MSOLO 22

“Kucitike Kufuna kwa Yahova”

Paulo akhadatsimikiza kuyenda ku Jeruzalemu kuti akacite kufuna kwa Mulungu

Nkhaniyi yacokera pa Mabasa 21:1-17

1-4. N’thangwe ranyi Paulo akhayenda ku Jeruzalemu, ndipo n’ciyani cingadakamucitikira kumweko?

POMWE Paulo na Luka akhafuna kucoka mu mzinda wa Mileto abale wentse adasunama kwene-kwene. Bzikhali lini bzakupusa kwa amisiyonario awiriwa kugonekana na akulu wa gwere la ku Efezo omwe akhawafuna kwene-kwene. Awiriwo adapakira naviyo ndipo adanyamula bzinthu bzakufunikira pa ulendobo. Iwo akhadanyamulambo mphaso zomwe akhadatambira kuti akapase Akristau wakusaya omwe akhali ku Djudeya, ndipo akhawona ninga akucedwa kufika kuti akapereke mphasozo.

² Padayamba kamphepo komwe kadafuthula bzinguwo bza naviyo, ndipo naviyoyo idayamba kufamba. Amuna awiri wale pabodzi na amuna winango 7 omwe akhawaperekeza, adanyang’anisa abale omwe akhadaima mphepete mwa nyanza omwe akhadasunama. (Mab. 20:4, 14, 15) Paulo pabodzi na anzacewo adapitiriza kuimisira manja abalewo mpaka pomwe akhadzawawona lini pomwe.

³ Paulo adaphata basa pabodzi na akulu wa ku Efezo magole matatu. Koma tsapano, mwakutsogoleredwa na mzimu wakucena, iye ali pa ulendo bwakuyenda ku Jeruzalemu. Iye akhadziwa lini bzentse bzomwe bzingadamucitikira thangwe akhadauza kale akulu wa ku Efezo kuti: “Mwakubvera mzimu wa Mulungu, ndikuyenda ku Jeruzalemu, napo kuti ndikudziwa lini comwe cin’kandicitikira kumweko. Tsono comwe ndikudziwa, n’cakuti mzimu wakucena umbandiuza mu mzinda uli-wentse, kuti kumangidwa na matsautso bzikundidikhirira.” (Mab. 20:22, 23) Napo kuti Paulo akhadziwa ngozi yomwe ingadacitika, iye adawona kuti akhafunika kubvera malango ya mzimu wa Mulungu kuti ayende ku Jeruzalemu, ndipo akhali wakukonzeka kucita bzimwebzi. Paulo akhafuna lini kufa, tsono kucita kufuna kwa Mulungu cikhali cinthu cakufunika kwene-kwene kwa iye.

⁴ Kodi imwepo mumbabzibvambo tenepa? Pomwe tidabzipereka kwa Yahova, tidalumbira kuti kucita kufuna kwa Mulungu cingadakhala cinthu cakufunika kwene-kwene pa moyo wathu. Kukumbukira ciratizo ca mpostolo Paulo kungakhale kwakuthandiza kwene-kwene kwa ifepano.

Adapita Pafupi na ku “Ntsuwa ya Xipre” (Mabasa 21:1-3)

5. Kodi Paulo na anzace adafamba tani kuti akafike ku Tiro?

⁵ Naviyo yomwe Paulo pabodzi na anzace akhadapakira idayenda lunga-lunga mpaka ku Kosi ntsiku imweyoletu, bzomwe bzikulatiza kuti kukhacita mphepo yabwino yomwe idawathandiza. (Mab. 21:1) Bzikuwoneka kuti ntsiku imweyire naviyoyo idagona kumweko ikanati kuyenda ku Rode na ku Patara. Ku Patara, komwe ni ku suli kwa Ásia Menor, abalewo adapakira naviyo ikulu yomwe ikhanyamula mitolo, yomwe idawayendesa ku Tiro, komwe ni ku Finisiya. Pomwe akhali mu njira, iwo ‘adapita pafupi na ntsuwa ya Xipre kumadzere’ kwa naviyoyo. (Mab. 21:3) N’thangwe ranyi Luka munembi wa bukhu la Mabasa adafotokoza nfundo imweyi?

