NKHANI YAKUPFUNZA 20
Bzomwe Tingacite Kuti Mipembo Yathu Ikhale Yakuthemera
“Mukhuthulireni bza mu mtima mwanu.” — SALIMO 62:8.
NYIMBO 45 Bzakukumbuka bza Mtima Wangu
BZOMWE TIN’PFUNZAa
Tingapembe kwa Yahova ticimbamukumbira kuti atitsogolere pa moyo wathu (Onani ndime 1)
1. N’ciyani comwe Yahova ambafuna kuti atumiki wace acite? (Onani cithunzi-thunzi.)
N’KUPONI komwe tingagumane mtsangalazo na malango yomwe yangatithandize pa moyo wathu? Ifepano tikudziwa mtawiro wa mbvunzo umweyu. Tingagumane mtsangalazo na malango mwa kupemba kwa Yahova Mulungu. Iye ambafuna kuti timbapembe kwa iye “nthawe zentse.” (1 Atesalonika 5:17) Tingapembe kwa iye mwakutsudzuka ticimukumbira malango yomwe yangatithandize pa moyo wathu. (Mimwani 3:5, 6) Yahova ambatipasa lini malire pakucita mipembo yathu kwa iye thangwe ngwakudeka mtima.
2. Kodi tin’cezerana ciyani mu nkhani ino?
2 Timbatenda mphaso ya mpembo. Pakuti tina bzinthu bzizinji bzakucita, nthawe zinango tingasaye nthawe ya kupemba. Ndipopa tin’funika kucita ciri-centse kuti timbakhale na nthawe ya kupemba. Cakukondwesa n’cakuti Bibliya limbatithandiza kudziwa momwe tingagumanire nthawe yakuti timbapembe. Mu nkhani ino, tin’pfunza momwe tingakhalire na nthawe ya kumbacita mipembo mwakutewezera Jezu. Tiniwonambo bzomwe tingacite kuti mipembo yathu ikhale yakubveka bwino mwa kupfunza bzinthu bzixanu bzakufunika kwene-kwene.
JEZU ADAPAMBULA NTHAWE YAKUPEMBA
3. N’ciyani comwe Jezu akhadziwa pa nkhani ya mpembo?
3 Jezu akhadziwa kuti Yahova ambawona kuti mipembo yathu njakufunika kwene-kwene kwa iye. Pomwe iye akhanati kubwera pa dziko la pantsi akhawona Baba wace akutawira mipembo ya amuna na akazi wakukhulupirika. Mwa ciratizo, Jezu akhali ku mbali kwa Baba wace pomwe Baba wacewo akhatawira mipembo ya wanthu wakukhulupirika ninga Ana, Davide, Eliya na winango. (1 Samuyeli 1:10, 11, 20; 1 Amambo 19:4-6; Salimo 32:5) Ndipopa, Jezu adapfunzisa ateweri wace kuti ambapembe nthawe zentse na citsimikizo cakuti Mulungu ambabva mipembo! — Mateu 7:7-11.
4. Kodi tikupfunza ciyani na mipembo ya Jezu?
4 Mipembo yomwe Jezu akhacita kwa Yahova ni ciratizo kwa anyakupfunza wace. Mkati mwa utumiki bwace, Jezu akhapemba nthawe zentse. Iye akhafunika kumbapambula nthawe yakuti acite mpembo thangwe akhakhala wakutanganidwa na kupfunzisa wanthu. (Marko 6:31, 45, 46) Iye akhabesera kuti apembe. (Marko 1:35) Nthawe inango, iye adapemba usiku bwentse pa cakucitika cakufunika kwene-kwene. (Luka 6:12, 13) Usiku bwakumalizira bwa moyo wace, Jezu adapemba kazinji-kentse thangwe akhafuna kucita cinthu cakufunika kwene-kwene na cakunesa. — Mateu 26:39, 42, 44.
