Lekani Kucedwa Kubatizidwa

1. Kodi ni mathangwe yaponi yomwe yangaticitise kufuna kubatizidwa?

KODI imwepo mumbafuna Yahova omwe adakupasani bzinthu bzabwino kuphatanidzambo moyo? Kodi imwepo mukufuna kulatiza lufoyi lanu kwa iye? Cinthu cabwino comwe imwepo mungacite ndico kubzipereka kwa iye mucibatizidwa. Bzimwebzi bzin’dzakucitisani kuti mucite mbali ya banja la Yahova. Mukacita bzimwebzi, Baba wanu Yahova omwembo ni Xamwali wanu, an’dzakusamalirani. (Salimo 73:24; Zaiya 43:1, 2) Kuthumizira bzimwebzi, imwepo mukabzipereka mucibatizidwa mun’dzakhala na cidikhiro cakudzakhala na moyo wakusaya kumala. — 1 Pedru 3:21.

2. Kodi tin’pfunza ciyani mu nkhani ino?

² Kodi pana cinthu cinango comwe cikukutazisani kubatizidwa? Penu mun’ti inde, dziwani kuti imwepo muli lini mwekha. Wanthu azinji pomwe akhanati kubatizidwa, adafunikambo kucinja makhalidwe yawo na makumbukidwe yawo kuti athemere kubatizidwa. Ndipo tsapano akutumikira Yahova mwakukondwa na nyongo. Kodi n’ciyani comwe imwepo mungapfunze na wanthu winango omwe adabatizidwa magole dzana yakuyambirira? Mu nkhani ino, tin’cezerana bza mabvuto manango yomwe iwo adagumana nayo na bzomwe ifepano tingapfunzembo na iwo.

ASAMARIYA ADABATIZIDWA

3. Kodi ni bzinthu bziponi bzomwe Asamariya winango adacinja pa moyo wawo kuti abatizidwe?

³ Asamariya akhacita mbali ya magereja yomwe yakhalipo mu nthawe ya Jezu ndipo azinji wa iwo akhakhala ku norte kwa Djudeya. Kuti Asamariyawo athemere kubatizidwa, iwo akhafunika kubvuma Fala la Mulungu, Bibliya, na kupfunza bzizinji na Bibliyalo. Asamariya akhambakhulupira kuti mabukhu maxanu ya m’Bibliya yomwe ni Genesesi mpaka Deuteronomiyo, ndipo pinango pentse kuphatanidzambo na bukhu la Djoswa, ndiyo yokha yomwe yakhadafuliziridwa na Mulungu. Asamariya akhakhulupirambo kuti Mesiya angadabwera mwakubverana na momwe Mulungu akhadalewera pa Deuteronomiyo 18:18, 19. (Juwau 4:25) Kuti abatizidwe, iwo akhafunika kubvuma kuti Jezu ndiye akhali Mesiya wakupiciridwayo. Tenepo “Asamariya azinji” adakhulupira bzimwebzi. (Juwau 4:39) Kuthumizira bzimwebzi, pakuti Akristau wakuyambirira azinji akhali Adjuda, Asamariya winango akhafunika kucinja khalidwe lawo la tsankhulo kuti abverane na Adjudawo. — Luka 9:52-54.

4. Mwakubverana na Mabasa 8:5, 6, 14, kodi n’ciyani comwe Asamariya adacita pomwe Filipi adawapalizira?

⁴ Kodi n’ciyani comwe cidathandiza Asamariya kuti abatizidwe? Pomwe mpalizi Filipi adawapalizira bza “Kristu,” Asamariya winango “[adabvuma] Fala la Mulungu.” (Werengani Mabasa 8:5, 6, 14.) Iwo alibe kulamba kutetekera Filipi napo kuti iye akhali m’Djuda. Pinango iwo adakumbukira Bzinembo bzomwe bzikhalewa kuti Mulungu alibe tsankhulo. (Deuteronomiyo 10:17-19) Asamariyawo “[adatetekera] na mtima wentse bzomwe Filipi akhalewa” pakulewa bza Kristu, ndipo adabvuma kuti Filipiyo akhana mzimu wa Mulungu. Filipi akhacitambo bzakudabwisa bzizinji ninga kupoza atenda na kucosa madimonyo. — Mabasa 8:7.

