NKHANI YAKUPFUNZA 10
NYIMBO 31 Kufamba na Mulungu!
Tewezerani Momwe Yahova na Jezu Ambakumbukirira
“Pakuti Kristu adabonera m’thupi, imwepombo bzikonzekereseni kuti mumbakumbuke ninga iye.” — 1 PEDRU 4:1.
CAKULINGA CA NKHANIYI
Tiniwona bzomwe Pedru adapfunza na momwe Jezu ambakumbukirira ndipo tiniwonambo bzomwe ifepano tingapfunze.
1-2. Kodi kufuna Yahova kumbaphatanidza ciyani, ndipo Jezu adalatiza tani bzimwebzi?
JEZU adafotokoza lamulo lakufunika kwene-kwene pa Malamulo yentse ya Mozeji. Iye adati: “Umbafune Yahova Mulungu wako na mtima wako wentse, moyo wako wentse, mphanvu zako zentse [na] nzeru zako zentse.” (Luka 10:27) Onani kuti kufuna Yahova kumbaphatanidza kumufuna na mtima wathu wentse ndipo bzimwebzi bzimbaphatanidzambo bzomwe timbakhumba kucita na bzomwe timbakumbuka. Ndipo kumbaphatanidzambo kubzipereka na mtima wathu wentse na mphanvu zathu zentse. Ndipombo kufuna Yahova kumbaphatanidza pomwe momwe timbakumbukirira. Cadidi n’cakuti ifepano tingakumbuke lini ndendende ninga momwe Yahova ambakumbukirira. Ifepano tingabvesese momwe Yahova ambakumbukirira mwa kumbapfunza momwe ‘Kristu ambakumbukirira’ thangwe Jezu ambakumbuka ninga Pai wace. — 1 Akolinto 2:16.
2 Jezu akhafuna Yahova na nzeru zace zentse. Iye akhadziwa bzomwe Mulungu akhafuna kuti iye acite. Ndipo akhadatsimikiza kucita bzimwebzo napo akhadziwa kuti angadabonera. Pakuti Jezu akhadatsimikiza kukondwesa Pai wace, iye alibe kulekerera kuti cinthu ciri-centse cikhale cakufunika kwene-kwene pa moyo wace.
3. Kodi n’ciyani comwe mpostolo Pedru adapfunza na Jezu, ndipo adalimbikisa kuti Akristau winango ambacite ciyani? (1 Pedru 4:1)
3 Pedru na apostolo winango adakhala na mwayi wa kukhala na Jezu kwa nthawe itali ndipo adapfunzambo momwe iye ambakumbukirira. Pomwe Pedru adafuliziridwa kuti anembe tsamba lace lakuyamba, iye adalimbikisa Akristau kubzikonzekeresa kuti ambakumbuke ninga Kristu. (Werengani 1 Pedru 4:1.) Pomwe Pedru adanemba kuti “bzikonzekereseni,” iye adaphatisa basa fala limweri pakufuna kulewa bza bzifuzo bzomwe acikunda ambanyamula pakufuna kuyenda ku nkhondo. Na tenepo, Akristau akapfunza na momwe Jezu akhakumbukirira iwo an’dzakwanisa kulimbana na bzikhumbo bzomwe bzingawacitise kuti acite bzinthu bzakuipa. — 2 Akolinto 10:3-5; Aefezo 6:12.
4. Kodi tin’pfunza ciyani mu nkhani ino?
4 Mu nkhani ino, tin’pfunza momwe Jezu ambakumbukirira ndipo tiniwonambo momwe tingamutewezerere. Ndipo tin’pfunzambo (1) momwe tingakumbukirire ninga Yahova bzomwe bzin’dzatithandiza kukhala na makumbukidwe mabodzi-bodzi, (2) kukhala wakubzicepesa na (3) kukhala wanzeru ticimbathemba Yahova pomwe tikucita mpembo.
