NKHANI YAKUPFUNZA 39
NYIMBO 125 ‘An’kondwa ni Wanthu wa Nsisi’
Kupasa Kumbaticitisa Kuti Tikhale Wakukondwa
“Kupasa kumbabweresa cikondweso cikulu kuposa kutambira.” — MABASA 20:35.
CAKULINGA CA NKHANIYI
Tin’pfunza bzomwe tingacite kuti tikhale wakupasa ndipo tin’pfunzambo momwe kupasa kungatithandizire kukhala wakukondwa.
1-2. Kodi Yahova adatilenga na luso liponi, ndipo thangwe ranyi?
POMWE Yahova adalenga wanthu, iye adawalenga na luso lakuti ambakhale wakukondwa na kupasa kuposa kutambira. (Mabasa 20:35) Kodi bzimwebzi bzin’funa kulewa kuti timbakhala lini wakukondwa munthu akatipasa cinthu? Ne ndibzo lini. Tentsenefe timbakomedwa tikapasidwa cinthu. Napo bziri tenepo, ifepano timbakhala wakukondwa kwene-kwene tikapasa munthu cinthu. Kulewa cadidi, mpsabwino kwene-kwene kuti Yahova adatilenga tenepayu. Thangwe ranyi?
2 Tikambanyang’ana njira zakusiyana-siyana kuti tikhale wakupasa timbathumizira cikondweso cathu ndipo timbalatiza kuti Yahova adatilenga mwa njira imweyi. Kodi mpsabwino lini kudziwa kuti tidalengedwa tenepayu? — Salimo 139:14.
3. Thangwe ranyi Yahova ambacemeredwa kuti “Mulungu wakukondwa”?
3 Bzinembo bzimbatitsimikizira kuti kupasa kumbabweresa cikondweso, ndipopa mpsakudabwisa lini Bibliya likalewa kuti Yahova ni “Mulungu wakukondwa.” (1 Timotio 1:11) Iye ndiye omwe adayamba kupasa ndipo ni Mpasi mkulu. Ninga momwe adalewera mpostolo Paulo, thangwe ra Mulunguyo, “ifepano tina moyo, timbafamba ndipo tiripo.” (Mabasa 17:28) Kulewa cadidi, “mphaso iri-yentse yabwino na yakulungama” imbacokera kwa Yahova. — Tiyago 1:17.
4. N’ciyani comwe cin’dzatithandiza kuti tipitirize kukhala wakukondwa?
4 Tentsenefe timbafuna kukhala wakukondwa thangwe ra kupasa. Tingacite bzimwebzo mwa kutewezera kupasa kwa Yahova. (Aefezo 5:1) Mu nkhani ino, tin’pfunza bza ciratizo cace cabwino na bzomwe tingacite tikawona kuti wanthu winango ambatenda lini bzomwe timbawacitira. Bzimwebzi bzin’dzatithandiza kupitiriza kukhala wakupasa na kukhalambo wakukondwa.
TEWEZERANI KUPASA KWA YAHOVA
5. Mpsiponi bzinthu bzinango bzomwe Yahova ambatipasa?
5 Kodi Yahova ambalatiza tani kuti ngwakupasa? Mbatiwoneni bziratizo bzakucepa. Yahova ambatipasa bzinthu bzakuthupi. Ni nthawe lini zentse zomwe tingakhale na bzinthu bzizinji bzakuthupi, koma iye ambawonesesa kuti tinabzo bzinthu bzomwe mpsakufunikira. Mwa ciratizo, iye ambatipasa bzakudya, bzakubvala na mbuto yakukhala. (Salimo 4:8; Mateu 6:31-33; 1 Timotio 6:6-8) Kodi Yahova ambatipasa bzomwe timbafunikira mwakucita kukakamizidwa? Ne ndibzo lini! Tsono, thangwe ranyi Yahova ambaticitira bzimwebzi?
