Kuthandiza Wanthu Winango Kumbabweresa Bzisimbo Bzizinji

Pai wangu akhali akulu wa gereja ku Canadá, ndipo sumana iri-yentse inepano na m’bale wangu wacikazi tikhambayenda ku xikola ya gerejayo pa dumingu macibese, ndipo zikakwana 11 ora tikhambayenda kukanamata nawo pabodzi. Kumaulo tikhambayenda na mamã ku Nyumba ya Umambo. Bzimwebzi bzikhatithandiza kuti tikwanise kusiyanisa magereja mawiriya.

Mamã adafotokozerambo axamwali wawo, Bob na Marion Hutcheson bzomwe akhapfunzabzo, ndipo iwo adabvumambo kupfunza cadidi. Mu 1958, banja la a Hutcheson lidanditenga pabodzi na wana wawo atatu ticiyenda ku mtsonkhano omwe udamala ntsiku 8 omwe udacitikira mu mzinda wa Nova Iorque. Tsapano nimbakwanisa kuwona kuti bzikhali lini bzakupusa kwa iwo kunditenda aciyenda nande ku mtsonkhano ule. Koma cimweci cidakhala cakucitika cakufunika kwene-kwene pa moyo wangu.

ABALE NA MPFUMAKAZI ADANDITHANDIZA KUTI NDICITE BZIZINJI PA KUTUMIKIRA YAHOVA

Pomwe inepano ndikhali tswaka, pai wangu akhafuwa bzifuwo bzizinji kwene-kwene, ndipo inepano ndikhakomedwa kusamalira bzifuwobzo. Bzimwebzi bzidandicitisa kuti ndifune kupfunza kuti ndidzakhale munthu omwe ambasamalira bzirombo. Mai wangu adaceza nkhaniyi na mkulu munango wa gwere. Mwakudeka mtima, iye adandikumbusa kuti tikukhala mu ntsiku zakumalizira, ndipo kupfunza ku universidade magole mazinji kungadacitisa kuti uxamwali bwangu na Yahova buleke kukhala bwakulimba. (2 Timotio 3:1) Ndipopa, inepano ndidawona kuti bzikhali bwino kuleka kuyenda ku universidade.

Tsono ndikhabzibvunza kuti ningadacitanyi ndikamaliza kupfunza. Napo kuti ndikhambapalizira sumana iri-yentse, ndikhambakomedwa lini na basalo thangwe ndikhawona kuti ningadakwanisa lini kukhala mpainiya. Pakuti pai wangu na tiu wangu akhali lini Mboni za Yahova, iwo akhandilimbikisa kuti ndikaphate basa pa empreza inango ku Toronto. Tiu wangu akhana mpando pa empreza imweyo, ndipopa ndidabvuma kuphata basalo.

Ku Toronto, ndikhamala nthawe izinji ndikuphata basa na wanthu omwe akhali lini Mboni za Yahova, ndipo bzimwebzi bzikhacitisa kuti nimbaleke kugumanika pa mitsonkhano nthawe zentse na kuyenda kukapalizira. Pakuyamba, ndikhakhala na yavu wangu, omwe akhali pai wa pai wangu. Iwo akhali lini Mboni ya Yahova. Tsono pomwe iwo adasaika, ndidanyang’ana mbuto inango yakukhala.

Banja la Hutcheson, lomwe lidanditenga liciyenda nande ku mtsonkhano wa cigawo mu 1958 lire, likhali ninga abereki kwa inepano. Iwo adandiuza kuti ndikakhale ku mui kwawo ndipo adandithandiza kuyenda patsogolo mwauzimu. Inepano na mwana wawo, John, tidabatizidwa mu 1960. John adayamba kucita upainiya, ndipo adandilimbikisambo kuti ndicite bzizinji pa basa la kupalizira. Abale adakwanisa kuwona kuti ndikhadakhwima mwauzimu, ndipo adandiuza kuti nimbatsogolere mbali ya Bziperekeni mu Utumiki Bwakumunda.a

NDIDAGUMANA MWANZANGU WABWINO KWENE-KWENE NDIPO NDIDAYAMBA KUCITA UPAINIYA

Mu 1966, ndidalowola Randi Berge, omwe akhali mpainiya wakubzipereka kwene-kwene ndipo akhali wakukonzeka kukatumikira komwe kukhafunikira thandizo. Nyakunyang’anira dera wathu adatilimbikisa kuti tiyende kukathandizira gwere la ku Orillia, Ontario. Ndipopa ifepano tidafuluka ticiyenda kumweko.