TEWEZERANI MOMWE YAHOVA AMBAKUMBUKIRIRA
5. Kodi pa nthawe inango Pedru adalatiza tani kuti akhakumbuka lini ninga momwe Yahova akhakumbukirira?
5 Mbatiwoneni bzomwe Pedru adacita nthawe inango bzomwe bzimbalatiza kuti akhakumbuka lini ninga momwe Yahova ambakumbukirira. Pa nthawe imweyi ni pomwe Jezu adauza apostolo wace kuti iye akhafunikira kuyenda ku Jeruzalemu komwe angadaboneresedwa na atsogoleri wa magereja na kuphedwa. (Mateu 16:21) Pedru akhadziwa kuti Jezu akhali Mesiya omwe angadadzapulumusa wanthu wa Mulungu. Ndipopa bzidakhala bzakunesa kwa Pedruyo kukhulupira kuti Yahova angadalekerera kuti Jezu aphedwe. (Mateu 16:16) Tenepo Pedru adatenga Jezu aciyenda naye pambali acimuuza kuti: “Lekani kulewa bzinthu bzimwebzi Mbuya; bzimwebzi bzin’kucitikirani lini ne na pang’onopo.” (Mateu 16:22) Pedru na Jezu akhabvesesana lini pa nkhaniyo thangwe Pedruyo akhakumbuka lini ninga momwe Yahova akhakumbukirira.
6. Kodi Jezu adalatiza tani kuti akhakumbuka ninga momwe Yahova ambakumbukirira?
6 Jezu akhadziwa momwe Pai wace ambakumbukirira ndipopa iye adatewezera makumbukidwe ya Pai wacewo. Jezu adauza Pedru kuti: “Coka kutsogolo kwangu Sathani! Iwepo ndiwe mwala wakukhukhumudwisa, thangwe ulibe makumbukidwe ya Mulungu, koma ya wanthu.” (Mateu 16:23) Pinango Pedru akhana cakulinga cakufuna kumuthandiza, tsono Jezu adalamba malango yaceyo. Thangwe ranyi? Thangwe Jezu akhadziwa kuti acite kufuna kwa Yahova akhafunika kubonera na kufa. Na bzimwebzi, Pedru adapfunza kumbakumbuka ninga momwe Yahova ambakumbukirira. Ifepano tikupfunzambo nfundo yakufunika kwene-kwene na nkhani imweyi.
7. Kodi Pedru adalatiza tani kuti akhafuna kumbakumbuka ninga momwe Yahova ambakumbukirira? (Onanimbo cithunzi-thunzi.)
7 Na kupita kwa nthawe, Pedru adadzalatiza kuti akhafuna kumbakumbuka ninga momwe Yahova ambakumbukirira. Ikhadafika nthawe yakuti wanthu wa mitundu inango acitembo mbali ya wanthu wa Yahova. Mulungu adatsogolera Pedru kuti akapalizire Korneliyo omwe adakhala munthu wakuyamba wa mtundu munango kukhala Mkristau. Adjuda akhalibe basa na wanthu wa mitundu inango, ndipopa Pedru akhafunikira thandizo kuti akwanise kupalizira wanthu wa mitundu inangoyo. Pomwe Pedru adazindikira bza kufuna kwa Mulungu pa nkhaniyi, iye adacinja makumbukidwe yace. Pomwe Korneliyo adauza Pedru kuti akamuzungire, Pedruyo “mwakusaya kupenukira” adayenda kamuzungira. (Mabasa 10:28, 29) Iye adapalizira Korneliyo ndipo Korneliyoyo pabodzi na adzinza wace adabatizidwa. — Mabasa 10:21-23, 34, 35, 44-48.
