NKHANI YAKUPFUNZA 50
NYIMBO 48 Timbafambe na Yahova Nsiku Zense
Tewezerani Kubzicepesa kwa Yahova
“Tewezerani Mulungu ninga wana wace wakufunidwa.”— AEFEZO 5:1.
CAKULINGA CA NKHANIYI
Mu nkhani ino, tin’pfunza njira zinai za momwe tingatewezerere kubzicepesa kwa Yahova.
1. Thangwe ranyi tingalewe kuti Yahova ngwakubzicepesa?
IMWEPO mukambawona atongi wa m’dzikoli ntsiku zino, kodi mungalewe kuti mbakubzicepesa? Kulewa cadidi ne. Tsono Yahova omwe ni Mulungu wamphanvu-zentse ngwakubzicepesa. (Salimo 113:5-8) Bzinthu bzentse bzomwe iye ambacita bzimbalatiza kuti ngwakubzicepesa ndipo ngwakubzikuza lini. Mu nkhani ino, tin’cezerana bzinthu bzinai bza momwe Yahova ambacitira bzinthu na ifepano ndipo tiniwonambo momwe bzinthu bzimwebzi bzimbalatizira kuti iye ngwakubzicepesa kwene-kwene. Ndipo tin’cezeranambo momwe Jezu adatewezerera kubzicepesa kwa Pai wace. Kucezerana bzinthu bzimwebzi kun’tithandiza kufendererana na Yahova na kutewezerambo kubzicepesa kwace.
YAHOVA NGWAKUFIKIRIKA
2. Kodi Salimo 62:8 ambatiuza ciyani pakulewa bza Yahova? (Onanimbo cithunzi-thunzi.)
2 Kazinji-kazinji, wanthu wakubzikuza mbakufikirika lini. Wanthu wakubzikuza ambacita bzinthu na anzawo mwakusaya kudeka mtima thangwe ambakumbuka kuti mbabwino kwene-kwene kuposa winango, ndipopa wanthu winangowo ambawatcenkha. Tsono Yahova ngwakusiyana kwene-kwene na wanthu wakubzikuzawa! Pakuti Baba wathu wakudzulu ngwakubzicepesa, iye ambatiuza kuti tipembe kwa iye ticimuuza bzomwe bzikuticitisa thupo. (Werengani Salimo 62:8.) Ninga momwe pai ambakhalira tceru kuti atetekere bzomwe bzikucitisa wana wace kukhala na thupo, Yahova akufunisisambo kubva mipembo yathu. Kulewa cadidi, iye adacitisa kuti mipembo mizinji ninga imweyi inembedwe m’Bibliya. Bzimwebzi bzikulatiza kuti iye ngwakufikirika. (Djoswa 10:12-14; 1 Samuyeli 1:10-18) Tsono nthawe zinango pinango tingakumbuke kuti tingapembe lini kwa Yahova thangwe ra pikado zizinji zomwe tidazicita.
Pai akutewezera Yahova pomwe akutetekera mwana wace mwakubzicepesa omwe wapswa vazo pomwe akhasenzeka (Onani ndime 2)
3. Thangwe ranyi mungatsimikizire kuti Yahova ambafuna kuti mumbapembe kwa iye ntsiku zentse?
3 Tingapembe kwa Yahova napo ticiwona kuti ndife lini wakuthemera kufunidwa na iye. Thangwe ranyi tingalewe bzimwebzi? Mu ciratizo ca Jezu cakulewa bza mwana wakutaika, iye adandendemezera Yahova na pai wakudeka mtima omwe mwana wace adacita bzinthu bzizinji bzakuphonyeka acikumbuka kuti pai wacewo angadamutambira lini pomwe. Kodi n’ciyani comwe pai ule adacita pomwe mwana wace adabwerera ku mui? Jezu adalewa kuti pomwe pai wacewo adamuwona na patali, “adamuthamangira, acikamukumbatira na kumumpsompsona mwa lufoyi.” (Luka 15:17-20) Yahova ali ninga pai umweyu. Iye akatibva tikupemba kwa iye pomwe tidasunama thangwe ra bzakuphonya bzathu ayai thupo, iye ambatitetekera mwatceru. (Maliro 3:19, 20) Yahova ana ntsisi na ifepano ndipo ninga momwe pai adathamangira mwana wace, iye ambatitsimikizira kuti ambatifuna na kutitsangalaza. (Zaiya 57:15) Kodi Yahova ambacita tani bzimwebzi ntsiku zino? Iye ambacita bzimwebzi mwakuphatisa basa akulu, adzinza na axamwali wathu kuti atitsangalaze. (Tiyago 5:14, 15) Yahova ambacita bzimwebzi kuti tikhale wakufendererana na iye.