Pomwe tidafika ku Orillia, ndidayambambo kucita upainiya. Kuwona momwe mkazangu akhakomedwera na basa la upainiyalo kudandicitisa kuti ndifunembo kukhala mpainiya! Pomwe ndidayamba kucita nyongo kuti ndikhale mpainiya wabwino, ndidayamba kumbaphatisa bwino basa Bibliya pakupfunzisa wanthu. Ndipo ndikhakomedwa kwene-kwene pomwe ndikhawona wanthu akubvesesa cadidi. Bzidakhala bzakudekeza kwene-kwene kuthandiza banja linango ku Orillia kucinja bzinthu pa moyo wawo acikhalambo atumiki wa Yahova.

KUPFUNZA CIREWEDWE CINANGO NA KUCINJA MOMWE TIKHAWONERA BZINTHU

Pomwe tikhali ku Toronto, ndidadziwana na m’bale Arnold MacNamara, omwe akhali m’bodzi mwa abale omwe akhatsogolera pa Beteli. Iye adandibvunza penu tingadafuna kukhala apainiya wakupambulika. Inepano ndidatawira kuti: “Inde, tin’funa! Tingabvume kuyenda kuli-kwentse, koma ku Quebec tingayende lini!” Ndikhana nzeru zakuipa ninga zomwe wanthu azinji wa ku Canadá akhanazo pakulewa bza cigawo ca Quebec, comwe wanthu wace akhalalewa Cifaransa. Pa nthawe imweyire, wanthu wa ku Quebec akhafuna kuti cigawo cawoco cimbabzitonge cokha.

M’bale Arnold adanditawira kuti: “Ku Quebec ndiko kokha komwe mthambi ikutumiza apainiya wakupambulika. Inepano ndidabvuma kuyenda. Ndikhadziwa kale kuti mkazangu, Randi, akhafuna kale kuyenda kukatumikira kumweko. Patsogolo pace, ndidadzazindikira kuti cimweci cidakhala cakusankhula cabwino comwe tidacita pa moyo wathu!

Pambuyo pakumala sumana zixanu tikupfunza Cifaransa, inepano na Randi pabodzi na banja linango tidayenda ku Rimouski, komwe kukhali mtantho wa makilometro 540 ku phiri kwa Montreal. Tikhafunikira kupfunza bzinthu bzizinji. Bzimwebzi bzidatsimikizirika pomwe ndidawerenga mwakuphonyeka cidziwiso m’gwere. Ndidalewa kuti pa mtsonkhano wa cigawo omwe tingadakhala nawo, tingadadzakhala na maavestrus, m’mbuto mwakulewa kuti tingadadzakhala na “abale wakucokera ku Áustria.”

Ku Rimouski, tidadzakhala na mpfumakazi zinai pabodzi na banja la a Huberdeau na wana wawo awiri wacikazi. Banja la a Huberdeau lidalugari nyumba ikulu ndipo apainiya omwe akhakhalambo m’mwemo akhathandizira kupagali nyumbayo. Nyumbayo tidaicemera kuti Nyumba Icena thangwe rakuti kutsogolo kwace ikhali icena ndipo ikhana pilare zicena. Tingalewe kuti tikhalipo wanthu 12 ayai 14. Ifepano tikhali apainiya wakupambulika ndipo tikhambayenda kukapalizira kumacibese, kumidiya na usiku. Ndipo tikhatenda kwene-kwene thangwe nthawe zentse tikhakhala na wanthu omwe akhatithandiza kucita basali, napo pa nthawe yakudjedjera usiku.

Tikhabverana kwene-kwene na apainiya anzathu wale ndipo tikhakhala ninga kuti ndife wa m’banja libodzi. Nthawe zinango tikhambawotha moto pabodzi, kuceza na kumbaphikira pabodzi. M’bale m’bodzi akhadziwa kuimba, ndipopa sabudu usiku tikhambaimba na kubzina.

Wanthu azinji wa ku Rimouski akhafunisisa kupfunza Bibliya! Mkati mwa magole maxanu tidakomedwa kwene-kwene kuwona anyakupfunza wa Bibliya akuyenda patsogolo mwauzimu acibatizidwa. Gwere lidakula mpaka kufika apalizi 35.

Ku Quebec, ifepano tidapfunzisidwa momwe tingakhalire apalizi wa Umambo wabwino. Ndipo tidakwanisa kuwona momwe Yahova akhatithandizira mu upalizi na kutipasa bzinthu bzomwe tikhafunikira pa moyo wathu. Tidayamba kufuna wanthu wa cirewedwe ca Cifaransa, kufuna cirewedweco na kufunambo cikhalidwe cawo. Bzimwebzi bzidatithandiza kuti timbafunembo wanthu wa bzikhalidwe bzinango. — 2 Akolinto 6:13.

