akufuna kuti tikhale naye pa uxamwali bwakulimba kuti tikwanise kukhala wakulimba pa mabvuto yomwe timbagumana nayo.

4. Kodi timbadziwa tani kuti Yahova ambatawira mipembo ya atumiki wace? (Onani cithunzi-thunzi.)

⁴ M’Bibliya kawiri-kawiri ifepano timbawerenga kuti Yahova ambatawira mipembo ya atumiki wace. Kodi imwepo mukukumbukirambo bza ciratizo cibodzi? Kodi tani pakulewa bza Mambo Davide? Pa moyo wace, iye adagumana na anyamadulanthaka azinji ndipo adakumbira Yahova mu mpembo kuti amuthandize. Pa nthawe inango, iye adadandaulira Yahova kuti: “Imwe Yahova, tetekerani mpembo wangu; bvani kudandaula kwangu kwakukumbira thandizo. Nditawireni, pakuti ndine munthu wakukhulupirika na wakulungama.” (Salimo 143:1) Yahova adatawira mipembo ya Davide yakuti amupulumuse. (1 Samuyeli 19:10, 18-20; 2 Samuyeli 5:17-25) Ndipopa, Davide adalewa na citsimikizo centse kuti: “Yahova ali pafupi na wentse omwe ambamucemera.” Ifepano tingakhalembo na citsimikizo cimweci. — Salimo 145:18.

5. Kodi atumiki wa Yahova wa m’mbuyomu adatawiridwa mipembo yawo ninga momwe iwo akhadikhirira? Fotokozani. (Onani cithunzi-thunzi.)

⁵ Yahova angatawire lini mipembo yathu ninga momwe tikhadikhirira. Bzimwebzi ndibzo bzomwe bzidacitikira mpostolo Paulo. Iye adakumbira Mulungu kuti amucosere “munga m’thupi.” Paulo adapempherera bvuto limweri katatu kentse. Kodi Yahova adatawira mipembo imweyi? Inde, koma alibe kuyitawira mu njira yomwe Pauloyo akhaidikhirira. Iye alibe kumucosera munga m’thupi koma adamupasa mphanvu kuti apitirize kumutumikira mwakukhulupirika. — 2 Akolinto 12:7-10.

6. Thangwe ranyi nthawe zinango bzingawoneke ninga kuti Yahova akutawira lini mipembo yathu?

⁶ Ifepanombo tingatawiridwe mpembo wathu mwakusiyana na momwe tikhadikhirira. Ifepano timbakhulupira kuti Yahova ambadziwa njira yabwino yakutithandizira. Iye angakwanise “kucita bzinthu bzikulu kwene-kwene kuposa bzomwe timbakumbira ayai kukumbuka.” (Aefezo 3:20) Ndipopa, mtawiro wa mpembo wathu ungabwere pa nthawe na mu njira yomwe ifepano tikhaidikhirira lini.

7. Thangwe ranyi nthawe zinango tingafunike kucinja bzomwe tikufuna kukumbira Yahova mu mpembo? Fotokozani.

⁷ Ifepano tikadziwa bzomwe Yahova akufuna,’ tingacinje bzomwe tikufuna kumukumbira mu mpembo. Onani bzomwe bzidacitikira m’bale wakucemeredwa Martin Poetzinger. Pomwe adandoti lowoleni, M’bale Poetzinger adaikhidwa m’kawoko na partido ya Nazi. Pomwe bzimwebzi bzidacitika iye adapemba kwa Yahova acimukumbira kuti amuthandize kucoka m’kawokomo kuti akasamalire mkazace na kucita basa la kupalizira. Tsono pomwe padapita sumana ziwiri, iye adawona kuti Yahova alibe kutawira mpembo wace thangwe rakuti iye alibe kucosedwa m’kawokomo. Ndipopa iye adayamba kupemba kwa Yahova kuti: “Yahova, ndaphata minyendo, ndilatizeni bzomwe imwepo mun’funa kuti inepano ndicite.” Patsogolo pace, iye adayamba kukumbukira bzomwe abale winango akhagumana nabzo m’kawokomo. Azinji akhacita thupo na azikazawo pabodzi na wana wawo. M’bale Poetzinger adadzapemba pomwe kwa Yahova kuti: “Yahova, ndikutenda thangwe ra kundipasa basa lipsa. Ndithandizeni kuti ndilimbise abale wanguwa.” Iye adamala magole 9 akucita basa limweri m’kawokomo!

