Tcenkhani Mzimu Wakubzifuna wa m’Dzikoli

WANTHU azinji ntsiku zino ambafuna kwene-kwene kulemekezedwa na kuwonedwa kuti mbakufunika kuposa winango. Napo wanthu aciwalemekeza ayai kuwapasa udindo, iwo ambakumbuka kuti an’themera kupasidwa bzinthu bzinango basi. Wanthu omwe ana nzeru zimwezi ambalatiza kuti mbakubzifuna okha ndipo mbakusaya kutenda. Bibliya likhadaleweratu kuti mu ntsiku zakumalizira wanthu angadadzakhala na makhalidwe yamweya. — 2 Timotio 3:2.

Tsono kuyambira kale-kale wanthu ambalatiza khalidwe la kubzifunali. Adamu na Eva adafuna kubzisankhulira okha cabwino na cakuipa. Bzimwebzi ndibzo bzikucitisa kuti wanthufe tibonere. Pomwe padapita magole mazinji, Mambo Uziya wa ku Djuda adalatizambo mtima umweyu pomwe adayezera kutentha bzakununtcirisa mu templo, tsono bzomwe adacitabzo bzikhali bzakuphonyeka. (2 Nkhani 26:18, 19) Ndipo pakuti Afarizeu na Asaduki akhali mbadwa za Abulahamu, iwo akhakumbuka kuti Mulungu akhafunika kumbawawona kuti mbakufunika kwene-kwene kuposa wanthu winango. — Mateu 3:9.

Ifepano tikukhala pakati pa wanthu omwe mbakubzifuna na wakubzikuza, ndipo mpsakupusa kuwatewezerambo. (Agalatiya 5:26) Tingayambe kukumbuka kuti tin’themera kutambira udindo bunango ayai kucitiridwa bzinthu bzinango mu njira yakupambulika. Kodi n’ciyani comwe cingatithandize kutcenkha nzeru zimwezi? Cakuyamba, tin’funika kubvesesa momwe Yahova ambaliwonera khalidwe limweri. Tenepo, comwe cingatithandize ni nfundo ziwiri za m’Bibliya.

Yahova ndiye omwe ambadziwa udindo bomwe tingathemere kupasidwa. Mbatiwoneni bziratizo bzinango bzomwe bzikulatiza bzimwebzi.

• M’banja, Yahova ambafuna kuti mkazi ambalemekeze kwene-kwene mwamuna wace ndipo mwamuna ambafune mkazace. (Aefezo 5:33) Yahova ambafuna kuti munthu wakulowola ayai wakulowodwa ambafunidwe na omwe adalowolana naye. (1 Akolinto 7:3) Kuthumizira bzimwebzi, abereki ambadikhirira kuti wana wawo ambawabvere ndipo wanambo ambadikhirira kuti abereki wawo ambawasamalire na kuwalatiza lufoyi. — 2 Akolinto 12:14; Aefezo 6:2.

• M’gwere, Yahova ambafuna kuti akulu ambalemekezedwe na abale. (1 Atesalonika 5:12) Tsono, iwo an’funika lini kupondereza abale na mpfumakazi. — 1 Pedru 5:2, 3.

• Mulungu adapasa maboma ugo bwa kutambira mitsonkho na ulemu kwa wanthu omwe iwo ambawatonga. — Aroma 13:1, 6, 7.

Thangwe ra lufoyi, Yahova ambatipasa bzinthu bzizinji napo tin’themera lini. Pakuti tidatengera pikado kwa Adamu tikhandothemera kufa. (Aroma 6:23) Napo bziri tenepo, Yahova ambatipasa bzisimbo bzizinji thangwe ra lufoyi lace lacadidi. (Salimo 103:10, 11) Iye ambatisimba ayai ambatipasa udindo sikuti thangwe rakuti tin’themera, koma thangwe rakuti ngwakudeka mtima. — Aroma 12:6-8; Aefezo 2:8.

KODI TINGATCENKHE TANI MZIMU WAKUBZIFUNA?

Citani mphole kuti muleke kutewezera wanthu wa m’dzikoli. Tikasaya kuzindikira bzimwebzi, tingayambe kuwona kuti tin’themera kupasidwa bzinthu bzizinji kuposa winango. Jezu adalatiza momwe bzimwebzi bzingacitikire pomwe adafotokoza ciratizo ca munthu omwe adayenda kukanyang’ana wanthu kuti akamuphatire basa ku munda kwace. Anyabasa winango adaphata basa ntsiku yentse pa dzuwa ndipo winango adandophata basa ora ibodzi basi. Tsono wentse adapasidwa dinario ibodzi. Omwe adaphata basa ntsiku yentse wale adalewa kuti akhafunika kutambira kobiri zizinji thangwe rakuti adaphata basa kwene-kwene kuposa winangowo. (Mateu 20:1-16) Mwakuphatisa basa ciratizo cimweci, Jezu akhafuna kulatiza ateweri wace kuti akhafunika kukomedwa na bzomwe Mulungu akhawapasa.

Mbatendani ndipo lekani kumbadikhirira kuti wanthu akucitireni bzinthu bzizinji. (1 Atesalonika 5:18) Tewezerani Paulo omwe alibe kukumbira abale wa ku Kolinto kuti amupase bzinthu, napo kuti iye akhanabo ugo bwakucita bzimwebzo. (1 Akolinto 9:11-14) Tin’funika kutenda bzinthu bzomwe wanthu ambatipasa na kutcenkha kudikhirira kuti iwo aticitire bzinthu bzizinji.

Khalani wakubzicepesa. Munthu akambabziwona kuti ngwakufunika kwene-kwene, iye ambayamba kuwona kuti an’themera bzinthu bzizinji kuposa anzace. Kubzicepesa kun’dzatithandiza kuleka kukhala na nzeru zimwezi.

Mpolofeta Daniyeli akhali munthu wakubzicepesa ndipo ifepano tingamutewezere. Banja lomwe adabadwira, mawonekedwe yace yabwino, nzeru zace na luso lomwe akhanalo bzingadamucitisa kubziwona kuti akhali wakufunika kwene-kwene nakuti akhali wakuthemera kutambira udindo bomwe adapasidwa. (Daniyeli 1:3, 4, 19, 20) Tsono, Daniyeli adapitiriza kukhala wakubzicepesa ndipo bzimwebzi bzidacitisa kuti Yahova akomedwe naye. — Daniyeli 2:30; 10:11, 12.

Mbatilekeni kutewezera wanthu wakubzifuna na wakubzikuza wa m’dzikoli. Koma mbatipitirizeni kumbakomedwa na bzomwe Yahova ambatipasa thangwe ra kudeka mtima kwace.