NKHANI YAKUPFUNZA 35
NYIMBO 123 Kubvera Mwakukhulupirika Mitemo ya Gulu la Mulungu
Momwe Akulu Angathandizire Wale Omwe Adacosedwa m’Gwere
“Kudzulu kun’dzakhala na cikondweso cikulu thangwe ra kukungula kwa munthu m’bodzi wa pikado, kuposa anyakulungama 99 omwe an’funikira lini kukungula.” — LUKA 15:7.
CAKULINGA CA NKHANIYI
Thangwe ranyi wanthu winango ambafunika kucosedwa m’gwere na momwe akulu angawathandizire kukungula kuti akhale pomwe pa uxamwali na Yahova.
1-2. (a) Kodi Yahova ambabva tani na wanthu omwe ambacita pikado zikulu-zikulu acileka kukungula? (b) Kodi Yahova ambafuna kuti wanthu omwe acita pikado acite ciyani?
YAHOVA ambalekerera lini makhalidwe yakuipa, iye ambawenga pikado. (Salimo 5:4-6) Iye ambafuna kuti ifepano tibvere mitemo yace yakulungama yomwe imbagumanika mu Fala lace, Bibliya. Tsono Yahova ambadziwa kuti ifepano ndife wakuperewera ndipo tingakwanise lini kuteweza malamulo yace mwakulungamiratu. (Salimo 130:3, 4) Pa nthawe ibodzi-bodziyo, iye ambalekerera lini wanthu wakuipa “omwe ambawona kudeka mtima kukulu kwa Mulungu wathu ninga thangwe lakucitira bzinthu bzakupasa manyazi.” (Djuda 4) Ndipopa Bibliya limbalewa kuti Mulungu ‘an’dzapfudza wanthu wakuipa’ pa nkhondo ya Armagedo. — 2 Pedru 3:7; Apokalipse 16:16.
2 Tsono, Yahova an’funa lini kuti munthu ali-wentse adzapfudzidwe. Ninga momwe tafotokozera kale mu nkhani za m’mbuyozi, Bibliya limbalatiza padeca kuti iye “an’funa kuti wanthu wentse akungule.” (2 Pedru 3:9) Akulu wa gwere ambatewezera Yahova akambathandiza mwakupirira munthu omwe wacita pikado kuti acinje makumbukidwe yace kuti akhale pomwe pa uxamwali na Yahova. Tsono nthawe zinango, munthu omwe wacita pikadoyo ambabvuma lini kucinja. (Zaiya 6:9) Wanthu winango omwe acita pikado ambapitiriza kucita bzinthu bzakuipa napo kuti akulu akuyezera kuwathandiza mwakubwereza-bwereza kuti akungule. Kodi n’ciyani comwe akulu an’funika kucita bzikakhala tenepo?
“COSANI MUNTHU WAKUIPAYO”
3. (a) Kodi Bibliya limbalewa kuti munthu omwe acita pikado omwe alibe kukungula an’funika kucitidwa ciyani? (b) Thangwe ranyi tingalewe kuti munthu omwe wacita pikado ambasankhula yekha kuti acosedwe m’gwere?
3 Munthu omwe wacita pikado akasaya kukungula, palibe cinthu cinango comwe akulu angacite kuposa kuteweza malango yomwe yambagumanika pa 1 Akolinto 5:13 yomwe yambati: “Cosani munthu wakuipayo pakati panu.” Munthu omwe wacita pikado akasaya kukungula, iye ambadziwa kuti an’cosedwa m’gwere. Tenepo, bziri ninga kuti iye wasankhula yekha kucosedwa m’gwere. Iye akubvuna bzomwe adabzala. (Agalatiya 6:7) Thangwe ranyi tikulewa tenepo? Thangwe rakuti iye alibe kubvuma kuthandizidwa na akulu pomwe iwo akhayezera kumuthandiza kuti akungule. (2 Amambo 17:12-15) Bzicito bzace bzikulatiza kuti iye akufuna lini kuteweza mitemo ya Yahova. — Deuteronomiyo 30:19, 20.