8. N’ciyani comwe tin’funika kumbakumbukira kwene-kwene pomwe tikucita mpembo?

⁸ Ifepano tin’funika kukumbukira kuti Yahova ana cakulinga ndipo cakulingaco an’dzacikwanirisa pa nthawe yace. Cinango comwe Iye akufuna kudzacita ndico kumalisa mabvuto yomwe yambacitisa kuti wanthu abonere ntsiku zino, ninga malengwa ya pantsi, matenda na infa. Yahova an’dzacita bzimwebzi mwakuphatisa basa Umambo bwace. (Daniyeli 2:44; Apokalipse 21:3, 4) Pomwe nthawe imweyi ikanati kufika, iye walekerera kuti Sathani atonge dzikoli.b (Juwau 12:31; Apokalipse 12:9) Yahova angadamalisa mabvuto yanango yomwe wanthu akugumana nayo ntsiku zino bzingadawoneka ninga kuti utongi bwa Sathani bwabwino. Ndipopa pomwe tikudikhirira kuti Yahova adzacite bzomwe adalewa, bzin’funa lini kulewa kuti iye an’dzandotilekerera tenepoyo ne kutithandiza, koma an’dzatithandiza. Bwerani tiwone njira zinango za momwe Yahova ambatithandizira.

MOMWE YAHOVA AMBATAWIRIRA MIPEMPO YATHU NTSIKU ZINO

9. Kodi Yahova ambatithandiza tani tikakhala tin’funa kucita bzakusankhula? Fotokozani.

⁹ Iye ambatipasa nzeru. Yahova adalewa kuti an’dzatipasa nzeru kuti tikwanise kumbacita bzakusankhula bzabwino. Pana bzinthu bzinango bzakufunika kwene-kwene bzomwe timbafunika kucita bzomwe bzimbafunikira nzeru zakucokera kwa Mulungu, ninga kusankhula kupita m’banja ayai kukhala wakusaya kulowodwa. (Tiyago 1:5) Onani bzomwe bzidacitikira mpfumakazi yakusaya kulowodwa yakucemeredwa Maria.c Mpfumakaziyi ikhakomedwa kwene-kwene kucita upainiya bwakukhazikika, tsono patsogolo pace idadzadziwana na m’bale. Iyo idati: “Pomwe uxamwali bwathu budakula, ifepano tidayamba kufunana. Ndikhafuna kuti Yahova andipase nzeru, tsono ndikhadziwambo kuti Yahova angadandicitira lini cakusankhula.” Mpfumakaziyi idacita mpembo ndipo idawona kuti Yahova adaithandiza kukhala na nzeru. Kodi bzimwebzi bzidacitika tani? Iyo idafufudza m’mabukhu yathu ndipo idagumana nkhani zomwe zidaithandiza kugumana mitawiro ya mibvunzo yomwe ikhanayo. Ndipo iyo idaphatisambo basa malango yomwe idapasidwa na mai wace. Malangoyo yadathandiza Maria kuti akwanise kuwona momwe akhabvera ndipo bzimwebzi bzidamucitisa kuti akwanise kusankhula bzinthu mwanzeru.

10. Mwakubverana na Afilipi 4:13, n’ciyani comwe Yahova an’dzacita kuti athandize atumiki wace? Fotokozani. (Onani cithunzi-thunzi.)

¹⁰ Iye ambatipasa mphanvu kuti tipirire. Ninga momwe adacitira na mpostolo Paulo, Yahova ambatipasambo mphanvu kuti tipirire pomwe tikugumana na mabvuto. (Werengani Afilipi 4:13.) Onani momwe Yahova adathandizira m’bale munango wakucemeredwa Benjamin kupirira mabvuto yomwe akhagumana nayo. Benjamin pabodzi na famidya yace akhakhala ku mbuto inango yakuthawira nkhondo ku dziko linango la ku África. Benjamin adalewa kuti: “Ndikhapemba nthawe zentse kwa Yahova ndicimukumbira kuti andipase mphanvu kuti ndicite bzinthu bzomwe iye ambakomedwa nabzo. Yahova adatawira mipembo yangu mwa kundicitisa kukhala na mtendere wa mu mtima, kundicitisa kukhala wakukhwimika kuti ndipalizire na kundipasa mabukhu yakusiyana-siyana yomwe yakhandithandiza kukhala wakulimba mwauzimu.” Iye adapitiriza kulewa kuti: “Kuwerenga nkhani za abale wakusiyana-siyana na kuwona momwe Yahova akhawathandizira kuti apirire, bzidandilimbisa kuti ndipitirizembo kukhala wakukhulupirika kwa iye.”