Pedru akupita m’nyumba mwa Korneliyo (Onani ndime 7)
8. Kodi tingalatize tani kuti timbakumbuka ninga momwe Yahova ambakumbukirira? (1 Pedru 3:8 na mafala ya m’nyantsi)
8 Pomwe padapita magole, Pedru adadzalimbikisa Akristau winango kuti akhale na “makumbukidwe yakuphatana.” (Werengani 1 Pedru 3:8 na mafala ya m’nyantsi.) Ifepano tingambakumbuke ninga momwe abale na mpfumakazi zathu ambakumbukirira tikambatewezera makumbukidwe ya Yahova yomwe yambafotokozedwa m’Bibliya. Jezu adalimbikisa ateweri wace kuti ambaikhe Umambo bwa Mulungu pa mbuto yakuyamba. (Mateu 6:33) Pinango m’bale ayai mpfumakazi ya m’gwere mwanu angafune kucita upainiya ayai utumiki bunango. M’mbuto mwa kumuuza kuti acite cinthu cinango sikuti upainiya ayai utumiki bunangobo, tin’funika kumbalewalewa mafala yakulimbikisa na kumuthandiza kukwanirisa cakulingaco.
KHALANI WAKUBZICEPESA
9-10. Kodi Jezu adalatiza tani kuti akhali wakubzicepesa kwene-kwene?
9 Usiku bomwe Jezu akhanati kuphedwa, iye adapfunzisa Pedru na apostolo winango kufunika kwa kukhala wakubzicepesa. Pomwe akhanati kuwapfunzisa bza nkhani yakubzicepesayo, Jezu adatuma Pedru na Juwau kuti akakonzekere bzinthu bzomwe angadadzabziphatisa basa pa cakudya cakumalizira comwe iye angadadya nawo pabodzi pomwe akhanati kuphedwa. Cinthu cibodzi comwe iwo akhafunika kutsimikizira n’cakuti pamwepo pakhafunika basiya na tuwadya kuti wanthu omwe angadacemeredwa kuti adzadye cakudyaco adzayambe kutsuka minyendo yawo pomwe akanati kudya cakudyaco. Tsono mbani omwe angadabzicepesa kuti adzatsuke minyendo ya winango?
10 Jezu alibe kuzeza kucita basa limweri ndipo adalatiza kuti akhali wakubzicepesa kwene-kwene. Pinango apostolowo adadabwa kwene-kwene pomwe adawona Jezu akuphata basa lomwe likhacitidwa na anyabasa. Jezu adacosa cakubvala cace cakunja acimangirira tuwadya m’nciuno mwace, adaikha madzi m’basiya ndipo adayamba kutsuka minyendo yawo. (Juwau 13:4, 5) Pinango Jezu adatenga nthawe ikulu kuti atsuke minyendo ya apostolo 12 wale kuphatanidzambo Djuda omwe patsogolo pace angadadzamuphindukira. Napo bziri tenepo, mwakubzicepesa Jezu adatsuka minyendoyo. Patsogolo pace, Jezu adalewa kuti: “Kodi mukudziwa thangwe ranyi ndatsuka minyendo yanuyi? Imwepo mumbandicemera ‘Mpfunzisi’ na ‘Mbuya,’ ndipo mumbalewa cadidi, pakuti ndinedi. Tenepo, penu ine Mbuya na Mpfunzisi ndatsuka minyendo yanu, imwepo mun’funikambo kumbatsukana minyendo.” — Juwau 13:12-14.
Kukhala wakubzicepesa kumbaphatanidza . . . bzomwe ifepano timbakumbuka na momwe timbakumbukirira wanthu winango
11. Kodi Pedru adalatiza tani kuti akhadapfunza kukhala wakubzicepesa? (1 Pedru 5:5) (Onanimbo cithunzi-thunzi.)
11 Pedru adapfunza cinthu cakufunika kwene-kwene na kubzicepesa kwa Jezu. Pambuyo pa Jezu kubwerera kudzulu, Pedru adacita cakudabwisa mwa kupoza mwamuna munango omwe akhadabadwa wakupunduka. (Mabasa 1:8, 9; 3:2, 6-8) Pomwe wanthu azinji adawona bzimwebzi adadabwa kwene-kwene. (Mabasa 3:11) Tsono Pedru alibe kufuna kuti wanthuwo amutumbize napo kuti iye adakulira m’cikhalidwe comwe wanthu azinji akhafuna kwene-kwene kubvekera. M’mbuto mwace, mwakubzicepesa Pedru alibe kufuna kutumbizidwa. Iye adauza wanthuwo kuti atumbize Yahova pabodzi na Jezu mwakuwauza kuti: “Munthu omwe mukumuwonayu imwepo mumbamudziwa, iye wapozedwa mu dzina la Jezu na thangwe ra kukhulupira kwathu pa dzina la Jezuyo.” (Mabasa 3:12-16) Mafala yomwe Pedru adayaphatisa basa pakunembera tsamba Akristau pakulewa bza kufunika kwa kubzicepesa yangatikumbuse momwe Jezu adacitira bzinthu mwakubzicepesa, pomwe adamangirira tuwadya m’nciuno mwace acitsuka minyendo ya apostolo wace. — Werengani 1 Pedru 5:5.