4. Kodi Jezu adalatiza tani kuti akhali wakufikirika?
4 Jezu ambatewezera Pai wace. Ninga Pai wace, Jezu ngwakubzicepesa. Ndipopa pomwe iye akhali pa dziko la pantsi, wanthu akhakhala wakutsudzuka kumufenderera. Iwo akhakhala wakutsudzuka kumucita mibvunzo. (Marko 4:10, 11) Ndipo pomwe Jezuyo akhawabvunza momwe akhawonera nkhani inango, iwo akhafotokoza momwe akhabvera. (Mateu 16:13-16) Iwo akaphonya akhacita lini mantha; thangwe akhadziwa kuti Jezu akhali wakudeka mtima, wantsisi na wakupirira. (Mateu 17:24-27) Pakuti Jezu adatewezera bwino-bwino Pai wace, anyakupfunza wace adamudziwa bwino Yahova. (Juwau 14:9) Iwo adapfunza kuti Yahova ngwakusiyana kwene-kwene na atsogoleri wa bzipembedzo omwe akhali wakuuma mtima, wakubzikuza na wakusaya kufikirika. Mwa kusiyana na iwo, Jezu akhali wakubzicepesa na wakufikirika.
5. Kodi kubzicepesa kungatithandize tani kukhala wakufikirika?
5 Kodi tingatewezere tani Yahova? Tikakhala wakubzicepesa tin’dzakhala wakufikirika. Kubzicepesa kun’dzatithandiza kutcenkha kukhala wa njiru, wakubzikuza na wakusaya kulekerera yomwe ni makhalidwe yomwe yangacitise kuti winango aleke kutifenderera. Ndipo kubzicepesako kun’dzatithandizambo kukhala wakudeka mtima, wakupirira na wakulekerera yomwe ni makhalidwe yomwe yambacitisa kuti wanthu winango atifenderere. (Akolose 3:12-14) Akulu wa m’gwere an’funika kucita nyongo kuti akhale wakufikirika. Kazinji-kazinji kuti bzimwebzi bzikwanisike, iwo ambafunika kuti akhale pabodzi na abale na mpfumakazi. Bzimwebzi bzikuthandauza kuti an’funika kumbacita nyongo yakufika pa mitsonkhano ya gwere m’mbuto mwa kumbacita mitsonkhano mwakuphatisa basa vidiyokonferensiya. Ndipo pomwe mpsakukwanisika, iwo ambapalizira nyumba na nyumba pabodzi na abale na mpfumakazi. Mwa njira imweyi, abalewo an’dzawadziwa bwino akuluwo ndipo nthawe zentse an’dzakhala wakutsudzuka kuwauza akafunikira thandizo.
YAHOVA AMBANGINGIMIRA LINI NZERU ZACE
6-7. Fotokozani bziratizo bzomwe bzikulatiza kuti Yahova akhali wakukonzeka kucinja pomwe atumiki wace akhapemba kwa iye.
6 Wanthu wakubzikuza ambawona ninga kuti bzomwe ambadziwa mpsabwino ndipo ambabvuma lini kucinja nzeru zawo. Tsono Yahova omwe ambadziwa bzomwe mpsabwino ali lini tenepa. Thangwe ra kukhala wakubzicepesa, iye ngwakukonzeka kubva bzomwe winango ambalewa ndipo ambacinja bzomwe asankhula mwakubverana na bzimwebzo. Mbatiwoneni momwe iye adacitira bzinthu na Miriyamu omwe akhali m’bale wace wa Mozeji. Iye pabodzi na Aroni adalewa kuipa Mozeji omwe akhali muimikiri wa Yahova. Bzomwe iwo adacitabzo bzidalatiza kuti akhalemekeza lini Yahova. Bzimwebzi bzidacitisa kuti Yahova akalipe kwene-kwene na Miriyamu acimucitisa kuti akhale na mapere. Tsono Aroni adadandaulira Mozeji kuti amuthandize ndipo Mozejiyo adadandaulirambo Yahova kuti apoze Miriyamuyo. Kodi Yahova adacita ciyani? Munthu wakubzikuza angadacinja lini nzeru zace, tsono Yahova adacinja nzeru zace. Pakuti Yahova ngwakubzicepesa, iye adatetekera Mozeji acipoza Miriyamu. — Numero 12:1-15.