Mwakusaya kudikhiririka mthambi idatikumbira kuti tiyende kukakhala ku kamzinda ka Tracadie, kumabvadzuwa kwa New Brunswick. Bzimwebzi bzikhali bzakunesa thangwe ndikhadapagali kale nyumba ya aluge ndipo ndikhana contrato yakuti nimbapfunzise pa xikola. Ndipo kuthimizira bzimwebzi, anyakupfunza wathu wa Bibliya akhadabatizidwa tsapanopa ndipo tikhamanga Nyumba ya Umambo.

Pomwe tikhanati kuyenda ku Tracadie, tidapemba sumana yentse thangwe iko kukhali kwakusiyana na ku Rimouski. Tsono tidawona kuti penu Yahova an’funa kuti tiyende kumweko, tikhafunikira kuyenda. Tidamuyeza Yahova ndipo tidakwanisa kuwona momwe iye adatithandizira kukunda mabvuto. (Malakiya 3:10) Pakuti mkazangu, Randi, akhali pa uxamwali bwakulimba na Yahova, iye akhali munthu wakubzipereka ndipo akhali wakupfatsa, ndipopa kucinja ticiyenda kukakhala ku mbuto inango kukhali lini kwakumunesa.

Mu gwere lipsa lomwe tidayendalo mukhana mkulu m’bodzi basi wa gwere. Iye akhacemeredwa Robert Ross. Iye na mkazace, Linda, akhacita upainiya kumweko. Tsono pomwe mwana wawo wakuyamba adabadwa, adawona kuti bzikhali bwino kukhaliratu kumweko. Napo kuti akhafunika kufuwa mwana wawo omwe akhali ng’ono, iwo adatilimbikisa kwene-kwene thangwe akhali wanthu omwe akhatambira bwino alendo ndipo akhacita nyongo pa basa la kupalizira.

BZISIMBO BZOMWE TIDAKHALA NABZO THANGWE RA KUTUMIKIRA KULI-KWENTSE KOMWE KUKHAFUNIKIRA THANDIZO

Pambuyo pa kutumikira magole mawiri ninga apainiya ku Tracadie, tidauzidwa kuti titumikire ninga anyakunyang’anira dera. Tidatumikira mu dera la cirewedwe ca Cingerezi magole 7. Patsogolo pace, tidauzidwa kuti tiyende kukatumikira ku dera la cirewedwe ca Cifaransa ku Quebec. Nyakunyang’anira cigawo wathu ku Quebec akhali Léonce Crépeault. Iye akhanditenda kwene-kwene thangwe ra nkhani zomwe ndikhafotokoza. Tsono patsogolo pace, iye nthawe zentse akhandibvunza kuti: “Kodi nkhani zomwe umbafotokozazi zingakhale tani zakuthandiza?”b Bzimwebzi bzidandithandiza kuti nimbafotokoze nkhani zangu mu njira yakusaya kunesa na yakubveseseka.

Utumiki bomwe nin’dzabuyebwa lini pa moyo wangu ni basa lomwe ndidapasidwa pa Mtsonkhano wa Madziko omwe udacitikira ku Montreal mu 1978, omwe ukhana msolo wakuti “Fé Vitoriosa.” Pa mtsonkhano umweyu ndidaphata basa la kuphika. Tikhadikhirira kuti pa mtsonkhanoyo pangadabwera wanthu wakukwana 80 000. Ndipo tikhafunikira kukonza cakudya ca wanthu wentsenewo mwakusiyana na momwe tikhacitira kale. Bzinthu bzentse bzikhali bzinovu: bzinthu bzomwe tikhaphatisira basa, bzakudya bzomwe tikhafunikira kuphika na kaphikidwe. Tikhana jalera zikulu-zikulu zakukwana 20, tsono nthawe zinango, zikhaphata lini bwino basa. Pa ntsiku yakuyamba tikhafunika lini kukaikha kamangu bzinthu mu mbuto yakucitira mtsonkhanomo, thangwe mukhana jogo. Ndipopa tidafunika kudikhirira mpaka pakati pa usiku. Tikhafunika kuyamba kuphika matabitcu pomwe kukhanati kucena. Napo kuti ndikhakhala wakuneta, ndidapfunza cinthu cakufunika kwene-kwene na momwe abale akhaphatira basa, kukhwima kwawo mwauzimu na kupfatsa kwawo. Bzimwebzi bzidacitisa kuti tikhale pa uxamwali bwakulimba mpaka lero. Mtsonkhano omwe udacitika ku Quebec ule udakhala wakudekeza kwene-kwene thangwe mu cigawo cimweci abale adazunzidwa kwene-kwene kuyambira mu 1940 mpaka mu 1960!