6. N’ciyani comwe tan’pfunza na Mateu 6:25, 26?
6 Yahova ambatipasa bzomwe timbafunikira thangwe rakuti ambatifuna. Onani mafala yomwe Jezu adalewa pa Mateu 6:25, 26. (Werengani.) Jezu adaphatisa basa bziratizo bza cirengedwe. Pakulewa bza mbalame, Jezu adalewa kuti: “Izo zimbabzala lini mbeu, zimbabvuna lini ne kukoya cakudya m’gwangwa.” Tsono onani bzomwe iye adalewa patsogolo pace. Iye adati: “Baba wanu wakudzulu ambazidyesa.” Ndipo Jezu adabvunza kuti: “Kodi imwepo ndimwe lini wakufunika kuposa mbalamezo?” Kodi pamwepa nfundo njiponi? Nfundo njakuti Yahova ambawona atumiki wace kuti mbakufunika kwene-kwene kuposa bzirombo. Penu Yahova ambasamalira bzirombo, tingakhale na citsimikizo cakuti an’dzacitambo bzibodzi-bodzibzi na ifepano! Ninga Baba wa lufoyi, Yahova ambasamalira wanthu wace thangwe rakuti ambawafuna. — Salimo 145:16; Mateu 6:32.
7. Kodi tingatewezere tani Yahova pa nkhani yakupasa? (Onani cithunzi-thunzi.)
7 Ninga Yahova, tingapasembo winango bzomwe ambafunikira thangwe rakuti timbawafuna. Mwa ciratizo, kodi pana m’bale ayai mpfumakazi yomwe ikufunikira cakudya ayai bzakubvala? Yahova angaphatise basa imwepo kuti mumuthandize bzinthu bzomwe iye akufunikira. Wanthu wa Yahova ambadziwika kuti ni wanthu wakupasa pakacitika malengwa ya pantsi. Mwa ciratizo, pa nthawe ya COVID-19, abale na mpfumakazi adapereka cakudya, bzakubvala na bzinthu bzinango kwa wanthu omwe akhafunikira thandizo. Azinji adacitambo bzakupereka kuti bzithandizire basa lathu la pa dziko lentse. Bzimwebzi bzidacitisa kuti abale omwe adagwedwa na malengwa pa dziko lentse la pantsi athandizidwe. Abale na mpfumakazi amwewa adaphatisa basa mafala yomwe yali pa Ahebereu 13:16 yomwe yambati: “Lekani kuyebwa kucita bzabwino na kugawana na anzanu bzomwe munabzo, pakuti Mulungu ambakomedwa na ntsembe zimwezi.”
Tentsenefe tingatewezere kupasa kwa Yahova (Onani ndime 7)
8. Kodi Yahova ambatithandiza tani? (Afilipi 2:13)
8 Yahova ambatipasa mphanvu. Yahova ambakomedwa kupasa atumiki wace wakukhulupirika mphanvu zace zakusaya malire zomwe anazo. (Werengani Afilipi 2:13.) Kodi mudapemba kale kwa Yahova mucikumbira kuti akupaseni mphanvu kuti mukwanise kulimbana na mayezo ayai kupirira bvuto lomwe mukhagumana nalo? Pinango imwepo ntsiku inango mudapemba kale mucikumbira mphanvu kuti mukwanise kucita bzinthu bzomwe mukhafuna kubzicita pa ntsikuyo. Pomwe mpembo wanu wakukumbira mphanvu udatawiridwa, imwepo mudatawiriza mafala yomwe mpostolo Paulo adayanemba yakuti: “Pa bzinthu bzentse nimbakwanisa kukhala na mphanvu thangwe ra ule omwe ambandipasa mphanvu.” — Afilipi 4:13.
9. Kodi tingatewezere tani Yahova pa nkhani yakupasa mwakuphatisa basa mphanvu zathu? (Onani cithunzi-thunzi.)
9 Napo ndife wanthu wakuperewera, ifepano tingatewezerembo Yahova pa nkhani ya kupasa mphanvu wanthu winango. Tsono ifepano tingakwanise lini kupasa munthu mphanvu zathu caizo. Koma tingaphatise basa mphanvu zathu kuti tithandize winango. Mwa ciratizo, tingathandize abale na mpfumakazi wacikulire ayai wale omwe akuduwala mwa kuwasamalirira nyumba yawo ayai kuyenda kukawagulira bzinthu. Penu tingakwanise, tingabzipereke kuti tikathandize kucenesa na kukonza-konza bzinthu pa Nyumba ya Umambo. Kuphatisa basa mphanvu zathu mwakucita bzinthu bzimwebzi ni njira yabwino yakucitira bzizinji abale na mpfumakazi zathu.