7 Yahova adalatizambo kuti ngwakubzicepesa na momwe adacitira bzinthu na Mambo Ezekiya. Mwakuphatisa basa mprofeta wace, Yahova adauza Mambo Ezekiya kuti angadafa. Ezekiya adalira ndipo adadandaulira Yahova kuti amupoze. Yahova mwa kudeka mtima adabva mpembo wa Ezekiya ndipo adamuuza kuti angadakhala pomwe na moyo magole 15. (2 Amambo 20:1, 5, 6) Kulewa cadidi, kubzicepesa kumbacitisa Yahova kukhala wantsisi na wakukonzeka kutitetekera.
8. Kodi ni bziratizo bziponi bzomwe bzikulatiza kuti Jezu ambangingimira lini nzeru zace? (Marko 3:1-6)
8 Jezu ambatewezera Pai wace. Pomwe Jezu akhali pantsi pano, iye adacitira bzinthu bzabwino wanthu winango pomwe bzikhali bzakukwanisika. Mwa ciratizo, Jezu akhapoza wanthu pa Sabudu comwe cikhali cinthu comwe atsogoleri wa magereja akhaciwona kuti cikhafunika lini kucitika. Jezu akhali lini wakuipa koma akhali wantsisi ndipo akhangingimira lini nzeru zace. (Werengani Marko 3:1-6.) Jezu akupitiriza kusaya kungingimira nzeru zace ninga msolo wa gwere lacikristau. Mwa ciratizo, winango m’gwere akacita pikado zikulu-zikulu, iye ambapirira nawo kuti iwo acinje. — Apokalipse 2:2-5.
9. Kodi n’ciyani comwe cingatithandize kuti timbaleke kungingimira nzeru zathu? (Onanimbo bzithunzi-thunzi.)
9 Kodi tingatewezere tani Yahova? Tin’funika kupfunza na Yahova kukumbuka na kucita bzinthu mwakusaya kungingimira nzeru zathu. (Tiyago 3:17) Abereki omwe ambatewezera Yahova ambadikhirira lini kuti wana wawo acite bzinthu bzomwe angakwanise lini kubzicita. Ciratizo cabwino pa nkhani imweyi ni Djakobo, ninga momwe Genesesi 33:12-14 ambalewera. Abereki wakubzicepesa na wakusaya kungingimira nzeru zawo an’funika kutcenkha kumbandendemezera wana wawo. Akulu wa gwere an’funikambo lini kumbangingimira nzeru zawo. Njira ibodzi yomwe iwo angacitire bzimwebzo ndiyo kubvuma bzomwe akulu azinji abverana nabzo bzikakhala kuti bzikupitana lini na mitemo ya m’Bibliya. (1 Timotio 3:2, 3) Ndipo tentsenefe tin’funika kuyezera kubvesesa makumbukidwe ya winango napo kuti tikubverana lini nabzo. (Aroma 14:1) Wentse m’gwere an’funika kucita nyongo yakucitisa kuti wanthu ‘wentse awone kuti ambangingimira lini nzeru zawo.’ — Afilipi 4:5.
Pai akundendemezera lini wana wace pomwe akucita upalizi (Onani ndime 9)
YAHOVA NGWAKUPIRIRA
10. Kodi ni mwa njira ziponi zomwe Yahova adalatizira kupirira?
10 Pinango imwepo mudakwanisa kale kuwona kuti wanthu wakubzikuza ambafuna lini kudikhirira. Kubzikuzako kumbawatazisa kukhala wakupirira. Iwo mbakusiyana kwene-kwene na Yahova omwe ambapirira kwene-kwene kuposa munthu ali-wentse! Mwa ciratizo, mu ntsiku za Nowa, Yahova adalewa kuti angadadikhirira magole 120 kuti apfudze wanthu wakuipa. (Genesesi 6:3) Nowa adakhala na nthawe yakukuza wana wace acikonzambo cingalawa pabodzi na banja lace. Patsogolo pace, anjo omwe akhaimira Yahova adatetekera mwakupirira pomwe Abulahamu akhamubvunza bza kupfudzidwa kwa Sodoma na Gomora. Munthu wakubzikuza angadatawira kuti: ‘Iwepo ulibe ugo bwa kundicita mibvunzo imweyi!’ Tsono mwakutewezera Yahova, anjo ule adapirira na Abulahamu. — Genesesi 18:20-33.