5. Kodi tingatewezere tani Jezu pakucita mipembo yathu?
5 Bzomwe Jezu adacita bzikutipfunzisa kuti napo tikhale wakutanganidwa tin’funika kupambula nthawe ya kupemba. Pinango tingambamuke macibese-bese kuti tipembe ayai tingambapembe usiku pomwe tikanati kugona. Tikacita bzimwebzi, timbalatiza kuti timbatenda Yahova thangwe ra kutipasa mphaso imweyi yakufunika kwene-kwene. Mpfumakazi yakucemeredwa Lynne ikukumbukira momwe idabvera pomwe idadziwa kuti ina mwayi wakupemba kwa Mulungu. Mpfumakaziyo idati: “Pomwe inepano ndidadziwa kuti ningacite mpembo kwa Yahova nthawe iri-yentse, ndidayamba kumbamuwona ninga xamwali wangu wapamtima ndipo bzimwebzi bzidandithandiza kuti nimbacite mipembo yakubveka bwino.” Mwakusaya kupenukira, tentsenefe timbabvambo bzibodzi-bodzibzi. Mbatiwoneni bzinthu bzixanu bzomwe tingambalewe m’mipembo yathu.
BZINTHU BZIXANU BZAKUFUNIKA KWENE-KWENE PAKUPEMBA
6. Ninga momwe Apokalipse 4:10, 11 ambalewera, kodi Yahova ngwakuthemera kupasidwa ciyani?
6 Tumbizani Yahova. M’masomphenya yakudabwisa, mpostolo Juwau adawona akulu 24 kudzulu akutumbiza Yahova. Iwo akhatumbiza Mulungu thangwe ra kuzindikira kuti iye ngwakuthemera kupasidwa “ulemerero, ulemu na mphanvu.” (Werengani Apokalipse 4:10, 11.) Anjo wakukhulupirika ana mathangwe yakubveka yakulemekeza na kutumbiza Yahova. Iwo ali kudzulu pabodzi na Yahova ndipo ambamudziwa bwino. Iwo ambawona makhalidwe yace yomwe yambawonekera pa bzomwe iye ambacita. Pakuwona mabasa makulu yomwe Yahova ambacita, iwo ambapereka ulemu kwa iye. — Djobi 38:4-7.
7. Thangwe ranyi ifepano tin’funika kutumbiza Yahova?
7 Mpsibodzi-bodzimbo na ifepano. Pomwe tikucita mipembo yathu kwa Yahova, tin’funika kumbalewa mafala yomwe yambalatiza kuti timbamufuna na kumutenda. Pomwe tikuwerenga na kupfunza Bibliya, tin’funika kumbawona makhalidwe ya Yahova yomwe yambaticitisa kuti timufune. (Djobi 37:23; Aroma 11:33) Ndipo mungamuuze Yahova bza makhalidwe yabwino yomwe mwawona. Tingatumbize Yahova thangwe rakuti ambatikhotcerera na kukhotcererambo abale wathu wacikristau. Iye nthawe zentse ambatisamalira na kutikhotcerera. — 1 Samuyeli 1:27; 2:1, 2.
8. Kodi tingamutende Yahova pa bzinthu bziponi? (1 Atesalonika 5:18)
8 Mbatendani Yahova. Tina mathangwe mazinji yakutendera Yahova. (Werengani 1 Atesalonika 5:18.) Tingatende Yahova pa cinthu ciri-centse comwe tinaco thangwe mphaso iri-yentse yabwino na yakulungama imbacokera kwa iye. (Tiyago 1:17) Tingamutende thangwe ra bzinthu bzabwino bzomwe adakonza pa dzikoli. Tingamutendembo thangwe ra kutipasa moyo, thangwe ra kutipasa adzinza wathu, axamwali wathu na cidikhiro cathu. Ndipo tingamutendembo Yahova thangwe ra kutithandiza kuti tikhale naye pa uxamwali bwakulimba.
9. Thangwe ranyi nthawe zinango bzingakhale bzakunesa kutenda Yahova?
9 Pinango tingafunikire nyongo kuti tikwanise kuwona bzinthu bzomwe bzingaticitise kumutenda Yahova. Tikukhala mu dziko lomwe wanthu ambatenda lini. Wanthu ambandokumbukira bzomwe iwo akufuna basi, ndipo ambatenda lini bzinthu bzomwe iwo anabzo. Tikatewezera makhalidwe yamweya tingambandocite mipembo ya kundombakumbira basi. Kuti bzimwebzi bzireke kucitika, tin’funika kupitiriza kutenda Yahova pa bzentse bzomwe iye ambaticitira. — Luka 6:45.