11-12. Kodi Yahova angaphatise tani basa abale wathu wacikristau kuti atawire mipembo yathu? (Onani cithunzi-thunzi.)

¹¹ Iye ambaphatisa basa abale wathu wacikristau. Usiku bwakumalizira pomwe akhanati kuphedwa, Jezu adapemba kwa Yahova na mtima wentse. Iye adapemba kwa Yahova kuti acitise kuti wanthu aleke kumuwona ninga munthu wakuipa. Tsono Yahova alibe kucita bzimwebzi, iye adathandiza Jezu mwa kutumiza anjo m’bodzi kuti adzamulimbikise. (Luka 22:42, 43) Yahova angatithandizembo mu njira ibodzi-bodziyi, iye angaphatise basa abale na mpfumakazi omwe angatiligariri ayai kubwera kudzatiwona ku mui kwathu. Tentsenefe tin’funika kumbanyang’ana mipata kuti timbalewe “mafala yabwino” kuna abale wathu wacikristau. — Mimwani 12:25.

¹² Onani bzomwe bzidacitikira mpfumakazi inango yakucemeredwa Miriam. Pomwe padapita sumana zing’ono-ng’ono kucokera pomwe bayace adasaika, Miriam akhali yekha pa mui ndipo iye akhadasunama kwene-kwene. Iye akhalira kwene-kwene ndipo akhafuna munthu kuti alalewe naye. Iye adati: “Ndikhalibe mphanvu ya kuligariri munthu ali-wentse, koma ndidapemba kwa Yahova. Pomwe ndikhapitiriza kulirako, foni yangu idayamba kucemera. Akhali mkulu wa gwere omwe akhali xamwali wangu.” Miriam adatsangalazidwa na mkulu wa gwereyo pabodzi na mkazi wace. Iye adawona kuti ni Yahova omwe adacitisa kuti m’bale ule amuligariri.

13. Fotokozani bza nkhani yomwe ikulatiza kuti Yahova angaphatise basa wanthu omwe ambamunamata lini kuti atawire mipembo yathu.

¹³ Iye angaphatise basa wanthu omwe ambamunamata lini kuti atithandize. (Mimwani 21:1) Nthawe zinango, Yahova ambatawira mipembo ya atumiki wace mwakuphatisa basa wanthu omwe ambamunamata lini. Kumbukirani kuti iye adaphatisa basa Mambo Artaxerxe kuti atawire mkumbiro wa Nehemiya wakuti abwerere ku Jeruzalemu kuti akathandize pa basa la kumanga pomwe mzinda. (Nehemiya 2:3-6) Ntsiku zino, Yahova angacitembo bzibodzi-bodzibzi. Iye angaphatise basa wanthu omwe ambamunamata lini kuti atithandize tikakhala tikufuna thandizo.

14. Kodi n’ciyani comwe cakudekerani pa nkhani ya Soo Hing? (Onani cithunzi-thunzi.)

¹⁴ Mpfumakazi yakucemeredwa Soo Hing idawona kuti Yahova adaithandiza mwakuphatisa basa dotolo. Mwana wace akhaduwala kwene-kwene. Pomwe mwana waceyo adacita asidente, mpfumakaziyo na bayace adasiya kuphata basa kuti athandize mwana wawoyo. Bzimwebzi bzidacitisa kuti iwo asaye kobiri. Mpfumakazi Soo Hing idawona kuti in’kwanisa lini kupirira mabvuto ninga yamweya. Mpfumakaziyi idacita mpembo kwa Yahova ndipo idamukumbira kuti amuthandize. Dotolo omwe adacita naye konsulta adafuna kwene-kwene kuwathandiza. Bzimwebzi bzidacitisa kuti iwo akwanise kutambira thandizo la boma na kupasidwambo mbuto yakukhala. Patsogolo pace, mpfumakazi Soo Hing idalewa kuti: “Tidawona kuti Yahova akhatithandiza pa nkhani imweyi. kulewa cadidi iye ni ‘Mbveseri wa mpembo.’” — Salimo 65:2.