5. Kodi n’ciyani comwe mukupfunza na Asamariya?

⁵ Asamariya angadafuna angadalamba kutetekera bzomwe Filipi akhapfunzisa thangwe iye akhali m’Djuda ayai thangwe rakuti iwo akhanati kubva kale bzomwe iye akhapfunzisabzo. Tsono iwo alibe kucita bzimwebzo. Pomwe Asamariya adatsimikizira kuti bzomwe Filipi akhawapfunzisa bzikhali bzacadidi, iwo alibe kucedwa kubatizidwa. Bibliya limbalewa kuti: “Pomwe Filipi adapalizira mafala yabwino ya Umambo bwa Mulungu na ya dzina la Jezu Kristu, iwo adakhulupira ndipo adabatizidwa amuna na akazi.” (Mabasa 8:12) Kodi imwepo mumbakhulupira kuti Fala la Mulungu ndacadidi? Kodi imwepo mukutsimikiza kuti Mboni za Yahova zimbalatiza lufoyi cairo lomwe Jezu adalewa kuti anamati wace wacadidi angadadzalilatiza? (Juwau 13:35) Penu ndibzo, lekani kugopa kubatizidwa. Khalani na citsimikizo cakuti Yahova an’dzakusimbani.

6. Kodi ciratizo ca Ruben cingakuthandizeni tani?

⁶ Ruben, omwe ambakhala ku Alemanha adakulira m’banja la Mboni za Yahova. Tsono pomwe iye akhali tswaka akhakhulupira lini kuti Mulungu alipo. Kodi n’ciyani comwe cidamuthandiza kuti ayambe kumbakhulupira? Iye adazindikira kuti akhadziwa lini bzentse bza nkhaniyo, ndipopa adafuna kupfunza bzizinji. Iye adati: “Pa pfunziro langu la pandekha ndikhacita nyongo kuti ndizindikire kuti n’bziponi bzinthu bzacadidi na bzakunama. Inepano ndidapfunza kazinji-kentse nkhani yakulewa kuti bzinthu bzidacita kusanduka.” Iye adapfunza bukhu lakuti Existe um Criador Que Se Importa com Você? Bukhuli lidathandiza kwene-kwene Ruben. Iye adalewa na mu mtima mwace kuti: ‘Wau! Yahova alipodi.’ Pomwe iye akhazungira likulu lathu la pa dziko lentse la pantsi, lufoyi lace kwa abale lidathumizirika thangwe ra kuwona mbverano omwe ulipo pakati pa abale na mpfumakazi wa pa dziko lentse. Pomwe iye adadzabwerera ku Alemanha, adadzabatizidwa na magole 17. Penu imwepo mumbapenukira pakulewa bza Mulungu, Bibliya ayai nkhani inangombo, fufudzani m’mabukhu yathu. Imwepo mukakhala na “cidziwiso caico” bzimwebzi bzin’dzakuthandizani kuti muleke kupenukira. (Aefezo 4:13, 14) Ndipo mukambabva nkhani zakulewa bza lufoyi na mbverano omwe ulipo pakati pa Mboni za Yahova pa dziko lentse na kuwonambo bzimwebzi m’gwere mwanu, lufoyi lanu kwa abale wa pa dziko lentse lin’dzathumizirika.