Kutenda Yahova pa bzinthu bzomwe ambaticitira kun’dzatithandiza kuti tipirire (Onani ndime 10)
10. Kodi kutenda kudathandiza tani mpfumakazi inango kupirira? (Onani cithunzi-thunzi.)
10 Kutenda kungatithandize kuti tikhale wakulimba pa mabvuto. Onani bzomwe bzidacitikira Kyung-sook mu Ntsanza ya Mulindiri ya 15 Janeiro, 2015 (Chichewa). Iye adagumanidwa na matenda ya kankro ya m’masapi. Iye adati: “Mabvuto ya thanzi yamweya yadakhala ya mphanvu kwene-kwene. Ndikhabzibva kuti ndaluza bzentse, ndipo ndikhabva mantha.” N’ciyani comwe cidamuthandiza kulimbika? Iye adalewa kuti nthawe zentse pomwe akanati kugona akhapemba kwa Yahova acifotokoza nfundo zixanu zakufunika zakulatiza kutenda. Bzimwebzi bzidamuderekhesa ndipo adapitiriza kulatiza lufoyi kwa Yahova. Iye adawona momwe Yahova akhathandizira atumiki wace wakukhulupirika pomwe akhagumana na mabvuto ndipo iye adazindikira kuti tikakhala wakukhulupirika kwa Yahova timbatambira bzisimbo bzizinji kuposa mabvuto. Ninga Kyung-sook, tina mathangwe yakutendera Yahova napo tikagumana na mabvuto. Tikalatiza kutenda kwathu mwakucita mpembo, bzin’dzatithandiza kuti tipirire ticikhala wakukondwa.
11. Thangwe ranyi anyakupfunza wa Jezu akhafunika kukhwimika pomwe Jezuyo adabwerera kudzulu?
11 Kumbirani Yahova kuti akuthandizeni kukhala wakukhwimika mu upalizi. Pomwe Jezu akhanati kubwerera kudzulu, iye adauza anyakupfunza wace kuti apalizire “ku Jeruzalemu, ku Djudeya kwentse na ku Samariya mpaka mbuto zakutali za pa dziko la pantsi.” (Mabasa 1:8; Luka 24:46-48) Patsogolo pace, akulu-akulu wacidjuda adamanga mpostolo Pedru na Juwau aciwayendesa ku nyumba ya mphala ya Sinedriyo ndipo adawagopswa aciwauza kuti asiye kupalizira. (Mabasa 4:18, 21) Kodi Pedru na Juwau adacita ciyani?
12. Mwakubverana na Mabasa 4:29, 31, n’ciyani comwe anyakupfunza wa Jezu adacita?
12 Pakutawira akulu-akulu wacidjudawo, Pedru na Juwau adalewa kuti: “Tongani mwekha penu mpsakuthemera pamaso pa Mulungu kubvera imwepo, kuposa kubvera Mulunguyo. Tsono ifepano, tingaleke lini kulewalewa bzinthu bzomwe tidawona na kubva.” (Mabasa 4:19, 20) Pomwe Pedru na Juwau adatsudzulidwa, anyakupfunza anango adapemba kwa Yahova thangwe akhafuna kucita kufuna kwace. Iwo adapemba kuti: “Bvumani kuti atumiki wanu apitirize kulewalewa mafala yanu mwakukhwimika.” Yahova adatawira mpembo wawoyo. — Werengani Mabasa 4:29, 31.
