Mbayezerani Kubvesesa Bzomwe Mukupfunza

Pomwe tikufuna kupfunza, pinango tingabzibvunze kuti: ‘Kodi n’ciyani comwe nin’pfunza?’ Tsono, tileke kulekerera kuti bzinthu bzomwe tikukumbuka kuti tin’pfunza bzititazise kuwona bzomwe Yahova akufuna kutipfunzisa. N’ciyani comwe tingacite kuti tikwanise kubvesesa bzomwe tikupfunza?

Mbapembani kuti mukhale na nzeru. Kumbirani Yahova kuti akuthandizeni kubvesesa bzomwe iye akufuna kuti imwepo mupfunze pa pfunzirolo. (Tiyago 1:5) Lekani kumbandokomedwa na bzomwe mumbadziwa kale. — Mimwani 3:5, 6.

Mbabvumani kuti Bibliya likuthandizeni kucinja moyo wanu. “Fala la Mulungu ndamoyo.” (Ahebereu 4:12) Na tenepo, pomwe tikuwerenga Bibliya, iro lingatipfunzise bzinthu bzomwe tikhanati kubzipfunza kale ndipo lingatithandize mu njira zakusiyana-siyana pa moyo wathu. Tsono bzimwebzi bzingakwanisike pokha-pokha tikazindikira bzomwe Mulungu akufuna kutipfunzisa.

Mbatendani bzinthu bzomwe Yahova ambaphatisa basa kuti akupfunziseni. Cakudya cace ca uzimu ciri ninga “phwando la cakudya cabwino.” (Zaiya 25:6) Tcenkhani kumbamoga nkhani zomwe mukuwona ninga kuti mungakomedwe lini nazo. Mukacita bzimwebzi, mun’dzabvuma kuti Fala la Mulungu likuthandizeni kukhala munthu wabwino ndipo mun’dzakomedwa na kupfunzako!