6. (a) N’thangwe ranyi kuwona ntsuwa ya Xipre pinango-pentse kudalimbikisa Paulo? (b) Kukumbukira momwe Yahova ambakusimbani na kukuthandizani, kumbakucitisani kucita ciyani?

⁶ Pinango Paulo adalata ntsuwayo aciwuza anzacewo bzomwe bzidamucitikira kumweko. Pa ulendo bwace bwakuyamba bwa umisiyonario, pomwe pakhadapita magole 9, Paulo, Barnaba na Juwau Marko adagumana na munthu munango omwe akhambacita bzamatsenga dzina lace Elima, omwe akhatsutsa basa lawo lakupalizira. (Mab. 13:4-12) Kuwona ntsuwa ire na kukumbukira bzomwe bzidamucitikira kumweko bzidalimbikisa na kuthandiza Paulo kukhala wakukhwimika pa bzinthu bomwe bzingadacitika. Ifepanombo tingagumane phindu tikambakumbukira momwe Mulungu akutisimbira na kutithandiza kulimbana na mayezo. Mwakusaya kupenukira, timbabzibva ninga momwe Davide adabvera, omwe adanemba kuti: “Nyakulungama ambagumana na matsoka mazinji, koma Yahova ambamupulumusa pa matsoka yentseneya.” — Sal. 34:19.

“Tidanyang’ana Anyakupfunza Ticiwagumana” (Mabasa 21:4-9)

7. N’ciyani comwe Paulo na anzace adacita pomwe adafika ku Tiro?

⁷ Paulo akhadziwa kufunika kwa kucita bzinthu pabodzi na Akristau anzace ndipo akhafunisisa kukhala nawo pabodzi. Luka adanemba bzomwe iye na anzace omwe akhacita nawo ulendo adacita pomwe adafika ku Tiro, iye adati: “Tidanyang’ana anyakupfunza ticiwagumana.” (Mab. 21:4) Pomwe adadziwa kuti ku Tiro kukhana Akristau, iwo adawanyang’ana ndipo pinango-pentse adakhala nawo pabodzi. Cibodzi mwa bzisimbo bzikulu bzomwe timbakhala nabzo thangwe ra kudziwa cadidi, ni kugumana abale kuli-kwentse komwe tingayende ndipo iwo ambatitambira na manja mawiri. Omwe ambafuna Mulungu na omwe ambanamata mwacadidi ana axamwali pa dziko lentse.

8. Kodi mafala ya pa Mabasa 21:4 yakuthandauza ciyani?

⁸ Paulo na anzace adakhala ntsiku 7 ku Tiro, ndipo Luka adanemba kuti mu ntsiku zimwezi kudacitika cinthu comwe iwo akhadikhirira lini. Iye adati: “Mwakutsogoleredwa na mzimu wakucena, iwo adauza Paulo mwakubwereza-bwereza kuti aleke kukaponda ku Jeruzalemu.” (Mab. 21:4) Kodi Yahova akhafuna lini kuti Paulo ayende ku Jeruzalemu? Ne ndibzo lini. Mzimu wakucena udalatiza kuti Paulo angadakaboneresedwa ku Jeruzalemu, sikuti iye aleke kuyenda mu mzinda umweyu. Bzikuwoneka kuti, mwakuthandizidwa na mzimu wakucena, abale wa ku Tiro adawona kuti Paulo angadakagumana na mabvuto ku Jeruzalemu. Tenepo, pakuti iwo akhafuna lini kuti Paulo akagumane na mabvutoyo, adamulimbikisa kuti aleke kuyenda mu mzinda umweule. Iwo akhafuna kukhotcerera Paulo ku ngozi yomwe ingadamucitikira, ndipo bzimwebzi bzikhali bzakubveka. Napo bzikhali tenepo, pakuti Paulo akhadatsimikiza kucita kufuna kwa Yahova, iye adapitiriza ulendo bwace mpaka ku Jeruzalemu. — Mab. 21:12.

9, 10. (a) Kodi pinango Paulo adakumbukira ciyani pomwe adabva thupo la abale wa ku Tiro? (b) Kodi n’ciyani comwe wanthu azinji ambafuna ntsiku zino, ndipo bzikupitana tani na mafala ya Jezu?