11. Mwakubverana 2 Pedru 3:9, thangwe ranyi Yahova ambalatiza kupirira mu ntsiku zathu zino?
11 Yahova ambalatizambo kuti ngwakupirira mu ntsiku zathu zino. Iye akudikhira nthawe yakuthemera kuti adzacose bzinthu bzakuipabzi. Thangwe ranyi iye ngwakupirira? “Thangwe an’funa lini kuti munthu ali-wentse adzapfudzidwe, koma an’funa kuti wanthu wentse akungule.” (Werengani 2 Pedru 3:9.) Kodi kupirira kwa Yahova kukundoyenda papezi? Ne! Wanthu azinji akukhala axamwali wace. Ndipo tikudikhirira kuti wanthu winango azinji acitembo bzimwebzi. Tsono kupirira kwa Yahova kuna malire. Yahova ambafuna wanthu, tsono ni nthawe lini zentse zomwe iye an’dzawalekerera kuti acite bzomwe akufuna. Iye an’dzalekerera lini kuti bzinthu bzakuipa bzipitirize mpaka kale-kale. — Habakuki 2:3.
12. Kodi Jezu ambatewezera tani kupirira kwa Yahova?
12 Jezu ambatewezera Pai wace. Jezu ambatewezera kupirira kwa Yahova kwa magole mazinji. Jezu adawona pomwe Sathani akhalewa kuipa Yahova pabodzi na wanthu wakukhulupirika. (Genesesi 3:4, 5; Djobi 1:11; Apokalipse 12:10) Jezu adawonambo wanthu azinji akubonera kwene-kwene. Kumbukirani momwe iye akufunisisira ‘kupfudza mabasa ya Dyabu’! (1 Juwau 3:8) N’ciyani comwe cimbacitisa Jezu kudikhirira mwakupirira kuti Yahova amubvumize kupfudza mabasa ya Dyabu? Thangwe libodzi ndakuti Jezu ngwakubzicepesa. Yahova ndiye omwe ambadziwa nthawe yomwe an’dzamalisa bzimwebzi. — Mabasa 1:7.
13. Kodi Jezu adapirira tani na apostolo wace, ndipo n’thangwe ranyi?
13 Pomwe Jezu akhali pantsi pano adapirirambo na apostolo wace. Mwa ciratizo, pomwe apostolowo akhanesana mwakubwereza-bwereza kuti mbani omwe akhali mkulu, Jezu alibe kukalipa nawo. M’mbuto mwace, iye adapitiriza kukhala wakupirira. (Luka 9:46; 22:24-27) Thangwe ranyi? Thangwe iye akhadziwa kuti na kupita kwa nthawe, iwo angadadzacinja. Kodi imwepo mwacita cinthu cinango cakuphonyeka mwakubwereza-bwereza? Penu mun’ti inde, bzikuwonekeratu kuti mumbatenda kwene-kwene thangwe ra kukhala na Mambo wakubzicepesa na wakupirira.
14. N’ciyani comwe cin’dzatithandiza kukhala wakupirira?
14 Kodi tingatewezere tani Yahova? Kuti timbakumbuke na kumbacita bzinthu ninga Yahova tin’funika kupfunza momwe Jezu ambakumbukirira. (1 Akolinto 2:16) Kodi n’ciyani comwe cingatithandize kumbakumbuka ninga Jezu? Njira ibodzi yakufunika kwene-kwene ni kumbawerenga ntsiku zentse nkhani zakulewa bza moyo wa Jezu m’Bibliya. Patsogolo pace, tin’funika kumbapambula nthawe kuti timbakumbukire bzomwe Jezu adacita na thangwe lomwe lidamucitisa kucita bzimwebzo. Ndipo tin’funikambo kukumbira Yahova kuti atithandize kukhala wakubzicepesa na wakupirira ninga Jezu. Tikapfunza kumbakumbuka ninga Jezu, tin’dzakwanisa kutewezera Yahova mwa kukhala wakupirira na winango. — Mateu 18:26-30, 35.