4. Thangwe ranyi munthu wakusaya kukungula akacosedwa m’gwere pambaperekedwa cidziwiso?
4 Munthu wakusaya kukungula akacosedwa, cidziwiso cimbaperekedwa ku gwere cakulewa kuti iye ni Mboni lini pomwe ya Yahova. Cidziwisoci cimbaperekedwa sikuti na cakulinga cakufuna kupasisa manyazi munthuyo. Ico cimbaperekedwa ku gwere kuti abale ateweze malango ya m’Bibliya yakuti ‘aleke kubverana’ na munthuyo, “ne kudya naye” munthu umweyo. (1 Akolinto 5:9-11) Thangwe ranyi Yahova adapereka malango yamweya? Mpostolo Paulo adanemba kuti: “Cakufufumisa cing’ono-ng’ono cimbafufumisa ufa bwentse bwakumunyidwa.” (1 Akolinto 5:6) Munthu wakusaya kukungula akasaya kucosedwa m’gwere wanthu winango angakumbuke kuti mpsakufunika lini kuti iwo abvere malamulo ya Yahova. — Mimwani 13:20; 1 Akolinto 15:33.
5. Kodi tin’funika kumuwona tani munthu omwe wacosedwa m’gwere, ndipo thangwe ranyi?
5 Tsono, kodi tin’funika kumuwona tani Mkristau omwe wacosedwa m’gwere? Napo kuti ifepano tingacite lini naye bzinthu, koma tin’funika kumuwona ninga bira wakutaika sikuti ninga munthu omwe angabwerere lini pomwe. Bira akataika acisiyana na mabira manango, iye angabwerere. Kumbukirani kuti munthu omwe wacosedwayo adabzipereka kwa Yahova. Tsono bzakupasa ntsisi mpsakuti iye alibe kuteweza bzomwe adapicira pomwe adabziperekapo ndipo bzimwebzi bzacitisa kuti moyo wace ukhale pa ngozi. (Ezekiyeli 18:31) Tsono pakuti Yahova akadapitiriza kulatiza ntsisi, ifepano tin’funika kukhala na cidikhiro cakuti munthuyo an’dzacinja. Kodi akulu wa gwere angalatize tani kuti ana cidikhiro cakuti munthuyo angacinje napo kuti wacosedwa m’gwere?
KODI AKULU AMBATHANDIZA TANI ANYAKUCOSEDWA?
6. Kodi akulu wa gwere an’dzacita ciyani kuti athandize munthu omwe wacosedwa m’gwere?
6 Munthu akacosedwa m’gwere, kodi akulu ambasiya kumuthandiza kuti iye abwerere kwa Yahova? Ne ndibzo lini! Komiti ya akulu ikauza munthu kuti an’cosedwa m’gwere, iyo imbamuuzambo bzomwe an’funika kucita kuti abwerere m’gwere. Tsono akulu ambacita pomwe bzinthu bzinango bzakuthumizirika. Iwo ambamuuza munthuyo kuti angadzafune kugumana naye pomwe pakapita minyezi kuti awone penu iye wacinja nzeru zace. Munthuyo akabvuma kudzawonana pomwe na akuluwo, iwo an’dzamuuza mwakudeka mtima kuti akungule na kubwerera m’gwere. Napo acisaya kucinja nzeru zace pa nthawe imweyo, akulu an’dzacita ciri-centse kuti adzagumane naye pomwe kutsogolo.