⁹ Pomwe Paulo adabva thupo lomwe abale akhanalo, pinango adakumbukira kuti Jezu adagumanambo na bzinthu ninga bzimwebzi pomwe adauza anyakupfunza wace kuti akhayenda ku Jeruzalemu ndipo kumweko angadakaboneresedwa na kuphedwa. Thangwe ra thupo, Pedru adauza Jezu kuti: “Lekani kulewa bzinthu bzimwebzi Mbuya; bzimwebzi bzin’kucitikirani lini ne na pang’onopo.” Jezu adamutawira kuti: “Coka kutsogolo kwangu Sathani! Iwepo ndiwe mwala wakukhukhumudwisa, thangwe ulibe makumbukidwe ya Mulungu, koma ya wanthu.” (Mat. 16:21-23) Jezu akhadatsimikiza kucita bzomwe Mulungu akhadamuuza. Paulo akhadatsimikizambo kucita bzimwebzi. Abale wa ku Tiro, mwakundendemerana na mpostolo Pedru, tikupenukira lini kuti akhana makumbukidwe yabwino, tsono akhazindikira lini kufuna kwa Mulungu.

Mwakusaya kupirira, m’bale akuwona nthawe pomwe ali mu upalizi. Mwanzace omwe akupalizira naye pabodzi akumunyang’anisisa. — Kutewezera ciratizo ca Jezu kumbafuna mzimu wakubzimana

¹⁰ Ntsiku zino wanthu azinji ambafuna bzinthu bzabwino bzokha-bzokha ayai ambafuna kucita bzinthu bzakusaya kunesa. Wanthu azinji ambafuna gereja yomwe iniwalekerera kucita bzomwe akufuna ndipo iribe malamulo mazinji. Tsono Jezu adauza anyakupfunza wace kuti akhale na makumbukidwe yakusiyana na yamweya. Iye adawauza kuti: “Munthu ali-wentse omwe an’funa kunditewera, abzilambe yekha acinyamula muti wace wakuzunzidwira, ndipo apitirize kunditewera.” (Mat. 16:24) Mpsakupusa lini kutewera Jezu, koma kucita bzimwebzi ni cinthu ca nzeru na cakuthemera.

11. Kodi abale wa ku Tiro adalatiza tani kuti akhafuna Paulo?

¹¹ Pomwe padapita nthawe pang’ono, idafika nthawe yakuti Paulo, Luka pabodzi na winango wale apitirize ulendo bwawo. Bzomwe bzidacitika pomwe adanyamuka bzidakhala bzakutokonya mtima. Bzimwebzi bzimbalatiza lufoyi lomwe abale wa ku Tiro akhanalo kwa Paulo na thandizo lomwe akhalipereka kuti apitirize na utumiki bwace. Amuna, akazi pabodzi na wana adaperekeza Paulo mpaka ku gombe. Wentse adagodama acipemba ndipo pakumalizira adagonekana. Patsogolo pace, Paulo, Luka pabodzi na anzawo wale adapakira mu barko aciyenda mpaka ku Pitolomaida, kumweko adagumana na abale ndipo adakhala nawo ntsiku ibodzi. — Mab. 21:5-7.

12, 13. (a) Kodi n’ciyani cikulatiza kuti Filipi akhatumikira Mulungu mwakukhulupirika? (b) N’thangwe ranyi Filipi ni ciratizo cabwino kwa Akristau omwe ana wana ntsiku zino?

¹² Luka adalewa kuti, patsogolo pace, Paulo pabodzi na anzace adayenda ku Sezareya. Pomwe adafika kumweko, iwo ‘adapita m’nyumba mwa mpalizi Filipi.’a (Mab. 21:8) Bzikuwoneka kuti iwo adakomedwa kwene-kwene pomwe adawona Filipi. Pafupi-fupi magole 20 m’mbuyomo ku Jeruzalemu, iye akhadasankhulidwa na apostolo kuti athandizire pa kugawa cakudya mu gwere lacikristau lomwe likhadakhazikisidwa tsapanopa. Filipi akhadziwika kuti akhali mpalizi wanyongo kwa magole mazinji. Kumbukirani kuti, pomwe anyakupfunza adabalalika thangwe ra cizunzo, Filipi adayenda ku Samariya ndipo adayamba kupalizira kumweko. Na kupita kwa nthawe, iye adapalizira mwamuna wa ku Etiyopiya acimubatiza. (Mab. 6:2-6; 8:4-13, 26-38) Cimweci ni ciratizo cabwino ca kucita utumiki mwakukhulupirika!