Ndidapfunza bzizinji na abale omwe akhanyang’anira madepatimenti manango pa mtsonkhano umweyu omwe udacitikira ku Montreal. Gole libodzi, m’bale David Splane, omwe tsapano akutumikira m’Bungwe Lakutonga, adanyang’anira mtsonkhano. Tsono pa mtsonkhano unango, pomwe ndadzauzidwa kuti ndicite ndinepano bzimwebzo, M’bale David Splane adabvuma bzimwebzo.

Pambuyo pa ifepano kutumikira ninga anyakunyang’anira dera magole 36, mu 2011, ndidauzidwa kuti ndikakhale mpfunzisi wa Xikola ya Akulu wa Gwere. Pa nthawe imweyi, inepano na Randi tidagona pa kama zakusiyana-siyana zakukwana 75 mkati mwa magole mawiri. Napo bziri tenepo, tikhakomedwa thangwe tikhagumana phindu. Sumana iri-yentse, akulu akhambatenda thangwe akhambawona kuti Bungwe Lakutonga likhafunisisa kuti iwo alimbise uxamwali bwawo na Yahova.

Patsogolo pace, ndidadzakhala mpfunzisi wa Xikola ya Apalizi wa Umambo. Anyakupfunza akhakhala wakuneta kwene-kwene thangwe akhamala maora 7 akupfunza ntsiku iri-yentse, akhamala maora matatu akupfunza ku mui usiku ndipo akhafunika kucita mbali zinai ayai zitatu zomwe akhapasidwa pa sumana. Inepano pabodzi na mpfunzisi munango tidalewa kuti iwo angadakwanisa lini kucita bzimwebzi mwakusaya kuthandizidwa na Yahova. Nin’dzapitiriza kukumbukira momwe kuthemba Yahova kukhawathandizira kucita bzinthu bzizinji kuposa momwe iwo akhadikhiririra.

KUTHANDIZA WINANGO KUMBABWERESA BZISIMBO BZIZINJI

Kufuna kuthandiza winango kudacitisa mai wangu kuthandiza anyakupfunza wawo wa Bibliya kuyenda patsogolo mwauzimu na kuthandizambo pai wangu kuti acinje momwe akhaciwonera cadidi. Pomwe mai wangu adasaika, pambuyo pa ntsiku zitatu pai wathu adatidabwisa kwene-kwene thangwe adabwera ku Nyumba ya Umambo acidzatetekera nkhani ya wentse, ndipo adamala magole 26 akutsonkhana. Napo kuti pai wangu alibe kubatizidwa, akulu adalewa kuti iwo akhambatsonkhana sumana zentse ndipo akhali wakuyamba kufika pa mitsonkhanoyo.

Bzomwe mai wangu adacita bzidathandiza wana wawo wentse. Mpfumakazi zangu zentse zitatu na azibayawo akutumikira Yahova mwakukhulupirika. M’bodzi akutumikira ku mthambi ya ku Portugal ndipo munango akutumikira ku mthambi ya ku Haiti.

Inepano na Randi tsapano tikutumikira ninga apainiya wakupambulika ku Hamilton, Ontario. Pomwe tikhali anyakunyang’anira dera, tikhakomedwa kwene-kwene kuyenda kukaperekeza abale ku maulendo yawo yakubwereza na ku mapfunziro yawo ya Bibliya. Tsono tsapano, tikufunisisa kuwonambo anyakupfunza wathu wa Bibliya akukula mwauzimu. Ndipo pomwe tikukhala pa uxamwali na abale na mpfumakazi mu gwere lipsa lomwe tiri, timbalimbikisidwa kwene-kwene kuwona momwe Yahova ambawathandizira pa nthawe zabwino na zakunesa.

Tikanyang’anisisa m’mbuyo, timbatenda kwene-kwene abale azinji omwe adatithandiza. Ifepano timbacitambo bzimwebzi ‘mwakulatiza thupo’ kwa abale wathu ticiwalimbikisa kuti acite bzizinji pa kutumikira Yahova. (2 Akolinto 7:6, 7) Pa banja linango, mkazi, mwana wacimuna na wacikazi akhacita upainiya. Tsono ndidabvunza pai wa pa muipo kuti ndidziwe penu adakumbukira kale bza kucitambo upainiya. Iye adanditawira kuti angadakwanisa lini thangwe rakuti akhaphata basa kuti athandize wanthu wa m’banja mwacemo kucita upainiya. Tsono ndidamubvunza kuti: “Kodi iwepo ungawathandize bwino kuposa Yahova?” Ndidamulimbikisa kuti akhale mpainiya. Pomwe padapita minyezi 6, iye adakhala mpainiya.

Inepano na Randi tin’dzapitiriza “kuuza m’badwo wa kutsogolo” bza “mabasa yakudabwisa” ya Yahova ndipo tikudikhirira kuti iwo adzakomedwembo na kutumikira Yahova ninga momwe ifepano tikukomedwera. — Salimo 71:17, 18.