13. Kodi tikupfunza ciyani na bzomwe Jin-hyuk adacita?
13 Tingatewezere anyakupfunza wa Jezu mwa kupitiriza kupalizira napo tikauzidwa na wamphanvu za umangi kuti tisiye kupalizirako. Mbatiwoneni bzomwe bzidacitikira Jin-hyuk, omwe akhadamangidwa thangwe ra kulamba kupitira nkhani za ndale. Pomwe akhali m’kawoko, iye adapasidwa basa lakuti ambawonerere anyam’kawoko omwe akhali kwawokha. Tsono iye adauzidwa kuti ambalewelewe bzinthu bzomwe iwo angadamuuza basi, ndipo akhafunikira lini kulalewa na anyam’kawokowo nkhani iri-yentse ya m’Bibliya. Iye adapemba kwa Yahova kuti apitirize kukhala wakukhwimika acipitiriza kupalizira akagumana mpata. (Mabasa 5:29) Iye adalewa kuti: “Yahova adatawira mpembo wangu ndipo adandithandiza kukhala wakukhwimika acindipasa nzeru yakuti nimbacitise pfunziro la Bibliya anzangu wa m’kawokomo tumphindi twakukwana tuxanu. Ndipo usiku ndikhambanemba makarta ndicimbapasa anzanguwo kumacibese kwace.” Ifepanombo tingakhale na citsimikizo cakuti Yahova an’dzatithandiza kucita basa la kupalizira. Ndipo ninga Jin-hyuk, tingapembe kwa Yahova kuti atithandize kukhala wakukhwimika na kutipasa nzeru.
14. N’ciyani comwe cingatithandize tikakhala tikugumana na mabvuto? (Salimo 37:3, 5)
14 Kumbirani Yahova kuti akuthandizeni kupirira mabvuto yomwe mukugumana nayo. Tentsenefe timbabonera thangwe ra matenda na mabvuto manango ninga kufedwa wanthu omwe timbawafuna, mabvuto ya m’banja na kuzunzidwa. Ndipo bzinthu ninga malengwa ya pantsi na nkhondo bzimbacitisa kuti nthawe zinango bzikhale bzakunesa kupirira. Muuzeni Yahova momwe mukubvera. Muuzenimbo bza mabvuto yanu ninga momwe mumbafotokozera xamwali wanu wapamtima. Ndipo khalani na citsimikizo centse cakuti Yahova “an’dzakuthandizani.” — Werengani Salimo 37:3, 5.
15. Kodi mpembo ungatithandize tani “kupirira mabvuto”? Fotokozani.
15 Kupitiriza kucita mipembo kun’dzatithandiza ‘kupirira pomwe tikugumana na mabvuto.’ (Aroma 12:12) Yahova akudziwa kuti atumiki wace akugumana na mabvuto yakusiyana-siyana. Ndipopa, “iye an’dzabva kukuwa kwawo kwakukumbira thandizo.” (Salimo 145:18, 19) Mpfumakazi inango ya magole 29 yomwe ikucita upainiya yakucemeredwa Kristie idawona kuti bzimwebzi bzacadidi. Iye adayamba kugumana na mabvuto ya thanzi. Bzimwebzi bzidamucitisa kuti iye ayambe kukumbuka bzinthu bzizinji. Patsogolo pace, iye adazindikira kuti mai wace akhana matenda yomwe angadafa nayo. Kristie adati: “Ndikhambapemba kwa Yahova kuti andithandize kuti ndikhale wakukhwimika ntsiku iri-yentse. Ndidayamba kumbacita bzinthu bzauzimu ninga kuyenda ku mitsonkhano na kucita pfunziro la pandekha.” Iye adalewa pomwe kuti: “Mpembo udandithandiza kwene-kwene kupirira pa nthawe yakunesayi. Ndikhadziwa kuti Yahova akhanande ndipo kudziwa bzimwebzi kukhandicitisa kuti ndibzibve bwino. Napo kuti bvuto la thanzi langu liribe kumaliratu, Yahova adatawira mpembo wangu mwa kundipasa mtendere na mtsangalazo.” Tileke kuyebwa kuti “Yahova ambadziwa momwe angapulumusire wanthu wakukhulupirika pa mabvuto.” — 2 Pedru 2:9.