¹³ Filipi akhalibe kusiya kucita nyongo mu utumiki. Tsapano iye akhakhala ku Sezareya ndipo akhatanganidwa na basa lakupalizira, ndipopa Luka adamucemera kuti “mpalizi.” Filipi akhana wana anai wacikazi omwe akhambalewa maprofesiya, bzomwe bzikulatiza kuti iwo adatewezera ciratizo ca pai wawo.b (Mab. 21:9) Bzimwebzi bzikulatiza kuti Filipi adacita nyongo yakulimbisa banja lace mwauzimu. Ntsiku zino, misolo ya mabanja imbacita bwino kwene-kwene kutewezera ciratizo ca Filipi, mwa kutsogolera mabanja yawo mu utumiki na kuthandiza wana wawo kufuna basa lakupalizira.

14. Kodi mpsiponi bzakutewera bza kuzungira abale komwe Paulo akhacita, ndipo ni mwayi uponi wakundendemerana omwe tinawo ntsiku zino?

¹⁴ Kuli-kwentse komwe akhayenda, Paulo akhanyang’ana abale ndipo akhakhala nawo pabodzi kwa kanthawe. Mwakusaya kupenukira, abale wa kumweko akhakomedwa kwene-kwene kutambira misiyonarioyu pabodzi na omwe akhamuperekeza. Ulendo bumwebu bukhathandiza kuti wentse ‘alimbikisane m’cikhulupiro.’ (Aro. 1:11, 12) Ntsiku zino, tinawombo mwayi ubodzi-bodziyu. Timbagumana bzisimbo bzizinji tikambatambira anyakunyang’anira dera pabodzi na akazawo m’mii mwathu, bziribe basa penu nyumbayo njing’ono ayai tiribe bzinthu bzizinji. — Aro. 12:13.

SEZAREYA LIKULU LA CIGAWO CA DJUDEYA

Pa nthawe yomwe nkhani zomwe zidanembedwa m’bukhu la Mabasa zikhacitika, mzinda wa Sezareya ukhali likulu la cigawo ca Djudeya, mtongi wa cigawo akhakhala mu mzindamu ndipo mukhanambo likulu la acikunda. Herode Mkulu, adamanga mzindayu ndipo adaupasa dzinali pakulemekeza Seza Agusto. Mu mzinda wa Sezareya mukhana bzinthu bzizinji bzomwe bzikhagumanika m’mizinda inango ya mu nthaweyo, ninga templo yakunamatira Seza, mbuto zakucitira teatro, mbuto zakucitira mpikisano wa makavalo na mbuto ikulu kwene-kwene yakucitira masenzeka yakusiyana-siyana. Wanthu azinji wa mu mzindamo akhali lini Adjuda.

Mzinda wa Sezareya ukhana litsito lakulimba na mbuto yakuimira naviyo. Herode akhafuna kuti mbuto yakuimisira naviyo ipsa yakucemeredwa Sebasto (dzinali m’Cigerego limbathandauza Agusto), ikhale na muro wakukhotcerera mbutoyo kuti ireke kudzongedwa na mabimbi. Bzimwebzi bzingadacitisa kuti naviyo zimbafike na kucoka mwakusaya kunesa. Herode akhafuna kuti mbuto ipsayi ipose mbuto ya ku Alexandriya yomwe ikhali likulu la malonda kumabvadzuwa kwa nyanza ya Mediteraniyo. Napo kuti mzinda wa Sezareya ulibe kuposa mzinda wa Alexandriya, tsono udabvekera pa dziko lentse thangwe rakuti ukhali pa mbuto yabwino kwene-kwene yomwe wanthu azinji omwe akhambacita malonda yawo akhambapita.