Pambuyo pa Pedru kucita cakudabwisa, iye adatumbizisa Yahova na Jezu. Ifepano tin’funikambo kukhala wakubzicepesa mwa kumbacitira winango bzinthu bzabwino napo kuti wanthu winango angazindikire lini bzimwebzo (Onani ndime 11-12)
12. Kodi tingakhale tani ninga Pedru ticipitiriza kukhala wakubzicepesa?
12 Tingatewezere Pedru mwakupitiriza kupfunza kukhala wakubzicepesa. Kukhala wakubzicepesa kumbandophatanidza lini bzomwe timbalewa. Fala lomwe Pedru adaliphatisa basa pakulewa bza kubzicepesa limbaphatanidza bzomwe ifepano timbakumbuka na momwe timbakumbukirira wanthu winango. Ifepano timbacitira bzinthu bzabwino wanthu winango thangwe rakuti timbafuna Yahova nakuti timbafunambo wanthu sikuti thangwe ra kufuna kutumbizidwa. Na tenepo, tingalatize kuti ndife wakubzicepesa tikambatumikira Yahova mwakukondwa na kumbacitira bzinthu bzabwino abale wathu napo kuti wanthu winango angawone lini bzimwebzi. — Mateu 6:1-4.
KHALANI “WANZERU”
13. Fotokozani kuti “kukhala wanzeru” kumbaphatanidza ciyani.
13 Kodi kukhala “wanzeru” kumbaphatanidza ciyani? (1 Pedru 4:7) Kumbaphatanidza bzomwe Mkristau ambacita pomwe akanati kusankhula kucita cinthu. Iye ambayamba wakumbukira momwe Yahova ambaciwonera cinthuco. Mkristauyo ambadziwa kuti palibe cinthu cakufunika kwene-kwene kuposa uxamwali bwace na Yahova. Iye ambabziwona mwakuthemera ndipo ambatcenkha kukumbuka kuti iye ambadziwa bzentse. Ndipo iye ambalatiza kuti ambathemba Yahova mwa kumbapemba kwa Yahovayo kuti amuthandize.a
14. Kodi pa nthawe inango Pedru adasiya tani kuthemba Yahova?
14 Usiku bomwe Jezu akhanati kuphedwa, iye adacenjeza anyakupfunza wace mwa kuwauza kuti: “Mwentsenemwe mun’ndithawa usiku buno.” Tsono Pedru adatawira mwakubzithemba kuti: “Napo wentse acikuthawani, inepano cipo ndicidzakuthawani!” Usiku bumwebule, Jezu adauza anyakupfunza wace winango kuti: “Pitirizani kukhala mudapenya ndipo mbapembani nthawe zentse.” (Mateu 26:31, 33, 41) Bzingadakhala kuti Pedru adaphatisa basa malango yamweyale, iye angadakhala wakukhwimika ndipo angadamulamba lini Jezu. Tsono, Pedru adalewa kuti akhamudziwa lini Jezu ndipo bzimwebzi bzidamucitisa kuti asuname kwene-kwene. — Mateu 26:69-75.