Tingaphatise basa mphanvu zathu kuti tithandize anzathu (Onani ndime 9)
10. Kodi tingacite tani kuti tilimbise winango na mafala yathu?
10 Lekani kuyebwa bza mphanvu yomwe mafala yanayo. Kodi mukukumbukira munthu munango omwe angalimbikisidwe mukamuuza kuti mumbatenda bzomwe iye ambacita? Kodi m’gwere mwanu muna munthu omwe mukuwona kuti akufuna kutsangalazidwa? Penu munti inde, thangwe ranyi mun’saya kucita ciri-centse kuti mumufenderere kuti iye adziwe kuti mumbacita naye thupo? Mungamuzungire, kumuligaliri, kumutumizira karta ayai kumunembera mensaje. Lekani kucita thupo kwene-kwene na bzomwe mungamuuze. Mafala yakucepa yakufotokozedwa mwalufoyi ni yomwe m’bale ayai mpfumakazi yanuyo ikufunikira kuti ipitirize kukhala yakukhulupirika na kubzibva bwino pa bvuto lomwe akugumana nalo. — Mimwani 12:25; Aefezo 4:29.
11. Kodi Yahova ambandofuna kuti nzeru zikhale na iye basi?
11 Yahova ambatipasa nzeru. Mpostolo Tiyago adanemba kuti: “Penu alipo munthu omwe akusaya nzeru, apitirize kukumbira kwa Mulungu ndipo iye an’dzamupasa, pakuti ambapereka na manja mawiri kwa wentse ndipo ambaperekambo mwakusaya kung’ung’udzika.” (Tiyago 1:5; na mafala ya m’nyantsi.) Ninga momwe yalatizira mafalaya, Yahova ambafuna lini kuti nzeru zindokhale na iye basi. Mwakudeka mtima, iye ambapasambo wanthu winango. Tiyago adalewambo kuti Yahova akapereka nzeru, iye ambapereka mwakusaya “kutombodzera,” ayai mwakusaya “kung’ung’udzika.” Iye ambafuna lini kuti tibzibve kuipa tikamukumbira malango. M’mbuto mwace, iye an’funa kuti timbamukumbire nzeruzo. — Mimwani 2:1-6.
12. Kodi ni mipata iponi yomwe tinayo kuti tipfunzise winango bzomwe timbadziwa?
12 Tsono tanimbo ifepano? Kodi tingatewezere tani Yahova pa nkhani ya kumbapasa winango nzeru zomwe tinazo? (Salimo 32:8) Wanthu wa Yahova ana mipata mizinji yakuti ambauze winango bzomwe adapfunza. Mwa ciratizo, kazinji-kazinji timbapfunzisa apalizi apsa mu upalizi. Mwakupirira akulu ambathandiza atumiki wakuthandiza na abale wakubatizidwa momwe angambacitire bwino mbali zawo m’gwere. Abale na mpfumakazi omwe ambadziwa bwino basa lakumanga-manga na lakukonza-konza ambathandiza kupfunzisa winango kuti ambaphate bwino basa lakumanga nyumba zomwe zimbaphatisidwa basa na gulu la Yahova.
13. Kodi tingatewezere tani Yahova pomwe tikupfunzisa winango?
13 Wale omwe ambapfunzisa winango angacite bwino kutewezera momwe Yahova ambaperekera nzeru zace. Kumbukirani kuti Yahova ambabisa lini nzeru zace. Mwa njira ibodzi-bodziyi, timbapfunzisa winango bzomwe timbadziwa. Timbasiya lini kuwapfunzisa thangwe ra kugopa kuti iwo akadziwa angadzambacite ndiwo basa lomwe tikucitalo. Ndipo timbakhala lini na makumbukidwe yakuti: ‘Inepano ndidapfunza ndekha! Iyembo an’pfunza yekha.’ Mboni ya Yahova in’funika lini kukhala na makumbukidwe yamweya. M’mbuto mwace, timbakomedwa tikadziwa kuti tiribe kundowapfunzisa bzomwe timbadziwa, koma tacita bzentse bzomwe tingakwanise ‘na cakulinga cakuti tiwathandize.’ (1 Atesalonika 2:8) Tikawapfunzisa bwino, “iwo an’dzakhala wakuthemera kupfunzisambo wanthu winango.” (2 Timotio 2:1, 2) Tentsenefe tikakhala wakupasa mwa kumbapfunzisambo winango bzomwe timbadziwa, bzin’dzacitisa kuti ifepano pabodzi na omwe tikuwapfunzisawo tikhale wakukondwa.