Mpalizi Filipi adapalizira mafala yabwino ku Sezareya, ndipo bzikuwoneka kuti kumweko iye adakhala na banja. (Mab. 8:40; 21:8, 9) Korneliyo omwe akhali kapitau wa acikunda waciroma, akhakhalambo mu mzinda umweyu ndipo ni komwe iye adatendeukira acikhala Mkristau. — Mab. 10:1.

Mpostolo Paulo adazungira Sezareya kazinji-kentse. Pomwe adandotikhaleni Mkristau, anyamadulanthaka wace adayang’ana njira kuti amuphe, mwakamkulumize anyakupfunza adatenga m’bale wawo mupsayu acifamba naye mtantho wa makilometro 90 kucokera ku Jeruzalemu mpaka ku Sezareya, kuti akapakire naviyo yakuyenda ku Tarso. Paulo adapita na ku mbuto yakuimisira naviyo ya ku Sezareya pomwe akhayenda ku Jeruzalemu kuphampha kwa ulendo bwace bwaciwiri na bwacitatu bwa umisiyonario. (Mab. 9:28-30; 18:21, 22; 21:7, 8) Iye adakhala m’kawoko kwa magole mawiri m’nyumba ya mambo Herode ku Sezareya. Kumweko iye adawonekera kwa Felisi, Festo na Agripa, patsogolo pace adacoka ku Sezareya aciyenda ku Roma. — Mab. 23:33-35; 24:27–25:4; 27:1.

KODI AKAZI WACIKRISTAU ANGAPFUNZISEMBO MAFALA YA MULUNGU?

Kodi akazi akhacita ciyani m’gwere lacikristau m’magole yakuyambirira? Kodi iwo akhapfunzisa mafala ya Mulungu?

Jezu adauza ateweri wace kuti ambapalizire mafala yabwino ya Umambo na kupfunzisa wanthu kuti akhale anyakupfunza wace. (Mat. 28:19, 20; Mab. 1:8) Lamulo limweri la kukhala apalizi wa mafala yabwino lidaperekedwa kwa Akristau wentse penu ni amuna, akazi, maswaka ayai atsikana. Umboni bwa bzimwebzi bumbagumanika pa Joweli 2:28, 29. Mpostolo Pedru adalatiza kuti profesiya imweyi idakwanirisidwa pa Pentekosite wa mu 33 EC, pomwe adalewa kuti: “Mulungu walewa kuti: ‘Mu ntsiku zakumalizira, inepano nin’dzatsanulira mzimu wangu kwa wanthu wa mitundu yentse, ndipo wana wanu wacimuna na wana wanu wacikazi an’dzalewa maprofesiya, maswaka pakati panu yan’dzawona masomphenya ndipo amuna akulu-akulu pakati panu an’dzalota. Ndipo mu ntsiku zimwezo, nin’dzatsanulirambo mzimu wangu kwa atumiki wangu wacimuna na wacikazi, ndipo iwo an’dzalewambo maprofesiya.’” (Mab. 2:17, 18) Ninga momwe tawonera mu msolo umweyu, mpalizi Filipi akhana wana anai wacikazi omwe akhambalewa maprofesiya. — Mab. 21:8, 9.

Tsono pa nkhani ya kupfunzisa mu gwere, Fala la Mulungu limbalewa kuti amuna wacikristau ndiwo an’funika kukhala anyakunyang’anira na atumiki wakuthandiza. (1 Tim. 3:1-13; Tito 1:5-9) Paulo adalewa kuti: “Ndikubvumiza lini kuti mkazi ambapfunzise ayai ambatonge mwamuna, koma ambapitirize kukhala adanyamala.” — 1 Tim. 2:12.

“Ndidakonzeka . . . Kufa” (Mabasa 21:10-14)

15, 16. Kodi ni mafala yaponi yomwe Agabo adalewa, ndipo yadatokonya tani wanthu omwe adayabva?