Kuti mupirire mayezo, (1) mbakumbirani Yahova kuti akuthandizeni, (2) mbacitani bzinthu mwakubverana na mipembo yanu na (3) mbalimbisani uxamwali bwanu na Yahova (Onani ndime 16-17)
16. Thangwe ranyi timbafunikira thandizo la Yahova kuti tipirire mayezo?
16 Kumbirani Yahova kuti akuthandizeni kupirira mayezo. Pakuti ndife wakuperewera, nthawe zentse timbayezedwa kuti ticite cinthu cakuipa. Sathani ambacita ciri-centse kuti ifepano titazire kupirira. Njira ibodzi yomwe iye ambacitira bzimwebzi ndiyo kuticitisa kuti timbafune kusenzeka na bzinthu bzomwe bzingaticitise kucita bzinthu bzakuipa. Bzinthu bzimwebzi bzingaticitise kuti tikhale na nzeru zakuipa ndipo nzeru zakuipazo zingacitise munthu kucita pikado ikulu. — Marko 7:21-23; Tiyago 1:14, 15.
17. Kodi mungacite tani bzinthu mwakubverana na mipembo yanu kuti mutcenkhe kuyezedwa? (Onani cithunzi-thunzi.)
17 Tin’funikira thandizo la Yahova kuti tikwanise kupirira mayezo yomwe yangaticitise kufuna kucita cinthu cakuipa. Pomwe Jezu akhacita mpembo wakuyezezera adalatiza kufunika kwa kukumbira thandizo Yahova pomwe tikuyezedwa. Iye adati: “Lekani kulekerera kuti tiyezedwe, koma tipulumuseni kwa nyakuipayo.” (Mateu 6:13) Yahova an’funa kutithandiza kuti timbapirire mabvuto yathu, tsono tin’funika kumbamukumbira. Ndipo tin’funikambo kumbacita bzinthu mwakubverana na mipembo yathu. Tingacite bzomwe tingakwanise kuti timbatcenkhe kuwerenga ayai kutetekera bzinthu bzakuphonyeka bza mu dziko la Sathaniri. (Salimo 97:10) Tingakhale na makumbukidwe yakucena tikambawerenga Bibliya na kumbalipfunza ntsiku zentse. Kugumanika pa mitsonkhano na kumbacita mbali mu utumiki kun’dzatithandizambo kuti tikhale na makumbukidwe yabwino. Yahova akutiuza kuti an’dzatilekerera lini kuti tiyezedwe mpaka kufika pa kutazira kupirira. — 1 Akolinto 10:12, 13.
18. Pakulewa bza mpembo, n’ciyani comwe tentsenefe tin’funika kucita?
18 Tentsenefe tin’funika kumbapemba kwa Yahova kuti tipitirize kukhala wakukhulupirika pa nthawe zakunesa. Mbakhalani na nthawe ya kumbacita mpembo kucokera pantsi pa mtima. Yahova ambafuna kuti ‘timbamukhuthulire bza mu mtima mwathu’ mwa kumbapemba kwa iye. (Salimo 62:8) Mbatumbizani Yahova ndipo mbamutendani pa bzentse bzomwe iye ambacita. Mbamukumbirani kuti akuthandizeni kukhala wakukhwimika mu upalizi. Ndipo mbamukumbiranimbo kuti akuthandizeni kupirira mabvuto na mayezo yomwe mungakhale mukugumana nayo. Lekani kulekerera kuti cinthu ciri-centse ayai munthu ali-wentse akutaziseni kumbapemba kwa Yahova ntsiku zentse. Tsono, kodi Yahova ambatawira tani mipembo yathu? Tin’dzacezerana bza mbvunzo wakufunikayu mu nkhani yomwe ikubwerayi.
NYIMBO 42 Mpembo Wangu kwa Yahova
a Tikufuna kuti mipembo yathu ikhale ninga karta yomwe munthu ambatumizira xamwali wace wapamtima. Tsono, bzingakhale bzakunesa kukhala na nthawe ya kupemba. Ndipo bzingakhalembo bzakunesa kudziwa bzinthu bzomwe tingalewe mu mpembo. Mu nkhani ino, tin’cezerana nfundo ziwiri zimwezi zomwe n’zakufunika kwene-kwene.