TIMBAFUNIKA CIKHULUPIRO KUTI TIBVUME MITAWIRO YOMWE YAHOVA AMBATIPASA

15. N’ciyani comwe cidathandiza mpfumakazi inango kuzindikira kuti mipembo yace ikhatawiridwa?

¹⁵ Mipembo yathu imbatawiridwa lini mwakudabwisa. Koma Yahova ambatipasa mitawiro yomwe imbatithandiza kuti tipitirize kukhala wakukhulupirika kwa iye. Ndipopa mbakhalani tceru kuti muwone momwe Yahova akutawirira mipembo yanu. Mpfumakazi yakucemeredwa Yoko ikhawona ninga kuti Yahova akhatawira lini mipembo yace. Tsono, iyo idayamba kumbanemba bzinthu bzomwe ikhakumbira Yahovayo. Pomwe padapita nthawe, iyo idatenga kaderno wace kuti iwone penu Yahova akhadatawira mipembo yaceyo. Iyo idakwanisa kuwona kuti Yahova akhadatawira mipembo yace mizinji napo ire yomwe iye akhadaiyebwa. Bzimwebzi bzin’funa kulewa kuti ifepano tin’funika kumbakhala na nthawe yakukumbukira momwe Yahova akutawirira mipembo yathu. — Salimo 66:19, 20.

16. Kodi tingalatize tani cikhulupiro pa nkhani ya mpembo? (Ahebereu 11:6)

¹⁶ Ifepano timbalatiza kuti tina cikhulupiro sikuti mwa kundopemba kwa Yahova koma mwakubvuma mitawiro iri-yentse yomwe iye angatipase napo icitike mu njira yomwe ifepano tikhaidikhirira lini. (Werengani Ahebereu 11:6.) Onani bzomwe bzidacitikira m’bale munango wakucemeredwa Mike na mkazace Chrissy. Iwo akhafuna kuyenda kukatumikira ku Beteli. Mike adalewa kuti: “Ifepano tidamala magole mazinji tikuprenxeri petição na kupemba kwa Yahova kuti bzimwebzi bzikwanisike, tsono tiribe kucemeredwa.” Mike na Chrissy adapitiriza kukhulupira kuti Yahova akhadziwa momwe angadawaphatisira basa. Iwo adapitiriza kucita upainiya bwakukhazikika, kuthandizira komwe kukhafunikira thandizo na kuthandiza mabasa yakumanga-manga. Tsapano iwo mbaanyakunyang’anira dera. Mike adalewa kuti: “Yahova ambatawira lini mipembo ninga momwe ifepano tikhafunira nthawe zentse, koma iye ambatawira mipembo yathu mu njira yabwino kwene-kwene kuposa momwe ifepano tikhaidikhirira.”

17-18. Mwakubverana na Salimo 86:6, 7, kodi n’ciyani comwe tingatsimikizire?

¹⁷ Werengani Salimo 86:6, 7. Nyakunemba salimo Davide akhakhulupira kuti Yahova akhabva ndipo akhatawira mipembo yace. Imwepo mungakhalembo na cikhulupiro cibodzi-bodzici. Bziratizo bzomwe tawona mu nkhani ino bzikutitsimikizira kuti Yahova angatipase nzeru na mphanvu kuti tikwanise kupirira. Iye angaphatise basa abale wathu wacikristau ayai wanthu omwe ambamunamata lini kuti atithandize.

¹⁸ Napo kuti Yahova angatawire lini mipembo yathu ninga momwe ifepano tikufunira, koma timbadziwa kuti iye an’dzatawira mipembo yathuyo. Iye an’dzatipasa bzomwe tikufunikira pa nthawe yomwe ifepano tikufunikira bzinthu bzimwebzo. Ndipopa pitirizani kupemba mwa cikhulupiro mucitsimikizira kuti Yahova an’dzakuthandizani ndipo mu dziko lipsa iye “[an’dzapereka] cakukhumba ca bzamoyo bzentse.” — Salimo 145:16.