¹⁵ Pa nthawe yomwe Paulo akhali ku mui kwa Filipi, padafika mulendo munango wakulemekezeka dzina lace Agabo. Wanthu omwe akhadatsonkhana pa mui pa Filipi, akhadziwa kuti Agabo akhali mprofeta omwe adalewa bza njala ikulu yomwe idacitika mu nthawe ya utongi bwa Klaudiyo. (Mab. 11:27, 28) Pinango-pentse iwo akhabzibvunza kuti: ‘N’thangwe ranyi Agabo abwera kuno? Kodi abwera kudzalewa ciyani?’ Pomwe wanthu wentse akhanyang’anisisa Agabo, iye adatenga bande lomwe Paulo akhamangira m’ciuno mwace lomwe likhana mbuto yakukoyera kobiri na bzinthu bzinango. Tenepo, Agabo adatenga bandero acibzimanga minyendo na manja. Patsogolo pace adayamba kulewalewa. Bzomwe iye adalewabzo bzikhali bzakugopswa, iye adati: “Mzimu wakucena walewa kuti: ‘Mwenekaciro banderi an’dzamangidwa tenepayu na Adjuda mu Jeruzalemu, acidzam’pereka m’manja mwa wanthu wa mitundu.’” — Mab. 21:11.

¹⁶ Profesiyayi idatsimikizira kuti Paulo angadayenda ku Jeruzalemu. Ndipo idalatizambo kuti bzomwe angadakacita na Adjuda bzingadacitisa kuti aperekedwe “m’manja mwa wanthu wa mitundu.” Profesiyayi idatokonya kwene-kwene wanthu omwe akhali pa mbuto ire. Luka adanemba kuti: “Tsapano pomwe tidabva bzimwebzi, ifepano pabodzi na wale omwe akhali pamwepowo tidayamba kumudandaulira kuti aleke kuyenda ku Jeruzalemu. Tsono Pauloyo adatawira kuti: ‘Thangwe ranyi mukulira, thangwe ranyi mukuyeza kutepesa bzomwe ndatsimikiza kucita? Dziwani ibzi: Inepano ndidakonzeka kumangidwa ayai kufa mu Jeruzalemu thangwe ra dzina la Mbuya Jezu.’” — Mab. 21:12, 13.

17, 18. Kodi Paulo adalatiza tani kuti akhadatsimikiza kucita kufuna kwa Yahova, ndipo n’ciyani comwe abale adacita?

¹⁷ Kumbukirani bzomwe bzidacitika. Abale wale pabodzi na Luka, adadandaulira Paulo kuti aleke kuyenda ku Jeruzalemu, ndipo winango akhacita kulira. Pomwe Paulo adazindikira kuti abalewo akhamufuna ndipo akhacita naye thupo, mwakudeka mtima adalewa kuti iwo ‘akhayezera kumutepesa pa bzomwe akhadatsimikiza kucita.’ Napo bzikhali tenepo, iye adacita bzomwe akhadatsimikiza, ndipo pomwe adagumana na abale wa ku Tiro, iye alibe kubvuma kuti kudandaula na kulira kwawo kucinje makumbukidwe yace. M’mbuto mwace, Paulo adawafotokozera thangwe race akhafunika kupitiriza na ulendobo. Pamwepa Paulo adalatiza kukhwimika kukulu! Ninga momwe Jezu adacitira, Paulo akhadatsimikiza kuyenda ku Jeruzalemu. (Aheb. 12:2) Paulo akhafuna lini kufa, koma, bzingadakacitika, iye angadawona kuti ni mwayi ukulu kufa ninga mteweri wa Kristu Jezu.

¹⁸ Kodi n’ciyani comwe abalewo adacita pomwe Paulo adawauza bzimwebzi? Iwo adacita bzinthu mwa ulemu. Luka adanemba kuti: “Pakuti tiribe kukwanisa kumuletsa, tidasiya kumudandaulirako ticiti: ‘Kucitike kufuna kwa Yahova.’” (Mab. 21:14) Wanthu omwe adayezera kuletsa Paulo kuti aleke kuyenda ku Jeruzalemu, alibe kupitiriza kungingimira kuti bzinthu bzicitike ninga momwe iwo akhafunira. Iwo adatetekera Paulo na kubvuma kuti kufuna kwa Yahova kucitike, napo kuti bzikhali lini bzakupusa kwa iwo. Paulo adayamba ulendo bomwe budamufikisa pa kufa. Kwa Paulo, bzikhali bwino wanthu omwe akhamufuna wale angadaleka kuyezera kumuletsa.