WANTHU AKASAYA KUTENDA BZOMWE TAWACITIRA
14. N’ciyani comwe wanthu azinji ambacita tikawacitira cinthu cabwino?
14 Tikakhala wakupasa ayai tikacitira bzinthu bzabwino abale na mpfumakazi zathu kawiri-kawiri iwo ambatitenda. Iwo angatitende mwakucita kutinembera tsamba ayai angatitende mwa njira inango. (Akolose 3:15) Iwo akatitenda, timbakomedwa kwene-kwene na bzomwe tidawacitirabzo.
15. N’ciyani comwe tin’funika kukumbukira munthu akasaya kutenda bzomwe tamucitira?
15 Tsono nthawe zinango, wanthu winango ambatenda lini bzomwe timbawacitira. Tingacitire munthu cinthu, tsono patsogolo pace tingawone kuti iye alibe kutenda bzomwe tamucitirabzo. Bzimwebzi bzikacitika, n’ciyani comwe tingacite kuti tileke kuluza cikondweso ayai kuti tileke kusunama? Kumbukirani bza mafala ya mu vesi lomwe likutsogolera nkhani ino, lomwe ni Mabasa 20:35. Cikondweso cathu cimbathemba lini penu winango angatitende pa bzomwe timbawacitira ayai ne. Tingapitirize kuthandiza winango napo kuti iwo angatitende lini bzomwe tingawacitire. Tingacite tani? Mbatiwoneni bzinthu bzinango bzomwe tingacite.
16. N’ciyani comwe cingatithandize kupitiriza kukhala wakupasa mwakukondwa?
16 Kumbukirani kuti mukakhala wakupasa mumbakhala mukutewezera Yahova. Yahova ambapasa bzinthu bzabwino wanthu napo kuti nthawe zinango iwo ambamutenda lini. (Mateu 5:43-48) Yahova akupicira kuti tikambacitira bzinthu bzabwino wanthu winango “mwakusaya kudikhira kubwezeredwa cinthu, . . .mabaibai [yathu] yan’dzakhala makulu.” (Luka 6:35) “Cinthu” comwe cikulewedwa kuti tingacidikhirireco cingakhale kutendedwa na iwo. Kumbukirani kuti Yahova nthawe zentse an’dzakusimbani thangwe ra bzabwino bzomwe mumbacita kuti muthandize winango thangwe iye ambafuna “wanthu omwe ambapereka mwakukondwa.” — Mimwani 19:17; 2 Akolinto 9:7.
17. Kodi n’ciyani comwe cimbaticitisa kuthandiza winango? (Luka 14:12-14)
17 Cinthu cinango comwe tingacite kuti titewezere Yahova pa nkhani yakupasa ni kukumbukira bzomwe Jezu adalewa pa Luka 14:12-14. (Werengani.) N’kuphonyeka lini kupasa cinthu ayai kucemera wale omwe angaticitirembo bzibodzi-bodzibzo kuti abwere ku mui kwathu kuti tidzadye nawo pabodzi. Tsono tani tikazindikira kuti tikucitira bzinthu wanthu na cakulinga cakuti adzaticitirembo bzibodzi-bodzibzo? Bzingakhale bwino kuyezera kuphatisa basa bzomwe Jezu adalewa. Ifepano tingacitire bzinthu bzabwino munthu omwe tikudziwa kuti an’kwanisa lini kuticitirambo bzomwe tamucitirabzo. Tikacita bzimwebzi, tin’dzakhala wakukondwa thangwe tin’dzadziwa kuti tikutewezera Yahova. Tikacita bzinthu moda umweyu, tin’dzakhala wakukondwa tikapasa cinthu wanthu napo iwo akasaya kutitenda.
18. N’ciyani comwe cin’dzatithandiza kuti timbaleke kukumbukira kuipa wanthu winango?
18 Lekani kumbakumbukira kuipa wanthu winango. (1 Akolinto 13:7) Munthu akasaya kukutendani pa bzomwe mwamucitira, bzibvunzeni kuti: ‘Kodi munthu umweyu ambatenda lini ayai wandoyebwa kunditendako?’ Pinango pangakhale na thangwe lomwe lamucitisa kuti iye aleke kutitenda. Wanthu winango ambatenda bzomwe timbawacitira tsono ambakwanisa lini kulewa. Pinango iwo angacite manyazi kutambira thandizolo, maka-maka penu kale-kale iwo akhathandizambo wanthu winango. Bziribe basa thangwe lomwe lingacitise munthu kuleka kutenda, kufuna abale wathu kun’dzaticitisa kuti tileke kumbawakumbukira kuipa ndipo tin’dzapitiriza kumbathandiza winango mwakukondwa. — Aefezo 4:2.
