Kodi Tingakhale Tani Xamwali Wacadidi?

KODI nthawe zinango mudabzibva kale kuti muli mwekha pomwe mukhagumana na mabvuto? Ifepano tikukhala mu “ntsiku . . . zakunesa na zakugopswa” zomwe nthawe zinango zingaticitise kubzibva kuti tiri tekha. (2 Timotio 3:1) Tsono tin’funika lini kulimbana na mabvuto ya pa moyo tekha-tekha. Bibliya limbatilatiza phindu lakukhala na axamwali wacadidi “mu nthawe zakunesa.” — Mimwani 17:17.

KODI AXAMWALI WACADIDI ANGATITHANDIZE TANI?

Mpostolo Paulo akhathandizidwa na axamwali wacadidi omwe akhanawo pomwe akhacita ulendo bwace. (Akolose 4:7-11) Pomwe iye akhali m’kawoko ku Roma, axamwali wace akhambamucitira mabasa yomwe iye angadakwanisa lini kuyacita yekha. Epafrodito adapasa Paulo bzinthu bzomwe abale na mpfumakazi wa ku Filipi adatumiza. (Afilipi 4:18) Tikiko adapereka matsamba ya Paulo ku magwere yakusiyana-siyana. (Akolose 4:7) Na thandizo la axamwali wace, Paulo adapitiriza kucita utumiki bwace napo kuti iye akhali yekha m’kawoko. Kodi imwepo mungakhalembo tani xamwali wabwino?

Mu ntsiku zathu zino, abale na mpfumakazi ambacita bzinthu bzomwe xamwali wacadidi ambacita. Onani bzomwe mpfumakazi inango idacita kuti ilatize kukhala xamwali wacadidi kwa Elisabet, omwe ni mpainiya wakukhazikika ndipo ambakhala ku Espanha. Pomwe mai wace wa Elisabet akhana matenda ya kankro, mpfumakaziyi ikhatumiza mavesi ya m’Bibliya kuti ilimbikise mpfumakazi inzaceyo. Elisabet adati. “Mensajezi zikhandithandiza kuti ndileke kubzibva kuti ndiri ndekha.” — Mimwani 18:24.

Ifepano tingalimbise uxamwali bwathu na Akristau anzathu mwa kumbawathandiza pa bzakucitika bza m’gwere. Ninga kumbatenga abale ayai mpfumakazi zacikulire kuti mumbayende nawo mu utumiki ayai ku mitsonkhano. Mukacita tenepo, imwepo mun’dzawalimbikisa ndipo iwo an’dzakulimbikisanimbo. (Aroma 1:12) Tsono abale winango ambakwanisa lini kucoka pa mui. Kodi tingakhale tani xamwali wacadidi kwa iwo?

KHALANI XAMWALI WACADIDI KWA WALE OMWE AMBAKWANISA LINI KUCOKA PA MUI

Abale winango ana bvuto la thanzi ayai bzakucitika bzinango bzomwe bzimbawacitisa kuti aleke kugumanika ku mitsonkhano. Onani ciratizo ca m’bale David, omwe adazindikiridwa kuti akhana matenda ya kankro. Iye adamala minyezi 6 akutambira thandizo la ulapi. Pomwe akhatambira thandizo la ulapiro, m’bale David na akazawo a Lidia akhambacita mitsonkhano mwakuphatisa basa vidiyokonferensiya.

Kodi iwo adathandizidwa tani na axamwali wawo wa m’gwere? Kuphampha kwa mtsonkhano uli-wentse, abale omwe akhambacita kugumanika pa Nyumba ya Umambo akhambalewalewa na m’bale David pabodzi na mpfumakazi Lidia mwakuphatisa basa vidiyokonferensiya. Kupambula bzimwebzo pomwe a David na a Lidia akhambapereka mitawiro yawo, nthawe zinango akhambatambira mensaje zakulimbikisa zakucokera kwa Akristau anzawo. Kodi iwo adabva tani na bzimwebzi? Iwo adabzibva kuti akhali lini okha.