SAULO WA KU TARSO ADABATIZIDWA

7. Kodi Saulo akhafunika kucinja makumbukidwe yaponi?

⁷ Mbaticezeraneni bza Saulo wa ku Tarso. Iye akhadapfunzisidwa bwino Malamulo ya Cidjuda ndipo akhali wakubvekera pakati pa Adjudawo. (Agalatiya 1:13, 14; Afilipi 3:5) Mu nthawe imweyire, Adjuda azinji akhakhulupira kuti Akristau akhali apanduki. Ndipopa Saulo adawazunza kwene-kwene. Iye akhakumbuka kuti bzomwe akhacitabzo bzikhali kufuna kwa Mulungu. Tsono iye akhafunika kucinja makumbukidwe yamweya. (Mabasa 8:3; 9:1, 2; 26:9-11) Penu Saulo angadafunambo kukhulupira Jezu acifika pa kubatizidwa, iye akhafunika kukhala wakukonzeka kudzazunzidwambo.

8. (a) Kodi n’ciyani comwe cidacitisa Saulo kuti abatizidwe? (b) Mwakubverana na Mabasa 22:12-16, kodi Ananiya adathandiza tani Saulo? (Onanimbo cithunzi-thunzi.)

⁸ Kodi n’ciyani cidathandiza Saulo kuti abatizidwe? Pomwe Jezu adalewalewa na Saulo kucokera kudzulu, ceza cidatoya Sauloyo acikhala zimola. (Mabasa 9:3-9) Iye adamala ntsiku zitatu akubzimana kudya ndipo pinango-pentse akhambakumbukira bzomwe bzikhadamucitikirabzo. Kulewa cadidi, bzimwebzi bzidatsimikizira Saulo kuti Jezu akhalidi Mesiya nakuti ateweri wace akhali anamati wacadidi. Saulo adasunama kwene-kwene thangwe rakuti adathandizira kuphedwa kwa Sitefano! (Mabasa 22:20) Pomwe padamala ntsiku zitatu, nyakupfunza munango wakucemeredwa Ananiya, mwakudeka mtima, adafenderera Saulo acimupoza ndipo adamulimbikisa kuti abatizidwe mwakamfulumize. (Werengani Mabasa 22:12-16.) Saulo adatetekera Ananiya mwakubzicepesa ndipo adabatizidwa. — Mabasa 9:17, 18.

9. Kodi n’ciyani comwe mukupfunza na Saulo?

⁹ Pana bzinthu bzizinji bzomwe tingapfunze na Saulo. Iye angadafuna angadalekerera kuti kubzikuza ayai kugopa wanthu kumutazise kubatizidwa. Tsono iye alibe kulekerera kuti bzimwebzi bzicitike. Saulo mwakubzicepesa adacinja makhalidwe yace pomwe adabvuma cadidi cakulewa bza Kristu. (Mabasa 26:14, 19) Saulo akhali wakukonzeka kukhala Mkristau napo acidziwa kuti angadadzazunzidwa. (Mabasa 9:15, 16; 20:22, 23) Pomwe adabatizidwa, iye adapitiriza kuthemba Yahova kuti angadadzamuthandiza pa mazunzo yomwe iye angadadzagumana nayo. (2 Akolinto 4:7-10) Kubvuma kwanu kubatizidwa mucikhala Mboni ya Yahova, kun’dzakucitisani kuti mugumane na mazunzo yomwe yangadzayeze cikhulupiro canu. Tsono, imwepo mungakhale na citsimikizo cakuti Mulungu na Kristu an’dzakupasani thandizo lomwe mukufunikira kuti mupitirize kupirira na kukhalambo wakukhulupirika. — Afilipi 4:13.

