PFUNZIRO 57
Bzomwe Mungacite Mukacita Pikado Ikulu
Napo imwepo mumbafuna kwene-kwene Yahova ndipo mumbacita ciri-centse kuti muleke kumusunamisa, tsono nthawe zinango imwepo mungaphonye. Tsono pikado zinango zimbakhala zikulu kuposa zinango. (1 Akolinto 6:9, 10) Imwepo mukacita pikado ikulu, dziwani kuti Yahova an’dzaleka lini kukufunani, iye an’dzakulekererani na kukuthandizani.
1. Kodi tin’funika kucita ciyani kuti Yahova atilekerere?
Wale omwe ambafuna Yahova akacita pikado ikulu bzimbawawawa kwene-kwene. Tsono ambatsangalazidwa na mafala yomwe Yahova adauza wanthu wace yakuti: “Napo pikado zanu n’zifuira ninga mulopa, inepano nin’dzazicenesa ninga thonje.” (Zaiya 1:18) Ifepano tikakungula na mtima wentse, Yahova an’dzatilekerera. Kodi tingakungule tani? Mwa kukungula na mtima wathu wentse, kusiya kucita bzomwe mpsakuipa ticidandaulira Yahova kuti atilekerere. Patsogolo pace tin’funika kucita nyongo kuti ticinje makumbukidwe yakuipa ayai bzomwe bzidaticitisa kuti ticite pikadoyo, ticiyamba kuphatisa basa malamulo yakucena ya Yahova. — Werengani Zaiya 55:6, 7.
2. Kodi Yahova ambaphatisa tani basa akulu wa gwere tikacita pikado?
Yahova ambatiuza kuti tikacita pikado ikulu, “timbauze akulu wa m’gwere.” (Werengani Tiyago 5:14, 15.) Akulu amwewa ambafuna Yahova na wale omwe ambatumikira Yahovayo. Iwo ambapfunzisidwa momwe angatithandizire kuti tikhale pomwe pa uxamwali bwakulimba na Yahova. — Agalatiya 6:1.
Kodi akulu wa gwere ambatithandiza tani tikacita pikado ikulu? Akulu awiri ayai atatu ambaphatisira basa Bibliya kuti atithandize kuwona bzomwe taphonya. Iwo ambatipasa malango ndipo ambatiuza bzomwe tingacite kuti tileke kudzacita pomwe pikadoyo. Kuti akhotcerere gwere, akuluwo ambacosa munthu omwe wacita pikado ndipo walamba kukungula.
FUFUDZANI BZINANGO
Pfunzani kuti mudziwe momwe Yahova ambatithandizira tikacita pikado.
3. Kukungula kumbatithandiza kukhala pomwe pa uxamwali na Yahova
Pikado iri-yentse imbasunamisa Yahova, ndipopa tin’funika kumbamuuza bzomwe taphonyabzo. Werengani Salimo 32:1-5, ndipo mukamala cezeranani mbvunzo wakutewerayu:
Thangwe ranyi tin’funika kumbakungula pikado zathu kwa Yahova?
Tikauzambo akulu wa gwere kuti atithandize pambuyo pakuza Yahova pikado yomwe tacita, timbakhala wakutsangalazidwa. Onani VIDIYO, ndipo mukamala cezeranani mbvunzo wakutewerayu.
Mu vidiyoyi, kodi akulu wa gwere athandiza tani Canon kubwerera pomwe kwa Yahova?
Tikacita pikado tin’funika kuuza akulu wa gwere bzentse bzomwe bzaticitikira, thangwe iwo ambafuna kutithandiza. Werengani Tiyago 5:16, ndipo mukamala cezeranani mbvunzo wakutewerayu:
Thangwe ranyi kuuza akulu bzentse bzomwe tacita kumbacitisa kuti akuluwo atithandize mwakusaya kunesa?
Kungulani pikado yanu, mbauzani akulu wa gwere bzomwe mwacita ndipo mbabvumani lufoyi la Yahova
4. Yahova ambadekera mtima wale omwe acita pikado
Munthu omwe wacita pikado ikulu akalamba kuteweza malamulo ya Yahova, iye angacosedwe m’gwere. Ndipo akacosedwa tin’funika lini kucita naye tsantsa. Werengani 1 Akolinto 5:6, 11, ndipo mukamala cezeranani mbvunzo wakutewerayu:
Ninga fermento yomwe imbacitisa trigu kuti ifufume, kodi kubverana na munthu omwe wacita pikado ndipo walamba kukungula kungadzonge tani gwere?
Akulu ambatewezera kudeka mtima kwa Yahova. Ndipopa, iwo ambacita ciri-centse kuti anyangʼane na kuthandiza wale omwe adacosedwa mʼgwere. Wanthu azinji omwe ambacosedwa m’gwere, ambadzabwezeresedwa. Thangwe ranyi? Napo bzimbakhala bzakuwawa kucosedwa m’gwere, tsono kucosedwako kumbawathandiza kuzindikira kuipa kwa bzomwe akhadacita. — Salimo 141:5.
Kodi momwe Yahova ambacitira bzinthu na wale omwe ambacita pikado bzimbalatiza tani kuti iye mgwakulungama, wakudeka mtima na walufoyi?
5. Yahova ambatilekerera tikakungula
Jezu adaphatisira basa ciratizo kuti atithandize kubvesesa momwe Yahova ambabvera munthu akakungula. Werengani Luka 15:1-7, ndipo mukamala cezeranani mbvunzo wakutewerayu:
Kodi mafala ya m’mavesiya yakukupfunzisani ciyani pakulewa bza Yahova?
Werengani Ezekiyeli 33:11, ndipo mukamala cezeranani mbvunzo wakutewerayu:
Kodi munthu an’funika kucita ciyani kuti alatize kuti wakunguladi?
Yahova ambasamalira mabira yace ninga momwe makabusa ambacitira
WANTHU WINANGO AMBALEWA KUTI: “Ndikucita mantha kuuza akulu pikado yomwe ndacita, thangwe an’ndicosa m’gwere.”
Kodi mungathandize tani munthu omwe ana makumbukidwe yamweya?
KODI MWAPFUNZA CIYANI?
Tikacita pikado ikulu ticikungula na mtima wentse, ndipo ticileka kubwerezera pomwe pikadoyo, Yahova an’dzatilekerera.
Mibvunzo yakubwerezera
Thangwe ranyi tin’funika kumbakungula pikado zathu kwa Yahova?
Kodi tin’funika kucita ciyani kuti Yahova atilekerere pikado zathu?
Thangwe ranyi tikacita pikado ikulu tin’funika kumbauza akulu wa gwere?
ONANI POMWE IBZI
Onani momwe Yahova adalatizira ntsisi zomwe zimbafotokozedwa pa Zaiya 1:18 kwa mwamuna munango.
Kodi akulu ambayezera tani kuthandiza munthu omwe acita pikado ikulu?
Onani momwe lufoyi na kudeka mtima bzimbalatizidwira kwa omwe acita pikado ndipo alibe kukungula.
“Momwe Akulu Angathandizire Wale Omwe Adacosedwa Mʼgwere” (Ntsanza ya Mulindiri ya Agosto 2024)
Kuti muwone momwe Yahova adathandizira mwamuna munango kubwerera pomwe kwa iye, werengani nkhani ya moyo wangu ya msolo wakuti “Ndikhafuna Kubwerera kwa Yahova.”
“Bibliya Limbacinja Moyo wa Wanthu” (Ntsanza ya Mulindiri ya 1 Abril, 2012)