7. Kodi akulu wa gwere ambatewezera tani ntsisi za Yahova pomwe akucita bzinthu na munthu wakucosedwa? (Jeremiya 3:12)
7 Akulu ambacita nyongo kuti atewezere ntsisi za Yahova pomwe akucita bzinthu na munthu omwe wacosedwa m’gwere. Mwa ciratizo, Yahova alibe kudikhirira kuti Ajirayeri wakupanduka ayambe kulatiza kuti akufuna kucinja kuti awathandize. M’mbuto mwace, iye ndiye omwe adayamba kuwanyang’ana napo kuti iwo akhanati kulatiza kuti akufuna kukungula. Ninga momwe tidawonera mu nkhani yaciwiri ya mu revista ino, Yahova adapereka ciratizo kuti alatize ntsisi zace mwa kuuza mpolofeta Ozeya kuti abwererane na mkazace napo kuti mkaziyo akhapitiriza kucita bzinthu bzakuipa. (Ozeya 3:1; Malakiya 3:7) Mwakutewezera Yahova, akulu wa gwere ambafunisisa kuti munthu omwe wacita pikado abwerere m’gwere ndipo ambayezera lini kuphingiza kuti bzimwebzi bzitazike kucitika. — Werengani Jeremiya 3:12.
8. Kodi ciratizo ca Jezu cakulewa bza mwana wakutaika cimbalatiza tani kuti Yahova ngwa ntsisi? (Luka 15:7)
8 Kumbukirani bza ciratizo ca mwana wakutaika comwe cafotokozedwambo mu nkhani yaciwiri ya mu revista ino. Pomwe pai adawona mwana wace akubwerera ku mui, iye “adamuthamangira, acikamukumbatira na kumumpsompsona mwa lufoyi.” (Luka 15:20) Onani kuti paiyo alibe kudikhirira kuti mwana waceyo amukumbire kuti amulekerere. Iye ndiye omwe adayamba kumufenderera mwanayo ninga momwe pai ali-wentse wa lufoyi angadacitira. Akulu wa gwere ambacitambo nyongo kuti alatizembo khalidwe ninga limweri kwa wanthu wakucosedwa. Iwo akufuna kuti wanthu omwe adacosedwa ‘abwerere’ kwa Yahova. (Luka 15:22-24, 32) Pambakhala na cikondweso cikulu kudzulu na pantsi pano munthu omwe wacita pikado akabwerera! — Werengani Luka 15:7.
9. Kodi Yahova ambalimbikisa wanthu omwe acita pikado kuti acite ciyani?
9 Mpaka pano, tapfunza kuti Yahova ambalekerera lini kuti wanthu omwe alibe kukungula apitirize kukhala m’gwere. Napo bziri tenepo, iye ambayezera kuwathandiza. Iye akufuna kuti iwo abwerere kwa iye. Onani momwe Yahova ambabvera wanthu omwe acita pikado akakungula pa Ozeya 14:4. Vesiri limbati: “Nin’dzamalisa kusaya kukhulupirika kwawo. Nin’dzawalatiza lufoyi mwakufuna kwangu, thangwe ukali bwangu bwawacokera.” Thangwe ra kudziwa momwe Yahova ambabvera, akulu ambacita ciri-centse kuti awone penu munthu omwe wacita pikado ikulu akulatiza kuti wakungula. Ndipo mafala yamweya yambatsimikizirambo wentse omwe adasiya Yahova kuti iye ambawafuna ndipo akufuna kuti iwo abwerere.
10-11. Kodi akulu wa gwere ambayezera tani kuthandiza wanthu omwe adacosedwa kale-kale m’gwere?
10 Tsono tani pakulewa bza wanthu omwe adacosedwa ndipo amala magole mazinji ali kunja kwa gwere? Wanthu amwewa angakhale kuti akucita lini pomwe pikado yomwe idawacitisa kuti acosedwe. Ndipo winango angakumbukire lini thangwe lomwe lidawacitisa kuti acosedwe. Bziribe basa kukula kwa nthawe yomwe munthu wamala ali kunja kwa gwere, akulu an’dzacita ciri-centse kuti agumane munthuyo na kumuzungira. Pa kumuzungirapo, akuluwo an’dzapemba pabodzi na munthuyo acimukumbira kuti abwerere m’gwere. N’cadidi kuti munthu omwe wamala magole mazinji ali kunja kwa gwere angakhale wakuwofoka kwene-kwene mwauzimu. Tenepo, iye akalatiza kuti akufuna kubwerera m’gwere akulu an’dzacita makonzedwe yakuti acitisidwe pfunziro la Bibliya napo kuti akanati kubwezeresedwa. Akulu ndiwo omwe an’dzacita makonzedwe yakuti iye ayambe kupfunzisidwa Bibliya.