15. Kodi Jezu adalatiza tani kuti akhathemba Yahova pa usiku bwakumalizira pomwe akhanati kuphedwa?
15 Jezu akhathemba kwene-kwene Yahova. Napo kuti akhali wakulungamiratu, iye adapemba mwakubwereza-bwereza usiku bwakumalizira pomwe akhanati kuphedwa. Bzimwebzi bzidamuthandiza kukhala wakukhwimika kuti acite bzomwe Yahova akhafuna kuti iye acite. (Mateu 26:39, 42, 44; Juwau 18:4, 5) Kulewa cadidi, pomwe Pedru adawona kuti Jezu akhapemba mwakubwereza-bwereza, bzimwebzi bzidan’thandizambo kwene-kwene.
16. Kodi Pedru adalatiza tani kuti akhali wanzeru? (1 Pedru 4:7)
16 Na kupita kwa nthawe, Pedru adapfunza kumbathemba kwene-kwene Yahova mwa kumbapemba kwa iye. Pomwe Jezu adalamusidwa, iye adatsimikizira Pedru pabodzi na apostolo anzace kuti angadadzatambira mzimu wakucena omwe ungadadzawathandiza kupalizira mafala yabwino. Na tenepo, Jezu adawauza kuti abakadikhirire ku Jeruzalemu mpaka kucitika kwa bzimwebzi. (Luka 24:49; Mabasa 1:4, 5) Kodi n’ciyani comwe Pedru adacita pomwe akhadikhirira bzimwebzi? Pedru na Akristau anzace “adapitiriza kupemba.” (Mabasa 1:13, 14) Pomwe adadzanemba tsamba lace lakuyamba, Pedru adalimbikisa Akristau anzace kuti akhale wanzeru na kumbathemba Yahova mwa kupemba. (Werengani 1 Pedru 4:7.) Pedru adapfunza kuthemba Yahova ndipo adakhala wakukonzeka kuthandiza na kulimbikisa abale na mpfumakazi zace. — Agalatiya 2:9.
17. Napo kuti tingakhale na luso linango, n’ciyani comwe tin’funika kupitiriza kucita? (Onanimbo cithunzi-thunzi.)
17 Kuti ifepano tikhale wanzeru tin’funika kupitiriza kumbapemba nthawe zentse kwa Yahova, bziribe basa luso lomwe tingakhale nalo. Ndipo pomwe tikufuna kusankhula cinthu tin’funika kumbapemba kwa Yahova kuti atithandize, thangwe ndiye yekha omwe ambadziwa bzomwe mpsabwino kwa ifepano.
Pedru adapfunza kuthemba Yahova mwa kumbapemba kwa iye. Ifepano tingakhalembo wanzeru tikambapemba kwa iye ticimukumbira thandizo pomwe tikufuna kusankhula cinthu cakufunika kwene-kwene pa moyo wathu (Onani ndime 17)b
18. N’ciyani comwe tingacite kuti timbakumbuke ninga momwe Yahova ambakumbukirira?
18 Timbatenda kwene-kwene Yahova thangwe adatilenga mu njira yomwe timbakwanisa kutewezera makhalidwe yace. (Genesesi 1:26) N’cadidi kuti tingakwanise lini kumutewezereratu bwino-bwino Yahova. (Zaiya 55:9) Tsono ninga Pedru, ifepano tingakumbuke ninga momwe Yahova ambakumbukirira. Tingacite bzimwebzi mwa kucita nyongo ya kumbakumbuka ninga momwe Yahovayo ambakumbukirira, kukhala wakubzicepesa na kukhalambo wanzeru.
NYIMBO 30 Baba Wangu, Mulungu Wangu na Xamwali Wangu
a Kuti mudziwe thandauzo la mafala yakuti kukhala wanzeru, onani mu jw.org ayai mu aplikativo ya JW Library® nkhani yakuti, “Kufotokoza mavesi ya m’Baibulo” pa “2 Timoteyo 1:7 — ‘Mulungu sanatipatse mzimu wamantha,’” pa kamsolo kakuti “Kuganiza bwino.”
b BZOMWE BZIKUCITIKA PA CITHUNZI-THUNZI: Mpfumakazi ikucita mpembo na mu mtima pomwe ikudikhirira kucitidwa mibvunzo kuti ipite basa.