10. Kodi imwepo mungapfunze ciyani na Anna?

¹⁰ Anna adakulira m’banja la cikhalidwe ca Cikurda ku Europa Oriental. Kucokera pomwe mai wace adabatizidwa, Anna adayamba kupfunza Bibliya pomwe akhana magole 9 mwa kubvumizidwa na pai wace. Tsono pomwe adzinza wace adadziwa kuti iye akhapfunza Bibliya na Mboni za Yahova, adayamba kumutsutsa. Adzinzawo akhambawona kuti kusiya gereja yomwe akhanamata bzikhali bzinthu bzakupasa manyazi. Pomwe Anna akhana magole 12, iye adakumbira pai wace kuti amubvumize kubatizidwa. Tsono pai wacewo akhafuna kudziwa penu iye wacita kusankhula yekha ayai wacita kungingimizidwa. Iye adatawira kuti: “Inepano nimbafuna Yahova.” Na bzimwebzi, pai wacewo adabvuma kuti iye abatizidwe. Kucokera pomwe iye adabatizidwa, adzinza wacewo adapitiriza kumbamucitira bzinthu bzakuipa. Ndipo yavu wace wacimuna adamuuza kuti: “Bziri-bwino iwepo kucita uputa ayai kufumali m’mbuto mwakukhala Mboni ya Yahova.” Kodi n’ciyani comwe cidathandiza Anna? Iye adalewa kuti: “Yahova adandithandiza kuti ndikhale wakulimba ndipo abereki wangu adandithandizambo kwene-kwene.” Anna ambakumbukira bzinthu bzizinji bzomwe adanemba bzakulewa momwe Yahova adamuthandizira pa moyo wace. Ndipo nthawe zinango iye ambawona bzomwe adanembabzo kuti aleke kuyebwa momwe Yahovayo adamuthandizira. Penu imwepo mukucita mantha kuti mun’dzazunzidwa, dziwani kuti Yahova an’dzakuthandizanimbo. — Ahebereu 13:6.

KORNELIYO ADABATIZIDWA

11. Kodi n’ciyani comwe pinango cingadatazisa Korneliyo kubatizidwa?

¹¹ Tingapfunzembo bzinthu bzakufunika na Korneliyo. Iye akhali ‘mtsogoleri’ wa acikunda wakukwana 100 wa ku Roma. (Mabasa 10:1, mafala ya m’nyantsi.) Bzimwebzi bzikhacitisa kuti iye akhale wakubvekera komwe akhakhala na pakati pa acikunda. Iye “akhambapasa bzinthu bzabwino wanthu wakusauka.” (Mabasa 10:2) Yahova adatumiza mpostolo Pedru kuti akamupalizire mafala yabwino. Kodi Korneliyo adazeza kubatizidwa thangwe rakuti iye akhana udindo bwapadzulu ayai akhali wakubvekera?

12. Kodi n’ciyani cidathandiza Korneliyo kuti abatizidwe?

¹² Kodi n’ciyani cidathandiza Korneliyo kuti abatizidwe? Bibliya limbalewa kuti iye “[akhagopa] Mulungu pabodzi na wanthu wentse wa m’banja mwace.” Ndipo iye akhambacita mipembo yakudandaulira Mulungu. (Mabasa 10:2) Pomwe Pedru adapalizira mafala yabwino Korneliyo, Korneliyoyo pabodzi na banja lace adakhulupira Kristu ndipo alibe kucedwa kubatizidwa. (Mabasa 10:47, 48) Kulewa cadidi, Korneliyo akhali wakukonzeka kucinja bzinthu pa moyo wace kuti anamate Yahova pabodzi na banja lace. — Djoswa 24:15; Mabasa 10:24, 33.

13. Kodi mukupfunza ciyani na Korneliyo?

¹³ Ninga Saulo, Korneliyo angadafuna angadalekerera kuti udindo bomwe akhanabo bumutazise kukhala Mkristau. Tsono iye alibe kulekerera kuti bzimwebzi bzicitike. Kodi pana bzinthu bzinango bzomwe imwepo mun’funikira kucinja pa moyo wanu kuti mubatizidwe? Penu ndibzo, dziwani kuti Yahova an’dzakhala Mthandizi wanu. Iye an’dzakusimbani mukatsimikiza kuphatisa basa mitemo ya m’Bibliya pa moyo wanu na kumutumikira.