19. Kodi ni nfundo iponi yakufunika yomwe tikupfunza na bzomwe bzidacitikira Paulo?

¹⁹ Tikupfunza nfundo yakufunika kwene-kwene na bzomwe bzidacitikira Paulo, tin’funika lini kutepesa wale omwe akucita nyongo yakucita bzizinji kuti atumikire Mulungu. Tingaphatise basa nfundo imweyi pa bzakucitika bzizinji, sikuti pa nkhani ya moyo na infa basi. Mwa ciratizo, napo kuti kwa abereki azinji bzimbakhala bzakunesa kuwona wana wawo akucoka pamui kuti akatumikire Yahova ku mbuto zakutali, koma iwo ambakhala wakutsimikiza kuleka kuwawofokesa. Phyllis, omwe ambakhala ku Inglaterra, ambakumbukira momwe adabvera pomwe mwana wace wacikazi omwe akhali m’bodziyo basi adayamba kutumikira ninga misiyonario ku África. Phyllis adalewa kuti: “Bzidanditokonya kwene-kwene mu mtima ndipo bzikhali bzakunesa kwa inepano thangwe ra kudziwa kuti ku África n’khutali kwene-kwene. Ndidasunama ndipo pa nthawe ibodzi-bodziyo ndikhakomedwa. Ndidaipempherera kwene-kwene nkhaniyi. Cakusankhula cikhali cace, ndipo ndiribe kuyezera kumutepesa. Inepano, nthawe zentse ndikhamupfunzisa kuikha Umambo bwa Mulungu pa mbuto yakuyamba. Mwana wangu akutumikira m’madziko yakunja kwa magole 30, ndipo inepano nimbatenda Yahova ntsiku zentse thangwe ra kumuthandiza kukhala wakukhulupirika.” Mpsabwino kwene-kwene tikambathandizira abale omwe ambasankhula moyo wakusaya kufuna bzinthu bzizinji kuti atumikire Yahova.

Bzithunzi-thunzi: Abereki na banja libodzi la amisiyonario. 1. Mwakukondwa abereki akuligari. 2. Banja likutambira chamada mwakukondwa pomwe likucita utumiki bwawo ku dziko linango. — Mpsabwino kumbalimbikisa abale na mpfumakazi zakubzipereka

“Abale Adatitambira Mwakukondwa” (Mabasa 21:15-17)

20, 21. Kodi n’ciyani cikulatiza kuti Paulo akhambafuna kukhala na abale wace, ndipo thangwe ranyi?

²⁰ Pomwe Paulo adamala kukonzekera, adayamba na ulendo. Abale winango wa ku Sezareya adamuperekeza, bzomwe bzikulatiza kuti akhamuthandizira na mtima wentse. Pa ulendo bwawo bwakuyenda ku Jeruzalemubo, Paulo na anzacewo akhanyang’ana abale na mpfumakazi za Cikristau pa mbuto iri-yentse yomwe akhaima. Mwa ciratizo, ku Tiro adagumana na anyakupfunza ndipo adakhala nawo pabodzi kwa ntsiku 7. Ku Pitolomaida, adamusana na abale ndipo adakhala nawo ntsiku ibodzi. Ndipo ku Sezareya, adamala ntsiku zakucepa pa mui pa Filipi. Patsogolo pace, abale winango wa ku Sezareya adaperekeza Paulo pabodzi na anzace wale mpaka ku Jeruzalemu, komwe wentse adakatambiridwa na Menasoni, m’bodzi mwa anyakupfunza wakale-kale. Luka adalewa kuti: “Pomwe tidafika ku Jeruzalemu, abale adatitambira mwakukondwa.” — Mab. 21:17.

²¹ Bzikuwonekeratu kuti Paulo akhambafuna kukhala pabodzi na abale na mpfumakazi. Mpostoloyu akhalimbikisidwa na abale, ninga momwe bzimbacitikirambo na ifepano ntsiku zino. Mwakusaya kupenukira, kulimbikisidwa kumweku kudathandiza Paulo kulimbana na anyakutsutsa waukali omwe akhafuna kumupha.

a Onani kwadru yakuti “Sezareya Likulu la Cigawo ca Djudeya.”

b Onani kwadru yakuti “Kodi Akazi Wacikristau Angapfunzisembo Mafala ya Mulungu?”