19-20. Thangwe ranyi tin’funika kupirira tikambacitira bzinthu bzabwino wanthu winango? (Onani cithunzi-thunzi.)
19 Khalani wakupirira. Pakulewa bza kupasa, Mambo Salomau adanemba kuti: “Thusa pau yako m’madzi pakuti pakapita ntsiku zizinji un’dzaigumana pomwe.” (Mpalizi 11:1) Mafalaya yakutipfunzisa kuti wanthu winango angalatize kutenda bzomwe tidawacitira “pakapita ntsiku zizinji.” Bzimwebzi ndibzo bzidacitikira mpfumakazi inango.
20 Magole mazinji m’mbuyomu, mkazi munango wa nyakunyang’anira dera adanembera tsamba la lufoyi mpfumakazi yomwe ikhadabatizidwa tsapanopa. Aciiuza bza kufunika kwa kupitiriza kukhala wakukhulupirika kwa Yahova. Mpfumakaziyo idatawira tsambalo pambuyo pa kupita magole 8, icilewa kuti: “Ndikhafuna kukunemberani tsamba ndicikuuzani momwe mafala yanu yadandithandizira kwa magole yentseneya. [Mafala yanu] yadandilimbikisa, koma comwe cidandithandiza kwene-kwene ni cinembo comwe imwepo mudacilewa, ndipo nimbaciyebwa lini.”a Pambuyo pa kufotokoza mabvuto yomwe adagumana nayo, mpfumakaziyo idalewa kuti: “Nthawe zinango ndikhandofuna kusiya bzentse na kusiyambo kutumikira Yahova. Tsono ndikhakumbukira cinembo comwe mudandinembera cire ndipo bzimwebzi bzikhandithandiza kuti ndipitirize kukhala . . . wakukhulupirika.” Iyo idathumizira kulewa kuti: “Magole 8 yentseneya tsamba lanu lire ndiro lomwe lidandithandiza kuti ndipitirize kupirira.” Ndokumbukirani cikondweso comwe mkazi wa nyakunyang’anira derayu adakhala naco pomwe adatambira tsamba limweri pambuyo pa ‘kupita ntsiku zizinji’! Mwakundendemerana na bzimwebzi, pinango ifepano tingatendedwembo pambuyo pa kupita magole mazinji.
Pinango munthu omwe tidamuthandiza angadzatitende pakapita magole mazinji (Onani ndime 20)b
21. Thangwe ranyi mwatsimikiza kupitiriza kutewezera kupasa kwa Yahova?
21 Ninga momwe tawonera, Yahova adatilenga na luso lakupambulika. Napo timbakomedwa tikapasidwa cinthu, timbakhala na cikondweso cikulu kwene-kwene tikapasa cinthu winango. Timbakomedwa tikambathandiza abale wathu wauzimu. Ndipo timbakomedwa kwene-kwene iwo akambatenda bzomwe tawacitirabzo. Tsono, penu munthu omwe tamucitira cinthu cabwino watitenda ayai ne, ifepano tin’dzakomedwa thangwe rakuti tacita cinthu cabwino. “Yahova angakupaseni bzinthu bzizinji” kuposa bzomwe imwepo mungapase wanthu winango. (2 Nkhani 25:9) Cadidi n’cakuti pakulewa bza kupasa bzinthu bzabwino wanthu winango, palibe munthu omwe angapose Yahova! Ndipo palibe cikondweso cikulu kuposa kusimbidwa na Yahova. Na tenepo, mbatipitirizeni kutewezera Baba wathu omwe ngwakupasa.
NYIMBO 17 “Ndin’funa”
b BZOMWE BZIKUCITIKA PA CITHUNZI-THUNZI: Pa bzithunzi-thunzi bzakuyezezerabzi, mkazi wa nyakunyang’anira dera akulimbikisa mpfumakazi mwakuphatisa basa tsamba. Pambuyo pa magole mazinji, iye akutambira tsamba la kutenda lakucokera kwa mpfumakazi yomwe adailimbikisayo.