14. Kodi mukupfunza ciyani na Tsuyoshi?

¹⁴ Mwamuna munango wakucemeredwa Tsuyoshi, wa ku Japão, adakumbuka bza kucinja basa lomwe akhaphata kuti athemere kubatizidwa. Iye akhali mthandizi wa diretori wa xikola inango yomwe ikhapfunzisa wanthu momwe angasamalirire maluwa ayai nkhata za maluwa. Pakacitika nkhawa, diretoriyo akhambakonza nkhata za maluwa ndipo akhambacitambo mbali pa miyambo ya Cibuda. Ndipo diretoriyo akatazira kugumanika pa nkhawapo, Tsuyoshi ndiye omwe akhambacita bzimwebzo. Tsono pomwe Tsuyoshi adapfunza cadidi pakulewa bza infa adadziwa kuti angadabatizidwa lini penu angadapitiriza kucita mbali pa miyambo ire. Iye adasankhula kuleka kucita mbali pa miyamboyo. (2 Akolinto 6:15, 16) Tsuyoshi adauza diretori wace bza nkhaniyo. Kodi iye adakhala na bzakutewera bziponi? Tsuyoshi adauzidwa kuti angadapitiriza kuphata basa lacero napo kuti angadacita lini mbali pa miyamboyo. Pomwe padapita gole libodzi akupfunza Bibliya, iye adadzabatizidwa.a Penu imwepo mukufuna kucinja basa lanu kuti mukondwese Mulungu, khalani na citsimikizo centse cakuti iye an’dzakupasani bzomwe imwepo na banja lanu mukufunikira. — Salimo 127:2; Mateu 6:33.

WANTHU WA KU KOLINTO ADABATIZIDWA

15. Kodi n’ciyani comwe pinango cingadatazisa wanthu wa ku Kolinto kubatizidwa?

¹⁵ Wanthu omwe akhambakhala mu mzinda wa kale-kale wa ku Kolinto akhafuna kwene-kwene bzinthu bzakuthupi ndipo akhambacitambo upombo. Wanthu azinji mu mzindamo akhambacita bzinthu bzizinji bzomwe Mulungu ambakomedwa lini nabzo. Ndipopa bzikhali bzakunesa kuti wanthu wa mu mzindayo abatizidwe aciyamba kutumikira Yahova. Tsono pomwe mpostolo Paulo adafika mu mzindamo acipalizira mafala yabwino yakulewa bza Kristu, “wanthu azinji wa ku Kolinto omwe adabva mafalayo adakhulupira acibatizidwa.” (Mabasa 18:7-11) Patsogolo pace, Mbuya Jezu Kristu adadzawonekera kwa Paulo ndipo adamuuza kuti: “Ndina wanthu azinji mu mzinda muno.” Thangwe ra bzimwebzi, Paulo adapitiriza kupalizira kumweko gole libodzi na meya.

16. Kodi n’ciyani comwe cidacitisa wanthu wa ku Kolinto kucinja bzinthu pa moyo wawo kuti abatizidwe? (2 Akolinto 10:4, 5)

¹⁶ Kodi n’ciyani cidathandiza wanthu wa ku Kolinto kuti abatizidwe? (Werengani 2 Akolinto 10:4, 5.) Fala la Mulungu, Bibliya, na mzimu wakucena bzidawathandiza kuti acinje bzinthu pa moyo wawo. (Ahebereu 4:12) Wanthu wa ku Kolinto omwe adabvuma mafala yabwino yakulewa bza Kristu, adakwanisa kusiya bzinthu bzakuipa bzomwe akhacita ninga kuledzera, kuba na kucita malume ya pa mphasa amuna okha-okha ayai akazi okha-okha. — 1 Akolinto 6:9-11.b

17. Kodi n’ciyani comwe mungapfunze na wanthu wa ku Kolinto?

¹⁷ Napo kuti wanthu wa ku Kolinto akhafunika kucinja bzinthu bzizinji pa moyo wawo, iwo alibe kuwona bzinthu bzimwebzo kukhala bzinthu bzomwe bzingadawatazisa kukhala Akristau. Iwo adacita nyongo kwene-kwene kuti ayambe kufamba mu msewu wakupapatiza na mseu wakupsindiza omwe umbayendesa ku moyo wakusaya kumala. (Mateu 7:13, 14) Kodi imwepo mukucita nyongo kuti mucinje bzinthu bzinango pa moyo wanu kuti mubatizidwe? Penu ndibzo, pitirizani kucita nyongo kuti mucinje! Kumbirani Yahova kuti akupaseni mzimu wace wakucena kuti akuthandizeni kutcenkha bzikhumbo bzakucita bzinthu bzakuipa.