YAHOVA AMBAWONA WALE OMWE MBAKUBZICEPESA
15. Fotokozani bziratizo bzomwe bzikulatiza kuti Yahova ambawona wanthu wakubzicepesa. (Salimo 138:6)
15 Werengani Salimo 138:6. Ni mwayi ukulu kwene-kwene kwa wanthu wakubzicepesa kuwonedwa na Mtongi wa pa dziko lentse omwe ni Yahova! Kwa magole mazinji, pakhana wanthu omwe akhanyozedwa na anzawo. Tsono Yahova adawawona. Winango wa iwo pinango tingawakumbukire lini tsono adanembedwa m’Bibliya. Mwa ciratizo, Debora adatumikira m’banja la Izaki na Djakobo kwa magole 125! Napo kuti pakhadziwika lini bzinthu bzizinji pakulewa bza mkazi wakukhulupirikayu, Yahova adacitisa kuti Mozeji anembe momwe iye akhafunidwira. (Genesesi 24:59; 35:8, mafala ya m’nyantsi) Na kupita kwa nthawe, Yahova adasankhula tswaka linango lomwe likhali makabusa lakucemeredwa Davide kuti likhale mambo wa Ajirayeri. (2 Samuyeli 22:1, 36) Pambuyo pa Jezu kubadwa, Yahova adatumiza anjo kwa thimu linango la amakabusa ndipo adawatumbiza mwakuwapasa mwayi wakukhala wakuyamba kudziwa kuti Mesiya akhadabadwa ku Betelehemu. (Luka 2:8-11) Ndipo pomwe Zuze na Mariya adayenda na Jezu ku templo, Yahova adapasa acikulire awiri omwe akhali Simiyoni na Ana mwayi wakuwona Mwana wace. (Luka 2:25-30, 36-38) Kulewa cadidi, “napo kuti Yahova ali padzulu ambawona wanthu wakubzicepesa”!
16. Kodi Jezu adatewezera tani momwe Pai wace akhacitira bzinthu na wanthu?
16 Jezu ambatewezera Pai wace. Ninga Pai wace, Jezu akhafunambo wanthu omwe akhanyozedwa na wanthu winango. Iye adapfunzisa wanthu “wakusaya kupfunza,” cadidi cakulewa bza Umambo bwa Mulungu. (Mabasa 4:13; Mateu 11:25) Jezu adapoza atenda ndipo adacita bzimwebzo mu njira yomwe idawacitisa kubzibva kuti akhafunidwa na kulemekezedwa. (Luka 5:13) Pa usiku bwakumalizira pomwe akhanati kuphedwa, Jezu adatsuka minyendo ya apostolo wace comwe ni cinthu comwe kazinji-kazinji cikhacitidwa na anyabasa. (Juwau 13:5) Ndipo pomwe akhanati kuyenda kudzulu, iye adapasa anyakupfunza wace kuphatanidzambo ifepano mwayi wakucita basa lakufunika kwene-kwene lomwe ni lakuthandiza wanthu kudzakhala na moyo wakusaya kumala. — Mateu 28:19, 20.
17. Kodi tingalatize tani lufoyi na ulemu kwa wanthu winango? (Onanimbo cithunzi-thunzi.)
17 Kodi tingatewezere tani Yahova? Timbalatiza lufoyi na ulemu kwa wanthu tikambapalizira mafala yabwino kwa wentse bziribe basa komwe adacokera, mtundu wawo ayai penu adapfunza ayai ne. Ndipo timbalatiza kuti timbafuna na kulemekeza abale na mpfumakazi zathu tikambawawona kukhala wapadzulu kuposa ifepano bziribe basa udindo buli-bwentse bomwe tingakhale nabo. (Afilipi 2:3) Yahova ambakomedwa tikakhala wakubzicepesa ndipo tikambacitira bzinthu wanthu winango mwa lufoyi na mwa ulemu mu njira imweyi na zinango. — Aroma 12:10; Zefaniya 3:12.
Timbatewezera kubzicepesa kwa Yahova tikambapalizira mafala yabwino kwa wanthu wa mtundu uli-wentse (Onani ndime 17)a
18. Thangwe ranyi imwepo mukufuna kutewezera kubzicepesa kwa Yahova?
18 Tikambacita nyongo yakutewezera kubzicepesa kwa Pai wathu wa kudzulu, tin’dzakhala wakufikirika, tin’dzangingimira lini nzeru zathu ndipo tin’dzakhala wakupirira. Ndipo tin’dzafuna winango na kuwalemekeza ninga momwe Yahova ambafunira. Ndipo kumbukirani kuti tikambacita bzomwe tingakwanise kuti tikhale wakundendemerana na Mulungu wathu wakubzicepesa, bzimwebzi bzin’dzacitisa kuti tikhale wakufunika kwene-kwene pamaso pace! — Zaiya 43:4.
NYIMBO 159 Perekani Ulemerero kwa Yahova
a BZOMWE BZIKUCITIKA PA CITHUNZI-THUNZI: Mwakubzicepesa mpfumakazi zikutewezera Yahova pomwe zikupfunzisa anyam’kawoko.