Pomwe tikucita makonzedwe yathu yakuyenda mu utumiki, kodi tingalatize tani kuti tikukumbukira wale omwe ambakwanisa lini kucoka pa mui? Pomwe tikucita makonzedwe kuti tiyende mu upalizi, tin’funika kukumbukirambo abale amwewa. (Mimwani 3:27) Tingapambule nthawe kuti tinembe nawo pabodzi matsamba ayai kucita nawo upalizi mwakuphatisa basa telefoni. Wale omwe ambakwanisa lini kucoka pa mui pinango angagumanike pa mtsonkhano wakukonzekera kuyenda mu utumiki mwakuphatisa basa vidiyokonferensiya. A David na a Lidia adatenda na makonzedwe yamweya. M’bale David adati: “Kukhala pabodzi na abale na mpfumakazi pa mtsonkhano wa kuyenda mu utumiki bwa kumunda mwakuphatisa basa vidiyokonferensiya kukhatikondwesa kwene-kwene.” Kuthumizira bzimwebzi, bzikakwanisika imwepo mungacite makonzedwe yakutenga nyakupfunza wanu wa Bibliya muciyenda naye kwa m’bale omwe ambakwanisa lini kucoka pa muiyo kuti mukacitise pfunzirolo pabodzi na iye.

Tikambaphata basa pabodzi na abale na mpfumakazi omwe ambakwanisa lini kucoka pa mui, tin’dzazindikira makhalidwe yawo yabwino ndipo bzimwebzi bzin’dzacitisa kuti uxamwali bwathu na iwo bukhale bwakulimba kwene-kwene. Imwepo mukawona momwe iwo ambaphatisira basa Fala la Mulungu kuti athandize munthu kukhala pa uxamwali bwakulimba na Yahova bzin’dzacitisa kuti muwalemekeze kwene-kwene. Imwepo mukambathandiza abale na mpfumakazi mu upalizi ayai kugumanika ku mitsonkhano mun’dzakhala na axamwali apsa. — 2 Akolinto 6:13.

Pomwe Paulo akhagumana na mabvuto, xamwali wace Tito adayenda kukamuwona ndipo bzimwebzi bzidacitisa kuti Pauloyo abzibve bwino kwene-kwene. (2 Akolinto 7:5-7) Mpsabwino kumbalimbikisa abale na mpfumakazi zathu na mafala yathu, tsono bzomwe Tito adacita bzikutipfunzisa kuti tin’funika kumbapambula nthawe yakuti timbakhale nawo pabodzi na kumbacita bzomwe tingakwanise kuti tiwathandize. — 1 Juwau 3:18.

THANDIZANI AXAMWALI WANU AKAKHALA AKUZUNZIDWA

Abale na mpfumakazi zathu za ku Rússia ambathandizana akakhala akuzunzidwa. Onani bzomwe bzidacitikira m’bale Sergey na akazawo a Tatyana. Pambuyo pa mapolisiya kufufudza m’nyumba mwawo, adawatenga aciyenda nawo ku esquadra acikawacita mibvunzo. A Tatyana ndiwo omwe adayamba kutsudzulidwa acibwerera ku mui. M’bale Sergey adati: “Pomwe [Tatyana] adabwerera ku mui, mpfumakazi inango yakukhwimika idayenda kukamuzungira. Mwakamfulumize abale na mpfumakazi adabwera kudzatithandiza kucenesa na kulongedza bzinthu m’nyumba mwathu.”

M’bale Sergey adalewa pomwe kuti: “Ndikhambakumbukira kwene-kwene Mimwani 17:17, omwe ambati: ‘Xamwali wacadidi ambakufuna nthawe zentse, ndipo iye ni m’bale omwe adabadwira kuti akuthandize pakawoneka mabvuto.’ Pa nthawe yomwe tikhazunzidwa ndikhafunikira kwene-kwene thandizo la axamwali wangu. Ndidakwanisa kuwona kuti mafala yomwe yambagumanika pa Mimwani 17:17 njacadidi. Yahova adandipasa axamwali omwe adandithandiza na kundilimbikisa.”a

Penu tikugumana na mabvuto yakunesa, ifepano tin’funikira thandizo la axamwali wathu. Ndipo tin’dzafunikira thandizo lawo pa nthawe ya citsautso cikulu. Ndipopa mbaticiteni nyongo yakulimbikisa na kuthandiza axamwali wathu! — 1 Pedru 4:7, 8.