18. Kodi n’ciyani comwe mungapfunze na Monika?

¹⁸ Monika, omwe ambakhala ku Georgia, adacita nyongo ikulu kwene-kwene kuti asiye kumbalewalewa bzinthu bzakuipa na kusiyambo kumbawona masenzeka yakuipa na cakulinga cakuti ayende patsogolo mwauzimu acifika pakubatizidwa. Iye adalewa kuti: “Pomwe inepano ndikhanati kubatizidwa, kupemba kwa Yahova ndiko komwe kudandithandiza kuti ndigumane mphanvu yomwe ndikhafunikira kuti ndicinje bzomwe ndikhacita. Yahova akhadziwa kuti inepano ndikhafuna kucita bzinthu bzabwino, ndipopa nthawe zentse akhambandithandiza na kunditsogolera.” Monika adabatizidwa pomwe akhana magole 16. Kodi pana bzinthu bzinango bzomwe imwepo mun’funika kucinja kuti mutumikire Yahova mu njira yakuthemera? Penu ndibzo, pitirizani kukumbira Yahova kuti akupaseni mphanvu kuti mucinje bzinthu pa moyo wanu. Ndipo Yahovayo an’dzakupasani mzimu wace wakucena. — Juwau 3:34.

CIKHULUPIRO CANU CINGAFUNDUSE MAPIRI

19. Kodi n’ciyani comwe cingakuthandizeni kukunda mphitca? (Onanimbo cithunzi-thunzi.)

¹⁹ Bziribe basa mabvuto yomwe imwepo mungafunikire kukunda kuti mubatizidwe, khalani na citsimikizo cakuti Yahova ambakufunani ndipo akufunambo kuti imwepo mucite mbali ya banja lace. Jezu adauza anyakupfunza wace winango kuti: “Mucikhala na cikhulupiro ninga kanjere kang’ono-ng’ono, mungakwanise kuuza phiri iri kuti, ‘coka pano uyende kule,’ ndipo iro lin’dzacokadi. Imwepo mun’dzakwanisa kucita cinthu ciri-centse.” (Mateu 17:20) Anyakupfunzawo akhadakhala kale na Jezu kwa magole yakucepa. Tsono napo bzikhali tenepo, iwo akhafunika kuthumizira cikhulupiro cawo. Ndipopa Jezu adawauza kuti penu iwo angadakhala na cikhulupiro camphanvu, Yahova angadadzawathandiza kukunda ayai kufundusa mphitca iri-yentse yomwe ingandendemerane na mapiri. Ndipo imwepo mukakhalambo na cikhulupiro camphanvu, Yahovayo an’dzakuthandizanimbo kukunda mphitca iri-yentse!

20. Kodi bziratizo bza wanthu wakale-kale na bza wa ntsiku zino bzomwe tacezerana mu nkhani ino bzingakuthandizeni tani?

²⁰ Penu pana cinthu cinango pa moyo wanu comwe cikukutazisani kubatizidwa, cinjani mwakamfulumize kuti mubatizidwe. Dziwani kuti bziratizo bza Akristau wa magole dzana yakuyambirira na bza Akristau wa ntsiku zino bzingakuthandizeni. Ndipo bziratizo bzawobzo bzikulimbikiseni kuti mubzipereke kwa Yahova mucibatizidwa. Cimweci ndico cinthu cakufunika kwene-kwene comwe imwepo mungacite!