11 Akulu ambayezera kutewezera ntsisi zomwe Yahova ambalatiza kwa wanthu. Tenepo iwo ambanyang’ana wale omwe adasiya Yahova ndipo ambawalimbikisa kuti abwerere kwa iye. Munthu omwe wacita pikado akalatiza kuti wakungula ndipo wasiya makhalidwe yace yakuipa, iye angabwezeresedwe mwakusaya kucedwa. — 2 Akolinto 2:6-8.
12. (a) Kodi ni nthawe ziponi zomwe akulu wa gwere an’funika kucita mphole? (b) Thangwe ranyi tin’funika lini kukumbuka kuti wanthu winango mbakuthemera lini kubveredwa ntsisi na Yahova? (Onani mafala ya m’nyantsi.)
12 Nthawe zinango, akulu an’funika kucita mphole pomwe akanati kubwezeresa munthu m’gwere. Mwa ciratizo, penu bzikuwoneka kuti munthuyo adapswitha mwana ayai akhali mpanduki ayai adacita ciri-centse kuti amalise malowozi yace, akulu an’funika kutsimikizira penu wakunguladi bzacadidi. (Malakiya 2:14; 2 Timotio 3:6) Iwo an’funika kukhotcerera abale na mpfumakazi m’gwere. Pa nthawe ibodzi-bodziyo, tin’funikambo kubvesesa kuti Yahova an’dzalekerera munthu ali-wentse omwe wacita pikado akakhala iye wakungula bzacadidi ndipo wasiya makhalidwe yace yakuipa. Na tenepo, napo kuti akulu an’funika kucita mphole na wanthu omwe adacita bzinthu mwacinyengo na anzawo, iwo an’funika lini kukumbuka kuti wanthu winango omwe adacita pikado angabveredwe lini ntsisi na Yahova.a — 1 Pedru 2:10.
N’CIYANI COMWE GWERE LINGACITE?
13. Kodi n’kusiyana kuponi komwe kulipo pakati pa momwe tingacitire bzinthu na munthu omwe watsimulidwa na ule omwe wacosedwa m’gwere?
13 Ninga momwe bzidafotokozedwera mu nkhani yapitayi, nthawe zinango tingabve cidziwiso cakuti munthu watsimulidwa. Bzimwebzi bzikacitika, ifepano tingapitirize kucita naye bzinthu munthuyo, thangwe rakuti iye wakungula ndipo wasiya makhalidwe yace yakuipa. (1 Timotio 5:20) Iye akadacita mbali ya gwere ndipo an’funika kulimbikisidwa na abale na mpfumakazi kuti acite bzinthu bzabwino. (Ahebereu 10:24, 25) Tsono mpsakusiyana na munthu omwe wacosedwa m’gwere. Ifepano timbasiya “kubverana” na munthuyo ndipo timbasiyambo “kudya naye.” — 1 Akolinto 5:11.
14. Kodi Akristau angaphatise tani basa cikumbu-mtima cawo cakupfunzisidwa bwino na Bibliya pomwe akucita bzinthu na wanthu wacosedwa? (Onani cithunzi-thunzi.)
14 Kodi bzimwebzi bzikuthandauza kuti ifepano tingacemere lini munthu wakucosedwa kuti abwere ku mitsonkhano ayai kumumusa pomwe abwera ku mitsonkhano? Ne ndibzo lini. Bzomwe bzikuletsedwa ni kucita bzinthu na munthuyo. Koma Mkristau ali-wentse angaphatise basa cikumbu-mtima cace cakupfunzisidwa na Bibliya kuti awone penu angacemere munthu omwe wacosedwa m’gwere omwe ni famidya yace ayai munthu omwe akhali xamwali wace pomwe akhanati kucosedwa kuti agumanike pa mitsonkhano. Tsono n’ciyani comwe tingacite iye akabwera? Kale-kale ifepano tikhamumusa lini munthuyo. Pamwepa Mkristau ali-wentse an’dzaphatisa basa pomwe cikumbu-mtima cace cakupfunzisidwa na Bibliya. Winango angawone kuti bziri bwino kumusa munthuyo ayai kumutambira pa mitsonkhano. Tsono tingamale lini nthawe ikulu tikuceza na munthuyo ayai kucita naye bzinthu.
Akristau an’funika kuphatisa basa cikumbu-mtima cawo cakupfunzisidwa bwino na Bibliya kuti awone penu angacemere munthu omwe adacosedwa m’gwere kuti abwere ku mitsonkhano nakuti angamumuse munthuyo akabwera ku mitsonkhanoko (Onani ndime 14)
15. Kodi ni anyapikado aponi omwe ambafotokozedwa pa 2 Juwau 9-11? (Onani kwadru yakuti: “Kodi Juwau na Paulo Akhalewa bza Pikado Ibodzi-bodzi?”)
15 Tsono pinango winango angabvunze kuti: ‘Kodi Bibliya limbalewa lini kuti Mkristau omwe an’musa munthu umweyu akugawana naye mabasa yace yakuipa?’ (Werengani 2 Juwau 9-11.) Tikawona bwino-bwino mavesiya timbakwanisa kubvesesa kuti malangoya yambalewa bza apanduki na wanthu winango omwe ambalimbikisa makhalidwe yakuipa. (Apokalipse 2:20) Tenepo penu munthu akupfunzisa bzinthu bzakunama ayai akulimbikisa wanthu kuti acite bzinthu bzakuipa, akulu wa gwere angacite lini makonzedwe yakuti amuzungire. N’cadidi kuti pinango kutsogolo, iye angadzacinje nzeru zace. Tsono pomwe bzimwebzi bzikanati kucitika, ifepano tingamumuse lini munthu umweyo ayai kumucemera kuti abwere ku mitsonkhano yathu ya gwere.
KUTEWEZERA NTSISI ZA YAHOVA
16-17. (a) Kodi Yahova akufuna kuti wanthu omwe acita pikado acite ciyani? (Ezekiyeli 18:32) (b) Kodi akulu wa gwere angalatize tani kuti akuphata basa pabodzi na Yahova?
16 Kodi tapfunza ciyani mu nkhani zixanu za mu revista ino zomwe zina nfundo zakundendemerana? Tapfunza kuti Yahova an’funa lini kuti munthu ali-wentse adzapfudzidwe! (Werengani Ezekiyeli 18:32.) Iye akufuna kuti wanthu omwe acita pikado akukungule acibwerera kwa iye. (2 Akolinto 5:20) Ndipopa kuyambira kale-kale mwakubwereza-bwereza Yahova akhacenjeza wanthu wace omwe akhamupandukira pabodzi na wanthu winango wakupanduka kuti akungule acibwerera kwa iye. Akulu wa gwere ana mwayi wakuphata basa pabodzi na Yahova kuti athandize wanthu omwe acita pikado kuti akungule. — Aroma 2:4; 1 Akolinto 3:9.
17 Kudzulu kumbakhala na cikondweso cikulu kwene-kwene munthu omwe wacita pikado akakungula! Maka-maka Baba wathu Yahova ambakomedwa kwene-kwene akawona mtumiki wace omwe akhadasiya kumutumikira akubwerera mu gwere. Lufoyi lathu kwa Yahova likupitiriza kukula pomwe tikukumbukira bza ntsisi na kudeka mtima kwace kukulu. — Luka 1:78.
NYIMBO 111 Bzomwe Bzimbatikondwesa
a Bibliya limbalewa kuti pana wanthu winango omwe pikado zawo zingalekereredwe lini. Wanthu amwewa mbale omwe ambasankhula kutsutsana na Mulungu ndipo ambacinja lini. Yahova na Jezu ndiwo omwe adathemera kulewa penu munthu angathemere lini kulekereredwa. — Marko 3:29; Ahebereu 10:26, 27.